4 4 2 تحتاج للياقة يا دو سانتوس .. واللاعب السوداني لا يهضم طريقة اللعب سريعاً .. هنالك بطء في الحركة والتحول من الدفاع للهجوم والوقت لا يسمح .. الهلال بدون أطراف .. وأمولادي لا يشبه الهلال وحسرتنا فيك كبيرة يا يوسف هوت .. عمار مرق أكد أن الشجر الكبار فيهو الصمغ .. ديمبا لاعب عملاق .. وأمبيلي خطير خطير ولكن .. كواريزما مكانه الوسط .. وسيف مساوي رجعوهو الجريف ولا علاقة لأحمد عادل بكرة القدم ..
03-03-2009, 06:50 AM
haroon diyab haroon diyab
تاريخ التسجيل: 06-20-2007
مجموع المشاركات: 23215
ما عندنا مشكلة في انو كلاتشي لعاب .. بس قالو الكاش بقلل النقاش .. وهسي الزول دا ماخد الحكاية تحدي ما لعب .. والمباريات الصعبة جايه .. ونحن من المنتظرين ..
03-03-2009, 07:09 AM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
تحية للجميع .. للأسف ضاع هذا البوست في الهجمة الأخيرة للهكر وضاعت معه الكثير من الردود مما أخل بشكله .. الحمد لله حفظت البوست في آخر لحظة ولكن صعب نقله هنا إلا عن طريق الكوبي بيست .. أعتذر للجميع وأكرر شكري وتقديري لكم ..
03-14-2009, 03:32 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
Quote: صاحبي دة بكون بضحك من المغسة والله مريخ المؤتمر دة عجيب
الغايظني بالجد حركات حافظ الزول دة زمن شوط اضافي كامل كان لاعب من (مراقدهم)
ـــــــــــ
مراقدهم يعني راقد نظام بضيع في الزمن
ردنا لخضر حسين ..
المغسني اليوم يمغسه بكره صاحبي دا ..
قبل كده لما قلنا أكرم الهادي ممثل كبير قالو دي كورة .. ولما جات فينا ساوونا مع الأمل سيم سيم .. بالله حافظ دا أمس ما ظهره عامله .. حتى شوف صاحبنا المشجع الصحفي دا كتب شنو ..
Quote: * وفريق يكتفي بالخندقة (كما قال قاقارين) .. والدفاع غير المنظم.. وتطفيش الكرة.. ويلغي خط الوسط.. ويستغل هجمة مرتدة ليسجل قبل أن يعود إلى الخندقة من جديد ويتفنن لاعبوه في السقوط أرضاً لإهدار الزمن! * السيناريو مكرر.. حتى في توقيت هدف التعادل! * الدعيع مثل بيومي.. ادعى الإصابة لتكسير الزمن.. أمولادي مثل الفكي.. سقط أرضاً مرتين بلا سبب!
صباح الخير .. وهاردلك لكن يا معتصم .. دحين ما ظلمت الولد دا
وبعدين زولنا داك اصبح بخير والا الحاصل عليهو شنو ؟
وكان ردنا ..
الله يصبحك بالخير يا علي .. ومبروك عليكم الكأس ..
ياخي أنا من زمان عندي رأي في سيف مساويك دا .. الزول دا ما بعرف يطلع باص صاح وكل الفرص المفروض يعكسها صاح في المرمى بتمشي غلط .. بعد خروج علاء يوسف بالبطاقة الحمراء المفروض هو يقوم بدور اللاعب المحور ودي الخبرةالميدانية .. لكن كل الكرات الإتقطعت منه شكلت هجمات خطيرة على مرمانا .. وحتى الفاول الإرتكبه مع كلاتشي بنفس الطريقة التي إتركبها في مباراة أنيمبا وأدت لطرده .. متين نعرف كورة وخطط وطرق لعب .. الإحترافية يا عالم ..
والله صاحبي داك بكون لي هسي ما داوم من المغسة ..
03-14-2009, 03:53 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
المشكلة في المطبلاتية وحارقي البخور عشان جرائدهم ما تبور .. ديل نعمل فيهم شنو ؟.. والله نحن واقعيين أكتر من اللزوم زاتو وعارفيه الكورة غالب ومغلوب .. لكن البقنع لينا أحمد عادل إنو كورة الحلة دي هنا ما بتنفع منو ؟..
أبقى طيب يا حبيب ..
03-14-2009, 04:05 PM
ismeil abbas ismeil abbas
تاريخ التسجيل: 02-17-2007
مجموع المشاركات: 10789
لون دمك ازرق زى لونى.....نعم من ما قمناالهلال يظهر ويغيب ويصبح بدرآ....الهلال يا هو الهلال..نحبه نعشقه..وسيظل فى القلب كما هو........مودتى..إسماعيل محمد احمد عباس...
عارفك أم رقيقة..وقاعد اكتر ليك فى كلمة مودة.أخ انا من الم الفراق...
الهلال دا جزء مهم جداً في حياتنا نعشقه ونهواه .. وأكيد ح يعود أقوى كما عهدناه .. اليوم يبدأ الفريق مشواره الأفريقي مع بطل جزيرة رينيون .. وبإذن الله سيتخطى هذا الدور ويصعد لدور الـ16 والثمانية الأبطال ومن ثم الكأس وعشمنا كبير في أولادنا ..
قلت لي أم رقيقة الشوية دي ياخ والله أخوك قاعد على الهبشة والأعصاب بايظة هنا وهناك ..
أبقى طيب يا حبيب ..
03-14-2009, 04:10 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
Quote: معتصم الهلال يشبه الكبار لذلك حتى عندما يسقط يسقط معهم في الأسبوع الماضي هزم برشلونة وفالنسيا وليفربول و خرج ميلان من كأس الإتحادالأوربي و هزم الترجي بالثلاثة و تعادل الأهلي المصري بطلوع الروح مع فريق مغمور. الفوز و الهزيمة في كرة القدم متلازمان لا يوجد فوز بدون خسارة و لا توجد خسارة بدون فوز
هاردلك للهلال و مبروك للمريخ
ردنا على خالد ..
لكن البقنع الوصيف منو يا خالد .. يوم السبت حضرت مباراة لا روما والإنتر ياخي كانت متعبة حقيقية وقبلها حضرت برشلونة الكان متصدر بفارق 12 نقطة من الريال والآن أصبح الفارق 4 نقاط فقط مع فريق أتليتكو مدريد والتي إنهزم فيها برشلونة وقبلها تعادل مرتين وإنهزم في واحدة .. الكورة مدورة يا خالد .. اليوم غالب وبكره مغلوب ونحن ما بنخاف على فريق في قامة الهلال سيد البلد .. وأكيد القادم أحلى والمحك الحقيقي في دوري الأبطال واليي نخبر دوربه جيداً ..
