|
|
|
 Re: موقف مشهود لرئيس الجمهورية يعيد فيه الحقوق لأهل المناصير (Re: العوض المسلمي)
|
كلمة السيد رئيس الجمهوريه
المشير عمر حسن احمد البشير في زيارته للمناصير
26-01-09
الله اكبر ... الله اكبر.. الله اكبر... لا إله إلا الله..لا إله إلا الله...لا إله إلا الله
بسم الله الرحمن الرحيم
الحمد لله رب العالمين
والصلاة والسلام علي خير رسل الله اجمعين
سيدنا محمد وعلي آله وصحبه اجمعين
اهلنا واحبابنا المناصير
السلام عليكم ورحمة الله وبركاته
ودا يوم.. دا يوم للحمد يا جماعه
دا يوم نحمد الله سبحانه وتعالي
نحمد الله سبحانه وتعالي علي نعم كثيره
وان تعدوا نعمة الله لا تحصوها
نحمده ربنا علي نعمة الاسلام
ونحمده ان جعلنا من امة محمد خير امة اخرجت للناس، صلوا علي رسول الله، وبنحمد الله سبحانه وتعالي حمد الشاكرين، حمد الحامدين المقدرين إنه جمعنا الليله بيكم هنا
جمعنا معاكم هنا
هل تصوًروا لمان جاني احمد ده انا في الخرطوم وقال لي يا اخي عايزنك في الزياره دي تزور مناطق المناصير، طبعا اخونا احمد كان بفتكر انه انا ما حا اقبل عشان الكلام البصلنا، لكن والله ، وما طالبني حليفه والله كانت من اهم اللحظات إنه يجيني احمد ويقول لي اخوانا المناصير منتظرين زيارتك ياخي ليهم في المناصير، لانه والله الواحد كان مهموم بيكم، لانه نحن ويشهد الله جينا هذا الموقع عشان نعبد الله سبحانه وتعالي، جينا الكرسي دا عشان نعبد بيه الله سبحانه وتعالي، ونحن نعلم انها امانه ويوم القيامه خزي وندامه إلا من اداها بحقها، نحن حريصين لانه العمر ياجماعه باقي فيه كم، نحن حانعيش اكتر مما عشنا، وكله باقيلينا ايام والواحد عايز يلاقي ربه نضيف، نضيف من مظلمة اي انسان لانه الظلم ظلمات ودعوة المظلوم ليس بينها وبين الله حجاب، نحن ماعايزين يجي زول دارك والواحد يجي ناخذ ضميره منه امام الله سبحانه وتعالي، اليوم داك مافي واسطه، مافي رئيس، مافي زعيم كل اتيه يوم القيامة فردا وزي ما يقولوا اهلنا اليوم داك كل شاه معلقه من عصبتها. نحن عايزين نجي اليوم داك نضيفيين، ما شايلين لينا مظلمه في ضهرنا لان كل واحد اليوم داك يجي شايل مخازيه في ضهره، نحن عايزين اليوم داك نستلم كتابنا بيمينا وبي امامنا ليس بي وراء ظهرناعشان كده ما ممكن نظلم لانه لو وصلنا زول لليشيل حقه يخته في جيبنا والعنده حق ما يطلعوا من جيبنا دي حقوق وكل زول لازم ياخد حقه. لكن نحن والناس تتذكر قبل قيام السد.. الناس تتذكر... الناس تتذكر... الناس تتذكر.. الناس الحضروا لقاء جماهيري في كريمه قبل قيام السد وانا في اللقاء داك اعلنت انه نحن ما حانهجر زول قسرا حاندي كل زول حقوقه، الداير يرحل بنرحلوا والداير يقعد محل محله بنديه حقه، الكلام ده انا قلته في كريمه قبل قيام السد، لكن المشكله كانت الكلام بينا وبينكم بيتم بالنقل وما كان مباشر وفي الحته دي حاولنا ناس كتار في المحله دي نقلوا ناس كتار والكلام بقي اشاعه وبقي اكاذيب نحن ما بعرفونا بالمناصير ولا يورونا المناصير مين هم لانه عارفين تاريخهم عارفين جهادهم، عارفين مواقفهم والجهاد عن السودان نعرف المناصير اول من انتصر للشريعه عبر صناديق الاقتراع، عرفنا المناصير مجاهدين في مناطق العمليات، عرفناهم مجاهدين وعرفناهم شهداء وعرفنا المناصير لما الناس جو يتاجروا بقضيتهم وابعادهم عن الشريعه بل ظنوا ان المناصير هم خلقوا متمردين ويبيعوا دينهم ويبيعوا بلدهم لكن ما قدروا عليها.. ده كلوا متابعنوا ياجماعه... ده كلوا متابعنوا