|
دعواتكم لزميلنا المفكر د.الباقر العفيف بالشفاء العاجل
|
|
 Re: حكاية درويش سابق .. وخيط ودقاسم (Re: معتصم دفع الله)
|
معتصم يا ابن أرض المحنة
لك التحية
ألعابنا ، مدائحنا ، أنسابنا ، صداقاتنا وصلاتنا كلها نابعة من دواخلنا النقية ، نحن نفيح عيوننا وقلوبنا نحو الوطن كله ، فتضم الجزيرة الخضراء أبدا إن شاء الله ، محاصيل شتى ، وأناسا شتى وخلقا لله شتى ، يتواصل أهلنا بالدواب وبعربات الكارو وبالبكاسي واللواري ، لا يمنعهم من التواصل انقطاع الطرق أو انعدام الكهرباء أو انقطاع شبكة الهاتف ،، مرة حمل أحد المسافرين خطابا يحمل خبر وفاة أحد أقاربنا ليوصله لأهل لنا في قرية من قرى 99 ود النعيم ، ولم يتذكر الرجل الخطاب إلا بعد أن تجاوز اللوري تلك القريه ، وكانت الريح تهب تجاه القرية ، فرمى بالخطاب لتحمله الريح ، ففوجئ هذا الرجل بأهل تلك القرية ياتون للعزاء في اليوم التالي ،،
الشيخ دفع الله الصايم رجل بر وتقوى يرحمه الله ، وأهلنا في أبوحراز وطيبة وأمدرمان وكركوج وسنار وقيسان وهناكقسم في كردفان لا أعرف مدنهم أو قراهم ،،كلهم أهل صلاح وعلم وقائمون على نشر الإسلام وتعليم الناس أمور دينهم ، وهذه شمعة لن تنطفئ بإذن الله ،،
وإبداع أطفالنا الذي تمثل في ألعابهم يتحول كل يوم إلى حكمة تتوارثها أجيال بلادنا وتأخذ منها العبر ،،
شعبنا شعب عظيم ووطننا وطن عظيم ،
لله درك يا معتصم وأنت تحفر في ذاكرتنا الشعبية ، وفي إرثنا الصوفي ، لتمنحنا أدبا راقيا وتنبهنا إلى مواقع هامة لننهل منها ..
لك حبي
| |
 
|
|
|
|
|
|
|
|
Re: حكاية درويش سابق .. وخيط ودقاسم (Re: ودقاسم)
|
أخي ودقاسم
يا أصيل..يا أمير
كل عام وأنت بخير
الحكاوي عن مجتماعتنا الصغيرة لجد شيقة وممتعة وفيها كثير من الحكم والمواعظ وإن كانت في زمن سابق لأوانها ولكن ها هو التاريخ يعيدها أو يذكرنا بهافي أشكال مختلفة وما أكثر الدروس والعبر التي تركها لنا أهلنا الطيبين .
متعك الله بالصحة والعافية
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: معتصم دفع الله)
|
العزيز معتصم دفع الله
عام سعيد و كل سنة و انت طيب
أولا أود أن أعتذر لك كثيرا لأني لم أنتبه لبوست الترحيب بك و فاتني ذلك ، فمرحبا بك معنا و يا سعدنا و حظنا الجميل بانضمام قلمك الأنيق لنا و ليس لدي شك في انك سوف تكون نقطة ضوء مشعة تزيد المنبر ثقافة و علما.
قضيت في الجزيرة بعض من سنوات طفولتي الأولى حيث كان أبي يعمل باشمفتش زراعي و تنقلنا بين العديد من المكاتب الحكومية. ما زلت أذكر بكل محنة مواسم حصاد القمح و القطن عندما كنا نذهب مع أبي في جولاته التفتيشية و ما زالت أغنية في الجزيرة نزرع قطنا يتردد صداها في أذني. لكن للأسف لم نعش فيها كثيرا اذ قدم والدي استقالته لرغبته في ممارسة الأعمال الحرة و ذهبنا منذ ذلك الوقت للخرطوم .
سلامي الى أختي الحبيبة شذى و محمد زوجها.
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: Nada Amin)
|
العزيزة ندى أمين
كل سنة وأنت طيبة
ما أروعك وأنت تأتين من بين سنابل القمح ..
ولوزات القطن ..
وتفاصيل العطاء ..
