|
|
 جمهورية الزهـــج ..
|
يعتبر السودان من البلدان الحارة ..
فهل تأثر درجة الحرارة والطبيعة على إنسانه ..
مما ينعكس ذلك على حياته وتصرفاته وعمله ؟ ..
الزهج كلمة متعارف عليها وتعني رفض الشئ أو عدم قبوله وهو التذمر منه ..
ويختلف المسمى من بلد إلى أخرى ..
لماذا نحن شعب زهجي أخلاقنا في رأس نخترتنا " أنفنا " زي ما بيقولوا ؟..
نزعل وننفعل بسرعة ..
يتوتر الجوء سريعاُ من حولنا ويتكهرب ..
وقد يترتب على ذلك أشياء كثيرة ..
فهل نحن قادرين على ضبط أعصابنا وتحكيم العقل في تصرفاتنا ؟ ..
قد ظهرت في الفترة الأخيرة الكثير من الطرائف والنكات فهل هذا نتيجة الجوء الخانق الذي يعيشه المواطن ؟..
وهل هذا تفريغ كامل لما بالنفوس ؟..
|
|
 
|
|
|
|
|
|
|
 Re: جمهورية الزهـــج .. (Re: معتصم دفع الله)
|
هناك الكثير من حالات الزهج في مجتمعنا السوداني فرأيت أن أتطرق إليها بطريقتي الخاصة ..
راجل نقناق ياااااااخ ..
نقناق ياااااااااخ ..
يبدأ يومه مع أم العيال نقة لي رب السماء ..
يا مرا إنتِ القميص دا ما كويتيهو ليه ؟..
ترد عليه يا راجل قول بسم الله إنت دا ما كنت لابسه أمس ..
أنا مجهزة ليك ملابس اليوم على السرير ..
صاحبنا يفتش ليهو على سبب لي نقة الصباح ..
بعدها يبدأ يومه المعكنن من محطة المواصلات ..
بالله عليكم دي بلد شنو البنتظرو فيها البصات تجي تشيل الناس ..
المفروض دي تكون حارسانا هنا دا ..
يلعن أبو الحكومة ووزارة المواصلات زاته ..
يركب الحافلة يا زول إنت بدفر مالك إنت عايز تركب الجامبو ما براحة ؟ ..
يرد عليهو الزول الوراه يا زول إنت هسي اللزاك منو ؟ ..
أها صاحبنا دا بعد ما يقعد في الحافلة يبدأ مسلسل جديد من النقة ..
إنت يا معلم ما توطي صوت المسجل دا الحافلة دي راكب فيها براك ..
هوعليك الله في فنانين في البلد دي لمن نسمع ليهم دا فنان دا ياخ ؟ ..
يلقى ليهو إتنين يتناقشو في الكورة يجي داخل ليك فيهم شمال ..
إنتو كورة شنو البتتكلمو عنها دي .. يا حليل الكورة وناس الكورة كرهتونا ليها زاتو ..
هو البلد دي فيها كورة ولا فيها ناس بتعرف تلعب هزائم بالكوم والردوم ..
ولسه صاحبنا ما إنتهى من كلامه نط ليهو في إتنين تانيين بتكلمو في السياسة ..
عليك الله البلد دي غير السياسة وناس السياسة الكرهنا ليها شنو ؟ ..
ديل والله المفروض يشنقوهم في ميدان عام قاعدين على نفسنا لمن قربنا نمرق الروح ..
وما تنفك الرحلة تنتهي بوصوله لمكان عمله وإلا تبدأ نقة جديدة بي شكل جديد ..
صاحبنا دا يتكلم في أي حاجة ..
السياسة ..
الرياضة ..
الفن والأدب ..
الطب والهندسة ..
مقطعة ياااااااااااخ ولا سقراط زاتو ..
نقناق يااااااااااخ نقناق ..
لمن جاهو مرض زهجي كرهو عيشته وبقى يتكلم براهوووووووووو ..
| |
|
|
|
|
|
|
|
|
|
Re: جمهورية الزهـــج .. (Re: معتصم دفع الله)
|
وفي نوع أخر من الزهج بتاع الحناكيش ..
يااااااااااااااااي يا سوسو ..
أنا زهجانة وعايزة أتخنق ..
مالك يا لولو المزهجك شنو ..
مش عارفة أقضي إجازتي وين ؟ ..
بابي وعدني أصيف في الخارج ..
وأنا عايزة عربية جديدة زي بتاعت ميمي ..
مبالغة يا سوسو زي العروسة كده ..
ياااااااااااااااي
أريتو بالزهج الليشقك يا يمة ..
دي طبعاً التاية أمها بتنهرها كده ..
با بت أمشي جيبي الوقود للعواسة ..
وبالمرة جيبي القش للغنيمات ديل ..
أها التاية المسكينة دي من الصباح يبدأ يومها بالنهير والدفير ..
شي عواسة وشي نظافة وشي طبيخ وشي غسيل هدوم ..
التقول شغالة بالمقاولة ..
| |
|
|
|
|
|
|
|
|
|
Re: جمهورية الزهـــج .. (Re: معتصم دفع الله)
|
ونجي لي أصحاب المزاج ديل حكاويهم ما بتنتهي ..
واحد صاحبنا بتاع مزاج أبوهو إتوفى وما لاقي ليهو طريقة يضرب البتاعة حقتو دي ..
تلاتة أيام ولا تلاتة سنين ياخي دي حاجة طويلة ..
حكمت معاهو حكمة شديدة خلاس ..
ما صدق صاحبنا دا إنو التلاتة أيام دي إنتهت ..
وزع ليك الناس كلها وما خلى ليهو حاجة ما رجعه لأصحابه ..
ومن عادات أهلنا في المناسبات زمان إستلاف بعض الأشياء مثل المساند والفرشات ومرات الأباريق ..
أها بعد ما عمل الحاجات دي كلها قعد في نص حوش الصالون ..
ولف ليك البتاعة حقتو دي ..
يا دوب نفس نفسين جاهو ليك زول يشيل معاهو الفاتحة دق ليهو الباب ..
رد عليهو صاحبنا دا حسب الحكمة بتاعتو ..
عايز شنو بي نهرة طبعاً ..
جاهو صوت الزائر عايز أشيل الفاتحة ..
صاحبنا نسى ليك أبوهو المات وهو زاتو بعمل في شنو ؟
قال ليهو الفاتحة دي خاتيها وين يا أخينا ..
ودي جديدة لنج جاية من السودان ..
واحد حاكمة معاهو حكمة شديدة جداً راكب في المواصلات ..
والزهجة ما بتتوصف ..
تاكل " يعني مستند " على شباك الحافلة وضاربو ليك الهوى ..
جات واحدة من على الشباك قالت ليهو ..
