|
|
 كيف تفـقع مـرارة خبراء الكومبيوتر
|
اول الحكي
ورأيت بان آدم وهو يجن ، فيقتلع الشجر المتطاول
يبصق في البئر يلقي على صفحة النهر بالزيت
يكسن في البيت ، ثم يخبئ في اسفل الباب
قنبلة الموت ، يؤوي العقارب في دفء اضلاعه
ويورث ابناءه دينه .. واسمه .. وقميص الفتن
اصبح العقل مغتربا يستول ، يقذفه صبيه
بالحجارة ، يوقف الجند عند الحدود .وتسحب منه الحكومات
جنسية الوطن . وتدرجه في قوائم من يكرهون الوطن
…
ورأي الرب ذلك غير حسن
امل دنقل - العهد الاتي : الاصحاح الثالث
___________
اصل الحكي
مشاغبة انا وكاااويا لاخر حدود اتساع نفخة الفشفاش وانفجاره .. غيياااااايظه بدرجة تفقع المرارة .. اصلي كده وسمجة سماجة باندوث بكري لمن يقفل .
لذلك قررت اليوم ان اريكم سادتي بعض اشكال هذه السماجة التي سوف اتلادح بها على خبراء الكومبيوتر .. ودعونا نرفع ضغطهم درجات شوية كده . ماذا سيخسرون ؟ فهم يستقبلون من السمجين امثالي الوانا من الثقاله واللداحة خلوهم يستزيدوا بواحده منها .. الم تستوعب حكومتنا الرشيدة مبارك الفاضل .. اهي كلها لداحة البتقع من السماء تتلقاها الواطه .
كأن يكون لديك مزاج عالي في الدخول الى عالم الانترنيت .. فتشيل الهاتف وتتصل على احدى هذه المعاهد وعلى كثرتها : لو سمحتي بدرسو انترنت موديل 2003 .. وتلك السكرتيرة من طول بالها تجيبك . ايوه بندرس انترنيت .. وبما انك لديحه ولاييوقه .. فتسألى : بس انا عايزه انترنت بالسوداني مو بالمصري .. وتجاوبك من هناااا : ايوه انسه عندنا كلو . لانها تسعي وراء فلوسك . وبما انك تفرغتي لها فكان لابد ان توصليها معاها الى هنا برضو : بس ح تبدوا لينا بالهارد دسك ولا الفيروسات .. لانو انا سمعت انو الباندوث تقيل خالص على الفلات رون لانو انا اشتريت كومبيوتر مقاس 13 بوصه . وبما انها كرهت ريالاتك التي سوف تنعمين عليهم بها . فتيجبك بزهههههههج : طلاتشر ايه يا انسه ..
وتجيبيها ببرود : اصل واحده صاحبتي كان عندها 13 بوصه جالها فيروس في كرت الصوت فقامت لغت اشتراكها على الهوت ميل : ولأن مدة المكالمة لازالت في الحد المسموح به فيجب ان تسأليها سؤال اخير لتبيني لها انك اقتنعتي بوجهات نظرها الفنيه . طيب هسع توصيني بان ادرس الهارد دسك ولا الفلاش .. اصلي بحب القيمس اوي .. ولا انت شايفه انو الواحد يتكل على الله ويدرس انترنت عربي . موش برضو الانترنيت افضل من الهارد دسك ؟
او تشيلي ريالاتك وتنقش تنقش تطلبي من اخيك ان ينزلك في مركز (الستي سنتر) بطريق المدينه او مركز الباروم حيث تتراص محال الكومبيوتر وباجهزتها وهناك كلهم تجدينهم ينشون الضبان وعلى استعداد لبيعك اي شيء تريدينه من الكومبيوتر انشاء الله علبة صلصة على اساس انها بديل عصري للمايك . وتدخلي المحل وما ان تعرفي انهم يعيرونك انتباهتهم فاسأليهم هذه الاسئلة :
- ياخوي بسأل عندكم وندويز اكس بي ملون ؟ اصلوا الابيض واسود قالوا الهارد دسك بتاعه مافيه بور .؟
- وحينما يفتحون خشومهم دهشة وبلاده . تّقلي العيار شوية واشوي كبدتهم شيا حارا ..
- لو سمحت ياخوي كنت عايزه حبر لشاشة ال جي فلاترون الاشتريتها امبارح اصلوا اخوي الصغير خلاها كاشفه قام الكرت بتاع الشاشه نشف من الحبر بتاعو .
- وتتاكدي من احكام غطوتك على وجهك وتفسحي لعينيك خرم بسيط تكحلين به محل الطابعات الانيق ذااااك ، ثم تنقش تنقش تدخلينه ليقابلك الهندي بشعره المجلط حتى اخر سبيبه : سلام عليكم . سديك .. انا في برنتر ليزر سكس ال وانا في اشتراك انترنيت انا في برنامج فلاش فيرشن فايف في ابغى ( اطبع بره)_ وهذه هي الترجمة العربية المعتمده عندك لـ كلمة برنت اوت . _وانترنيت ما يعرف برنتر انا .. انا في ثلاث يوم حطها سوا سوا الكومبيوتر وهو مايبغي يعرفها .