شكراً لكلماتك الرقيقة وشعورك النبيل .. وهذا الحضور الجميل
فما أكثر الرائعين في بلادي وأنت تمنحينا كل هذا الوفاء، حديثك عن الجزيرة والفترة التي قضيتيها فيها يؤكد أن هذا المشروع يجمع كل أهل السودان ولهذا تكون هذا النسيج الإجتماعي الجميل وهذا الحب الكبير بين أهله ، وذكريات الطفولة كثيرة ونحمد الله أننا عشناها بكل تفاصيلها وتعلمنا من أهلنا زمان كل هذا الحب الكبير للوطن العزيز ولا زلنا نصارع من أجل سودان موحد سودان ينعم بالسلام والتمنية والإستقرار .
تحياتك وصلت للأخ محمد والأخت شذى .. مع امنياتنا لك بسنة سعيدة ملئيةبالنجاحات.
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: معتصم دفع الله)
|
العزيز معتصم
أقول سبحان الله ، كل خيط في هذا البلد المسمى السودان يوصلك إلى خيط آخر ، وتكون خيوطنا نسيجا متينا هو هذا المجتمع السوداني الذي نعشقه ،، هاهي العزيزة ندى أمين تصبح جزءا من هذا الخيط ، وبمنتهى السهولة وبدون معادلات مطولة ،،
ندى الجزيرة ،البورد ، المكاتب ، قناطر الري ، الترع ، الكباري ، الحواشات ، أمات عشارين ، أمات ستات ، الجداول ، التقانت ، والتقنت الحربي والتقا ، ورحل الكبس ،،
ندى لماذا لا تكتبين لنا عن المكاتب ومحتمعاتها وعلاقتها بمجتمعات القرى من حولها ، ودراسة بنات المفتشين والباشمفتشين والمدراء مع بنات الفلاحين ،
أذكر كيف كان يتكون السوق أمام المكتب يوم الصرف ، ويباع القماش بأرخص الأسعار ، وتذبح الثيران ، وتكوم الويكة والبصل والتمر ، وتباع الفواكه ،، سوق فيه كل شئ وليوم واحد فقط ،،
في الجزيرة نزرع قطنا
نزرع نتيرب نحقق أملنا
ومواسم كلها فرح وعمل ..
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: ودقاسم)
|
العزيز ودقاسم
هذا والله جميل جداً ويا ريت الأخت ندى تحكي لينا عن فترتها في مشروع الجزيرة والأيام الجميلة التي قضتها فيه .
ويا للأسف أخي ودقاسم المشروع نفسه دخل دائرة الإهمال التي طالت جميع مشاريعنا التنموية في البلاد ، واذكر زمان أيام الرخاء والعز الأسابيع الصحية والسينما المتجولة والنشاط الرياضي والثقافي ولا نقول صعب إعادة كل هذا ولكن ببسيط من الإهتمام نعيد لمشروع الجزيرة هيبته .
وأطمئنك أنو السوق في المكاتب لا زال بنكهته وتزداد مشتروات المزارعين بعد صرف الفردي والناس تكون في فرح وسرور بعد عام زراعي ملئ بالعمل والعطاء.
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: معتصم دفع الله)
|
أخي معتصم
لك التحية
كان للتصوف وللطريقتين القادرية والسمانية القدح المعلّى في تربية أهلنا في الجزيرة ، فمشايخنا كانوا يعلمون الناس القرآن والعلوم الدينية بوعي ودونما تطرف أو شطط ، وكانوا يتقبلون عادات المجتمع وتقاليده ويحسبون لها ألف حساب وهم جزء من هذا المجتمع ، وقد كان لهذا الدور أثر عظيم في تشكيل خلق إنسان الجزيرة ، فهو وسط في كل شيء ، وهو إنسان غاية في التهذيب ومنفتح نحو الآخر ، لذا رغم كل النعرات الجهوية في البلاد فإن إنسان الجزيرة ظل دوما قلبه على الوطن كله ، والمشروع نفسه مشروع للوطن كله ، لم يبخل إنسان الجزيرة بإنتاجه ولم يجعله حصرا عليه ،، ومثلنا يقول ( الدابو وداب رقبتو قصّر من رقبتو ) ،، أنظر كيف نشات القرى في الجزيرة متقاربة ، وكيف وطدت علاقاتها ببعضها وتصاهرت القبائل وامتزجت لتشكل نسيجا سودانيا خالصا ،،
لو أن إنسان السودان ركز كل جهده وطاقته في مشروع الجزيرة لكفاهم المشروع ولأغناهم جميعا ،،
الحكومة حاولت هدم مشروع الجزيرة ، لكن أهل السودان يعلمون أن المشروع مشروع السودان كله ، لذا بقي المشروع وسيبقى .