وين ؟
" قصدها الحافلة دي ماشة وين " ..
رد عليها صاحبنا ..
موجودين والله إنتو الما ظاهرين ..
| |
|
|
|
|
|
|
|
|
 Re: جمهورية الزهـــج .. (Re: walid taha)
|
معتصم
صباحك خالي من الزهج ..
بوست مسبك ..
بالفعل إن المناخ له دور كبير في السيطرة و التحكم في المزاج العام.
بنظرة بسيطة إلى مزاج السودانيين المقيمين أو الزائرين لدول إسكندنافيا مثلا تجد أن المزاج ينعدل منحرفا بزاوية كبيرة.
معظم سكان البلاد الحارة مزاجهم متعكنن. و هذا له تفسيرات يمكن أن يفتي فيها الأطباء هنا.
نأتي إلى النقة :
مقارنة بدولة كمصر فإن كنا جمهورية زهج فإن مصر إمبراطورية زهج و نقة.
المصريون طول اليوم بينقوا ..
في البيت في الشارع في الباص
الفرق بيننا و بينهم أننا في كثير من الأحيان نكتم نقتنا خصوصا أمام الناس أو في الشارع .. و لكن المصريين يمكنك أن تسمع نقتهم في البلكونة و لا يكتمون ما بدواخلهم .. يحبون الفضفضة علنا ..يمكنك أن تعرف مشاكل الذين يسكنون في الشقة المقابلة من أول أسبوع تسكن فيه.
يقال أن سودانياً دخل مرحاضا عاما .. و أظنه أطال مكوثه بالداخل و المصري يتلوى خارج الحمام فقد كان مزنوقا زنقة شديدة ، و يطرق باب المرحاض كل راس دقيقة : إطلع ياللي جوة .. روحي حتطلع يا إبن الناس .. إنت بـ .... ولا بتستحم جوة ؟
ثم طلع الزول الزهجان و قال و الشرر يتطاير من عينيه : مالك يا أخينا ؟ بتكورك مالك ؟
فقال المصري : يا خي إطلع أنا عاوز أدخل ..
فما كان من السوداني إلا و أن دخل من جديد و أقفل عليه الباب بالترباس.
( أكملوا الباقي ) ..
الزهج + الحماقة = مصيبة ضخمة
عريس أخلاقو في كرعيهو
يوم الحنة متحنن .. رافع حاجب و مدلدل حاجب.. ( مفروض يكون فرحان .. مش ؟ ). ينظر إلى الناس شذراً. يمص سيجارته و كأن بينه و بينها تار بايت.
عندما حاولت خالته لتمسح له رأسه بخلطة ريحة .. قال لها : الشي دة ما تختيهو لى ..
حاولت مرة أخرى و هي تقول : أجي يا ود أمي .. أسكت ساكت و خليني أمسح ليك راسك.
رفض .. و أصرت هي .. علا صوته .. شخطت فيهو ..
فقام يمشي و الحنة في قدميه ( جلبغ .. جلبغ ) و كأن الحنة شبشب في قدميه ) ..
فرتق و الناس في دهشة و عجب ..
واصل .. نواصل
| |
|
|
|
|
|
|
|
|
 Re: جمهورية الزهـــج .. (Re: ابو جهينة)
|
أستاذنا أبوجهينة
شكراً للمداخلة القيمة ..
فعلاً السلوك الإنساني تحدده البيئة والمنطقة المحيطة به ..
ويلعب فيه التعليم والثقافة والحضارة دوراً كبيراً ..
فنجد أن المناخ السوداني وطبيعته القاسية لها أثر كبير في ذلك ..
وهي تحد من عملنا وتسيطر على الكثير من حركتنا ..
الزهج كسلوك يتسم به الإنسان محسوب على الغضب كذلك والتذمر من الواقع أيضاً ..
نحن السودانيين زهجيين وسريعي الغضب ..
وتصرفاتنا تدل على ذلك ..
أما أهلنا المصريين ديل في النقة مافي زيهم من تصبح تلقى الشارع دا كلو بيتكلم ..
وتصبح ليه ؟..
ما هي الحياة عندهم ليلهم مع نهارهم واحد ..
بس هم يمكن يكونوا أحسن مننا لأنهم يملأون حياتهم بالطرفة والقفشات ..
لذلك لا تجدهم يتلفتون للكلام سريعي الرد والبديهة ...
سمعت بي نكتة أدروب ..
قالوا في واحد أنصار سنة كان بيصلي جنبو ..
طبعاً صاحبنا كان لاصق ليك رجلو مع رجل أدروب والحكاية دي مضايقاه شديد ..
كل ما يزح منه شوية صاحبنا داك يديهو لكزة تاني ومعاه عفصة حارة ..
المهم أدروب زهج منو شديد شال رجله وعقله على التانية ..
كدي تخيل معاي دي ..
وقال للزول الجنبو دا أها تاني هســـــلو ..
مع الإعتذار لأدروب وأهلنا في الشرق ..
عميق ودي ..
| |
|
|
|
|
|
|
|
|
|
Re: جمهورية الزهـــج .. (Re: معتصم دفع الله)
|
معتصم
هذا البوست موضوعه جميل ، فهو يتطرق لبعض سلوكنا ، ونتائجه ،، والطرفة فيه مطلوبة ، لكني لا أرى أن تطغى على موضوع البوست ،،،
في اعتقادي أن أساس ( الزهج )، هو ( عدم الشغلة ) ، يعني الفراغ ،،، فحين لا تجد شيئا تفعله ، أو حين يكون ما تفعله غير مقنع لك فإنك ستحس ب ( الزهج ) ، أي الضيق ،،، ونحن السودانيين لا نجد ما يشغل كل وقتنا من العمل ، ولا نجد ما يملأ فراغنا ، ولا تتوفر لنا إمكانيات الترفيه ، فنجد أن مزاجنا يتعكنن بسهولة ويسر ،،، ونتحول إلى أناس انفعاليين .
آمل أن يتجه هذا البوست وجهته السليمة ، وأن لا يتم إفراغه من محتواه ،، حتى لا يصيبنا ( الزهج )
| |
|
|
|
|
|
|
|
|
|
Re: جمهورية الزهـــج .. (Re: ودقاسم)
|
كان لابد من محدقات يا خال ..
الفراغ ..
هناك فراغ عجيب يعيشه الإنسان السوداني ودا نتيجة أسباب تكاد تكون معلومة للجميع ..
الظروف المحيطة به والإحباطات الكثيرة التي نعيشها ..
وزي ما قال صديقي محمد الشيخ ..
أعاني من فراغ مالي علي حياتي ..
لدرجة إنه ما لاقي فرصة أعمل أي حاجة ..
وكنت أتمنى من المتخصصين في مجال علم النفس البشري أن يفيدونا عن هذه الحالة ..