- وعندما لا يفهمك هذا الهندي .. سيهرول اليك صاحب المحل السوري التخين حتى قلوزة الكرشه .. وعلى الفوري ترجمي سؤالك الى العربي وقلوزيهو :
- ياخوي والله انا عندي شغل على الفلاش فيرشن فايف حبيبت اطبعو من الانترنيت على برنتري الليزر مارضي يطبعها . صاحبتي خبيرة في الكومبيوتر قالت لي لازم تعرفي الكموبيتر على البرنتر . وانا لي اكثر من ثلاثة حاطتها جمب الكومبيوتر ومارضي يتعرف عليها ؟
- امكن يكون اشتراكي في الهوت ميل خلص؟؟ . مع انو اشتراك فري .. بس تفتكر انو ناس الهاتف السعودي ليهم دخل في الموضوع اصلو اخوي ماسدد فاتورة الهاتف . ؟
- وعندما ترينه يمعط ويزعط في شعر رأسه .. اياك ان تحني عليه .. فتوكلي على الحي الذي لا يموت ودردمي سؤالك كويس ثم القيه على حجره :
- ياخوي انا بشتغل كثير على القيمز وسمعت انه ح تنزل حروف جديده للوحه التحكم هي نزلت ولا لسع .!!
- وبما انكي فقعت مرارة هؤلاء العرب والعجم . فتحولي الى المحل الانيق الاخر الذي يتخصص في الانترنيت واسأليهم طوالي :
- ياخوي قالوا في حاجة جديدة نزلت اسمها ايزي ديسك بديلا للهادر دسك . الاقيها واااايااكم . .. اصلوا الهارد دسك بتاعي بقت تجيه في الايام الاخيرة فيروسات كثيرة ، قمت رشيتو بي بف باف ..قام لخبط لي كل الادريستات (جمع عنوان من ادرس) . وطلب مني في الهوت ميل لازم اسجل الادرس كامل من المحل الاشتريت منه كرت اشتراك الانترنيت.. الحين جيت اخذ صندوق البريد بتاعكم وتوقيعكم بتاع الغرفة التجارية قالوا الادريس ضروري يكون صاااااح .
-
|
|
 
|
|
|
|
|
|
|
|
Re: كيف تفـقع مـرارة خبراء الكومبيوتر (Re: shiry)
|
غايتو يا شيري
أنا أحس بأني سعيد جدا
لاني لست بتاع انترنت
بالله ممكن تقولي لينا الأشياء والمحلات التي تترددين عليها
أو لديك تعامل معها
عرفنا منا حتى الآن الانترنت ، والجزر
والكمونية
الباقي بسرعة ، عشان ما نقع في طريقك
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: Ahlalawad)
|
سلام مربع
ودنمر
بالله موش ريحتك .. اصلي مغييييوظه منهم
اديها صنه شويه ..
سلمت ياسيدي للطله
ابو فاطمه
ود الانا قاصداهو .. موش في الاول حذرتكم من سماجتي
لا سيدي مابين زعلنا ..مفروض هم الليزعلوا موش انا .؟
سلمت ياسيدي للطله
اهل العـوض
عربية التراب .. وحراج الصواريخ
بالله انت كدي قول لي : انت وين ؟
عشان اتشبك في تخصصك ؟ اصلوا الشبك بتاعتي ماعايزه ليها درس عصر
موش انا لديحه وسموجه
سلمتم كللكم للطله
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: shiry)
|
يعني مش مكفيك فقيع مرارات الناس الهنا كمات مشيتي لناس السوق؟؟؟؟
اسمعي انتي مش قلتي عندك اخوك فتح ليك وشك خلاهو ليك زي خور عمر؟؟؟
انا يا دابي عرفت السبب شنو
اللهم لا نسالك رد القضاء ولكن نسالك اللطف فيه
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: ود عقاب)
|
شيري
فقع مرارات روعة
معانا واحد هنا متخصص في فقع مرارات الهنود
كان في البداية عاملها نوع من التسلية
ما بيخلي صاحب برادة او مجزرة او محل كمبيوتراو عطورات
وحتي الخبازين ما بيسلموا منو
هو درس في الهند
وعمرو هنا ما دفع لي هندي ثمن الحاجة البشتريها
يمشي يسالم عن تفاصيل تجي زي
شعيرات الفشفاش
وفي النهاية يدوه الحاجة العايزها مجانا
او علي الاقل يرهن ساعتو
ولحدي الآن رهن ساعتو وجزمتو وخاتمو وفنيلتو
لكن بيقدر يشيل منهم العايزو
وعندو عبارة مشهورة بالهندي بيقولها ليهم
كل
بفتح الكاف وسكون اللام
معناها باكر
واي من باكراتو لسة ما جات
الهنود مسمينو محمد كل واصبح الان مشهورا بينهم
| |
|
|
|
|
|
|
|
|
 Re: كيف تفـقع مـرارة خبراء الكومبيوتر (Re: shiry)
|
شيري
نزيدك من الشعر بيت
الله يكرمك اخوك مرارتو مفقوعة من سنين
ونديك من ارض الواقع - كل الذلى ساحكي حصل لي وهو
جاني مره واحد شايل جهازى وكان عطلان وبعد الكشف المبدئي اتضح نقص في ملفات التشغيل
المهم عندما اتى لاستلام الجهاز سالني ما مشكلته بكل بساكة قلت له اصيب بفايروس