وعارفنه.. لكن نحن قررنا يوم قيام السد انه السد دا نحل بيه مشاكل الناس كلها... عايزين ننقل الناس نقله حضاريه، ما قصدنا انه نرحل الناس من مناطقهم لانه هم مابيين مناطقهم لكن نحن قررنا انه الناس ديل ننقلهم نقله حضاريه نحل مشاكلهم في السكن في المعاش في الخدمات في كل شيء، لكن بعد داك الخيار للزول، الداير يرحل يرحل والداير يقعد يقعد، حتي الناس الرحلوا وانا برضوا بحييهم من هنا الداير يرجع بعد استلم هناك ممكن يرجع ما في حاجه بتمنع ديل كلهم مواطنيين ودا حق دستوري يا جماعه الدستور بدي الحق لاي مواطن يتحرك لاي حته يسكن في اي حته لانهم مواطنيين لانه يا جماعه نحن ما قلنا البرحل هناك تاني ما عنده حق.. الداير يمشي كسلا يمشي والداير يمشي الخرطوم يمشي والداير يقعد في المكابراب يقعد والداير والداير يقعد هنا يقعد والداير يمشي مروي يمشي، دا السودان ياجماعه وانتو مواطنيين من الدرجه الاولي، مافي حكر علي مواطن انه يمشي اي حته دايرها.
نحن اول حاجه عايزين نؤكد ليكم حقوقكم كلها محفوظه، ونحن عندنا كل المعلومات عن البيوت الكانت 99 وعن البيوت الزادت والحيط الزادت والزراعه الزادت نحن حكومه عندنا كل المعلومات واي زول حا ياخد حقه كامل واخوانا في الولايه ديل هم معاكم ومع لجانكم يحددوا مناطق التوطين والخدمات المحتاجين ليها في التعليم وصحه ومويه ومشاريع اعاشيه وطرق وكهرباء من سد مروي. اما المطلب يا جماعه بالمحليه، اهو اخونا الوالي هو البعمل الدراسه وهو البيتخذ القرار والوالي ده عنده برنامج وانتو عافين برنامجه ونحن موافقين عليه كله، ونحن اليوم نحي المناصير ونحي سكان امري والحامداب وكل الناس اللضحوا باراضيهم وبي بيوتهم بي مراتعهم بي وديانهم وسهولهم وجبالهم من اجل السودان.. الله اكبر.. الله اكبر.. لا اله إلا الله ولا نعبد إلا اياه مخلصين له الدين ولو كره الكافرون ولو كره المنافقون... في سبيل الله قمنا نبتغي رفع اللواء، نحن للدين فداءأ فاليعد للدين مجده فاليعد للدين عزه
ونحن الان عشان نساعد اخونا احمد ده يحل مشاكل الناس العاجله، لانه انا جاي طاير بي فوق وشايف الحال.. نحن طايرين بي فوق شايفين الحال شايفين الخيم شايفين الحلال الغرقانه والبيوت الغرقانه شايفين الحال ما عاجبنا، والله ما نرتاح إلا لما كل واحد يكون عنده بيت وبيت صحي وعنده خدمات تعليم وخدمات صحه وخدمات مياه ومشروعات اعاشه زنحن معاكم لغاية ما نحل مشاكلكم كلها ولغاية ما تقولوا نحن ما عندنا مظلمه تاني ونرفع شهادتنا لله. والله احمد ده متحمس كده داير قروش كتيره هسي نحن يا جماعه عشان حل المشاكل العاجله وحل .. وحل المرتبط بيه حياة الناس بندي احمد ده اربعه مليار بالقديم.. الله اكبر.. الله اكبر... لآ أله إلا الله محمد رسول الله.. محمد رسول الله... انشاء الله نجيكم المره الجايه وتدونا التمام... ألسلام عليكم ... ياجماعه واحد قال لي قول للمناصير غفر لكم ما تقدم... والله ما زعلنا منكم يوم.. كنا شفقانيين عليكم كنا خايفين عليكم.. لكن ما كنا زعلانيين منكم وهسي اخوانا الرحلوا انا بكره بعد بكره بمشي ازورهم برضوا هناك اتفقد احوالهم واشوفهم واشوف مشاكلهم اذا عندهم اي مشاكل احلها... الله اكبر... التحيه للمناصير في كل موقع القاعدينهنا والفي كسلا وفي الشماليه او الفي الخرطوم...(ناس الخرطوم ديل كويسين) والفي المكابراب والفي اي موقع تحيه لكل المناصير والسلام عليكم ورحمة الله
| |
 
|
|
|
|
|
|
|
|
ff (Re: azz gafar)
|
!!!!!!!
