كتب الكاتب الفاتح جبرا المتوفرة بمعرض الدوحة
|
|
 يوم الفول المصلح
|
1-
وحم السودانيات غريب،،، أظنكم جميعاً تعرفون ذلك،،، ومتواضع،،، وكله أشياء غريبة من التي لا توجد في السوق،،، فإذا كانت في السودان،،، لاشتهت الكمثرى التي ما رأتها إلا في كتب العلوم نماذج،،، والكمثرى في بلادي تنتمي لصنف الكائنات الغالية الشاقة ،،، فإذا كان كيلو الموز السوداني الضهبان ده قبل ست سنوات بأربع الالاف جنيه سوداني ،،، فلا بد أن الكمثرى بت الناس الأجنبية الطاااااعمة دي،،، مستحيلة الثمن،،، ولا بد أنها في الغالب لن تحصل عليها ،،، فيأتي الطفل الزائر (زائر لأنه في الغالب ماش يغترب) مختوماً برمز الكمثرى،،، ولا ادري ما الإشكال لو أنه حمل وجهاً مليئاً بالكمثرى،،، اولاً هي كائن نبيل (الكمثرى اعني) وثانياً (الشوف واللا العدم) وثالثاً ،،، يقلل هذا من شأن الديانا لو كانت المولودة انثى،،، فلن يكون هناك داع للفسخة طالما أنه ملئ بالكمثرى الجميلة ... بعدين رمز الكمثرى أحسن بكثير من رمز التنكة
!!!!والشاطر يفهم ويكسب
وبمناسبة الفواكه والموز،،، (شفتوا الفرق بين موز السودان واليمن والموز الأمريكي من حيث الوجاهة؟؟؟)
ولو كانت الموحومة في دولة أجنبية من آكلة لحم الخنزير الموسمي،،، لانفنست في نص السرير وقالت
( مشتهية لي أب دمام)
وأنا من الأساس أشك أن هذا الجزء من الخروف،،، ليس إلا مخلوق خاص ببهايم السودانين،،، يساعدهم على هضم ما يأكلون من ظلط،،، ونيم،، وأكياس نايلون،،، اي والله بياكلوا اكياس النايلون.
الجميلة ابنة عمي،،، والتي يوماً ما كانت تحمل جردل موية آسنة يسمونها في السودان (موية البلاعة) ،،، وخرائط طينية جميلة ترتسم على سوقها من الكعب لي فوق الركبة،،، وايشارباً جميلاً يزين جبهتها فيذكرك بفيلم (ناديا) النسخة السودانية ،، يا قول ناس الكمبيوتر (الفيرشن السوداني)،،، يذكرك الإيشارب بناديا الجميلة التي ربطت وجهها المشوه (وبي تشويه اخير من وشي) بحرير لطيف هفهف مع شعرها بفعل أثر الهواء البارد في السفينة،،، فابنة عمي جميلة،،، وترتدي ايشارب،،، وهاهي البركة الجميلة البحر،،،و كان ما اخاف الكضب لون الجردل متل لون السفينة كمان،،،
حملت ابنة عمي يوماً جردلها وفتحت باب البيت زهجانة وشووووووو،، كشششششششح ،،، كشحت الموية،،، وبسببها ابتلت عروق البدلة الوجيهة التي كان يرتديها (زوج ابنة عمي لاحقاً) فصرصر لها وجهه وانتفخت جضومه بسبب الغضب الذي تفاعل مع البيتزا الكثيره التي لهط في بلاد العجايب،،،فانتج كمية من (الكواريك) والزهج والاعتراض ،، فرفع لها رأسه المجلط تماماً بالداكسي والجل ،،، فتوقفت عيناه ذات فجأة في بشرة نقية سمراء،، وعينان دباحتان،،، إذ أن ابنة عمي حقيقي جميلة،،، فارتد لسانه في حلقه،،، وارتطم بشدة بلغاليغه،،، فتدلدل بلهاً مريلاً في (البنية السكرية حلاوة لبن) فكانت شرارة الحب التي بدأت في (القطينة) وانتهت بحي الصفا في السعودية،،،
ففووووووو،،، فتح الخشم ،، (فتح دي مبني للمجهول ) ثم العريس بشتغل شنو؟؟؟ بشتغل مغترب في السعودية،،، ولا يخطرن ببالك أن تتساءل عن ماهية هذه الكلمة الحديثة ودلالتها فهي واضحة كعين الشمس،،، مغترب،،، أي عنده إقامة،،، ودي براها شغلة كويسة،،،إذ تكفل له التمتع بالكونديشن،،، والبدلة في عز الحر،،، وشبرا الخيمة،،، غير زيارة بيت الله ،، ومسك حديدية لاااامن يآمن (الحديد أعني) ،، والدعاء لرب العالمين بأن يفك الكرب فينهي سنين الغربة الطويلة في بلاد الملك سام العربي بالرجوع إلى البلد،،،،،، ثم بعد هذا الدعاء الصادق النبيل،،، الرجوع من بيت الله لبيت الكفيل،، ومسح (جزمته) إن دعا الأمر،،، بس ما يدق النهائي،،، لأنه لو حدث ودق النهائي،،، لدقت روح صاحبنا السما وتدقس ،، ولتحققت الأمنية التي تعبت فيها المزارات وجاها وجع وش منها ،،، فما كان هناك أي سبب لتذكر الله والرجوع إليه؟؟؟
الغربة يا جماعة نوعا من طاعة الله وسبباً في التقرب إليه،،، يعني طول الوقت يدعي يرجع أها كان اتحققت الأمنية الزول ده ممكن يبعد من الله ،، واللا شنو؟؟؟
فرقيص عروس فمن بعيد جات تمشي المها رغم كجولة بنت عمي الواضحة للعيان ،،، فخرطوم ،،، فانتظار فتذاكر فتأشيرة،،، فمطار فطيارة
ف فووووووووووو،، فمطار الملك زنزبار ففتحة خشم فخلعة السنيييين فانبهار باللموزين فتفاح مسيخ ،،،فكنتاكي جميل (رحم الله الحاج كنتاكي وزاده رزقاً من زلعة السودايين) فشبرا،،، فباب شريف،،، ففلهمة استدعت سكوت فسكوت استدعى (اش بك مرررررة حلو) فانخلاع فتسلخ فحمل فوحم ففنسة نص السرير ف (والله يا جماعة قرفت من التفاح وال(حليب) اشتهيت الفول،،، وحمي جا في الفول) ولسان حال الواجب الذي أديته واسرتي يقول (الله يرحم زمن الفول الكان بتتمسحوا بيه تبركاً وطلباً لمرضاة الله)
