|
|
 في الخرطوم: أسرة تتقبل العزاء في هرتها
|
الخرطوم : ياسر المساعد
في سابقة نادرة من نوعها اقامت عائلة سودانية تسكن ضاحية الرياض الراقية شرقي الخرطوم ، مراسم عزاء حزين لهرة تطلق عليها اسم" روني" كانت تعتني بتربيتها ابنة الاسرة الصغيرة وكانت قد جلبتها العائلة قبل سنوات من العاصمة البريطانية لندن وان اهل الحي فوجئوا قبل ايام بصيوان صغير للعزاء في منزل الاسرة المعنية علموا فيما بعد ان كل ذلك كان من اجل نفوق " روني" الهرة المدللة للعائلة.
المصدر
صحيفة الخليج
يونيو 4
|
|
 
|
|
|
|
|
|
|
|
Re: في الخرطوم: أسرة تتقبل العزاء في هرتها (Re: sympatico)
|
يا ربي الكديسة دي تركت ثروة تقدر بكم؟
السودان بلد عجائب والله، لكن ده مؤشر جيد لقرب يوم القيامة الذي اعتقد انه سيريحنا في حسم كتير من القضايا أمثال مشاكوس والمؤتمرين الشعبي والوطني والكيزان و....الخ من الأشياء التي احترنا في حلها
| |
|
|
|
|
|
|
|
|
|
Re: في الخرطوم: أسرة تتقبل العزاء في هرتها (Re: sympatico)
|
اسع يا رجاء الدخل مشاكوس في صيوان العزاء الفي الرياض ده شنو ولاساكت كده لو ماتت كديسة يحشرو السياسة
دي سوات بتاع الشرطة السعودي الجنو جن سواقين اللموزينات والمصرين
اها قامو اتصلو عليهو وهو راقد في بيتو مع مرتو قالو ليهو في حادث في الشارع الفلاني طوالي قال ليهم غلطان بتاع اللموزين
قالوا مافي ليموزين
طوالي قال غلطان المصري
وتعازينا
لجميع الهررة والكدايس داخل وخارج الميدان
عنيزتنا الدوام لله
عنيزتنا البتسوي الشاي
كانت عادية
عنيزتنا
وتملا الكورية
عنيزتنا
الدوام لله
| |
|
|
|
|
|
|
|
|
|
Re: في الخرطوم: أسرة تتقبل العزاء في هرتها (Re: sympatico)
|
أخي الكريم
إذا كان هناك ملح إنجليزي وفيلم إنجليزي ومدرس إنجليزي وحصة إنجليزي وفريق إنجليزي ومفتاح إنجليزي فبالضرورة هناك كديس إنجليزي وهو دون شك لا يشبه كدايسنا ، فإذا كان هناك أسباب جعلت من الخواجات يقيمون مع قططهم وكلابهم وحيواناتهم الأليفة علاقات حميمة يأكلون معها ويشربون معاها وينامون معاها ولا أزيد بسبب فتور العلاقات الإجتماعية فما بال قومنا يفعلون مثل ما يفعل الإنجليز ، هل الحضارة والشطارة تتمثل في تلك القشور والتي لها ما يبررها لدى الغرب أما أن في الأمر بد ولابد مما ليس منه بد.
| |
|
|
|
|
|
|
|
|
|
Re: في الخرطوم: أسرة تتقبل العزاء في هرتها (Re: Raja)
|
عندما قراءت هذا البوست قبل فترة تعجبت وصدقت ولم اصدق
الا انني عندما ذهبت الي الخرطوم دخلت احدي المتاجر لاجد قسما مخصصا لاكل القطط وهو عبارة عن معلبات مستورده.... فتذكرت هذا الخبر ولولا ضيق الوقت لذهبت لاداء الواجب رفقا بالحيوان
| |
|
|
|
|
|
|
|
|
|
Re: في الخرطوم: أسرة تتقبل العزاء في هرتها (Re: sympatico)
|
الغريبة أنا سمعت أن هناك أحد سكان حي الرياض حمل صينية الغداء إلى بيت جاره الذي توفي والده ظنا منه أن الفراش مفروش والناس جالسة ومالية البيت ، ولما وصل وجد باب الجار مغلقا ، فنقر ، فخرج إليه جاره ، ولما رآه يحمل صينيته قال له :
خلينا ليكم أمدرمان لحقتونا هنا بي صوانيكم دي
| |
|
|
|
|
|
|
|
|
|
Re: في الخرطوم: أسرة تتقبل العزاء في هرتها (Re: sympatico)
|
وقد كانت الفقيده روني رحمها الله تمر بازمه نفسيه بالغه بعد إنهيار علاقتها العاطفيه مع الكديس زعموط احد دونجوانات المجتمع الكديسى
المرحومه رونى تخرجت من الجامعه الانجليزيه العريقه
University of Cat-bridge
ومن ثم التحقت بشركة
Cat-erpillar
حيث تدرجت بالسلم الوظيفى حتى تم تعينها مديرا لفرع الشركه بالشرق الاوسط
يشاع ان اول لقاء لها بزعموط كان فى افتتاح معرض الشركه بمدينة هر-ارى حيث كان زعموط حينها مندوبا لاتحاد اعمال القطط الصناعيه
زعموط كما يشير اسمه كديس عصامى من اسره فقيرة الحال كانت تقطن كرتون سته حيث ترعرع فيها زعموط واتقن بها فنون الكدسنه واحترفها مع رفيق عمره كدوس
كانت الفقيده رونى تنظر إليه ككديس احلام قل ما جاد به الزمان فهو شاب طموح جرئ له تاريخ سياسى مشهود ابان دراسته الجامعيه وله صولات وجولات مع كلاب الامن انذاك...لم تكن تدرى حقيقته ومغامراته العاطفيه الملتهبه
