|
|
 موية غسيل-الشطفة التانية
|
يا ايهاب حسناً
يا جماعة ايهاب اخوي هزأني عديل كده
يعني ما نبهني فقط بل هزأني
وانا الحقيقة سعيدة جداً بهذه التهزيئة إذ يبدو انني استحقها
وهو عنده حق في أني بالغت وعبرت عن غضبي بشكل سئ يزعل الناس الما ليها دخل في الموضوع مني
يعني انا جطتها
فانا اعتذر جداً ،،،اعتذر بخجل عن طبعي النمري المستنفر دوما للشر
واسمحوا لي أن اورد ما قمت بسمحه هنا
والبريد وشيطان كوشته يطير في السما الأحمر ده إن شاء الله
والله المستعان
وسماح يا جماعة وامسحوها في وشي الشين ده
دمتم
|
|
 
|
|
|
|
|
|
|
|
Re: موية غسيل-الشطفة التانية (Re: بت قضيم)
|
صباح الخير يا وطني
غسيلي اهو
ويا قرجة مرة تانية دي كلمات زولة لقت الزول البتفكر فيه مكسر في صاحبتها وطلب منها تكلمها ليها
ما قايلاك حنكش للدرجة دي وما حتعرف تعبير موية الغسيل
ما سمعت الشاعر إذ قال
وبقيت تقيل لامن سقوك موية الغسيل
ها هو
----------------
لم استوعب ماذا عنيت بقولك (اكتشفنت جماليات فكرها)
حقاً لا ادري،،، هل يعني ذلك أنك وجدت غاندي فجأة في فكرة راسها،،،أم أنها افتتحت قريباً (دكان باسطة) طاعم في (الطايوق) فأصبح يغذى (جماليات افكارها)
لا عليك يا نفسي
الحقيقة أنت فقط تهذي،،،
ما قاله لم يكن سهلاً ،،، كان قويا لدرجة إصابتي بحمى مزدوجة،،، حمى جسد وحمى فكرة،،، (اشمعني يعني انا لا؟؟؟) أنا ايضاً جماليات افكاري تتألم وتتأزى وتصاب بوجع الباسطة،،، اعني وجع الفكرة،،، بل أن حمى صميم ايضا اصابتني،،، اليس هكذا يتشدق أهل اللغة بأن فلان اصيب في الصميم؟؟؟ حسناً أنا صميمي مصاب ويعاني فوق ذلك شعور الغثيان،،،
اود الضحك ،،، كم وددت أن يصورني احدهم في ذلك التعبير الذي الآن تخيلته ارتسم على محياي وانت تخبرني عن (صحو نبضك) المفاجئ،،، الغريب أنك لم تفصح يوماً من اين تستقي افعال كلماتك؟؟؟ ما هذه ال(صحو نبض) ؟؟؟ ألها علاقة بأهل الطب؟؟؟
جميلة جداً اكتشافاتك،،، ككل ما تفعل في حياتنا،،، حديثك جميل،،، وحماسك جميل،،، حتى حزبك الذي تحزبته أنا من أجل ابتسامة لا من أجل وطن،،، ايضاً جميل،،، يأخذ بعض من تكوينك،،، وحسناً حسنا لا تنظر لي بدهشة،، هل ظننتي فقهت يوماً اصل ومصدر كلمة تحدثتها في تلك الأركان العديدة التي كنت تقيم في الجامعة طيلة فترة زمالتي معك؟؟؟
يا (أخي) الحديث الصنع،،، كل ما كان يبدو جميلاً في تلك السانحات الجميلات ذات الأصوات العالية،،، كل ما كان يبدو جميلاً فيها،،، سيجارك الثائر الذي لا يقرب شفتيك إطلاقاً،،، دخانها كان عندي أكثف من تلك الشعارات الصماء،،، ويلي حسناً لا بأس،،، ماذا الآن إن اكتشفت جهلي وتفاهة فكري؟؟؟ لست انا حاملة دكان الباسطة فلا تلمني يا اخي.
جميل أن تكتشف فجأة براحات أرض جديدة،،، رغم مرورك عليها يومياً ولمدة خمس سنوات دراسية،،، وإن كانت ارض خيالية لا يقوم لها سور ولا عشب إلا في الراس،،، (مجازية) كما يحلو لك دائماً أن تتمنطق.
