امبارح بعدما أصابني الاحباط من الحرب في العراق ومناظر الأطفال المصابين والجرحي وقوافل الشهداء واخبار القصف المتواصل اخدت الريموت وقلت نغير القناة ونشوف لينا شيتن شوية يخفف المصاب . مريت على قناة نغم لقيت البنية البقولو ليها نانسي بت عجرم ، وزي ما بحصل معاي في كل مرة اشوفا فيها لقيت ليك نفسي سارح معاها وتايه في عالم تاني وبعد تفكير طويل طلعت بالقرار الحاسم ده وما حاتنازل منه ابدا ومهما تقولوا أو تعملوا قررت أن اتزوج نانسي بت عجرم أيوا وانا بكامل قواي العقلية قررت امشي اتقدم لي عمي عجرم واقول ليه والله ياعمي عجرم انا طالب القرب منك في بينتك نانسي . طبعاً الراجل ما حيصدق وحايقول على بالطلاق بالتلاتة نعقد ليك هسة دي عليها وكمان العقد يكون في الخرطوم . الحقيقة فوجئت بطلبه خاصة والعبد لله من المفلسين دوما وبعدين ما كنت مجهز نفسي لمسألة العقد في الخرطوم دي عشان كدا قلت استعين باخواني في البورد على حكاية العقد في الخرطوم دي وبناء عليه رسمت الخطة التالية لمراسم العقد وحفل الزفاف طبعاً الحفل حايحيه الأستاذ الموصلي اللي بجي من أمريكا وعلى حسابه الخاص لاحياء الحفل ومعاه أستاذنا حمزة سليمان ، برضو قرر انو يغني في الحفل وبرضو ملح والجية من الأمارات والرجعة على حسابه الخاص تصدقوا . أها بقى كون العروس نانسي بت عجرم ما بتعرف في أمور الحنة والدخان حا نوكل المهمة دي للعزيزة تماضر ايوا تماضر شيخ الدين اصلها خبرة وعندها نظرة فنية ، وكمان عاشرت أجناس كتيرة غير سوادنية وبالتالي اكتسبت الخبرة الكافية . الأخوات شيري وبت قضيم قررن بقومن بعمل خبيز العقد وشيري قالت إنها رغم الحرب مؤثرة فيها بس حاتجتهد وتطلع لينا حاجة ما تخلص من الخبيز بأنواعه .وبت قضيم قالت اصلو خبرتها في الخبيز ماليها حدود. أخوانا أبحراز وابو يسرا ديل ناس ضبح ساااااااااااااااااكت يشوفو الخرفان بي وين ويمشو على النمرة الفاضية ديك يضبحوا فيها ويقطعوا اللحمة ويجهزوها تمام التمام . كبير البيت بكري قال متبرع يجيب الساوند وكاميرات التصوير من أمريكا ويجي يحضر الحفل ويشرف على تصويره بالكامل وكمان حلف من حق الساوند ونواصل
04-08-2003, 01:48 PM
شرووم شرووم
تاريخ التسجيل: 04-21-2002
مجموع المشاركات: 662
اها يا استازتنا ( وعفوا لعدم وجود حرف الزال على جهازي المجنون دا الموصلي وحمزة سليمان
بتجو وللا عندكم رايكم علي الطلاق اللي مايجي يحضر عرسي من بت عجرم بس اللامي والفارقي ويا بت قضيم وشيري اخير تتكربن مع عروسي وتقيفن الف احمر بكري ياخوي انا معتمد علي الله ثم عليك في الساوند والكاميرات وماتقصو ضهرنا مع البنية بت عجرومي
اول حاجة ورينا نانسى دى منى وانت شفتها وين وكان تنزل لينا صورتها ياخى عشان نقول راينا فيها مش اى واحد يمشى يلقط لينا من الشرق ومن الغرب ويجينا ما كفاية اخونا عكسو ياخى ؟؟
المهم ورينا انت شفتها وين وفى ياتو قناة وبتغنى شنو ؟؟
انت لحقت اخونا جيمس ولا شنو اخونا تمبس ورانا بضاعته والله شرط للارض وتستاهل لكن انت ما عرفنا ليك صرفا ولا عدلا
04-08-2003, 06:46 PM
zola123 zola123
تاريخ التسجيل: 08-22-2002
