كتب الكاتب الفاتح جبرا المتوفرة بمعرض الدوحة
|
|
 زغاريــد في القصـر الجمهوري
|
اول الحكي
الاسم الكامل انسان
الشعب الطيب والدي
المهنة مناضل بتعلم
تلميذ في مدرسة الشعب
المدرسة فاتحه على الشارع
والشارع فاتح في القلب
والقلب مساكن شعبيه
وديني محل ماتوديني
الكلام لسيد الناس/محجوب شريف
_____________________
محادثــة مع سكان القصر تغير
خارطة الحكم عندنا
_
مع انهم حذروني بالف سيف وقنبلة ان لا اجيب سيرة الملعونه السياسة .. الا ان حجتي ستكون انتم .. ساقول ساعتها انكم من حرضتموني ..وساحرد ساعتها العشا ولن اشرب مويه او اي عصير ان اقتادني رجال (الامن) بسيارة (كابرس) مكييفه الى مكاتبهم ..
وساعتها سارفض ان اتكلم الا بوجود (محامي) او الادلاء باي اقوال وساتمسك بحقوقي حينما يتلوها على (المدعى) العام .. وان هاجمني (المحقق) او حاول ان ينهرني .. سوف اطلب منه ان يراعي الادب ويراعي حقوق المواطنه التي كفلها لي الدستور . والا فانني سوف ارفع عليه دعوة اطالب فيها برد كرامتي .. ساحرد العشا ان تاخر (المحقق) في الاسراع في بدء التحقيق معي .. وسابكي (مجعرة) جعيرا شديدا ، حتى يحن على (المحقق) ويرسل كل جرسونات مطاعم الفنادق ذو البذات الناعمه ، ان يأتوني بعصير ليمون بارد وان لم يتوقف جعيري ، سوف تزداد تحانيسهم ويتصلون بالرئيس ، وسيتكلم معي السيد الرئيس .. وجعيري لا يتوقف ابدا اذ انني مخاصماهو ..
وسيمسك منه السماعة النائب الثاني ، وعند سماعي لصوت هذاا (الغتيت) سوف يزداد جعيري .. اذ ان نفسي مقفوله منه ، وسيناول السماعة الى وزير شئون الرئاسه ، ورأسي يهتز يسرة ويمنة ان لا احادثهم ..
حتى يكلمني المسشار الاول لشئون السلام وساعتها سيهدأ بالي شوية وسوف اشيل شفطه شوية من الليمون البااارد الذي جابوه لي من بوفيه السيد رئيس الجمهوريه .
ومع ذلك كله ساحاول ما امكن ان اكون هادئة ، واتكلم على سجيتي واقول لهم انكم (خاتين) على الشعب الطيب داك الذي يجاور النيل ،ويراعي حقوق جيرة ارض بمساحة مليون ميل مربع .. أبدا لم يزعلها ، شوف شوف حتى انه من شدة حياؤه خاف ان يدنس رحمها (بفلاحتها) ففضل ان يطفش منها بدلا ان يرويها بالدماء . وقلع اشجارها ونيمها .ورملتها.
يا ناس يا(خاتين) انتو .. ليه الختأ دا ؟؟ فيها ايه لو خليتوني اتكلم ولا خليتوا الناس تتكلم ؟؟
ومع ذلك كله .. تغيظني جدا جولات السلام ومحادثاتها وتصيبني بهستيريا وارتكاريا مزمنة ..
واتساءل كيف يمكن لاشخاص ان يستحملوا هذه الدردرة امشي وتعال .. ؟؟ نحن عايزن كده وانت عايزين كده
وكثيرا جدا ماتساءلت في ماذا تقضون اوقاتكم وانتم تسكنون نفس الفندق ، وتجلسون في نفس الكراسي .. اظنكم تطلبون كثيرا جدا من الشاي ، والقهوة . وتعفرون الصالة بكثرة استهلاككم للفائف التبغ ..
وفود تتغير بعد ان تحفظ بنود الاشكاليات ومناطق التماس ..وصيغ التصريحات الاعلاميه .. ويمضي الوقت ويتغير الوفد كامل .. وتتغير تبعا لذلك نفسيات المفاوضين .. وتستجد اشكاليات جديده .. وتدخل اطراف اخرى .. اكثر تمسكا .. وتتغير حكومات الوسطاء ويبقى المشكل هو هو ..