وتطورها في حال فشل صاحبها علاجها ..
شكراً يا خال على المداخلة القيمة ..
وأتمنى أن تنتظر معنا حتى نعرف طرق علاج هذه الحالة ..
| |
|
|
|
|
|
|
|
|
|
Re: جمهورية الزهـــج .. (Re: معتصم دفع الله)
|
يااااااااااااااااي يا سوسو ..
أنا زهجانة وعايزة أتخنق ..
مالك يا لولو المزهجك شنو ..
مش عارفة أقضي إجازتي وين ؟ ..
بابي وعدني أصيف في الخارج ..
وأنا عايزة عربية جديدة زي بتاعت ميمي ..
مبالغة يا سوسو زي العروسة كده ..
ياااااااااااااااي
انت قاصدني عدييل
يا هي انت
يااااااااااااااي
| |
|
|
|
|
|
|
|
|
 Re: جمهورية الزهـــج .. (Re: A.Razek Althalib)
|
يا زول ما تدفر ..
زح كده شوية ..
إنت ما بتشوف ..
أبورزقه إتذكرت مواصلات أمبابة ولا شنو ؟
ولا زهجة نص الليل في حدائق المعادي مع الشلة ..
في المسطبة العجيبة ديك ..
ما أظنها تتكرر يا صديقي ..
| |
|
|
|
|
|
|
|
|
|
Re: جمهورية الزهـــج .. (Re: waleedi399)
|
معتصم
انا كنت انسان زهوج حتى من ضلى لكن برود الهنود وجوهم البارد افقدنى انسانيتى السودانية
مرة جاى من احد المدن الهندية ركبت بص وكان فاضى بعد شوية طلعو الناس من الدوام والبص اتملى..المشوار 80 كيلو يعنى ابقوتة الخرطوم تسلط على 3 هنود فاهمين شديد.لانهم بنكلمو انجليزى . عشان يقلعو منى مقعدى لابنهم المشمع اتفقو مع الكمسارى..قال لى المقعد دا حقهم...ياجماعة انا راكب والبص فاضى..لخمونى نقرو نقرو وجاتنى لبعة ما عارفها من وين...عموما قلت احسن اقيف واعتبر نفسى ماشى ابقوتة وقمت لحاجة كبيرة من يومها قلت لو بقيت زهوج .زى زمان .. ما باكل عيش ..مع الباردين ديل...
معنا زميل شاكل فى السنما..رفعناه فى الاسعاف ووديناه المستشفى بين الحى والموت
عندى عمى بزهج من طاقيتو ..شغال مساعد طبى..20 سنى فى الزلفى الان نقلوه عفيف..
هذا المخلوق من شدة زهجو من عائليته..مرة سافر وشايل فى ايده جوازهوبس ورجع كذلك بدون حقيبة..
بجى الرياض كل 3 شهور...مرة كنت اووووف وسقتو معاى مطعم الملتقى..بعد ما فطرنا
جاء واحد سودانى ناصح ومفتل..من ناس السودان الجديد..قام قال لى ياولدى البلد كلها اتملت زى ناس ديل...الراجل كانت اخلاقو عالية...ضحك وفات..قلت ليه ياعمى الضوء اسى الزول دا كان ممكن يكسرنا الاتنين...لكن يامعتصم..ازهج من زبون مشترك adsl وتلفونه بقطع كل 20 دقيقة مالاقانى
ولقدام
| |
|
|
|
|
|
|
|
|
|
Re: جمهورية الزهـــج .. (Re: abuguta)
|
الاخ/معتصم
تحية لك ولااخوة دون زهج
الزهج افة الفراغ خاصة
المحبوس فى اطار زمنى لاتستطيع تجاوزة
مثلا العمل فترة زمنية اذا كان لديك فرغ فى العمل ولاتستطيع التحرك فى انتظار نهاية الدوام لابد ان يصيبك الملل ممزوج بالزهج ونحن السودانيين نكملة بالنرفزة خاصة اذا كان هذا الفراغ انتظار فهو ممل ويدخلنا (السودانيين)لتصرفات اخرى مثلا عند الطبيب تكون منتظر الدور تمل من الانتظار الواحد يتحرك يدخل ويخرج فى اللا شى فقط لكسر حاجز الزمن
والامثلة كثيرة فقط انظر لاى سودانى منتظر تجد الملل تسرب الية وتحول الى زهج
ولى قدام
دون زهج
| |
|
|
|
|
|
|
|
|
|
Re: جمهورية الزهـــج .. (Re: صلاح الدين عبدالله محمد)
|
الأخ الحبيب صلاح الدين عبدالله
تحياتي وإحترامي ..
الفراغ ..
الملل والروتين ..
كلها أشياء مساعدة على الزهج والغضب ..
حياتنا عبارة عن معركة كبيرة مع الحياة ..
والصبر هو مفتاحها ..
ولكن هل لنا بذلك ؟..
منذ أن إستقل السودان لم تهدأ الحياة فيه وظل في دوران شديد لا يثبت على حال ..
حيكومات تجي وحيكومات تروح ..
والساقية لسه مدورة ..
وسنظل نحن بهذه الحالة إلى أن يفتح الله علينا بمن يخافه فينا ..
زهج ..
دبرسة ..
مصير مجهول ..
أتمنى أن نجد علاج لكل مشاكلنا المستعصية هذه ..
ليهنأ سوداننا ومواطنه بالعيش الكريم ..
بعيداً عن كل هذه الأشياء .
عميق ودي ..
وشكراً للمداخلة القيمة ..
| |
|
|
|
|
|
|
|
|
|
Re: جمهورية الزهـــج .. (Re: abuguta)
|
أهلين أبوحميد
ياخي أظهر وبان عليك الأمان ..
على الأقل تجينا في المنتدى تفك شوية من الدبرسة والزهجة دي ..
فعلاً السوداني أينما كان هو هو زهجي من الطراز الأول ..
أنا كنت في السودان رايق البال على عكس هنا في المملكة بقيت أزهج كتير ..
وأي حاجة بتنرفزني وممكن أتحامق كمان وأشاكل لي زول ..
يمكن عشان ظروف الغربة والبعد عن الأهل ..
وحاجات كتيرة ..
لكن يا أبوحميد نحن في الحالة نفسها ..
الزهج طبع السودانيين فقط والحماقة الزائدة ..
لماذا تظل معانا في أي مكان ..
إذا قلنا في السودان الظروف المحيطة بنا أما في الخارج بتزيد زيادة ..
ولا زلنا في إنتظار متخصص يمدنا بتقرير كامل عن هذه الحالة ..
عشت يا حبيب ..
ودم صديقي ..
| |
|
|
|
|
|
|
|
|
|
Re: جمهورية الزهـــج .. (Re: خضر حسين خليل)
|
يازول زهج شنو
شوقى ليك طال
قولى متين ارك..
