|
|
 استلفت ليكم ليمونة من كووول داون
|
خليتونا نصل مرحلة نستلف الليمون كمان
اها دي لطشتها ليكم من بيغادي
غادي وين مافي زول يسالني
المهم كاتبها واحد اسم دلعو كووول داون
لن أغير الواقع ولن تغيره أنت بل نستطيع ان نفعل أكثر من مجرد التغيير وهو التصور الذي ليس له حدود وهذا التصور في حدود الحقيقة ولكن بشكل مشنكل
مشنكل = مقلوب =مشقلب = منفقل) فلو شنكلنا حياة الرجل والمرأة ما ذا تتوقع أن يحصل إليك بعض صور الحياة الزوجية المشنكلة
--.تطلع زوجتك في الصباح بدري إلى العمل بعدا ان تكون جهزت لها الشاي باللبن بالطريقه التي تعجبها ولم تنسى ان الشاي لازم يكون خفيف مع ملعقتين سكر، وبعد ما المدام تطلع تقوم تفرش السرير وتنضف الحوش وتغسل عدة الشاي ... وبعديها تخطف رجليك لاصحابك رجال نسوان الجيران وتبدأ بالاتصالات على زملائك الزوجاتهم ذهبوا لعملهم بعدين تجتمعو شلة شباب وتدقو الحنك والشمارات الحاصلة في الحلة ومنو المرتو عايزا تعرس فيو ومنو المرتو دقتو امبارح بالليل وطبعا الكلام ده كلو بيحصل اثناء غياب الزوجات ووجودهم في اماكن عملهم.
--.تتصل عليك زوجتك من العمل وتقول ليك حبيبي اها يا عزوزي طبخت لي شنو الليله .. اوعك تكون عملت ملاح القرع داك.
تقوم تقول ليها يا سلوى انا قلبي شن سوى يمين بالله ظبت ليك جنس عضه ... لو عايز تتفشخري بي راجلك اعزمي صحابتك في الشغل غدا عشان يعرفوا راجلك طباخ كيف 0
--.ترجع زوجتك من العمل تعبانه وجعانه وتلاقيك مهبب الدنيا في المطبخ البيت ملان بالدخاخين .. دخان طالع من الحلل ودخان من حفرة الدخان ودخان بتاع سيجاير ... طبعا المدام تزعل تحنبق وتحرد الاكل في البيت وتقوم تتخارج تتغدا برا 0
تحس انك تعبت واتنجضت من شغل البيت نضفك كنسك افعلك اتركك اطبخك فتقوم تطرح على المدام بصوت عذب يدوب حنيه ... اسمعي يا سلوى ايه رايك تجيبي شغال يجي يساعدني في شغل البيت ,, ضهري اتقص عديل كده…… تقوم تقلب ليك عيونها وتنهرك فد نهره ... شحدت ربك عليك يالمخوزق ...شغال !!! انا اجيب شغال طيب انا عرستك لشنو .... هوووي ياراجل هوي علي بالطلاق تاني تفتح خشمك بي كلام جنس ده بوديك بيت امك عدل 0
يقع عليك هذا التهديد فتصمت وما تقول بغم وتتذكر انو محمود الطويل مرتو طلقتو من عمرو كان تزعطاشر سنه ولي يوم الليله مالقي واحدة تعرسو مع انو ما عندو منها اي اولاد 0
--.تتصل بيك المدام يوم الثلاثا بالليل وتقولك حبيبي انا عند صديقاتي عازماهم على الغدا بكرة ابيك فعايزاك تبيض وشي بكره .... تقوم انت تفهم الكلام غلط وتمشي لي حاج احمد بتاع الدكان تشتري خمسه علب ديانا وعلبتين لوشن لزوم تبييض لون بشرة المدام وكده 0
