|
أطالب بمحاكمة بكرى أبوبكر
|
كنت مرتاح، بدخل النت وقت ما أنا عايز، أجك الميلات وأقرى لي شوية أخبار وأتخارج ومن يوم ما عرفتة البورد اللذيذ ده والمسائل باظت. دى عملية تعملة فينا يابكرى؟ تلمنا مع المبدعين والأحباء من وطننا العزيز وتخلينا ندمن بالطريقة دى؟ يابورداب، لقد ارتكب بكرى فى حقناألذ جريمة في التاريخ ولابد أن يعاقب، على الأقل، بتلتين تبشيرة و خمسين حضنة وكم كرتونة تحايا أنا أعلم تماما أن كل هذا ليس بالجديد عليكم ولكنى فقط أردت أن أعبر عما أحس به تجاه هذه الأسرة وكما تقول زوجتى، البورد بقا لى زى الضرة ـ بضم الضادـ لأنو لو هى ردت على التلفون، أنا بجرى بخش البورد! لو قبلت كدة،ترجع تلقانى لاصق في البورد....ولو ماعرف شنو، أنا توووووش جوة البورد لكن أعمل شنو؟ بالرغم من أنى ولا شاعر ولا ولا أديب ولا فنان ولا يحزنون، لكن مجرد سودانى مشتاق لكل ما سبق من المبدعين وللونسة الخفيفة والظريفة وبالمناسبة، أود أن أدعو كل الأخوان الزوار لهذا المنبر بأن لا يترددوا فى الاٍنضمام اٍليه. أفادنى بعض الأصدقاء بأن السبب فى ذلك هو عدم قدرتهم على الكتابة بنفس مستوى الأدباء والمبدعين في هذا الدار. وأد أن أنتهز هذه الفرصة وأطلب منكم ترك هذا التردد والاٍنضمام اٍلى هذا الوطن الاٍلكترونى والذى اٍبتلانا به بكرى وما أحلاه من بلوة. ولا شنو يا بورداب؟ ولكن وقبل اٍنضمامكم أنصحكم بأخذ الجرعة المضاضة من دواء ال Antiboardatine وعلى فكرة كات لقيتوهو رسلو لينا منو كان كرتونة كان كرتونتين ويا بكرى بابكر، كان راجل، طالعنى عشان أديك حضنة ما أداك ليها زول قبل كده!!
|
|
|
|
|
|
|
|
Re: أطالب بمحاكمة بكرى أبوبكر (Re: wadazza)
|
بكرى أبوبكر
أصبح أهم من شاى الصباح وقهوة ضل الضحى وفطور فول أبوالعباس والصبحية وشاى العصر وغداء حمام محمر وشاى المغرب وجلسة عمود النور فى ام درمان سنة سبعين وسينما لوج دور تانى وقعدة الجنودل تتبعها حفلة كاربة وشروق الشمس على النيل
بكرى حكاية تانية خالص
| |
|
|
|
|
|
|
Re: أطالب بمحاكمة بكرى أبوبكر (Re: Maged)
|
العزيز ماجد تحية طيبة البورد ده بقى متنفس لكل السودانيين فى الغربة وفى الوطن عشان كده عايزين نشوف ليه اسم علمى المرض العجيب ده ادمان البرود bordyaasis adiktism boaardmania bukriboaardosis وما عنده علاج هنا فى اليمن ذى السارس الواحد اذا ما اتمسى بيه واتصبح بيه يجيه صداع وحمى وفى حلات حادة نرفزة ويشاكل ضلو وامراض سرية اخرى نعجز عن ذكرها هنا....تصور هسع انا بكتب ليك الكلام ده وانا فاتح البورد مرتين عشان اسمع من بوست ود عازة هجرة عصافير الخريف ..الله يجازى ود عزةبعصافير الخريف دى وبعدين مفاجات الموصلى والاغانى والناس الظريفة ذى سجيمان خلاص يا زول ان تهت فا الا شواق وما برجع وهسع لاحريك ولا دريك ولا بسمع تششششششششششششششششششششششششششش
| |
|
|
|
|
|
|
Re: أطالب بمحاكمة بكرى أبوبكر (Re: adil amin)
|
عزيزى عادل: ال bordyaasis adiktism منشقة من الاتينى bordidiosis وقت أكتشفت بعد أن عمت فجأة حالة ال bukriboardosis والتي سميت علي أحد المبدعين السودانيين والذي وبعد اٍصابته بال boardmania نقل عدواها اٍلى بقية البورداب
| |
|
|
|
|
|
|
Re: أطالب بمحاكمة بكرى أبوبكر (Re: بكرى ابوبكر)
|
محكمة عسكرية و لا عدالة ناجزة ؟؟؟؟؟؟؟؟
و الله يا باشمهندس بقيت أباري فيك محل ما تمشى اليومين ديل
لأنو عارف أي بوست تدخل فيهو بترمي ليك فيه أغنية و تمشى.