يا جماعة وحات نظري ان المسألة برمتها ابسط من بسيطه ..
.....
كالعادة ، استحملونا
للهترشه بقـــيه
|
|
 
|
|
|
|
|
|
|
|
Re: زغاريــد في القصـر الجمهوري (Re: shiry)
|
الحظ يمنح شيري بت ام شيري
الفرصة بقيادة محاثات السلام
_
ياجماعة النبي فوقكم لو ماخليتوني اقود ليكم مفاوضات السلام دي وشوفوني لو جبت ليكم حل للمشكل دا ونرتاح من مشاكوس وايقاد ومبادرات
ماذا ستخسرون .. الم يكن مبارك والقزافي واحدا ممن جرب حظه
الم تجربوا الرئيس الامريكي
الم تعطوا فرصة لزايد بن سلطان
اشمعنا انا لع ..؟؟
المسالة عباطه ولا شييء تاني ..
؟؟
انا قررت وخلاص الرسول فيكم ولو واحد فيكم فتح خشموا
خلاص ياعم البشير
خلاص ياعم قرنق
خلاص ياعم الميرغني
خلاص ياعم الصادق
خلاص يااعمامنا الديناصورات
ساعلن من دربنا دا ونحن ماشين المطار .. وخلى جماعتكم يا ناس المعارضه يلحقونا في اصلي جاتني عقدة من مشاكوس ونيروبي ديل .. نحن احسن نختار جبال الاماتونج ومع اني ماشفتها ، لكن اهو اخير شوية من بلاد النحس ديلك
وفي اقل من ساعات وصلت كل الوفود الى قمة الاماتونج .. ورصت الكراسي والطاولات . وترامس الشاي والكركدي
مع ملاحظة ان المعارضه هنا تعني
كل المعارضين لحكم الانقاذ
شمالييين جنوبيين /غربييين /شرقييين
يللااا ياشباب . جيبوا ورقكم وتعالوا الاجتماع بدأ
بسم الله الرحمن الرحميم .. نبدأ ..
ياجماعة بالله من فضلكم انا هنا مسئولة الجلسة هنا ونبدأ بوفد المعارضه
- ورونا الحاصل شنو
- الحكومة : والله الجماعة ديل نحن زعلانيين منهم كتير بالحيل
- المعارضه : خير ياناس الحكومه مالكم نحن الزعلانيين ولا انتو
- شيري : انتو ولا هم : خلاص اليوم دا ، ايه حاجات لازم ندفنها هنا ونقوم نخليها ورانا
- المعارضة : الحكومة .. عداك العيب يا شيري موافقين تب
- الحكومة : والله نحن عايزين الناس ديل يوقفوا الكسير والضرب
- المعارضة : نحن ماعندنا مانع بس لازم (تتفرتك) الحكومة من اول وجديد
- الحكومه : قلت كده .. ونحن ماعندنا مانع .. بس ماعايزين بكره تجوا تقولوا لينا محاكمة ولا كلام فارغ عفى الله عما سلف .. عايزين ديه ندفعها ليكم .
- المعارضه : ديه شنو يا ناس ، نحن اهل . عيب الكلام دا
- شيري : ياجماعة المسالة ابسط من بسيطه اها شفتوا ، نحن اتفقنا .. تاني شنو المزعلكم من بعض ياجماعة
- الحكومه : والله المزعلنا كيت وكيت وكيت وكيت
- المعارضه : والله نحن المزعلنا منكم كذا وكذا وكذا
- الحكومه : طيب انتو ياجماعة ماتعملوا الحاجات البتزعلنا تاني
- المعارضة : وانتو برضوا ماتعملوا الحاجات التزعلنا منكم
- الحكومه : نحن من دربنا دا . اديناكم اي حاجة عايزنها
- المعارضه : اها نحن من دربنا راجعين معاكم في طياره واحده . وبكره نبدأ صفحة جديده في الخرطوم
- الحكومه : ليه بكره البعيده ديك . من هسع دا . نحن بدينا الصفحة الجديده .