لا بأس لا بأس،،، أنا ايضاً،،، الآن ،،، (اتجازى)
ترى !!! ماذا يكون هناك في جماليات افكاري إن اكتشفها احدهم يوماً؟؟؟
ربما بعض من عناكب رفيعة الأصابع تتبعها حتماً تلك الخفافيش المخيفة التي تميز افلام الرعب ببعض الجمال،،، ماذا إن حل مكان (دكان باسطة افكاري) تلك الطيور المقلوبة النظر؟؟؟ هي مخيفة ربما،،، لكنها مميزة،،، بها نوع من الغموض والخصوصيةـ،،، قد لا تجده في جماليات افكار صديقتنا المشتركة
حسناً حسناً،،، هي صديقتي بالطبع،،، لكني فقط احدثني،،، انا اقرب إليا مني لست غريبة عليا لكي لا اتحدث لي بما يجود به دكان أفكاري...
ويلك ،،، إياك أن تظن انني اشعر بالغيرة،،، هي مجرد الطريقة التي توقعتك بها ونظراتك اللامعة المتحفزة لشئ اقرب لحلم في الخاطر
وكان أن حلمت بك معك،،،
هي فقط الطريقة التي تدخلت فيها إلى سويداء جلدي،،، ولا بأس،،، للجلد سويداء كما للقلب تماماً،،، هو ليس قرآن منزل فلن اسمح لك مرة أخرى مطلقاً، السخرية من جهلي المقيم،،، وايضاً ،،، نعم،،، كانت طريقتك في التدخل حتى في مخارج حروفي،،، كان تدخلك اقرب لنظرة مستقبل واعد،،، وكان أن حلمت،،، كان ان حلمت،،، وكان أن توقعت،،، وكان أن ،،، كان أن يبدو قريباً كأنه واقع ،،، كأنه تحقيق لشئ لا بد آت
ويلك،،، يا أخي المستحدث،،، لما لم توقف تطور ابتساماتي في وجهك قبل الذبول؟؟؟
لا طبعاً أنا لا الومك،،، أنا في حياتك فكرة،،، لست (أنثى) ،،،أنا (مجازاً) وكم يسرني ان اكون مجازك،،، لكم تجيد (الإجازات) يا هذا
حسناً دعنا لا نختلف،،، ولنسمه فقط ،،، اختلاف في وجهات النظر أفضى للشعور بالذبول والانكماش،،، مجازياً برضو،،، حسناً
حسناً
رأيي فيها؟؟؟؟
تسألني رأي في زميلتنا المشتركة...
وكيف لي أن؟؟؟؟!!!! يا جائر،،، الم تفكر يوماً،،، مجازياً،،، في سر التصاقي بكتب محاضراتك؟؟؟ بتعلق كوب مائي الصباحي وخرمة سجارتك؟؟؟
ومع ذلك ،، من البديهي أن اعترف أنها جميلة،،،من السوء بمكان أنها كذلك،،، لا استطيع ابدا أن اتبجح بأن عيناها عاديتان،،، وأن كعوب أقدامها ،،، لا تنتمي لقبيلة الغزلان،،،
كيف لي أن احيل سواد شعرها في عيناي إلى بعض النتوف المتطايرة هنا وهناك فيما يشبه جزيرة قبائل متناحرة؟؟؟!!!! اممممممم،،،بمن يذكرني هذا الوصف يا ترى؟؟؟!!! من السوء بمكان ان اتذكرني في هذه اللحظة الحرجة،،، حسناً حسنا دعنا من تلك اللفتة
كيف لي أن ادعى بأن مقاسات وسطها لا طفولية،،، وكلها يتحزم في ذلك الجزء من الجسد،،، كأبواق سلطة يبدو،،،
نعم هي جميلة،،، مقارنة ب،،، وتفرداً بدون
وهي ناعمة كأفعى
وهي ممتازة كمنتمي اصيل لوادي عبقر
وهي ضاحكة
وهي تقية
وهي ،،، هي ستقبل!!!! تراها ستقبلك؟؟؟؟ مؤكد أن نعم.
لا بأس لا بأس
ليس هذا نوع من ذبول حروفي،،، ولا انقطاع تنفسي،،، انا فقط ،،، احاورني
أمممم ،،، تسألني تمثيل الهداي؟؟؟!!!