أبقى طيب يا حبيب ..
03-14-2009, 04:04 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
كفاية تضليل يا اعلام الهلال .. واللعب على صفحات الجرائد .. الهلال فريق كبير وليس فريق للاعبين .. شبكتو الناس روني وإيتو وفييرا ومين ومين .. والفرق بين السماء والواطـة ..
علاء الدين يوسف أنت لاعب كبير .. بطل لعب الحواري وكورة الحلة دي .. الهلال أحوج لمجهوداتك والزعل دا هناك في البيت .. فرّق بين الغيرة على الشعار والحماقة .. والهلال فريق كبير يحتاج للاعبين مش مصارعين ..
03-14-2009, 04:27 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
Quote: إن شاء الله تكونو بتجيدو فن السباحة لأن السد خطر ..
والله انتو يا الصهاينة ما بتريحو خالص .. شوف الرسالة دي جاتني امس قبل المباراة ..
سمؤال يا صحاب .. مشتاقين كتير والله .. ومبروك عليكم الكأس .. بس ما تفرحوا كتير .. بيت المال دا بنلحقكم ليهو .. والحنية دي ماخدنها منكم يا حبيب ( ههههههههه ) ..
كن بخير ..
03-14-2009, 04:34 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
انتو كان رجال العبوا وجيبو الغلب لكن حتظلو تجرو وره الهلال وتسجلو في اللاعبين ومحتمل السنة الجايه تسجلوا كوارزما زي ما جريتو وره قودوين وعمر بخيت.
عليك الله تقدر تقول العجب مالو ما لعب ومالو وارغو قطع في اول نص ساعة.
للمعلومية الشايل مريخكم امبارح كان كلتشي يله وريني جاب الخبرة ده من وين
الهلال لسه كبير
ردنا ..
خال العيال .. ياخي حقو نشكر الهلال الجابك لينا الليلة .. سلام وسلام شديد يا حبيب ..
سيظل الهلال كبير وسيد البلد .. ويبقى المريخ ندنا التقليدي البشيل مننا لعيبتنا ( هههههه ) .. عشان يجو يغلبونا .. كلاتشي قدم مباراة كبيرة وللأسف في المرتين الأحرز فيها أهداف كان خالي من الرقابة .. المفروض كان تكون هناك تغطية كامله له فهو لاعب ماكر ويحرز متى ما سنحت له الفرصة ..
كن بخير ..
03-14-2009, 04:47 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
صدقني ..سيظل يعاني هلالنا من مجزرة الشطب الأخيرة لخط دفاعه
ردنا ..
تحياتي ناصر ..
الهلال يمرض ولا يموت .. أذكر بعد مجزرة هلال 92 عانى الفريق معاناً شديدة حتى إسترد عافيته .. ياها دي حال الكرة لا يخلد فيها لاعب ومشكلة اللاعب السوداني عمره قصير في الملاعب .. لو جينا بحسبة بسيطة .. عمار كان أساسي وبسبب خطاءه في مباراة الأهلي المصري جلس في كنبة الإحتياطي فترة طويلة وهاهو يسترد عافيته .. ديمبا لاعب كبير وحل محل ريتشارد تماماً وداريوكان ليس كان أقل أخطاء من مرق .. النقص هو في أطراف الملعب والتي فقدنا فيها يوسف هوت وأثر ذلك على لعب الهلال كثيراً .. الطرف الشمال ولفترة طويلة لم يشغلها لاعب بمواصفات تنقا ومحمد حمدان وكنا نعاني منها فترة طويلة من الزمن وأمولادي لا يصلح لها وعلى مدرب الفريق أيجاد بديل له .. هناك لاعبين في عمق الدفاع يمكن أن يكونو بدلاء ناجحين أمثال سامي عبدالله وأسامة التعاون .. وعلى المدرب أيجاد بدلاء لأطراف الملعب وهي العلة الرئيسية الآن في الفريق ..
كن بخير ..
03-14-2009, 04:59 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
Quote: معتصم هارد لك بصراحة المريخ يستاهل الكأس والهلال لا يستحق حتى التعادل
ردنا ..
تحياتي إيمو .. ولا يهمك يا حبيب الكورة غالب ومغلوب .. الهلال ليس بالسئ لكن يحتاج لفترة طويلة حتى يتأقلم لاعبوهو الجدد مع القدامى .. وحتى يهضموا طريقة اللعب الجديدة 4 4 2 والتي لم يلعبوها منذ فترة طويلة .. ودا ناتج عن تغيير المدربين الكثير وكل واحد يجي بطريقة لعب جديدة ومدرسة مختلفة .. واللاعب السوداني يلعب بمزاجية عاليه وبعيداً عن الإحترافية ..
يلا ما علينا إلا أن نصبر .. ونحبك يا هلال رغم كل شئ ..
لك الود ..
03-14-2009, 05:08 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
Quote: دقت يا معتصم (الهلال) الشايفو ده سااااااااااااااااااهل بالحيل لكن كليتشي كان ليهو فضل وصول الهلال لمراحل متقدمة في دوري الابطال السنتين الماضيتين وان شاء الله حا يكون له فضل مع جوقة النجوم الموجودة الآن في الزعيم في الوصول لنهائي كاس افريقيا والفوز به والذهاب الى ابو ظبي .
هلالكم تعبااااااااااااااااان يا معتصم .. والله جد .
معتصم دفع الله والله مشتاق ليك جدا جدا جدا وحاولت كتيييير اكلمك في تلفونك وطوالي مقفول اذا غيرتو ادينا الجديد.
ردنا ..
يا ريت يا أمير تشيلو الكأس وتمشو أبوظبي .. انت قايل الكلام دا بزعلنا بالعكس ياخي نحن والله المحلية دي دمرتنا .. وخلت كورتنا في الواطـة .. عايزين تنافس شريف يخدم الكرة السودانية ويتيح لفرق الممتاز المنافسة واللعب خارجياً .. ضعف الهلال في ضعف المريخ وقوته في قوة المريخ .. ولما يكون الفريقان في المنافسة الأفريقة بديهم دافع وقوة للمضي قدماً في منافستها .. خلونا نتناكف هنا في محلينا دا ولكن خارجياً نكون في عظمة الوطن .. لأن الهلال والمريخ هما الوطن ..
كيفك يا أمير .. والله نحن شوقنا أكتر .. أنا ما طولت من جيت وتلفوني نفس العندك .. تحياتي الكتار لك وللأولاد ..
