|
|
 من هم كتاب ال"صالونات "؟
|
Quote: عميق تحياتي ومليون دعوة لمباركة العيد وكل سنة وانتي طيبة أخر حاجة قريتها لك كانت في تذكر العم مدبولي واشياء اخرى كانت غاية في الابداع والانسانية.. تصدقي تمنيت وقتها لو كان عندي بت زيك انتي عارفة انه ولدت ولد واحد..
إعجابي بشجاعتك وخيالك وجرأتك في الكتابة لا تحده حدود.. والأهم من ذلك مواجهتك للحياة نفسها فيها إبداع وشجاعة.
اتمنى ان نلتقي وانا عارفة انه اعوامي ال73 تنذر بقرب النهايو المحتومة ولكني سأناضل لأبقى حية حتى اتمتع بإسقاط نظام القهر المتأسلم الذي بعثرنا ونلتقي من غير ميعاد مرة أخرى!!
ماما سعاد
الخرطوم في 10 ديسمبر2008 |
|
|
 
|
|
|
|
|
|
|
|
Re: من هم كتاب ال"صالونات "؟ (Re: خالد العبيد)
|
خالد الحبيب
لاننى كما ذكر حدهم كاتبة "صالونات"
اهديك هذا النص
حاجة سعيدة
تفتحت العيون في اسرتنا علي لمعة ضحكتها الناصعة واعتادت الاذن صوتها
متخللا الاوصال ، فتنام الاحزان بضحكة منها ، فهي تمتلك المقدرة علي جذبك
بمغناطيسها الضاحك المشع فرحا ، دعابة لا تنقطع قط .
منذ ان وعينا الحياة وهي امامنا وخلفنا ، معنا في كل لحظة لا نذكرها في غيابها الا وتجئ داخلة كخزانة جليلة مفتاحها مدسوس في قلوبنا .
لكل واحد منا مكانة خاصة بها ، فهناك من يعرفها وهي تميس في حلبة الرقص في حفلاتنا ، ايا كانت نوعية الحفل فهي الجرتق الذي ينسدل عطره علي كل فرد ، ويتشتت حريره علي كل من يود شبالا ، في المناسبات الكبيرة كالزواج ، تجئ باكراتوقظ من كان نائما ،تدخل رواكيب القلوب بزغاريدها ، تجئ من مدينة مدني حيث كان عم الجاك زوجها يشتغل هناك ، كنا لا نعرف اين تقع مدني لكننا نحبها لانها تجئ الينا كل حين بحاجة سعيدة مصحوبة دائما بعم الجاك وأطفالها الذين غدوا الآن رجالا ونساءا ، تدخل من شراعة الروح بلا موعد ، تطلق زغرودة الترحيب الاولي من( خشم الباب) ، ليصحو من كان متكاسلا ، ويفرح من كان محزونا ، فهي الحاجة سعيدة قد جاءت
- مبروك وبخيت ، بيت مال وعيال ، تغلبو بالمال ويغلبا بالعيال ، احي يا يمه ، والله والله دي نهزة من الساعة خمسة الدغش ،صلينا انا والحاج الفجر ، ومن ساعتنا ديك علي محطة( الباظات )الحمد لله (الباظ ) ما اتاخر، اها ، دحين وين بكان العواسة ، وفيها منو من اما ت (دزه )بري ديل ماناسي ، ولا اقول ليكن ، المرارة والكمونية ديل حقاتي ، اها النقوم نشوف حالي بي غادي .
الآن وقد مضت الاعوام كبرنا ( وكبرت احزانا )عمت الفوضي التي ضربت بعصي الموت والترحال ذاك المكان الزى كان بيتا كبيرا ( الحوش) هكذا كانت تسميته ، تدخله من ناحية شارع الفيل أو من زقاق الشيخ اسحاق حمد النيل فهو (فاضي معلم الله ) الا من بعض الذين يجذبهم الحنين الي ذكرياته وايامه المجيدة فلقد رحل من رحل ممن كانوا يصنعون الفرح والحياة فيه ، تآكلت روحه كما تتآكل الجدران الرطبة ، ولم يتبق سوي الذكرى نلوكها ونتعزى بها عن فقدنا .