اليوم التاني المدام وصاحباتا يجوا يلقوا لا في غدا ولا يحزنون .. كريم ديانا .... امانه ما اتورطت ... المهم مرتك تتصرف سريع وتطلب اكل سريع من برا .... واثناء ما انتوا بتاكلوا كلو دقيقه والتانيه تحمر ليك بي طرف عينا... لما يطلعو المعازيم تقوم كده يالمدام تفتح علب الفازلين والديانا الاشتريتم من دكان حاج احمد وتحلف طلاق الا تاكلهم ما تفضل فيهم حاجه ... تتذكر محمود الطويل ,,, فتتوكل على الذي خلق وتتدوشر بالفازلين واللوشن والديانا ..... تصحى اليوم التاني تلاقي نفسك في الحوادث 0
تتأخر المدام عن المجيئ الى البيت ... تقلق عليها وتتصل بالموبايل بتاعها
ترد عليك وتقول في شنو ضارب لي مالك ,,, مش البيت وخليتو ليك لاحقني تاني لشنو ,,, وقبال ماترد عليها تسمع صوت بنات في الباكقراوند وضحك وقرقرة شيشه
وشريط غنا رجالي هابط يلعلع بي طول حسو لمتين لمتين يامنى لمتين ,,,,, لي سنتين يا منى براجاك برجاك يا منى في محل يوم داك يا منى ,, لمتين لمتين يامنى لمتين انشالله مرة راجلين يا منى
تصمت لفترة وتكاد سماعة التلفون ان تسقط من يدك فترد عليها لا مافي حاجه بس حبيت اطمن عليك يا سلوى وعايز اشوف اذاكنتي حاتجي تتعشي معاي… وكده وبعدين... ترد عليك المدام وتختصرك بي سرعه لا حبيبي انا ما جايا اتعشى معاك الليله اتسمم انت براك
ثم تقفل الخط--
.يجي يوم الخميس اليوم الرومانسي لدى الزوجين ……شموع … تفاح عنب,, باسطه بسبوسه ,, عصير منقه .. عصير فراوله ... عطور صندل محلب سرتيه .. دلكه وكبرته … موسيقى …عطور … تتأخر المدام… تتصل عليها
وووينك يا حبي ... انا مستنيك بجاي
ترد عليك المدام بكل برود يا راجل ارقد اتخمد نوم ... مستنيني عشان شنو 0
ينكسر قلبك لردها البايخ وتخجل ان تقول لها مستنيها عشان شنو… تطلع عندك الاجوبة … تقولها حبيبتي انا… مشتاق … ولهان … عاشق واحبك … ينتهي الجو الرومانسي بصوت لا يمت للأنوثة بصلة
يا راجل مابتفتر وللا ما عندك شغلة تقضاها .... ما شا يفني جاريه شغاله السنه كلها ,,, قال ولهان قال
--.ترجع زوجتك من الشغل وانت قاعد مستنيها بي فارق الصبر عشان تقول ليها الخبر السعيد… فطبعا لما تشوفك تتبسم وتتكشب من الخجل حا تقول ليك اها انشالله خير يا وش النكد في شنو… واذا بك تفاجئها
بالخبر السعيد وتقول ليها انك حامل … وقبال ما تتم كلامك تلقى الوليه رزعتك بي كف صاموتي يقول يا غربتي
ليه
لانو المدام متفقة معاك من قبل الزواج أنو مافي ولادة أول سنتين
وتستمر المعاناة إلى مالا نهاية والسؤال المطروح هو …يقبل الرجل او تقبل المراة السودانيه بهذا الزواج المقلوب والمتفنقل راسا على عقب ؟ هل يقبل الرجل بالاحداث الموجودة أعلاه ( مع استثناء الفقرة الاخيرة ) …
(عدل بواسطة garjah on 03-08-2003, 10:44 AM)
|
|
 
|
|
|
|
garjah
سجيمان
وجن
cola
فيس بوك
تويتر
انستقرام
يوتيوب
بنتيريست