فما كان منه الا ان قال الفايروس دا وينو عايز اشوفو
_________________________________________
ومره اتصل واحد وشكا ألم جهازته ومن الاعرض عرفنا انه مصاب بفايروس الحب (آنذاك) فما كان منه الا ان اتي الينا وقال خزو منى هذا الجهاز هدا كتفي وصار تقيل الظاهر الفايروس دا كبير
_________________________________________________
ومره جاني واحد شايل طابعة ملونة وقال (عييت تطبع) وبعد الفحص اتضح انها محتاجة لاحبار
وتم اخطاره بذلك بانها ناقصه احبار (اسود - وملون ) فقال لى (وش الزين)الاسود ولا الملون
___________________________________________________________
واحد جاني شايل شاشه وقال لي يا زول الانتر نت ما ظبط معاي
----------------------------------------------------------------------------------------
ولنا عودة
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: shiry)
|
شيري هنا عندنا في محل الصيانة , محل ماأنا شغال , خلي الزبون يغلط ويجدع ليهو مصطلحين ولا أنشاء الله يغالطك في أثر الحمى الصفره _ سموها صفراء لييه_ على برنامح الأوراكل داتا بيز الممنوعين منو السودانيين مع الستة الكرام ,يقوموا الشباب يشبكوهوا ليك أنو أصل المشكلة بتاعة جهازو دي دايرة الخبير يجي في زيارتو الأسبوعية من الرئاسةأو المشكلة أصلا في الأوفرفلو وباقي القطع مفروض نجيبا من الشكابة الشهر الجاي ويطلع الزبون وهو مقتنع تمام انو جهازو يستحيل يتصلح الا في محل العرب ده
في الكمبيوتر مافي زول يقول انا بعرف والا ما تلاقي زول بعرف في المجال ده اكتر منك يسكتك
أبنوسي مع وقف التفيذ
تبلدي شرعا
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: tabaldy)
|
شيري ..انتي ما عادية
كلما تزعلني كتابتك السياسية ..تبهجني هترشتك الما عارف بتجيبيها من وين
كنت قلت لي مريم اعملي جسابك من ناس شيري ديل ؛ لانهم مبدعين ..او مجانين
اظن انك جمعت الاثنين
وما الابداع الاجنون
في عالم فقد عقله ؛ وطفولته ؛ وبرتئته الاولي
يبدو اني حاخش في الهترشة
وما حاقدر اكتب بالعربي
لانو الهارد ديسك بتاعي مصنع في تايومان ؛
وما بفهم الا بالصيني
وشاشتي حجمها 15 بوصة ؛
عشان كده الكتابة بالعربية بتطلع مخربطة مرات زي الهيروغليفي
عادل
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: tabaldy)
|
سلام مربع
نزار حسين /
والله ياخوي لو عايز نصيحتي الزول دا ابعد منو .. والله المره الجايه يرهنك انت ذاتو للعجم ديلك .. هاهاهاه..
كدي بالله اسألو لي كيف بخليهم يقتنعوا بمطالبو دي ... اصلي معاي السيرلانكيه هنا .. وعمر ي ماعرفت اشيل منها لا حق ولا باطل ..
سلمت ياسيدي للطله
محمد المبارك
معقولة مرارتك بعد الحاصل دا كلو لسعة قاعدة وماانفقعت ؟
لديك مرارة مبالغة فيهااااا ...
هاااااك المااااوس اوبتكال دا ، يمكن يقدر يعمل حاجة
الرشيد احمد قاسم
اسمع قلت لي الزول بتاع الشاشة .. انشاء الله تكون ما اتلومت معاهو وظبت ليهو الانترنيت ..
شايفه كدا الايام دي في فيروس وبائي (رئوي) ظهر في اسيا .. وقالوا في حالة واحدة ظهرت هنا في الرياض
نعمل شنو بالله عشان ما يخرب لينا الانترنت بتاعنا ؟؟؟
مريم بت الحسين
وحات نظري انا قبل يومين بالظبط كنت بفتش ليك في البورد وقت البت دا مالها الايام دي مافيشها .. اصلي متعوده كل ما اخش القاك غاطسه في الارشيف بتفتشي فيهو .. اعملي حسابك قالوا الارشيف بتاع بكري دا ، كلو فيروسات .. خاصة مع انتشار المرض الفيروسي بتاع الصين دا .
والنبي يا مريييووووم .. بلغينا اول باول عن الفيروس دا .. اصلي بريدي الايام دي بجيب لي رسائل عجيبة كدا .. وخايفاهو يقوم يعاديني
تبلــدي
بالله انتو بتعملوا كده .. يعني جهازي اللي كان ضاربو ليك في فيروس السي دي روم بتاعو .. وقام بتاع الصيانه اقنعني انو المشكلة موش في الس دي روم . انما المشكلة في البرنامج نفسه .. انا غايتو ما كنت مقتنعة ، لكن بس سميتها رضينا .. وفضلت انتظر لمن لقو لي السوفت وير بتاعو والجهاز محجوز عندهم اسبوعين ..