يتبع
|
|
 
|
|
|
|
|
|
|
|
Re: يوم الفول المصلح (Re: بت قضيم)
|
مشتهية لي اب دمام
والله يا بت قضيم مت من الضحك وانا اتخيل المنظر كان كيف
الجملة دي بالذات كان مفروض تكون آخر جملة ,,,لكن كلو حلو
| |
|
|
|
|
|
|
|
|
|
Re: يوم الفول المصلح (Re: بت قضيم)
|
غايتو عليكن جنس وحم
توحمت المرا العروس على حبة تفاح واااحدة .. فلما غلب الراجل حيلة .. عدد من الأيام ما قادر يجيب التفاحة ، قالت له مهددة : والله ما تجيب التفاحة اتوحم ليك علي دش (برهة ، ثم) دجتال
مش أخير صحن الفول؟
| |
|
|
|
|
|
|
|
|
|
Re: يوم الفول المصلح (Re: بت قضيم)
|
بسم الله الرحمن الرحيم
بت قضيم
سلام وإعجاب
هسع أمانةً في ذمتك دي المصلّح منو؟ إنتي ولا الفول؟ .. والله كلامك دا كلام زول مصلّح تب .. بالمناسبة كان في عرس في حلتنا والعريس ما من الحلة وجاء واحد مع ناس السيرة وكان برقص رقيص شديد عندي بت أهلي قايلاهو سكران قالت
سمحة البدنة والشبعة
فردت عليها واحدة من أهل العريس ويبدو أنها أخته .. هوي ياختي القال ليك منو شبعان ولا سكران وحات الله في سنو ما ضاقها علا أخوي من يومو طربي (ضمة على الطاء وفتحة على الراء وياء في الآخر) أها إنشاء الله تكوني يابت قضيم طربية ما تكوني بدينة
وبنت أهلك أخير تتوحم على الفول ولا علي أنا؟؟؟؟؟؟
كمية من الروعة .. جبال من الإبداع
بدرالدين شنا
| |
|
|
|
|
|
|
|
|
|
Re: يوم الفول المصلح (Re: بت قضيم)
|
بت قضيم
الذ بوست من الصباح...
قطعت مصاريني بالضحك...
وكاضافه
حاوريك نسوان امريكا بتوحموا شنو
جبنه مضفره، ملوحه ،جرجير ،كسره ,و اكيد دجاج البوادي
تحياتي
و
لى قدام
| |
|
|
|
|
|
|
|
|
|
Re: يوم الفول المصلح (Re: بت قضيم)
|
يقول الشاعر
بنية من فتوار باقة ذي النار (قرضها عين عديل)
لهيب الشوق،،،ببكي ليل ونهار
دي انتي؟؟؟
بنية الفنجرية حلاوة لبن
تسلمي للضحك العالي،،، فقد قال ابو عركي
اضحكي ضحكك شرح قلب السما
وعن وحم ناس امريكا،،، طبعاً بصفتي بسافر اسبانيا طوااااااااالي ،،، فبتالي لم يتسنى لي زيارة امريكا بعد
شفتي كيف؟؟
لكنهم وكت بتوحمن بالجبنة المضفرة،،، فليك علي اشيل في الجبنة واتاجر،،، طبعاً من المفارقات الجميلة في السودان،،، تضفير الجبنة دي،،، لم ارى ولم اشاهد جبنة مضفرة إلا في السودان،،، ولا ادري من ابتدع الفكرة،،، لكني اظنه تعبير عن النقص الكامن في الضفاير،،، ولو انه (السلة) الله كترها
بتعرفي السلة؟؟؟
لو لا ،،فاكييييد الملا عمر يقول ليك ،،اما أهل العوض فقطع شك انه ممكن يوريك بستخدموها كيف كمان،،، ديل ناس مقعدة تب
يا بنية الجميلة
تسلمي للدخول والقراءة
ولي قدام انت زاتك
| |
|
|
|
|
|
|
|
|
|
Re: يوم الفول المصلح (Re: بت قضيم)
|
-2
وإذ كان لا بد من أكل الفول ذاك اليوم،،، وإلا العيل يطلع مموسح بي فول وهذه فضيحة ذات دلالات سياسية لها علاقة بالإقامة في الخليج،،،
وإذ لا بد أن يقوم أحدا ما بهذه العملية الشاقة وهي شراء الفول (السوداني) من إحدى المطاعم السودانية،،، لأنه من المستحيل طبخ الفول في وقت قصير غير أنه من غير المنطقي طبخ الفول خصيصاً لل(البت المفلهمة دي)
وإذ أنه لا يوجد من يتبرع بالقيام بهذه العملية الشاقة جداً من رجال العائلة الذين وقتهم ملكاً للكفيل،،، وكفيلهم ملكاً للدولة،،، و إذ أن الواجب العائلي كان يفترض أن نجيب ليها الفول من تحت الأرض ولو استدعى الأمر الذهاب للكلاكة صنقعت (نفسي اعرف المصنقعة ليها شنو الكلاكة دي)
إذ كل ذلك تبرعت أنا واختي وصديقة لي بالذهاب إلى الكلاكة صنقعت ،،، اقصد محل الفول السوداني أو تحرياً للدقة محل السوداني المفول إذ أن هذا هو الإنطباع الذي يرتسم في مخيلتك أول أن تدخل المطعم السوداني،،، فكل ما فيه،،، يرتسم على وجهه الفول،، سيد المطعم،،، باغات الزيت الملطخة بالفول،،، العيش السوداني،،،صاج الطعمية،،، عراقي سيد الفول،،، حتى الباكستاني الذي يساعد سيد المطعم بالبحلقة في بنات الناس،،، كان يعطي الإنطباع الحقيقي بمطعم فول سوداني،،، الشئ الوحيد النشاز في هذه القائمة،،كان دهاسة الفول بديلة قزازة الببسي العتيقة.
أنا شخصياً أحب الفول،،، ولو عليا،،، لفتحت مصنع حلاوة فول ودندرمة فول وقونقليز فول وطعمية فول ومربى فول،،، كلو فول،،، وفول سوداني لأن طعم الفول المصلح السوداني لا يضاهيه أي فول من نوع (قلابة ) و(فلاتة) وما ادري شو،،، من تلك المسميات الفولية المتنوعة التي عرفناها في هذه النواحي.
لست بصدد (قطعت الثقافة) ،، لست بصدد الحديث عن الفول،،، لكن بشأن مطعم الفول صدد.