مجموع المشاركات: 7
يا زول ما تشيل هم ونحن نشد من ازرك لووول اها بس شفت نخرت البت دي قبل ما تعمل عملية تجميل تتذكر شامير الاسرائيلي؟ والله يمكن نخرته كانت احله من حقته النبي الزول ده مات متين ما سمعت بيه؟؟ اها بس خد بالك من العوامل الوراثية عشان التجميل ما بنفع معاه
يا عم قرشوانت ما بتعرف نانسي عجرم امال بتتفرج سنو في التلفزيون لووووول
تحياتي زولة123
04-09-2003, 08:42 AM
tmbis tmbis
تاريخ التسجيل: 10-19-2002
مجموع المشاركات: 24862
يا زول انت قاعد وين لي يوم الليلة ما شفت بت عجرم الحق نفسك وحصل شوفا قبل الامريكان ما يشوفوها في قناة جديدة اسمها قناة نغم بتجي على الديجتال بتجيب بت عجرم زي عشرين مرة في اليوم انصحك تمشي تشوف اغنيتها اخاصمك اه اه اه وبعدين براك بتعزر اخوك شرووم
نشكر لك الطلة بس ما وريتنا مشاركتك في العرس بتبقى بشنو
حاول تملا جيبك عشان الكشف حايكون تقيل خالص وبالدولار
شرووم
04-09-2003, 11:12 AM
شرووم شرووم
تاريخ التسجيل: 04-21-2002
مجموع المشاركات: 662
اشكرك حتى اتكرمش على مؤازرتك وتأييدك ، بس ما تبقى زي مؤازرة الدول العربية لشعب العراق
بعدين حكاية النخرة دي يطرشني منها الا كان كلامك ده ، اما حكاية النسل وكونه بجي على ماقبل التجميل يعني بالنخرة الاساسية دي مامشكلة يا بت عمي لانو نخرت ناس عمي عجرم نخرة معتبرة وفي كل الاحوال احسن من نخرة آل شرووم
مرة تانية مشكورة على مرورك على صيوان عرسنا الميمون
شرووم
04-09-2003, 11:32 AM
شرووم شرووم
تاريخ التسجيل: 04-21-2002
مجموع المشاركات: 662
يا زول والله ما تقول لي ، وكمان بالطرحة ما شي عجيب ايوا ده الكلام الصاح لمن صاح لكن والله بت عجرومي دي كان لبست لي الطرحة مابنتحر ليها طوالي ويا خوي نحن من دعاة تحسين النسل وبشدة وبقوة ونشجب وندين كل محاولات معاكستنا او معارضتنا في اتجاهنا ده
نشكر لك الطلة واخونا جيمس مشكور نزل صورة للعجرومية لكن دي ما الصورة اللي انا بشوفها اليومين ديل خلي بالك تكون قبل العملية القالتها اختنا زولة 123
يديك العافية
جيمس اخونا وحبيبنا هلا بيك وبي طلتك ومشكور حبيبنا على صورة المدام طبعا انا كنت ناوي انزلها بس قلت ياود ما تنزل صورة مدامتك على الانترنت عيب
هاهاهاهاا بس يا جميس برضك ما وريتنا بتجي العرس وللا لا ومساهمتك شنو معاي لاني العرس ده بتم بالمساهمات البوردية
ولك تحياتي وودي
شروووم
04-09-2003, 11:55 AM
HAMZA SULIMAN HAMZA SULIMAN
تاريخ التسجيل: 04-20-2002
مجموع المشاركات: 3278
شروووم انا طبعاً مابعرف نانسي بت عجرم دي لكن بعمل ليك الخبيز بناء على الصور النزلوها الشباب هنا البت شديدة شدة الحرامي السرق التلفزيون والمسلسل مدور ورغم ما قد تسببه لنا هذه الشدة من ضيق نفس وحرقان روح لكن لا فرار من الاعتراف بها الله يجازي محنك كان في داعي للعقد دي؟؟؟
بس بالله عليك دي بتعمل شنو بالضبط؟؟؟ بتغني واللا دي الغنا بقولها ما شاء الله
04-09-2003, 12:09 PM
james james
تاريخ التسجيل: 06-21-2002
مجموع المشاركات: 2726
