|
|
 الأنصاري الأخير....!!!!!!
|
لشدة ما أعاني من إحباطات و خلعات (جمع خلعة) و تشويش عام هذه الأيام من الموقف العام في السودان. أمسكت (برموت الستلايت) ضجرا, فوقعت عيناي على فيلم الساموراي الأخير( و هذه ترجمة بتصرف) في MBC2 و لقد شاهدت فيه الجزء الاخير و الذي يصور المعركة و موتة الساموراي المثالية...و التي إختارها و نفذها بنفسه في شرف و كرامة و شجاعة مثالية.... كآخر ساموراي حقيقي,,,,
آها نجي لقصة الأنصاري الأخير دي.....
في المعركة الأخيرة الفي الفيلم كانت في مشاهد إستبسال نادرة تشبه لحد كبير ما فعله أنصار الإمام (عليه و عليهم السلام) في كرري العظيمة زمان...
و أنا بشاهد في الناس ديل و إستبسالهم و رجولتهم و على قول المغني: (هيجتني الذكرى)....
خاصة في المشهد و الذي أمر فيه قائد المعركة الضابط الياباني من إستعمال السلاح الجديد (المكسيم) السلاح الأتوماتيكي الفتاك....و الأنصار أقصد (الساموراي) يتقدمون ببسالة و شجاعة نادرة, و هم يمتطون خيولهم و يمتشقون سيوفهم
فما كان مني إلا أن صرخت بكل ما أملك من حلقوم و نفس (ودي طبعا كان سمعتوها كانت مبالغة) و كبرت و حمدت الله ثلاثا:
الله أكبر و لله الحمد..(بالطريقة القديمة)
كعادة أي أنصاري عندما تهيج به الذكرى للإمام و صحبه الكرام
و طبعا أنا أنصاري
و لكن
ما حزب أمة...
المهم في شئ ما داخلي ردعني و كسر خاطري و أعاد إلى حالة الإحباط و التشويش و التي لازلت أعاني منها و قال لي بالحرف الواحد:
- هوي يا خيالي بطل الحركات بتاعة الهيجات بتاعتك دي و أقعد في الواطة دي,.. الحاجات الزي دي بقت مثاليات و إنتهت زمان و بقت آثار.... و الفضل منها محفوظ و محنط في متحف الخليفة في أم درمان....
و عدت إلى الحالة المذرية كما كنت....أجاركم و أكرمكم الله...
و نواصل.........
|
|
 
|
|
|
|
|
|
|
|
Re: الأنصاري الأخير....!!!!!! (Re: Azhari Nurelhuda)
|
الموسيقى الذى ضل طريقه للمسرح
ياخ شن يا ؟
ضحكت ضحك لمن غلط
الله يرضى عليك
لكن بالجد يا ابو الزوز القصة دى دايرة ليها
مخرج
نعم
مخرج
والنطق الصحيح للكلمة م خ ر ج بضم الميم وكسر الراء
لانه ماف حل غير مخرج
شواااااااااااااف
بشوف باكر وبعد باكر
المخرجين العندنا ديل كلهم ناس امسك لى واقطع ليك
دايرين مخرج عالمى
يكون وزانها صاح
واصل
| |
|
|
|
|
|
|
|
|
|
Re: الأنصاري الأخير....!!!!!! (Re: Azhari Nurelhuda)
|
المهم
حسيت بأننا محتاجين أن نعبئ هذا الذي شعرت به في فيلم سينمائي...تبدأ قصته مع بداية الثورة المهدية و يتعرض للمحاور الأتية:
مولد الإمام عليه السلام (طفولته و صدقه خاصة مشهد صيد السمك من غير طعم إمعانا في عدم الغش)
ملاحظاته و التي دفعته للثورة (ظلم التركي و غطرسته)
بداية الثورة
مشاهد تجمع الأنصار في قدير
المعارك الإبتدائية
ثم التجمع في الجزيرة أبا
حصار الخرطوم
الإنتصار
و فاة الإمام
تولى الخليفة و إنفراده بالسلطة (ظلمة أو عدله مع مراعاة التوازن في التناول)
بداية سقوط الدولة
مشهد مهم جدا لمجلس الخليفة و جميع القواد و هم ينفذون الأوامر بطاعة كاملة على الرغم من إعتراضهم على الخطة الحربية لكرري و بالتحديد المقولة المشهورة: (المهدية مهديتكم إلا نصرة مافي)
مشاهد الإستبسال في كرري
مشهد إنتحار الخليفة و موته المثالي في أم دبيكرات
مشهد درامي كبير لإجتياح و إستباحة ام درمان
ثم
الإحباط الكبير
و الذي إستمر إلى الآن.....
| |
|
|
|
|
|
|
|
|
|
Re: الأنصاري الأخير....!!!!!! (Re: سلمى الشيخ سلامة)
|
سلمى
الظاهر القصة حتبقى جد جد ما دام أقنعتك إتي دي,... دي براها كفاية
السني كيف أنساهو ما أنا لسه بشوف في أبعاد كل شخصية و عليها برشح الكاست بتاعي
المهم
أنا هسي بفكر في إيقاع المعارك و زوايا التصوير و التقطيع البرفع درجة حرارة تلك المعارك
و تعرفي يا سلمى أنا حاتبع طريقة (الفريد هتشكوك) و حابدأ أرسم في كراستي بتاعة الإخراج من هسي..