بالجد موضوعو جميل
خصوصا لمن تلقى ليك زول بارد زى فى الوضعيه بتاعت بلدنا بالجد ببقى زول شاذ
النظبت لى مداخله كاربه ونجيك
بخصوص
التخلص من
Hello!
من ساعتها ماخليت شى ماعملت ليهو
copy&pest
بس خليهو فى سرك..
 
| |
|
|
|
|
|
|
|
|
|
Re: جمهورية الزهـــج .. (Re: وليد شريف)
|
إنت كده يا وليد ضغت على الجرح زاتو ..
وأنا خائف يجيب الدم هسي ..
تعرف من أسباب الزهج الفلس زي ما قلت ..
ودي راجعة للبطالة وضيق فرص العمل إلا للمحسوبين والموالين ..
بالله تخيل معاي كم خريج في السنوات الماضية لا يجدون فرص عمل ..
لو مشيت لي صف العمرة ما تلقى محل تقيف فيها ..
ولو مشيت لأي سفارة حا تلقى صفوف من الناس مهاجرة سايبة البلد ..
لأنها زهجانة ومدبرسة ومصيرها مجهول ومستقبلها مظلم ..
هسي أنا زاتي من النوع دا ..
يعني زيك وكده ..
فلس شديد والجيب سخانة تعمل شاي بعد الغداء داك ..
خليك معانا لغاية ما الفلسة دي تطير ..
أقصد الزهجة دي تطير ..
شكراً يا وليد شريف وبجيك تاني ..
| |
|
|
|
|
|
|
|
|
|
Re: جمهورية الزهـــج .. (Re: معتز تروتسكى)
|
بالله عليك يا شقيقي موضوع زي الحصل ليك في اليومين الفاتو ديل ..
ما بخليك تجدع الجهاز من فوق لي الحيطة .
بالصح إنتو عندكم حيط هناك ؟..
الزهج ..
إمبراطورية تسيطر علينا ..
لا نجد له علاج ولا حتى وسيلة للتخلص منه ..
عكننة ..
وقرف ..
وزهج لمن يخليك تكره نفسك ..
منتظرك يا شقيقي تجيب لينا موضوع علمي عن الموضوع دا ..
ودي ..
| |
|
|
|
|
|
|
|
|
|
Re: جمهورية الزهـــج .. (Re: خضر حسين خليل)
|
الحبيب خضر حسين
تعرف قبل كم يوم لاقينا لينا زول يشبهك شبه عجيب جداً ..
أسأل محمد الشيخ ..
حتى وقفنا في الشارع منتظرين الزول دا يصلنا ..
ما كان عندنا شك في إنو الزول دا ما خضر حسين ..
ولما وصلنا لقيناه بيشبهك شبه ما عادي ..
يخلق من الشبه 41 والواحد دا من عندي أنا ..
بس بيني وبينك الزهجة اليومين دي حاكمة حكمة شديدة ..
وعايزين لينا علاج نفكها بيهو ..
تسلم يا غالي ..
| |
|
|
|
|
|
|
|
|
 مزامير الضياع (Re: معتصم دفع الله)
|
ماذا دها الايام..
فاختارت ان تسير في دربي الصعاب
درب اشواكه نمت..
بين الغيوم و في حضن الضباب..
و نامت تحت ستر الليل و الظلم المهاب..
فسرت باحلامي..غريبة..وحيدة..
وراء الهضاب..
و عبر السحاب..
اشق بهمسي عبير الضباب
و بين الهجير بدات المسير
اطوي بوجدي خداع السراب
فخرت بحلمي في قاع العباب
غرقت بوجدي عميق اللجاب
و عبر البحار
مررت على شط قلبي المصاب
صريع الهوى..و حلم الشباب
و سرت ابحث عن ترياق يشفي
حلم ذبيح و قلب صريع وراء السراب
ليعود عمري الضائع
بعد طول سفر و اغتراب
فسطرت حزني على صفحات و اسطر الكتاب
كتاب الاماني.. الزاخر الخلاب
و عزفت لحني على مزامير الضياع
و سكبت وجدي على ينابيع العذاب
و ارسلت صوتي وراء الغياهب
يشق السكون..
لتلقي الخطاب..
ماذا دها الايام فاختارت
ان نسير في درب الصعاب...?
متى نعود..?
متى الاياب..?
| |
|
|
|
|
|
|
|
|
|
Re: مزامير الضياع (Re: رانيا بابكر)
|
ماذا دها الأيام ؟
علامات إستفاهم كتييييييرة ..
وأسئلة ليست للإجابة ..
أنا لو عارف الزهج بطلع حاجات حلوة كده ..
كان نزلت البوست دا من زمان ..
ماذا دها الايام فاختارت
ان نسير في درب الصعاب...?
متى نعود..?
متى الاياب..?
متى تنفك الزهجة دي ؟..
ونخرج من هجير الأيام ..
إلى ساحات الأمل والتفاؤل ..
شكراً رنوية زهرة المنتدى ..
على هذا البوح الجميل ..
وهذه الكلمات الرائعات ..
| |
|
|
|
|
|
|
|
|
|
Re: جمهورية الزهـــج .. (Re: أم سهى)
|
جات داخلة .. زي مرقة غضب من جوف حليم .. في زمن صعب
رمت السلام .. زي شنطة من كتف المسافر .. بي تعب
زي رُدخة رب .. الله يا رب
قعدت على طرف العنيقريب المحازي ا########## ..
ضايرت التراب ، كسر العويش الفوقو .. شالت باصبعا وشختت شخيت
الله يا رب
عايننا فيها نكوس سبب .. للكفرنة وفورة الزهج .. من دروة البال الوهيط
ما عودتنا تدس عوج .. تكتم فرح .. زي حالة الزول البسيط
صنقعنا في قعدتنا .. راجعت الوشوش ..
دنقرنا عن رفعة وشيها المتعب الجاد الرحيم
الطيب السمح المعافى .. رهاب رهاب ينشاف وسيم
إنوهطت فوق العنيقريب القديم
من تاني ضايرت التراب ، كسر العويش الفوقو شالت باصبعا وشختت شخيت
وقالت : تصدقو آ ولادي بقيت
أبيت الليل أفكر في التميرات القدر فوق راسا ما خمّت صبيط
غلبا الجرورة الفوق ضهرنا تنزلا ..
تطلق وشينا مع الجماعة ..
