|
|
|
 Re: إنه ينتزع الضحكة من فم الثكلى (شهـــــــاب شكوكو ) إحتفائية تستحقها (Re: محمد الطيب يوسف)
|
... في نهار يوم من ايام الصيف الحارقة والشلة المذكورة ( كراكة و الجفير و السالوف و قنديلة و دغماس ) يتضاحكون ويتهامزون تحت ظل شجرة وارفة وكيس التمباك يتجول يمنة ويسرة ،،، ما بين الشفاه المتورمة ... و البزيغ والسخرية من كل شئ .
اها الشباب قالوا دايرين يمشوا لي زميلتم في الجامعة ( سلمي ) بمناسبة الوضوع الميمون ... و الزولة دي زولة رايعة وزي حاجاتا الجواها جميلة ومدوزنة ،، وزي الناس تقوم توطد علاقاتا وتتغلغل اسريا ...
قنديلة : نحن زي نقوم نحاول نتفرد كدة ونكون سباقين ونقدم طرح جديد شي مبتكر !!
كراكة : انا بقترح نشتري ليها شوال ( حلبة ) وزي نقوم نأمن ليها الجانب الاقتصادي وزي نعمل ليها اكتفاء زاتي من المديدة ونمزق ليها فاتورة النشويات باعتبارها نفساء وكدة !!
كراكة ( وقد اطرق براسه : شن فايدة مديدة الحلبة والويقود بشيلو اليانكي ) !!
دغماس : اها تاني رجعت لي نضميك المسيخ داك زي المكنة قديتنا قد .
كراكة : نحن الواحد زي بحاول يرتقي بيكم لكن يبدو انك عاطل موهبة وغير مندمج مع الآخر ولازم الواحد يتصالح مع نفسو اولا ثم ينداح في الحواليو !!
قنديلة : خلاص يا شباب انا الصباح من الدغش زي بقوم بعرج عليك يا سالوف ونمتطي الكارو بتاع ابو حديد ونتناول لينا شوال بتاع حلبة من العيّاشة ونجي صادين .
سالوف : مكسب يا مان !!
و بعدين الحساب ولد !!
مش زي كل مرة يا كراكة تعمل ميت وما تدفع !
الجفير : انا بقترح نمشي للزولة دي يوم الجمعة المساء وزي نحتسي معاهم شاي المغربية ونجي قالبين .. وهو يوم مبارك وزي اخواتا بكونن قاعدات خاصة بتاعة الاحفاد ديك ( البت زي المخاتة تتلوي ) مما يسهل علينا عملية الاندياح الاسري .
دغماس – بوصفه عكليت الشلة – والله يا شباب انا قلبي ماكلني من المشوار ده !! وخايف نخش لينا في حتة ضيقة .. نحن ما نسوق لينا واحدة من الزميلات وبكدة شكلنا يكون كويس ويا دار ما دخلك شر !!
كراكة : خلاص قمت لي افكارك الرجعية وظنونك الهدامة .. فيها شنو لمن ناس زملاء يتواصلوا اسريا ويزوروا زميلة ليهم وهي تضع اولي لبنات مملكتها كانثي خصبة !!!
قنديلة : وانت عارف براك البنات ح يقعدوا يقولوا ليك دي ما جات في قيدومة اخوي ولا ما عزمتني في حنة اختها ..
الجفير : بالله يا انهزامي سيبنا من نظرياتك دي .. وتعال لينا يوم الجمعة بدري وغيّر قميصك الكاروهات داك لانو خلاص حفظناو .. حفظ !!
قنديلة : نقطة نظام زي نشوف الاجندة فيها شنو تاني ،،، لانو الموضوع ده اشبعناو بحث و تمحيص!!
كراكة – بوصفه دكتاتور – خلاص الموضوع انتهي ومافي داعي للت والعجن يوم الجمعة المساء تجوني في البيت ونتحرك نشوف لينا رقشة .. ونتوكل .. والضحاكات انا بجيبا ليكم ( عالم مادي تسيطر عليهو المادة ) .
سالوف : رقشة !! .. يعني الحلبة دي نعبيها في جيوبنا ؟ ما نشوف لينا عربية احسن !!
الجفير : عربية بيضاء مكوية !! انت معانا ولا مع الخيانة ؟؟ كدة الشغلانية ح تجر والفلة ح تزيد وعارف جيوبنا خاوية علي عروشا ... و الشوال نباصرو بيناتنا ويا دار ما دخلك شر !!