الحاجة سعيدة رحمها الله يا لتلك المراة الحميمة الضحكة حتي لكأنك تعرف تلك الضحكة منذ ان كنت في رحم الغيب ويا لتلك الرقصة التي عرفت بها والتي ازعم ان من اطلق عليها ( الحمامة)كان قد شهد حاجة سعيدة وهي ترقصها ( الرأس يغوص حتي منتصف الظهر ، فلا تكاد تراه الصدر يعلو كابرع ما تكون راقصة الباليه ، الاكتاف مسدولة في ارتخاء تحسدها عليه ، والعنق يجئ ويذهب يمنة ويسرة في عذوبة ويسر، سبائب الشعر ( الديس ) تصل قرابة الارض ، لكنها تعود الي موقعهاالي صهوة الاكتاف ليستقيم العود الفارع ثانية ) كنت ارقبها وهي ترقص اتمني ان اكون في مثل لدونتها وبراعتها في الرقص الزى كنا نتسابق لمشاهدته ، ولعمرى كثيرا ما تصورت بعد ان تعرفت الي اغنيات الحقيبة انها حتام المعنية بكل تلك التخريجات الرائعة الكلمات ، والقصائد ، فلقد حكي لي جدي بشير عليه الرحمة انه كان مولعا ببيوت ( اللعبات ) وكانت هي مولعة بالرقص ، فكان بعد ان يهجد الكبار يناديهن للخروج ( مسارقة ) يخرج بهن كراع يخاف علي شياهه من الذئاب يدخل بهن الي بيوت اللعبات ولا يراهن الا بعد انتهاء اللعبة ( الحفل ) وما يزال بعض حبوباتنا وجدودنا يطلقون ذلك الاسم علي بيوت الاعراس ، وما يزال البعض ينادي وزير الرياضة بوزير ( بتاع لعب ) حاجة سعيدة علي وعد دائم مع الضحك حتي في احلك الاوقات ، لا تراها الا وهي ضاحكة لعلها ـ هكذا اتصور ـ ان اسمها جاء قبل ان تعرف القابلة ما اذا كانت ولدا او بنتا ، لكنها حين جاءت بنتا ضاحكة ، اسموها سعيدة ليتطابق الاسم مع المسمي الي الابد .
لم ارها حزينة الا بمقدار ما يعلو الحزن لحظة غابرة ، تعود بعدها لمداراته بضحكة لا مرسومة ولا مفتعلة ، روحها الصفاء ، ليست صاخبة ، لها قلب دافئ ، علي نحوها ، وطعم خاص ايضا ، حتي بعد ان تساقطت الاسنان ، ظلت الضحكة مشرقة والابتسامة حلوة ، بروح طفولية وبريئة.تشابه وجهها المختوم بشلوخ مطارق رفيعة وفم دقيق، وشعر (ممشط بالسلة )وانف افطس جميل ولون تشتهى الخضرة فيه، فهى لام جنوبية من ملكال واب من القطينة
لديها قاموسها الخاص مفرداته من صنعها ، فهي صانعة جيدة للكلام ، بمقدار ما ما يجعلك ترجح ان هذه الكلمات ، معدة لتتعاطاها حاجة سعيدة ، فهي مع الاطفال طفلة ابرع منهم مع بعضهم البعض ، مع النساء الرقة والعطف والعذوبة ، مع الرجال القوة والصلابة والعزيمة والكرامة التي لا تنحني لها ( جبهة) لغة لكل انواع البشر ، تخاطبهم فتحس مبلغ الاحترام بين الطرفين فهي ( حلال المشبوك ) وسند الضعيف ومفرحة الحزاني .
مع اولادها هي الام التي لا حدود لطاقة الامومة لديها ، ليتك تراها مع احفادها ،
ستاخذك الغيرة وتتمني ان تكون احدهم .