كنا وقريبتي وأختى في قمة الأناقة الوطواطية السعودية ،،، عباءات سوداء حالكة ،،، كما اضافت صديقتي واختي فوق ذلك الرداء الأسود ،،، (غطوة) فاصبحنا كذات الرداء الأحمر (الفيرشن السعودي) ،، وتفادياً لقلق الوالدة بذهاب (البنوت براهن) لمطعم الفول السوداني،،، حملت معي جوال والدتي ذي الماركة المسماة (القشرات في الحفلات ) اسمه كده ما بهزر،،، حملت جوالها وكنت أكيدة أنه لا داعي للقلق اولاً الساعة ما زالت التاسعة مساءاً يعني بدري نوعاً ما،،، وثانياً،،، لا مشاكل فالمطعم سوداني ورجال (جعل) بسدوا عين الشمس وخشمها كمان.
ولغير قاطني السعودية الذين قد يتأثروا بتخريفي هذا نقول،، أن المرأة الوطواطية في هذه النواحي،، من الصعب عليها أو يكاد يكون مستحيلاً،،، أن تذهب إلى أي مكان (بي راسها ) بدون رجل يحميها من هذه البلاد التي من قوانين سعودتها الأساسية أن تحمل سمة السماجة فتشاغل بنات الناس في الماشة والجاية،، وتمشي وراهم بالسيارة الما خمج و( خذي الرقم ما تبغيني ارقمك) ،،، (ردي عليا والله انا قاصد خير)
رغم ارتداء نساءها ذلك الجلباب الأسود والغطوة من الراس لي القدم لا معروفة زول لا معروف سوبر مان متنكر في امرأة،،،
المهم أننا في تلك الهيئة المسالمة ذهبنا ثلاثتنا لأجل خاطر (بت النمير) ابنه عمي ،،، وتبرعت أنا (لي شلاقتي) بالنزول من الليموزين للمطعم ،، وابتسامة كبيرة تزين طالعي تفاؤلاً بهذه الوجوه السمراء النبيلة التي غصباً عني والله تعطيني الإحساس بالرجولة والشهامة والحنين للبلد،،،
الغريب أن هذا كان انطباعي،،، أما انطباعهم فتمثل في ال(بحلقة) ذات الشك،،، والريبة،،، فظننت لدقيقة(بي عوارتي) انهم ربما حسوا بشجرة النيم القايمة لي في راسي،،،فشكوا يا ربي خلقة الله واللا بشتنة الملايكة.
فهمت الحاصل عندما قام أحدهم من الكرسي ،،، ولف من ورا الليموزين،،، ومد رأسه لشبرين داخل نافذته،،، وعوج فمه بسخرية مريرة،،، وعمل كده (هأ... والله غايتو) ،،، ومضى لا يلوي على شئ.
آخر ذهب مسرعاً للبقال المجاور لمحل الفول،، دخل وفي ثانية خرج ومعه رفيق متلهف لرؤيانا فيما يبدو،،، ووقفا هناك يتهامسان في المخلوقات الفضائية دي،،، فيمدا البصر تارة إلى الليموزين،،، وكارة إلى شخصي الكريم،، وكنت ما زلت مبتسمة لا بعرفها عوارة لا بعرفها دهشة.
سيد المطعم تلازج ،،، وتماطل،،، واصر على تفويت بعض الرجال قبلي،،، وهو يدرك أنه من الآولى ومن الأسلم،،، ومن الأشهم،،، اعني من الشهامة أن يمررني أنا فيكفيني شر تلك النظرات المستنكرة وكأنما الآن شاهدت بدء خلق أول انثى على الأرض.
احدهم زجر ابنته الصغيرة صاحبة الأعوام الثمانية (بالكثير ثمانية)،،، (ارجعي العربية دي لي امك ده مكان تنزلك فيه؟؟) وهو ينظر لي جوووووة عيني ولسان حاله يقول (الكلام ليك يا المقلع عينيك) . وامها بالطبع نصها تدلدل خارج السيارة لا ادري إن كانت راغبة في النظر لشخصي العالي أو لحذائي جميل الطلعة.
حتى الباكستاني ال(معولق) لم اسلم من محاولة وضع يده بداخل كيس العيش عله يطول مني كان لمسة وكأنني جزء من الحرم النبوي الشريف.
كارثة الكوارث كانت عندما دق جرس الجوال فرددت على والدتي التي ارادت الإطمئنان علينا،،، لمدة ثواني واغلقت الخط ،،، وعندما رفعت بصري ،،وجدت أن الشارع العام قد تلفح جميعه بصمت الحملان،،،وكان من الواجب وقتها ،، دق بعض الموسيقى الجنائزية،،، ليصبح المؤثر الصوتي ملائماً لتلك المؤثرات العديدة التي ارتسمت في وجوه (اخوات فاطنة)
الحقيقة دخلت ليس في نص هدومي فقط،،، بل انني دخلت في هدومي كلها وغيرت رأي سريعاً بالخروج من هدومي والدخول إلى ضوافري بل لكوعي لو سمح الأمر،،، كم حسدت وقتها الكرمبة على كرفستها على نفسها.