كم انا سعيد لطلتك علينا في صيواناالمتواضع دا وابداءك الاستعداد للغناء في حفل زفافي من زينة البنيات نانسي بت عجرومي خلاني اطير فوق السحاب بلا جنحين
قلت لي البنية بتبراني وتحلف ما تفارقني انا بعد الم فيها يا المبروك ما داير شي خلها تبراني انشاء الله ابقى متل الابرة من كترة البري يديك العافية استازنا ومشكور على طلتك زات الاشعاع الابداعي
شرووم
04-09-2003, 12:44 PM
zola123 zola123
تاريخ التسجيل: 08-22-2002
مجموع المشاركات: 7
يا عم قرشو والناس الما سمعو خطيبة شروم بتغني لاكن ما تقولوا زولة تساهم في نشر الفن الهابط في البورد لوووول انا بس باعرفها على الناس لو باعرف اخت الفيديو كليب كان ختيتوا بس تجيبوا لينا اذن من رقابة البورد
اها يا شروم جامعة الدول شنو , و نحن تأييدنا من شدة ما قوي ولا حلف الناتو انت بس انوي وشوف التأييد كيف
اما النخرة عندي مجلة قديييمة حانبش كدة وكان لقيتا بانزل صورتها زمان لاكن يا زول وماله بعد العملية حلوة وولادها بعدين زاتهم اعمل ليهم عمليات تحياتي زولة123
04-09-2003, 01:17 PM
شرووم شرووم
تاريخ التسجيل: 04-21-2002
مجموع المشاركات: 662
انا طبعا ختيت فوقك حمل تقيل واتكلنا عليك تب في موضوع الخبيز ده خاصة انه ما موضوع ساهل العروس كمان من لبنان وديل اهل الحلويات واهل الخبيز لكن متأكد انك وشيري حاترفعو راسنا فوق كالعادة
مشكورة على الطلة اللي جات بطعم البتي فور وحاولي تكتري من البتي فور والكعبك
شروووم لك تحياتي
04-09-2003, 02:49 PM
motaz motaz
تاريخ التسجيل: 04-26-2002
مجموع المشاركات: 1412
حبيبنا شرووم مبروك يا عم ويا بختك لكن اخوك خايف عليك بعد فترة البت دي تتقلب ليك نانسي جاكسون بس اها ما قلت لينا صيوانكم ده في ياتو شارع لاني بيني وبينك عايز اشوف لي واحده من اهل مرتك ديل بس بشرط يكون اسمها (فاطنة) يا ربي بلقاها
04-09-2003, 02:47 PM
شرووم شرووم
تاريخ التسجيل: 04-21-2002
مجموع المشاركات: 662
بالله مش انا معزور ، بعدين البت غناها ما هابط ولاشي بس الناس يعاينو ليها يكتشفو انو غناها ما هابط لكن كان سمعوها في الرادي وللا المسجل انا ما لي دخل بس الاغنية ما ظهرت عندنا
لك التحية تاااااني وحكايتي المجلة خليها لاني عزمت وكان نخرتها بقت زي خرطوم الفيل انا ماني مغير راي تب
يديك العافية
شرووم
04-09-2003, 03:00 PM
شرووم شرووم
تاريخ التسجيل: 04-21-2002
مجموع المشاركات: 662
ايهاب تحية خاصة بطعم العجرم وانت تطل على صيوانا الكبير ده
بس اوع يا ايهاب يا اخوي تقولي انك ما شفت نانسي عجرم ؟؟؟؟ بتكون بالجد مسكين وفاتك الكتير وعليك تحصل نفسك بسرعة اوي اوي على قولة ابناء شمال الوادي
نشكرك على انك جيت تاوقت لينا في الصيوان بالمناسبة ما تسالني من عجرم دي شنو لاني ما عارفها انا زاتي لكن بسال ليك العروس عنها واحنا قاعدين في الكوشة بس تعال بارك لينا عشان اتزكرك هاهاهاهااها
ولك تحياتي
شرووم
04-10-2003, 03:51 PM
شرووم شرووم
تاريخ التسجيل: 04-21-2002
مجموع المشاركات: 662
الظاهر عليك نويت تعملها وتزوغ ما تجي تحضر معانا عرسنا لانك لسة ما أكدت انك جاي وللا لا على كل حال نحن قاعدين حارسنك لمن تجي وبنية عجرم وقع منها حلف قالت انك لوماغنيتو انت واستازي حمزة بترجع في الموضوع كله دحين ياالموصلي يا حبيبنا لا تطرشق علينا الموضوع نحن ما صدقنا البنية وافقت
