|
|
 أين مني كورية شطة مدنكلة وكميات من شرائح التبش
|
اول الحكي
داير اصبر امامك
داير اضحك
وماني قادر
بس دموعك لما فاضت
ضيعت صبري الشويه
الغناء للجابري
______________
سطوه البطيخ وسماجة الموز
وأنا من يحيل صبري الى بقعة تؤطرني الى اي معني اخر عدا الصبر .. أي اتجاه آخر يتوادد مع سكون اللحظة غير الركون الى حالات من الهواجس تدفعني لان اشتت صبري فوق منضدة تتحكر امامي تجاهر بنقل صورة وجهي (الككو) الملامح والافكار تتصاعد من سبيبات شعر رأسي مثل خيط دخان يتكاثف حضوره فيحصرني بين حزنين يفصلهما جدار من حزن و حزن اخر يتوسط حزني يبشرني بغيمة برتقالية ..
وانا دونا عن الخلق اعرف ان لون الحزن عندي برتقالي .. فاندلق على طاولة اغراضي عصيرا من الهواجس وشرائح ضبابيه (جرجيريه ) الطعم ، لا يمكنها ابدا ان تصنعني ولو لحظه على شاكلة عصير الجزر او حتى لوحة تشابه شكل نصف البطيخه باحمرها الصارخ وبذورها السوداء التي تستفز التماهي .
للبطيخ وجه غريب ومصادم ، لا يمكنك ابدا ان تفقد بوصلة احاسيسك تجاهه ، فللأمل والرجاء سطوة ملحة لا تغادرانك بوابابتها ..فدائما نحن امام البطيخ نقف بين بوابتين ... تنفرج احداهما فتفضح وجه البطيخ الضاحك فتلك تعني لنا الرجاء ، وطعم الحلاوة المحمر فيها هو الامل ..او نجازف بالدخول لنتقبل العزاء في قرعتها .. فتلك بوابة الخيبة .. وياحسره على فلوسك اللي ضاعت على بطيخه قرعه .
ومع ذلك نحن نحب البطيخ بدرجة واحده تجوز فيها كل الاحتمالات .. فكيف يمكننا ان نركن الى ضعف نسيج الموز رغم رخامته.. فللموز سماجة عجيبة تجعلك في كل الاحوال مستعدا لنفس الطعم ، لايمكنك ان تتوقع ان تجد طعم البرتقال على الموز ، ومع ذلك تنفي تماما هذه الذائقة وجود الملمس نفسه على التبش .. ماله التبش .!!!. عيبوه لي .. اليس من عائلة العجور والخيار ؟؟..
فاننا في كل الاحوال مقطعوه ثم جاعلوه في شرائح دائريه .. وعلى سراويس الشطه الخضراء المدقوقة دقتا دقاقه بالفندك..ثم نخمجها ونلغوصها مع الدكوة ونعصر عليها حبات الليمون عصراً وللحصول على مزيداً من اللهلبه نكب ليها مقداراً لا بأس به من الشطه الحمراء .. ولا تنسوا سادتي اضافة قليل من سائل (الاتي). فللذين تحنكشوا بسبب عوامل الهجرة او حتى بسبب بعدهم عن سوق الخضار او بيت الغنم او الخراف نقول ان الاتي هو البول او بمعني اوضح هي العصارة الصفرا للكبد .. ولا اعرف اكثر من ذلك . ثم نجيب شرائح التبش ونقرمشه ومع كل لحسه نتمطقه ..
أين مني كورية شطة خضراء مدنكلة ومليانه لابو عينها وكميات من شرائح التبش..!!! لافك هذه الدبرسه ..
.....
ابقوا معنا
الشطه جااايا
|
|
 
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
طردية بذو البطيخ
واشكالية الدبرسه
وللشطه المدنكلة فلسفه عجيبه . فهي تدفعك للمجازفه على رهان في الغالب يوصلك الى ان تاكل .. رغم ان الجوع ينفي اشتراطها كسبب مقنع لان ناكل . . فالجيعان مثل ما تقول حبوبتي قرش الحب ..
انظروا معي هداكم الله الى هؤلاء المتحججين
يخبرونك دائما في محاولة من التملص من طبيخ انت (خمجته) بيديك
فصار لا هو طعام القطط ولا هو شبه اكل الجداد
وانت نفسك لا تعرف كيف ياكل الارانب
من منكم شاف ارنب بيشرب عصير
منقه
او حتى اننا مع كل وجبه
احضرنا كبابي العصير ووضعناها امام كل
فرد منا
وسألناه
تشرب عصير منقه ولا تفاح
.؟؟
ان جبنا المويه ولم ننسى حتى كاسات لنشرب بها
فيبقي كتر خيرك يابت ياشيري
؟
وبعد ذلك تجي مريم نور وتقول ليك
الصنو الغذائي والنمو البروتيني
طيب ؟
كيف تقنعوني .. ان النفس الامارة بالسوء هذه
لم تشتهي اكل طبخته انا ولا انتم
تحجج عجيب يخبرونك دائما اننا لا نأكل الا بوجود شطه ؟ .
كضابون هؤلاء الاكالون
كضب مردود على صاحبه
... لم ارى جيعان رفض الاكل لان صحن الشطه غاب عنه ..
ومع ذلك تجدني احب الشطه موت .. ان كانت مع الليمون او حتى دون ليمون ..
سجمي دا كلام شنو دا ، اظنني جنيت جن رسمي . رسمي شنو ؟ دا جن احمر عديل كده ، ومع انني أجهل تماماً لما سمي الجن الاحمر بالاحمر ولا ماهية الجن الكلكي ، ومع ذلك لا تهبشوني سادتي وسيبوني في حالي ، ما فيني مكفيني ..
منغصات كثيرات تردمت فوق راسي المنكشة سبيباته واحدة بعد الاخرى والذي غالبا ما يحمل لي كميات من المشاغل والمشاكل والغريبة كلها ليست على مقاسي .