محبتي التي تعلم ..
03-14-2009, 05:25 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
Quote: ياخي أنا من زمان عندي رأي في سيف مساويك دا .. الزول دا ما بعرف يطلع باص صاح وكل الفرص المفروض يعكسها صاح في المرمى بتمشي غلط .. بعد خروج علاء يوسف بالبطاقة الحمراء المفروض هو يقوم بدور اللاعب المحور ودي الخبرةالميدانية .. لكن كل الكرات الإتقطعت منه شكلت هجمات خطيرة على مرمانا .. وحتى الفاول الإرتكبه مع كلاتشي بنفس الطريقة التي إتركبها في مباراة أنيمبا وأدت لطرده .. متين نعرف كورة وخطط وطرق لعب .. الإحترافية يا عالم ..
تعرف يا معتصم
مساوى دا اكتر لاعب بيخوفنى فى الهلال فى مباريات هلال مريخ بس لمن الهلال بيخرمج مساوى بيخرمج .. كدى ارجع وراء شويه واتذكر مستوى مساوى مع المنتخب ومع الهلال تلقاهو كان حاجه روعه جدا ..
غايتو لو ماعاوزنو ادونا ليهو بندوزنه من جديد ونعيدو للخدمه كما فعلنا مع هيثم طمبل احتياطى كلتشى وكما فعلنا مع كلتشى ظاطو القلتوا كعب والفيهو كملت ..
وبعدين تعال اقول ليك حاجه فنيه على قدر معرفتى البسيطه فى الكوره ..
طبعا الشطب والاحلال تم بقرارات اداريه فى الهلال وليس بنظره فنيه وذهب كلتشى وحل بدلا عنه كوارزما وبراك شفن الفرق وذهب يوسف محمد زحل بدلا عنه خليفه المشطوب من فريقه لسوء السلوك وذهب علاء جبريل وكرنقو وحل بدلا عنهما ام اولادى الخ الخ ..
المهم الان الهلال لديه لاعبين جدد بنسبة 40% من التشكيل الاساسى ويحتاجون للانسجام وتقديم مستويات جيده الى وقت ليس بالقليل مع وجود خامات جيده يعنى مثلا عمار مرق اثبت انه كان مظلوم وقدم فى مباريتى المريخ مستوى جيد جدا وخاصه فى مباراة السد وبجانبه ديمبا بالى المالى والذى قدم نفسه بقوه وهناك ايضا امبيلى صاحب الطاقه الجباره والمجهود الوافر فقط تنقصه اللمسه الاخيره فهذا اللاعب ورغم لياقته العاليه والتحاماته القويه وامكانياته فى المحاوره الا انه يلعب جيدا خارج خط ال 18 ويفقد البوصله بمجرد دخوله لل 18 ودا شئ عجيب وغريب لاحظته انا فيهو وقد توافقنى او لا توافقنى ولكنها نظرتى المتواضعه ويمكن مرد ذلك الى تواجده فى هجوم الهلال وحيدا ودون دعم من المحترف البطئ جدا كوارزما وكان يحتاج امبيلى الى راس حربه اخر اكثر سرعه وحيويه حتى يرتاح هو ويتفرغ لاحراز الاهداف لانو امبيلى لمن يحاور ويناور ويتلفت بيكون كوارزما فى امبده منتظر الرقشه
غير ذلك وفى ظل فشل اطراف الهلال فشلا زريعا كان على الجهاز الفنى ان يغير خطة اللعب من 4/4/2 الى 3/5/2 والتى تتناسب تماما مع شكل الهلال الحالى والذى يعانى من اطرافه
غايتو دا رايى انا ..
03-14-2009, 05:34 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
بالعكس يا علي كلام جميل بس في بعض الحاجات خلينا نتناقش فيها .. انت قايل الفرق بينا وبين المطبلاتيةالعاملين صحفيين شنو .. ديل بكتبوا من مدرجات المشجعين بدون صحافة .. ونحن بنكتب من مدرجات المشجعين وعينا على الصحافة ..
مساوي دا مثال للاعب السوداني يعني يوم في السماء ويوم في الواطـة .. وبعدين ما ممكن لاعب ما يطلع ليهو باص واحدة صاح في المباراة دا لاعب شنو .. كثير من المدربين يقولو ليك مساوي دا لاعب مهام .. أها مباراة الأمس دي مباراة المهام وكان يمكنه أن يعيد توازن خط الوسط ويقوم بعملية الربط بينه والدفاع .. لكن لم نرى ذلك بل كل أخطاء مساوي كادت أن تتسبب في أهداف عكسية على مرمانا ..
Quote: وبعدين تعال اقول ليك حاجه فنيه على قدر معرفتى البسيطه فى الكوره ..
قبل كده ما حاولتو .. ياخي انتو عايزين تحولو الهلال كله المريخ .. طيب نحن نلعب ليكم بي شنو ( هههههه ) ..
معاك انو عملية الشطب والتسجيل في فرقنا بتكون بأمر من الإدارة وليست للأجهزة الفنية يد فيها .. يوسف محمد ذهب بعد أن وقع عقد مع فريق سيون الفرنسي ولم يشطبه الهلال وكلاتشي كذلك قبض قروش من بدري وسردب بيها وما كان ح يلعب تاني في الهلال طالما هناك الكاش البقلل النقاش ( دا كلام كبير المشجعين مزمل أبوالقاسم ) .. وداريوكان عمل نفس طريقة يوسف محمد .. أما ريتشارد وعلاء الدين كانا أكثر إصابة في الموسمين الماضيين وما كان ممكن يلعبا تاني بنفس روحهم السابقة .. بالنسبة لكرنقو أنا ما عارف الحصل للزول دا شنو .. من بعد مباراة الهلال والأهلي القاهري ظن أنه بقى كبير على الهلال ولا كبير على الهلال على الإطلاق .. لذلك كثر غيابه ونحن بنسميها زوغانه والسبب يمكن الصهاينة فاوضوهو ( ههههه ) .. بعدين أصلاً العلة كانت في خط دفاع الهلال ودا منذ فترة ليست بالقصيرة وكل نتائجه السلبية كانت عبره ..
