|
|
 ودراوة
|
جات المراكب
مجرتقه بى ضريرة الموج
معطره بالسنا
فترانه تنده للجروف
شرت مقاديف الحنين
فوق الضليل
الشرّ من روح الحراز
جات المواكب
والبلود بى ناسا طربانه
مطمورة ماليها الغنا
الا الرهود عطشانه
والبحر اصبح ضنين
جات المواكب
دافره من كل الجهات
من الشرق
بالسعيه وبالحلال
وبالعروق الدمها موية دميره
جاتا تاره من الشمال
والوشوش الطيبة سمحات السمات
جات عابره من نص الجزيره
مشوارا يا عز العمر
خطواتا يا حر الجمر
مشتوله ارضك
يا نضيره
بالحكايات القديمه
صلينا فرضك
يا كبيره
بالترانيم القسيمة
والصباح إسم الشمس
ساقينا نبضك
من تفاصيل الرواية
من عويناتا الوسيمه
جات المراكب
وولدك بعيد، ولدك حزين
شايلك حجاب شاقى الهويد
نص البلود اليابسه ديمه
لاميكى فى بطن الحشا الواقد حنين
كايسك فى متاهات السنين
خوفو بس من الهزيمه
يا نديه
يا وفيه
يا الفى صقيعة الروح مبتقه
قايمه نيمه
داير اقول ليك اسمعى
وصدقينى يا نديمه
حلمت يوم
إنى جوه الجنة قاعد
بى انهارا، بى اشجارا، بى ازهارا
بى انوارا والأملاك
شفت فيها المافى زول
بى عيونو شافو
ضقت فيها طعم هواك
وقفت جنب سدرة محاسنك
فرتقت بقجة أغنياتى
مرقت فرحى، لبست توبى
وشلت حجبات الطرب
قلت اتأمل بهاك
وبديت ادوبى
لقيتك احلى وديمه أجمل
و الفرح إسمك براك
الصفا الجواك مكمل
يا صفيه، يا وفيه، يا حفيه
مين فينا بقدر يوصفك
مين يرسم المعنى الهناك
مين يكتبك
عطشانة محبرة المسافة
منو البرويها من كوثر سناك
جات المراكب
وقفت تغازل فى الجروف
جات المراكب
كاسحة مشرعه ومنسرحه
نزلت عليك شمس النهار
اتحكرت وسط الصفوف
وبقيتى للناس الديار
معنى الأهل
خيرا كتير
فاض انبهل
جات الخلوق ميات الوف
وصبحت تامه فى لمحه
جات المواكب
ختت ايدا فى صدر الخدار
وبقيتى اللامه للفرحه
والغنوات
والأشعار
الصلوات
والأذكار
الأمات
والأخوات
منارات شالعه بالأنوار
نداوة مرقة عصريه
لافحة الطيبة زى طرحه
واطاتك منابت العز
الحيران
والليحان
والنوبه
تدمدم بى هدى الرحمن
الجيران
والحبان
الفة وريدة مكتوبه
وجنياتك نحاسن يرز
دلوكه وشتم رويان
صقريه وركوز وبطان
بازمه الشكره لى عيالك
فى جاه الجنا البطران
نريدك والله زى الروح
وين ما نكون
وكيف ما نكون
ريدة اصيلة ما بتروح
ريدة على مدى الأزمان
|
|
 
|
|
|
|
أبوذر بابكر
فيس بوك
تويتر
انستقرام
يوتيوب
بنتيريست