ويديك العافية استازي
شرووم
04-12-2003, 01:29 PM
ابو يسرا ابو يسرا
تاريخ التسجيل: 02-21-2002
مجموع المشاركات: 1837
الاخ شرووم بجد انا اعرف خطيبتك جيداً وساعدني فى معرفتها اجهزة التجسس في السودان لقد سالت وعرفتها والبوست هذا سيصلها عبر اخونا ود العجمي وانا لم اكن اشاء ان الخبط لك اوراقك لكن زجك لاسمي مع ابو حراز هو السبب لان زوجتي من متابعي هذا المنتدي وعارفة ابو حراز زول بتاع جكس ووجودي معه في عملية الذبح تعني ان هناك علاقة بيني وبينه وهذا ماترفضه حرمنا خاصة مع الدخول المكثف لبعض الوجوه النسائية الرطبة مؤخراً للبورد
04-12-2003, 01:45 PM
شرووم شرووم
تاريخ التسجيل: 04-21-2002
مجموع المشاركات: 662
رغم تلميحاتك يا اخي ابو يسرا بس ما قلت لي شفت البنية بت عمي عجرم وللا لا وهي تستاهل وللا لا ؟ أما بخصوص خطيبتي فأنا اعلنتها من أول يوم شفت فيه بت عجرم انو دي ياها خطيبتي ومش حاتنازل عنها ابدا مهما يكووووووووووووووووون ، وهل معنى كلامك انه ود العجمي اصبح جاسوس ، انتظر اجابة من ود العجمي الزي من المتوقع تكليفه برش ارضية الصيوان حتى لا يزعج الغبار بت عمي عجرم وفرش الرمل الصفراء الفاقع لونها حتى يشغل وقته بما هو مفيد له ويبتعد عن اعمال التجسس اللي تودي في دهية خصوصا مع فوران امريكا ومقصها الي شايلاه لكل من طال شعره لك التحايا وليسرا وامها وود العجمي
شرووم
04-12-2003, 04:55 PM
abas abas
تاريخ التسجيل: 07-27-2002
مجموع المشاركات: 6254
ياخوي والله سؤالك صعب خالص خالص لكن نتكل على الله ونقول انه الامور كلها في ايد بت عجرومي انا ما لي دخل فيها هي اللي ليها الحل والربط كان عجبها ود اخوي بتديه وكان ما عجبها كمان بتها وحرة فيها واكيد حاتقول والله مرتبطين أو البت عاوزنها تقرا
ومرحب بيك في صيوانا الكبير المتواضع جدا وحللت اهلا ونزلت سهلا
والله مشاركتك قمة في الروعة وانا من زمان محتار في تعليمة العروس خصوصا واني من مؤيدي رقيص العروس ومن الاولويات عندي وفكرت اشوف واحدة مختصة من السودان بس مادام العرض جاء منك انتي فاهلا بيك وزي ما قلت العروس مابتتعبك كتير يعني نقرة نقرتين في الدلوكة وتلقيها بقت معلمة في الرقيص السوداني وللا شنو رايك
نشكرك على الطلة على الصيوان الكبير ده
وتحياتي
شرووم
04-13-2003, 11:54 AM
shiry shiry
تاريخ التسجيل: 07-05-2002
مجموع المشاركات: 3511
لست حاسده ولا بغرانه لكن بتشبه روحها ويخسسسسسسسسسسسسسسي كمان عامله عمليات تجميل .. تنقصي يانانسي بت عجرم انت يا القاهر وحات سيدي حسن انا بشعري اللي كل ثلاثة عاملات انقلاب احلى منها عارف ياشرووم انا بالجمبه احلى منها شكيتك على الله يا شرووم الكان عايز تبور سوقنا كتر خيرك ياجميس انا اليوم حا احاول اجتمع باللجنة الدائمة للمراة السودانيه عشان نقدم ليك جائزة مناصرتنا في قضية حيويه مثل هذه اصلوا ناس شروم ديل نحن لو ماشيننا عليهم حمله ما بجيبوها البر شوفت كيف ياشرووم اهو قالوا ليك الشناه دي كلها مااصليه تقليد .. وكمان قالت مابتنكر امشي كده ياشبه محلات قطع الغيار ياخطافة الرجال سجمي انا مانبذت المرأة رسمي لكن ماغاظوني ياجماعة يعني نحن بشناتنا اقصد بي حلاتنا دي نطير نمشي وين ؟؟