نعم أتفق معك في حوجة الهلال للإنسجام وزي ما قلت أن الفريق بدل 40% من جلده ودا ما بيأتي بين يوم وليلة .. يعني محتاج لعمل كبير من الجهاز الفني ووقفة أكبر من إدارة وجمهور الهلال .. بالنسبة لعمار وديمبا يقدمان مستوى طيب في دفاع الفريق ولكن تكمن العلة في أطرافه ولابد من معالجتها بسرعة لأنها أصبحت واضحة وأضرت به كثيراً .. لو رجعت لملاحظاتي فوق كنت وجدت بعض ما ذكرت هنا وخصوصاً عن أمبيلي ( وضعت كلمة لكن دي جنبه ) .. هذا اللاعب خطير ومخيف فقط يحتاج لبعض الإنسجام مع زملائه عند التمرير وتهيئة الفرص وكذلك مواجهة المرمى وإحراز الأهداف لو فعل ذلك سيكون له شأن كبير مع الفريق .. نعم كلامك صحيح عن أمبيلي وكان ممكن أن يلعب أي رأس حربة آخر بجانبه مع !! رجوع كواريزما لخط الوسط هذا اللاعب يجيد الإستلام والتمرير المريح حين يعلب في الوسط ويكون عبيئاً في خط الهجوم لأنه يسهل مراقبته والحد من خطورته وعلى الجهاز الفني مراعاة هذا الشئ .. طرق اللعب ليس فيها إختلاف كبير أخي علي ولكن إستيعاب اللاعب السوداني لها ضعيف .. وما تنسى أن لاعبينا بتاعين كورة حلة ساي ( بكسر الحا ) قاعدين يتمو الباقي موية .. كل العالم الآن أصبح يلعب بلا مركزية مع تنويع طرق اللعب في فترات متفاوته من المباراة دا لأن اللاعبين هاضمين طرق اللعب بإحترافية عاليه وفكر كروي متقدم عكسنا نحن ناس قريحتي راحت .. كورة الباكات دي انتهت زماااان وناس ( الكورة دي موت موت حياة حياة ) انتهت .. قد يحتاج المدرب البرازيلي لتغيير خططه في الفترة القادمة ودا ناتج للضعف الواضح في أطراف الهلال وشاهدناه يقوم بتغيير بعض اللعيبة للعب في هذه الخانة .. ودا بضيع عليه مجهود كبير يقوم به وهذا المدرب شاطر وقدير بس يحتاج لبعض الوقت ..
Quote: غايتو دا رايى انا ..
ياخي دا رأي جميل .. يا ريت يا ريت يا علي بعد أن ننتهي من المناكفات في كل مباراة ويا ريت تكون المحلية فقط .. نجي نحلل مبارياتنا بطريقة كويسه زي دي عشان نطلع بفائدة وتجد من يتلقاها هناك لعل وعسى يستفيدو منها ..
يديك العافية يا حبيب .. خليتني أتفش وأجي أكتب الكلام دا كلو وأنا لي زمن ما كتبت قدر دا الغلب حار ياخ ..
03-14-2009, 05:42 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
Quote: طرق اللعب ليس فيها إختلاف كبير أخي علي ولكن إستيعاب اللاعب السوداني لها ضعيف ..
ح ابدا ليك من اخر كلامك يا معتصم اولا يا معتصم 4/4/2 ابتكروها الالمان فى كاس العالم 82 زى ما بيقولوا الخبراء وذلك لانو كانت الفرق المنافسه ليهم بتتميز بقوة خط هجومها وعشان يحصل توازن بين قوة هجوم الخصم ودفاع الالمان تم ابتكار هذه الطريقه للعب وهى كما هو معلوم تتكون من اربعه مدافعين واربعه لاعبى وسط يشكلون وحده متكامله ويمتلكون طول وعرض الملعب ولاتستطيع الوصول الى مرماهم الا بتخطى ثمانيه لاعبين اشداء ومعلوم طبعا ان تنفيزها يحتاج الى عناصر قويه ومرنه فى نفس الوقت وهذا لا يتوفر للهلال فى الوقت الحالى انما كان يتوفر فى العام السابق والذى قبله بوجود رتشارد وداريوكان وعلاء جبريل ويوسف محمد وامامهم عمر بخيت وحموده وهيثم ومساوى
اما 3/5/2 يا معتصم تتيح لديمبا ان يكون هو اقرب لاعب للدعيع بينما يراقب عن كثب مرق فى الناحيه اليسار الاقرب للظهير وان يراقب اسامه التعاون مثلا والذى هو اقرب للظهير الايمن ويشكلون ثلاثتهم مثلث دفاعى امام الدعيع بينما يمتلك الوسط خمسه من لاعبى الهلال يدعمون المهجمين عند الهجمه ويصير عددهم سبعه امام مرمى الخصم وعند التراجع يدعمون الدفاع ويصير عدد مدافعى الهلال ثمانيه على اقل تقدير هذا اذا مالم يتراجع هيثم اوامبيلى او كوارزيما ليزيدوا عدد المدافعين الى تسعه
وبهكذا طريقه سيتخلص الهلال من حكاية الاطراف المقصوصه وانكشاف دفاعه فى اول هجمه منظمه وارتباك مرق وديمبا ما بين تغطية اخطاء وبطء المساكين ومهامهم الاساسيه فى المراقبة والالتحام مع المهاجمين وهذا ماكان واضحا فى مباراتى الهلال ضد المريخ وهى كانت من الاسباب الاساسيه فى ظهور الهلال ضعيفا ومفككا ومختلفا عن هلال 2007 وهلال 2008 الى حد ما
بعكس ذلك تجد ان خطة اللعب 4/4/2 تناسب المريخ تماما لوجود عناصر يمكنها الى حد ما اجادة هذه الطريقه بصوره مقبوله واذا اخزنا بله جابر وموسى الزومه مثالا سنجد ان بله يهاجم على جانب الخصم اليسار ومن جانب المريخ الايمن وبمسانده من احد وسط المريخ الهجومى ونزول واحد من روسين الحربه ليجعل شكل الهجمه تتكون من ثلاثه لاعبين وكمثال بتجد الكوره عند بله وبيسانده وقريب منو قلق وبينزل ليهو وارغو ونفس الشئ فى اليسار الهجمه بيقودها موسى الزومه وبيسانده العجب وبينزل ليهو كلتشى ومرات كتيره بتلقى الشغيل فى المسانده او لاسانا فى الجمبتين وبالتناوب
عشان كدا فى المباريتين السابقتين بين الهلال والمريخ كان بتجد انو محاور الهلال بتلتزم بالجانب الدفاعى لتغطية الضعف الواضح فى الاطراف مع انشغال مرق وديمبا كذلك بهذا الامر لتجد انو عدد مدافعى الهلال سته طوال وقت المباراه .. طيب الفضل كم من لاعبى الهلال اذا ما اضفنا للعدد الحارس الدعيع .. بيكون الباقى اربعه واذا خصمنا كوارزما البطئ بسبب زياده حجمه والذى لم يكن يستطيع ان يساند الدفاع او يقوم بواجبه الهجومى وبرضو للبطء الواضح فيه .. يبقى الباقى ثلاثه لاعبين اتنين وسط وامبيلى اذا كيف كان سيهاجم الهلال ويحرز اهداف فى ظل هذا الوضع وكيف كان اصلا سيلعب الهلال ويظهر بشكل افضل بهكذا وضع ؟ وماذا سيفعل ثلاثه لاعبين امام اربعه مدافعين وخمسه لاعبى وسط عندما ينزل كلتشى للوسط ليدعم خط وسط فريقه ليصبح عددهم الاجمالى تسعه ؟
دى وجهة نظرى المتواضعه يا معتصم فى خطط اللعب التى ينتهجها فريقى الهلال والمريخ وكدى فكر فيها وشوف شكل دفاع الهلال كان كيف فى ظل وجود امولادى وخليفه كمدافعين الان وشكله سابقا فى وجود يوسف محمد وعلاء جبريل واذا ما وضعنا مسألة دفاعهم جانبا وتزكرنا طريقتهم الهجوميه على اطراف الملعب لتزكرنا انهم كانوا بيضغطوا على الخصم ويجبروهو على التراجع لحماية منطقته خوفا من الاهداف .. والهجوم اخر شئ يفكر فيهو الخصم واتزكر الاهلى والترجى واسيك والزمالك وعييك واتزكر انهم كانوا بيصنعوا الاهداف وبعد دا كلوا كانوا بيرجعوا يدافعوا
واذا ما اصر دى سانتوس على 4/4/2 لماذا لم يولف لها لاعبين جدد غير القاعد يشتغل فيهم ديل كحقل تجارب وفى فتره ابكر من ذلك حتى يدخل للموسم والهلال قد وصل للتشكيله المناسبه والشكل الامثل
وبجيك صادى ..