تريدني (الواسطة) بين قلب وطائر؟؟؟
ما هذا التعبير؟؟؟ انه لا يشبهك في كل الأحوال،،، لم اعهدك يوماً رومانسياً،،، وعندما اهديتك زهرة الياسمين في ذاك الصباح الندي،،، ضحكت كثيراً على زهوري المقدمة في موقف الحافلات بجوار (غنمة) والشمس (طاقة)
ومع ذلك،،، لك ذلك،،،
سآخذ قلبك،،، واضعه (أمانة) في يد طائرتك الجديدة،،، وياااااااا للسعادة،،، سأصبح فجأة،،، كابتن طيران.
اتخيلني في منزلي ومشوار (التآلف) يهدهد بدني،،، وانا افكر،،،، أي طائر هذا الذي يشبه البوم،،، ولا بأس إن لمتني،،، أنا هنا فقط،،،، اهادن نفسي،،، بعض الهدوء.
يا صديقي العزيز
لماذا اخترتني صديقة تشهد مولد (أول حب صادق في حياتي) ....على حد تعبيرك
حسنا حسنا،،، ربما هذه اول كذبة في حياتك،،، للغرابة ما تمنيتك يوماً كاذباً إلا تواً،،، وحيثما
حسنا
سأفعل ما أؤومر،،، ولست أنت بآمر،،، هو أمر القلب المحب الصامت،،، حيث يدور برأسي كل الجهات،،، حيث امتثل صابرة،،،
مطيعة،،، مجروحة ،،، غبية،،، كانت تنتظر مجرد (مجاز)
يا أخي
انت أختي اليس كذلك؟؟؟؟ ستساعدينني اليس كذلك؟؟؟!!!
حسناً حسناً،،، ليشهد علماء اللغة ومتحدثى الشعور،،، بأن كلمة (أخ) الآن فقط ،،، استشهدت واريقت دماؤها في حرب كيييييرة تسمى حرب الإحباط
سيبقى شئ أخير،،، قبل بداية النهاية ،،،
ساسلم امانتك لطائرك،،، عليه اعدل،،، وسلمني قلبي،،،، أمانة
سامحك الله
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
شكراااااااااان يا ايهاب
بعد التهزيئة البارد ديك لا يسعني إلا ان اقول شكراااااااااان تاني
قرجة
اكتشفت قريباً أن اثقل عمل بعد نفخ الفشفاش هوالمكوة
فحيكون احسن شي تعملو انك تكوي الغسيل تمام
تكوي الغسيل دي (يا حنكوش) شئ أقرب ل(تملى الطاسة) تبقى فقري لو عرفتها دي
قال موية غسيل قال يعني شنو
بالله فهمت؟؟؟
وليد
الدستة 12 ريال
قصرنا معاك؟؟؟
ايهاب
يكسر سنونك انت
تااااااني
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
نستنى موية الشطفة الرابعة أو الخامسة - لو في
بتكون أنضف شوية
الصابون ما مشكلة مقدور عليه
ياعبدو عيب الدنيا حر والموية بتسخن عليك
وقديما قال الشاعر العربي
إن كنت في كل الامور معاتبا صديقك
سدو واستريح
| |
|
|
|
|
|
|
|
|
 Re: موية غسيل-الشطفة التانية (Re: بت قضيم)
|
يعني يا بت قضيم بقت المشكله في انك ما فهمت بوب
.والله احنا قاعدين كنب وما فهمنا اللضا (اللضا دي عرفتيها
تبقي صحي بت قضيم والفاضل سعيد ذاتو لوفهمتيها وقبل دا وداك فهمينا الحاصل شنو
ابونور
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
دقيقة يا ابو نور بس أهل العوض ده أظنه نعس
اهل العوض اخوي
جيد لامك كان فرقتنا ستة شهور
انت قايلني جيل (غردون)
!!!!