من دربي دا ماشه ادورها معاهم .. يدقسوني الوقت دا كلو ..
| |
|
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: shiry)
|
بسم الله الرحمن الرحيم
المبالغة شيري
سلام وإعجاب
غايتو لو عايزة ليك قش لخرفان جيرانك البدو تعالي أفقعي مرارتي أصلو أنا شغال في مزرعة ومرارتي أساساً فقعوها البدو قبالك .. وماذا يضير المرارة بعد فقعها
العاجبني فيك أنك تتمتعين بثقافة وجراءة وسلاسة عالية .. لك إحترامي وإعجابي
هترشي هترشي
يرحمك الله
يغفر الله لنا ولكم وللمسلمين أجمعين
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: اسامة الخاتم)
|
الاخ عادل عبد العاطي
اعجبني ايضا ما قلته في الحالتين وقدرته جدا .. يسعدني ايضا انك واضح ، فالنقاء والوضوح هو طبع الحكماء ..
وهذا دليلا اخر على عافيتك الابداعية ..
سلمت ياسيدي للطله
بدر الدين الما شين
دحين يا اخوي كدي النسألك .. دي صورتك لمن كت سغير ..؟؟
ماشاء الله ، لكن كنت زي القمر .. بس خير الحصل الليك شنو ؟؟
اوع يكون الوقع عليك دا كلو من فقعييين المرارات ..
كان كدى ... الله يجازي المرارة لو بتبقي الناس كدي
يستر الله ..
اسامه الخاتم
سلمت يازوق لهذه الطله البهية
وسلمت اكثر للاطراء ..
بس تعال النسألك .. مالك ياود امي .. بتعاين من تحت الزنك دا ؟؟
الشمس حارا ولا شنو .. وخايفنا نفقع ليك مرارتك ؟؟
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: shiry)
|
بسم الله الرحمن الرحيم
الغالية/ شيري
هسع في ظمتك الصورة دي صورة ولد ولا دايرة تفقعي مرارتي أنا كمان
الحلق الفي الأضان دا (إيار تاق) ؟ المهم كان شايفاهو صغير جيبي ليها غيرو
الأمورة دي (ربى) بتني وآخر العنقود
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: shiry)
|
في نوع تاني ياشيري من الناس بفقعوا المرارة ومنظراتية في نفس الوقت
في واحد صاحبنا مرة حكى لي مشكلة حصلت في جهازو
قال لي: حاصلة لي مشكلة غريبة في جهازي
لماّ أركّب المودم الجهاز ما بشتغل
فقمت قلعت المودم وشغلت الجهاز وأول ما الوندوز دخل
قمت ركبت ليك المودم، لكن يا محميد برضو المودم ما اشتغل
يكون من شنو؟؟؟؟؟
وطبعاً كان جادي في سؤالو
والأغرب إنو الجهاز لسة شغال
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: Mohd Mubarak)
|
أول الحـكـي
شـيـري النجـاضـة
شـيـري الربرابـة
شـيـري النـضـامة
إنتي بالعة رادي ؟؟؟ تنقنقي اليوم كلو
الكمونية و الخروف و المش و الفسبخ و الكمبيوتر و الهندي و السوري
فقعتي مرارة الناس كلها السودانيين و إستحملوك قلنا معليش نحن
مجبورين عليك بت عمنا نحن أولى بيها. لكن جابت ليها هنود و سوريين
يا بت إنتي حكايتك شنو رايحة ليك نـقـة ؟؟؟ و الله إنتي مش تفقعي المرارة
إنتي تفجري المرارة و كل الكـرشـة.
آخـر الحـكـي
الله إدينا خيرك و إكفينا نـقـتـك الكتيرة دي .
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: shiry)
|
يـا شــيـــري
عـلـيـك الله عـايـزك فـي مـهـمـة إنـتي أفـضـل مـن يـقـوم بـهـا
فـي واحـــد في البـورد دا فـقـع مـرارة النـاس كـلـهـا.
لـو سـمـحـتـي عـلـيـك بـيـهـو أفقعي المرارة و المصران و أبو الدمام
و الكمونية و القلب و المـخ .
إنـتـي عـــارفـــه أنـا بـقـصـد مـنـو!!!!!! ما دارين نجيب إسمو الهوا بقسمو
خـدمـة بـس لـي أخــوك و الله عـمـري كـلـو ما حا أنـسـاها ليك .
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: ABUHUSSEIN)
|
| Quote: اصل واحده صاحبتي كان عندها 13 بوصه جالها فيروس في كرت الصوت فقامت لغت اشتراكها على الهوت ميل : ولأن مدة المكالمة لازالت في الحد المسموح به فيجب ان تسأليها سؤال اخير لتبيني لها انك اقتنعتي بوجهات نظرها الفنيه . طيب هسع توصيني بان ادرس الهارد دسك ولا الفلاش .. اصلي بحب القيمس اوي .. ولا انت شايفه انو الواحد يتكل على الله ويدرس انترنت عربي . موش برضو الانترنيت افضل من الهارد دسك ؟ |
الله يفقع مرارتك يا ابو حسين يعني اكتر من كده تعمل لينا شنو.....تعلقنا من كرعينا......