مالي اليوم مدبرسة ، مطوفشه ، مكشره ، متحوصنه .. تشغاغلني الوان من الهواجس والشجن تتعنكلان على مقدمه رأسي .. ولا اعرف لما انا حزينه . حزن يشد مدي الافق على خاصرة الرؤيا . رجعنا تاني للكلام المغتغت وفاضي ...
ايه الجنتره دي !! .. ايه الجن !! ايه كلام اثنين والثالث بره دا ؟؟ ..
ايه مود البطيخ ، وبرتقاليه الحزن ديل المتعارضان امام ناظري .. اقصد المتلصقه لي في حلقي دا ؟؟؟
لي كمين يوم كده .. ولا استطيع صراحة ان احدد هذه الكمين تطلع كم يوم ؟؟ اذ ان في لهجتنا تتضاري كثيرا من المعاني المبهمة التي نرجعها الى عدم جديتنا في السعي لمعرفة ماوراء الكلام وكسلنا . على مزاجنا نحن غالبا ما نلاحق تفاصيل نود ان نقتلها بحثا ثم نكسل في الاخير وندمدم وننوم ونعزي انفسنا ان كثرت عليك الهموم ادمدم ونوم ..
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: HOPELESS)
|
ٍسلام مربع
المسافة
ياود امي وحات نظري انت رايحه ليكه جوعة رسمي وشعبي
كدي صلي على النبي .. اشرب الشاي بالنعناع داك
وغسل ايدينك واتحضر للفسيخ اللي ناويه اسويه ليكم
عشان يحصل الفطور
يعني على حداشر صباح كد يكون طلع
شطه خضراء حاره جدا بالدكوة والليمون
ايه رايكم في الفطره المدنكله دي
Simpatico
سلمت ياسيدي لسؤلك ..
وسلمت اكثر لمشاعرك الطيبه الرقيقه ..
شكلي كده عايزه اموت واكل التبش !!
بس كيف ؟ .. الكرنتينه مافيها تبش ؟
من وين بجيبوهو ؟؟
كدي النسأل مهاجـــــر
سلمت ياسيدي للشفافيه
وسلمت اكثر لكونك شعرت بحزني
هوبليس
دي بياكلوها وبتمطقوا بيها بس
انا غايتو ام فتفت ما من انصارها
لكن لو لقيت التبش .. النبي فوك لو مارسلت لي
حاجات كثيرة بجيب الحزن .. .... .... ....
سلمت ياسيدي لكونك احسست بدبرستي
وحزني .. وسلمت اكثر ياشفيف للمواساة
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: مهاجر)
|
سلام مربع
ولياب
كيفك يا حلفاوي
في حلفا بتاكلوا القراصه ؟؟
شوف ياو لياب انا معاك في الشطه الخضراء بكل انواعها بالدكوة من غير ليمون بالملح ساي
ببصل من غير بصل
بس ابعدني عن التركين وعن الملوحه ..
سلمت ياسيدي للحندكه دي
مهاجر
هسع جيبنا سيرتك وقلنا ، عايزين مهاجر يجيب لينا تبش
من الكرنتينه ..
وفي العدم .. بنعزمو نحن فسيخ ..
يلاااا حاول حصل الفسيخ قبل الظهر
سلمت ياسيدي للسؤال
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
العزيزة شيري
بعد ان ابدعتي واحترفتي
وتخصصتي في ادماننا لكتاباتك
اراك تدلفين لتحريضنا علي الشطة بالدكوة
والله انا بكتب في الرد وفي بالي متين ينتهي الشغل
عشان ابحث عن هذه الدكوة والشطة برجل كلب
تتصوري ممكن الواحد هنا يجيبها هدية لعيد ميلاد؟؟؟؟؟
واليوم يا بنزيني يا الشطة بالدكوة
التبش مافي هنا او لو في لا اعرف له اسم
لان الاسماء الخضرواتية هنا هندية علي فارسية علي عرانجليزية
وانا غالبا ما امشي علي الشكل في اختيار الخضار
نوع اديني من دي
ومن داك دون ان افضح نفسي
تتصوري تقولي لي الخضرجي هنا اديني جرجير دي فيها حاجة يديني
حاجة تشبه بنبون البصل والبنبون بلغة اهل العوض تعني
اوراق البصل الاخضر
ولك ودي
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
أها يا شيري
سحبنا من قدامك صحن التركين
وحأنادي أمي عشان يجيب ليك
ملاح ورق بالقراصة وتكتر ليك الشطة الخضراء
تعرفي يا شيري
قبل سنتين
أذكر خصصنا بوست
في سودان نت
عشان خاطر
عيون التركين
وكان بوستا ظريفا
بين مؤيد ومعارض
وقد التف حول التركين
كافة الدناقلة
والمحس
وناس حلفا
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: ولياب)
|
ٍسلام مربع
نزار حسين
تعرف ، انني احب جدا التسوق في العزيزيه بنده ، دونا عن السوبرماركات .. عارف لانو هناك تجد نفسك وجها لوجه مع الخضروات من جميع الاشكال .. انا بحب الخضروات موت ، واتفاؤل بها .. جد جد ..
عشان هناك ما في زول بقول ليك دي شنو ولا شنو .. تشيل الكيس وتعبي
هانذي ا زيد جرعات تحريضي لكي تضيف بننزينا لعربيتك وبكراع كلاب كتيرة تفتش
ابحث عن القونقليز ..
او لعلني ازيدك اعراء اخر تتمطق له .
ابحث عن العرديب ..
ابو الزفت
شوف يا طيب ، نحن معاااك في الخضروات حتى اخر تبشايه
مغموسه في كورية الشطه بالدكوة علىشرط فول حاجات
موش زبدة الفول السوداني
تخيل . دلعو فول الحاجات واحالو اسمه الىمعلبات بلاد العم سام
ابعدني عن كبدة الجمل .. والمرارة
دي اسأل منها العمده قرشو
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
سلام مربع
المسافه
لا ياسيدي ... كد العضام دا .. داير ليهو ناس كتار .. وخطيف..