______________________________________________________ شكيتكم على الله يا بوش وبلير وصدام
04-13-2003, 12:27 PM
شرووم شرووم
تاريخ التسجيل: 04-21-2002
مجموع المشاركات: 662
هلا وبيك وبمشاركتك في صيوانا بتاع افراح الشمالية الكبير ده
انتظرناك كتير انك تجي وتدخلي مع بت قضيم حسب الخطة المرسومة لعمل الخبيز وما يلزم من كعك وبتي فور وكل الحلويات وسمحنا ليك كمان تستعيني بصديقتك السيريلانكية نصف وبعد كله جاية متأخرة وجاية تشاكلي مدامتي والله ياشيري كتر خيرك وبارك الله فيك ، غايتو نعتبرها ليك غيرة ساكت وبغرانة من السماحة الكتيرة دي لمن البطن تطم منها عشان كدا نسامحك ونقبل جيتك المتاخرة ونرحب بيك ترحيب حااااااااااار أما قصة النخرة الفيها عملية دي يا بت الناس ده كلام جرايد ومجلات وما بهمنا كتير المهم هسة هي زي القمرة وده المهم في الموضوع كانت شنو وللا حتاتبقى شنو ده انا ماني سائل فيه يالله قومي شوفي ليك بنبر ( بكتبوها كدا ياربي ) وتعالي الحقي بت قضيم دي قلبه اتقطع بالشغل وانت زايغة بهناك مع بوش وبلير
لك التحية على الطلة وشكرا على مرورك بصيوانا
شروووم
04-13-2003, 12:55 PM
shiry shiry
تاريخ التسجيل: 07-05-2002
مجموع المشاركات: 3511
الظاهر عليك يا بت عمي مابتعرفي شي في الخبيز ودايرة تغطي علي دا بانك تسوي شكلة مع العروس وتحردي وتمشي بيتكم لكن اصلو ما نطيك كان ما بتعرفي تسوي الخبيز محلك جاهز في غسيل العدة بهنااااااااااك في الركن داك خلي الكلام الكتير والنضمي وامشي على البنيات ديلك غسلي ليك ماعون ماعونين اما العروس انا اتفقت مع عمي عجرم اتفاق رجال وتب ما بنط في كلامي وما بخليها ان بقيت حي شفتي كيف ،،، وبنات الحلة انا برضيهن ليك بس انتي كدي قولي بسم الله وختي الرحمن في قلبك وقولي مبروك لاخوك شرووم ، وخليك من نخرة عروستي لاني من الله ما خلقنا ما شفت لي سماحة نخرة زي دي وما مهم بعداك ان بقت بعملية او من بطن امها جات كدا
شكرا مرة تانية ونشوف غسيلك للعدة بكون كيف مادام فشلتي في الخبيز
شرووم
04-13-2003, 01:39 PM
شرووم شرووم
تاريخ التسجيل: 04-21-2002
مجموع المشاركات: 662
اتفضل على الصيوان لي جوة ، يا زول ماك متاخر ولا شي ونحن لسع في التجهيزات والحقنا بالتلج وكمان كان غشيت بيغادي مصنع البيبسي تكون ما قصرت معانا تب وربنا يخضر ضراعك
لك التحايا وربنا يديك واحدة عجرومية زي بت عمي عجرم دي
شرووم
04-15-2003, 12:57 PM
Elmosley Elmosley
تاريخ التسجيل: 03-14-2002
مجموع المشاركات: 34683
معقوله ياشرروم بوستك الجميل ده يفوتني اولا انا اعتذر عن انني لم انتبه له وهذا من عيوبنا في هذا البورد ولكن ياصديقي اذا قبلت نانسي زواجك او عرست واحده سودانيه احلي الموصلي بجي يغني ليك ومعاهو حمزه وعركي كمان ايه رايك شكرا علي اغنية ناننس خفيفة الظل انا جهزت شنطتي خلاص