ذكرتني واحـد إسمو كباية أها يا ناس أم درمان بتعرفوا كباية دا ؟؟
كباية دا واحد كان عندوا عجلة فيها مليون نور و كمان مسجل و شغال
أربعة و عشرين ساعة و كان كتير بجي ماشى في شارع العرضة .
| |
|
|
|
|
|
|
Re: أطالب بمحاكمة بكرى أبوبكر (Re: ABUHUSSEIN)
|
وانتو فيها انا من يوم ما خشيت المنبر دا وبقيت اكره الشغل البتعارض معاهو وبقيت اقعد قدام الشاشة اكتر مما بتقعد اجمل وافرغ فتاة في العالم قدام المراية وبقيت عزيز الدايرني يجيني يا بكري منك لله
| |
|
|
|
|
|
|
Re: أطالب بمحاكمة بكرى أبوبكر (Re: بكرى ابوبكر)
|
ياشباب بكرى مستعد للمحاكمة. هل هناك أى اٍقتراحات عن الأحكام؟ أنا سخصيا أحكم عليك ـ يارائع ـ بأن تواصل هذا الجهد الجميل وأن تخلى بالك مننا لأنو اٍحنا أصبحنا زى أولادك يا أبونا الاٍلكترونى اٍنتا ....... اٍديك العافية يارجل أنت وبقية أسرة البوراداب
ماجد
| |
|
|
|
|
|
|
Re: أطالب بمحاكمة بكرى أبوبكر (Re: Maged)
|
والله تقول بكري ده عامل لينا عمل عديييل
البشرب من موية البورد ما بيقدر يفارقة... الواحد يعلن اعتزاله و الناس تودعه .. وبعد يومين يجيك راجع تاني
واحد تلقاهو بيكتب و مافي زول معبره.. وبرضو ما قادر يبطل ومصر يكتب
واحد يفصلوه مرة واحدة... وبعد كم يوم يقدم استرحام عشان يرجعوه التقول قطعوا منو الموية و النور.
ربنا يخليك لينا يا باش مهندس
| |
|
|
|
|
|
|
Re: أطالب بمحاكمة بكرى أبوبكر (Re: manj)
|
والله يا ماجد معاك حق انا شخصيا النت عندي معناهو البورد
بعدين انت عارف لو اي واحد مدمن للبورد خش وعلق هنا البوست دا حيكمل الباندويدث بتاعة بكري وتاني الاتشوفو ليكم مصحة تعالجكم من اعراض الادمان تسلم يا بكري يا
سوداني يا اصيل
| |
|
|
|
|
|
|
Re: أطالب بمحاكمة بكرى أبوبكر (Re: Maged)
|
السلام عليكم ورحمة الله وبركاته
حقيقه هذا البورد جميل للغايه ولا يمتلك الواحد الا يقعد امام الجهاز بالساعات الطوال تقريبا قول ادمان وبالمناسبه الادمان ما للكبار عندنا هنا فى البيت ادمنوه الصغار قبل الكبار واولهم السفير الذى نسى كل الواجبات والالتزامات امام هذا الانجاز الرائع تسلم يا بكرى وربنا يديك العافيه بعدين الكروت الظريفه دى قاعد تجيبها من ياتو موقع ربنا يديك العافيه ويا جماعه لو عاوزين تحاكموا بكرى اتنمى ان تكون البلاغ امامى للنظر عشان احاكمه انا لوووووووول ياربى بقدر ولا بعتذر عن نظر البلاغ
لكم تحياتى والقومه ليك يا وطن
ام الاء
| |
|
|
|
|
|
|
Re: أطالب بمحاكمة بكرى أبوبكر (Re: Maged)
|
بسم الله الرحمن الرحيم
المحبوب / ماجد سلام وإحترام يا ماجد
أنا ما حا أتكلم عن عمايل بكري والهملة الهملنا ليها أنا حا اتكلم عنك إنت ياخي إنت مقلل من رقبتك مالك؟؟؟ أنا شخصياً أعجبت شديد بالطريقة التي طرحت بيها الموضوع ومن خلال حروفك لمست فيك فنان عديل كدا ...أكتب وأكتب وأكتب وواصل هذه الروائع
| |
|
|
|
|
|
|
Re: أطالب بمحاكمة بكرى أبوبكر (Re: بدرالدين شنا)
|
الغزيز بدرالدين أولا شكرا على لطفك وظرفك ثانيا، شكرا على ظرفك ولطفك ثالثا، أرجع اٍلى أولا وثانيا أمثالك يابدر هم الذين جعلونا ندمن هذا البورد شكرا على رفع معنوياتى ولكن أكتافى بدأت تؤلمنى لأن راسى كبر شدييييييييييد.... ولك كل الود ماجد
| |
|
|
|
|
|
|
Re: أطالب بمحاكمة بكرى أبوبكر (Re: Maged)
|
شكرا ليك يا ماجد ناس المكتب سمونى سودانيزاونلاين وشكرا لى لقائد جمهوريه البوردالديمقراطيه بكرى ابوبكر والعقوبه حب مدى الحياءمن البورداب واشغال شغاله تقدير واحترام وسلام واخاء بين الجميع ودعقاب