سيد المطعم الجميل تساءل بخبث ظاهر،،، انتوا ساكنين هنا؟؟؟؟ اجبت بعدم تركيز فعقلي وقتها شغال تفكير في ذنبي الذي استحق وأد ابتسامتي البريئة،،، وهززت رأسي وغصة عجيبة وشعور بالخوف والضيق اصابني كأنني فعلاً مذنبة،،، فاسترسل وقال،،، (ما تتعبوا روحكم تاني،،، اديكم رقم تليفون اتصلوا تاني ونحن نجيب ليكم الحاجة لييييي عندكم... ولا دايرين منكم تعريفة ولا مليم،،، الونسة وال(قعدة) براها بالدنيا) واردف يقول (المرارة زاتها احنا عندنا بنجهزها)
انا (بت بلد) ،،، اصلية،،، وادرك تماما ما ادرك هو انني ادركته،،، فالله عرفوه بالعقل،، ،وبالعقل فهمت ما يقصد وبنظراته كمان،،، ثرت غيظاً،،، وغضباً،،، وفكرت أن ارمي له فوله،،، وطعميته في وشه والخبط ليه وشه اكثر من ما لخبطه الزمن,,, ونظرت نظرة أخيرة على (اخوان جعل) وتساءلت من جديد
(لما،،، لما افتراض سوء النية ،،، والتعامل مع بنات البلد في الخارج بهذا الشكل المشين؟؟؟)
وجاءتني الإجابة واضحة فمرة أخرى (من جديد) ، نحن لا نغترب،،، نحن ننسلخ،،، ونبهت،،، نصبح كقماش كان كثير الألوان مبهرها،،، فبهت بعد أول غسلة ،،، وليس ذلك فحسب،،، بل أنه للأسف تطبع واختلط بلون جديد أخذه من قماش دخيل ليس لنا وليس هو بجميل ولا بشبهنا،،، فلا طلنا لونا الأصلي،،، ولا حتى اللون الدخيل كان خالصاً،،، من نسوانا ليييييي رجالنا ،،، أغلبنا،،، فقدنا اللون الخاص بنا،،،
عدت للمنزل وكلي كآبة،،، وإحساس ببراءة فكري (العبيط) ما زال يساورني حتى اللحظة،، وهو السبب الذي جعلني اطرح هذه القصة الآن،،، فأنا لا ادري،،، اتلك الصورة الفارسية للرجل السوداني تحديداً ماتت،،أم انهم فقط يتغيرون في الغربة ويعودون للأصل في السودان
الله اعلم
| |
|
|
|
|
|
|
|
|
|
Re: يوم الفول المصلح (Re: بت قضيم)
|
بت قضيم
بقدر ما انبسطت وضحكت وقرقرت؛ وانا اقرا الجزء الاول؛ وردودك الطالعة من بيت الكلاوي؛ بقدر ما حزنت وابتئست في النهاية ؛ وحقيقة نقلتينا من النقيض الي النقيض
حديثنا عن الاخلاق والشهامة السودانية - ونقصد اخلاق المتعربنين والمتاسلمين من وسط وشمال السودان - هو خدعة كبيرة. فهذه الاخلاق هي النظرة الرجولية التسلطية عينها؛ من نوع يا بت اسكتي ؛ ودا ما كلام نسوان؛ والمراة كان بقت فاس ما بتقطع الراس ؛ الخ
هذه النظرة التسلطية ؛ ما اسهل ان تنقلب الي نظرة سلبطة؛ وسماجة؛ ومشاغلة فظة؛ في داخل السودان او خارجه؛ فالمراة في كل الاحوال لا تعامل كانسانة لها كينونتها وحريتها وحقها في الخصوصية ؛ وانما كملحق تابع ؛ يمكن نهرها بسهولة ؛ كما يمكن مشاغلتها بنفس السهولة
اضافة لذلك؛ فواقع السعودية يضيف الي الطين بلة ؛ ومن عاشر قوما اربعين يوما؛ صار مثلهم ؛ او شرا منهم
بس تبري لينا انتي يا بت قضيم
مع التحية
عادل
| |
|
|
|
|
|
|
|
|
|
Re: يوم الفول المصلح (Re: بت قضيم)
|
الرائعة بت قضيم
انا كمان نفس الشعور بتاع عادل
في الاول ضحكت لامن وقعت علي حميرة قفاي من حكاية الشدرة القايمة ليك في نص راسك (اشمعنى نيمة نبقة ما تنفع لانو دايما بتخيل انه الشدرة البتقوم للزول لازم تكون سدرة).والكرفسة حقت الكرنب (مع اني ما شفته لاكن من اسمه واضح انه بتكرفس كرفسة صاح الصاح)..
ولمن وصلت لي نهاية القصة ويا ريت لو ما وصلت.!
العبرة وقفت لي في حلقي  ...معقول وصلنا للدرجة دي..
علي العموم يا ستي دي اشكال موجودة بس ان شاء الله ما تقابلي زيها تاني...
ودمتم
جدو
| |
|
|
|
|
|
|
|
|
|
Re: يوم الفول المصلح (Re: بت قضيم)
|
انا بتخيل انه الشجرة البتقوم للزول في راسه شجرة تبلدي،،، من كثر ما بلع من قونقليز في الصغير
تاني مساء الخير
عادل عبد العاطي
مؤلم والله هذا التحليل والتفسير الذي قلت
فعلاً،،، الشاب السوداني لم يصبح ذاك الكائن المسالم زول الشدايد،،، وعنصر المادية طغى عليه في كثير من جوانب الحياة،،، فتبلد حسه
قرات كثيراً جدا جدا عن وضع الفتيات في السودان وكيف أن الأخلاق تدنى مستواها وأن وأن وأن
وكثيرا ما فكرت ما السبب؟؟؟
تفتكر السبب البنت نفسها أو في الأغلب الأخ والأب والزوج هو السبب الفعلي؟؟؟
الله اعلم
اشكرك كثيرا لكل ما قلت الحقيقة ما فكرت في الموضوع بهذا العمق إلا لما قرأت كلماتك
تسلم إن شاء الله
جدو
يمكن إذن يكون اسمها كرمبة،،، والله انا ما عارفة اسمها الحقيقي شنو لكني هكذا اسمعهم يسمونه،،تقول علي
شكراً للتعليق
ولا تحزن،،، هذه النماذج التمساحية نواجهها يومياً حتى باتت شبه روتين،،، واصبحنا نعرف كيف نتعامل معها جيداً،،، انا حزينة اكثر على ما سوف يؤول إليه مستقبل السوداني كمواطن رجل كان وامرأة
الا ترى أن الصورة بدأت تتخذ اشكالاً والواناً سوداء عديدة؟؟؟
سلمت للحضور الكريم
| |
|
|
|
|
|
|
|
|
|
Re: يوم الفول المصلح (Re: بت قضيم)
|
الأخـت بـت قـضـيـم ســـــــلااااام
أنـا من واحـد من الناس اللي في السعودية عشت في جدة فترة ما بسيطة
و ألآن في المدينة المنورة .
أولا كلامك كلو صحيح عن جدة لأنو جدة فيها كل شئ و فيها كل الناس
فيها الصالح و الطالح و فيها المطاعم السودانية بالكوم و فيها كل
أشكال الشعب السوداني و فيها مجتمعات سودانية متفرقة .
و كمان فيها نساء سودانيات متنوعة في أشكالهم و في أخلاقهم يعني
بالواضح اللي ما فاضح كل ما يخطر ببالك موجود و دا ما دفاع عن
الرجال اللي إنتي شفتيهم و لي علمك في أسـوأ منهم .
اللي حصل ليك أكيد بكون حصل لي كتيرات غيرك .
بـس يا بت قضيم ما تفتكري اللي إنتي شفتيهم ديل كل السودانيين
اللي في جدة زيهم لأنو لسه في سودانيين محافظين على كل عاداتهم
و أخلاقهم اللي معروفين بيها كل أهلنا الطيبين و لسه في السودانيين
اللي إذا قابلوك من أول مرة بتعاملو معاك زي كأنك أختهم و أكتر كمان
تحياتي و أنا معجب جدا بي أسلوبك في الكتابة و في كلماتك البسيطة
في الكتابة .