03-14-2009, 05:48 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
تمام يا علي .. وعلى ما أعتقد إن لم تخني الذاكرة هذه الطريقة أدخلها للسودان المدرب اليوغسلافي ميرسلاف في نهاية الثمانينات من القرن الماضي حينما كان يدرب فريق الهلال وبعدها إنتشرت في باقي الفرق .. أنا هنا لا أتكلم عن طريقة معينة زي ما ذكرت ليك قبل كده لكن الواضح الآن في كرةالقدم لا تعتمد على طريقة لعب واحدة لأن الطرق والخطط تتغير داخل الميدان لإحترافية اللاعبين وخبرة مدربيهم .. لو شاهدت أي مباراة في الدوريات العالمية وخصوصاً الأوربية تجد كل هذا ظاهراً .. نقل الكرة من الدفاع للوسط ومن ثم الهجوم بحركة مميزة وبشكل سلس ولامركزية في اللعب تكون بصورة واضحة .. حتى أنك تجد رباعي أو ثلاثي خط الدفاع يساهمون في بناء الهجمات إن لم يكن إحراز أهداف من ضربات ثابتة أو راسية من رأس الكورنر أو متحركة من خارج الخط .. وحتى مسألة التكتل دي ما قاعدين نجدها في مبارياتهم والوسيلة الجبانة في تضييع الزمن ما بنجدها إلا في ملاعبنا لأن خبرتنا ضعيفة وعندنا عدم ثقة في النفس .. نعم طريقة 4 4 2 والتي إنتهجها البرازيلي دي سانتوس ليست غريبة على فرقة الهلال ولكن لم يلعبوها منذ زمن طويل لإعتمادهم على طريقة 3 5 2 وزي ما قلت ليك اللاعب السوداني إستيعابه لطرق اللعب بطئ جداً لأنه لاعب حواري وقاعدين نلعب الكورة زي ما تجي تجي بالعربي كده .. لعبة كرةالقدم عموماً الآن تعتمد إعتماداً كلياً على اللياقة البدنية العالية وتنفيذ خطط اللعب وأكيد تتبعها المهارات الفردية للاعب والموهبة .. ونحن في السودان للاسف إذا وجدت المهارة والموهبة ما بتلقى لياقة ولا بنية جسمانية وإذا وجدت الثانية لن تجد الأولى .. وفي الطريقتين نجد أهمية لاعب الطرف لأنه مكمل لخط الدفاع والوسط ويلعب مهاجم ثالث في حالة الهجمات .. طريقة 3 5 2 كما يسميها مدربنا بابكر عبدالله لاعب الهلال السابق طريقة المثلثات وهي تقفيل اللعب ودا ناتج للزيادة العددية في وسط الملعب وهي اللعب بمحورين ولاعبي الطرف .. وزي ما قلت ليك يمكن لأن فرقة الهلال الجديدة محتاجه لإنسجام وفترة أطول حتى يتأقلموا على بعض وكذلك تنفيذ خطط المدرب فدي محتاجة لفترة ليست بالقصيرة .. الهلال يحتاج لحل مشكلة الأطراف وليست في طرق اللعب وصدقني يا علي لو وجدنا لاعبين مثل يوسف محمد في الأطراف لن تواجه الهلال أي مشكلة .. أوريك ليه المريخ أفضل من الهلال لأنه يمتلك منطقة الوسط ويلعب بثلاثة محاور تساعد طرفي الجنب في حالة الدفاع أو الهجوم لذلك لا تظهر عيوب بله جابر وموسى الزومة كثيراً ولو أني أرى أنهما الأضعف في المريخ بالإضافة لحراسة المرمى ومرات العددية الزائدة في خط الوسط قد تكون خصماً عليهم .. ولك أن تنظر أخي علي لهذه العلة بنظرة فنية ستجدها ظاهرة زيادة على ذلك وفرة هجوم المريخ وخطورة لاعبيه ودي ما بنكرها إلا مكابر ودي برضو إنعكست عليهم بتضييع اسهل الفرص بالشفقة ومحاولة اللاعب التسجيل بنفسه دون إتاحة الفرصة للزميل المريح .. يمكن لأن هجوم المريخ والعددية الكبيرة في خط الوسط تغطي على عيوب المريخ في دفاعه .. والطريقة دي اللهي 3 6 1 إنتهجها أتوفيستر الألماني وأخذها من بعده مازدا ثم كروجر ولو لاحظت كثيراً ما نجد أن هنالك مهاجم واحد صريح في خط هجوم المريخ مع رجوع أحد رأسي الحربة المكمل لخط الوسط .. المهم فنياً نقدر نقول المريخ أكثر جاهزية من الهلال والفريقين مقبلان على بطولة هامة يجب عليهم الإستعداد لها وعدم الركون لمباريات هلال مريخ والتي تعتبر بطولة لحالها وظروفها مختلفه .. وكم كانت هذه المباريات خصماً لاحداهما وسبباً مباشراً لشطب أفضل اللاعبين ..
