دعواتكم لزميلنا المفكر د.الباقر العفيف بالشفاء العاجل
|
|
 حوار أجرته مذيعة لبنانية مع صاحب دكان في السوق الشعبي بأمدرمان
|
نحو اليوم أمام قضية هامة ، حيّرت الأمة ، وتاهت فيها عقول العلماء ، وشلت حركة تفكيرنا ، إنها التدخل الأممي في دار فور ، ولذلك آثرنا طرح هذه القضية لمواطن بسيط يملك دكاناً في الحي ، وإيماناً بحرية التعبير ، ودعماً لانتشار المعرفة ، فقد قمنا بدعوة مذيعة لبنانية شقراء ، وأعطيناها ورقة وقلم ومسجلة صغيرة . وطلبنا منها إجراء حوار مع صاحب دكان في السوق الشعبي بأمدرمان ، وهذا هو نص الحوار :
يا عمي ماذا تعرف عن اقليم دارفور ؟؟
الحقيقة لا أعلم الكثير عن دارفور غير أنها تقع في غرب السودان ، وهي بلد يأتينا منه ( التمباك ) ومركوب الفاشر الأبيض ، وهي بلد الآن في غاية الخطورة ، وسمعت من الراديو أن الإنجليز قرروا الرجوع إلي السودان من بوابتها .
المذيعة : طيب شو عمي أفهم من كلامك أنت ضد الإنجليز ؟؟
بيني وبينك الإنجليز ما كانوا ( كعبين ) .
المذيعة : كيف عمي ..كل الدنيا بتحكى عن الاستعمار الأجنبي وغلطاته وأنت عمال بتحكي من راكوبة دكانك وبتقول الإنجليز مو غلط ؟؟؟
في زمن الإنجليز لم يكن هناك أولاد بحر وزرقة ، والدولة كانت منظمة ، كانت هناك شفخانات ومستشفيات ، وعائد القطن يمنع مواطن الجزيرة من بيع المويه في الخرطوم ، والخواجة كان عادل وكلمته مسموعة ، والله يجازي الطلع الإنجليز من البلد .
المذيعة : بس أنا بسمع أنو اللا رح حا يدخلو مش الإنجليز وبس ، ديل معاهم أميركان كمان ؟؟
تنحنح عمنا وجلس في وسط العنقريب ، وبدأت عليه علامات الجدية ورد قائلاً :
والله يا بنتي نحن الاميركان ديل هبشناهم في مكانهم ، نحن كنا ننشد في أيام الدفاع الشعبي ونقول .. يا الأمريكان ليكم تدربنا .. يبقي هم جايين جايين ، وبعدين الأمريكان ديل يجونا ليه ؟؟
المذيعة : أنا بسألك هذا السؤال ؟؟ أكيد في بلادكم مصاري رح حا أبلشوا يقضوا عليها !!
والله يا بنتي أنا بسمع في الأخبار أنو في بترول في السودان ، وفي ذهب وكمان يورانيوم ، ولكنني لم أري هذه الأشياء ، وفي اليومين دي البترول أسعاره ارتفعت في الداخل قبل الخارج ، يعني في الحالتين عدمه من وجوده شئ واحد .. .
المذيعة : دا اتهام خطير ..كيف تقول مافي بترول ؟؟ انا شفتا بعيوني الريس بتاعكم ببلش فتح الماسورة ؟؟
والله يا بنتي الريس بتاعنا دا كل يوم بفتح بئر بترول جديدة زي ما أنا بفتح علب الساردين ساعة الفطور ، بس قروش البترول دي بتمشي وين ؟؟
المذيعة : خلينا نتجاوز ها النقطة ونركز علي موضوع القوات الدولية ...هل سمعت عنها ؟؟
- القوات الدولية !!! مش دي دخلت السودان من زمان ؟؟
المذيعة : اللي تقصدها دي دخلت تحت البند السادس ..انا قاصدا اللي تدخل تحت البند السابع ..طبعاً انت أكيد عارف انو حكومتكم وافقت بس بشرط أن تكون تحت البند الثامن
والله يا بنتي ..مش عارف اقول أيه ، دي بقت زي بوابات الحرم المكي ، كتيرة ولكن كلها تدخلك البيت الشريف ، مش شايف فرق .
المذيعة : أنا سمعت أنو الريس بتاعكم أصبح مشروع شهادة ؟؟
هو مشروع شهادة قبل 17 سنة ، ولكن لسه ما شبع ، بعد يشبع إنشاء الله يكون مشروع شهادة ، وهو لسه عاوز أتفسح في الدنيا ويشوف العالم ، عشان كدا اشتري مركب جديدة .
المذيعة (wauuuu) ...مركب جديدة ؟؟
نعم يا بنتي مركب جديدة مش (مركوب ) فاشري
المذيعة : اها فهمت عليك عمي قصدك ( يخت ) ، حرام عليك تقول مركب ، المركب دي تقال عند صيد السمك .