و الله إديك العافية
| |
|
|
|
|
|
|
|
|
|
Re: يوم الفول المصلح (Re: ABUHUSSEIN)
|
العزيزة بت قضيم
استغرب دائما الحديث عن الفساد وسط البنات السودانيات ؛ والمزعوم بوجوده في خارج السودان وداخله ؛ واتسائل وماذا عن فساد الشباب من الرجال ؛ ام نحن نلتزم بالمقولة المصرية العبيطة ؛ ان شرف البنت زى عود الكبريت ؛ اما شرف الولد زي الولاعة
ازعم انا ان هذه المقولة عبيطة ؛ اولا لانها تتجاهل ان البنت التي تريد ؛ يمكن ان تجعل شرفها مثل عشرة ولاعات ؛ وثانيا لانها تربط مفهوم الشرف بجانب ضيق من حياة الانسان ؛ وهو الجسد والجنس ؛ وهذا الهوس بالجنس ومركزيته في الثقافة المتعربنة المتاسلمة ؛ برؤيته في كل مكان؛ ومحاربته في كل مكان ؛ يوضح تخلفنا وعقدنا ونظرتنا الاحادية للعالم ؛ كما يوضخ جهلنا وضيق افقنا فيما يتعلق بمفهوم الشرف ؛ فالشرف مفهوم متكامل ؛ وهو شرف الكلمة ؛ والقرار ؛ والموقف ؛ والسلوك ؛ في جميع القضايا الوجودية والاجتماعية .
فمن يقبل الظلم يخسر شرفه ؛ ومن يشرق ويختلس ويرشي ويرتشي يخسر شرفه ؛ ومن يضهد الاخرين يخسر شرفه ؛ ومن ينكسؤ بؤئيسه في العمل يخسر شرفه ؛ ومن يتراجع عن مبادئه خوفا او طمعا يهسؤ شرفه ؛ وفي كل ذلك لا ينبغي ان يكون للجسد ؛ او لجزس بسيط من الجسد ؛ هذه القيمة المتضخمة في تحديد الشرف او عدمه
لقد استنكر الكثيرون ان يكتب احد من تعرضوا للتعذيب في السودان؛ عن ااحدي وسائل تعذيبه ؛ وذلك لما قام رجال الامن الفاشست باغتصابه ؛ وزعموا انه بذكره لهذا يمرغ شرفه في الوحل
ما لم يدركه هؤلاء ؛ هو ان من مارس هذه الفعلة الشنيعة هو فاقد الشرف ؛ ومن يرئسهم من بشير وترابي (حينها )؛ وان الرجل كان متسقا مع شرفه ؛ وشجاعا ؛ حين حكي عن تجربته علنا ؛ وطالب بمعاقبة من انتهكوا حرمة جسده ؛ ولكنهم لم ينتهكوا شرفه ؛ ولا يستطيعون
انت تسالي من هو المسؤول ؛ هل هو الاخ ام الزوج ام البنت ؛ وانا اسالك ليس عن من هوالمسؤول عن فساد مزعوم للبنات - الحيطة القصيرة - ؛ بل من هو المسؤول عن فساد معلوم للامة ؛ فالبلد الذي تمارس فيه الابادة الجماعية ؛ والتعذيب ؛ ويطلق الرصاص فيه علي المتظاهرين ؛ وينتشر فيه الفساد المالي والاداري ؛ ويحكمه سفاح كاذب خالي من الضمير والمواهب ؛ هو بلد فاقد للشرف العام ؛ وينبغي ان تكون فيه مفاهيم العفة التقليدية آخر مواضيع النقاش
الفساد الروحي والاجتماعي في السودان ؛ والذي يجعلنا ننفعل دفاعا عن دكتاتور حقير من شاكلة صدام ؛ ولا ننفعل لموت 2 مليون انسان في ديارنا ؛ في واحدة من اقذر واسؤا الحروب الاهلية علي الاطلاق ؛ مسؤولة عنه العقلية السودانية ؛ والاسرة السودانية ؛ والنخبة السودانية ؛ مسؤولة عنه هذه الاطراف ؛ لانها لا تبني كائنا سويا ؛ له استقلاليته وقدرته علي التعببير عن رايه ومقاومة الضغوط المختلفة ؛ ولذلك فسرعان ما يبيع هذا الكائن المازوم ؛ جسده او ضميره او عقله اومبادئه ؛ ويتحول اما الي منحل او منحلة يبيع الجسدبالمال ؛ او كائن عصابي متشنج يجد لذته في قتل الجنوبيين او تعذيل المعارضين ؛ او انتهازي متسلق يبحث عن المال بالسلطة ؛ او الي اخر فارغ هارب من اي التزام
الطفل السوداني ؛ والذي يسمي عندنا جاهل ؛ هذا المقموعة ذاتيته ؛ والذي ياكل معزولا مع غيره من الاطفال ؛ وذلك بعد ان ياكل الرجال والكبار اولا ؛ والذي ينتهر عند كل سانحة ؛ وخصوصا الطفلة المقموعة مرتين ؛ لا يمكن ان ينمو/تنمو كراشد/ة بشخصيات سوية ؛ ولا يمكن ان يطوروا؛ شاباتا وشبابا في انفسهم مبادي تكون ذاتيتهم ؛ ولذلك فنجد انهم ضعيفين امام التحولات الاجتماعية ؛ فما ان يصل احدهم الي اوربا حتي ينفصم ؛ وما ان يقرا كتاب دين حتي يتدروش او يتكوزن ؛ وما ان يخرج من بيت الابوين وحتي ينطلق جنونا ؛ وما ان يخرج من السودان حتي يتبني المثل السوداني السمج : بلدا ما بلدك ؛ انطلق فيها عريان
المراة السودانية والرجل السوداني هما ضحايا مجتمع تقليدي متخلف وخامل ولزج ؛ يدعي ما ليس له من الاصل والفصل والتاريخ ؛ ويعيش في هوية مزعومة ؛ ويتطاول علي الاخرين وهو يعيش التخلف والفقر المدقع والدونية السياسية والاجتماعية ؛ ولذلك فما ان يخرج من محيطه؛ وينكسر عنه؛ كالمجنون ؛ القيد ؛ حتي تخرج للعيان كل امراضه وتشوهاته وسماجته وجلافته
