سلامك قرأت لك تعليقا في بوست رفدية دافي واستيائك وخجلك من كلمة واااي التي استخدمتها بكل حسن نية كما جاء في كلامك وكما هو اساسا واضح في مشاركاتك وهسة يقولوا فكيت خيمة الموضوع نصبت لي خيمة براي ليه؟؟ والإجابة هي لفت نظر وجر مشاكل ياخي من الأخير كده يعني عشان ما في احسن من الوضوح
والحقيقة انني وددت يوما ان افتح بوست بعنوان (جنس خفة دم) وددت فيه أن افتح خط نار (جديد) على الشباب السوداني ذوي التفكير البائس وخفة الدم اللطيفة التي قد تحيل كلمة قيلت ببراءة إلى جريمة سخرية وتريقة ودلالات بايخة مزعجة ومحرجة في آن
بعدين قلت ما في داعي لوجع الراس،، لانه الموضوع سيفهم بطريقة شحصية ،، مع اني قاصدة الشاب السوداني على وجه العموم،،ثم اني ما كنت فاضية
لما قرأت ردك اليوم احسست ببعض حزن في نبرة حديثك وساءني ذلك جدا وزعلت ليك واحببت أن اقول،، هو كذا الشاب السوداني،، واحدد السوداني لاني مش من جزر الكاريبي،،،أي لا علم لي عن الأجناس الأخرى
مرات مرات الشاب السوداني من السخف بمكان أن يهزر هزار شبابي دون مراعاة الحياء العام وهو يفكر أن له الاحقية على تفسير وتدليل الكلام على حسب هواه بما ان الفتاة التي اجرمت بقول كلمة سودانية يرددها الأطفال والكبار،لم ترعوي ولم تنقى كلماتها وتفصفيها وتلبسها الجزمة والشراب قبل ما تقولها شان يقولوا عليه كلام اولاد ناس كأنوا في كلام بتاع اولاد فيران مش كل الكلام كلام الناس
وهذا السلوك ليس حكرا على شخص محدد،، كلهم كده ابتداء من أخواني الذين يظنون أن حديثهم البايخ وضحكهم اللامعنى له ،، مشروع ،، وان اللا مشروعية تكمن في استخدام البنت لبعض الألفاظ التي هو يفكر بها تفكير سئ الجملة دي هندية كده قصدت اقول ،،والنوم كابس علي وانا مصرة اتلادح واكتب الآن،،، قصدت انه لا يلوم تفكيره المعفن بل يلوم البنت لعدم مراعاتها تفكيره المعفن هذا سبحان الله
فلا تتضايقي ،، ينبغي أن تطنشي مثل هذه العوارات،،، ولو زاد الامر اديهم في راسهم تماما كما تفعلي مع اخوانك في البيت فكلنا هنا اخوان ونحن انعكاس طبيعي لشعب كبير اكثر ما يميزه تسامحا كبيرا وقلبا يغفر بمنتهى السهولة
ونيابة عني واصاله عني برضو اعتذر لك عن كل تعليق سبب لك هذا الضيق وذاك الحرج ووجع الكلام
اختك الملقبة بجنابو (حيث لي جولات سابقة في هذا الشأن)،، بت قضيم
والله يا هوبليس يا ريتك قلت لي يا عمتو كان اقدر اقول ليك عمى الكباسة ولو قلت يا خالتي كان قلت ليك خلال الشوك اما امي فيقال انو بليق عليها ام بنتو لكني لا احب ان اربط مثل هذا الاسم الجميل (الوالدة) بأي من سجعنا الجميل
ولك عليا اكون حبوبتك عديل كده لو فسرت الطلاسم السابقة دي
يا هوبليس يا بني لك التحايا قدر ده والشكر الحقيقي لسلوكك الراقي ورغم ان درر طنشتني ،، لكني اظنها ستقبل اعتذراك الجميل هو انت بالله كنت منهم؟؟
والله دى ما كانت وآآآآى اعصابك .. الزعلك شنو كدا ؟؟ الشاب السودانى السخيف
اتفق معاك فى بعض الامور ولكن قد يكون ايضا ليس سخيفا ولكن ما باب الداعبة والمزاح لا ادرى ما الذى دوما يجلعنا نوصم بالجدية وعدم القدرة على المزاح ونصبح ثقلاء الدم