اهلين ابو نور
والله انا زاتي ما فاهمة حاجة
واللضا دي حقت أهل الريف
وطبعاً بعرفها
تشبه بالجعلي (التكتح)
واللا كيف؟؟؟
الحاصل اني كتبت بوست،،، قام واحد ثقيل متبكني (متبكني دي كيف معاك؟؟؟) من بوست كتبته عن اهل الظار وكرهني فيه ،،، يرسل ويشتم
قمت زهجت ومحيت الكلام
قام ايهاب قال لي انتي عديمة ذوق
ما احترمتي الناس الردت عليك دي ،، وقلبتي وشك شان خاطر نفر
والمثل بيقول
عشان عين اكرم مية عين
قمت اعتذرت وخجلت واكتشفت ان ايهاب عنده كل الحق،،،فكتبت البوست تاني من جديد،،
أما ما جاء في محتوى البوست من براطم
فلست صاحبة شأن كبير فيما حباني الله من دقسات واسعة المدى وعقل ممكن يودي لكن ما راجع ،، ياقول سواقين حافلات (الخرتوم)
الخرتوم دي اثبتت ليك قضيمتي؟؟؟
تسلم يا ابو النور
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
سلام مربع
بت قضيم
بس حبيت اقول . شكيتوا لي الله بوش والطرشان بلير
هو ياربي طرشان ؟
والله ماعارفه ، لكن اتخيل لي كده زي السمعت
بكوركوا ليهو في لندن واصلوا مااتلفت ليهم
وزي السمعت بت خالتي ام مازن علقت على ذلك
وطوالي شبكت في راسي انو بلير اطرش
لست ادري ماعلاقة طرشانه بما قلت
وبما اردت ان اقوله
انها االهترشه ، دائما ماتحجرك امام علية القوم
حينما تستعصي عليك عملية احكام قبضتك على موضوعك
مثلما فعل الامريكان وهم ينقادون امام شرك
العراقيين اطال الله امد بقاءهم
وفرجهم على اعداءنا واعدائهم والصغار يتلاعبون بهم
ماعارفه . . اين راس الموضوع
عايزة امسكوا مالاقياهو
الله يقطعوا بوش ،
الحمد الله اهوندا الموضوع
قصدي . ان كنت قد هممت وانا في زحمة انشغالي باخبار
العلوج الامريكان والطراطير البريطانيين
كنت اود الهترشة معك في هذا البوست
اصلها رايحة لي هترشة من مدة طويلة تجي ليها
اربعين وخمسين حلة كمونيه
لكن ام مازن خسمتني باليكلتني انا لا اهترش
عليه ها انذا اخترس
سلمتم كلكم
المهم يابت قضيم
اكتبي العايزاهو ، والعايز يغيطك اعملي ليهو جلد
وموية الغسيل خليها علينا نحن
بنشربا ليهو
سلمت ياستي
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
أنا غايتو غردون ما بعرفو
لكن عمري يساوي = سبعة معاك الاتنين ناقص تلاتة
أقول ليك .. عمري يساوي عمر الملا عمر والدكتور أبكر زياد بت الرحمابي واقسم الناتج على تلاتة زايد كم شهر كدي
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
..
.
ست البنات بت قضيم
يعني اقول شنو.....صح انو اغلب كلامك فيهو دهاليز و فيهو نوع من الغموض لكن الواحد استمتع جدا جدا....بالله استمري وانت بالجد زوووله...ميه ميه
تحياتي
| |
|
|
|
|
|
|
|
|
|
Re: موية غسيل-الشطفة التانية (Re: ABUHUSSEIN)
|
والله يا بت قضيم حقيقي مبدعة
يعني كان لينا حق نتعكلت ونشاكل وايهاب يشتم وانتي تكسري ليهو سنونو ..
والله القصة جميلة جدا جدا ولغتها راقية جدا جدا وفربت تعلى علينا الا جبنا سلم طلعنا ليها ..
ولي قدام
جــــــــــدو
| |
|
|
|
|
|
|
|
|
|
Re: موية غسيل-الشطفة التانية (Re: جدو)
|
بت قضيم
كده الواحد بقه في الصوره اها بورديك ده قاعد وين عشان نمشي نقراه ونشوف الزول الكرهك ده ونخليه ينتف ابو النوم من الغسيل ابو النوم دي قويه مش كده؟ وتبقي صحي صحي صاحبة مصطلحات صعبه زي حقت عمو
الجعلي وعمو قرجه لو عرفتيها
ابونور