فى الحلقه القادمه سنرى كيف تسلل زعموط الى قلب رونى واحتله فابقوا معنا
| |
|
|
|
|
|
|
|
|
 Re: في الخرطوم: أسرة تتقبل العزاء في هرتها (Re: sympatico)
|
ولد دا قال ليك عزاء لكديس اقصد قط
( بعدين ولد دا تعبير يعني ماانت ) لوول
يارجاء كان من بدري عارفين الخبر
كان رسلتي قصيدة الرثاء بتاعتكم مع شوية تغيير
كي تناسب المرحومة روني
كان هسه رسلوا ليك 6 الف دولار مثلا في مصر نفعتك هسه
او انا متبرعة بعمل قصيدة رثاء
لاني تأثرت فعلا بس للطفلة اكتر من الكديسة
ورضيانة ب 3 الف دولار بس ما مشكلة
ولدا دا ( المرة دي انت زاتك )
واصــــل بالله
عمل شنو زعموط ؟؟؟
| |
|
|
|
|
|
|
|
|
|
Re: في الخرطوم: أسرة تتقبل العزاء في هرتها (Re: sympatico)
|
تطلعت رونى ذات اليمين وذات الشمال وهى تعبر قاعة المعرض بدلال قططى مدروس. كان لطقطقة الكعب العالى وعبير كديستيان ديور دورا كبيرا فى لفت انتباه زعموط الذى كان حاضرا بدوره وبوسامته انذاك
"دينى انا ودين ابو ما كده زاتو" غمغم زعموط بتلك الكلمات وهو يلتهم رونى بعينيه متفحصا قوامها الممشوق وعينيها الخضروان ثم ارجع البصر كرتين وهو يتطلع ذلك الذيل الذى طالما حسدنها فيه صويحباتها فانتفض قلبه وزادت دقاته متجانسه مع طقطقة الكعب العالى
"واى جنيس ده ما بنقدر عليو" صرخ بهذه الجمله فى اعماقه فقط ولكن انفاسه المتصاعده وإضطرابه الملحوظ حملا إعجابه الى رونى، هكذا اخبرته رونى لاحقا بعد هذه الليله المشهوده بشهر
واخبرته ايضا بانها شعرت بإضطراب وكبكبه خصوصا بعد ان اقترب منها هامسا :
"Good Evening"
تطلعت اليه بغنج قبل ان ترد تحيته باحسن منها
Good evening, how are you
- Have we ever met before
لم يدرى زعموط حينها لماذا سأل هذا السؤال والذى يعتبره من اغبى بل واتفه انواع الحنك وهو دونجوان وبلير خطير
"الله يازى الكبكبه وسنينها وشهورها زاتو"
وتذكر فجاءه تلك النكته التى سمعها فى شريط فرقة كدسو الفكاهيه عن قطة الحله التى يتكبكب كدايس الحله كلما رأوها قادمه من مدرسة ابوهريره الثانويه بنات. تقول النكته "كلو ما تفتح باب البيت ويشوفها واحد من كدايس الحله يتكبكب ويقول ليها آآآ اخوك طوجود مطروش؟ وهو يقصد اخوك طروش موجود المهم واحد لملم روحو وقال ليها آآآ اخوك طروش موجود؟ فاجابت بى دلع لا مرق مع ابوى قام الكديس قال ليها طيب لمن إجى نقول ليهو منو؟؟"
عند هذه النقطه تبسم زعموط وتمالك نفسه وعرفها، اى نفسه، لرونى بانه مندوب اتحاد اعمال القطط الصناعيه بالسودان
حينها صرخت رونى : "Oh My God
دادى ومامى برضو من السودان"
هنا ارتسمت دهشه حقيقيه فى وجه زعموط وتسأل كيف لهذه "الجكسويه الشرط"، على حسب تعبيره السوقى طبعا، ان تكون من اصل سودانى بل هى كما غنى المطرب الشعبى ابشنب متسأئلا امن حور الجنان ام انت كديس الكمال
- والله ما بصدق معقوله الحلاه دى كلها وتقولى سودانيه؟
- Oui بس ما قلت لى اسمك منو
هنا تحرج زعموط هل يخبرها باسمه الحقيقى؟ زعموط؟؟ الله يديك العافيه يا حاج كدباس ابوى ما لقيت لى غير اسم زعموط ده؟؟ مكلفين روحكم وضابحين خمسه فيران فى الاسم الفقر ده؟؟
قطعت رونى حبل افكاره متسائله مره اخرى
Excuse me, what's your name again
تنحنح زعموط وهو يرد بحذر
- احم احم آ احم اسمى زع زع مو ؤو ؤط، زعموط لاكين ده ابوى...آ
قاطعته بصرخة اعجاب ساذجه تدل على هبل فطرى
- WOW, thats a coooooooooool name
"البت دى عبيطه يا الله ولا ياها دى سماحة جمل الطين البتقول عليها امى حاجه كديسه؟؟"
هنا ادرك زعموط سذاجة رونى وتحفذت نفسه الاماره بالسؤ للايقاع بها فى شباكه
كيف وعدت رونى زعموط بلقاء اخر وماذا دار فى ذلك اللقاء وكيف اقنع زعموط رونى بالعوده الى السودان والعيش هناك، هذا ما سنعرفه فى الحلقه القاده فابقوا معنا
| |
|
|
|
|
|
|
| |
Ahlalawad
قرشـــو
zola123
ابو جهينة
Raja
albagir altahir
almulaomar
Rawia
abdelrahim abayazid
ABU QUSAI
ودقاسم
ود شاموق
Mayada
HOPEFUL
ملكة سبأ
فيس بوك
تويتر
انستقرام
يوتيوب
بنتيريست