هذا يذكرنى بشخصيتين ميشو اللبنانى وتجتوج السودانى بقدر ما رايت فى الاول سخفا ومحاولات لخفة الدم كنت ارى بعض السودانيين ناهيك عن الجنسيات الاخرى يصفونه بخفيف الدم وعندما جاء نظيره (بتاعنا) نفسهم وصفه بالسف والعبط كان ليس من المفترض ان يخفف هذا الشاب السودانى السمين دمه اكثر مما يجب لذا قد يكون تعليق على كلمة من باب المزاح ولكنها عندما تصدر من هؤلاء السودانيين الجادين الرسميين تكون غير محببة للجمع والمجتمع وغير مستساغة لاذن الفتاة السودانية ولا اقصد بلا شك المهنى الذى قد يضم الاساءة او الاستفزاز بقصد معين
اؤيدك واحي الاخت صاحبة الواااااي والواي دي من العليها
فلتستمر الوااااااااااي
كتبت -------- كأنوا في كلام بتاع اولاد فيران مش كل الكلام كلام الناس ---------
وبالمناسبة دي اتذكرت حكاية طريفة - محزنة ؛ كان حاضرها معي الاخ ادروب ود الخطيب
اذكر في عام 1993 ؛ كنا في زيارة لموسكو ؛ وكان السودانيون يسموا الافارقة هناك "الفيران" ؛ومرات يقولوها عن نفسهم ؛ وهي كلمة قبيحة حاولنا معارضتها ؛ فكان الرد : اسكت يا فار انتا
علي العموم ؛ مرة قرصت معانا ؛ ونزلنا من الداخلية برفقة الاخ ح.س ؛ وهو من اكثر الناس تهذيبا ولطفا ؛ وامام الدكان كان هناك صف ؛ ومن بينه شاب اسمر لابس فنلة كط ؛ والجو مايل للبرودة
الاخ ح.س علق ؛ وفي ذهنه ان الشاب من غرب افريقيا : بالله عليكم الله الفار دا ما بردان ؟
فما كان من صاحب الفنيلة الكط الا ان التفت اليهو وردا بكل لماضة سودانية : ابدا والله ؛ الفار دا ما بردان
وواااااااااااااااااااي
انا طبعا فقعت اكبر ضحكمة عندي ؛ وصاحبنا ح.س قعد في التحنيس : سوري يا اخونا ؛ والله ما قايلك سوداني ؛ والله ما قاصد حاجة ؛ ودي كلمة عادية بنستعملها ؛ وانت برضو يتستعملها ؛ موش كده ؟
صاحبنا داك ردا: ابدا والله ما بستعملها
ووااااااااااااااي تانية
وح .س مواصل : يا اخي اسمع ؛ فرصة سعيدة ؛ انا اسمي فلان الفلاني ؛ انا بدرس هندسة ... في كلية ....؛ وانت بتدرس وين ؟
داك اجاب وهو ماشي علي التكسي ؛ علي قاعدة حل من روحي : بدرس في الطب التاني
والتكس متحرك وح.س جاري وراهو : خلاص اديني عنوانك ؛ نتعرف وكده ؛ والله ما قاصد ؛ فرصة سعيدة يا اخ ؛ في ياتو داخلية ساكن ؛ الغرفة رقم كم ؟
وكسح التكسي دون ان يجد اجابة
وواااااااااااااااي
في ذلك اليوم ؛ ضحكت كما لم اضحك من قبل ؛ واحرج ح.س كما لم يحرج من قبل وكانت لنا عبرة
يا بت قضيم وضع السيف فى موضع الندى مضر كوضع الندى فى موضع السيف قبل ما اعلق على اتهامك وتجريحك للشاب السودانى بساطة شديدة ما الداعى لاستخدام كلمة واااااااااى فى كل المقالات المعنية لاننا ضمنيا والجميع يعلم ذلك متى واين تستخدم ومن حام حول الحمى اوشك ان يقع فيه
05-31-2003, 10:23 PM
بت قضيم بت قضيم
تاريخ التسجيل: 07-05-2002
مجموع المشاركات: 2048
يا جماعة اشكر فضلكم وردودكم ويا عادل ضحكتني لما ازداد انتفاخ مرارتي اصلها منفوخة خلقة بالغ صاحبك وزولو الثقيل حقيقي ثقيل كان يفردها معاه حبة يعني صاحبك دخل في اضافره
وددت أن اقول شكرا لكم كثيرا على الرد واعتذر عن تأخرى ردي لكني كنت مشغولة جدا والحقيقية ما زلت
ولجميع من ناقشني في المشاركة اقول اعود لنقاش ما عممته عساني افلح في توصيل الفكرة
واخص الاستاذ الموصلي بكلماته الجميلة والتي حقيقي اندهشت لها لم اكن اظن اني عاقلة ،، آخر ما اوصف به نفسي من الصفات الجميلة لذا حاقشر بيها كتير خصوصا انها جاية منك تسلم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
بت قضيم
Elmosley
Abdel Aati
فيس بوك
تويتر
انستقرام
يوتيوب
بنتيريست