ولغوصه بتاعة صينيه ..
هل جربت ان تدلق كل ماعلي الصينيه في الصينيه
وتعجنها بالكسره .. والشطه الخضراء والبصل الاخضر
والجرير ..
كل كل ما في الصينيه تعجنو ..
بالله موش برضو احسن البيتزا
ولياب
لحدي سلطة الروب بالعجور الرخص .. والفلفل الاسود الحار
وكمان هدية ملاح قرع بايت ليهو اربعة ايام في الثلاجة
معاهو الفسيخ ، والباميه والخضراء .. واعجنها مع الكسره والرغيف
والقراصه .. وادلق عليها كوريه الشطه الخضراء المليانه ديك
على شرط الناس يتعدوا العشره .
عشان الخطف ..
وطبعا . بنات العائلة بس .. الاولاد يمتنعوا من المشاركة في الصينيه دي
لانو الاولاد خطافين وشرفانننننننننيننننين
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
شيري الهترشة عندك جد لكن
قلتي لي تبش وشطة
رجعتي الواحد لايام الابتدائي و
بعد البيوت من المدرسة كان
عندنا كاسوري رهيب حول البنبر بتاع
حاجة رحمة الله يطول فى عمرها
بكون التبش خلاص قرب يخلص
اها فى باقي التبش دا فى واحدين
بتشاكلوا وواحدين بتصاحلوا
ووحداين بتعارفوا ببعض
والسبب صاحبنا التبش والشطة
المدنكله
كانت لنا ايام
لك التحية
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: alsngaq)
|
السنجك انت قديم نحنا التبش شفناه فى الثانوى العالى انت مصاقروا من الابتدائى و لعلمك نحن قرينا مرحلة الأساس تمانية سنينا عجافا لا شفنا تبش لا دكوة لا شعيرية و السمسمية و الفولية و اللكوم و جوز الهند شفناهم فى المولد فقط و بالكيلو كمان مش بالوقية و تسلم يا عمو
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: Al-Masafaa)
|
سلام مربع
السنجك
ياحسره علينا نحن
ماقرينا الابتدائي كله في السودان
عشان كده الحاجات دي كلها راحت مننا
لكن برضو بره
في حاجات زي كده
بس مافيها شطه بالدكوة وتبش
المسافه
لكن ياالمسافه
حقيقي انا بتأسف على ايام زي كده
كان مفروض نعيشها زي ماهم عاشوها
احسدهم اطفال السودان
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
يا شيرى الحمد لله انك ما عشتيها فى السودان كان واطاتنا اصبحت من الهترشة ، على وزن الشفع و الصغار ذكرتينى النكته دى :
قال ليك مسطول جاء داخل نص الليل و اصر على زوجتة انه ما يشرب الا فى بزة الشافع المهم الولية مشت عبتها ليه لبن و زولك يرضع ، اتنين حرامية ناوين يسرقوا البيت من وراء الحيطة حرامى رفع اخوة و قال لية تلب الحرامى الفوق متمحن و مذهول و صاحبة قال ليه ما تنط .... قال لية يا
فردة انسى الموضوع دا تعال شوف الناس ديل شافعهم قدر كيف؟
ان شاء الله الفسخ جاهز
| |
|
|
|
|
|
|
|
|
 Re: أين مني كورية شطة مدنكلة وكميات من شرائح التبش (Re: alsngaq)
|
شيري
حمد الله الف علي السلامة
يا خيالية
بس تتخيلي محروم من شطتك المدنكلة دي
اصلو السقف الإئتماني بتاع اللوز ،،والزائدةوالحاجات التانية دي ،،،لمبتو ولعت
يعني بي صراحه امكانية مجازفة ،،،،تك
افتحي التلاجة بتاعتك دي كان لقيتي لينا،،،، نشاء ارقعيني بيها
واحشااااااااااني بشكل لما قاعد احلم بيها
ابقي قاعده يا شيري ،، بنحتاج كتير للتسكع عندك
بتعرفي كيف تردي الروح ،،وتنشلي الدبرسه بي حرفنه
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
تعرفي يا شيري
ما عايز احرق روحك ساي
لكن صدقيني ايام الابتدائي والشطة والتبش
بعد البيوت زي مافي
وبالجد فاتتك
بعد اخر حصة فى اليوم الدراسي
والجري ومكابسة باب الفصل
والشفوت بنطوا بالشبابيك طبعا
ويبدا سباق التبش
ومداهمة البنبر بتاع حاجة رحمة
ونظرات حاجة مرضية القاعده جنبها وهي متلهفة
متين يخلص التبش عشان تبدا فى بيع الحلاوة بتاعتها
وفول الحاجات
ونحن بهناك هاك يدفر ورفس وخمش
زمن حتى البنات لما يطلعوا من فصولهم
ما بقدروا يقاومو الشطة والتبش
وبخليهم اكثر شارسة مننا فى الدفر
وانتزاع حقوقهم كاملة من الشطة والتبش
وين يا حليلك يا شيري
زي دا غير السودان ما بتلقى فى اى مكان فى الدنيا
بس بقول ليك العوض عند الله
تحياتي
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: alsngaq)
|
أختي شيري ........................................سلام
الله يديك العافية، ولا فض الله جنونك النبيل، يا أنبل من
جن .. ودوزن وتر مخنا الخربان .. التحية ليك بخيارك
وتبشك وعجورك وبطيخك (سوق الخضار) ..
عندي بت أختي ملقيبينها باسم ،، الدقاقة أو الدقوقة ،،
لو شافت كلامك دة حا تضبحك
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: aboalkonfod)
|
سلام مربع
المسافة
طبعا .. كنت ع اعمل ليكم بيها سافوته في راسكم .
تخيل هذا ماكان يحدث عندما كنا نجي نزور السودان ..
بس ماتقول لي سيد البيت مابالغ
هاهاهاهاهاهاهاهاهاهاها ..
