|
|
 البايركس كبى الجرسة
|
طبعاً كالعادة البنت عندما صغيرة في السن وفي المرحلة الدراسية
وبالأخص إذا كانت جميلة شوية وعندها حبة رقشي بتدلع في الشباب جنس دلع
وكل ما يتقدم واحد تعتذر لهذه الأسباب :
* والله أنا لسة ما فكرة في الحتة دي
* أصلو أنا عاوزة أكمل الدراسة
* أو أنت مؤهلك التعليمي غير مناسب أو فقران أو ساكن في العشوائي
أو أنت لسة ساكن مع ناس أمك ما عندك بيت مفصول وتكون لها مواصفات عجيبة مثل :
مؤهل علمي جامعي فما فوق وشييك ولبيس ومثقف وثري ويملك سيارة وسكن منفصل من سكن عائلته وهلمجرا ..
إلى أن يصفر القطر وتبدأ التنازلات وتكون بعد دا المواصفات كالآتي :
* ود ناس
* متدين ويخاف الله
* يحترم الزوجة ويعطيها حقها
* بالنسبة للمال الأرزاق بيد الله
* بالنسبة للوسامة والأناقة ما شرط الراجل بعرفو بأفعالوا
وإليكم هذه القصيدة الظريفة
منقولة من منتدى جماهير المريخ بواسطة العضو حريقة
لي أيدينا بنـــــرفع *** والعازب كلو بيســمع
نفوسنا كتير مشــتاقة *** للراعي دوام نتضــرع
شعارنا عريس متواضع *** ياخي ياقدر اسمع أجمع
نحن البايرات في لهفة *** والعمــر ولـي وودع
نحن مساكين يا جماعة *** وللجنة دوام نتطـلع
لو واحد قام وأتقــدم *** في لحظة نلبي ونسمع
بلاش عربيــــة خصوصي *** مالو الكداري دا هسـع
بلاش من شبكة وشيلة *** بي أبســط حاجة بنقنع
البيت ماشــرط عمارة *** دي مظاهر ساكت تخدع
لي جنة نضيرة نحــول *** البيـت الخرب البجمـع
ما شـــرط تجيب تلاجة *** كفاية الزيــر البنقع
ما دايرين كبدة وشـية *** بي ويكة تقيلة بنشـبع
ما أصلو شبابنا الودع *** ما ممكن تانـي بيرجع
أحلامنا الكانت بــدري *** ما عادت تانـي بتنفـع
دايرين الشاب الأغبش *** حتى لو فقــران ومقطع
لانو الفيهو الفايـدة *** ليهــو دوام نتطلع
حياة الســترة أملنا *** إنشاء الله ربنـا يجمـع
يحن الله عليـــــــنا *** ونشــيل أيدينا ونرفع
الشباب ردو عليهم وقالووووووووووووووو....
للرب شـــكوانا بنرفع *** والبايـر كله بيسـمع
في دربك يامــا جرينا *** والعين الســاهرة بتدمع
كم مرة ايدينا اتمـدت *** والرد الجـارح اقنـع
احلامكم والله غريبــة *** وللعـين بتزغلل وتذلع
طلباتكم لينا تحيـــر *** جايين تتواضعوا هســـع
ما جينا زمان شن قلتو *** يافقير يامقطـع أرجع
ما عندك حق السـفة *** لابس دمور ومرقع
دايرين العنـدو مصانع *** لو كان لي غيروا بيركع
ما جينا زمان شـن قلتو *** يافقير يا مقطـــع أرجع
في جيوبك ساكنة عناكب *** لو كان باعوك ما بتنفع
دايرين العنـدو الفـلة *** لو كان حنكوش ومدلع
ما جينا زمان شــن قلتو *** يا فقير يا مقطـع أرجع
لو ماشـــي لآخر الدنيا *** تركــب رجليك تتبرطـع
دايرين العندو البنز *** لو يبقى عجـوزاً أصلع
ما جينا زمان شن قلتو *** يافقير يامقطع ارجـع
ياالبيتـك مبني زبالة *** ومن غير فيضــــان يتزعزع
دايرين العنـدو الفيلا *** لو كان صغير بيرضـع
ما جينا زمان شن قلتو *** يا فقير يامقطع أرجع
وموكيتاً فخـماً فاخـر *** ونجفاً بالـدر مرصـع
والكندشة فريون ضـاربة *** وثلاجة فريــزر تجمع
بي فيديو كاسـيت وأتاري *** نتسلى لو وكتنا نضيع
ما جينا زمان شــن قلتو *** يا فقير يا مقطع أرجــع
دايرين زنقيل ومقندل *** لو كان تمســاحا يبلع
والعملة الحرة ضـــروري *** والمهر دولارا يدفع
وبشرط الشــيلة العامـرة *** والكرسي الجابر يلمـع
وذهباً مختوم وأســاور *** مليانة الإيد للأصــبع
وضروري الحفـلة بوردي *** والكابلي اللحنو موقـع
ونقضي عسل في أوروبــا *** ونطوف العالم أجمــــع
بي لندن وروما وموسـكو *** وفينا المدن الأربــع
نلبس في الكاسي العاري *** ولو طلعت موضة بنتبع
وناكـــل فاكهة طـازجة *** وبالخير نتمتع ونشـبع
أفلامـــكم والله عجيبــة *** خلونا نحمض ونطبـــع
ماجينا زمان شـن قلتو *** يامبهدل أوعك تطمـع
مد رجليك قـــدر لحافك *** وشوف ليك طـورية وأزرع
لي مين تتقـــــدم انت *** يا قرد ياقبيح يا مبرقـع
كيفن بتحـــب يا أغبش *** من غير شاكوش تتفرقع
لو كان بنحـــب الزيك *** ما أخير الموت الأســرع
لو مت وفاتك تفــــرح *** ولو عشت حياتك تفجـع
ولو تبقي ضراعي الأيمن *** في لحظة بنقطع ونجدع
ما قلنا الدنيا دي فانية *** وآمالنا مظاهـر تخـدع
اختاروا العندو ديانـــة *** الديمة وشـــو بيلمع
قلتولنا خلاص انتظـــرو *** الحــور في الجنة بتنفــع
الليلة قطـــــركم صفر *** والعمــــــــر ولى ودع
عجزتو قعـــدتو تقولوا *** واشبابنا الأغبـــــش أجدع
ماجينا زمان شن قلتو *** يا فقير يا مقطــع أرجــع
ما جينا زمان ليه كنتو *** جاهــلننا زي الشـفع
ما خلاص الليلـة وقعت *** من قد القفة الأوســـع
والليلة قطركـــم دور *** وقعتوا في وش المدفـع
رافعين الراية البيضـاء *** لكن هيهــات ما بتنفـع
رافعين لعرس جماعي *** وفي العشرة ألف ما بنطمع
وهنياً ليكم كبدة وشية *** بعـد الأضراس تتخلــــع
|
|
 
|
|
|
|
فيس بوك
تويتر
انستقرام
يوتيوب
بنتيريست