بس بي سهووووووووووووووووووووووووووووووولة كدة تنقلب مية وتمنين درجة ؟!!!
غايتو يا عز نظريتي فيك أصلو ما خابت ...!!
| |
|
|
|
|
|
|
|
|
|
Re: ff (Re: ناذر محمد الخليفة)
|
الأخ ناذر امافى انقلاب
نحن خلافنا هنا مع هذه الحكومة فى حقوق البسطاء من اهلنا والموقف هنا انسانى فقط بغض النظر عن الأنتماء السياسى .
لذا لزم اعطاء كل انسان حقه وهذا كلام قاله الرئيس وان اتى متأخرآ ولكن فقط نتمنى التنفيذ .
| |
|
|
|
|
|
|
|
|
|
Re: ff (Re: azz gafar)
|
عز
قبل ما نقول أي شئ
دا انت الكاتب الكلام الفوق دا وكمان ناقل سخف المشير؟
| |
|
|
|
|
|
|
|
|
|
Re: ff (Re: عاطف عبدون)
|
الأخ عاطف شكرآ لحضورك هنا
الأخ عاطف هذا ماقاله البشير فى اللقاء الذى جاء متأخرآ للمناصير نحن بدورنا نوثق هذا الحديث وننتظر مقبل الأيام .
| |
|
|
|
|
|
|
|
|
|
مواطنيين من الدرجه الاولي (Re: azz gafar)
|
| Quote: الداير يمشي كسلا يمشي والداير يمشي الخرطوم يمشي والداير يقعد في المكابراب يقعد والداير والداير يقعد هنا يقعد والداير يمشي مروي يمشي، دا السودان ياجماعه وانتو مواطنيين من الدرجه الاولي |
!!!!
| |
|
|
|
|
|
|
|
|
|
Re: مواطنيين من الدرجه الاولي (Re: محمد فرح)
|
نحن نريد ان نثبت من خلال كتاباتنا المتتالية فى هذا المنبر انوهنالك مظالم واقعة على المتأثرين بسد مروى وكل اهل السودان وهذا تأكد من خلال خطاب البشير نفسه وهذا اعتراف اكده البشير نفسه.
نتمنى من البشير ان يرد الحقوق لأهلها فى كل شبر فى السودان ( جنوب ،غرب ، شرق ،شمال )
وسنظل ننتظر الكذاب لحدى خشم الباب .
| |
|
|
|
|
|
|
|
|
|
Re: مواطنيين من الدرجه الاولي (Re: azz gafar)
|
فى هذا البوست احى ثبات وتضحيات اهلنا الذين متمسكون بجمر القضية برغم الوضع الصعب الذى يعيشونه منذ اغراقهم والى الآن ،واقول لهم سنظل ننتظر رد المظالم والحقوق ورد حقكم الادبى الذى تم اجهاضه وبصمودكم اعترف الرئيس نفسفه بظلمكم ...
وسنظل ننتظر الكذاب لحدى خشم الباب .
| |
|
|
|
|
|
|
|
|
|
الشغلانة قلبت (Re: azz gafar)
|
يا جماعة الله الحقوا الزول دا
يا في زول هكر الباسورد حقتو و كتب بيها البوست
أو تلقي عضة ثمينة قلبته 180 درجة
و الله أعلم
| |
|
|
|
|
|
|
|
|
 Re: موقف مشهود لرئيس الجمهورية يعيد فيه الحقوق لأهل المناصير (Re: Frankly)
|
Quote: ود محجوب
تابع هذا الرابط لترى التحوّل في المواقف تجاه عسكوري من بعض المناصير
عسكورى والفجور فى الخصومة
تحياتي كمال |
الأخ كمال تحياتى متابع هذا البوست .
