/*/*/*/ بحــر الــــــزُرُق /*/*/*/

مرحبا Guest
اخر زيارك لك: 05-04-2024, 11:21 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف الربع الاول للعام 2009م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
01-10-2009, 05:31 PM

فاروق أبوحوه
<aفاروق أبوحوه
تاريخ التسجيل: 07-26-2008
مجموع المشاركات: 2242

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
/*/*/*/ بحــر الــــــزُرُق /*/*/*/


    بحــر الــــــزُرُق


    يانيل أتمد على كيفك ونوم ..
    يانيل أنشر فوق قيفك وقوم ..
    قبال يجينا اليوم ..
    يا خير أتمدد وأخلف الأبيض فوق الأزرق
    خلى جروف الزُرُق التغرق
    مِد إيديكَ علينا جداول ..وخدّر فرع الإلفه الشايل
    سلِّم لينا على تيرابنا ..
    طمِّن لينا قليب قيسابنا
    يوم تتمد عليهُ مناجل
    بكريك بالدوم.. صحّى النوم..وزيد الكوم
    يانيل تعال ..بكريك بريال ..بكسيك هدوم
    يرضيك الحال .. مَحَلْ ورمال ..وبُور مردوم؟
    لو عارض عرقك (سار) ..أو غيَّر ليك مسار
    ألبسنا دميره وطين..دفِّقنا عليك أنهار
    الموجه الشابى صديره.. والقسوه الماشابه
    راجيها ( الكرُوُ ) يتشابا..مشتاق لى قوس نشابه
    جابداهُ عليها دميره ..
    يالبحر الساقى الجوف بالحِن..فوتاتك لينا كتيره
    من جرفاً أخدرمشبوك .. بنخِّيت ليك حريره
    نجرتق (عِرقك ) الدافر ..نخمج الشيمه ضريره
    تتشبّل من نخلاتنا .. وتغنى جزايرك سيره
    تباطِن كل جنياتنا .. وتقالد كل شِديره
    تزغرد ( كرده ) وقيفه .. وتفرهد شتله وريفه
    ويجيك ( اللُوبا ) مسيره
    يا نيل يا دِرِب العافيه ..ياحليل الموجه الكانت
    بتجيب المسره الشافيه ..
    والرمله الكانت صافيه .. ردمتنا وراك بالسافيه
    من بعدك يا وآلدنا ..لا فرحت شتله ولا واسوق
    لا ( تقنت ) نام متهنى ..بى مويه وبى ماروق
    حيضانك يابسه تحنِّن .. فى شقوقه ( الجِندِب ) يجنن
    صعبان عليها الطين .. يا ابونا فايت وين ؟
    قصرنا فى حقك ؟ والله البراك مستغنِّى ؟
    شقينا جوف عِرقك .. سدارى ضهّارى
    وبى فرحه بنغنِّى ..
    فتّحنا سقايك .. شان تجرى متهنِّى
    تيرَبنا قمحاتنا .. رقّصنا سمحاتنا
    ليه الخصام يعنى ؟ قاطعتنا وفتَّ ؟
    وأيه باقى غير هدّام ..
    يبّستَ تمراتنا .. حتحتَ حباتنا
    جهجهتَ مسراتنا .. خليته واطاتنا ..
    للمويه بتنادى
    خليها جياتك .. حتى الزياره حرام ؟
    تحرمنا من ذاتك ..
    فد جيَّه فى فد عام .. ( بتَقتَ ) للأحلام
    فرّحت جنياتنا .. ونحرتَ للهدام
    وقبال نرحب بيك ..نفتح تُرع واديك
    تشرُد تبكى الناس .. تحفر تقُص دربك
    وما تلقى غير جمّام ..
    من فُتَ يا طيّب .. لا بتطرا ولا بتنشاف ؟
    لا شوق لى عهد قديم .. لا دفَّه .. لا مقداف
    دردرتنا يا نيل .. (بالجابيه) (والختّاف)
    شوف الكرد محروق .. من يومه ما خدّر