- سلام .. سلام سلام .. سلام ... زغرودة واحدة ، زغرودة تانيه اكبر ، رابعة مجلجله ..
- وقع وقع وقع وقع وقع .. لم الورق ، لملمك ، لململك . شيل يا ولد الاوراق دي ختها هناااااك
- جيب الصور . صورك ، صورك . .ابتسم ، ابتسمنا ،
- الوا اتعشوا معانا
- والله بنمشي نتعشي في البيت الاولاد بنتظرونا
- حرم لازم نتعشي سوا
- والله
- على بالطلاق
- يازول نادي الناس البرا ديل يجوا يتعشوا معانا
-يا زول ماممكن
- لا والله ممكن
- فيها شنو لو اتعشوا معانا
- لا خليهو يحرسوا العربات بره
- يازول البلد امان مافي زول بسرق حاجة هنا
- نادي السواقييين
- نادي السواقييين
- اكلت اكلت اكلت اكلت
- الحمد الله ، الحمد الله الحمد الله
- اها نحن نمشي .. يا شباب
- لا والله على بالطلاق لازم تشربوا الشاي ..
- شاي شنو ياناس الدنيا ليل .. خلونا نروح لاولادنا . نشوفكم بكره
- ياناس الكلام ما بجي نحن حلفنا .. بالطلاق ..
| |
|
|
|
|
|
|
|
|
 Re: زغاريــد في القصـر الجمهوري (Re: shiry)
|
الله ايديك العافيه
ياشيرى
دى عملتيها كيف
انا عندى مشكلة مع
الجماعة ما نعملك
رئس الوساطه
بالمناسبة
ان سربنا الى ؟
وقرطعنا الشاى
بس مالقيت كيك معه
المره الجاى خالى
الكيك
| |
|
|
|
|
|
|
|
|
|
Re: زغاريــد في القصـر الجمهوري (Re: almohndis)
|
سلام مربع
المهندس
ياخوي دا زمن السلام
انا مبسوطه جدا عشان السلام العم البلد
ماعايزين نزعل من بعض
ماشايف الناس ديل اتصالحوا
لو كنت وين مايكون حضر شنطة هدومك
نحن راجعين
خلااااص
البلد اصبحت ااااامان
| |
|
|
|
|
|
|
|
|
|
Re: زغاريــد في القصـر الجمهوري (Re: shiry)
|
الأخت شـيرى
والله انا عجبنى بالحيل حلك لمشكلة السودان وبناءا على تجربتك العميقة دى انا اقترح علبكى انه انا وانت نمشى اسرائيل ولمن نصل المطار نشرح ليهم بأنه نحن عندنا مبادرة لحل الأشكال العربى الأسرائيلى. يقوموا طوالى يقابلوا بينا مستر شارون وبرضه نشرح ليه هدفنا النبيل ونحلف عليه انه يقوم معانا من محلنا داك عشان نقابل ابو عمار لأنه ابوعمار ما عنده طريقة يتحرك بيها بره مكتبو. يازولة المهم نمشى تقابل ياسر عرفات وبرضه نشرح ليه سبب حضورنا ويدور الحديث التالى:
ابو عمار: يا أخوانا انا زعلان شديد من شارون ده تخيلوا هسى هو حابسنى فى مكتبى ده قريب السنة وانا حتى بيت الجيران ما قادر امشيه
نحن: والله الكلام ده اعوج منك ياشارون.. تانى ماتعمل كدة
شـارون: ماهو ذاتو قاعد يطقع فينا باالحجار ليل نهار
نحن: خلاص يااخواناباركوها ونحن عندنا ليكم حل.
جيبى الخريطة يابت ياشيرى ومعاها قلم شينى وقومك شـييييييط نقسم الخريطة من النص بالظبط ويلا ياخوانا كل واحد فيكم يعزل ليه نص. ويلا ياشارون قوم حب على راس عمك ابوعمار وانت ياابو عمار قوم بوس شارون فى شلاضيمو انت اصلك جنك بوس .وبى كدة تكون المشكلة المزمنة بتاعة الجماعة ديل اتحلت بى عبقريتنا.