شن دهانا دي كم سنين والحال وقف قطّ وحلف ما فيهو لو نقاط بسيط
كان بوشنا في حش التمور .. الليلي دوشنا مع اللقيط
أي لا حكت دي ولا بقت .. ما كنا قايلين في حياتنا يجينا أقسى من المضى
ساعة مروق الإنجليز قلنا الظلم فات وانقضى
تاريهو كمتر .. وقام دقون .. حلفا وعشر .. معيوقة نال
دمسيس ... ضريسا .... وشوك جمال
الله يا رب كربك كرب
عاولى التمور .. ا########## بور .. الناس حطب
بابور شهور غلبان يدور .. مافيش مطور .. ويجيك بعد ده علم طلب
الله يا رب العالمين
الما جحدنا نعمتو في الشوف والسمع راحة الولادة ولا قلوبنا قسن ولا غيرنا دين
في الجابو ما قصر حمد .. في الشالو ما قلنالو وين ماشيبو وين
عدلت نعال مقلوبة في الجيهة اليمين .. حدرت شمال
زمناً مو دا الحيكومة كانت بت حلال
بي حالا .. بي حرب الجنوب ..
بي قلة المال في الجيوب
كانت رخية العيشي .. إلا ترا العوين الكبرو .. كبرو مليسين
علمن يطير .. إن كان هو ما فدّر عوج ..
ما فادنا شيء ومحق القبيل لمينا هين .. في هين .. في هين
يا حليل رجالاً سكتن غدراً غشاهن بالقفا .. ولي الليلة سيفن في الجراب يهرج سنين
دا زمن قواسي .. زمن ضلالة .. اوانطجية .. زمن حقارة .... زمن مهين
لاقين هواكن ضروا .. ضر .. يا عسكرياً ما انتعظ .. كتل الرقاب بيودي وين
ضر .. يا جلاليباً رهاف .. ذمماً خفاف .. ضر يا ضرر .. ضر .. يا دقين
منصلبطين عرق النبي .. وبالنار بتلعبوا يا عوين
لي الحول قريب .. درب السلامة .. تخوجوا بي درب الحرب
غتي قلب واللا الحرب .. بقرة حلب .. والأرض صين
ما كان عمل .. ما كان دا دين
يا أرزقية تخمجوا دم .. والدم مو موية .. ومانا طين
منصلطين في الناس دحين .. لامن يجي اليوم الفصل والحق يبين
وين تمشوا وين تنسلوا .. وين
كان طال وكان قصر الزمان .. الحين بحين
كب يا رجالاً سكتن غدراً غشاهن بالقفا .. ولي الليلة سيفن في الجراب يهرج سنين
وإنأوهت .. وحسيت بأعماق الشوارع والتواريخ المجيدة إنأوهت .. وأدتني عين
صنت شويتين .. كوركت .. هيى يا بنيه وكتنا راح .. يا بت شمشنا إدهدهت ..
شوفيلي شافع ود فطين جاء من الطحين
الله فترنا من الطحين
وكان الوقت زالف عصر .. عين الشمش مشغوله بي دوشة سحاب
عرق المراكبية البعاد راحل مع ريحة التساب
ما تدري مارقي من البيوت الحلة .. واللا من التراب
الناس تقول مدقوقة طالعة على الحقاب
مفلوقة بي حجر الصعاب المرة .. نازلة على البحر مشروقة بي موية السراب
الفرة .. مشنوقة عقاب .. بالمرة من كتر العذاب
الحرة في طايوقه داب
يا المرة كيف بقت الرقاب مسيوقة بي قيد السلاب
منشرة من نشر الحجاب في عروقا .. وإشتد الخراب
من بعدما انبلج الفرج من ضيقا .. خدعوها بي حيلة كتاب
رفعوه فوق سن الحراب
ودهت الهزائم خلقتا
فالناس بدل عن نقتا
التلقى فكة ريقتا
وبدل القصور الفي خيال .. التبقى ماهلة كريقتا
وما جاتا راحة طلقتا .. إلا التعمر طلقتا
بي بندقيتاً حقتا .. بي ها الشوارع وبقتا
تنسدا منك دقتا .. ودم فلقتا .. ومر شرقتا .. ونار شنقتا
يا دقن دينك سرقتا
قطعت وضوها انشرقت .. مسحت وشيها إنشهقت
قال نست ما تاكت العوضة التحت .. عن مرقتا
دارت تقوم .. مسك العنيقريب الحنين طرقتا
رجفت بشيش عن نتقتا
رجفت بشيش من الغضب واللا التعب .. فتر السنين ..
واللا الكبر دا الما قدر يمسح سماحة خلقتا
زي نيتا البيضة الشعر .. وزي موج بحر كان الجبين
مديت يميني أساعدا ..
ردت يسارا تباعدا
وقالت لي : أبوي وفر ضراعك للبلد
وادخر مروتك آ ولد
لي يوم بحين
احفض كرامتك تحفضك .. الموت ولا العيش المهين
الموت نفاد الما نفد .. الموت حياة الميتين
أختاها جنة مع الفقر .. وادخل جحيم المتعبين
وإن ما قدرت على دا أبوي .. رب لك دقين
وصنت .. رب لك دقين
وضحكت .. حمدنا الله الحنون .. جيداً خلقنا بلا دقون
وضحكنا زين
ساقت حديثا .. على الخراب الشوفتو ما دايرالا عين عقب متاقانا الرياح
رفعت قران شوك الصنط .. ساسوية جاية من المراح ..
يا خيري ودي المستراح
والشوكة تحت الدوكة .. يا داك الركين
الشوك بمرق الشوك .. شوكاً فينا شين
مراقو رب العزة .. شعباً ما بيلين
الجاي حيكومتنا .. لكن الزمن دبوية .. داير النهمة .. وينكم يا الخزين
ما قلّ حاشى صبرنا .. لكن لا متين
دعكت عيونا وصنقعت .. كان الغيوم إنجمعت تقلت على الريح النصيح
كان المطور شو ترعت .. زي باكي فوق دم الحسين
لكن ده وين .. والتاني وين
وإنلوعت .. معقول في ناساً ما وعت لي الليلي بالم .. بين بين
وكيف وإنتو نوحنا من الدعت .. مومنا من جحر الدقون الكاكي يلدغ مرتين
والتالتة قرصة أبو الحصين
حسيت بأنها دمعت .. وشهقت عيونا الدمعتين
حسيت بأني متل حجر .. جدعوهو في نص البحر .. قام البحر بنى فوقو طين
حسيت بأعماق الشوارع .. التواريخ البعيدة إنأوهت .. وأدتني عين
الجاي حيكزمتنا .. كيف .. ومتين .. ووين ؟
ومرقت متل دخلة غضب .. صدر المسامح والحليم
في أيام عجاف
دي السرة بت عوض الكريم
مرة ما بتلاوز .. لا بتخاف .. زي الضفاف
الما بتهاب ضنب التماسيح والكلاب .. قومة البحر واللا الجفاف
مرة من قديم .. مرة بت قبائل .. قالوا لا .. وإختارو في الحق الجحيم
من رفقة الفسل الخلا .. وكانت نعم تدي النعيم
مرة من صميم ضهر الغلابة الما بتنكس راسا .. غير ساعة الصلا
أو ترمي تيراب في التراب .. أو تستشف وجه السديم
السرة بت عوض الكريم
ما فيها من عادة الحريم .. غير السماحة القدمت قدم الضهب حافضنو في حقاً قديم
في أقصي كيم
ما فيها من طبع الرجال .. غير الأيادي الخشنة زي قولة النصيحة وقت يكدب في الصميم
ساعة يكون الحكم ضيم
تسعين سنة .. ويا السرة بت عوض الكريم
بصرك بصير .. سمعك سميع .. نضمك نضيم
بالك محلو صبي وسليم
تسعين سنة .. عودك أمداً ما انحنى .. شامخ بلا البان القديم
تسعين سنة .. ومن فتنتك .. استغفر الله العظيم
جوك الرجال يا السرة بت عوض الكريم من وين وين
لا الكلو طين أغراك .. لا السمح الوسيم
آ السرة صددتي المشايخ والعمد .. مرسالا ليك ..