    زى زول صبح مسروق .. لا ساقيه لا (شرشر )
    (فازقيتك ) الماهله فيها ( الورل ) كركر
    (والسحلِى) (وام سيسى) ساكنين تقول عنتر
    كانت إنت ناسينا .. ليك نحن نتذكّر
    ما هد حيلنا الخوف .. إلا العطش فتَّر
    منعول أبوها سنين ..
    شهّتنا لى خيرك .. لى شربه يوت بالهِين
    لى سرحه فى جِزيره .. لى ( بُوقة) البرسيم
    لى شدره شاله الموج .. لى نظره فى (وِزِين)
    عايم مع ولادو .. بيغنّى بين موجتين
    تطرا الزمن آخُوى .. كيف كنا يوت نلعب
    الرِمّه والحرّاس ..العوم فى نص النيل.. الغتسه شيلة الكاس
    يا حليل مراكبنا الزمان .. الكُنّا فيها نفوت
    نقدِف على الموجات .. نقنص نمرق الحوت
    كم ضُقنا من غرقات .. كم ضقنا من علقات.. من (المليح) بالسوط
    كيف ننسى ماضينا .. مهما الزمن بفوت؟
    تاريخ مسطر بالتعب ..من غير كعب .. محفوظ فى جوف تابوت
    تذّكروا آجنيات حين كنا ندّلى .. للقُمرى و(الدِفيق) .. ونفارق الحِلَّه
    ونعدِّى لى (نسرى) متوكلين والله
    قاطعين على مُركب .. كان قلت (أُف) بتفوت
    تذّكر آلمبروك مركبنا ديكَ (بهوت)
    نحَلِب بقيراتنا .. مع المغارب يوت
    نشرب نقيف (قِربه) ..نديهو هين مويه .. وللحِلّه فد قرَبَه
    تذّكروا آجنيات ..
    يوم التلاقى (المِستِر ) ..رابط علىْ الواسوق
    عايم على ضهرو .. يكسح بلا أبكروق
    فى إيدو(سنهورى) .. فى التانيه سِن محرات ..فى سدرو سعن الروب
    ويكورِك : ( آنِعمان) عجّالك العاديات.. ديل فرنبن القصبات
    ديل كل يوم ساربات.. حرِّص شديد آخوى ..خلى الحبل مطبوق
    وبى غادى حاج بكرى .. زولاً هدى ودُغرى
    ما بفوِّت العشمان .. لا بظلم المكرى ..
    كلامو (الحمد لله) ..سلامو (الحمد لله )
    وحمد الرب حديث طيب ..ومن بدرى .. يكيل ميزانو بالتبرِ
    وشكر النعمه زيّاده .. لو الخلوق تدرى
    والطيب الفتراوى زولاً بصير وبداوى
    مع (النجّام) تلفاهُ بدراوى ..وعلى الحِلّه يتشرَّف يضاوى ..
    راجى الفطور مريوق .. ملاحو الليله (ساساوى)
    ناساً عُدال بالحيل .. والزول بتمنى كل يوم يصابح ديل
    لكن زماناً مر شبّعنا فى البهديل..
    يا حليله (أم صوفه) من وجع العطش .. الفيها بقت معروفه
    الزومه السبحه المنضومه..المحل الفرزع كومه .. والوجع الودر نومه
    الخير الكان فى ( فايق ) .. الزاد البال الرايق .. السيل الكان مضايق
    (وخير من ساكت) سكتت غصب .. يبس الخدار الكان متشابك
    ملعونه أيام الأوجاع ملعون الزمن الجابِك ..
    (حضيرى) الصبحت كيرى .. العشم الحيرى الطيرى
    ( الدامبويه) الشرقت بالمويه ..
    الأرض الكانت جيابه .. لى غيرا قبل أصحابه
    العطش اليتّم إنجابه .. فى الراحه تساسق (ساسويه)
    (التِِسَع) الحضن الربانا..كبرنا وخيرنا الأدانا
    إنشلت يبست سيقانا ..حيرانه و ساهيه ومحلانه
    والناس بى درب الرى .. كوراكن يسوى الصى
    ومن غادى فوق ناقه (حمراى) و(عبد الحى)
