|
|
 العاصمة المظلطة!
|
مقدمة..
الحمدلله الذي جعل من العشش حي النزهة وقوّم فيها عمارات وشقق تتوفر فيها حمامات الجاكوزي!!
وبعد..
العاصمة المثلثة وفي أي مصلص مجموع طول أي ضلعين أطول من الثالث..ومن ضلوع العاصمة الأصيلة احياء "مايو" و"كرتون كسلا" حيث كوارع الجداد وجبة متداولة..
من عجائب الأقدار أن تتحول كماين الجريف شرق الى "المنشية شرق" حيث تقاس بالمتر المربع المدولر..وأن تصبح أغلى وأكبر فلل العاصمة المثلثة في "كافوري" وتفصلها شارع عن "العزبة".
ومن اجمل ما قيل في اطراف الامبدات وسوق ليبيا أن احياء يباع فيها المعجون بالقطاعي والتسويكة الواحدة بمية جنيه مما تعدون زمان حيث يصحو الرجل باكراً بعد أن سكت "الجنريتر" من الساعة العاشرة وقد ظل من المغارب يقول تك..تك..تك..تك..تك والحافلات الروزة جاهزة بعد السواك والنفر "للعربي" بجنيه واحد بس.
ومن اللطائف في حقيقة احمر الشفائف أن محلات "الأقباط" اعظم التجار على مر التاريخ الحديث يلمعون زجاج محلاتهم في "نمرة اتنين" حيث يبيعون فيها "الفاظة" المقعرة الواحدة بمليون جنيه مما تعدون في زمنكم الغابر القديم هؤلاء يلمعون الزجاج بورق جرائد؟!! سبحان الله..والسيارات "الأودي" و "الهاامر" تمر جنباً الى جنب هناك مع تكاسي "الفور أو فور"! جرائد..
ونقول..ما اجمل شارع "عبيد ختم" حينما تمخر عبابه مواصلات قادمة من "مايو" وذاهبة الى "الحاج يوسف" وبالعكسسس حينما يمر أفرادها بمطاعم "كودو" وحدائق شركة "كنانة" ذات النوافير. أو حينما تمر روزة "المجاهدين" تحت نفق شارع المطار المهيب قبالة "الروطانة سلام" وتنعكس الاضواء على زجاجها في جمال متناهي.
يا من اشتروا في "مخطط النخيل" ومن قال أن "ام ضواً بان" حيث القرآن وليالي الذكر ، وأن العيلفون حيث أرقى واجمل السكان لا يعدونكم من الداقسين فمن قال أن "النخيل" تبعد من اقرب كوبري خمسطون وعشرون دقيقتن كان يقصد بالسيارة "الرينو" والتي يقودها "الونزو" في سباق الفورمولا
يا سكان أحياء "جبرة" و"أبو آدم" انتم من الاحياء الراقية والدليل البعوض الذي ينهش فيكم فهو بعوضٌ بالمناسبة لا ينقل الملاريا ويكرم الضيف ويجعل المصلين في صلاة المغرب يصفقون في صلاتهم فلا يسمعون الامام ولا يطربون بصوت البعوض في الأذن..نسأل الله أن يجعلهم من المقبولين..آآآآآآآآآآآآآآآآآآمين
اعلم أن دهشتنا ستزول وأن حيرتنا ستنتهي حينما نعلم كم طائرة محملة بالمصلصين تحط بهم يومياً في مطار "دبي" حيث ينظرون بعيد لبعيد وبعين الجرادة لافتتاح "اطلانطس"!!.. ويعتبرون أن كل ما يحدث هنا من تصليص عادي بالزبادي البلدي البي الرطل.
|
|
 
|
|
|
|
|
|
|
|
Re: العاصمة المظلطة! (Re: محمد يوسف الزين)
|
وانا في موقف الاستاد..
والجوع ضاربني ضربة عجيبة ، ما غطى على كوارك بطني الا صوت الابنصات. نعععععننننننن..نعّن نعّن..نعععععععععن..المهم..راجيني مشوار بتاع مجاملة..واحد والدتو ربنا ياخد بيدها عملو ليها عملية في واحدة مستشفيات أم درمان ، فسريع سريع وبعدين نرجع...أيوااااه ياهو زاتو.