ضيعت بي أنفه البشارة عليهو ... كيف قلبك صمد يا بت قصاد المغريات ..
الجان يجن والهام يهيم
والبشروك بالجنة من فقرا البلد .. أسقوك بالغفلة المحايات .. ما نفع
رتباً كبار .. قلتيلا .. لا
شعراء ومغنين .. خت فيك دوداي غناهو .. ما شفع
الجان يجن والهام يهيم
والإنجليزي أسلم في شان خاطر هواك .. ساعة طلعتي تجيبي عود السيسبان
إتصيدك آ السرة بت عوض الكريم ... مرقنو كرعين الحصان
والجاكي ناط .. كتفتي بالليل في اللمين .. مع الفجر طلبك عفو وسترة
وعفيت وسترتي .. يا السرة القوية .. بقتلو توبة سوية من هتك العرض
يا بت ها كيف بعد الحسن .. ما تاورك قلبك على زول في الأرض
ستين سنة ..
ويا بت بلا النيل وحدك واقفاها .. و النيل إنحنى
ستين سنة
ما جهجك فقد الحسن .. لا يفقهك فجع الجنا
فجع الجنا الويحيد تحت خيل ميجر السجم الرماد
الإنجليزي وقت مرورو على العباد
وجناكي ناش عين الحصان بالنبلة .. ناش طربوشو
قيح العسكري إنحم .. وحم بالسوط جناك في إطن المسيمح ما اتلفت
والهاشم الواقف وقع .. والدم هدر ..
وكان زي محمر في الكجر
بي إيدو قابض نبلتو .. وفي التانية غامت للحجر
صرخت صليحة وشكعت فوق قيحة .. كلْبينا الزرق ومن يوما داك ما شافتن
صيحة البطان قيح البقل .. نهمت غنا غضب البنات عن زفتن
فس .. يا كديس الإنجليز .. كلب الترك يطفر من الفارة وينيص
يا مكري .. صبرك .. يا رخيص
الفافنوس .. البوص .. لحاية الهردبيس
تمر البلد شال شيلا جد إلا الحصا تبل مارقة صيص
كوسلك بلد .. بلدك واباك .. رفسك رفيس
نفضك نفض .. بلدك تضادي .. ولا مغيث
قلبت عليك بطن الرجال .. شقيش تقبل .. يا خسيس
يا قيحة .. حظك في الحياة وفي الميتة مافي .. وموت تعيس
عفنت كرشتك دون ترب .. منفوخة للغربان فطيس
وفوق سكة الماظ الصعب .. هاشم - حلالي - قدل عريس
هيلة آ رجالاً عرستن .. شمش المشارق ليها ميس
هيلة آ رجال .. هتفت نفيسة وحرّقت توبا الوحيد
عقدت شديد .. قرقابا حافيي ودون قميص
جرت الكرارق زي برق .. لفحت من السحارة لي هاشم حريرة وقرمصيص
وكان الفريق إنخم ما فضل بشر ..
ما هزا زلزال الفجيعة المرة .. والدماع طفر
دايرات يولولن الحريم .. صنت وقت صوتك نهر
وكيفن زفتي وشيي ونعلت قفاهو .. شيخ الحلة عن قال لك قدر
ولميتي هاشمك ونبلتو .. وفي إيدو الحجر
صبغ الحريرة .. القرمصيص .. الدم ملاك ..
لميتي زي لمة ملاك ..
آخر عمل خير في البشر
جاك الصبر من وين .. ولا قلبك رجف .. لا آهة .. لا دمعاً طفر
رشرشتي بي إبريق أبو .. وبي دمو نبلتو والحجر
خيط الحريرة القرمصيص .. كفنتي بي رفت القماش ..
الساكوبيس الخاتا لي يوم الطهورة ..
مرقتي لاقوكي الرجال بين الغلب إنقلبو
ومتحزمين زي يوم أبو
دمع الرجال هزاكي
آه خارت قواكي
طفرت دموعك والحريم كسرن عليك
قلدوك رجالات الفريق فوقك ضي الشمش إتكا
وبعض المراضى المقرفين قلدوكي لي شي بلا البكا
وكانت دي أول مرة يتبكي في الفريق ..
وبي حرقة زي كل الرجال الخيرين ..
درفون ضرب بالنبلة طربوش إنجليز ..
عور حصان الإنجليز ..
لا انزح لا زاغ لا جرى
وكانت دي أول مرة شافع في الفريق بي حرقة .. ذي كل الرجال
الناس تشقلو ود لحد في مقبرة
سبلتي ما انقطع الدرب .. دفقتي بي قرعو الطشت .. فنيتي في البير النحاس
جا طشت جديد .. وقرع جديد .. ونحاس جديد .. وما انترو ناس
ناساً تقلب الدنيا.. لو لاقية راس
دور والمعاك ما انفرقو ..
وين وشك الصعب الصلب .. إن صر في الريح بعذقو
وإن صر في الموج غرقو
يا بت كضب ..
معروفة ما من قوة تحمي الفرح واللا الترح حين إندلاقو على القلب
لي دور حديث المنغلين ما إندل من فورتو وهبد
دماً صعد من ها الترب .. لا بد من ينزل مطر .. رحمة وسعد
ما بروح سراب .. هاشم نجمة الفنجرة .. نشهد على إنك ولد
طمنت بي فعلك بلد .. من إولها ولي آخرها
رجعت أبوك من القبر .. قصرت لسنات الكتر .. سكت خشم المسخرة
هزيت رجال جوغة غريق ..