اللقطات العامة و القريبة بس منزعج لحصين الإشلاق الضعاف ديل داير لي حصين قوية و مانعة...
ياخ أنا شفت لي عسكري سواري راكب ليه في حصان ضبلان كده و ركبة عسكري السواري واصلة نص رقبة الحصان...
و الله دي مشكلة
اسمعي إتي ما نجي نبدأ الكتابة من هسي
انا غايتو عندي شوف كده إنه الهندسة كيكي ممكن يلعب دور مهم في مرحلة الكتابة دي
و لا رأيك شنو...؟
كتاب و الله الشاب ده.....
| |
|
|
|
|
|
|
|
|
|
Re: الأنصاري الأخير....!!!!!! (Re: Azhari Nurelhuda)
|
Quote: انا غايتو عندي شوف كده إنه الهندسة كيكي ممكن يلعب دور مهم في مرحلة الكتابة دي
و لا رأيك شنو...؟
كتاب و الله الشاب ده..... |
كتاب حسن احمد مش؟
بالجدكيكى زول كتااااااب خالس
واضيف ليهو مصطفى احمد الخليفة
ومعاك زول انت مابتريدو عشان كده "اها " الخمسة فى الاتنين
ومعاك زول تالت اسمه صوصل عبدالله
الانور محمد صالح
احمد طه امفريب
فضيلى جماع باعتبار انه عنده نص "المهدى فى ضواحى الخرطوم"
ديل كتابين كتابة الجن
ونبدا "حبيبتى "
معاك لاخر السكة
| |
|
|
|
|
|
|
|
|
|
Re: الأنصاري الأخير....!!!!!! (Re: سلمى الشيخ سلامة)
|
- تدخل مقدمة مكتوبة بخط حر أبيض تتدحرج من أعلى إلى أسفل ببطء شديد على خلفية شاشة سوداء.
يقرؤها صوت جهوري عريض كخامة صوت المراحيم عبدالوهاب أحمد صالح أو ضوالبيت مع خلفية موسيقية للحن الخليل الخالد عزه في هواك تردد المقطع و الذي تأتي فيه الآهات بصوت عثمان مصطفى يصاحبه الكورال يردد عزة في عزة في عزة في هواك لينسحب تدريجيا ليدخل الصوت الجهوري الغليظ و يقرأ التالي:
- رصد التاريخ في احد دروسه المقروءة و المستفاده, أنه و في فترات الإنتقال ما بين القرون عادة ما تكون هنالك فترات سقوط و إنحطاط, تفرق و شتات, قتال و إحتراب بين أفراد الأمة الواحدة. و سرعان ما ينفرط العقد فيها فتتفرق شعوبا و قبائل فتضيع و يذهب ريحها و تصبح نسيا منسيا......
ويخرج من رحم تلك الأمم عادة من يعيد لها مجدها. قائدا فذا يستطيع أن يوحد شتاتها و يعيد رتق تمزقها, و من ثم يقود جحافل جيوشها فيحررها و يزيل عنها هوانها و يقود مسيرة ركبها نحو المجد.....
- ثم يدخل مركب تنبيه مفاجئ يمهد لدخول موسيقى هام ذاك النهر لوردي بتصرف لتظهر بعده في الشاشة الإعلان التالي:-
شركة البقعة للسينما
بالتعاون مع
شركة ود تور شين للميديا
و شركة بيت المال للإستثمار
تقدمان
الأنصاري الأخير
* عليك الله شنو ليك يا سلمى؟؟؟ مافقري نقري و ما بنوم بدري, ما هي الحكاية بقت كورة (ون تو) بيني و بينك شوق عمر لا نام و لا مده إنحسر
| |
|
|
|
|
|
|
|
|
|
Re: الأنصاري الأخير....!!!!!! (Re: Azhari Nurelhuda)
|
الحبيب / ازهري
انا شفت الفيلم ده ( توم كروز ) جابوهو يوم الجمعه فجر السبت ساهرت ليك فيهو لقريب الساعه 2 صباحا .
اصدقك القول : انه انتابني نفس شعورك في المقارنة بين الساموراي والأنصاري .
اوافقك بشدة ( مشاهد ) على مسألة الفيلم عن الثورة المهدية --- فقط ---- يعني القصة تبدأ من مولد الإمام المهدي وحتى وفاته لأن الجميع متفقين حولها ولن تجد فيها شدا وجذبا كثيرا من حيث الوقائع او القناعات .
واذا كنت جادا في طرحك انا اول من يقدم لك يد العون حيث انني عملت دراسة حول القدرات الذاتية للإمام المهدي واثرها في انجاح ثورته ، كنت قد نشرتها هنا . وقدمتها في شكل محاضرة بمنتدى السودان الفكري - ابوظبي .