ثم تحمل المسؤلية للمراة
عادل
| |
|
|
|
|
|
|
|
|
|
Re: يوم الفول المصلح (Re: بت قضيم)
|
بت قضيم
تحية بروعة كتاباتك اللذيذة
لا زلت استمتع ببوستاتك الرائعة
من وكت كنت بتابع وانا برا الحوش
ولى هسى
طبعاً كنت بضحك من بداية البوست لغاية
ما قلبت الحكاية
ودى ما اخلاق كل المغتربين .. الفى جدة ولا غيرها
لا كن النماذج السالبة موجودة فى اى مكان وزمان
واصلى كتاباتك الممتعة لانها تغسل كثيراً من همومنا
كل الود
| |
|
|
|
|
|
|
|
|
 Re: يوم الفول المصلح (Re: doma)
|
الاخت بت قضيم
اولا اتفق مع الاخ عادل في طرحه
وازيد ليكي شوية لكن قبل الزيادة فتوار ديل اهلي الرباطاب ما شفتها
خلاص كدي نديهم زيارة ما دام في شاعر قال كلام زي دا
اختي ازيدك علما ان العنصر النسائي الان في المملكة اصبح منظم بالنسبة للاشكال اياها
انا اعمل في مجال العمرة والسياحة معا اعرف كل الجنسيات التي تمارس هذه الاشياء بصورة منظمة لكن بناتنا ما كان عندهم هذا التنظيم لكن قبل ثلاث سنوات انتظمت هذه المجموعات وحتي لديهم من يعمل في القصور في جدة والرياض والطائف
ويوجد تهريب الي الرياض ايضا وحتي يحضروا الي المكتب ويقولوا الكلام دا ما عليك بس خلوهم يمروا وتاني ما حاتشوفوهم
اقول لك ان العنصر الرجالي موجود بنفس شهامة اولاد البلد واولاد جعل
ما تقابلك شريحة نتنة وتحكمي علي الجميع
نقول ماذا زال هناك الكثير من ابناء السودان المخلصيت الذين يخافون علي بنات بلدهم
| |
|
|
|
|
|
|
|
|
|
Re: يوم الفول المصلح (Re: بت قضيم)
|
الأخــت بت قـضـيـم ســــــــلااااااااام
و الله ما عارفين بي زيارتك لي بتاع الفول دا لكن لو كنا عارفين
كنا هاجرنا من المدينة فرادا و جماعات و نخت لينا كراسي جنب بتاع
الفول المحظوظ دا علشان نتشرف بي شوفتك و شوفة شجرة الكرومب دي
( كدي تعالي هي زي بتاعة ويست باك نيجيريا؟؟؟؟؟؟)
تحياتي
| |
|
|
|
|
|
|
|
|
|
Re: يوم الفول المصلح (Re: بت قضيم)
|
بنت قضيم
ازيك يا بنيه؟؟
عساك طيبه
شكلك بتعرفيني
لاكن انا والله ما عرفتك منو..
اما عن الجبنه المضفره
فاظن ان اصلها مصري..
لاني عارفه انه الجبنه المضفره فى مصر موجوده
و حتي كان ما مصر
النوبه
والله اعلم
لك تحياتي يا استاذه
و
لى قدام
| |
|
|
|
|
|
|
|
|
|
Re: يوم الفول المصلح (Re: بت قضيم)
|
سلام عليكم جميعاً
لما يعكلت مديري اللطيف،،، يستصعب عليا الرد في وقته،،، ونقتي كلها تضيع في حق الشيطان الرجيم
مما يعني رحمة الله لكم
ابو حسين
انا ادري ان أصابع اليد لا تتشابه،،، كنت قد قصدت أن هذه الظواهر دخيلة وجديدة على الشعب السوداني،،، وقد بدأت تأخذ شكل العموم،، والله يستر من مقبل الأيام وجيلنا الجديد المزعزع ما بين الغطوة،،، وحفلات الخلط
وتسلم
عادل عبد العاطي
قالت لك دوما (القومة ليك) وقد سبقتني إليها
يومياً تثبت لي أنك تستحق من الأحترام والتقدير اكثر مما اكنه لك بكثير
حفظ الله لك كبير عقلك
كل الود
أرتيقا
تسلم لكل شئ
واعتقد أن القراءة من بعيد لبعيد ليست كافية
لا بد أن تدلي برأي لو تملك رأيافي اي موضوع عارف ليه؟؟
لأن الكثير منا يستفيد من هذا البورد ويأخذ بقدر ما يعطي ،،، اقول ليك مثال؟؟؟
تعلمت (وهذه حقيقة ويشهد الله) تعلمت من حمزة سليمان الترفع والتواضع لله في كل شئ،، التسامى
ولا تسألني كيف فالشرح يطول،،، قد افعل واقول يوماً
سلمت يا ذوق
دوما
قرأت لك تعليقاُ في إحدى بوستات الأخت شيري،، يخصني ويخصها
ليست المسألة اغتراب أين؟؟
ولكن اغتراب كيف؟؟؟
لم اجرب اغتراب الدول الأوربية والأمريكية،،، لكني اظن أنها اكثر في الإنخلاع والتسلخ
ليتك تطرحين لنا بعض من خبراتك هناك عسى الصورة تتضح لنا شوية
دمت يا كبيرة
| |
|
|
|
|
|
|
|
|
|
Re: يوم الفول المصلح (Re: بت قضيم)
|
مهاجر
لك كل التحايا الطيبة
أنا اكيدة أن العنصر السوداني الجيد بل الممتاز ما زال موجود
اليس الرسول صلى الله عليه وسلم من قال فيما معناه أن الخير في أمتي إلى يوم الدين
!!