السنجك
طبعا ما ممكن كت انط من الشباك .. واتخيل لي برضو البنات شوية كده اقل مجازفه من الاولاد
طبعا في المدارس خارج السودان .. فيها كثير من وجه التشابه .. بس
بنتفقد للحاجات الشعبية . مثلا المشي . كداري ..
تقريبا .. الحاجات الفارشات بره ، اتخيل لي نفس المنظر .. بس بتختلف
الاشياء المعروضه ..
بس احلي من شطة التبش مافي ..
صااااااح ..
خاصة اذا غافلت الناس ، وقرطعت ليك منها شربة شربتين كده
وتمطقت كثيرا .. حتى سال لعابك
وتوحوحت كثيرا
تمبس الشفيف
حمد الله على السلامه
لعن الله حنكشتي .. كادت ان توديني في داهية .. تخيل احالتني حروفك ( السقف الائتماني للوز) .
الى المكسرات وحب اللوز .. وكنت عايزه اعزمك لوز .. بس جنوني خلاني ارجع واقرأها لوز
بس سلامتك ..عقبال الشال منك مايرجعها ليك .
امين .. يارب العالمين عارف دا ، كلو عشان تجي تاكل معانا في كورية التبش بالشطه المدنكلة دي
لا انصحك با لنشاء والا المديده ..
اذ انها تودي في ستين داهية .
الا تعرف ماذا قالت ماما نور في هذه المديده ..
؟؟
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
سلام مربع
ابو القنفد
عندي ليك اقتراح عشان انا اطلع من الشكله دي
وانت تسلم برضو من لسانها
هاك شيل ليها صحن الفسيخ دا
رغم ان وقت الفطور فات
بس ، يلااا .. اهو نحن سودانيين في بعض
بنفطر وقت ماعايزين
ومعاهو كورية الشطة الخضراء الدكوة
دي
سلمت اياسيدي لهذا الاطراء
وسلمت اك
| |
|
|
|
|
|
|
|
|
 Re: أين مني كورية شطة مدنكلة وكميات من شرائح التبش (Re: shiry)
|
شيري
هوووووووووووي
شطتك دي بتودي في ستين داهية
يلا وريني ماما نور قالت شنو
الشمار كتلنا طبعا
انا والكيبورد
والقاعد يجيب لي ساندوتشات الفطور الصباح الصباح
ياخ بلاقي عندك الوصفه بتاعت المديده دي
بس علي شرط ما تكون زي الوصفات بتاعتك المشهوزرة البتودي في ستين مليون داهية
وكان ما عندك الوصفه ما تكلفي علي نفسك وتنجري لي حاجه من عندك
في عرررررررررررررررررررررضك
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: aboalkonfod)
|
صباح الخير
انشاء الله بعد الونسه دي والناس الظراف المحندكين ديل
تكون الدبرسه طارت
تعرفي ممكن تنظري ليها
زي الشطه واحد
قد يكون الحزن شطه الحياه
و لا حتى الاتي بتاعا
والتعب هو ملحها
فهناك من يستمتع به كما
يفعل الجماعه الذين لا يعجبهم ما لذ وطاب ولا يكتمل كيفهم ولا
تنتهي جوعتهم الا بحضور الشطه
انسانه عامله غرفه للصراخ
كيف معاك
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: ايهاب)
|
تحياتي يا شيري
وهذا يذكّرني بالقليعدان الذي مرّ بجماعة من بني مرمطة وهم يتكورعون فاقترح عليهم صبّ نقيع الليمون صادحاً بأن " احرنجامهم " مضمون
انتي بتجيبي الحاجات الدقاق دي من ياتو بيت كلاوي؟
صحيح اننا افتقدناكِ في الأيام الماضية يا شيري ، وكان صعبا علينا، لكنه كان يملؤنا اليقين انكِ لن تتغيبي كثيرا وتتركينا نتصبب كآبة
هيا يا شيري . نحن في كامل الانتباه ، وفي أشد حالات الاشتياق لهذا الضحك المعافى ،،، و ،، الى الأمام
السمندل
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: السمندل)
|
سلام مربع
تمبس
ماما نور كلامها كتير
ياتو شمار العايزو منها
اوعي يكون شمار المديد
؟؟
لحدي المديده و(قرض) على كده ... قرض دي بكتبوها كدا ؟
ايهاب
فاتك يا ود (فطور) الفسيخ الكان مدنكل
السنجك وولياب كملوهو كلو ومعاهم المسافة
هسع عايزه اقنع (تمبس) دا .. عشان يسيب الجرسه
ويجي يقرطع معانا كورية الشطه الباقي لينا ..
والله ح ادخلها ..
انا لسعة مدبرسه يا ايهاب .. وحزينه
رغم ان وجودكم معي هو من خفف عني كثيرا
لكن حزني جبالا تهد حيلي
ا
السمندل :
سلمت ياسمندل ، لهذا الود الشفيف .. وكل هذا التواد الذي ينضح
على نسيجي فيحيل نبضي الى ايقاع متموسق ، يرجئ كثير من طوفان
الحزن الذي اراه يشحد امواجه العرمر ..
الا تعلم ان رفيقة دربي ودمي المؤكسد سوف تغادر السودان
هذا اليوم ؟؟
لا اعرف كيف اواجه ايام جايات دون ان اسمع صوتها
او اتكحل بطلتها البهيه
....
.....
....
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: السمندل)
|
الرائعةالمبدعة شيري
جوعتينا وطلعتي عينا .. خاصة الناس الممنوعين من أكل الشطة .. لك الفسيخ دا أصلي ما بخليه م غير شطة باكلوا منتظرين فطورك .. بالرغم من أنه لينا سنين خلاين حكاية الفطور دي ..