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
سلام الاخت بت قضيم
لابد ان دكان الباسطة جذبه لها فللسكر فعله .....؟؟
وهل ممكن ان تحمل كل واحدة دكان باسطة فى راسها ام من الصعب
عليها حمله وايضا المحافظة على جودته
الكل منا ممتلئ انانية فلا يمكنه ان يوقف اى ابتسامة الا اذا اكتشف
دكان باسطة
اما نصيحتى حتى لا يلتفت لصديقتك او اى من كانت فعليك باستخدام
( العشرة ورقات )
هذا النموزج موجود وبكثرة فى مجتمعنا وليس الان بل اصلا موجود
ونسبة لان المجتمع السودانى لا يناقش مشاكله الا قليلا الان وفى
نطاق محدود جدا فلذلك كثيرا من الاشكالات تحت الاغطية
ولكن لابد ان تطفح وتظهر وتعودنا دائما لا نناقش مشاكلنا الا بعد
تفجر الازمات وعندما لا يمكن معها تغطية
على كل سوف تصبحين اخته واختنا شئتى ام ابيتى
لكى الود كله برائحة القرنفل
وفى انتظار الشطفة التالته
قرنفل
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
قرنفل
وحاة جدي السمح وزين،،، دي ما انا
مع ذلك انا فاهمة أنك فاهم كده
ما قصدت ان اقوله وجغبزته في دكان باسطة (جغبزت دي دايرة ليها قاموس هندي)،،، أنه يوجد في الحياة ما يسمى (استغلال العاطفة)
طبعاً من الجميل أن تحب شخصاً،،، لكنه من المبهر أن تحب،، بضم التاء
في بشر (من الجنسين) يعشقون أن يحبوا،،، ويحبوا دي فيها ضمة برضو ما عارفة واقعة في ياتو حرف
وهو نوع من النرجسية اللاارادية
وموجودة بقدر طبيعي في الناس،،، لكنها لو زادت،، تنقلب إلى نوع من الشراسة والتنمر،،، والإصرار على ايقاع الفريسة،،، ووقت أن تفعل وتوقع بعاطفة،، يأتي شعور نشوة وانتصار عجيب
لا يشوبه أي نوع من تأنيب الضمير،،، فالضمير قد اسكت (دي برضو فيها ضمة في مكان ما) اسكت الضمير بلامبالاة أو ببضع كلمات بسيطة ك(انا ما وعدتك بشئ) أو (فاجئتني) أو (والله انت زي اخوي،،أو والله انت زي اختي) الخ الخ الخ وهذه اسميها في قاموسي الروسي،،،مسكنات ضميرية
وشخصياً لا اقتنع إن قال لي احدهم (والله جات صدفة كده وانتي اتعشمتي براك) لأنه في العقل البشري،،، يوجد رادار عاطفة قوي جداً ومدهش ودقيق في الشعور بالغير،،، طبعاً باعتبار اننا بنتكلم عن ناس ناضجين
وبالطبع في حالات برئية من هذه الشراسة العاطفية إن صح التعبير ،،، لكنها نادرة
عموماً
المشاعر للأسف لا تكيل بأي ميزان،،، سوى الموازيين الشخصية،،، ولو انهم خيروني لقلت،،، أن العاطفة المتلاعبة أو الاستهتار بمشاعر الغير،، يجب أن يكون جريمة يعاقب عليها القانون
فهي منتهى الظلم المدعوم بأنانية مفرطة
دمت يا قرنفل
ويا قرجة انبسط
أهو قدامك أهو
درس فلسفة مجاناً،، كان فهمت منه حاجة اتنطر،،، إذا انا ما فهمتني ياخييييي من الثرثرة
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
سلام بت قضيم
انا لم اقصدك شخصيا بل تعاملت مع النص على انه
نموزج وموجود فى اوساط مجتمعنا
ايضا لكل انسان قرون استشعار ولكن البعض فى بعض الاحيان
بيقفل عليها بى ضبه ويتناساها
اما الاقتناع بالتعشم وغيره فهذا متروك لحالة الحدث
والاستشعار لانه ربما لا يكون دقيقا ربما
قرنفل
| |
|
|
|
|
|
|
|
|
|
Re: موية غسيل-الشطفة التانية (Re: قرنفل)
|
يا بت فضيم ما بالغتي
اولا ؛ انا ما فاهم حاجة خالص
ثانيا " وين مشيتي بفستانك الاحمر ؛ وجبتي لينا الزول الما معروف طفل ولا حشرة دا