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: SAMIR IBRAHIM)
|
يا خــوي أنا قلت قشير إبراهيم أسي بسم الله الرحمن الرحيم
إنت راكب من وين يا خوي ؟؟؟ دا كلام بيني و بين النضامة دي
أنا كنت قايل لم أقول بسم الله الرحمن الرحيم قبل ما أدخل البورد
كافيه لي إنها تبعدني من ...... لكن الظاهر لازم أقرأ سورة البقرة
علشان أسلم من (ناس ديلا) اللهم أحفظنا.
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: shiry)
|
شيرى
انا لى كم يوم باجى بجاى اتاوق واضحك وامشى
لكن لقيت من حقك علينا انه نقول ليك انك حقيقى مبدعة
انا فخورة بانتمائك لنون النسوة وفخورة بانتمائى لكن
...
قال كان بقت فاس ما بتشق الراس هسي اصعب شق الراس ولا فقع المرارة
يا ابو حسين اذا الزول اللى بالى بالك والله انا خايفة على شيرى لانه ده متخصص فقع مرارات
الله يدينا خيره
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: hala guta)
|
سلام مربع
بدر الدين المتلبط في صورة ماحقتو
وحات نظري .. اها النقول ليك النصيحه
الصورة دي ماتبعك ؟ مادام اصلك اعترفت لي انها بنيه
انا عيني نجيضه بالحيل
البت دي تبع الرحمــابي وانا قبل كده سرقتها
امش شوف صورة بتك وين
ياخوي ماتلبطوا في صور بنات الناس
هاهاهاههاهاها
عبد الله جعفر
قصدك منو ياخوي؟
اوع تقول لي فلاااان داك
السايق لينا العربية هناااك
ومستضيف (اولاد النيل)عند بيت الضيافة بتاع البيت الكبير
؟؟
ولا الزول الخلا البلد وشتت في بلاد الخواجات
وعامل حمد لبت
؟؟
لو كده خاب ظنك ياود عمي
ديل سبقوني وفقعوا مرارة الناس الكلهم
واولهم انا
سجيمان
انا قاعدة هنا في قاعدة فقع المرارات
ارسل ليك مقاتلة زكيه
بس لازم توريني عايز تفقع بيها مرارات منو
؟؟
محمد المبارك
اقول ليك وما تنفقع مرارتك
انا برضو عايزه هسع اعرف
الحصل منو شنو
من المودم ولا الوندوز
i'm very serious
i wonna know
hahaha
ابو حسين
انت مالك ومالهم دخلوك
ولا حشورك ؟؟
اها قول لي اسمو اصلي غبيه
وريني اسمو ولا يهمك
وعشان خاطرك افقع ليك مرارتو هسع
اخليها ليك زي البالونه المفرقعة
كل حتة في بلد
سامر ابراهيم
امين يارب العالمين
عقبال الجماعة القاعدين هناك ديلك
علي قلوبنا
الانتا عارفهم وانا عارفاهم
ما افقع ليك مرارتهم
فقققققعتتتتت
النبي فيك ياسامر لو ماقلت اميييييييين
وتسلم ياسيدي على هذه الامييييين
..
هاله قوته
سلمت ياستي للطله
وسلمت اكثر للاطراء
وانت ايضا تشرفين تاء التأنيث
والله يكرمكم ويخليك ياستي عشان رفعتي لي معنوياتي
اصلوا ابو حسين وسامر ابراهيم
مصرين يفقوا مرارتي انتقاما من تاء التانيث
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: ABUHUSSEIN)
|
ٍسلام مربع
ابو حسين
عايز سامسونج فلاترون
ولا احس ليك الي جي 17 بوصة
انا اتخيل لي كده
انو الاوراكل اوضح شوية في الاسبريد شيت بتاعتو
من
hp lesserjet 2000p
انت شوف البتناسبك والنضيفه
ونحن تحت الخدمة انشاء الله تقول خلو لي البرنتر
out of order
' نحن برضو يهمنا رضاء الزبون وخدمة مابعد البيع
شفت الشاشة الكبيرة في طريق المدينه وانت ماشي المطار
اقيف جمبها ولا لقيت زول بيقدر يطلع ينزلها ليك
تكون برضو انضف شوية
خاصة اذا كنت بتلبس نظارات
لو شفت من خلال الشاشة النضيفه ديك .. تاني الا تكلم بيل غيتس دايركت
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: shiry)
|
بسم الله الرحمن الرحيم
شيري يا شيارة وشيري
لالالالالالالالالالالا .. كدا مش فقعتي مرارتي بس .. كدا إنتي شلتي فشفاشي وأديتيهو لي بنغالي مصاب بداء ال (سارز) عشان ينفخو
تديني هجيمة في النهار الحار دا دي بتي
تكتّل أهلي تعدمهم طافي النار دي بتي
وعشان أفقع مرارتك البت جابداها أمها بالسماحة عشان أصلك ما تفكري فيني
وأذيع لك سر أخوي عندو بت في عمرها وأنا لمن مشيت الإجازة قبل شهر الجماعة حاولوا يمتحنوني وختو بتي بجوار زوجة أخي وبنت أخي بجوار زوجتي ولكني أفشلت مخططهم بمعرفة بنتي والتي من لحمي ودمي
يا حرامية يا سراقة البنات
هترشي هترشي
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: tabaldy)
|
بدر الدين الما شين
احلى امنيه لاحلى اموره من شيري بت ام شيري الى (العسوله)شبيهة امها وعقبال مية شمعة يارب
بس ماجبت لينا شهادة من (المجلس البلدي) تنفي /كلية او بالمره انه ليس بالامكان او حتى مجرد احتمال ساكت خاتي القول والشك ان عملية التبديل حصلت اثناء الولاده ، حيث انه نما الى علمنا ان زوجة اخيك ولدت بنتا اموره في نفس الساعة بل وفي نفس المشفي ..