(( مش ح تعرف تغمض عينيك )) .... !!
| |
 
|
|
|
|
|
|
|
|
Re: إنه ينتزع الضحكة من فم الثكلى (شهـــــــاب شكوكو ) إحتفائية تستحقها (Re: محمد الطيب يوسف)
|
... المهم جاء اليوم المشهود والشباب وصلوا للنفساء في مراحا – قصدي في بيتم – وكراكة في الشارع رفض يشيل الشوال بدعوي آلام الغضروف وخوفا من خراب الشكة !!
واول ما وصلوا البيت استلم الموضوع وعتل الشوال براو وسأل والدة سلمي عن مكان المطبخ لكي يضع الحمولة ،، وسط دعوات الحاجة ليو بالصحة والعافية واخضرار الضراع .
وهو في طريق العودة لم ينسي ان يفتح جردل العيش ويتناول عيشة وفتح التلاجة خمش لي ربطة جرجير ومعاها طماطماية ،،، ومن وراء باب المطبخ خمشة دقيق من شوال الدقيق وشغال طحن ( ما دني ) .
اها عمك ابو سلمي قدر السلوك الموض ده جداُ .
وبقوا يشربوا في الشاي في عوضة المراة الوالدة وهاك يا ضحك وقرقراب ،،، وتنظير حول العلاقات الاسرية وكيفية توطيدها في ظل الراهن الاجتماعي والهجمة الفردية الطاغية علي الشباب ،،،!!
ووالد سلمي استاذن الشباب ليدرك صلاة العشاء ،،،!!
وقال ليهم زي بيتكم يا اولادي !!
كراكة ( في سره ) :
ماتغور ياعمك قاعد لينا كدة زي الخازوق ،،،،!!
قوم تقوم فيك حيطة .
في راجل بيقعد مع بتو الوالدة نقعد في النار .
| |
|
|
|
|
|
|
|
|
|
Re: إنه ينتزع الضحكة من فم الثكلى (شهـــــــاب شكوكو ) إحتفائية تستحقها (Re: محمد الطيب يوسف)
|
بعد شوية يجي راجل سلمي وهو يكورك زي الاسد من برة ويسال في الشفع :
ديل منو القاعدين جوة مع الحريم ديل ؟؟
اللحظة ديك الشباب خلاص بقوا يتململوا وقالوا نحن اصلا كنا ماشين !!
كراكة : وبحركة سريعة ( زي توم آند جيري ) ولا تخلو من خيانة للاتفاق المبرم مع الشباب – حاول يخت لي ( سلمي ) حق اللبن تحت المخدة ... بس الراجل يجي داخل في اللحظة ديك !!
زوج سلمي : انتوا منو ؟
وجايين من وين ؟
وياتو بلد دي الجابتكم ؟؟
كييف تجوا تسلموا علي مراة والدة ؟
وكمان قاعدين معاها في العوضة ؟؟
وانت الطويل ده شيل حق اللبن بتاعك ده !!
ان شاء الله لبن عشر يكبوا ليك في عيونك الدقاق ديل !!
قال حق اللبن قال !!
الشباب قاموا يتنفضوا ويجرجروا في اذيال الخيبة ... وسط لعنات واساءات الزوج المغدور واحساسه بالخزي والعار !!
ووجوم سلمي ووالدتها التي كانت تبرطم بعبارات ( لا يفهمها اجعص معلمي اللغة العربية ) وقال ليهم شيلوا شوال الحلبة البرة ده اشربوها اصلكم ما نافعين !!
... وتعالوا يوم السماية بدري عشان تاكلوا ( اللبا ) !!
وفي دكان ( جوبي ) كراكة شغال تنظير : انا من زمان كلمت ( سلمي ) وقلت ليها الراجل ده ما ح يستوعبك !
وهو رجعي وغير مستنير وانا زي ثبتا حاجاتي فيو ،، وزواجك منو تواضع منك وبمثابة ردة اجتماعية ،، ومفروض ترتبطي برجل يقدس الحياة الزوجية ويستوعبها معني ومغزي بوصفها رباط مقدس وسامي .
دغماس : انت لسع شغال في الكلام الفارغ وزي الدُراب ده .
لكن الحق ما عليك نحن نتستاهل زاتو لاننا مبارينك زي العتّان .
وكمان قبضوك بتخت حق اللبن .