النتـيجة:
حصولى انا وانت على جائزة نوبل للسلام وانا حأديكى الميدالية واشـيل الجائزة المالية المصاحبة ليها ...اصلو اخوك عنو مشروع حافلة وركشة وكدة
| |
|
|
|
|
|
|
|
|
 Re: زغاريــد في القصـر الجمهوري (Re: shiry)
|
كابرس مكيف
عصير ليمون وبااااارد كمان
محامي
تتكلمي
تكلمي السيد الرئيس ونايبو وضنب نايبو
شيري ..شيري يا بنت ام شيري اصحي .. انتي جاك كابوس ولا شنو..؟
غسلي وشك بمويه باااارده وصحصحي الاحلام الزي دي بتغطس حجر الواحد
| |
|
|
|
|
|
|
|
|
|
Re: زغاريــد في القصـر الجمهوري (Re: james)
|
سلام مربع
جيمس
ليه كف الله الشر
؟
نحن نتحدث عن اناس اخترعوا المشروع الحضاري
اليسو بقادرين على
تطبيق هذه الحقوق البسيطه
انت واهم كبير
اخي جيمس
ماتحدثت عنه يحدث فعلا في بلدنا الحبيبه السودان
هل تعلم انني اطلعت على ملف المتعقلين في السودان
فانهم يرحلون بالطائرات المروحيه
خوفا عليهم من زحمة المواصلات
نحن نتقدم كثيرا في هذا الاتحاه
اخ جيمس
قول ماشاء الله
| |
|
|
|
|
|
|
|
|
|
Re: زغاريــد في القصـر الجمهوري (Re: bushramk)
|
بشرى المك
سلام مربع
نحن نتحدث عن حقيقة واقعة فعلا
اخ بشري
كل الوفود المشاركه
تعاونت معي تعاونا تاما
ولم تقل كاني ولا ماني
ولم يتعبوا قلبي
ولم يفتح احدهم خشمه
لكي يقول كلاما مستحيلا
انهم اناس طيبون
فعلا
ادعوا مع الله لكي يوفقني
واختار المجلس الشوري الذي سيدور البلاد
حتى قيام الانتخابات
تجنبا للفجوة في الطبيخ
اقصد الفجوة في السلطه
| |
|
|
|
|
|
|
|
|
|
Re: زغاريــد في القصـر الجمهوري (Re: Al-Masafaa)
|
سلام مربع
البعيو
نحن شنو الخلانا نعمل كده غير
كترة الوفود الماشه والجايه
ياخوي مافيش اي وفد غيري
انا
هو لو كانت في وفود كان السلام جاء للبلد
ولا كان سمعت ليك زغرودة واحدة في القصر الجمهوري
؟؟
المسافه
انت بس قول بسم الله واطرد الخوف
وانشاء الله
بكره انت ذاتك تترشح لمنصب رئيس الجمهوريه
بس اوعك بعدين تصر على رأيك
وخليك متفائل
| |
|
|
|
|
|
|
|
|
|
Re: زغاريــد في القصـر الجمهوري (Re: shiry)
|
سلام مربع
طرقت الباب حتى كل متنى
و لما كل متنى كلمتنى
فقلت ايا اسماء عيل صبرى
فقالت يا اسماعيل صبرا ..
يا بت امى انا لا داير رئاسة و لا يحزنون
و انا متفائل و ما بغير رآيئ و مابتحير
الا مغير لكن خايف هترشتك دي تساهر بيك
اكتر من اللازم " اوفردوز" يعني و بعدين
عندي ليك همسه خاصة يا بت يا نيل " الصورة بتاعت المرفعين اب نضارة القاعد فى اللابتوب .. ان شاء الله تكون اشنى منك ؟ "
| |
|
|
|
|
|
|
|
|
|
Re: زغاريــد في القصـر الجمهوري (Re: shiry)
|
شراك شيري مرة أخرى ..
ويستمر رأسي في الدوران ..
أنا مالي ومال الكركار .. والزغاريد ..
لكن دي ما اللقافة .. وحب الشمشرة ..