وحقيقة الجزيرة أرض المحنة
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: مهاجر)
|
العزيز / مهاجر
كل عام وأنت بخير ..
القلقالة قرية جميلة تجد أهلها يعيشون في حب ووئام يحترمون كل من يحضر إليها زائرا ، علاقاتهم الإجتماعية ممتدة إلى كل قرى الجزيرة البعيدة والتي من حولها، لذلك ليس غريب أن يكون لك أهل فيها فاسرة العبيد شبيكة من الأسر الكبيرة والعريقة وأحد أبنائه وهو عبدالحليم يرأس نادي الرابطة القلقالة بإتحاد الكاملين لكرة القدم ويشاركه في الإدارة اخوه وليد وهم يمتازون بعلاقاتهم الطيبة وحبهم لهذه القرية العريقة ولأبنائها.
لك خالص التحايا ومرحبا بك في القلقالة في أي وقت .
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: معتصم دفع الله)
|
اخي معتصم
انا ما كنت موجود فترة طويلة جدا في السودان لذلك دائما اجد امامي عادل او عبدالحليم
او نتقابل في الخرطوم عند اهلي بقية شبيكة
حقيقي جدي العبيد رحمه هو من حكماء ابناء شبيكة وهو الوحيد الذي يصل اهله كلهم ويحل مشاكلهم
اكيد سوف احضر الي القلقالة قريبا انشاء الله
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: شتات)
|
الأخ شتات
وانت طيب ..
ووطن الطيبين بخير ..
عزانا أن هنالك أناس قابضين على جمر القضية ..
يدافعون عن المغلوبين والمظلومين ..
ونعود مرة ثانية لأرضنا الطيبة ..
أرض المحنة .. أرض الشيوخ والصلاح ..
وطن عم عبدالرحيم والشيخ ودعجبنا ..
وطن وردي وودالأمين .. وهاشم صديق ..
وكل الرائعين في بلادي ..
عشت يا سيدي ..
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: Nada Amin)
|
العزيزة ندى
الذكريات مثل النقش على الحجر لا يمكن نسيانها بسهولة .. ونحن هنا قصدنا الوطن الكبير بكل تفاصيله .. ومعانات أهله ..
أن نعرف الأجيال الجديدة بالوطن وبتراثه .. بأدبه وبفنه .. نحكي عن الحبوبات .. قصص فاطنة السمحة .. لقيط القطن .. القناطر وسراية المفتشين الأنيقة .. نحكي عن معاناة أهلنا المزارعين وكيف كانوا يكدحون ليعلمونا .. كيف كانوا يزرعون فينا حب الوطن والدفاع عن مكتسباته مثل زراعتهم لمحاصيلهم بكل عناية ..
السودان كله أرض لنا شماله وجنوبه .. غربه وشرقه ..
نحكي عن شيوخ الطرق الصوفية وعن زهدهم وورعهم .. عن أعمالهم الجليلة والمقدرة في نشر تعاليم الدين الحنيف بكل يسر وسهولة ..
وعزانا في أن من تخرج على أيدي هؤلاء الناس ما زالوا ينهلون من العلم ويوظفونه في خدمة الوطن وأهله الطيبين ..
متعك الله بالصحة وأدامك ذخراً للوطن ..
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: معتصم دفع الله)
|
هذه مشاركة سابقة كانت باسم ثورة أهل العوض المسلحة ، وفي اعتقادي أنها لم تحظى بمتابعة من أبناء الجزيرة ، فرغبت في عزضها هنا ، وعذرا على التكرار :
حدثني شيخ من أهل العوض :
نحن آجنيات سكتنا وشلنا الشيلة ، وقلنا الناس ديل أخوانّا ومافي مانع نقسم معاهن شقانا وعرقنا ، لكين هن ما رضوا ، وقالوا دايرين يقعدوا مع الحكومة ويقسموا معاها ، بس المشكلة هم ناسيين أنو الحكومة ذاتها بتاكل من عرقنا ومن شقانا نحن ، الحكومة لا زرعت لا حشّت ، ولا ربّت ولا رضّعت ، القطن ده من الله خلقنا نحن نزرعو ونحشّو ونسقيهو ونرفع جداولو ونشلخو ونلقطّو ونكبسو في الشوالات ونرحّلو للمحطة فوق جمالنا وحصينّا ، ونرجى الحساب البجيبو لينا ، ونرضى بالقاسمو لينا رب العالمين ، ونقول كان في شيتا شالوهو منّنا بيمشي لي أخوانّا كان في الشرق وللا الغرب وللا الجنوب وللا الشمال .