بس كيف نضيق ضيقاً عميق
يبقى الحجر فلخة جبل .. والنبلة تصبح منجنيق
أو بندقية معمرة
ساق نخلة في الطين الطري نازف تشق المقبرة
وقصب التواريخ ينبري ودمك عمار المحبرة
نشهد على إنك ولد .. بركان جسارة وفنجرة
زي ما شهدنا على أبوك .. فرسان قبيلتك من ورا
ويا السرة بت عوض الكريم .. إنك مره
ولدك جدع ما بندبوا ..
حي في وليداتنا .. الدشر لعبن .. طعيم النوم أبو
ولدك بخيت .. ما دام رقد في صدر أبو
ولدك شفيعنا مع النبي .. ولدك يمين يكفينا كلنا مغفرة
وهنا دا الدرب .. حرة قلب.. صرة وشي
ولدك وعدنا بكل شي
وما في إيدنا حاجة نخسرا
يا السرة بت عوض الكريم ..
مع إنو كم سنوات ولا بحراً طمح .. لا سمانا كانت ممطرة
كان كل ما نحفر .. يلاقينا الترا
عن جينا لي دفن الترب .. حسينا كم ملك إندفن
جات غيمة من دون الوقت .. جات نسمة هبهبت الكفن
بي دمو نبلتو والحجر .. خيط الحريرة .. القرمصيص
دخرينا نام آ السرة .. في صدر الحسن
فاتونا بي قدم الصلاح .. سبقوك على جنة عدن
وسابوكي نخلة وسط رياح .. بين الزمن
لكن ضراعك هو الضراع .. على رغم أقداراً قسن
ماسكي الشباطين في الصراع .. لا بودة لا سوس لا وهن
تعبر قليبك زي شعاع .. ما غيرت لونو المحن
ضلك متل بالك وهيط ..
عبرت مراكبك بي شراع صبر إحتمالك كم محيط
ورونا في الزمن العبيط .. يا تربة .. يا كل الوطن
مافيش وسيط إلا الصراط المستقيم
السرة بت عوض الكريم
الله .. أيا مره من قديم
سلطان وعن ساعة الفزع مملوك نشيط
عادية زي قولة سلام .. حلوة لسان .. لكن إذا تغضب سليط
مره ما بتفرط في الزمن .. وفيها الزمن لحظاتو أبن
ساعة مروق الإنجليز .. ضبحت غنيماية اللبن
طلعت على ناس القبور ..
كشحت ورا طرف القبب عيشا المجودا للطيور ..
ومن زمزميتا والدموع .. رشت قبر هاشم عقب قبر الحسن
والباقي لي كل القبور
في توبا صرت هين من القبرين بعد ما انبركت ..
بركة عشق .. بركة شكر .. بركة وفا
غيبة الشمش جبرت خطاها على الرجوع .. والقلب من شوق ما اكتفى
ولسع في غيمة من الدموع تبراها لي طرف الفريق ..
شيلة نفس تطلع مطر .. ختة نفس تطفي الحريق
آ السرة يا دوب يندمل بين الضلوع جرحاً غريق
فاتو إنجليز فوق دمها .. وعين إنجليز
مبروك وحمديل السلامة يذكرك ليلة الحسن سار لك عريس
أو من ضراوتو يذكرك كتل المنيحيس التعيس
ناس تملا في الأزيار .. وناس في كل كيم واقدالا نار
ناس نازلة في الحيشان تقش ..
ناساً ترجع في المضى .. والجايي سودانية مش
السرة ليلها قلب نهار .. ا########## غبشة الناس غبش
والروح خدار من حلتها .. النوم فر طار
باكر دغش شدت على ضنب الحمار
حموها للميجر تخش
عقبت على بيتو العصر .. قصرت مع بتو الحديث
دهت المشايخ والعمد .. سفهت عمايل الإنجليز
ظلم الحكم ياهو الحكم .. كان من جوامع كان كنيس
يبرا السما .. وتبرا آمحمد سيدي .. ويبرا المسيح
ورجعت بلا الموية الروت .. حيضانها لي جدول فسيح
لي دور معلقة للبخور في بيتها عامر بالمديح
لي دور تزغرد ما انقرش يا السرة .. حسها كيف نصيح
لي دور مع الشاي والزلابية مع الضبيح ..
الجوكي بالخرفان سمان .. والجار له تور
لي دور كوبيقاتك تدور
ما قصر الطمباري .. جاك ملك الدليب
رحلت بروش الزاوية عندك في الفريق
آ السرة ما فضى عنقريب
آ السرة بينات الخلوق .. مراتاً الليل آ بحوق
لي دور علي كتف الفرح .. تتعب عيونك وتستريح
لي دور تكلك قاح تكية .. آ السرة دارك ماج ضريح
ويومين بعد سقت الخدار بي إيدا .. جيهت العقاب
قامت معاها تسع رجال .. بي نوبة فوق ضهر البخار
قالت عليها نذر قديم .. واقع عليها نذر عزيز
إن حية في الدنيا ونصيحي .. إن كان تشوف بي عينا فوت الإنجليز
إن كان تطق زغرودة في ضل العلم ..
خلوها تدخل للختم .. حرموها يكفيها الضريح
شوف عين تشوف الأزهري .. وبي ما يكون .. صح النذر .. ما راح وهم
دماعا رقرق في العيون .. عن ساعة المحجوب نضم
وإنشر عِن زروق بزم
ما كان تكون آ قيحي حي .. وأنا أفش مغستي وأصفي دم
من تاني يا رخم الوخم
ما دام حرتناها الأرض .. سندنا .. تيربنا .. بوغنا .. ومسحنا قمحنا .. هسع في وحم
هاشم ولا أسفاً عليك .. وعلي رفاقتك لا ندم
ما دام بقينا أسياد بلد .. ما فتو يوم أبداً قسم
والفوتك يا الإنجليز .. يعقب علي باقي السجم
آفاتن أولاد الحرام .. أكبر من آفات العجم
دي السرة بت عوض الكريم .. سرة عقاب
سرة تواصل بيننا بين رحم التراب
والجاية في الزمن الرحيم
مره من قديم
ما فيها علقنة الرجال .. ما فيها دلقنة الحريم
مره بت قبائل .. قالوا لا .. واختاروا في الحق الجحيم
ومن رفقة الفسل الخلا .. وكانت نعم تدي النعيم
مره من صميم ضهر الغلابة الما بتنكس راسا غير ساعة الصلا
أو ترمي تيراب في التراب .. أو تستشف وجه السديم
جات داخلي زي مرقة غضب من جوف حليم .. في زمن صعب
ومرقت متل دخلة غضب ..
* محمد الحسن حسن سالم (حميد )
| |
|
|
|
|
|
|
|
|
|
Re: جمهورية الزهـــج .. (Re: humida)
|
عاينا فيها نكوس سبب .. للكفرنة وفورة الزهج .. من دروة البال الوهيط
ما عودتنا تدس عوج .. تكتم فرح .. زي حالة الزول البسيط
صنقعنا في قعدتنا .. راجعت الوشوش ..