ثالثا؛ وين بقية حفلة الظار
والا اولاد ماما فاتوا مع الفستان الاحمر
غايتوا انا ما سعيد اطلاقا
ونتلاقي في مرحلة " التظهير "
عادل
| |
|
|
|
|
|
|
|
|
|
Re: موية غسيل-الشطفة التانية (Re: قرنفل)
|
سلام بت قضيم
طبعا صاحبك بطل الرواية بتاع الباسطة دا ؛
الله ينعلو ؛ مع انو البطلة - ما انتي - بتحبو ؛
لكن زول جبانات بشكل
هو عارف البير وغطاها ؛ بس اناني
عارف البت مكسره فيهو ؛ واشان كده قاليها
"موش انتي اختي برضو "
الخوه ال...تسقط حجرك
اختي دي ما قالا ليها من زمان لييه ؟
تلاقي كان بقول ليها زمان
يا زميلة ؛ ويا رفيقة ؛ ويا صديقة ؛
وعلي اسؤا تقدير يا شقيقة روحي
التشقق رجليك ان شاء الله في برد امشير -
وصاحبتك تسمع
وهاك يا العشم
وطبعا كل كلمة من الكلمات دي ممكن تفسر بالف معني ومعني
وصاحبك عاملا سياسية وصحوبية ؛
والبت تتعشم ؛
وما تتعشي
وفي النهاية بدل تاخد ورد اكلت نيم
انا لو محلها كت خربتا عليهو حبو الجديد الطار ليهو في راسو دا ؛
الحبة التقوم لي في قدومو
تمشي للبت تلخبت ليها ؛
وتحكيليها كيف انو بيناتم قصة حب ملتهبة ؛
وتفتش ليها واحد تاني تلتقو فيها سريع سريع
اما هو فتشتغل فيهو عدله وقلبه
يسالها عن الحبكانة الجديدة ؛ وعن رايا فيها ؟
تقول لي دي مخطوبة من زمان ؛
يقول ليها رايك شنو تقول لي والله ما بطالة؛
لكن فيها شوية عباطة كدا
لكن دي ما مشكلة
اضنينا مشاترات لكن دي حاجة هامشية ؛
ما دام بتحبها
لمن تزعل عيونا بتحوص ؛
لكن انت ما حتزعلا ؛ موش كده
اخوها الكبير كل يوم والتاني يودو التجاني الماحي ؛
واخوها الصغير كل يوم والتاني داخل الحراسة ومارق
ابوها سكير
وامها شرانية ؛
لكن انت بنحبها هي ؛
ما اهلها
وجيرانهم عندهم كلب سعران
عضي لي كم نفر ؛
لكن انتا جراي مش كده
والله بطلة قصتك دي الظاهر عليها داقسة ؛
يعني صعب تمشي دكان باسطة وتشتري ليها نص صينية كدا ؛
بعدين قالت ديك رجلينها زي الغزال ؛
غزال شنو في الحر دا
دي رجليهنا اعواد كبريت
وخصرها الدار ينقطع دا ؛ معناها عندها انوركسيا ؛
والحاجات التانية البتفتخر بيها دي ؛
يا بلون منفوخ
يا مخلقنه
يعني ما سمعت بي حكمة
" ان كيدهن عظيم "
ولا شنو
والله دي كيدها لا عظيم ؛ لا عبد العظيم
قالت تشتغل طيارة وتشيل وتودي المراسيل
الداقسة
عادل
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
شيري
حبوبة لينا سامعة الناس حرب حرب،،، الامريكان حيضربوا العراق،،، الكيماوي،، بلير،،، ما بعرف شنو
سكتت ،،، ففكرت طويلاً ثم قالت
شكيتها على الله امريكيا،،، كان داير تضرب العراق سوت ليها شنو قدرها يا يمة واللا لحم سدرها،،،
راقني الأمر فقاطعتها وقلت
مالها يا حبوبة ما لحم سدرها،،، هو الشحم ده ما مقياس،،، ما شفتي عواطف دقت سمية كيف المرة ديك لما اتشاكلوا في حق الختة؟؟؟
وعواطف هذه رفيعة كقناية (قناية دي كيف يا ابو النور؟) وسمية مليانة وعاتية ما شاء الله،،، وفي يوم اتزاعلوا بسبب بعض النقود،، فنتنفت عواطف ريش سمية نتفاً،، رغم كل التوقعات بأن سمية الماكنة قد تفعص عواطف
فقالت حبوبة،،، هأ،،، قال تغلبها قال،،، كيفن عاد مع (الكتماوي)
ده؟؟؟؟
فسألتها والاستمتاع عندي وصل اقصى درجاته(هو الكتماوي ده شنو يا حبوبة؟)