وقبل ما أتلب في واحدة من الحافلات قلت ياخي ناكل لينا اي حاجة ان شاءالله بسكويت كابتن ماجد ، بركت الجيب لقيتو فاضي. مشيت صراف قريب وصرفت لي خمسين جنيه ، بتأكلني وتوصلني وبتشتري لي علبة حلاوة محترمة لزوم الزيارة ، وبتجيب حق اللبن بعدين ،
المهم..
لفيت لف الجن وما اقنعتني حتة اكل منها ، المطاعم كلها الفي المنطقة المباركة دي ما شاءالله عليها ، كل ذرات الغبار والعوادم ، بعدين تحت تحت واحد قال لي اوعك من الشاورما الفي المطاعم دي لأنو الجداد بتاعهم .... واللحمة كذلكا ..... ، وأووعك من البرقر كمنجا لأنو كذلكا ..... وزيت الطعمية برضو كذلكا ....... ، وقالو لو الزول القاعد في الكانون سفتو وقعت في الصاج عااااااادي بلخها ليك في الزيت.
ثم أن الأكل برة البيت أصبح من المكروهات التي ترقى الى المحرمات عند حكومتنا الموقرة.
المهم...
تلبت ليك في الحافلة الماشة الموردة ، على حسب الكمساري الذي كورك .. الموردة الموردة
المهم..
اول حاجة لاحظت ليها والحافلة متوجهة صوب الكوبري وبعد الأعععععن أعععععععنننن ، انو الناس كلها صارة ، بعد شوية كدة حسيت بحاجة بتفرفر في كرعيني ، بسم الله..وأعوذ بالله من الشيطان الرجيم ، أعاين تحت..القى ليك "عتوت" في رواية أخرى "عمبلوق" وفي أخرى "سخل" وفي أخرى "ابن الماعز" وهذا المذكور بفرفر في كراعي وبعد شوية انفجر ليك بالكوراك.
اتجاوزت الموضوع دا وعملت نايم ،
المهم..
ونحن في شارع الأربعين طقطق الكمساري
طلعت فكة حديد وأديتو
قال لي..دا شنو؟ النفر بألفين
يا راجل..صاح انا طولت لكن ما بتكون حصلت
فجأة كدا طقت لي وسألتو..انتو الحافلة دي ماشة وين؟
وبصوت واحد جهوري جداً شاركو فيهو كل الناس الصاريين..
"بورندي"
بورندي؟ اتذكرت ليك طوالي جريدة قون والمنتخب الوطني والنقل الاذاعي الحي والحاجات دي.
- ياخي كمساريكم دا قال موردة.
- لا لأ
- وبورندي دي وين؟
- شيفت شارئ سوق ليبيا؟ نأم..أها بيغادي لأنقولا
- يا راجل؟! خلاص نزلوني وهاك دي الالفين وربنا يوصلكم بالسلامة.
ما يستفاد من القصة...
- أخوك لمن تحنسو يسوقك بالعربية مشوار ويقول ليك مافي طريقة نط ليهو في حلقو ، لازم يوديك.
- مافي داعي تطلع من البيت بدون فطور وتعمل فيها مستعجل.
- دوس يازول أي حاجة ، لأنو الجوع حيخليك تسمع "موردة" بدل "بورندي".
- لازم تتعلم كيف تخلي "العتان(جمع عتوت)" تسكت ، الزمن ما مضمون.
- ناس بورندي ديل ناس صارين وشهم طوالي.
- مافي زول مفتح ومقطعها ، عاااادي ممكن تطلع وهم ساكت.
- مافي داعي تفتح علبة الشكولاتة الاشتريتها لناس صاحبك في المستشفى وتاكل منها قبل ما تصل ، حتى لو جعان لازم توصلها وهي مقفولة.
وطيب
| |
|
|
|
|
|
|
| |
محمد يوسف الزين
فيس بوك
تويتر
انستقرام
يوتيوب
بنتيريست