وسط ضحكات الشباب المدوية .
... انتهت ....
| |
|
|
|
|
|
|
|
|
|
Re: إنه ينتزع الضحكة من فم الثكلى (شهـــــــاب شكوكو ) إحتفائية تستحقها (Re: محمد الطيب يوسف)
|
الجزء الاول :
.... مرة يا عمك و نحن شفع صغار ( بس ما شديد ) شلة من اولاد الحلة بنلعب الدافوري .. معانا واحد شايقي زي الحيطة .. ويدو قدر الطالوش .. يا زول ونحن بنلعب كدة قمت اتعافنت عليو و مالعبت ليو باص و هو منفرد بالقون !!
بس قام ليك علي :
هو : كييف ما تلعب لي الكورة و انا منفرد ؟
وتلعبا لي صاحبك اب كرشة داك !؟
انا : منفرد انت ماردونا !
هو : و الكورة اصلا كانت جاياني انت شلتها ليه ؟
انا : جاياك دي جكساية !!
وانا قلبتها شمال يمين ما لقيت مكتوب فيها اسمك ؟
دي كورة ولا شيك ؟
... بس الميدان كلو بطل الكورة و فكوها ليك ضحك ،، جمجرة شديدة ،، و انا في اللحظة ديك داير اطير .
قلت الزول ده لو حرقتوا شديد و قام قطع فيني كف اضاني دي الا يجبصوها لي !!
( و بقيت افكر في الجبص حق الاضنين ده ،، ح يبدا من وين ؟ و ح آكل كيف ؟ ونضارتي دي اعلقا وين ؟ ) .
... يا زول الضحكة جابت ليك نسوان الحلة لي حدهن !!
بس الشايقي يقوم يجي ليك علي وهو يزبد ويرغي !! و شالني ليك فوووق و قال كدي علي الخور الكبير ،،، انا طاير زي شوال البصل !
و انا في الجو بقيت اعاين للخور الحا اقع في ده ،، قزاز و حجار وموية معفنة ) .
و في سري شغال ( منلوج ) :
ان شاء الله قانون الجاذبية دي يلغوا !!
لاني لو جيت داقي في الخور ده حوضي ح يتكسر وبعدين الا يركبوا لي حوض جديد او وضاية و الجراحة بتاعة العظام متقدمة في المانيا بس بي حظي العفن ده ما باشروا لي !!
المهم سادتي المسافة ما بين انا في الجو للارض !! شفتها زي الاربعة ايام !!
(( تابعونا )) .
| |
|
|
|
|
|
|
|
|
|
Re: إنه ينتزع الضحكة من فم الثكلى (شهـــــــاب شكوكو ) إحتفائية تستحقها (Re: محمد الطيب يوسف)
|
... و اردلوووب جيت داقي الدلجة ،، واول حاجة شفتها كانت ( عايدة شمار ) و هي تتابع الحدث بالمرصاد ... و قلت خلاص يا عمك ،، انا موضوعي انتهي و خبري ح يصل الحلة و الحلال المجاورة .
( عايدة شمار تعتير رويتر الحلة لسرعتها في تغطية الاخبار بالحلة والحلال المجاورة في آن واحد ) .
.. اها الميدان كلو اتلما جنب الخور ويعاينوا لي زي جنازة البحر ،،، وانا راقد زي الغنماية الوالدة ،، ما قادر احرك عضاني ،، و الشباب شغالين شمارات واحدين يقولوا : العارض اتلحس ،، واحدين العارض اتشل ،، واحدين قالوا دي صرعة !!
المهم تجي ليك ( عايدة شمار ) .
عايدة شمار : واا فليلييي واا فلييلي ،،، يا غتانا البرد جانا ،،، ويا ضرانا الحر جانا !! الود ماشفنا جديدو !!
انا : ( في سري ) جديد في عينك انت بس غوري !!
ود الشايقية ما عفن : قال ليهم :
شوفوا لي الفارة ده لو ما اتلحس جيبوا لي الحقوا ليكم امات طه !!
انا طبعا ما بسكت حتي في احلك اللحظات : ( طه حسين يا ملعون ) .
... يا زول ارفعك .. عتلك .. غسلك .. نفسك .. الشباب عاشوني ليك تنفس صناعي !!
حتي فتحت عيني .