حين تهل فلا مكان ( لبوزممدود ) ولا لاحد ( حانف وشو ومطرم ) لانها حينذاك ستترك كل ما عندها وتجئ الي من كان( ممدود البوز او محنوف الوش او المطرم ) وتوجه كل طاقاتها الي اضحاكه ، لانها ستقول له علي رؤوس الاشهاد :- هي بس كدي هيا اب دزه ، ساو حجباتك امات بعر ديل ، اجي مالك هسي ؟ خلاس ؟ طار ليك ولا قام بيك ؟ جاك البعرفو مرض حامد ، من عويناتك ديل بخبرك هسي البنيات ما حلاتن ، زي النجف واسمح كمان ، ومالك حانف وشك كدي ؟ ماك شديد تحمد سيدك ، الشغل شعال واحسن وظيفة ، القراية ماخليت ليها حد ، البيت ماشاء الله تبارك الله ، العربية عندك تحمد سيدك ، الملالين عندك ، وحاشاك ماك بخيل ، اها نان مال عدوك ؟ انت قول خيروالباقي بنتم
فان كنت مكان ذلك الرجل حتام ستنفرج اساريرك لان طريقة الاداء لا تضاهي بابرع الممثلين ، من الكوميديانات ، وغالبا ما ترد عليها
- يا حاجة سعيدة ام المحن
وغالبا ما ترد عليك بقولها :
- اول البمرق النصيحة ياهو العندو المحن ؟ هسي أقول ولا ... بالله كان اقول ، بت الناس المزازي بيها دي ، اجي اجي ، ولا قايلني ما عارفة ؟ الضحك والتكشم بلا غرد ،يندخرلك ، ضحكن يجيب الرايح ، ولا قايلني ما بفهم غرودة العيون ، والتسبل ، والحس الناعم ؟ هوي با ولد ارعي بي قيدك ، خلي البشتنة البتسوي فيها دي وقوم علي حيلك سد مالك وشوف احوالك ، ولا والله ان ما سويت كدي ياني الشايفا ليها عريس هايش وكباب درايش واخلي خشمك ملح ملح ، اجي يا يمه ، البشتنه ما سمحة والسترة واجبه بنات الناس ماهن لعبة ، والله باكر تقول حاجة سعيدة قالت ، الله يديك العافية واللقمة الدافية ، والنية الصافية الكلام عجبك تتكشم بلا نارالقصب ، والرجفة ، اجي يا بنات امي شوفن جنس السخته دي ؟ اها اها لمن شعرة جلدي كلبت نان يا ولدي العرس ما سمح ، وهي ذاتا بتا هدية ورضية ، الغنماية تاكل عشاها ، والكلمة الباردة من حشاها ، والسماحة حقتا تب ، بتا تختها في الجرح يبري ، لا نضامة لا حوامة ، لا لوامه ، اللون يا الله بجيك وتسالني الدهب المجمر ، طول كدي ، مستورة ومحضورة بتا لا بتقلب الكلام لا بتخرب النظام ، مادبه ومهزبه ما سمعنا زولا قال تب عليها مالك يا ولدي ؟اخير ليك من هسي شوف جناك الولادة ( سغرة) سوي ليك تيرابا يشيل كبرك يشيل اسمك ويعدل هدمك ، قوم علي عمل الخير الله يجازيك بكل خير ، قوم الله يرضي عليك ويديك الفي مرادك وتخرف وسط اولادك