عن العناصر السيئة التي تحدث فوالله الواحد بسمع ويشوف أشياء تكش لها الأجساد
كميات (الدعارة السودانية) في هذه النواحي اصبحت في ازدياد ورائحتها فايحة
وكما ذكرت أنت وتفضلت فإنها للأسف اصبحت تدار باقتدار وفي شكل منظمات ذات خبرة وكمان مكفولة من جهات عليا
استغفر الله العظيم
المشكلة لو طرحت فكرة ذي دي للنقاش،،، لقالوا لك عيب عليك أن تقول ما لا يقال في حق الشعب السوداني
ربي كم نجيد دفن الرؤوس في الرمال؟؟
تحية احترام لك يا اخي
بنية السكرية
إن شاء الله اكون بعرفك
غايتو سمكتك دي ما بعيدة عليا
كمان عجبتني ويوم ممكن اسرقها ليك
شكراً لمعلومة الجبنة المضفرة وعندك حق،،، هي صحي اساسابتاعت القبطة المصاروة تحديداً
تسلمي يا ذوق
هالة قوتة
هل لك علاقة بالمنطقة (اب قوتة)؟؟؟
تسلمي للدخول هنا ورفع البوست
حاجة تكيف لما يجي زول يرفع للواحد بوسته
جنس عظمة الله وكيلك
ليتك ابديت رأيك في الموضوع
وتسلمي يا جميلة
ود العجمي
لووووول
حلوة (الكركتي) دي،،، وكدي ربطها معاها شوية الكتوش زاتو بتعرفوا ليك
ظنيتها حنكشة ساي
تسلم يا لذيذ
| |
|
|
|
|
|
|
|
|
 Re: يوم الفول المصلح (Re: بت قضيم)
|
شكرا الاخت بت قضيم
حقيقة الان نعيش في وقت اللامبالاة
يعني في البورد الناس تناقش في مواضيع مرات الواحد يدخل ضيف عشان ما ارد او الناس تشوفك وتعرف عنك انك ترفض هذه الاشياء ولا ترد عليها
انا اموت من الخجل مرات او الزعل بصورة لا استطيع ان اصورها لك
انا مشرف علي قسم العمليات في الشركة وعندي جيش من السعوديين المستقبلين في المطار والميناء لا اعرف كيف يحضروا ويحكوا لكي عن السودانيات ومنهم من يقيم علاقات ومنهم من يطنش وما يجيب لي تقرير عن وصولهم وخلي المناظر الواحد شافها بنفسوا
حتي يتحدثن عن ما ادخروه في فترة العمرة من مال شي لا يوصف
والحقيقة ما في خجل انوا الموظف دا سوداني وامامك تتعامل مع السعودي بطريقة لو السيفين ديل كان قتلتها
لكن ربنا كريم انا لو رجعت السودان بشتغل في وزارة الداخلية وبوريهم كلهم رجال علي حريم كيف يطلعوا من السودان
لكن برضو الواسطة ليها اثر
الله كريم علينا وما مشكلة اطرحي اي مشكلة ونحنا معاك ما عليك من الناس هنا النطيط حقهم دا بقي عادي بقي سوق ام دفسوا
| |
|
|
|
|
|
|
|
|
|
Re: يوم الفول المصلح (Re: بت قضيم)
|
شكرا للرد من جديد يا مهاجر
والموضوع الذي تتحدث عنه خطير،،، والحديث فيه بجيب وجع الراس،،، ده لو اساساً وجدت رغبة من أحد ما مشاركتك فيه
حاوريك
وتسلم
| |
|
|
|
|
|
|
|
|
|
Re: يوم الفول المصلح (Re: بت قضيم)
|
سلامات بت قضيم
الليلة حكايتكم شنو البورد كلو اكل وعزومات ساااااكت بى جاى اب دمام والفول المصلح وكمان فيها عواسة كسرة
وبى هناك شيرى عاملة كمونية من خرفانه السبعة والجماعة واقفين مالين المكان والبيت لامن مدفق وكمان ما شفتو البيتاوق بالحيطة عايز يمدو ليهو بى فوق
اها قولو لى يا ناس ما نلمها احسن فى مكان واحد ورايكم شنو لو طلعنا بيها البر ونمرق من كتمة الشقق دى
اها قلتو شنو؟؟؟
حكيك حلو بلحيل
ولى قدام
| |
|
|
|
|
|
|
|
|
|
Re: يوم الفول المصلح (Re: بت قضيم)
|
..
.
سلام قرنفلى
يا اخوى ما قالو ليك وحَم
يعنى ممكن تتوحم بفول وتكون قادصده المقادم
من قدم ولا الكوارع من كرراع
ولا ما قريت قرفة التفاح واشتهاء الفووول
لا ادرى كيف فأتتنى هذا الابداع
وتلك الروعة
تحياتى يا مبدعة
وزيدينا فرحا واشراقا
يا ربي محمود عبد العزيز ما ينزل لينا كاسيت
اسمو يا مبدعة
على وزن
انتى مشرقة ويا مفرحة
تحياتى
| |
|
|
|
|
|
|
|
|
 Re: يوم الفول المصلح (Re: بت قضيم)
|
معقوووووووووووووله بس.. بس تعالي شوفي القطينه و حي الصفا والفول المصلح لي علاقه بيهو وعلشان كده لازم تديني خلو رجل اقصد حقووق الطبع والله بالغتي عديل
| |
|
|
|
|
|
|
|
|
|
Re: يوم الفول المصلح (Re: بت قضيم)
|
قرنفل نكت البوست ده من وين؟؟؟
بعدين بالله كان ما شايف الفول،، ما شميت ريحة بصله؟؟
حتجوعنا ساي ياخي
تبلدينا
اقول ليك سر؟؟
ياخي ما بحب محمود عبد العزيز مع أني متأكدة من مقدارته الفنية ،إلا أنه (في رأي المتواضع جدا) لا يجيد استخدام كل أدواته، ألحانه ليست من النوع الذي يتحدث عن نفسه
وفي أدائه بعض التكلف
وما تديني عكاز لان هذا مجرد رأي لشخص مستمع وليس ناقد فني
وكان فاتك الفول المصلح نضبح ليك تور انت بس ما تزعل
وتسلم لكل هذا الذوق يا طيب
وليام
حرم تشيله،، وبدون خلو رجل كمان،، جيب انت طعمية ونبدل،، اصلي ما بحب الفول يا قول بت عمي
سلمت للحضور
| |
|
|
|
|
|
|
|
|
|
Re: يوم الفول المصلح (Re: بت قضيم)
|
عشة صغيرة لسبعة أنفار وعازف واورغ
يعني لو كانو تلاتة يقلبوها بيت نمل
لا بأس
اهلين أهل العوض
كنت من شوية ابحث عن خيمة الحردلو طاير لي دوبيت وما لقيتها زهجت خليتها
محمود بالنسبة لي صوت جميل،، وثقة كبيرة لا بد يتمتع بها أي فنان
لكن عندو موسيقى ياخي عجيبة
ربما هي حالة الإفلاس العام،، فلما تستمع لكلمات أغاني وموسيقاها تغنوا بها في الثلاثينات من القرن الماضي،، وما زلنا للآن نستمع إليها ونطرب بها،، تستغرب لجيل الفنانين والشعراء الحالي، ولنوع الشعر الذي يغنون
أنا شخصيا غايتو ما بطيقه ولا بهضمة ربما لأني دقة قديمة
وفرق السبعة طبقات واستك ، اقصد اورغ دي ما بسمعها اساسا شان وجع الركب
نديك حقيبة أحسن
سمعت عن هيامي
؟؟
إنت قدرك سامي للثريا تسامى
عالي قدرك سامي
العفاف والرقة
لي سيادتك اسامي يا حبيبي ما حفظت زمامي
ده بمناسبة الليلة متغدين حمام وكده
| |
|
|
|
|
|
|
|
|
|
Re: يوم الفول المصلح (Re: بت قضيم)
|
لوووووووووول
أهل العوض جغبزتها جغبزية السنين
قال غدرك سامي لأم سامي
ياخي خليتها فجل
ما تفتح خيمة حقيبة طيب خلينا نفش غل نار البورد القايدة دي
نسميه مناظرة حقيبية بين أهل العوض وبت قضيم
يقوم نزار حسين يستلم الموضوع
شنتير طبعا بياخد الكاس ويشوتونا هنااااااك
| |
|
|
|
|
|
|
|
|
|
Re: يوم الفول المصلح (Re: بت قضيم)
|
بت قضيم
تخيلت واحد في أمريكا أو أوروبا لا فرق وزوجته تتوحم على بخسة قنقليس وهي للذين توجسوا خيفة وعقدت الدهشة ألسنتهم من هذه الكلمة عبارة عن ثمرة من ثمار أشجار التبلدي والثمار عادة ما تكون بيضاء في قرعة بحجم الباذنجان تزيد أو تقل عن ذلك في الحجم والشكل وتتخذ من ألوان التمويه العسكري لوناً هو بين لون كدندار شجر الحنا وحمار سيد القزاز الذي ما زال يقلق منامنا رغم إنتهاء حقبة البار وقزاز البيرة أم جمل أو أم تركتر إلى أن تظهر علينا حقبة زمنية تكون الركشة فيها علامة مميزة لتلك المشروبات الكحولية.