كيف كده ؟ لسعه مرارتك ما انفقعت ولا نجيب الاتي زي ماقالت تماضر ؟
تماضرتي : حبيبة البي
عارفه اني بحب (الإتي) جدا ، خاصة اذا كانت (كورية) الشطة الخضراء الدقوقه ناااااااعمه وعليها ليمون ودكوة وتاني شطه حمراء .. وتجي تكبي فيها (تبش) او القنقليز ايهما (كتير) او الاثنين معا . واتفني في نص الاوضه .. وشيلي (الهطي) الشطه الفيها (الاتي) ديك ..
ولوميني تاني لو في زول قدر يفقع مرارتك .. مين زيك تاااااااني .
واموت ليك ياتماضر لو ماغنيتي لي الغنوه دي
لاخونا بدر الدين الماشين
والمرارة الانت باكي فيها ... ياما كتيرين قبلك
سال (لعابهم) وكانوا بتمنوا من ايدك
انشاء الله لو فشفاشايه حته
او (كبدايه) نيه مغموسه في جردل شطه فاهمه .
وبعدها انشاء الله لو تنفرطق (بطونهم) او لهاتم ذاتها يفنيها الهراد
بس (مرارتك) الفيها اتي لما (طلت) ضيعت صبري الشويه
وهسع لما اتفشيت جيت تقول الصورة ديك ماتبع زولا سواك
ياااااخي ما تبالغ انت بس قول حكايتك وفقع المرارة خليه علينا
تبلدي
شارع خالد بن الوليد .. ولا اقول ليك روح باب شريف اكيد هناك بدلوك على اتجاه حركة البورصه العالميه
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: shiry)
|
العالمية نقلوها لي مدرسة العصور الوصطى بنات , بتاع دكان البوش جنبنا كشح موية الفول في سلك الغسيل فصل النيت بعد ما شر فيهو الشطة الخضراء غرب المطار , قالوا عملوها هناك جمب المطار عشان تعجب الراكبين سياحي اركويت والجريف واللوبيا ,الاغنية دي ما لقيتا في النيت بلاقيها عندك؟ لو مافي ادين أسبرو أهدي بيهو المصران الهيجتيهو ده
عصير أبنوس
تبلدي
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: tabaldy)
|
ٍسلام مربع
تبلدي
مادام اصلك جبت سيرة اركويت وحديقة الرياض العالميه
شفت الكورنا القبل
محطة البلابل
فيها كوفي انترنيت
الانترنيت بتاعهم كويس اكيد بتلقى فيهو الغنوه الطلبتها دي
ولا اقول ليك اتصل على برنامج كليك في ابوظبي
بجيبوها ليك ، أصلي الانترنيت بتاعهم
عالمي مازي حقنا نحن في السعودية
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: shiry)
|
بسم الله الرحمن الرحيم
فقاع المراير وين ... يلا نشوفوا يا حلوين
أشكرك على الأماني الحلوة ألتي بعثتي بها للأمورة العسولة (ربى) وربنا يحفظك كمان وكمان
بس ماجبت لينا شهادة من (المجلس البلدي) تنفي /كلية او بالمره انه ليس بالامكان او حتى مجرد احتمال ساكت خاتي القول والشك ان عملية التبديل حصلت اثناء الولاده
إنتي عارفة (المجلس البلدي) دا ياهو فقع المرارة الصحي صحي .. وإنتي قايلة التمساح المعلق في مجلس أمدرمان داك مات في وضوع؟
هترشي هترشي
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: بدرالدين شنا)
|
سلااام مربع
اوووووبسسسس
توقف ياهذا فقع
مرارة
صحي التمساح دا المعلقنوا في المجلس البلدي دا مالو
؟؟
اصلي شفتوا مرة واحدة في حياتي وسألت نفس السؤال دا
وانت اليوم ذكرتني ليهو
يعني مامات في الولادة ولا شنو الكتلو؟
اوعي تقول لي مات من الملاريا
او في مظاهرات جامعة الخرطوم الاخيرة
؟؟؟
اصلي شاهدة احداث . او قول اثبات
فلم اري تمساح يسقط علي ايدي الطلبه المساكين
لكن الطلبه هم من سقطوا على ايدي التماسيح
وعجبي
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: shiry)
|
يا شيري
نصحتيني ولم استبين النصح الا ضحي الغد
هسي انا جائي من الشرطة المخفر بالسوري ونقطة البوليس بالسوداني
لكن بالسعودي ما عارفها شنو؟؟؟؟؟؟؟؟