لك التحايا وانت تطل على صيوانا العامر بيكم وبالاخوان الحلوين ديل علي الطلاق بت عجرم زاته ما حاتصدق انك حاتغني في حفل عرسنا الميمون ، وانا بعد كلامك ده زاد طولي متر لي فوق وخلاااااص تاني ما شغال بي زول اعرس بت عجرم ويغنو لي الموصلى وعركي وحمزة يا للهنا ويا للسرور ويا بختك يا شرووم
اشكرك يا استاذنا مرة تانية على طلتك واستعدادك للجية للصيوان ومن هسة انا فضيت صالون جدي محمد تجي تنزل فيهو طوالي
ولك تحياتي وودي
شرووم
04-15-2003, 02:06 PM
قرشـــو قرشـــو
تاريخ التسجيل: 02-05-2002
مجموع المشاركات: 11385
لك التحايا ،وانت تحييني بتحية جميلة ومتفردة ومتميزة
كنت متأكدانو البنية بتعجبك وبتعجب اي زول يشوفها( رغم محاولات الرائعة شيري لاظهارها بمظهر ذات الجمال المصنوع ) والاغنية يا سيدي مامهة بقدر اهمية طلة البنية بت عمي عجرم وعلى كل حال ممكن تزور الموقع ده وتسمع الاغنية وكمان تنزلها نغمة على جوالك http://www.melodyhits.com/ وشكرا على طلتك التانية وماتنسي يوم العرس تجي من بدري عشان احتمال تمسك الكشف
شرووووووم
04-15-2003, 02:49 PM
almulaomar almulaomar
تاريخ التسجيل: 07-08-2002
مجموع المشاركات: 6485
ألف مبروك يا شروم وبيت عجرم وشروم بس ما في طريقة نانسي دي تعمل عملية تجميل للوالد يعني بدل عجرم يكون أشرم ولا أكثم ولا أخرم أى حاجه غير عجرم دي عشان الواحد لو عاوز يخاطبها بلغة المسلسلات الدينية ما يقول ليها ثكلتك أمك يا بنت عجرم أو ويحك يا أبنة عجرم ولو نانسي عملت عملية تجميل أو عمليات تجميل ناس ست النفر بت عثمان وبت المنى خير السيد يعملوا شنو الغريبة في حاجه الله يديها الصحة والعافية إسمها ست البنات والله دي إلا تكون ست بنات كشتنيه. مبروك يا عريس حبيب ألبي باللبناني
04-15-2003, 11:19 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39330
هلا هلا بالملا وعساك طيب , كيف اخبار اخونا بن لادن
اشششششكرك على طلتك على صيوانا الواسع دا واقتراحك بتغيير الاسم جميل بس كمان انا في بالي ان كرت الدعوة بكون جميل لو ظل اسم البنية على ما هو عليه شوف معاي الكلام الجميل ده آل عجرم و أل شرمرم لهم عظيم الشرف بدعو سعادتكم لحضور حفل الزفاف ابنتهم إلى ابنهم
يعني اظن فيها جمال مش كدا
لك التحية والتجلة ومرحبا بك ادخل لاداخل علىالصيوان
شرووم
الحبيب ابو حسين
علك عافي آزول يا زول انت كت وين لي يوم الليلة ماشفت بت عجرومي غايتو بالغت عديل وزعلتني منك وبس شان خاتر البنية قالت يسامحوك انا بقول ليك المرة دي سماح لكن حاول انك تعرف بت عمي عجرم كويس عشان لا نزعل منك تاني
لك التحية وادخل لاداخل وشوف لك محل جنب الملا عمر بهناك
شرووم
04-16-2003, 09:42 AM
shiry shiry
تاريخ التسجيل: 07-05-2002
مجموع المشاركات: 3511
اخي شروم السألتني منو دا ناس السي آى إيه ما عارفين مكانه أعرفو ليك أنا ، وبعدين بمناسبة آل عجررم وآل شرمرم دي زي بيت الشعر الكلو شربكه داك: وقبر حرب بمكان غفر وليس قرب قبر حرب قبر يعني تقولو مرتين تلقى نفسك غلطان فيهو ثلاث مرات على الأقل وأكيد الحفلة حا تكون في وادى عربه وحا يحيها المطرب الكبير ود السافل.