بس أخوانا طمعو كتير وقالوا دايرين حقهم ، سووا ليهن حق في شيتا لا زرعوه ولا حشّوه ولا لمّوه ، عاد آجماعة الحق ده كيفنو ؟ نحن زرعنا وسقينا وحشينا ، ولما قطنّا نوّر ودردم قلنا ليكن تعالوا ، القطن قرّب يفقع ، تعالوا لقطوه معانا ، قتّو : لا ، نحن ما ناس لقيط ، نحن بنبيع الموية في الخرتوم ، ونحرس العمارات والبيوت البيبنو فيها جديد ، ومشيتوا وخليتونا ، ونحن قمنا اتحزمنا واتلزمنا وشمرنا ولقطنا القطن ، شيتا قدرنا عليهو ، وشيتا خليناهو في شدرو ، وصلناهو لمن بقى دولارات ، ولمن جاء وقت القروش جيتو قتّو دايرين حقكن ، عاد آجماعة حقا ليكن وين .
الحكومة قالت آجماعة الناس ديل عندهن حق ، والناس ديل شايلين سلاح ، ونحن لازم نديهن حق ، وكان ما أديناهن حقهن بسوو لينا حرب ، دحين آجماعة إتّو اتنازلوا من حقكن لي أخوانكن ديل .
قلنا آجماعة ما في مشكلة نحن اتنازلنا ، وعمرنا كلو نحن متنازلين ، لكن الجماعة ديل لمّن جاهن البترول والبلد بدت تصّلح فندروا فد مرة وقالوا تب ما معانا شريك . الحكومة قالت : آي ، كلام الجماعة ديل صاح ، بس نحن بنحنّسن عشان يدونا شوية بترول معاهن ، والحكومة حنّست الجماعة ورضوا يدّوها شوية بترول ، لا حايق جاي ولا جاي ، أها قنّا ليهن ما دام أبيتو بي بترولكن نحن كمان بنابى بي قطنّا ، وكل زول يموت بي شغلتو . قالوا لا القطن ده من زمان مقسم ، وما في طريقة يتغير تقسيمو ، ونصيبنا منّو ياهو نصيبنا ،
قنّا ليهم الكلام ده عيب ، وده كلاما بجيب اللوم ، قالوا والله يجيب اللي يجيبو ، نحن ما عندنا شغلة ، الحكومة قالت : آجماعة هوي ، الناس ديل معاهن سلاح ، ونحن ما بنقدر عليهن ، وامريكا معاهن ، دحين آجماعة ارضوا بالقسمة القالوها دي .
قلنا للحكومة : كدي خلونا نقعد برانا ونشوف كلامكن ده ، ونقلّبو جاي وجاي ، وبعدين نقول ليكن راينا ، الحكومة قالت : بس ما تطولوا ، عشان أمريكا دي مستعجلة والجماعة ديل زي ما قّنا ليكن شايلين سلاح .
قعدنا أنا وحاج علي وحاج أمحمد ود الزين وحاج بخيت ود النور ومعانا فاطنة بت دفع الله ، قعدنا في ديوان حاج الطاهر ود اللمين ، والطاهر زاتو حاضر معانا .
آزول قدر ما نضمنا ما اتفقنا ، وشوية شوية جونا الوليدات ، وشوية آزول جاتنا البنيات ، والحلة كلها آزول إنخمت ، تقول في زولا كورك ليهن ،عليك أمان الله اللعمى يشيل المكسر ، والله ناس جوة الديوان ، وناس قاعدة في الضل ، وحاج الطاهر ووليداتو ما قصّروا تب والله كفّوا الناس كلّهن ، شاهي وموية ،
أها آزول بيني وبينك الوليدات والبنيات راين غلب علينا نحن الكبار ، وقالوا ستين يمين ما نقبل بي جنس الكلام ده ، وقام ود الحسين آزول نضم ، باقي هو ولدا متعلم بلحيل وقاري ، وكمان كايس بلدة ، بعرف الناس كلهن ، لي ناس الحكومة ديل آزول بعرفن واحد واحد ، والله الجنا مو جنا نصاح ، مرق ليهن المدسوسة كلها وما خلا ليهن جنبا يرقدو عليهو ،
والله آزول أتاريهن كلهن حرامية ، ونحن أتارينا ما جايبن خبر ، قلنا الجنيات المتعلمين ديل مادام عارفين متل ده ، مالن من زمان ما فتوه لينا ،أتاريها الدقون والجللب دي كضب ساي ، ونحن المساكين قايلين القبة فيها فكي .