يا ود بتول بت الما فيها قول ، ونحنا غير صالحك ما دايرين ،
وغير سمحكن ما طالبين ، ولا ما ياهوكدي ؟
هي هكذا دائما مهزارة في غير ما ابتذال ، مدرارة لحلو القول ، تدخل البهجة الي قلبك قصدا ، رحمك الله عمرك ايتها المرأة الرائعة
هيوستون / 1999
| |
|
|
|
|
|
|
|
|
|
Re: من هم كتاب ال"صالونات "؟ (Re: سلمى الشيخ سلامة)
|
وان كنت احد كتاب الصالونات
من اين جئت بموية البلاعة لتكون من مسامى وتخرج هكذا؟
الشوق لماء تدلقه حسناء
ويسالونك عن الشوق قل الشوق مرابض هنا واشير الى قلبى
صار الشوق عمودا فقريا في حياتي اقول اني اشتاق كل شئ كل طقس من ( دق الريحة) الى ( موية البلاعة )
اتذكر الان بجلاء كيف ان حوشنا الكبير ذاك كان يبتلع كل ماء دلقناه فيه من فائض ماء البلاعه ، مع ذلك نحن مجابهون بصياح امى وابى :
ـــ يا اولاد البلاعة ملانه الداير يستحمى اليغرفا عشان ما تكسر
النداء رغم جمعه الحاوى للجنسين ضمنا لكنه موجه للا ولاد على الارجح لان البنات كن يعرفن كيفية السيطرة على الموقف ، الاولاد غالبا ما كانوا يستنكفون العملية بخاصة حين يكون الواحد منهم علي عجل فلا يتردد حينذاك فى دخول الحمام دون مبالاة ، حينها تفيض البلاعة ، تطفح المياه الي حيث تجرى باتجاه الجدول الصغير الذى يمر تحت شجرة غرستها ذات اخضرار يد هدى رحمة الله عليها ، كانت لها الرحمة مسكونة بالاخضرار حميمة معه لدرجة انها تركت كل دراسة رشحت لها ودرست الزراعة ، كثيرا ما كانت تدخل في مناوشات مع الوالد رحمه الله ، فلقد ظلا معا ينقلان الينا الاخضرار وشيجة فى البيت الكبير فى ام بدة خصومتهما كانت دائما حول السماد 0
حين انتقلنا الى السكن فى بيت امبدة لم تكن مزروعة فيه سوى شجرة مهوقنى (حدثونى انهم قطعوها ) امتد ظلها الى بعيد مرمى ، كانت تجاورها شجرتا (ليمون وقريب فروت) فى الحوش الامامى قبالة(باب النسوان )كنا ننام بين مرماهما لكنهما اختطفتهما يد القطع ذات يوم
عدت من مشوار الحياة اليومى فلم اجد ايا منهما ، بكيتهما لسبب ما ، ربما لانى كنت اداوم النوم تحت ظلالهما او قريبا منهما بحكم موقع سريري ، احس الان مرارة فقدهما 000
كنت لحظة تفتح الباب ( باب النسوان ) الصغير دائما ! والذي يفضى بك الى زقاق صغير نسبيا ، لا ترى سوى تلك الاشجارفتبدوان كغابة مقترحة للفرح ، ينشرح قلبك ، تحس ان الامل شجرة ،خاصةحين ترتد اليك رائحة الشجر المبلول اوراقه بماء الخريف الجامح ، يا لهم ، لم يدعوها تثمر !!