فيتفضل مشكوراُ أحد أقاربه الملقوفين طماعاً في كرم قريبه ليخارجه من البلد إلى أى جهة لا مشكلة فيقوم بشراء كمية من تلك القنقليس أكتبوها بالإس أو الزد سيان ثم يقوم بشحنها عن طريق اللفتهانزا إلى أوروبا وهناك يكتشف رجال الجمارك بحنكتهم وفطنتهم أن هناك أجسام غريبة وربما يكون الطرد ملغوماً أو مفخخاً ، وتعلن حالة الطوارئ وتعم الفوضي ويتم التحقيق مع صاحبنا الذي أرسل الطرد على عنوانه ويستمر التحقيق لحين وصول نتائج المختبرات في أمريكا وبريطانيا ويتم حجز الرجل في قاعدة غوانتانموا وتلد الزوجة وتنوم وتصحي ويظل زوجها في الأسر بتهمة التحريض على الإرهاب وتهديد الأمن القومي لأمريكا وبريطانيا العظمي ومعاداة السامية بي شوية قنقليس.
| |
|
|
|
|
|
|
|
|
|
Re: يوم الفول المصلح (Re: بت قضيم)
|
لووووووووووول
ذكرتني بخس القونقليز
الغريبة اقل ما فيها كمية القونقليز نفسها
أما ما يتناثر من هبابها هنا وهناك،، فيسمونه الأطفال (الدقة) وهناك نوعان من الدقة،، دقة قونقليز وهي أحمض طعما من النوع الثاني وهو دقة الدوم
ودقة القونقليز تستخدم في المدارس لجعل محلول الشطة السايل يتقل شوية فيصير شيئا اشبه بدمعة بطاطس مهرودة شديد،، فيأكلها الأطفال بمتعة مابعدها متعة خصوصا انه الشطة السايلة تكتسب صفة الكثافة وتصبح اكثر سهولة في اللطيخ والجلبطة
ولذا،، فلا بأس أن تتوحم المراة على بخسة القونقليز فلا تجدها لان الطفل لا محالة آكل القونقليز بكل صوره بخس وبذر وهباب
ساي ابوه حبسوه والله
| |
|
|
|
|
|
|
|
|
|
Re: يوم الفول المصلح (Re: بت قضيم)
|
تبلدينا
ديل ذي اسماء في سباق خيل
لكن نهديهم مشكلة يعني؟؟
عاجباني اغنية لمحمودعبد العزيز اسمها مع السلامة
كما نهديها للأهل بكسلا وودمدني
هسه اللم كسلا بي ود مدني شنو؟؟؟
هوبليس
المهم عملية الهضم تكون مريحة
وتسلموا
| |
|
|
|
|
|
|
|
|
|
Re: يوم الفول المصلح (Re: بت قضيم)
|
..
.
looool@ ديل ذي اسماء في سباق خيل
والله بالغتى وقطعتى مصارينى عديل كدا
انت قلت كدا ؟؟
سمح
انت قايلاهم ما قاعدين يقروا الكلام دا
قبل شوية قطعت فيك فى بوست انسانه
عليك الله اقريهو وهترشى لينا عن تصرفاتنا فى الشتات
رغم انو الموضوع تم تناوله منك سابقا لكن ما بتفرق
الليلة الخميس الجابكم شنو ؟؟
سلام
| |
|
|
|
|
|
|
|
|
|
Re: يوم الفول المصلح (Re: بت قضيم)
|
والله قريته يا تبلدينا
وكنت ماشة اتماسخ عليك ما عارفة ليه
الله ستر
لكن اشمعنى الخميس
قايلني ندى القلعة ياخ
عليك ملاحظات
يسترنا الله منك بس
| |
|
|
|
|
|
|
|
|
|
Re: يوم الفول المصلح (Re: بت قضيم)
|
بت قضيم
تسلمى على الروائع الوحمية دى
انت عارفة
فى واحدة عندنا فى بلاد الخواجات هنا
توحمت ليها بعجور
جابو ليها خيار قالت لا عايزة
قصب سكر ولا تبش
دى حالة دى ؟
| |
|
|
|
|
|
|
|
|
|
Re: يوم الفول المصلح (Re: hala guta)
|
والله يا هالة بوستك ده لفت نظري لموضوع الترشيحات ما شفته إلا الآن
واتفاجئت أن اسمي اساسا مذكور
انا لست مساهمة جيدة،، اولا انا بكتب مجرد فضفضة ولست اختصاصية
وثانياً،،، بالله الجن ده تسميه اساسا كتابات ليترشح كمان؟؟؟
خجلت أكتب هذا الكلام في البوست المعني
تسلمي لحسن ظنك فيا
عايزة اعبر اكتر خايفة يقولوا انبشكت وعجبها الكلام وبتجامل
لكن حقيقي تسلموا لحسن الظن
يخليك
| |
|
|
|
|
|
|
| |
بت قضيم
garjah
Ahlalawad
بدرالدين شنا
benyya
Abdel Aati
جدو
ABUHUSSEIN
doma
مهاجر
ود العجمى
willeim andrea
almulaomar
alfatih
فيس بوك
تويتر
انستقرام
يوتيوب
بنتيريست