========
أختي شيري هترشتك جميلة .. يا ريت لو كلام وزرانا كان كله هترشة .. أحييك من بعد .. وأنصبك كأكبر "Hutrashist" في هذا البورد ..
تحياتي ..
| |
|
|
|
|
|
|
|
|
|
Re: زغاريــد في القصـر الجمهوري (Re: JAD)
|
سلام مربع
المسافة
لا دي الاوفر دوز ذاتها في سماحتها
بالنسبة لي
أنا قلت ليك اتفائل بس ماللدرجة دي
جاد
معليش ياخوي عملنا ليك (خوطه) في راسك
اصلي كده جني هترشه
عشان خاطرك ح نوقف هذه الهترشه
حفظا على سلامه الاخوان
هنا
سلمت ياسيدي
| |
|
|
|
|
|
|
|
|
|
Re: زغاريــد في القصـر الجمهوري (Re: shiry)
|
هسى بالله عليك فى اوفردوز بهترشة سلامك دا خلت هوبلس يطلق المسكينة مرتو دي تربل دوز عديل ان شاء الله يا شيرى صورتك تكون اسمح من السرنكالية!! و انا عارفك اشد منهم الاتنين الليلة وين؟
| |
|
|
|
|
|
|
|
|
|
Re: زغاريــد في القصـر الجمهوري (Re: shiry)
|
دوبيت مربع
لى شيرى
بت ناس فاطنه زينب فيها عنقا باهى
شن تشبه برا الفى الناله غريد ساهى
حلفوا الضاقو ليمك فوق كتاب الله
احلى نفيسها مالا الزعفران والشاهى
زينب فى البنات مى داب سماحه ذى
شن تشبه بلا اللدتو امو ودى
فيها تلت خصالا ما حواهن حى
الصبا والجمال عقب اللهيج النى
| |
|
|
|
|
|
|
|
|
|
Re: زغاريــد في القصـر الجمهوري (Re: shiry)
|
شيري
مادام وصلتي لي هناك
بالله كلمي لينا الجماعة عشان يشوفوا لينا اي وزارة في الحكومة الجاية
واخونا حمزة بالله شوف ليهو وزارة الثقافة والاعلام
وبرضو جماعة البورد ديل ماتنسيهم
والله اقول ليك انت ما ترأسي الحكومة الانتقالية لمدة عشرة سنة وتشوفي لينا معاك وزارة وبعد العشرة سنة ليها حلال عشان تبري الشعب السوداني لمن يكره حاجة اسما السياسة
وبالمناسبة ماتنسي بدر الدين الاداك الكشك وهو مقدم ليك السبت
شكرا لك شيري علي هذه الاستراحة الجميلة جدا والقلم الساخر جدا
عبدالله جعفر
| |
|
|
|
|
|
|
|
|
|
Re: زغاريــد في القصـر الجمهوري (Re: Abdalla Gaafar)
|
ٍسلام مربع
الموسيقار /حمزه سليمان
انت عارف اني ، بعشق (المسادير) وشعر البطانه ... رغم اني مابفهم فيه كتير .. الا اذا شرحوه لي ،
سلمت ياسيدي لهذا الابداع ..
سلمت اكثر لهذه الطله البهية التي شرفتني بها ..
عبد الله جعفر
والله اخونا حمزه على العين والراس .. بس عندي شرط لوزارة الثقافة ، لازم يرجع لعقد الجلاد .. وتاني شيء لازم يقوم بتلحين 10 اغنيات جديدات لصالح عقد الجلاد .. وتالث شيء لازم يقول لينا الف بيت من شعر الشكريه والبطانه ..
اما حضرتك ، فلك وزارة خاصة جدا .. وانت براك شفت انا (متصالحه) جدا وانسانه بسيطه مابعقد الامور شفت في ساعة واحدة حليت مشكلة ليها 60 سنة بالظبط (رجال) ماقدروا يحلوها ..
شفت التباهي بتاعي دا وصل لحدي وين ..
عشان كده ابشر (شعب) السودان بكل خير .. لو حصل اللي في بالي ..
بس بكره الناس دي كلها تنقلب علي (لانهم ) لا يسمحون لامرأة ان تديرهم .