بس ما قادر ارفع ضهري ،، معسم عسيم شدييد ،،،، يا ربي ضهري ده في جمل بارك فيو ؟؟
بعدين معقولة تعضيك نملة في ظروف زي دي !!
ووين كمان ؟؟
و تحكها كيف ما تعرف !!
... المهم من جاي لي جاي فتحت عيوني و الجماعة ماسكين ود الشايقية مني .
و الذ حاجة جابو لي جك ليمون بارد من ناس ( هجرة الله ) و انا ما دني شربت لي خمسة كبابي اشفط و اكرع ،،، حتي نعنشت !!!
ود الشايقية : الفارة ده كان صايم ولا شنو ؟؟
السالوف : انت لو هرقل ده كان رماك في السابتنك حقنا كان شربت جردل ليمون ؟
دغماس : و الله يا عمك البشوفك مجندل في الخور يقول الا يعملوا ليك ( انبوب معدة ) وشوف بتشفط كيف ؟؟
الجفير : يا عمك زي الورل يلحس ، الزول ده جدعك ولا فطمك ؟؟
تابعونا :
| |
|
|
|
|
|
|
|
|
|
Re: إنه ينتزع الضحكة من فم الثكلى (شهـــــــاب شكوكو ) إحتفائية تستحقها (Re: بدر الدين اسحاق احمد)
|
... المهم سادتي رجعت البيت لقيت ( عايدة شمار) بتحكي لي ناس البيت القصة بطريقة الفلاش باك و قلت ده الا فيلم ( رامبو ) ،،، عرفت الموضوع بايظ !!
المهم اخدت لي دش ،، و كلما الموية تجي في ضهري المظلط داك اسب للشوايقة و لي
( صديق احمد ) .
وانا بتنشف كدة حكيت بالبشكير ظلطة في ضهري حرقتني ليك زي المكوة !!
كبست ليك لي ( حميد ) زاتو وقلت لي عامل شعرك الكلو نسوان ده زي بيت البكاء شابكنا :
( نورة ونعمي و امونة ) .
يا عمك بالليل و انا مدروخ اشم ليك ريحة سمك في البيت ،، العشا سمك ؟؟
دي ما جات في السلك والدكاترة قالوا كتر من اللحوم البيضاء !!
غسلت يدي و جيت اقعد في صينية العشاء بس جدي زي الرعد !!
جدي : قوم كمان عندك نفس تاكل يا باطل !!
انا قايلو بهظر قعدت اضحك ،،، و قلت لي فكنا !!
جدي : تضحك شنو انت اهبل ؟
قوم امشي تأكل السم ،، ود الشايقية يدقك ؟؟
انا : و الدنيا دي اصلا شنو ؟
ما يا داقي يا داقنك !!
مش لازم واحد يرجع مدقوق ؟؟
خليك عندك منطق !!
المهم الراجل طلع جادي شديد ودفرني ،،،، قمت وانا خشمي ملح ... ملح ... و الحجة غمزت لي !!
عرفت الموضوع محلول ( من حيث السمك ) !!
بس جدي ده بختها لي !!
عامل حنكو الزي الختامة ده !!
كان ما مليت لي الابريق حقو نمل !!
ابقي ما انا !!
(( تابعونا )) :
| |
|
|
|
|
|
|
|
|
|
Re: إنه ينتزع الضحكة من فم الثكلى (شهـــــــاب شكوكو ) إحتفائية تستحقها (Re: محمد الطيب يوسف)
|
ها الحجة صبنت لي سمكاية فوق راس التلاجة عشان الهطا بالليل لمن سيد عنصري السودان ده ينوم !!
كان ما اشتكيتو للامم المتحدة !!
يا زول آخر المسا جات كديسة سرقت الثمكة !!
سكيتا ليك بي عكاز جدي ،،، اخوي شافني !!
قال لي : رجالتك دي ما كان تعملا لي ود الشايقية !!!
وانا زهجان من الكديسة : قلت مش بقولوا رزق زول ما بياكلوا زول !!
ما كان يقولوا ما بتاكلوا كديسة كمان !!
كان اتعشينا !!!
... المهم بيتا القوا وانا زهجان من الشوايقة وقلت اصلهم حاجاتم كلها لي ورا :
برقصوا لي ورا ، شلوخم لي وراء ، و بضحكوا لي ورا !!
ولي يوم الليلة اشوف لي شايقي ضهري يتاورني !!