صاحبي طلب مني نسخة من بطاقتي الشخصية عشان يكتبني شاهد في عقد ايجار حسب كلامو
مشي غلف البطاقة ورهنها عند حلاق هندي
حسب ما عرفت مؤخرا
وجاني يضحك بعد نص ساعة وطبعا حالق ومتريح بي كلونية الهندي
ويبدو انو اقنع الهندي بان صاحب البطاقة حا يجي يدفع ليه
((كال))
باكر يعني
ولم يخبرني بموضوع الرهن
باكر الهندي ما كضب مشي سلم نسخة البطاقة لمركز الشرطة
ونادوني ونادوا الهندي وسألوه
لما شافوا انه لا تبدو علي آثار حلاقة
رفيق انت يقول حلق حق هذا نفر وما يسلم بيزات
هذا نفر مافي يحلق انت مين يعطيك هذي بطاقة
سوري سوري سوري ساير
مو هدا نفر يجي نفر غير بس سيم سيم سوداني
هدا نفر انا يعرف مافي مشكلة نفر غير انا يشوف وبعدين قتلك
الحين انت كانسل هذا كيس
وبعدين يشوف
سكرا سكرا سكرا مافي مشكل
وانا لم انطق بكلمة استلمت نسخة بطاقتي المغلفة مجانا وجيت وهسي حا اتصل بصاحبي
واسلمو الشرطة واللا اسلموا للهندي
انتو رايكم شنو
الكلام ده حصل جد جد
| |
|
|
|
|
|
|
|
|
|
Re: قايتو عملتي عملية شكيتك على الله (Re: sunrisess123)
|
سلام مربع
نزار حسين
مبااااااالغه
صاحبك
اصلوا مابناقشو
اقول ليك سلموا الانتربول
واذا القوات المارينز قريبة منكم
شوف اقرب جنرال وسلموا ليهم قول ليهم
دا من السماسرة البنوا المفاااااعل النووي العراقي
وارجع لي تاني وريني الحصل شنو
؟
sunrisess 123
الحصة دمها تقيل ولا يعني اها بتمشي الحال لمن وقت الفطور يجي
شايفها الساعة عشره يعني مفروض تطلعوا
شوف الهندي بتاع المقصف لو دمه تقيل
افقع مرارتو
وتكون اسديت لي مرارتك الاتفقعت
| |
|
|
|
|
|
|
|
|
|
Re: قايتو عملتي عملية شكيتك على الله (Re: shiry)
|
الزولة جدا شيري
نيلينك والأبنوسة والشوق الجاري عليك
بما اني بتاع كمبيوتر مرارة أهلي الرقدو اتفقعت
عشان كدا قررت أسدائك بعض النصائح عشان ما تفقعي مرارة بقية الزملاء
أولا ... ممكن نديك دروة أنترنت في الهارد وير بشرط انو تكوني اخدتي لغات برمجة متطورة يعني أسباني او تركي
بالنسبة لدروة بالهجة السودانية حاليا ما متوفرة لانو ناس سعد قشرة ما نزلو الوندوز في قزايز لسة
كمان لو الاشتراك بتاعك في الهوت أنتهي ممكن تحاولي تجددي الاشتراك وتشتري شريحة جديدة برقم جديد... لو ما جددوا ليك أعملي لي مس كول في البيجر
الشاشة التالاتشر ما كويسة أحسن تاخدي واحدة مقاس 38 أو 14 بالنسبة للشباشب .. بس ما يغشوك الجنوبين في السوق العربي واقولو ليك أيطالية وتلقيها بعدين من أم بدة
لو الكمبيوتر ما أتعرف علي الطاولة اعزميهوم في الرفيرا بروااااااقة مش حا أيتعرفوا حا يحبوا بعض عديل
أما بالنسبة للباندوث كباية منقة كبيرة الصباح بدري قبل الدالينق تسقيها ليهو من السيدى روم بس اعملي حسابك ما تشرق المديو بلير
الأسكانر شغلانته سهلة شديد تشغليهو بالسي بلص بلص أو بيد الفندق
كدة ان شاء الله ما حيكون عندك اي عطلة في الكمبتوتر
ولو في مشكلة عليك الله والنبي فوقك والرسول يكسرك ما تجينا
والريد نيلين
| |
|
|
|
|
|
|
|
|
|
Re: قايتو عملتي عملية شكيتك على الله (Re: زوربا)
|
سلام مربع
زوربا
الشفيف
ماكنت قايلاك مهندس
خطير في الكتنيوتر
اصلو ابن بت خالتي الصغير
حالف قسم الا يسميه كده
لا يعرف ابدا يقول كومبيوتر
ومع ذلك متفلقص فلقصه كده قاطعة من راسو براهو
اولة امس جاء عندنا ، وعلى طول ساب كل شيء
وعلى غرفتي جري ،
طبزت .. افتح الكتنيوتر
خالتو خالتو
عايز القيمز بتاع طرزان
يا حمودي ، انا ماعندي طرزان هنا
اوووووه ، كيف مافي طرزان
طرزان بطلع بس من الكنتيوتر
ودا موش كنتيوتر
؟.