شكراً يا علي وفي إنتطارك ..
03-14-2009, 06:18 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
Quote: المريخ يحتل المركز الأول عربياً.. الثاني أفريقياً والرابع والثمانين عالمياً.. والهلال في المركز 124*
Quote: كليتشي لعب للهلال 3 سنوات احرز فيها هدفين في مرمى المريخ ولعب مع المريخ ضد الهلال في 3 ايام واحرز هدفين في مرماه ( دي يحسبوها كيف دي!!!!!)
ردي لأمير الجمري ..
يا أمير أنا حكاية تصنيف الفيفا دي ما قاعد أشتغل بيها .. لأنو حاسي كده زي القاعدين يرفعوا من معنوياتنا ( يا ربي الحكومة تكون وصلت هناك ) .. ياخي كتر خيرهم ما قصرو معانا ..
يلا نجي نمسكه واحدة واحدة .. شنو البخلي الفيفا تمنح المريخ هذا التصنيف .. في شهر فبراير دا المريخ لعب في تمهيدي أبطال أفريقيا يعني الـ64 من وراء خالص .. وانت عارف شنو تمهيدي في دوري الأندية الأبطال .. تاني حاجة المريخ لعب ثلاثة مباريات في الدوري السوداني فاز في واحدة وتعادل في إثنين .. هلال بورتسودان وهلال كادوقلي أحسن منه لأنهم جامعين نقاط أكتر منه بل هلال الساحل متصدر الدوري حتى الآن .. يعني مافي حاجة بتخلي الفيفا تصنف المريخ كده من الباب للطاق .. دا مع العلم أن فرق الدوري الأبطال المنافسة الحقيقة لسه ما بدأت .. في تصنيف أكثر لاعبي العالم شعبية كان العجب خامس لاعب في العالم .. والله أنا ضحكت لمن ضحكت على نفسي زاتو .. يعني العجب دا إختاروه ناس اللجان الشعبية ولا كيف .. ياخي نحن اللاعب بتنتهي نجوميته بخروجه من الميدان .. يأكلون الطعام ويمشون الأسواق زي عامة الناس .. بلدنا دي ما فيها شعبية ولا نجومية .. تصدق تزكرة حفلات ندى القلعة أغلى من تزاكر حفلات أبوعركي البخيت .. وبرضو دي شعبية .. وردي ولا ودالأمين لو جو ماشين في السوق ساي ولا الحلة ولا في زول بهببه ليهم .. لكن لما مصطفى قمر يجي الخرطوم الناس بتمسكه هيستريا .. لا وكمان كان جاء ميسي ما عارف ح يحصل شنو في اليوم داك .. من وين الناس دي جابت الشعبية .. قال فيفا قال ..
نجي لي ولدنا كلاتشي .. ياخي الزول دا مغبون ساي وعايز يحلل قروشه في فريقه السابق وعايز يثبت إنه لسه لاعب كبير .. ما عندنا شك في لعب كلاتشي لكن الدوري شغال ودوري الأبطال على وشك البداية الحقيقية .. وهنا ح نعرف الحجم الطبيعي له وهل هو فعلاً بلعب للثأر ولا بلعب عشان هو لعاب .. ياخي الفرص الضيعه كلاتشي وطمبل كانت كفيلة بتسريح لاعبي الهلال وإتجاههم للعب السيجة أو التيوة .. لكن تقول شنو في اعلامنا الضلالي المؤغل في السطحية والإثارة ..
الأخ / معتصم دفع الله سلام يا أستاذ مشتاقين كتير أمنياتي للهلال بتحقيق نتيجة ايجابية مع بطل جزيرة رينيون شوف لي أسم الجزيرة دا صح ( ساقط جغرافيا ) أنت عارف يا وصيفاب أقصد معتصم والله الأيام دي حالتكم تحنن جرسة كتيرة خلاس ولو شفت الجرسة الفي منتداكم تبكي عديل كدا الله يكون عونكم بعدين يا أخوي مساوي دا ما لاعب أساسي وكويس مالك عليه كدا كلامك دا لو سمعوا السيد بتهمو بالتواطؤ مع المريخ أستر الراجل . بعدين صعب جدا على دو سانتوس تغيير طريقة اللعب مباشرةً في المباراة القادمة من 4/4/2 إلى 3/5/2 تغيير الطريقة يحتاج إلى زمن لهضم الطريقة وتجارب ودية بس أنت عارف نحن في المريخ خلينا اللعب بالطرق دي وبقينا نلعب الكرة الشاملة زي البرازيليين والهولنديين يعني عادي تشوف أمير دامر في الهجوم كلتشي في الدفاع دا المريخ علمية ومنهجية ونحن السنة في المريخ يا معتصم شامين لينا ريحة بطولة محمولة جواً ههههههههههههههه أمنياتي يا معتصم أن يتفوق الهلال وأتمنى من أن أشاهد فريقين سودانيين في دوري المجموعات وذلك لرفعة أسم السودان بس يا ريت دو سانتوس يعالج مسألة الأطراف في الفريق وأتمنى أن لا يتدخل الديبة في وضع التشكيلة لأن الديبة مدرب صاحب تصفية حسابات وصدق اللاعب أمبيلي في أخر تصريحات له قال لا يمكن أن أحرز أهداف بدون وجود أطراف فاعلة .
03-14-2009, 06:32 PM
Abdlaziz Eisa Abdlaziz Eisa
تاريخ التسجيل: 02-03-2007
مجموع المشاركات: 22291
انتو الكلام دا بتجيبهو من وين .. وينه هو المجد البناهو المريخ .. ياخي السودان كله ما فيهو مجد كروي يحسب له .. صحيح إنو هنالك تمثيل مشرف إذا كان من الهلال أو المريخ لكنه ليس بمجد .. منتخبنا الكروي آخر مشاركة ليهو كانت في العام 1976م وبعدها في العام السابق وهذه المشاركة تجرع فيها هزائم مخجله ..
وحكاية وصفاء دي أنا رديت عليها فوق .. أما كيفية المحافظة على هذا المجد .. ياخي الهلال والمريخ ديل ( أحمد وحاج أحمد ) رغم إجتهادهما إلا أنهما لن يحققا بطولة أو مجد كما تقول إلا عن طريق الصدفة .. ودي مشكلة كامله عندنا لأن الرياضة ماشه بالبركة بدون تخطيط ولا بنيات أساسية تساعد على نهضة الرياضة في السودان ..