حاشية :
فيما يتعلق بالحجة ( عايدة شمار ) هي بتجيب الايسكريم حقها في تلاجتنا بوصفنا من اثرياء الحلة !! و انا ما ابو العفانة قمت بالدبوس قددتا الاكياس كلها ! و الصباح جنب المدرسة بقت تبيع في اكياس فاضية ....
و بقت كلما اجي جنبها تقول لي : ( عافية من الشوايقة !! ) وهي بتقدل !! .
لمن اقول لا شنو ؟
تقول لي : مالك انت يا بتاع الخيران البنضم معاك منو ؟!
@ @ اما جدنا العنصري وسيد عنصري السودان :
اجريت له عملية ( بروستاتا ) و يشتكي من داء تسبب فيه هجوم من جيوش من النمل لم يعرفوا لها مصدر ، اصابته في مناطق حساسة من جسده !!!
(( إنتهت )) .
| |
|
|
|
|
|
|
|
|
|
Re: إنه ينتزع الضحكة من فم الثكلى (شهـــــــاب شكوكو ) إحتفائية تستحقها (Re: محمد الطيب يوسف)
|
أنثي الأنوفلس ،،،، حبيبتي ووالدها الجنرال ،،،!!
( 1 )
..اذكر ونحن اتبان الدراسة الجامعية اذ نحن جلوس امام ست الشاهي نحتسي شاهي السادة المنعنع ..بعد فطرة بوش كاربة في استاد الخرطوم ثلة من الاولاد والبنات .. وكل واحد جاي وهو طابق الحناناية بتاعته ويادنيا ما فيك الا انا ... ( انا قايل نفسي روميو )،،اها يا سادتي الامنتي ليكم الحناناية بتاعتبي قامت قالت لي : انا بعدين دايراك في موضوع اوعك تمشي بكان كدة ولا كدة .. قلت ليها حاضرين يا قلب !! وانا بيني وبينكم عرفت الحاصل شنو؟ وعملت ميت !1 خلاص نحن علي اعتاب التخرج والحمامة دايرة تربط الامور ،،، المهم اخر اليوم بقيت شغال ليك مضايرة واعمل في السواتر .. مرة ورا ستات الشاي ومرة ارقد في الخور زي التمساح .. وجندت الفرد كلهم ويقولوا ليها ( العارض ) ده يعمينا كان شناهو !! واحدين يقولوا مشي القمسيون عشان تطعيم الجدري وواحدين يقولوا مشا الجنوب للجهاد .. وآخرين مشا ليبيا !!
اها قبضتني ليك جنب ست حلاوة الشعيرية .. انا كمان ما دني ملصق جنبها ومصاحبها عشان تديني زيادة لمن اشتري منها ... بس زي قطعة الشيطان البت تجي طالعة ليك من بين صواني الحلاوة ،،، بسم الله انت هنا من بتين ؟؟ قالت لي : مما انت بتقول لب بت الحلاوة : دينيني لانه بت الحرام دي كملت قروشي كلها !! وقربت ادخل جوة اباط ست الحلاوة من الخجلة!!! وست الحلاوة تكشف لي ساااي واتحركنا من جنبها بعد ان تم اعتقالي ،،، وانا اجرجر في اذيال الخيبة .. وسامع ليك ست الحلاوة وصويحباتها يغنن : ( القبضو منو يا ناس ؟ القبضو منو ؟؟؟)
وانا ماشي مديت اصبعي الاوسط من وراء ضهري وبقيت اعمل لي بنات الحلاوة في حركات شريرة !!!!!