لكنهم يسمحون لغبي او معتوه أن يديرهم
سلمت ياسيدي للطله
| |
|
|
|
|
|
|
|
|
|
Re: زغاريــد في القصـر الجمهوري (Re: shiry)
|
الزولة جدا شيري :
المشكلة تب أتحلت لكن أنا عندي إقتراح كدة بما انك قدت المفاوضات دي بسلام رايك اية تقودي مفوضات لسلام كامل بين أخوانا توم وجيري
وتاني بما اني جيت متأخر علي البورد يعني ما لحقت اول زغرودة لو أقنعت (السيرلانكية) تزغرد ممكن تشوفي لي وزارة أخوك مزنووووووووق وداخل علي مشروع عرس في العشرة سنين الجاية
| |
|
|
|
|
|
|
|
|
|
Re: زغاريــد في القصـر الجمهوري (Re: زوربا)
|
زوربا السوداني الشفيف
وانت مشكلتك تب اتحلت اااازول
تب ما بنقصر معااك
طالما ربنا رفع قدمنا
توم وجيري
كل واحد منهم ح نمسكو وزارة
ليها ضل
مثلا جيري بنديهو
وزارة شئون الحيوانات
وتوم
بنديهو
وزارة الشئون الكديسيه
اما مشكلتك
فقد تم تعيينك
الامين العام لشئون كروش الوزراء
| |
|
|
|
|
|
|
|
|
|
Re: زغاريــد في القصـر الجمهوري (Re: shiry)
|
الزولة جدا شيري : هاي نيلين والابنوسة
انقلاب في الخرطوم
استيقظت من نومي كالعادة متأخرا .. وبدأت بممارسة طقوس الإفاقة ( بي مهلة ) .. فردت زراعي ألي الأمام والي الأعلى وتثاءبت ( بي مزااااااااااااااج ) . من ثم بدأت رحلة البحث اليومية ( جدا ) عن علبة السجاير تحت المخدة ... أشعلت السيجارة وبعد النفس الأول بدأت الأشياء من حولي تأخذ ألونها وتشكلها . وقبل النفس التاني سقطت عيناي علي جريدة ملقاة بإهمال علي الأرض وقرأت فيها ( انقلاب في أفريقيا )
قفزت من السرير ( زي العضتو عقرب ) لالتقط الجريدة .. قبل أن اكمل قفزتي كان خيالي قد أكمل تربعه في القصر الجمهوري .. سمعت الخرطوم تهتف جددناك يا أكتوبر في يونيو .والزغاريد طاقة من سوبة لي الحلفاية من الرياض لي راس الشيطان ( شفتوا كيف ..والعساكر يقادون بالقباقيب ألي المحاكم والترابي مطارد في الحدود الليبية .. كان هذا المخاض أما الميلاد
كانت شيري قاعة وسط أعماما الدينصورات وبتصدر في الأوامر بكل جدية ( أتخيلوا )
شوف يا عم الصادق .. تقعدوا كدا برواقة وتتلموا ومبارك دا ما عندك شغله بيهو خليهو علينا وكان ماأتلميتوا ما تجوني
وانت يا عم المرغني بما انك (( شريف )) حا نشوف ليك مكان في المؤتمر الدستوري الجاي .
أنت يا أونكل قرنق الكلام دا منك ماصاح والله .. دحين أنت تفرتق مليشياتك دي وتسلمني السلاح وتعال أترزع هنا في الخرطوم تحت عيني
وتقوم شيري تقيف وتعلن حل كل القوات النظاميه والما نظاميه وتشغل كل الفيها مزارعين وبدل البنادق توزع ليهم طواري ..