رجعتينا لأيام حلوة زومن التبش وزمن غطور المردسة والباقي ليهو قرش ولا قرشين بيوفرها لآخر الحصص عشان التبش بالشطة .. يا أخوانا دا كان في الابتدائي زمان .. دا زمن كثرين ما بعرفوا .ز دا زمن كان الطالب بركبالبص وما بحاسبوا .. وتركب الطرحة ويقا دا شافع ختوا بناتكم وما بحاسبوا .. دا زمن كان معلمين أمثال محجوب شريف
قلبتي يا شيرس ذكريات ومواجع .ز ما أظن دا زمن الجيل دا بعرفوا ولا الجيل القبالوا ..
دا زمن كان بصرفوا للطالب الكراسات الكتب وحتى الريشة والحبر .. وين تلقوا زي دا تاني ..
صحيح يا شيري اتوا اتعمتوا هنا .. وشايفين في راحات كثيرة .. لك سودانا كان فيه خيرات كثيرة .. كان يا مكان .. وإن شاء الله سودانا يعود ويعود ليدمه ..
وشكراً وشكراً ليك يا رائعة يا شيري .. وكان غبتي تان يبنخلي الألفة يكتب اسمك في اللستة
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
eh eh eh eh ehe
شيري المهترشه
سلام لحد الغيبوبه......طالما اصابتني من سيل لعاب
اللسان الذي إفتقد طعم تلك الايام الخاليات
راسك المنكشه سبيباته ده بخلينا نرجع من البلد
الطيرا عجمي دي
تمشوا سوق العزيزيه....وتجيبوا الكلام المغتغت وفاضي وخمج
الخمج الطار مننا في بلد الخواجات ...الله يطرد الخواجات
إخخخخخخ ....من الشرائح الضبابيه الجرجيريه الطعم
التبش المدنكل بكوريه شطه دا ....يا مجنتره جيبي لينا منو شويه
بس اوعك تنسي اخوكي تاني .....كان اصابني إحباط من الدبرسه
التبشيه الملمس .....بقوم جاري .....وتاني كان لموا فوقي
والله لك الحاجات السمحه ودوام الهترشه التي تصيبنا بالوجع الخرافي
ولك دوام الصحه.....بس اوعك تدبرسي
اكان دبرستي ....بس خليها في سرك
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: alfatih)
|
سلام مربع
الفاتح
حاضر ياسيدي لن ادبرس
بس ، هل لديك
طارد العوارض
؟؟
والله ياسيدي كلنا اليوم تمطقنا وتوحوحنا
وجرى لعابنا
خاصة مع سيرة
الفسيخ
والقونفليز
خاصة انو انا امبارح
عجنت ليك عرديب مع شطة بالدكوة
بعد ان اخرجت من تلاجه قعد فيها
اكثر من اسبوع
كل يوم ااجل فيهو
بس امس كنت مدبرسه
وعجنتنه ليك جنس عجنه
وهسع دي انا بلغوص فيهو
طبعا الفسيخ فاتك
بس ما مشكلة ناس التركين
قالوا ح يبدوا فيهو بكره
سلمت ياسيدي
وربنا يغطيك في بلاد الخواجات
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
شيري حقيقه رغم فسيخك(الكمل)و
و شطتك
و دكوتك
الا انو دبرستي بينا احنا زاتنا
تخيلي
في مؤامره من عصابه الاواغد
الحزن +الكابه+الدبرسه
لضرب منابع الفرح والهترشه
المقر الدائم لراحتنا و بهجتنا
وقد نجحو في احتلال محافظه بت قضيم
وهناك بعض جيوب المقاومه في محافظه شيري
بعد استسلام القوات الهوزيه
مما ادي الى انهيار تام في معنوياتنا نحن شعب البورد
المغلوب على امره
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: singawi)
|
سلام مربع
ايهاب
معليش يارائعة لهذا الاحساس الكئيب الذي تناقلته حروفي غصبا عنها
اعلم ان نبل احاسيسك هو الذي دلاك على مكامن
الحزن فينا
لكن ليس بايدينا
ادعو معي ان يمنح صديقتي بت قضيم
القوة التي تشتت بها فلول احزانها
ووحدتها ضد كل شيئ سئ في هذا العالم الكريه
ضد الجبن والخيانه والغدر
والقباحه
سلمت يا ايهاب
ساري الليل
عشرين شريحة من التبش النوع العائلي
يا مفتري ؟؟
عملت ازمه في التبش
ينفعك يا يابا
اصلو التبش بيني وبينك لا يقاوم
سلمت ياسيدي
سنجاوي
ماعندك حظ ، نحن قبيل سوينا فسيخ مدنكل
واكلنا الشطط بالكواري
...
تعبت آهـ آهـ آهـ آهـــ
تعبـت ألقـى فسيخ
ما سمعـو بيهو الناس
واحرك الأسنـان
بين الضنب والراس
جبت الليـمـون وبديت
أحلـب وأقـول يـاريـت
ياريـت .. ياريـت
ياريـت .. يـاريـت
لوكان فسيخي متاح
طعمو التقـول تفـاح
كان المريء يرتـاح
وأنا كنت بيهو رضيت
ياريـت .. ياريـت
ياريـت .. يـاري
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
شـيـري الـبـرايـة
يعني بوستاتك كلها بقت الواحد لم إدخل فيها زي البمص ليهو في ليمونة
مغموسة في شـطـة و ما عارف خليتي شنو لي النسوان البتوحمن.
تبري من الدبرسة يا شيري و إنشاءالله الدبرسة دي تجي لي ناس فلان و فلان
و صديقيني نظرية إيهاب صحيحة 100 % نظرية المؤامرة كـدي أحسبيها كويس
و يا إيهاب الله إديك العافية جبت المختصر المفيد.
غايتو يا شيري نحن أولاد الجزارين و الله فوتينا لي غادي لكن ذكرتيني
ود عمتي كنا بنقرأ سوا في الإبتدائي إظنوا من نفس فصيلتك الحيوانات
الشطوطية و نحن في الإبتدائي بملأ قزازة البيبسي شطة من بالليل
و برميها في الزير و أول ما إجي من المدرسة جري على الزير.