والواضح بالنسبة لى ان عسكورى وهو عضو فى الحركة الشعبية ومعه عبد الواحد ابراهيم. قد البسا قضية المناصير ثوب قبلى كريه وبطريقة منفرة وقد تداخلت معهم فى بوستات عديدة وقلت لهم ان لأهلنا المناصير قضية عادلة وان قضيتكم مع الحكومة وليس الشايقية فلم ينتصحا واستمرا فى طرحهم القبيح المنفر لقضية المناصير وبدعم من بعض اقلام الهامش.
المؤتمر الوطنى لم يطيب له ان ترجع حقوق المناصير على يد لجان هى اقرب الى المعارضة منها الى الحكومة. فعملوا على تغيير اللجان بدفع كوادرهم او من استطاعوا شرائه بالأموال وسحبوا البساط من تحت اقدام عسكورى وجماعتو.
وبعد ان ضمنوا ولاء اللجان الجديدة لهم عملوا على حل مشكلة المناصير على يد لجانهم كسبا انتخابيا وتفويتا لمن اراد استغلالها فى وجه النظام.
| |
|
|
|
|
|
|
|
|
|
Re: موقف مشهود لرئيس الجمهورية يعيد فيه الحقوق لأهل المناصير (Re: ود محجوب)
|
يا عز انت قلته:
| Quote: نحن خلافنا هنا مع هذه الحكومة فى حقوق البسطاء من اهلنا والموقف هنا انسانى فقط بغض النظر عن الأنتماء السياسى |
ركز على كلمة حقوق البسطاء دي
وتاني كمان قلته:
| Quote: هذا ماقاله البشير فى اللقاء الذى جاء متأخرآ للمناصير نحن بدورنا نوثق هذا الحديث وننتظر مقبل الأيام |
وشوف نوثق دي كويس وقارنها بالعنوان الكبير حق البوست:
موقف مشهود لرئيس الجمهورية يعيد فيه الحقوق لأهل المناصير
غايتو انت يا من الأول كانت عندك أجندة خفية وحققتها
لكن كان الافضل ليك تماما انك ما تجي بمثل هذا البوست
أو إنك .....
| |
|
|
|
|
|
|
|
|
|
Re: موقف مشهود لرئيس الجمهورية يعيد فيه الحقوق لأهل المناصير (Re: صلاح ليون)
|
يا أخوانا جمعيكم سلامات . الحكاية شنو ؟ إنتو ما عاجبكم مشكلة المناصير
تنحل وللا شنو ؟ وإذا ربنا بإرادته سخر ليها الحل دايرين عز جعفر أو المناصير يرفضوه
وتستمر المشكلة مولعة لمن تسقط الحكومة دى وتجى واحدة غيرها تحل المشكلة وللا رأيكم شنو؟
المناصير على كل حال مشكلتهم إتحلت بواسطة الرئيس مهما إختلف البعض معاه كماإنهزم أسامة
عبدالله والمعاه هزيمة نكراء. والحل جاء لقضية المناصير مسخر من رب العالمين براه من وسط
الظروف السياسية المحيطة بالبلد والصراعات من دون ما المناصير يستشهد أو ينجرح منهم فرد.
وفى سبيل أنه قضيتهم تنحل أقل وأبسط شيئ يقدموه أنهم يستقبلوا الرئيس بحفاوة ويشكروه
وكمان ينقلبوا مائة وثمانين درجة إذا لزم .