شكراً يا عبدالعزيز لأن كلامك محفز للحديث ..
تحياتي ..
03-15-2009, 09:19 AM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
إزيك يا حسن .. وين الحي بيك .. ليك وحشة يا حبيب ..
لو كنت هلالابي كنت عرفت كل دول أفريقيا ومدنها ( هههه ) لأن فريق الهلال جاب أفريقيا وأدغالها ودك حصونها فاتحاً .. الإسم صحيح يا صاحب ..
بعدين شنو حكاية الوصيفات الشابكننا بيها دي إنتو صدقتو .. الوصافة دي المقصود بيها انتو المريخاب لأنكم خمسة سنين يا حسرة جايين الوصيف .. يبقى كيف نحن وصيفات بالله انتو قاعدين تصدقوا كلام المشجع دا أقصد مزمل أبوالقاسم ..
مافي جرسة ولا حاجة يا حبيب وأنا عضو في منتدانا دا .. بس نحن قاعدين نكتب الحقائق ما قاعدين نغتغت ولا بنكتب الكلام المعسول ..
بالنسبة لمساوي هذا ليس بهجوم وأنا ما عندي معاهو أي عداء ولكن أقول ما أشاهده .. هنالك لاعبين يلعبون في القمة تخدمهم الظروف ويجدون نفسهم نجوم ولكن كورتهم حبة ولا ترقى لمستوى النجومية .. بالله أديني محاسن لهذا المساوي تخليهو لاعب كورة .. ما علينا دا ما موضوعنا .. أما حكاية البيع والتواطؤ دي ما جديدة على الملاعب السودانية وكانت على عينك يا تاجر .. بعدين صحفنا قاعدة تتحدث عن أشياء كلها قد تكون وهمية وتصدقها بعد أن تضخمها وتزيدها موية .. لاحظ لكتابات مزمل أبوالقاسم كلها ( ولدنا) في إشارة لإضعاف معنويات اللاعبين ووضعهم في محل غير ثقة لزعزعة إستقراره بالنادي ..
لو رجعت لردي فوق للأخ علي ح تلقى كلامي كله عن عدم التقيد بطريقة لعب واحدة في الفرق العالمية الكبرى وأن اللعب تحول إلى اللامركزية مع التقيد بتكتيكات اللعب وقلت أن اللاعب السوداني لا يجيد تطبيق الخطط لضعفه الزهني والبدني .. أما فريقكم لا غبار عليه يا حسن ولكن ما تشطحوا قدر دا .. حسب مستوانا نحن السوداني وطريقة لعبنا المريخ كويس الآن ولكن التنافس الخارجي سيكشف لنا ضعفنا وانو نحن قاعدين نصور الحاجات أكبر من حجمها ودونك هزيمة المنتخب القومي في منافستين على ملعبه ياهو دا الحجم الحقيقي لكرتنا .. بعدين حكاية بقيتو تلعبوا كورة شامله دي كتيرة شوية ياخي دامر دا والله لو عدى خط النص تمسكوا أم هلا هلا ياخي سفاري ما قاعد يعدي خط النص تقول لي دامر .. بعدين أديني مثال واحد يخليني أقتنع بأنو موسى الزومة دا لاعب كورة ياخي الزول دا كورتو كلها في الكشافات بس صبي وليقاتو سمحة ساي . بلة جابر أنشط ومفيد أكثر منه .. بعدين لو انت بتتكلم عن الكرة الشاملة بتلعب بثلاثة لاعبين محاور ليه ؟ وين الكورة الشاملة دي البتخليك تلعب بي 8 لاعبين مدافعين ؟ ياخي مافي ما يمنع إنكم تجيبوا كاس خارجي بس ما تمسكوها لينا ذلة ..
أنا معاك إنو أطراف الهلال هي أضعف خطوطه ولابد من معالجة سريعة لهذه المشكلة ودي ظاهرة والكل شكى منها .. أتمنى أن نرى فرق القمة الهلال والمريخ حتى النهاية ونيل أحدهما كأس البطولة ودي ح تكون دفعة قوية لبقية الفرق السودانية للمشاركة في البطولات الأفريقة وبالتالي تمرسها وإستعدادها لمثل هذه المنافسات وهذا يعود بفائدة كبيرة لمنتخبنا الوطني ..
لك تقديري ..
03-15-2009, 08:27 AM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
Quote: الزميل معتصم الهلال كبير ويسظل كبير ولك جواد كبوة والارباب تحدى الصعاب بشطب جل الدفاع وكانت تلك احد اسباب هزيمة الهلال ولكن متى تجانس المحترفون سنجى حصاد نجوم التسجيلات لنا فى قودويين ويوسف محمد وكلتشى مثال فلقد لزموا مقاعد البدلاء عدة سنين وبعد ذلك اصبحوا ابطال فى الميادين تحياتى
الحبيب بلدي يا حبوب .. كيفك وكيف أيامك .. زمان ما شفناك ..
مشكتلنا نحن في السودان ما قاعدين نخطط للأمام .. إدارة وبناء فريق في حجم الهلال صعب جداً لذلك يحتاج لإداريين أكفاء وذوي نظرة ثاقبة .. خلال الثلاث سنوات السابقة كان يعلب فريق الهلال بـ15 لاعب فقط ويمكن أقل وإدارة النادي لم تسأل المدير الفني ولا طاقمه عن السبب وكانوا سعيدين بنتائج الفريق في البطولة الأفريقية ولما حصلت الهزائم إنكشف المستور .. لو رجعنا للفترة الماضية كانت المعضلة الأساسية في تيم الهلال هي خط الدفاع بسبب الإصابات وإعتماد المدرب على تشكيل معين وحارس واحد فقط كان بسببها فقدنا المنافسة على البطولة الأفريقية بسبب إصابة ريتشارد والمعز قبل مباراة النجم الساحلي والبديل لم يكن بمستواهم .. لذلك أتمنى أن نعي مثل هذه الدروس والإستفادة منها حتى نبني فريق قوي أي لاعب فيه يمثل ركيزة أساسية .. ما علينا إلا الصبر على اللاعبين الجدد يبدو أننا سنشهد تألق الكثير منهم من خلال متابعتنا لهم في الفترة الماضية ..
محبتي وتقديري ..
03-15-2009, 04:50 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
Quote: الغالي معتصم التحايا الطيبات ما يهمنا الان هو الحفاظ على فارق النقطتين ..ولكن هذا هو الهم الأساسي للتيم القائم بأمر التدريب. والى ان يجي موعد لقاء المريخ بالدورة الثانية حيكون الجماعة اتعثروا في عطبرة وللا في بورتسودان مرة أخرى.. أحبك وأحب الهلال.