تخريمه :
موضوع الإمام المهدي ده عندي ( جده جد وهزله جد )
| |
|
|
|
|
|
|
|
|
|
Re: الأنصاري الأخير....!!!!!! (Re: محمد الواثق)
|
الحبيب
محمد الواثق
تحية طيبة و إحتراما
Quote:
موضوع الإمام المهدي ده عندي ( جده جد وهزله جد )
|
أفو أ زول أنا أخوك إت
و أنصاري على السكين بس ما حزب امة أؤمن و على عقيدة قوية بالحركة الإنصارية التحررية وقائدها و ما قدمته للأمة السودانية من تجربة رائدة...تقتدي و يحتذى بها....
و جاد في هذه المسألة حد الجد ما يودي
و ابشر بالخير
و أرحك نمشي
و أرمي قدام يازول
و الله اكبر و لله الحمد
| |
|
|
|
|
|
|
|
|
|
Re: الأنصاري الأخير....!!!!!! (Re: محمد الواثق)
|
| Quote: يقرؤها صوت جهوري عريض كخامة صوت المراحيم عبدالوهاب أحمد صالح أو ضوالبيت |
عندنا الخامات دى بالجد
امسك عندك دكتور حسن دوكة واستاذ طارق كبلو
استاذ السنى دفع الله
ديل اصوات ما تخلص
وجادة معاك
بس خليك جادى
| |
|
|
|
|
|
|
|
|
|
Re: الأنصاري الأخير....!!!!!! (Re: سلمى الشيخ سلامة)
|
تستمر موسيقى (هام ذاك النهر لوردي) و تظهر لقطة (aerial shot) لجزيرة لبب و كأنها تسبح في النيل الجميل....
- تقطعها صرخة حادة لمولود جديد و تندفع الكاميرا في لقطة (zoom in) سريعة لوجه معروق مبتسما لمزارع في حالة إنتباه لذلك الصوت ثم تتحول الكاميرا لوجه تركي متغطرس جزعا من ذلك الصوت ثم لقطات سريعة لطيور تغادر أعشاشها و حيوانات مختلفة ترفع رأسها من رعيها و تلتفت إلى مصدر الصوت منتبهة...
و تصاحب تلك اللقطات ضربات متسارعة (لتمباني) على بعد تالتة كبيرة ليركز مبطئا في (رولا) في الصوت الخامس....
و نواصل........
| |
|
|
|
|
|
|
|
|
|
Re: الأنصاري الأخير....!!!!!! (Re: سلمى الشيخ سلامة)
|
هوي يا سلمى
أعملي حسابك
و إنتي عارفه الراس براه كبير
و تربية أنظمة شمولية
تقوم تطلع في راسى
و أطالب بكل هذه الألقاب و النعوت لتتقدم إسمي و عندك مثلا:
الأستاذ الموسيقار المخرج السيناريست الحاج:
.........................
و بعدين تحصل مشكلة....
| |
|
|
|
|
|
|
|
|
|
Re: الأنصاري الأخير....!!!!!! (Re: Azhari Nurelhuda)
|
هلا بابو الزهور
وحباب سلمي والاخ محمد الواثق
واستلهام ملهم يا ازهري وفكرة مجنونة جن
والحقبة المهدية ملان وغنية وزاخرة بالاحداث التي يمكن ان تغذي اي دراما تناولها
ان وجدت كل الامكانيات...وفليبقي الحماس عاليا يا ازهري بين كل المهتمين بالدراما والكتابة السردية
والتاريخ من الذين ذكرتوهم هنا...
وعلي استعداد يا ازهري ان اساهم معك ومع الجميع في انجاز كل ما يليني في هذا الامر..
فلايزال تاريخنا وثقافتنا وفلوكلورنا خصبا وملان حكاوي ومنابع سردية ودراما...
وانا جالس هنا معاكم يدا واحدة
| |
|
|
|
|
|
|
|
|
|
Re: الأنصاري الأخير....!!!!!! (Re: Azhari Nurelhuda)
|
و نواصل......
- تقطع صوت التمباني المتخافت أو تمتزج معه صوت أقدام مليئة بالطين تجري (اللقطة تكون من أعلى الساقين) لترتفع الكاميرا لتصور المسافة بين الحقل و القرية و هي تتناقص مقتربة من المنزل و مبتعدة من الحقل. و يجب أن تظهر اللقطة طول المسافة و تعبر عنها مع خلفية لصوت لاهث فرحان و متعب.....
- تنتهي هذه اللقطة بمشهد يصور ولوج الكاميرا لبوابة منزل طيني من غير باب ثم لتنتقل لمشهد الأضاءة تكون فيه خلفية لا تظهر التفاصيل الشخصية لأب يرفع مولود حديث الولادة فرحا به و يأتي صوت الأب مرددا الشهادة ثم الآذان في أذن المولود الجديد من اليمين أولا ثم من الشمال.....
| |
|
|
|
|
|
|
| |
Azhari Nurelhuda
سلمى الشيخ سلامة
محمد الواثق
عبدالكريم الامين احمد
فيس بوك
تويتر
انستقرام
يوتيوب
بنتيريست