تحياتي و ما تدبرسي علشان كتيرين حا إدبرسوا معاك .
| |
|
|
|
|
|
|
|
|
 Re: أين مني كورية شطة مدنكلة وكميات من شرائح التبش (Re: shiry)
|
احيييييييييييييييييي انا منك يا شيري مالك يا بت
علينا ما كنا كويسين وكنا ناسين الكلام ده كله او بالاصح عاملين ناسين
مالك يا بت الله يجازيك كان دايره تساهري بينا
والظاهر اني فعلا حا اساهر
خليتيني اتذكر يوم الجمعه و فطور الجمعه و بكره الجمعه
اخ منك كان هيجتيني
اشوف فيك يوم
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: dawash)
|
سلام مربع
ابو حسين
غايتو ما بسألكم انت وود عمك
مباااااااالغة عديل كده
تدسو الشطه من بالليل في الزير
لا لا يابا نحن المرحلة ما وصلنا
سلمت ياود الجزارين
سلمت الف مره لاحساسك النبيل
دواش
وانت شفت حاجة . من هسع نحن بنعد لفطور
بكره
طبعا الجمعة وضيوفها
واكيد اكيد الفسيخ والقراصه ح يكونوا بالصحانه الكبيره
والشطه اسكت خليها ساكت
كورية بايركس كبيره
ستة ليمونات
كيلو شطه خضراء
سبعة معالق شطه حمراء
شوية توم
اتي
وملح وشوية شمار اصلي
وتعالوا لوموني لو جاتكم حاجة بعد كده
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
الأستاذة / شيرى
نادرا ما أشبع من الكلام , ولكننى شبعت وأنت تغمرينا بمفردات شكلت ملامحنا فى كل كتاباتك
وهذه المرة مبالغة وأنت ترددين التبش و الشطة الخضرة
مما يجعلنى أجزم إنك من الضهارى أو قرى الجزيرة التى تقرب بيننا المسافات خاصة وأننى أتهيب صورتك بالنضارة واللاب توب
تسلمى يا فظيعة
وفظيعة عندى= ممتازة
وكنا نسأل محمد أخوى رايك شنو فى البت دى ويقول رجلة بس
وكان رائعا على حسب فهمه وهو الذى يحب الرجلة جدا
ويحب السفاسف
خالتى زينب دى حنينة ذى عيد الضحية
وأيضا من أقواله الزول ده طيب ذى يوم الجمعة وماتفتكرى عشان الصلاة لكن يوم الجمعة الغداء بيكون كارب
المهم
تعجبنا إضافاتك
تسلمى يافظيعة
دبيب
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: dabeep)
|
سلام مربع
بنيه
انا الشريره ولا الفسيخ ؟ غايتو انا شايفه انو الشطه الخضراء اكثر شرورا من الفسيخ ... رغم ان التبش هو المحرض الاول
ومع ذلك نخاف جدا من ملاح الخضراء ماعارفه ليه ؟؟
اليوم هو الجمعة فعلا .. وكدي حضري نفسك يابنيه لهذه الاكله الصادقه ..
اوعك تقول لي هو في اكله صادقه ولا لع ؟
في كتير جدا .. وفي اكله فيها كل صفات الغتاته والنفاق .. اقولها ولا بلاش اكرهكم
هي ملاح الاسود .. فيها كل الحاجات الذكرتها دي ..
سلمت ياستي
دبيب
هاهاههااهاها . عجبتني جدا .. روح اخيك محمد (الاكلانيه) كونه وصفني بالرجله ..
بس انا مختلفه معاهو في حتة ملاح (الرجلة) لازم يورينا رجلة بعد كم يوم
يعني الرجلة يجب ان تأكل بعد ثلاثة يوم والا كانت لا زيها زي الباميه
التي لا اجد معني لوجودها على المائدة فهي لايووووقه ، وغير بشوشه بالمره
وحمدت الله كثيرا اذ لم يذكر ملاح الاسود ، ويظهر انه لا يحبه مثلي
والا لكان شبهني به ، وكنت عملت معاهو (كاسوري)
سلمت ياسيدي .. وانا كمان لا احب يوم الجمعة اذ تكثر فيه اشغالي المنزلية المربكه
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
بعد اذن الاخت شيري
الاخ الفان الصديق المبدع
حمزه سليمان
يا سيدي انشاء الله دايما ضاحك ومبتهج
انشاء الله شيري تمام هسه تجينا وتهترش لينا لمن نكب الزوقه
سحابه وانشاء الله عدت
رايك شنو تدينا حاجه كدا من روائعك
و يا ريت بستمهلك
انشاء الله كتابه و اللحن والاحساس واصل
وتسلم يا ملك
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: ايهاب)
|
سلام مربع
الرائع ايهاب
وحات نظري موش فاهمه حاجة
بس الاستاذ المبدع
حمزه سليمان
نحن بنحندكو
بي كورية شطه حاره حدا
ومعاهو شوية تبــش
وجمبها صحن فســيخ
ولا احلى
وشايفه تماضــر الحلوه
رجعــت
ويا تماضر اجري تعالي حصلي كورية الشطه والتبش دي
قبل ناس حمزه وايهاب وابو حسين مايكملوها
مخيره براك
انا كلمتك وانت حره
اتفضلوا معانا ياجماعة شاي الغدا
عقبالكم اتغدينا بي ملاح خضراء
ورجله
وقراصه.. كل جمعة معانا لازم
موش شايقيه
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: Tumadir)
|
ٍسلام مربع
تماضر حبيبة البي
الف لووووول مربعين عليك
خلي التبش عندنا
بعدين ناس ايهاب
ونزار حسين
والجماعة الطيبيه ماخلوا فيها تبش
كل ماتبقى لدينا كورية شطه خضراء مدنكله
جيبي شنطتك جاي (نكب) ليك منها شوية
عشان تخشي للصينين ابوعوينات بره ديل
وانتي بي شطتك .. جاهزه
عايزاهام يقولوا ماعندنا (محندكات) سودانيه
سجم خشمهم
والله نحن شطتنا دي تخلي الواحد ياكل
براميل فسيخ
موش اكل الجاينيز اللقمه لقمه دا
عموما
بالهناء ياستي
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
عزيزتى شيرى
لك التحية
رغم انى طلعت قرعة لاكثر من مرة وبطيخى اتمقلب لكن حكاية التبش دى تعرفى رجعتنى لايام جميلة ..
