|
|
 للقالت بخاااااااااف .... اغنية للمسافات والمطر
|
يا قلب أسكت
كفاك مالك علي
أشعلت في جواي
شلال الأماني
وحرقة الشوق
وأحزان المطر
ما زمااااااان
تُبت من وجع المواني
والمسادير
والأغاني
إرتِحت من
بعد المسافات
والدروب المستحيلة
هجدت من هم السفر
يا قلب أنا كنت
راجيك سنين
رويانة بي شوق العمر
أشاشي في الومضة الرهيفة
وادعب الزمن البكر
وكنت بحلم بيك
ساكنة جوايّ زمنا قديم
مالياني بي بهجة هواك
زي القَدر
أهاتي بيك
وأحلم أجيك
لا بتردعني المسافة
ولا الجسم الكِمل
بي وراك فَتَر
يا قلب فاض بي خلاص
كفاك أرقد مكانك
إتوسد أحزانك عدييييل
لوك الصبر
ضجّ المكان
وكنت قايل إني
حسيت بالأمان
أدمنت ترديد القوافي
وسكنت في بحور الشعر
مالك علي
الليله جايي
تشابي لي
مالك علي
تغريني بي حلو
الأحاديث البهيجة
بالصباحات النديّة
المواعيد الأنيقة
واللقاءات الخطر
ما كان ده خوف والله
كنت سرحان في المَدى
ومن عيونك إنتي
يا فرح المحافل
الطيبة بتجيني القوافل
بي زنجبيل الوعد المُطلسم
سناجب الصّبر الجميل
تهدهد الشوق الكِبر
وكُنتَ يا رعشة الفرح
المواصل
بقراك ورد
هجعَة اللّيل الطويل
وأناجيك فرض مكتوب
أرجاك بالقرابين
والنوافل
يغشاني من طرفك خبر
زي غيمة بتبلل
عتامير روحي اللهيفة
وتنزل سلام جوّه الصدر
وأحلم اني ألقاك
يا صباح الضحكة الباشة
في الزمن العكر
يا قلب أسكت
كفاي مالك علي
أسكت كفاي
وخلّيني كاتِم في حشاي
كملت في رجاك نهار الجَد
وصِلت الحَد
وسهرت في عيوني السهر
الليله مالك يا قلب
قاسي وعنيد
ما راتي لي
كترت الوحيح
باريت مناجاة القماري
ورجعت للهم والكدر
أسكت كفاك
لا بفيدك البكا والنويح
ولا بنفع العود القِدم
شدّ الوتر
أسكت خلاص
لا النمّة بترجع الزمن القبيل
ولا همسك الوسنان
بيرجع العمر الوِدِر
|
|
 
|
|
|
|
طيفور
اساسي
فيس بوك
تويتر
انستقرام
يوتيوب
بنتيريست