    (كرموش) على ترسو .. أبعد بعيد آجنى
    وعباس ود عبد الله .. زولاً نجيض حرّات ..
    أتقهوج إتدلى
    قبل الشمس تشرق إدلى دليَّات ..
    كان خمسه ..كان عشره .. وبديِّر البقرات
    زمناً سمح بالحيل .. ما زيو فى الأزمان
    ناسل كرام زى نيل ..(البرعى) ناس (بوجان)
    (ود البشير) السيل .. السبحه والقران
    وسيد القدح والكوم .. شيخنا الكفيف (مَحَكوم)
    والأبلج الصلاّى .. الطيب السمعه
    من الخميس بدرى بتوجه الجمعه
    (وندر) مع ( السندوك)..(شيخ السلم) مع (حريبات)
    (كرموش) و(أبو شاديه)..(أم بحير) زمان الخير
    إتناقرو يهرجو .. فى الضل على الجامع .. يتذكرو (الميجه)
    يتسلو بالسيجه .. يتلاعبوكل يوم مابخلو تب شافع
    زمناً رخى ودغرى.. ماتت ملامح صورتو
    لا ودّع الجيران ..لا شارنا فى فوتو
    ما قنعنا من خيرو ..وإتشرطت نوتو
    بعد اللبن إدوا العِجول .. الليله فى كورتو
    مُصّار مشحتف ساي .. من زيرنا كان مويتو
    الفاتحه للراحو .. والكل بضوق موتو
    والله الزمن دولاب .. يوماتى فى حاله
    تصبح ملانه عذاب ..تمسى الفرح فاله
    مالدنيا دلوكه .. غشاشه بطّاله ..
    بتاخد عرضتك فيها ..بعدك عُقُب رِجّاله
    وزمناً عديل بالحيل .. سافر معاك يانيل
    آخر كلام آبحر .. كان جيت ياك مشحود
    إياك مُرُوة الحيل ..العافيه والمقصود
    وكان رحت بى غادى ..وقلت الشرق تنسى
    راجنك كان ترجع .. كان بكره كان بعدو
    كان بدرى كان تمسى .. وما تنسى
    زيد الهدير .. شد المسير .. أملانا خير
    من العمير راح الكتير ..
    والباقى كم ؟
    الله العليم
    الله الكبير
    هو الدبير.


    (عدل بواسطة فاروق أبوحوه on 01-11-2009, 07:46 PM)
                  

01-10-2009, 08:11 PM

فاروق أبوحوه
<aفاروق أبوحوه
تاريخ التسجيل: 07-26-2008
مجموع المشاركات: 2242

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: /*/*/*/ بحــر الــــــزُرُق /*/*/*/ (Re: فاروق أبوحوه)

    أيام ..

    في بواكير العمر..

    تتردد في ذاكرة العشق..

    للأرض ..

    للحياة.

    للجذور.


    فاصمت أيها الصدي..



    فما زلت أعي ..


    الصوت.

    داخلي.
                  

01-11-2009, 06:16 PM

فاروق أبوحوه
<aفاروق أبوحوه
تاريخ التسجيل: 07-26-2008
مجموع المشاركات: 2242

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: /*/*/*/ بحــر الــــــزُرُق /*/*/*/ (Re: فاروق أبوحوه)

    فما زلت أعي ..


    الصوت.

    داخلي.



    ،،،

    رغم ..

    إعياء ..

    الخفوت ..



    رغم ..

    أعباء ..

    البعد ..

    وهذه الغربة .



    الموت.
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
 اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين 		News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de