فقالت،،، بري ما بعرفوا،،، ما قالوا شي كدي متل الحبوب المشمومة،،، كان الزول شماها طواااالي شحمه ينماص ويبقى ذي العندو السل،،، بري يا يمة ،، هسة يا بنية كان شحمتي شوية ما كان اخير ليك من تشمي كتماوي ويجيك سل؟؟؟ تبري وتستبري يا يمة
اديني مصلايتي دي خليني النصلي الصبح
وقد كانت الساعة الثانية عشر صباحاً
وشر البلية ما يضحك
شفتي في كيف ناس على نياتها وحلوة مما يعني ان الدنيا لسة فيها ولو شوية خير؟؟؟
شكرا لطلتك الجميلة
وعلى فكرة انا قررت اسميك شيري علوني
كيف معاك؟؟؟
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
سولارا الحبيبة
كلام زوغة مافي
جيبي الطشت هنا ده واكربي الشعر ورانا غسيل
طبعاً غسيل الطشت ده رغم عدم جدواه إذ أن الهدوم تتطنبج (تتطنبج كيف يا ابو النور؟؟) تتطنبج في نفس الموية كم مرة فتطلع يا مولاي كما وسختني نفس الملامح والبقع
رغم تعبه،،، فقد كان ذا ميزة تحفة،،، وهو امكانية أن تدلق موية في نص الشارع مما يعطي ال(حرمة) الأحقية الشرعية أنها تكشح أي شخص غير مرغوب فيه بمزااااااااج ثم ترفع حاجباها في دهشة وخلعة مصطنعة وتقول
هي سوري،،، والله سوري،،، ما ما قصدت
اتخيلني في هذه البلد وانا شايلة الطشت (وللأسف بتاع معدن مافي) وفي نص الشارع شوووووووو وقووووووم كده يا المطوع افتي بأن هذه الكشحة )لا تجوز شرعاً)
فيقيم عليا الحد بتهمة (لا شرعية الكشحة) أو (الكشحة اللا شرعية) أو كيف ما يكون
هسي ارش جارنا الغايظني بشنو تفتكري؟؟؟
الموضوع داير تفكير خصوصاً ان الغسالة تقيلة
!!!!!
ابو حسين حبابك
هو بالله توب الزراق لونه ازرق؟؟؟
يطرشني قايلاه خيش
طيب بتعرف التيلة؟؟؟
جدو يا رافع معنوياتي
الله يخليك وتسلم
المشكلة هسة نجيب للزول ده سنونه من وين بعد ما الشبطة (الشبطة كيف يا ابو النور؟) تمت
زي زمان الواحد يكسر سنه يقولوا ليه شيلها ارميها في وش الشمس وقول
يا شمس هاااااك سن الحمارة اديني سن الغزالة
واموووت انا بس اشوف سنون غزالة،، إذ أنني كلما اناظر المرآة تذكرت هذه القصة وفكرت في احتمالين
يا الشمس دي مقلبتني وحوصت كلامي
يا إما القال المقولة دي ما شاف ليه سنون غزالة قبل كده وعملها في اولاد الناس
الحقيقة اصلي ما شفت لي غزالة مبتسمة ما عارفة هو افتى كيف ان سنونها حلوة واللا ما ياها؟؟؟
لكن لو نفينا الاحتمال الثاني وآمنا بجمال سنون الغزالة،،،يبقى مؤكد اليوم داك وقت (طقعت) الشمس بي سني مؤكد الشمس كانت حرانة أو ربما شاربة موية غسيل ففشته فيني
قال سنون غزالة قال
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
الغريبة يا هوزي فعل (كورك) ده غريب ولا ادري ما اصله من اللغة،،، عربية منها أو اعجمية
كورك،، يكورك،،، كوريك
والكوريك ذا معنى مختلف تماماً في محلياتنا
المهم
بطلي استهبال
هو احلى من الشر ده في؟؟؟
انت عليك بالغسيل وعلينا نحن بالشر حيث لنا في ذلك صولات وجولات
فلا تشيلي هم
وتسلمي للحضور وصورتك الحلوة
غايتو قدر ما فكرت اغير صورتي ما لقيت غير الزول الما معروف زول واللا حشرة ده ،،، يا قول عادل
ودعقاب
تسلم لحضورك مرتين في الشطفة الأولى والتانية
بعدين الشر ،، بره وبعيد
مالك عليه؟؟؟ رغم كده ، ما بنفوتك ليه
ما دام عاجبك شديد يعني
سلمت يا اخي
حمزة سليمان
سيظل حضورك انت مصدر فرح وامتنان
ارجوك لا تغب
المهندس
انا مريخابية
مافي ظهرة صفرا؟؟؟
برضو ذكرتني طرح المدارس البيضاء والظهرة شديدة الزرقا دلالة على قوة الغسلة والشفطة