( نرشرش ) ماء البلاعة فى ذاك الموقع الذى بات الان خاليا بدعاوى تثبيت التربة ، فالماء ليس مؤهلاالا للشرب ، لكن موقعهما تحول الى الم لن تشفى جراحه
يندلق الان ماء البلاعة في ذاك الموقع ،مارا عبر الجدول الصغير باتجاه الجنينة التى سوروها بالفايكس الزاهى الخضرة ، بعيدا عنها قريبا من الباب الكبير ( باب الرجال)تقف العنبة ( رامية فى بيتنا ) لا اذكر كيف كان سقياها 000
هدى كانت معنية بكل اخضرار تصادفه دوما تثبت انها ( صاح ) مع والدي فيما يتعلق بالسماد
ـــ يا ابوى الشجر ما تخت ليهو الفضلات حقت الجداد ولو ختيتو ما حاجة كتيرة ، حاجة بسيطة كفاية
لان(الجداد) كان ينكت السماد ، وتنكت هى الاخرى ما بداه الجداد لانها كانت تخاف على شجرة اللارنج الليمون والبرتقال
لا اعرف من يهتم بتلك المزروعات الان بعد رحيلهما ، عليهما كل الرحمة واخضرار الاخرة
هدى كانت تحدثنا عن خطورة ( موية البلاعة ) علي الشجر والزرع
ــــ يا اخوانا الشجر ما تسقوه بي موية البلاعة عشان البكتيريا بتكتل الشجر
لكن مين يسمع ؟
كل يوم منذ الصباح الباكر وانت تسمع صوت (الكركرة ) لذلك ال( كوز ) الذى كان ذات يوم ( علبة لبن ) وهو يكركر في قاع البلاعة ، تخرج ارتالا من الطين الاسود ، والدي كان يضعه في صحن قديم حتي لا تتسخ الارض بتلك الالوان السوداء
البلاعة الان (فاضية ) تدخل الي الحمام ، وانت متيقن ان الجردل الموضوع الي فتحة الماء الخارج مساوية لماءحمامك ، لكن ، تخرج من الحمام بعد ذلك الفاصل الغنائى الذي ظننت نفسك فيه احسن مطربى الكرة الارضية ، ( غالبا ما تندلق الالحان اليك في الحمام رغم التنبيهات ان الغناء في الحمام كعب ، وان الشياطين تستحم معك، لكنك لا ترعوى ، وتغني ) حين تخرج ، بعد الفاصل الغنائى ، تجد انك امام امر لا ثانى له (لازم تغرف البلاعة) ، وحينها ستكره نفسك لانك ( الولد القيافة) وما فى زول حيغرف ليك البلاعة الانت مليتا ، ولو كنت في بيتنا فان الافندى سيشن عليك حرب الخليج الخامسة
( انا هسي غرفتها مسافة جبت الصابونة من الدكان القاك مليتا ؟ ما عندى شغلة بيك ــ تغرفا ، يا سكينة ما تكلمى ولدك دا ؟ خليهو يكون عندو زوق
ــ لكين يا خال ما عندى مواعيد
ــ وانا عندى عرس ؟
ــ خلاس المرة الجاية والله اغرفا ليك ، كدى قول خير
البنات كن ينتهزن فرصة امتلاء البلاعة يتسارعن الي انجازذلك الفعل خاصة حين يكون هناك ضيوف ( صبيان ) في البيت ، فغاية الكرم ان يفعلن ذلك ، ربما للفت الانتباه ، او لغرض ما ، او ثمة من تحلم بمروه تلك اللحظة ، يدفعها شوق خفي لاداء تلك المهمة ، فتفعل ، وتراه او يراها ، احيانا تخضع العملية لتوقيت القلب ، والتلباثي تحت غطاء ( القلوب شواهد) خاصة ما بعد الظهيرة لحظة عودة الافندية من الشغل والطلبة من المدارس ، فتلتقى العيون ، وتهمس الارواح همسا لا يعرفه سوى من احب ، لا حديث س، او النظرات المتواطئة وغالبا ما تكون بفستانها ليراها
ايوا/2003/
| |
|
|
|
|
|
|
|
|
|
Re: من هم كتاب ال"صالونات "؟ (Re: سلمى الشيخ سلامة)
|
Quote:
وان كنت احد كتاب الصالونات
من اين جئت بموية البلاعة لتكون من مسامى وتخرج هكذا؟
|
وأما البالوعات يا صديقتي فأتيت بها من عمق شارعنا السوداني المليئ بالبالوعات والقاذورات
وأشياء أخري لا مجال لسردها ! تعجبني يا سلمي أنك بالرغم من وجودك في بلاد العم سام تظلين دوماً
محتفظة بغبار (شوارعك) تظلين مهمومة بالمعايش والاذاعة والتلفزيون وأصدقائك وصديقاتك تتفقديهم
تكتبين عن وجوه ما رأت من أمر الصالونات شيئاً لكن تقول شنو بس يامواطنة !