| |
|
|
|
|
|
|
|
|
|
Re: إنه ينتزع الضحكة من فم الثكلى (شهـــــــاب شكوكو ) إحتفائية تستحقها (Re: فاروق أبوحوه)
|
(( 2 )) :
المهم البت ختتني ليك في الكرسي الساخن : وهاك يا اسئلة زي نكير : العرس متين ؟ وانا اتلاوق ليها ( عرس الزين ) طيب ما نعمل خطوبة اقول ليها : ( خطوبة سهير ) ؟؟ وقلت مافي حل غير ازهجا ليك مني وهاك يا بزيغ .. واكح ليها جم وشها .. واكرع زي الغول ومرات امخط بي يدي اليمين .. وهي تقول لي مالو نحن ما حاجة واحدة ! اقول ليها ده ماكلام علمي كيف حاجة واحدة ...وامعانا في الثقالة ختيت لي سفة سعوط قدر الضربة ( وهي يحدي قريب بتقول لي ياااي ده بسفوا كيف الاولاد ؟ ) اليوم داك قالت لي مالو ما حق الرجال !!! وتجيب لي سيرة اغاني مصطفي اقول ليها انا فناني بقي ( قيقم ) واقول ليها في زول يدخل الحمار في غنية دي حواشة ؟؟ ودي غنية ولا سيد دكن اسمها عم عبد الرحيم ؟؟ المهم هي تدخل لي بي حمد اطلع ليها بي خوجلي .. لمن خلاص فترت غيرت الخطة وقالت لي ابوي قال ليك تعال اشرب معاو شاي لو ماجيت ما بشربو !! قلت ليها انا قرقوش ما يشربو ويفكنا ،،،المهم اصرت وعزمت الشباب واتلمينا وان في الطريق امشي خطوة لي قدام واتنين لي وراء والشباب يغنوا لي : ( هوي بي هوي بي.. العارض العريس يالله تتم لي ... )
!!!
| |
|
|
|
|
|
|
|
|
|
Re: إنه ينتزع الضحكة من فم الثكلى (شهـــــــاب شكوكو ) إحتفائية تستحقها (Re: فاروق أبوحوه)
|
(( 3 ))
ويا عمك ابو البت من الضباط القدااام ديك وشابكنا ليك حسن حسين ده دفعتي .. وعبود ده انا الطلبت منو يتنحي !! و هاشم العطاء صاحبي موت .. ونميري انا نصحتو يسافر القاهرة .. والترابي جاني امس !! وعلي عثمان سالني نعمل القمة الافريقية هنا ولا في ليبيا ؟؟ ! انا لمن خلاااس زهجت قلت لي : يا حاج انت طوااالي البطل ؟ يوم ما بتبقي الخائن ؟؟ يازول عمك بقي زي البركان ونقنق براه .. تحت .. تحت..
.. وانا من حركة شلاليفو الكبااار ديك عرفتو ( سب الدين والامريكان )....بس اكلا في حنانو ،، بعد شوية كدة اتلفت علي وسالني ليك مباشرة : انت يا ولد بقيت علي شنو مع الانثي دي ؟؟ يا زول انا زي الصبت فيني مطرة !! قلت لي ياتو انثي ياحاج ؟؟؟
قال لي : بتي دي ما انثي ولا ماعاجباك ؟؟؟؟
قلت ليه : انثي الانوفلس ياخي ؟؟ ماكرهتنا جيب الشاي بالكيك والحلويات دي وخلينا نشربو ونتخارج !!! شابكنا قصص قصص انت ( هتلر ) ؟؟؟
## وعينك ماتشوف الا النور وانا ما بتذكر حاجة تاني ،،، الا ونحن جنب دكان جوبي ،، و هدومي كلها شاي بي لبن وكيك ،،،، واسف لما فعل الجنرال بي وبالشباب !!!
## حاشية : ( انثي الانوفلس ) ،،،، حاليا في كندا ولديها ولدان وبنت !!! ولسان حالا يقول مالي ومال الشقاوة انا ،،،
## اما الجنرال انتهي به المطاف في احدي صواني الخرطوم .. تطارده لعناتي !!
انتهت !!!
| |
|
|
|
|
|
|
|
|
|
Re: إنه ينتزع الضحكة من فم الثكلى (شهـــــــاب شكوكو ) إحتفائية تستحقها (Re: فاروق أبوحوه)
|
شهاب ...
قلم لا ينقصه من الروعه..سوي أنه مدهش
يعرف كيف يغوص في حواري الكلم..
يصور أدق تفاصيل الحياة اليوميه بلغةٍ تتخلل المتلقي بأريحيه مطلقه..
هذا وغيره يبقي تحت إنسانيه طاغيه تتملك الرجل ..
..
تمنيته هنا..
فتحت بوست مناشده لبكري لإعطائه نفاج الدخول الذي أضاعه..
ولكن إلي الآن هو هناك .. خارج حوش بكري..فإلي متي.؟
معاً ليكون شهاب هنا..
محبتي..
وأشياء أخري
| |
|
|
|
|
|
|
| |
بدر الدين اسحاق احمد
اينانا
محمد عبد الماجد الصايم
محمد فرح
فاروق أبوحوه
Elsanosi Badr
فيس بوك
تويتر
انستقرام
يوتيوب
بنتيريست