غايتو بنات المدارس عندهن جنس حركات
كانت ايام جميلة ونقية
تسلم يا اخي
ابو قرجة
اها انبسط
شوف البسكتني الليلة
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
يبدو الخميس والجمعة في هذا البورد اشبه بالظهرية في السودان
الحتة صاااانة ومن آن لآخر تسمع ضجة خفيفة يذيبها الحر فترجع إلى ربها راضية مرضية
سلامات جميعاً
عبد العاطي
هسة مالك ومال الحوص؟؟؟
تحياتي
على فكرة،، انت تدهشني،، ادهشني ما قلت لأنه في اغلب الأحوال هذا ما يحدث
أنا اعتقد في كيد النساء كثيراً،،، واطمنك،،، لا اظن أن واحدة عاقلة تسعى لواحدة أخرى في شئ هي تحبها لنفسها إلا إذا ،،، إلا إذا كانت صادقة لدرجة السذاجة
وهذه نادرة ندرة (ما قادرة اتذكر لي حاجة نادرة الآن) المهم انها نادرة وخلاص
سلمت للمشاركة وعندي راي تاني في كلامك ده برجع اقوله لاحقاً
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
بت قضيم
سلام الاتذكرتينا
والله ما عندي مشكلة مع الحوص ؛ ولا مع اي شي من خلقة ربنا
وبعيدين الم يقل الشاعر
ان العيون التي قي طرفها حول
قتلننا ثم لم يحيين قتلانا ؟
بطلة قصتك دي ما صادقة ؛ دي ساذجة
وحبها مفروض تقاتل في سبيله
اظنها ما قرت اهانات شخصية لابن الملوح
للشاعر محمد المكي ابراهيم
لكين الغايظين عاشق الباسطة دا ؛
قال عندها جماليات في راسها ؛
وهو البيعرفا رهاب رهاب
اظنو لخبط ما بين راسها وخصرها وصدرها
وقايلين داقسين
ليك السلام مربع
عادل
عادل
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
معقول يا عبد العاطي تتنسى؟؟؟
اساسا زيارتك البوست شرف لينا وكلامك كان فيه بحث ولت وعجن
فلو البنت كانت تفكر فيما قلت انت ،،، لما كانت اتدقست الوقت ده كلو
يبدو أنها فاتحة في راسها محل حمام،،، ابيض يا ورد
دخلت لأرفع البوست لأهل العوض،،، عسى الله يفتح عليه بقصيدة يا عبدو لا،،، لانها فعلاً قصيدة جميلة ،،، و(ماتشن) مع البوست
شفت الحنكشة دي؟؟
تسلم
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
العربي عندك يا جدو
سذوج صيغة مبالغة من ساذج
يعني عبوط صيغة مبالغة من عبيطة؟؟؟
هي فعلاً البت سذوج،،، ودقوس كمان،،، من داقسة،،،
اوكي يا جدو
انا فعلا اظن ان البنية عويرة
وقد تكون بتحبه فعلاً،،، والبحب عمره ما يكره
وقد اكد هذا القول كل المسلسلات المصرية التي رددت الجملة ولاكتها لاااااامن طلعوا عينها
(اللي يحب ما يكرهش)
واللا كيف؟؟؟
| |
|
|
|
|
|
|
|
|
|
Re: موية غسيل-الشطفة التانية (Re: بت قضيم)
|
سلام جدو
انوركسيا دي صاحبة انور كينغ الروح بالروح
- بهذر بس ؛ يسلم انور كنغ من الانوركسيا واخواتها-
ما عارف الكلمة بالعربي شنو ؛ لكن الانوركسيا مرض يصيب البنات الببحثن عن الرشاقة ؛ والبيعملوا ريجيم قاسي ؛ حتي يصلوا مرحلة يكرهوا فيها الاكل ؛ولا يستطيعوا التوقف عن الريجيم ؛ والواحدة يكون وزنها 40 كيلو ؛ وشايفة روحا سمينة زي الفيل
ما عارف في السودان ما اظن في بت عندها المرض دا؛ لانو الكل عايز يسمن ؛ لكن دائما لو في بت فايته الرشاقة بي غادي ؛ ممكن نتهمها بانها عندها انوركسيا
عادل
| |
|
|
|
|
|
|
| |
بت قضيم
ايهاب
waleed500
garjah
bob
Ahlalawad
shiry
ABUHUSSEIN
جدو
HAMZA SULIMAN
almohndis
Abdel Aati
فيس بوك
تويتر
انستقرام
يوتيوب
بنتيريست