أبوي محمد شريف أبو الشام:جمعة ترطّب قبرك

Quote: أم الوليد، المحبة تبراك يا يمة و ما تبكي عينك في يوم ..! اتصالك الليلة جاني في لحظة حزن وسيعة يا لنا، زهجانة براي في البيت، اسر لي شيطوني الصغير ان اتخلص من كراكيب الحجة عثت فسادا في الكراتين و الصرر واكياس النايلون وتحت سريرها لقيت شنطة كبيرة ملفوفة جريت الشنطة بهمة زول ناوي التلاف واتفحت من قوة الجرة و مرق منها كون من رائحة اعرفها جيدا انا مشكلتي حاسة الشم يا لنا باحب الناس بالرائحة و باتذكرهم بالرائحة و ان نسيتهم، اودعت رائحتهم النسيان خرجت الرائحة من الشنطة انسان يا لنا وقعت طاقيتو و لمحت طرف جلابيتو و صندوق الحلاقة و الشنطة الجلد الكان بيحتفظ فيها بأوراقنا الثبوتية في الغربة و جواز سفر قديم اوراقه صفرا ديل كلهم جو مارقين لي واصطفوا قدامي و دبت فيهم حياة يا لنا اتفتحت الدفاتر و اسراب الذكريات جات مارقة من آخر الحزن الذكرى تجر التانية والليلة جمعة وهو مات يوم جمعة يا لنا ... في نفس وقت انسكاب متعلقاته كان آخر عهدي بيدو في يدي رافعاها ابوسها آخر عهدي بشعر راسه وانا بشذب اطرافه آخر عهدي بجبينو اطبع عليهو قبلة و دعاء يدوم لي الجمعة ديك كانت آخر عهدي بـ (أبوي) امبارح كمان اتذكرته، و حكيت عنو لشخص عزيز و اتذكرت صوت ابوي يقرأ لي أواخر البقرة قبل ما انام تخيلي يا لنا كنت باتصل بيهو محل ما أكون لو غلبني النوم علشان يحصني ولو ما قدرت، بيكون معاي شي منو، سبحتو، طاقيتو، منديلو المهم شي من ريحتو... امبارح القريبة دي اتذكرتو لما عز على النوم و سألت طيفو كان من حالي وكان زعلان مني شقاوتي الودتني للرائحة دي فتحت باب السيل من تاني و بكيت من تاني و اشتقت ليهو تاني و غلبني الصبر من تاني حسي البيهدي الطفل الجواي منو؟ البعرفني جد جد منو؟ البفرح لي من قلبو منو؟ البيرفع يدو في كبد الليل يدعي لي منو؟ تعبت يا لنا .. و اشتقت ليهو اشتقت ليهو .. وحاة الله اشتقت ليهو ما دايرة كثير، ما دايرة صبر، دايرة بس ارتمي في حضنه مرة أخيرة دايرة احكي ليهو عثرتي و قومتي دايراهو يقول لي (زوزة انت سندي) علشان ارحع ارفع ظهري تاني الايام مسيخة يا لنا مسيخة كملانة من طعم الفرح شبه بعضها لا فيها حلاقة الجمعة ولا سمك الجمعة، ولا صوتو بيتلو القرآن في الليل لا فيها شاي الضحى لا مشية العصرية لا ريحة يدو الصباح ابوسها و أودعها خوفي و اتوكل لا مواعيد الدوا اتملت، بل تركت حفرة في ساعات يومي العمر مسيخ باهت، و لا صوتو بيجيني في الشغل يسرّع بي للبيت لا خطو المحبب يكتب لي طلبات البيت، لا انا بتو لسه لا هو أبوي عامر لي حياتي ... كفاني الليلة يا لنا، كتر الله خيرك، و اعفي لي بكيتك و شلت همك يعلم الله اعفي رميت عليك حزني الكسر كتفي جيتيني الليلة في وجع و اجيك ان شاء الله في اليفرحك و يسر بالك ارقدي عافية يا بت امي