أكتبي يازولة بالله وبلاش معارك معاك !
| |
|
|
|
|
|
|
|
|
|
Re: من هم كتاب ال"صالونات "؟ (Re: سلمى الشيخ سلامة)
|
العزيزة سلمى بت الشيخ
عشان بس تعرفى معزتك عندنا .. ما فى اجمل كم كلام الراحل ابو امنه حامد ليكى فى الصباح .. و الله يسعد أيامك ..
بنحب من بلدنا ما برّا البلد
سودانيّة تهوَى عاشق ود بلد
في عيونها المفاتن شئ ما ليهُ حد
التّوب المهبهب فوق أم الضّفائر
والخد المعطّر زي أحلى الأزاهر
والخطوة الأنيقة ترنيمة مشاعر
أنا بيك كل عمري بمشيلها وبسافر
مين في الدّنيا ديَّ أجمل من بناتنا
الليهن قلوبنا والفيهن صفاتنا
الكامنات بروحنا والعايشات في ذاتنا
في حلفا البداية أحلامي وهنايَ
أنا عايش لحبّي المخضر برايَ
النّافرة الأليفة ست روحي وهنايَ
أنا ليْ في كريمي شايقيي بشلوخها
نعتز بي صفاتها ما نجهل تاريخها
وما ها المابية ريدتي مو ياها المسيخة
في شندي العظيمة تلقى بنات جعل
واحدات في المتمّة زي لون العسل
النايرات خدودِن زي فجراً أطلْ
في سنكات بنعشق في السّمراء وأبيّة
ترتاح في الضّريرة خُصلاتها الغنيّة
عاشت في شعورى أحلَى هدندويّة
الوارثات جدودن في الجّود والشّجاعة
البظهر جمالن من زمن الرّضاعة
سودانيّة ميّة الميّة في ذوقها وطباعها
ياناس أرحموني انا قلبي في رفاعة
لوزة القطن اليانعة السّمحة ونضيرة
تِتّنَّىَ الحليوة في مشية أميرة
أجمل حب عندي في قلب الجزيرة
ليْ في الغرب أغْيَدْ في دار حَمَر والبقّارة
نحميها بسيوفنا تفّاحة ونُضارة
تسكرنا الليالي وتطربنا النُقّارة
ليْ في جوبا ساحر تسلم ليْ خدودُه
يمرح في غاباتُه ويسرح في ورودُه
حبّي الغالي ليهُ ما بعرف حدودُه
| |
|
|
|
|
|
|
|
|
|
Re: من هم كتاب ال"صالونات "؟ (Re: زهير عثمان حمد)
|
كويس انو تاني جات سيرة البحر
تعرفي يا سلمي المشكله هنا في المنبر دا
واحد زيي كدا يجي ينزل ليهو غنيه
يجي زول زي خضر حسين صاحبي دا يقول لي يا سلام يا عاطف يا مبدع
ويتكرر الحصل يوم بعد يوم لمن اصدق انا المسكين القدامكم اني مبدع
زيي زي يحيي فضل الله وزي خطاب حسن احمد وزي سلمي وغيرها
ولمن يجو ناس خطاب ينزلو بيان واكتشف اني ما محسوب مع المبدعين
ساعتها حفتح الف بوست اشتم فيهو الابداع والمبدعين
والحقيقه الماقادرين يستوعبوها الناس ديل انو الناس ما سواسيه في الابداع ولا في تلقيهو
و الناس الصدقو انهم مبدعين هم الشنو الحرب علي الابداع هنا
لكن حيظل (خطاب) هو (خطاب) بي ابداعو
والمابحصلو حيفضل يجدعو
وما حيحصلو
..................
سلمي
معليش لو خرمت من البوست
| |
|
|
|
|
|
|
| |
سلمى الشيخ سلامة
خالد العبيد
mohmed khalail
Saber Abdelhadi
عبدالوهاب علي الحاج
خضر حسين خليل
اسعد الريفى
سفيان بشير نابرى
زهير عثمان حمد
عاطف عبدون
فيس بوك
تويتر
انستقرام
يوتيوب
بنتيريست