ايوه دا كنتيوتر
يلااا ، دوسي هنا واشار الى مفتاح الانتر
ياخي ياخالتو انت مابتعرفي
كنتيوتر
انا ح اوريك
يلاا دوسي هنا
ودوسي هنا
المهم نحن نصف ساعة مع لاياقة حمودي ، وطرزان
وكل الدنيا ما قدرت تقنعو ان الكنتيوتر دا بالذات
مافيهو
وانا ذاتي بقيت محتاره زيو
ليه كنتيوتري مافيهو قيمز طرزان
يكون الراجل بنقيزوا وعوارتو البعمل فيها مع
الحيوانات السبب في خراب المومرى بتاعتي
عشان كده انا اقول الجاب
الفيروس بتاع استون في الشاشه بتاعتي شنو؟
اتاريها من طرزان
..
طيب اعمل شنو ؟؟
انت موش بتاع كنتيوتر
شوف لينا حل مع طرزان دا
شوفوا مالو ابى الجيه عندنا
؟؟؟
سلمت ياسيدي اعتذاري اسوقه اليك
بهذه القصة التي حدثت فعلا فعلا
امس
| |
|
|
|
|
|
|
|
|
|
Re: قايتو عملتي عملية شكيتك على الله (Re: قرنفل)
|
سلام مربع
قرنفل
يخربنا يا دا
والله نحن ذاتنا اليومين ديل هاردسكنا
انملاء لي ابوعينو ودفق
قدر مانشيل ونغرف فيهو
يا دسك السجم انت ابيت ما تنقص
بس من دربي دا قايمه اعمل فيهو نظرية
ولو مانجحت
غايتو اهوندا المنشار في يدي
ايه رأيك اقسمو النص بالنص
موش برضو الفقره انقسموا النبقه
؟؟؟
الفقرا ديل موش اكرم مني .
| |
|
|
|
|
|
|
|
|
|
Re: قايتو عملتي عملية شكيتك على الله (Re: shiry)
|
سلام شيرى
شكرا يا ابو الكرم
بس المشكله فى الكلام الجوه نص الهارد دسك دا
اول شى بتكترى الحساد كده تانى هام احتاج الى كمية من العيون والاضنين
لمعرفة او شوف وسمع ما بداخل نص الهارد دسك
كويس ما كل الهارد دسك والا كان بديت التحويص من الان
لكى الشكر على الهدية صباحات مليئة هداية الله يكتر
| |
|
|
|
|
|
|
|
|
|
Re: قايتو عملتي عملية شكيتك على الله (Re: قرنفل)
|
سلام مربع
قرنفل
يالهذا الرجل الكسول!!
انا اعطيك نصف مااملك من نصوص
وهترشات ووو
وارض واسعة كبيرة في حتة حديده
موش برضو الهاردسيك مصنوع من حديد
وخرابيط ؟؟
المهم اهديتك نصف هذه الكراكيب
وتقول لي انك ح تكسل تفتش هذه الكراكيب
طيب ياعم ولا يهمك
اصلا موش رادة ليك طلب الليلة
اليوم هو يوم العطاء العالمي
ولازال المنشار في يدي
سوف نقسم نصفك الى نصفين اخرين
وادي نشره
سامع صوت المنشار ولا تخفظ صوت الساوند شوية
عشان الصوت يصلك
؟
| |
|
|
|
|
|
|
|
|
|
Re: كيف تفـقع مـرارة خبراء الكومبيوتر (Re: shiry)
|
لكين يا شيري ... بااااااااااالغت
دي مش المرارة فرقعت ... دي اتفروست ( من فايروس ) واتهرجنت ( نسبة للقنبلة الهيدروجينيه ) واشرشرت ... منك
مع رمضان الدعوة للأزية بيبقى ليها طعم خاص ... والآثام تبقى (قدر ده ) لكين ناس سديق وناس رفيق ديل والشعوب المحبة للطحن والاذلال ( لا يعني الشعوب بكاملها ولكن خليط منها يشترك في نفس الصفة ) يمكن تنفع معاهم استئصالات المرارة دي ...عشان ترتاح وتحلى أيامهم وتبقى شعوب بلا (مرارة )
ولكن يبقى الأمر الأهم بعد فقع مرارة خبراء الكمبيوتر ( والمبتدئين منهم سليلي جامعة عين شمس خصوصاً ومنهم الأخ المبجل مفقوع المرارة كابروس ) وهو كيف نفقع مرارة ( ملبارديرات ) الكمبيوتر لعلنا نتلقى من بين الشظايا المقذوفة بعد الفقع مليون أو مليونين ... ما دام ليس للكمبيوتر نفسه بين أحشاءه الكثير ..مرارة
| |
|
|
|
|
|
|
|
| |
shiry
Ahlalawad
خالد
Mohd Mubarak
مريم بنت الحسين
Abdel Aati
Wad Elfadil
بدرالدين شنا
اسامة الخاتم
سجيمان
ABUHUSSEIN
Tumadir
زوربا
Husam Hilali
Alrayah Senhuri
فيس بوك
تويتر
انستقرام
يوتيوب
بنتيريست