وتقدل كدا وتعلن تشكيل الوزارة ( لم أستطع ان أحفظ أسماء كل السادة أعضاء الحكومة لكن ما إلتقطتته ذاكرتي الرمدانة
1- ذ/ حمزة سليمان وزيرا لثقافة
2- ذ/ بت قضيم وزيرا للخارجية ( جنس شكل خلوا ساي )
3- ذ/ هوبليـــس وزيرا للري ( شايل زيره وحايم طواااااالي )
كل هذا كان في المسافة بيني والارض وعندما التقطت الجريده وجدتها بتاريخ قديم وعن موريتانيا
سوري يا شيري ... لكن ولا يهمك الجايات أكتر ووعد المرة الجايه ما أتم النفس الأول لو ما عينتي السيرلانكية
| |
|
|
|
|
|
|
|
|
|
Re: زغاريــد في القصـر الجمهوري (Re: زوربا)
|
سلام مربع
زوربا السوداني
يالهذا الحلم (الغربال) والغشاش الذي مرقت به من نومة
اظنها بعد ليلة محمومة وصراع طويل مع
شرطة الطواريئ
وخيمةالالزاميه
خيمة العرس بتاع جيرانكم
وانت تتحكر في موقعك حارسا لبرميل الببيسي
شايلا خيزرانتك (بسطونتك) تنهر بها شفع الحله
وشايلا وش القباحة مع النسيونات الكبار
اللائن ابدين مصرصر وفاصل من المساخة
انتهي بدعيك
انشاء الله تشرب الشربو جدي ورقد بيهو
اصلي انا خبيره في هذه الدعوات الطيبات الماحقات
حيث ان لي حبوبة رحمها لله كانت متخصصه في هذه التراتيل
عموما امتعتني جدا بهذا السرد
وافرحتني جدا رغم انك قفلتها معاي في النهاية
وطلعتني من غير حتى اذن دخول للقصر الجمهوري
والمره الجايه اتعشى عشوة مدنكلة واشرب عصير مانجو
واشرب شاي وقهوة ثم توكل على الله ونوم
ممكن تشوفني رئيسا للولايات المتحده الامريكيه
واهو من هناك يكون في امكاني بوضوح
ان اتحكم في الحكم في قصرنا الجمهوري الرابض على ضفاف النيلين ومقرنه العظيم
ومنها اشوف ليك هناك لوتري او باسبور امريكي عديل كده
من دون المرور على هذه المحطات التي تعكر الدم عديل كده
| |
|
|
|
|
|
|
|
|
|
Re: زغاريــد في القصـر الجمهوري (Re: shiry)
|
هاي نيلينك والابونسة
الزولة جدا شيري .
تصدقي ولله العظيم أفتقدوبشدة كل الوصف القلتيهو لحدي دعا الحبوبات
اما برميل البيبسي ما حرستو قبل كدة لكن حا أحرسوا المرة الفياتة وابقي (( مرة )) وتعالي أتشابي لواحدة .
باااااااااالغت في زول بشل وش لقباحة مع الحبوبات
بااااااااااالغت
راكوبةفي ضل النيل أجمل من فيلا علي ضفاف اليانكي
وسميتك زغرودة في الأبيض و بريك دنص في البفيرلي هيلز
عليك الدور وتصريف الليالي بدور ... اللوتري وبرضوا ستات الشاي
فتك نيليــــن
| |
|
|
|
|
|
|
|
|
|
Re: زغاريــد في القصـر الجمهوري (Re: willeim andrea)
|
سلام مربع
زوربا السوداني الشفيف
تعرف حكاية بيوت العرس
من اجمل المناسبات على الاطلاق عندنا في السودان
حتى المناسبات الغير سعيده حمانا الله واياكم
فيها كمية من الاحاسيس التضامنيه بصورة
تفتقد اليها كثير من المجمعتات غير السودانيه
نحن عشنا خارج السودان
وشفنا كيف (لمة)الناس هنا
في الغالب مسيخة وباردة ومافيها اي نوع من الحميميه
ولا اي صلات طيبة
انا اشتاق الى السودان في هذه اللحظة
سلمت ياشفيف
وليم اندريا
حلما سعيدا دائما ياسيدي
امنياتنا الصادقة لك
بان تتحق الاحلام
وبكره تتحقق اماني
والفؤاد يرتاح
سلمت ياسيدي للطله
| |
|
|
|
|
|
|
| |
shiry
waleed500
almohndis
قلقو
james
bushramk
Al-Masafaa
JAD
HAMZA SULIMAN
زوربا
willeim andrea
Tumadir
فيس بوك
تويتر
انستقرام
يوتيوب
بنتيريست