وهاكم مثال لما كتبته اليوم من مقال نشر بصحيفة السودانى وما عندى مانع تقولوا علي
بقيت مؤتمر وطنى أو الحكومة اشترتنى . وإذا الحكومة ما نفذت حلها ممكن نختلف معاها تانى
نهاية سعيدة لقضية المناصير ... ووفاء غير مسبوق للرئيس
محمد عبد الله سيد أحمد
لم يحدث أن ساور المناصير أي شك فى يوم من الأيام فى تعاطف السيد / رئيس الجمهورية مع قضيتهم . فموقف السيد / رئيس الجمهورية وتعاطفه مع رغبة غالبية المناصير فى إعادة توطينهم حول بحيرتهم كان واضحا وجليا منذ توقيعه على قانون إعادة توطين المتأثرين بسد مروى عام 2002م وهو قانون نص بكل وضوح على حقهم كمتأثرين مناصير فى إعادة توطينهم فى مواقع حول البحيرة بجانب مشروع المكابراب الذى ترغب فيه قلة منهم . ولكن إدارة السد – جزاها الله – إلتفت حول خيارإعادة التوطين فى مواقع حول البحيرة وادعت استحالة تحقيقه وجعلت أقرب موقع بديل له فى صحراء العتمور شمال مدينة أبوحمد حول محطة سكة حديد نمرة عشرة ، خارج نطاق البحيرة وخارج منطقة المناصير نفسها . ومن أجل التضليل لم تستح أن تطلق علي هذا الموقع الصحراوى البديل إسم الخيار المحلى تارة أو الكحيلة شرق تارة أخرى بإدعاء أن قرية الكحيلة شرق بمنطقة المناصير هي أقرب قرية اليه وما هي بذلك . ورئيس الجمهورية لم يتوان من الإنحياز لجانب الخيار المحلى حول البحيرة عندما إحتدم الخلاف حول الخيار المحلى بين المناصير وإدارة السد حيث قام بسحب ملف المناصير من إدارة السد وحوله الى والى ولاية نهر النيل وأتبع ذلك بإصداره لقراره الجمهورى رقم (70) لسنة 2006 م الذى أوكل فيه لوالى ولاية نهر النيل تخصيص الأراضى حول البحيرة للمناصير وتم على أثر هذا القرار الجمهورى توقيع أول إتفاق بين المناصير والحكومة ممثلة فى والى ولاية نهر النيل فى 1 /6 / 2006 م بقاعة الشارقة بالخرطوم . وقد جاء ذلك الإتفاق ملبيا لجميع مطالب المناصير بوجه عام . وكان من المؤمل إذا ما تم السير فى تنفيذ بنود ذلك الإتفاق أن تنتهى القضية تلقائيا وفى أقرب وقت و بسلام وبأقل التكاليف والخسائر . و لا نريد هنا أن نقلب المواجع بسرد جميع ما قامت به وحدة تنفيذ السدود من عراقيل لإفشال تنفيذ ذلك الإتفاق والإتفاق الثانى الذى تلاه وانتهاء بما حدث من كارثة إغراق متعمد للمناصير من أصحاب الخيار المحلى ، وما صارعليه حالهم اليوم من وضع مأساوى . ولكننا سنتجاوز كل تلك الوقائع المريرة والتى كانت معارك فى غير معترك الى الخاتمة السعيدة التى انتهت اليها بفضل زيارة السيد رئيس الجمهورية لمنطقة المناصير الغريقة نهار الإثنين 26 يناير الماضى وما أعلنه فى تلك الزيار من توضيح وقرارات منهيا بذلك والى الأبد مشكلة طالت واستطالت وظلت تراوح مكانها لما يقرب من عقد من الزمان . وكان قوله فيها هو الفصل وما هو بالهذل حيث أزال فى تلك الزيارة ما علق بقلوب المناصير من غل على الحكومة و شفى صدورهم وأصلح بالهم .
والمناصير كانوا مدركين لحقيقة الذين مكروا مكرا كبارا وروجوا عنهم اتهامات وأباطيل بأنهم ضد التنمية وضد مصلحة السودان وأن هناك جهات معادية تستغلهم وقضيتهم لأجندة سياسية وللإضرار بأمن السد وبأمن الوطن والى غير ذلك من ترهات . وكانوا يدركون كذلك أنه لا سبيل لدحض هذه الإفتراءات وحل قضيتهم إلا بزيارة الرئيس لهم فى منطقتهم ليتحدث اليهم ويتحدثوا اليه وجها لوجه ليدرك ويبصر الحقيقة بنفسه. ولذا فإنهم ظلوا ولزمان طويل يتطلعون الى هذه الزيارة . فما أن علموا بنبأ زيارته لهم فى قلب منطقتهم بالطوينة شرق جزيرة شرى من قبل أربعة أيام من اليوم المحدد للزيارة حتى بدأوا وعلى والفور مراسم إحتفالاتهم بهذه المناسبة مبكرا وبصورة لم تنقطع معبرين بذلك عن شعور صادق ينبع من اعماقهم بحبهم ووفائهم وامتنانهم له ، وكانوا على ثقة من أنه سيلعن الخاتمة السعيدة لقضيتهم إعتمادا على ما لمسوه من جدية والى ولاية نهر النيل فى حل قضيتهم وعلى ما جاءهم به من بشرى بهذه الزيارة . والمناصير كما أعلمهم مغالين فى التعبير عن عواطفهم وردود أفعالهم إن هم فرحوا وإن هم غضبوا – وان هم عاهدوا وان هم اوفوا – ووفاءهم للرئيس قد عبروا عنه بما لم يسبق له مثيل فى تلك الزيارة كما شهدت بذلك وسائل الإعلام المختلفة وكما اتضح وانعكس ذلك من الإنشراح النفسى الذى كان باديا التى عليه وعلى نفوس كافة مستقبيله . وما أجمل أن ينتصر الرئيس لرعيته ويزيل عنهم ما لحق بهم من ظلم وضراء مستهم ويحق الحق ويبسط العدل . وما أجمل أن يوفى القوم لرئيسهم ويردون عنه كيد الأعداء ويكونون له فداء .