دنقرنا عن رفعة وشيها المتعب الجاد الرحيم
منعول أبو الزهج ..
مرقن على البيوت ..
شايلات تيبان الصبر ..
يبكن على حالي الحرن ..
والغربة أم وجعاً دفين ..
شال النوم عيون ..
والسهر هدّ الحيل ..
شكراً حميده ..
وشكراً حميد ..
على هذه الدرة الرائعة ..
| |
|
|
|
|
|
|
|
|
|
Re: جمهورية الزهـــج .. (Re: معتصم دفع الله)
|
الأخ معتصم
لك التحية
حقيقة الموضوع ليس مطروقا من قبل مع تفاقمه بيننا وفينا ومن منا يخلو من ذلك ... تعرف اغرب حاجة انا بزهج مع عدم زهج شبابنا الجديد وبرود دمهم ( ليس تعميما هذا ) ولست ادرى حكاية الزهج هذه معنا حكايتها ايه وقد استغلها البعض للتريقة علينا ومحاولة المزح الثقيل وقد لاحظت ان بعض السعوديين يتعمدوا اثارة السودانيين ليس لسبب الا لاكتشاف مدى سرعة زههجهم من كل شىء ...
اعرف احدهم كان فى زيارة مع زوجته لاقاربه واستدعى الاولاد للعودة للمنزل وقعدوا فى العربية مستنين المرأة ولما لم تأتى ارسل احد الابناء لكى يستعجلها وهى ترغى مع قريبته تلك فى الباب فما كان منه اخيرا الا ان ذهب بدونها وتركها ليحضرها له اهل المنزل المضيفين على مسافة ثلاثون كيلومترا..
الزهج حقيقى حقنا بلا منازع سوى الصوماليين ...
هل لحرارة القارة سبب ترى ؟؟ ام ماذا؟؟
هل هنالك علاج للزهج هذا ؟؟؟
ام انه قدر محتوم ...
مع تحياتى
| |
|
|
|
|
|
|
|
|
|
Re: جمهورية الزهـــج .. (Re: قرشـــو)
|
العمدة قرشو
تحياتي وسلامي ..
من خلال البحث لم أجد معنى علمي للكلمة وهناك ما يعادلها في محيطنا وكنت أتمنى أن يمدنا أحد المختصين بأسبابها وطرق علاجها لتعم الفائدة ..
الأسباب كثيرة لهذه الحالة منها المزاجية والظروف المحيطة بالإنسان السوداني من ظروف إقتصادية وسياسية ومناخية ..
يعني الواحد منا يقول ليك والله مزاجي معكر اليوم أو مزاجي تمام في السلك يعني ما هي درجة المزاج التي تتحكم في طبيعة الإنسان وسلوكه ؟ ..
ولو مفلس خلاص تكون كملت معاك أي حاجة ترفع ضغطك ..
من خلال مداخلات الجميع أتمنى أن نصل لمعنى وعلاج يفيد هذه الحالة ..
شكراً جميلاً للمداخلة الرائعة ..
| |
|
|
|
|
|
|
|
|
|
Re: جمهورية الزهـــج .. (Re: معتصم دفع الله)
|
وينما أنا زهجان بدون سبب وهي مرحلة من مراحل الزهج المؤدية للإحباط دخلت النت ومشيت أفتش في الأرشيف فوجدت مقالكم هذا وتمنيت على الله الأماني أن تنقلب جمهوريتكم إلى أمبراطورية أو مملكة حتى تسلم من الإنقلابات الزهجية المحبطة.
كدى تعال قول لي الما بزهج شنو المواصلات تسل روحك تكاليف المعيشة تقصم الظهر جارك يطلع عينك شارع بيتكم وما به من حفر ومويات آسنة يصيبك بالربو ووجع الركب وآلام المفاصل وعرق النسا ، حالة الطقس درجات الحرارة المرتفعة والرياح الشمالية الشرقية والجنوبية الغربية أو ما يعرف برياح الكركي من جميع الجهات محملة بالتراب وإنعدام الرؤية وإرتفاع ضغط الدم وفساد وتسيب المسئولين من رأس الدولة إلى أخمص قدميها والغش الذي يمارسه الجزار وسيد الخضار وكثرة نقة أم العيال بالحيطة مع جارتها من الصباح الباكر والباعة الجائلون الذين هجرتهم الدولة من قراهم ورمتهم في أتون العاصمة بلا مؤهل أو مقام كريم فأصبحوا فئات يمارسون البيع الجائل لأشياء أهون من خيط العنكبوت وهي عادة لا تشبع ولا تغني من جوع بمداخيلها وفئة سارت على درب الحكومات وإحترفت الجريمة فأجادت السرقة والقلع وتحزبت في سبيل ذلك ، وفئة لا إلى هؤلاء ولا إلى هؤلاء وهم الذين يشمون النزين وكل المواد المتطايرة تطيراً من واقعنا المؤلم في محاولة إلى خلق عالم حالم بعيد عن الواقع المؤلم ولو إلى حين أن تفك السطلة وتنتهي السلطة والتي عادة لا تنتهي وإن كانت السطلة تفك دائماً فكان لابد من إعادة ربطها. ده كلام زهج ما بقصدو
| |
|
|
|
|
|
|
|
|
 Re: جمهورية الزهـــج .. (Re: almulaomar)
|
الملا عمر ..
والله أنا زاتو سعيد إنو جابتك زهجة ..
عليك الله الما بزهج شنو والحالة تف يا دنيا تف ..
تلقاها من الصباح مولعة ..
حارقة روحك والزهجة ألف ..
الناس متوسدة التراب ..
وملتحفة السماء تسأل الرحمة من رب العباد ..
الما لقته في الأرض ..
"والجاتا جاتا من الأرض ما من تالا السماء "
درجات الحرارة مرتفعة في كل حاجة ..
في الناس الكروشة زادت وراكبة عربات ..
وناس ما لاقية حق المواصلات ..
ولا في الفساد الطال الخلق ..
دايسة على كل القيم ..
سألت أحد أقربائي والدنيا سخانة ..
ونحن في فصل الشتاء تخيل ..
قال لي ياها دي حالنا ..
جونا كده حار شتاءاً ..
وحار جداً صيفاً..
أهي دا يا الملا عمر برضو كلام زهج ساي ..
| |
|
|
|
|
|
|
| |
معتصم دفع الله
walid taha
ابو جهينة
Sobajo
ودقاسم
A.Razek Althalib
waleedi399
abuguta
صلاح الدين عبدالله محمد
خضر حسين خليل
معتز تروتسكى
رانيا بابكر
humida
قرشـــو
almulaomar
فيس بوك
تويتر
انستقرام
يوتيوب
بنتيريست