آزول الجنا ود الحسين قال لينا تب ما ترضو تب بالقسمة المايلة ، أكان دايرين يقاسمونا في قطنّا ده ، نحن كمان بنقاسمن في بترولن ، وأكان مادايرين يقاسمونا في البترول نحن بنمسك قطنّا علينا .
قنّا لي ود الحسين ، تعال آجنا ، إت بتقول كلاما متل ده ، وأكان الحكومة دي جاتنا بي سلاحا نسوي شنو ؟
قال ود الحسين :
اللي يقابلكن بالسلاح قابلوه بي السلاح ،
قنّا لي الجنا :
آجنا سلاحا لينا وين ؟
قال :
العكاكيز والفرارير والسككّن .
قلنا ليهو الناس البيكاتلو ديل عندهن غابات ، وعندهن جبال ، ونحن ده كلو ما عندنا
قال :
مالكن ما عندكن ؟ أدخلوا غابات القطن ، والعيش ، ألبدو في أمّات عشارين ، وأمات ستات ووسط العدسي وسووا شوالات القطن ساتر .
وهكذا انطلقت الثورة المسلحة تقودها جبهة تحرير السودان الجديدة جنودها وقياداتها هذه المرة من أهل العوض .
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: ودقاسم)
|
بس أخوانا طمعو كتير وقالوا دايرين حقهم ، سووا ليهن حق في شيتا لا زرعوه ولا حشّوه ولا لمّوه ، عاد آجماعة الحق ده كيفنو ؟
تعرف يا ود قاسم
هؤلاء هم أهل الجزيرة .. البساطة والمروءة والكرم
هذا التساؤل البريء يكشف عن الفطرة السليمة ، الوجدان النقي والضمير الحي
كثير منهم دخلوا هذه الدنيا كما خرجوا منها .
كان هناك فى "حلتنا" رجل اسمه "ود تنير"
هذا الرجل "رحمة الله عليه" كان يمثل لي عالما فريدا
عايشنا هذا الرجل ونحن أطفالا وشباباحتى صرنا رجالا ..
ذات الرجل ..نفس البشاشة والابتسامة ظل محتفظا بهما طيلة هذه السنين
ما غيرته السنين أو حادثات الأيام من جفاف أو مصائب
كنا نأتي الجزيرة لأهلنا بلهفة من الخرطوم فى الاجازات بانتظام
أكملنا الابتدائية والمتوسطة والثانوية والجامعة وسافرنا خارج السودان
وهو نفس الرجل وذات الابتسامة .. نفس الحنان والعطف الذي كان يغمرنا به
ما رأيناه يوما خصما أو عدو..
وأجزم أن هذا الرجل خرج من الدنيا كما دخلها أبيضا نقيا
كانت حياته كلها فى مساحة من كيلومترات معدودة
كان كل عالمه "شوية غنيمات" وقلب يملأ الدنيا بالمحبة
كنت أجلس معه كثيرا ، وسألته مرة " يا عم تنير انت راضي عن نفسك؟" فرد اذا انت راضين عنى أنا راضي عن نفسى وانشاء الله ربنا يكون راضى عني .
رحل هذا الرجل رحمه الله رحمة واسعة ولكني لن أنساه ما حييت .. لأنه يمثل حالة تستحق الدراسة
هؤلاء هم أهل الجزيرة .. يسألون هذه الأسئلة البريئة
لأنهم لا يعرفون ماذا يعنى الدخل القومي ومداخل الانتاج والتضخم والتوازن الاقتصادي
لا يعرفون نظريات الاقتصاد الحر ولا البنك الدولي ولا منظمة التجارة
لكنهم يعرفون "ليس منا من بات شبعان وجاره جائع وهو يعلم"
شكرا ود قاسم
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: Tumadir)
|
تماضر بنت شيخ الدين
الفنانة .. الرائعة ..
كل عام وأنت بخير وجميع أفراد الأسرة الكريمة بخير ..
عفواً إن دخلت منبر الرائعين خلســـه ..