| |
|
|
|
|
|
|
Re: أطالب بمحاكمة بكرى أبوبكر (Re: Maged)
|
والله بكري دا بذكرني سياسي سوداني مختلف عن كل السياسيين السودانيين
كان همه خدمة الناس لا طلب المجد والمال والشهرة
كان حليما طيبا واسع الصدر
وكان يخدم الناس دون سابق معرفة ودون سؤال عن لونك الحزبي
مثل هؤلاء قليل جدا في الدنيا وفي السودان بالذات
ندعو لهم بكل خير وجميل ولن ينسى الناس افضالهم وخدماتهم
وربنا يوفق بكري ويجزيه خير الدارين
ويوفقنا نتعلم الاستفادة المثلى من هذا الديوان المفتوح في بيت هذا العمدة الفاضل، نتعلم فيه ادب الحوار وخلق السودان، ونتعلم فيه من بعضنا، ونتعرف فيه على بعضنا لقوله تعالى "لتعارفوا" ونتعلم فيه احترام الاختلاف واحترام الآخر واحترام الرأي الآخر ونستمتع فيه بالصحبة الجميلة مع المبدعين، والفنانين، والكتاب والادباء والشعراء، والناس العاديين الحلوين البسيطين
بكري دا زعيم طائفة ضخمة، والمحيرني لماذا يرتاد بعض الناس ديوانه وهم يكرهون كل من تجتمع حوله طائفة من المحبين؟؟ لماذا، تناقض مع الذات؟ ربنا يهدينا جميعا للخلق السوداني النيل الاصيل
ولك ولبكري الود والتحية
| |
|
|
|
|
|
|
Re: أطالب بمحاكمة بكرى أبوبكر (Re: haneena)
|
الأخ العزيز بكري أبوبكر ... الأخوان الأعزاء لقد تطرق الأخ ماج حقاً لأحمل وأحلى شئ في حياتنا وهو هذا البورد .. الذي جمعنا في وطن واحد .. وجعل المحبة والإلفة بيننا .. فعلاً منذ دخولنا البورد وتغيرت حياتنا ... واصبح البورد أهم شئ ندخل فيه عند تشغيل النت .. وأنا أكتب الآن والله جاني ولد من جيرانا يعني مسافة 500م بيقولي أهلي قالوا ليكم ردوا التلفون لينانصف ساعة بنحاول معاكم... هذه واحدة . أما عن حكاية الزوجة فأخذت موقف منذ دخولنا البودر قالت لي كان كدى كا أخير ناس حزب الأمةكنت بتدخل تتاوق للأخبار وترجع .. دا شنو السمرك على طول .. أديتها فكرة قلت ليها تعالي في الإجازة قدم طلب وأدخلي معانا .. عشان أرتاح من الكلام دا .. قالت كلام السياسة أنت عارف أنه ما بعجني قلت ليها واللخ كان دخلتي البورد كل شئ يعجبك دا السودان بحاله أنت قايلاه سياسة .. غايتو اليومين دي بمرن فيها بالإطلاع على الرسائل.. أخي العزيز بكري أبوبكر .. أنا أول المرافعين عنك .. في محاكمة الوطن الخالد البورد .. لك من كل التحية والتقدير .. فقد قمت بعمل عظيم لميت شلم السودانيين الماقدر أي حزب أو جهة لمها منذ من طويل .. وأمنى أن ننتهز هذا البوست من أجل : أن نكون أخوان أعزاء أحباب مهما اختفنا في رأي أو اختلف ألواننا السياسية فنحن أبناء بل واحد .. أن نحاول التجاوز عن هفوات بعضنا إن حدثت وأتمنى أن لا تحدث. أن نحترم بعضنا البعض وأن تكون حرية الراي والديمقراطية في سلوكنا في هذا البورد لا نحجر رأي ولا نستأصل حدمهما كان طالما يلتزم باحترام الآخرين. أن عمل سوياً بفكرنا وكلمتنا من أجل الخروج بوطننا الغالي إلى بر الأمان في هذه الظروف الحانكة والمأساوية التي يعيشها شعبنا .. فلنتضامن جميعاً من أجل ذلك . واخيراً ليس بآخر لكم مني كل التحايا والتقدير أخوان وأخوات أعزاء
| |
|
|
|
|
|
|
Re: أطالب بمحاكمة بكرى أبوبكر (Re: فيصل النعيمه)
|
العزيز فيصل والله ما قصرتة تب ومافى اٍتنين ممكن اٍختلفو معاك فى القلتو. ...نعم يجب أن ننتهذ هذه الفرصة لنقرب من بعضنا البعض فنحن وفى الآخر هدفنا واحد وهو سوداننا الحبيب وعلى فكرة أنا عملت زيك مع زوجتى وبعد داك زريتة ليك كم مرة جوة البورد المسائل بعد كدة حا تجيب ليها غيرة يابكرى
| |
|
|
|
|
|
|
|