الأخ الحبيب فتحي الصديق .. لك من التحايا أكثرها وداً ..
فعلاً الدوري نقاط وعلى فرقة الهلال المحافظة على فارق النقطتين مع مضاعفة الجهد حتى نيل كأس الدوري وهناك بطولة الأندية الأفريقية والتي يستهل الهلال مشواره فيها اليوم مع فريق جزيرة رينيون ودا إختبار حقيقي له .. قلوبنا ودعواتنا مع الهلال دائماً ..
محبتي ..
03-15-2009, 04:52 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
Quote: يا إبراهيم أخوي ما عندنا مشكلة .. كرة القدم غالب ومغلوب .. يوم ليك ويوم عليك .. بس ما تفتكرو انها ح تديكم طوالي ..
كتب عبدالعزيز الفاضلابي ..
Quote: ده برضو حايكون كلامك لما الهلال يغلب ,,?
عبدالعزيز الفاضلابي تحياتي .. وح يظل رأيي على الدوام طالما دي حال كرة القدم .. يجب أن نفرق بين المناكفات الرياضية وما يحدث الآن بين جمهور الناديين .. الحالة أصبحت صعبة وقد تقودنا إلى ما لا يحمد عقباه ..
وخليك رياضي دائماً ..
تقديري ..
03-15-2009, 05:40 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
المشكلة في المطبلاتية وحارقي البخور عشان جرائدهم ما تبور .. ديل نعمل فيهم شنو ؟.. والله نحن واقعيين أكتر من اللزوم زاتو وعارفيه الكورة غالب ومغلوب .. لكن البقنع لينا أحمد عادل إنو كورة الحلة دي هنا ما بتنفع منو ؟..
أبقى طيب يا حبيب
كتب مهدي الصادق السيد ..
Quote: معتصم هاردلك ولكن لما تغلبونا ما قاعدين تتذكروا الكلام دا عندكم كم واحد فصيح ما شايفهم هنا ابو قرع بلدي وابو نضارات كبار وبشارة الخير الا خدر وغيرهم كلهم كبوا الزوغة والله ما كنا دايرنها كدا ولكن برضوا خلت الجماعة يندسوا المغصة جات من كلتشي البياع الاكبر او الولد العاق معليش تعيشوا وتاخدوا غيرها بس الكاس تاريخي مثل افتتاح جامعة جوبا وقد سجلت في اضابير الزمن
تحياتي أبوالصادق ..
ياخي ناسنا قاعدين وعناوينا دائماً بتلقاها معلقه فوق .. ناسكم القاعدين يدسو ويكبو الزوغة ما بظهرو إلا لما الحمام الميت يفوز .. ولو التشجيع إرتقى لمستوى أفضل بكون أحسن ويا ريت المناكفات تكون في حدود الروح الرياضية .. تغلبونا اليوم نغلبكم بكره .. الجديد شنو ما ياها دي هلال مريخ من ما فتحنا .. ولا مريخ الوالي دا غير .. أموت في الحكومة .. مافي مغصة ولا حاجة إن شاء الله ولدنا دا يبقى هداف أندية أفريقيا ما تبقى أهدافه دي في الهلال فقط ..
أبقى طيب يا حبيب ..
03-15-2009, 05:43 PM
على محمد على بشير على محمد على بشير
تاريخ التسجيل: 08-07-2005
مجموع المشاركات: 8648
كيفك يا إسماعيل .. ألف ألف مبروك لكل هلالي يعشق الهلال .. تلفونك أسعدني بقدر سعادتي بالفوز أمس ..
إستهلالية طيبة لفرقة الهلال والمهم في هذه المرحلة الفوز وتخطي هذا الدور .. بدأ الهلال المباراة بشن هجمات منظمة على بطل جزيرة رينيون نتج عنها هدفان .. ودائماً في حالة ضعف الخصم يندفع لاعبونا للهجوم دون عمل حساب لمرتدات الخصم لذلك نتج عن إحداها هدف من خطأ دفاعي واضح .. بعدها إضطرب اللاعبين وتغير شكل الفريق بإرسال الكرات العالية للمهجامين مما سهل قطعها من الخصم ومراقبة لاعبينا .. ظلت المباراة رتيبة في معظم فتراتها إلا من الجزء الأخير بعد دخول النعيم وتحرك مهند الطاهر مما نتج عن هذا التحرك ضربة جزاء واضحة نفذها مهند محرزاً الهدف الثالث للفريق والثاني له في المباراة .. إجمالاً ممكن نقول أن الفريق كأفراد جيد جداً ولكن عابه التنظيم واللعب الممرحل بنقل الكرة بين اللاعبين وعن طريق الأطراف ودي ناحية تدريبية بحتة يجب أن يفطن لها الجهاز الفني ويقوم بعلاجها .. هناك شوط ثاني ينتظر الفريق ولابد من العمل له حتى نتخطى هذه المرحلة ومعالجة الأخطأ المتكررة للدفاع ومعالجة اللاعبين المصابين .. أجمل ما في المباراة خروج لاعبي الهلال بدون إنذارات ..
تحياتي ..
03-16-2009, 04:47 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
وشكراً على هذا المشاعر الطيبة .. أتمنى أن يواصل الهلال والمريخ إنتصاراتهما حتى منصات التتويج لرفع إسم السودان عالياً .. والله ملينا المكاجرة والمهاترات مافي هلال بدون مريخ والعكس صحيح .. أكثر ما أضر بنا وبرياضتنا دخول من لا علاقة له بها + الصحافة الرياضية والتي أصبح شأنها إثارة العصبية والخلافات في الوسط الرياضي ..
في إنتظار عودتك يا حبيب ..
03-16-2009, 06:08 PM
علاء الدين حيموره علاء الدين حيموره
تاريخ التسجيل: 08-08-2006
مجموع المشاركات: 5689
طيب ما تخلينا نكمل الحلم للنهاية ياخ .. الفريق دا لسه دمائه جديدة وعايزة إنسجام أكتر عشان كده لازم نصبر عليهم شوية .. ما هو البنسوي فيهو دا كلو عشان قلوبنا على الهلال وعايزنه يكون أحسن الفرق في العالم .. والمسألة ليست في الهلال لوحده دي مشكلة البلد بحاله ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
معتصم دفع الله
ابراهيم محمد الحسن
haroon diyab
خضر حسين خليل
محمد الجيلى
ismeil abbas
Abdlaziz Eisa
على محمد على بشير
علاء الدين حيموره
فيس بوك
تويتر
انستقرام
يوتيوب
بنتيريست