04-16-2003, 10:14 AM
شرووم شرووم
تاريخ التسجيل: 04-21-2002
مجموع المشاركات: 662
اهلا بيك مرة جديدة ، وهسةانا كنت بتفقد في الصيوان ماشايفك جنب محل العدة اللي قررنا نحولك ليها بعد ما اتضح لي عدم معرفتك بعمل الخبيز والحلويات والبنبر لسة فاضي
وده شنو كمان الجيتي بيه الليلة ده امير شنو يا بت الناس مالك دايرة تخليني اعلن انتحاري اليوم ، بس اظنك ما زلت تحاولي ابعادي عن بت عجرومي لكن ما حاتنجحي في مساعيك دي لاني حاغني ليها اغنية وردي مابخليك ان بقيت حي يا قصيبة السكر الني هووووووووووووووووووووووووي يا شيري بطلي اشاعات والبت دي ابوها ( عمي عجرم ) مضاها لي والموضوع ده انتهي وبلاش تودينا في داهية وخلينابعيد من الامراء
ولك تحية خالصة شرووم
04-16-2003, 12:51 PM
ابو يسرا ابو يسرا
تاريخ التسجيل: 02-21-2002
مجموع المشاركات: 1837
لكن ما تقول لي ما اشراق عديييييييييييييييييل كدا شوف بالله قمر اربعتاشر ده منور كيف الليلة الصورة دي كان شافتها شيري بتموت خشمها فاتح ،،،،، والله ربك قادر على كل شي
اشكرك كتيييييييييييير على الصورة الجميلة وتقرر نقلك من لجنة الضبايح إلى لجنة الاستقبال في خشم باب الصيوان وسوي عمتك الكبيرة وتعال من بدري
تسلم يا ابويسرا وتسلم ليك يسرا
04-16-2003, 11:08 PM
ALZOLZATOO ALZOLZATOO
تاريخ التسجيل: 03-14-2002
مجموع المشاركات: 4216
اهلا بيك وبي طلتك علينا، وطبعا بت عجرومي اليومين ديل ماسكة الجو على حسها ومافي زول قدرها ، الله يغتيها من عين الحسود عين الراجل في المناجل عين المرا فيها الترى عين الفتاة فيها الواطة عين الضيف احد من السيف وعين الجار احر من النار عين العجوز الكرفسوس التفك الريق في طرف الفريق
وما عندك مشكلة يا حبيبنا وبنبقى اصهار بس انت جيب موافقة عمك مشعلاني اول شي ولك
تحياتي ،،،
شرووم
04-17-2003, 11:12 AM
Elmosley Elmosley
تاريخ التسجيل: 03-14-2002
مجموع المشاركات: 34683
نشكرك على طلتك وكمان ترشيحك للبوست ليكون بوست الاسبوع بس عاتبين عليك انك جهلت كل ذلك الوقت بحرمنا المصون (مستقبلا يعني ) بت عجرومي كان لازم تعرفها من وقت مبكر شوية بس ولا يهمك نحن عارفين الحرب اللي كانت قايمة في العراق وعشان كدا بنجد العذر للكل . أما شيري يا اخوي يا عبدو اظنها الحكاية ما عاجباها الزول الازرق ده يتزوج من ناس عجرم عائلة العز والنسب
لك التحايا وللاخت شيري ونتمني طلتكم من جديد
شرووم
04-18-2003, 03:15 PM
شرووم شرووم
تاريخ التسجيل: 04-21-2002
مجموع المشاركات: 662