دون أن أطرق باب الجميلين مثلك .. عذراً عزيزتي ..
فوجودي بينكم يزيدني فخرا .. وإعزازا ..
شكرا تماضر .. شكرا جميلا ..
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: معتصم دفع الله)
|
شتات
معتصم
تماضر
شوية ويطلع البورد كله أهل عوض ، تفوح منهم ريحة القطن واللوبيا ، عادة أخترق الجزيرة من الشرق الى الغرب منطلقا من مدني مارا بالكريبة ثم بيكا ف 99 ود النعيم ، وهناك مسقط رأسي في شلعوها الجعليين ، ثم أنطلق غربا وتتابعني قرى الجزيرة حتى أتهدى المدينة عرب ، وأخترق ود ربيعة ، وهناك أهل حبوبة والدي أم أبوه ، ومسقط رأس والدي ، وأغرب متجها إلى 65 كمل نومك وعبود والمناقل ، و24 القرشي ومن جيرانها أم دكت قرية الخاتم عدلان ، ومن هناك ننطلق نحو معتوق العمرة بالعركيين وجيرانهم من الجعليين والفلاتة والحلب ، كلهم أهل ، انصهار تام وتواصل لا ينتهي ،،
أين ما ذهبت في داخل الجزيرة وفي أي قرية أجد شخضا أو أشخاصا يعرفون أهلي أو أقرباء لهم ، وأين ما ذهبت وجدت الخلق الكريم والطيبة والشهامة ، وكما قلنا يا معتصم هي التربية الصوفية التي منحت أهلنا خلقهم هذا ،، يحبون الأرض ويحبون عطاءها ويحبون الإنسان ويكرمون الضيف ،
في معتوق هناك لوكاندة وسط السوق ، لكن صاحب اللوكاندة يسوق النزلاء عندما يغلق دكانه ليتعشوا ويبيتوا في ديوانه ،،
ويا حليل القهاوي في معتوق ويا حليل الكبدة والكباب في مطاعم معتوق ، ويا حليل إنداية معتوق ، ويا حليل سوق معتوق العامر كل يوم اثنين وخميس ، ويا حليلنا لما كنا صغار نجيب العمود من البيت ليأكل الناس في برندة الدكان فتكفيهم تلك اللقمة حتى لو كانوا مية .
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: ودقاسم)
|
الأخ ود قاسم
هذه هي أصالة اهل السودان .. الكرم .. المرؤة .. الشهامة ..
كل هذه الصفات متوارثه أبا عن جد .. فما غريب أن تجد لك أهل في كل بقعة من وطننا الحبيب .. فأذكر أن أخي كان يعمل في الجماهيرية الليبية فصادف شخص ينده له يا ود دفع الله .. يا ود دفع الله .. فما كان منه إلا أن توقف فسأله من أين تعرفني فقال له شبهتك لواحد كنت أعمل معه إسمه دفع الله ود الحليلة .. فرد عليه أنا إبنه فما كان من ذلك الشخص إلا أن يقلده ويبكي .. ذلك الشخص من دولة تشاد الشقيقة وقتها كان يعمل في حواشتنا ولم ينسى تلك الأيام رغم مرور السنين .
دمت يا ود قاسم
| |
|
|
|
|
|
|
|
|
|
Re: حكاية درويش سابق .. وخيط ودقاسم (Re: معتصم دفع الله)
|
معتصم
اخونا شانتير قال لى هشام شيخ الدين خالة دوما وتماضر ديل بيؤمنوا بالخير المطلق ولو قالوا ليهن فى كلب وقع فى حفرة وكسر كراعو .. طب بيطبن ثيابن وهوب ..
ودا تعبير فى منتهى البلاغة
ودي الفطرة السليمة
وحب الخير وحب الناس
ودي تقريبا صفات أهلنا فى الجزيرة
عشان كدة أنا قلت لتماضر انت بتشبهينا .. أو حقيقة نحن البنشبهك
التحية لخالة دوما وشانتير وهشام وتماضر .. وهم فى منافيهم
البعيدة يستشرقون صبحا لما يسفر بعد ..
التحية لود قاسم صامدا كالنيل .. كالطابية
التحية ليك انت يا مواسم الربيع
ولناس البورد كلهم عاصفة من أشواق .
| |
|
|
|
|
|
|
| |
معتصم دفع الله
ودقاسم
مهاجر
شتات
Tumadir
فيس بوك
تويتر
انستقرام
يوتيوب
بنتيريست