بعض من القادة المحليين بالمنطقة قالوا لى : تكفينا زيارة الرئيس وإطلاعه على حقيقة أمرنا حتى وإن لم ننل من ورائها أي جقوق ، ويكفيه أن يعلم أي ظلم وعدوان حاق بنا . وأي فشل ذريع حاق بالذين قصر فهمهم عن حقيقة أمرنا كمناصير وحاولوا غمط لحقوقنا عنوة واقتدارا حينا وحيلة ومكرا أحيانا كثيرا جاهلين لتاريخنا المليئ بالبطولات والفداء والذين قتل فيه أجدادنا جنرالين من الإنجليز من جملة خمسة جنرالات قتلوا فى السودان . وكيف كان زعمينا النعمان ود قمر أول فدائى شهيد فى السودان دفاعا عن عرض جيرانه . وكيف أنهم فى الشدة والبأس كصلابة صخورهم ولا تعرف قناتهم لينا 000000000. . وكيف أنهم يؤثرون على أنفسهم ويضحون بكل ما يملكون . وها قد أفشل الرئيس كل حساباتهم . فأين يذهبون . ؟
| |
|
|
|
|
|
|
|
|
|
Re: موقف مشهود لرئيس الجمهورية يعيد فيه الحقوق لأهل المناصير (Re: محمد عبدالله سيد احمد)
|
الأخ صلاح معذرة لعدم الرد
اخ صلاح نحن مبادئنا ثابتة وموقفنا ثابت وواضح تجاه كل قضايا السودان (دارفور وفى الجنوب وشرق وكجبار والشريك والمناصير وامرى )ولن تتغير ولكن زيارة السيد الرئيس للمنطق اشرنا فيه للجانب المضى منها وهوالتزام الرئيس بحل المشكلة بعد اعترافه بها واشرنا الى الجانب المظلم منها وحتى فتحنا بيه بوست ..
اخ صلاح طيلة الفترة الماضية فى هذا المنبر نتحدث عن هذه القضية ولكن نحن نشيد بمواقف الناس حتى نعطى كل ذى حق حقه ...
اخ صلاح طالما انو القضية الرئيس قال بحلها انااعارض كلامو فى شنو؟؟
| |
|
|
|
|
|
|
|
|
|
Re: موقف مشهود لرئيس الجمهورية يعيد فيه الحقوق لأهل المناصير (Re: azz gafar)
|
استاذنا محمد عبدالله شكرآ على التوضيح
نحن ثبتنا بأن السيد الرئيس اقر بظلم المتأثرين وهذ يثبت فشل مشاريع اعادة التوطين بأمرى الجديدة والمكابراب واصبح لا خيار الا الخيار المحلى ،لذا نطالب الرئيس بمحاسبة كل الذين تسببوا فى ضياع اموال الشعب السودانى فى مشاريع التوطين التى تمت بدون دراسة وتحت تصرف فردى من اسامة عبدالله ، ونطالب بدراسة جدوى اقتصادية وليست دراسة جدوى فنية لسد كجبار وسد دال وسد الشريك.
ونطالب ايضآ الرئبس بالتحقيق مع الذين ارتكبوا جرائم الفتل فى كل من امرى وكجبار وكل مناطق السودان ونطالب الرئيس ايضآ بإرجاع وحدة تنفيذ السدود وضمها لوزارة الرى كما كانت .
| |
|
|
|
|
|
|
| |
azz gafar
Frankly
العوض المسلمي
ناذر محمد الخليفة
عاطف عبدون
محمد فرح
Abdulla Ageed
Moawia Mohammed
علاء الدين يوسف علي محمد
ود محجوب
ود الخليفه
صلاح ليون
فيس بوك
تويتر
انستقرام
يوتيوب
بنتيريست