زمان سوق الخضار فى مدنى بعد العصر بتحول لسوق ثانى اهم معالمه الكورية الكبيرة بتاعت الشطة بالليمون ومليانه فل والليمون مطفح بى فوق وبتاع التبش بى سكاكينو واقف وتاكل لامن تقول بس وتديه قرش واحد يعنى نظام بوفيه تبشى متقدم خالص وما بعد ليك المهم انت تدفع القرش ..
طبعا جراء تلكم الشطة بتلقى الناس كلها عرقه جارى وحاجات ثانية مافى داعى ليها..
بجوار بتاع التبش ده بتلقى حاجة غريبة
واحد خاتى ليه طشت مليان كوارع بالفرن يعنى مشوية شيه مش مسلوقه كما هو المعتاد وهى ضلوف بقر طبعا ومليانه لحم والجماعة متحلقين وده بقى ما عنده شطله بالدكوة ده عنده شطه اسمها دقه مكبوبه فى ورق جرايد ..
جنبو بقى الملك واحد قاعد وعنده برضو طشت لكن فيه روسين نيفه
سمعتى بى روسين نيفه؟؟؟
ياخى مافى زول من مدنى هنا ياخى يساعدنى
لك تحياتى
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
شيري المجنترة
الشطة بالتبش دي اشهر وجبة كانت في المدرسة الابتدائية يعني قروشنا كلها بنكملها فيها
وفي اقوال اخرى بتكون معاها ( دقة قونقليز) شفتي الهترشة الاكلية دي كيف
وعينك لبذور التبش عايمة في الشطة
بس مع جو الخليج الاسخن من جهنم ده الجماعة ديل ما بينفعوا
رغم انه كورية تبش مع شطة والجو مكتح ومغبر الصورة بتكون مبدعة وجميلة
انتي مجنترة يعني شنو؟؟؟؟؟؟؟
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: maia)
|
شطة خضرا قال؟؟
اليابانيين ديل عندهم حاجة مهروسة كدة زى البقدونس
بجيبوها ليك فى فنيجين صغيييييييييييييييييير كدة
على بالحرام انا لمن ضقتها ، قربت امشى افتح بلاغ
والله تجيبى شطةسوق نسوان السودان من نخلاتك يا حلفا للغابات ورا تركاكا
ومن دارفور الحرة نبيلة لكل قبيلة على التاكا
على مر قرون من اعياد الضحيه وكل "المرارات"* التى "تتأتى"* من جراء
هذه الاعياد ضحية
ومعها كل الكرامات والحريات والحوليات واللآظار* والحرارات*
والعزايم ساى
ما يحصلوا ، لذعة هذه المادة البقدونسية المظهر الثعبانية الجوهر
انا باكل جاينيز
معانى المفردات
الكلمة معناها
مرارات جمع مرارة
تتأتى يغمرها الأتى
الآظار جمع ظار وهو ضرب من الخيوت
الحرارات جمع حرارة بضم الحاء وتشداديد الرائين هى خروف يضبحه اهل النفساء تانى يوم طوالى ، فرحا بالحلل
اللهم انى بلغت ، اللهم باكل جاينيز
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: Tumadir)
|
سلام مربع
قرشو
انا طبعا ماشفت في حياتي مدني ، لكن صورتك دي .. لكن الصورة وصلت خاصة الجزء الخاص بالعرق والنخرين ..
انا ما قلت حاجة .. بس متخيله المنظر كيف بكون . .
والناس البتقرف ياجماعة يتذكروا انو نحن بنتكلم عن الشطة بالدكوة والليمون وانو مازالت الكورية مليانه
اما الكوراع (الباربكيوي) دي اول مرة اسمع بيها .. هي مسلوقه .. فيها شوية كلام
يقوم يشوي كرعين البقر ..
لووووووووول ياقرشو .. دي عايزه ليها قعدة طويلة ونقه كتيرة هنا
بس لسعة انا محتارة انو دا جوع شنو دا ، اللي خلى الناس تاكل البقرة كلها وما تكفيهم وبعد داك يجيبوا كرعين البقر وياكلوها
عشان كده بقولوا (كراع البقر جيييييابه) ..
يعني بتجيب الفرق
لووووووووووووووووول يا عمده .. امزح . بس الفكره حلوه
تستاهل هذه اللول .. اصلي كده ..
مايا
مجنتره تعني .. مفلكبه بضم الم ... اي هنالك اسلاك ضاربه في الراس . او كهرباء زايدة شوية ..