كلوا ما فارق ما دام بعوم فوق المويه .
|
|
 
|
|
|
|
|
|
|
|
Re: حوار أجرته مذيعة لبنانية مع صاحب دكان في السوق الشعبي بأمدرمان (Re: SARA ISSA)
|
نواصل الحوار بعد فاصل إعلاني ، في هذه الأثناء تجولت المذيعة اللبنانية في السوق الشعبي ، واشترت لها بعض الأغراض ، ( كنش ) و ( كرارة ) و ( قرقريبة ) و ( مفراكة ) ، وضعت كل هذه الأدوات في حقيبتها ، ثم عادت إلي عمنا صاحب الدكانة وواصلت معه الحوار :
هي : انتا عارف عمي ، عندنا كتير اشاعات في الشام بتقول انو أهل السودان عرب ..فهلا تخبرنا بالحقيقة ؟؟
هو : والله يا بنتي أنا ( المصنقر ) قدامك دا عربي
هي : شو يعني (messenger) احنا صرنا بنحكي عن الشات كمان !!!
هو : لا يا بنتي ( مصنقر ) يعني جالس
هي : فهمانة عليك هلا
هو : انتي عارفة قصة نحنا عرب دي بعد نشوفكم يا اهل لبنان في التلفزيون ما بتركب في راس زول .. شوفي (جون ) البيأكل في الفول بزيت السمسم هناك دا ما ممكن نقول عربي ... و ( الدومة ) سيد الدكان الملاصق لي دا ما عربي ...
هي : نعود لموضوع تاني وهو دعمكم لحزب الله ؟؟
هو : انا سمعت الريس بقول حا يحارب لجانب حزب الله .. بس في دارفور
هي : كيف يعني ..هل الصهاينة جو لعندكم ؟؟
هو : نعم الصهاينة ديل نحنا بنحارب فيهم من خمسين سنة .. بس ديل صهاينة سودانيين ولدناهم وربيناهم ... يعني بلغة السوق صنف صيني مقلد ..مش صهاينة جايين من أوروبا .. يعني إذا كان الصهيوني عندكم بلبس طاقية بخيطين .. في السودان بلبس طاقية وعمة وشال ومركوب نمر .. وإذا لقي عندك جنيه واحد بطمع فيه .
قاطع الحوار موظف الضرائب ، ثم أتي بعده موظف البلدية وهو يطالب برسوم نظافة الشارع ، ثم داهمت الدكان لجنة دعم الدفاع الشعبي ، ذهبت مبيعات اليوم إلي جيوب هؤلاء السادة والمذيعة اللبنانية تطالع باستغراب
ثم علقت : انتو عندكم يهود أصليين .. دول حتى ما يعرفو كلمة ( سلف ) ولا بكرا علي طول هلا والآن !!
عمنا : يا بنتي أنتي شوفتي حاجة ..ديل الجرابيع ... الكبار لسه بعيد .. ديل الأساتذة والفي إسرائيل ديل التلاميذ
المذيعة : يعني قد أيش اتبرعتو لحزب الله من الأموال ؟؟
عمنا : والله يا بنتي حاجات بسيطة .. واحد قال قصيدة .. وفي واحد اتكلم في المسجد .. وفي واحدين طلعو مظاهرة .. وفي واحدين عملو أغنية ..يعني كل واحد باستطاعتو .
المذيعة : أنا مش شايفة مصاري في الحكي دا ..الناس في جنوب بيروت بدها خبز .. وبدها غاز .. وبدها أكل وشرب وبدها حاجات كتير .. ونحن مش محتاجين شعر وغنا .. الفينا مكفينا .
عمنا : والله يا بنتي زي ما بقول المثل الجود بالموجود .. نحن ناس فقرا
المذيعة : انا بسمع عن حاجة اسمها المشروع الحضاري ..لو تفضلت ممكن تحكي لي عنها ؟؟
عمنا : لا ده اسمه المشروع الحرامي ..
استغربت من قوله ..كيف يعني المشروع الحرامي ؟؟
يعني الحرامية اجتمعوا في مكان واحد .. وجابوا لينا المشروع دا .. هم قالوا بعد عشرة سنوات حا يبقوا أقوى من أمريكا .. وحا يقودوا العالم .. وانتي شايفة حالنا اليوم
المذيعة : انا شايفا الحال كتير مليح ..هناك حدائق وورد ونافورات وطرق مرصوفة .. ولوحات جميلة
عمنا : برضو هناك فشل كلوي واسهال مائي وسحائي وغدة درقية
المذيعة : يا ساتر يا رب
| |
|
|
|
|
|
|
|
|
|
Re: حوار أجرته مذيعة لبنانية مع صاحب دكان في السوق الشعبي بأمدرمان (Re: SARA ISSA)
|
Quote:
هي : انتا عارف عمي ، عندنا كتير اشاعات في الشام بتقول انو أهل السودان عرب ..فهلا تخبرنا بالحقيقة ؟؟ |
| Quote: هو : انتي عارفة قصة نحنا عرب دي بعد نشوفكم يا اهل لبنان في التلفزيون ما بتركب في راس زول .. شوفي (جون ) البيأكل في الفول بزيت السمسم هناك دا ما ممكن نقول عربي ... و ( الدومة ) سيد الدكان الملاصق لي دا ما عربي ... |
دي مشكلتك !!! اسقاط نفسي !!
| |
|
|
|
|
|
|
| |
Mustafa Mahmoud
Mohamed Ahmaed Olyesh
Faisal Al Zubeir
فيس بوك
تويتر
انستقرام
يوتيوب
بنتيريست