تماضر انت عندك بت اظنك خايفاها تبور ، كيف بت عجرم تكون زي ماقلت ماهو باين في العيون انها من عائلة عجرم ، بعدين عائلة عمي عجرم معروفة ومشهورة في لبنان عليك بس تسالي عنها رفيق الحريري وهو يدلك عليها من طرف لبنان . وللا احتمال تكوني نطيتي من المهمة اللي كلفناك بيها ، غايتو كان انتي نطيتي نحن ما ناطنك وشدي حيلك معانا وخلي الجهجهة ونانسي كان بقت ياها السجم والرماد انا مابخليها تب
لك التحية والامانيبالتوفيق
شرووم
04-18-2003, 03:04 PM
شرووم شرووم
تاريخ التسجيل: 04-21-2002
مجموع المشاركات: 662
شكرا على مدة راسك في صيوانا للمرة التانية و ده شرف كبير لينا
بخصوص التذاكر ما قلنا الجية والرجعة على حسابكم الخاص وللا شنو يا استاذي على كل حال انا عندي اجتماع الاسبوع الجاي مع عمي عجرم لتحديد موعد العقد وبعداك نشوف حكاية تذاكركم دي شنو كمان
والله لي زمن اشوف العنوان وزولك غبيان لا بعرف نانسي لا عجرم الليلة بس قلت ادخل اشوف الحاصل شنو يازول دي مرة والله حربوية عليك الله كانو الصور حقاتها دي حقات نسوان تانين واحدة بتشبه اختها مافي لمن يوم تجيك داخلة البيت ماتعرفها
تماضر
يسال منها كيفن انت ما عرفتيها دي مابت ناس عجرم
يديكم العافية ويدي عجرم العافية
عبدالله جعفر
04-18-2003, 03:41 PM
Tumadir Tumadir
تاريخ التسجيل: 05-23-2002
مجموع المشاركات: 14699
سعيدين اكيد بمرورك الليلة على صيوان عرسنا الكبير ده بس ما ها المحرية في تجي وتقولي دايرة قروشك شنو يعني نحنا جايين ناكل حقك ، بعدين البت دي حقو تحننيها اكراما لينا أو لعمك شرمرم الكبير والبت لعلمك سالنا عن ( وأطأسنا )على قولة المصريين ولقيناها بت حسب ونسب وعائلة عمي عجرم عائلة اشهر من انك تشككي فيها، وقلنا ليك كان سالتي رفيق الحرير بوريك بيتم .
لك التحية تاني وخلينا من التعلل دا وقومي سوي المحلبية للبت دي خلينا نشوف الباقي شنو
شروووم
04-18-2003, 03:30 PM
شرووم شرووم
تاريخ التسجيل: 04-21-2002
مجموع المشاركات: 662
نشششششششششششششششششكرك على طلتك على الصيوان واشادتك بالصيوان كمان
طبعا ما مقبولة منك انك ماتعرف بت عجرم لي يوم اللية ، لكن بما اننا في ايام عرس سماح وسماااااااااااااااااح بس لازم تجي مالي جيبك للكشف عشان الكشف زي ما قلنا بالدولار وعمك قرشو ماسك الكشف ومابخليك تمشي ساكت وتعال من بدري عشان العقد بكون زحمة والعرس زحمة اكتر منه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
شرووم
قرشـــو
zola123
tmbis
james
HAMZA SULIMAN
بت قضيم
motaz
ايهاب
ابو يسرا
abas
shiry
Elmosley
almulaomar
ABUHUSSEIN
ALZOLZATOO
Tumadir
فيس بوك
تويتر
انستقرام
يوتيوب
بنتيريست