عارفه دقه القونقليز دي . هي ودقة الدوم .. طبعا هنا مافي
لكن حقيقي حقيقي .. احلى من اي شوكولا . ولا توفي مارس
سلمت ياستي
تماضر حبيبة البي
لوووول في فتح البلاغ دي .. تعرفي لحدي هسع انا بضحك
ومتخيلااااااك لافه المطعم بحركة مسرحيه تشيلي وتسكلبي
الليلة وب علينا .. الياباننيييين ماهردي لهاتي يا ساريه
وساريه يشيل ويجري .. ويزرزر ليك الياباني الفونط داااااك
بس الكلام دا حقيقي ؟؟
ياااااخي اليابانيين ديل حيرونا في اي حاجة فاتونا
ديل تلقاهم هسع بتلكوا سوداني احسن مننا ذاتنا
ديل شنو ديل . لازم يطلعونا الطيش في كل حاجة
حتى الشطه بتاعتنا
اها او عي واحد يطلع ويقول لي عندهم (وزير داخلية) بوضح كلامو اكتر من وزيرنا الهمام
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
سلام مربع
serenader
يا خوي انت ماشي بعثة اكل ولا شنو
؟؟
شوية شوية على بطنك
بعدين الملوخية دي مابياكلوها طوالي كده
من غير ماتعمل لي بطنك
تسليكات واجبة
كأن تشرب عرديب
لمدة يومين
ثم تصبح بالجبنة وشاي احمر تقيييييل
ثم تشرب ااااابري
وبعد داك ممكن يسمحوا ليك تاكل شوية شوية منها
يعني قدر لقمتين بس
وبالرز كمان من غير كسرتك المررررره
اتعلموها بأأأأأأ
بعدين تامبيييييرا دا شنو ؟
عايز تقدسني ؟
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
تخيلي يا شيري
بعد رجعت من العراق حلفت ستين يمين إلا أمشي السودان- ما مصدق طبعاً إني طلعت سالم، وعيوني بالخلعة زي البصل في ملاح الروب- المهم بعد خنق وفطس قالو لي أمشي
فترب طفرت في أقربها طيارة.. وعشان ما أتعبك كتير بتفاصيل المرمطة في المطار وبراه، وصلت البيت زي سبعة مسا.. أول طلب قبل ما اسلم على أمي كان العشا بوش... وداير بوش شطته تنقز براه من شده ما سخنة، وجبنته بتتسوك بي سقنال تو
وجابو البوش
وانمعست لمن قربت أنشق.. عاد الساعة الغطست ليك في طشت البوش التقول غرقانة لي فيهو فولة، وهاك ياغرف.. مضغ مافي، ابلعك وألبعك (دا جناس غير تام، ويمكن مطابقة) المهم أكلت لمن بالليل غلبني أنوم، بالله الليل كلو حايم في حوشنا الورا داك، ولمن أتعب أرقد، بطني واقفة زي التامبيره (خلي يترجموها ليك دي).. وبكرة الصباح
حلفت تسعمية يمين إلا الغدا خدرة لايوووووووووووقة بي كسرة مرررررررررررررررررة
وجابو الخدرة... هي خدرة نصاح؟ من شدة ما لايوقة إلا غسلت يدي بي سنر (بتاع البوهية
والكسرة من شدة ما مرة لحدي ما حسيت إنو مرارتي طلبت إجازة بدون مرتب
وانمعست ليك بالخدرة
أها بالليل بطني قالت لي نوم
بالمختصر المفيد.... ركبت أول طيارة راجعة هنا
فل ستوب
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: elsharief)
|
سلام مربع
صديقتي بت قضيم
انت عارفه انا مبغبغة بالفصاحة سااااكت
ماتشوفي هترشتي دي
اختك بتاعة كلام بس
الشريف
وانشاء الله تكون حصلت ليك حاجة كده
غمستها بالشطه المدنكلة دي
عارف الشباب سبقوك واكلوا الفسيخ والتبش
بس عشان خاطرك ياسيدي
انا ح اظبط ليك فسيخ تاني
سلمت ياسيدي للطله
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
العزيزه الشديده جدا
شيري
قالت الاعراب
تامبيره تعني تامبر
وده اخو الزرديه الخربتي بيها العربيه
وتامبيره تعني
سمكه في النيل الابيض
عندما يزعلوها بالضرب علي بطنها
تنتفخ
كلما زاد الضرب ...كلما زاد الانتفاخ
المعلومات من
قاموس
الشدائد
في المكائد
للمسحلب الطاقوشي
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: alfatih)
|
سلام مربع
لنا مهدي
سلمت ياشفيفه لهذه الطله البهية وسلمت اكثر لكونك منحتيني تفاؤلا بأن الايام الجيه
ربما تكون احسن شوية من هسع
يارب . . وانت كمان ايامك تكون كلها افراح
وما تنسينا برضو .. فاما انا فلا يمكنني ان انسي حبيبا سلمني باقات من الحب
بشكل الورد
الفاتح
سلمت ياسيدي لهذه المعلومه القيمه التي ااسعفتني بها
لانني فعلا ما كنت عارفه ان المثل دا معناهو كدا
وان فعلا التامبير ببتنفخ من الزعل
الله كفينا شر الكلام البجيب الزعل
وينفخ البطون
سلمت ياسيدي الف مره
| |
|
|
|
|
|
|
|
|
|
Re: أين مني كورية شطة مدنكلة وكميات من شرائح التبش (Re: shiry)
|
سلامك دائما مربع يا شيري كم مساحةذلك المربع...ايوجد به متسع
ما اجمل ان يكون المرء مبدعا حقا وهو لا يدري...و ما اروع ان يرسم المرء من بساطة الطبيعة والحياة الاجتماعية السلسلة السهلة معن يستعصي سبكة في حديقة وردية من الكلمات على نحو ما تفعلين ايتها المهندسة الصغيرة رعاك الرحمن ما اقمت واينما حللتي .....
وبمناسبة الشطقة والليمون .. خلينانشاغل اولاد اعمامنا الشوايقه شويه...
شايقي شاف خطيبته بعد طول غياب وفعل به الشوق اي ما فعل: فقال لها والله ممن ا شفتك ريقي جم... قالت ليه في استحياء مشاغب ..جم جمن عيونك اني ليك ليموناي " ليمونه"
قال ليها ليموناي وعليها شطايي كمان...
اخوكم ابوساره
| |
|
|
|
|
|
|
| |
shiry
اسامة الخاتم
Al-Masafaa
ولياب
مهاجر
nazar hussien
أبوالزفت
alsngaq
tmbis
aboalkonfod
ايهاب
alfatih
HAMZA SULIMAN
sari_alail
ABUHUSSEIN
benyya
Tumadir
قرشـــو
بت قضيم
elsharief
lana mahdi
فيس بوك
تويتر
انستقرام
يوتيوب
بنتيريست