|
|
|
 Re: رسالة إلى أصدقائي في سودانيزأولاين (Re: هشام آدم)
|
السلام عليكم....الأخ/هشام ادم...
ده كلام جميل جدآ...ومرتب...
الصداقة من اسما العلاقات الجميلة.....
كل العلاقات فى الدنيا تبدآ بالمعرفة...والغوص بعد ذلك فى شخصية من تعرفه و تستلطفه..وقد تجد ضالتك المنشودة فى شخص ما وتتقاربوا وتتعاملوا حتى تنمو الثقة بينكم .
وتتوج هذه العلاقة بهذا المسمى الجميل الصداقة التى مبعثها الصدق....
هنيئآ لك بأصدقائك....والتحية لك ولهم......
إسماعيل محمد احمد عباس....
| |
 
|
|
|
|
|
|
|
|
Re: رسالة إلى أصدقائي في سودانيزأولاين (Re: ismeil abbas)
|
| Quote: وتتوج هذه العلاقة بهذا المسمى الجميل الصداقة التى مبعثها الصدق |
الأخ: إسماعيل عباس
هذا كلام حقيقي وقافز على الواقع في نفس الوقت. الصدق كقيمة هو ما نبحث عنه في كل علاقاتنا حتى الكراهية. يقول البعض أن الكراهية هي الأصل، وأن الحب هو استثناء، وربما يكون هذا الكلام –على حدّته- يحمل في طيّاته بعض الحقيقة. وربما لهذا نُفسّر جمالية الحب، وعدم قدرتنا على معرفة لماذا نحب. والبعض الآخر يرون أن الحب يستوجب التبرير بالأسباب، فأنا أُحب فلان من أجل كذا وكذا وكذا، ولكنني قد أكره شخصاً من مجرّد النظرة الانطباعية الأولى. تُصبح قيمة الصدق الحقيقية في أيّ علاقة هي مقدار الصدق مع النفس في المقام الأول. وربما تكون الحقيقة في أنّ الحب والكراهية هي مشاعر ذاتية لا علاقة لها بالآخرين، فأنا أحب فلان لأنني أريد أن أحبه، وأكره فلان لأنني أريد أن أكره، فمشاعرنا تجاه الآخرين هي التي تجعلنا نشعر بالرضا عن أنفسنا عبر تفاعلنا مع الآخرين؛ ولهذا فإن الحبيب إن فعل ما فعل، فإنه لا يُنقص من حبته في القلب شيئاً، وكذلك العدو، فإنه إن فعل ما فعل فإنه لن يُنقص مع كراهيته في القلب شيئاً. هذا الإنسان كائن عجيب!
أشكرك يا عزيزي على كلامك الجميل والمؤثر
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: هشام آدم)
|
| Quote: يرغبون في رؤيتي دائماً كما يُحبون. |
سلام يا هشام
كيفك بالله انت برضو مرات بتحب لله في لله وتكره لله في لله كدا زيييينا كدا يعني
وش مليااااااااااان ضحكـ .......... ومحبة لشخصكـ الأنيق العبارة .
أصدقاء بحق ويحق لك ان تفاخر بهم أصدقاء وليس عبدة ظن .
.....................................................................حجر.
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: انعام عبد الحفيظ)
|
الأستاذة: أنعام عبد الحفيظ
كل شيء ينطلق من عند أنفسنا وينتهي إليها دائماً حتى الحب والكراهية، وفي بوست سابق بعنوان (THE FRIENDS ) قيل كلام جميل وجيّد عن الصداقة، شارك فيه كلٌ من الأستاذ: أبو جهينة بمداخلة ذكية ولطيفة جداً، وكذلك صديقي العزيز: معتز تروتسكي، ومما جاء في هذا البوست: | Quote: أكثر ما يدهشني في شأن الصداقة والعداوة، أن كلّ صداقة تنتهي تتحوّل مباشرة إلى عداوة، فيما لا يتحوّل أعداؤنا إلى أصدقاء بالضرورة عندما تنتهي العداوة! هذا الشيء مُحيّر، ومثير للتساؤل. وبين نشوء العداوات والصداقات هنالك عامل –لا أقول خفي- وإنما مُستتر، لا بُد من كشفه. |
أتمنى أن تقرئي ذلك البوست، وخصوصاً مداخلة الأستاذ: أبو جهينة فهي مداخلة قيّمة جداً
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: محمد مكى محمد)
|
دا شنو يا هشام آدم :)
انت ( الجكة والسويدي ) بتاع امس عمل معاك حاجة بقيت تحبنا كدة ..!!
غايتو شوف مبدئياً ان متضامن مع الانسانية ولن اعلق حتي حضور تروتسكي ابو صلعة ..هههه
* ياخي جد ما عارف اقول ليك شنو ؟ اصابعي قدام الكي بورد زمن وهربت الحروف .. هسع لو شاكلتني ما كان النضمي طلع اسهل واحسن من كلامك المرتب والجميل دا وعارفني قادي تعبير ..
بس بفهم حاجة يا هشام الحب والاحترام والمحافظة على المبدأ اصعب ما يبحث عنها الانسان .. وياريت تجتمع ليهو ..
بالجد ذكرت واحد من اجمل وانقي واوضح الناس هنا صاحب مبدأ رفيع وكلمة حق للاعور في عينه ( سمير شيخ ادريس ) .. احترامي له وربنا يجمعنا بساعة خير ..
تحياتي
* اوعك تاني تعمل كدة هسع تروت يتفشي في منو يعني :):)
| |
|
|
|
|
|
|
|
|
 Re: رسالة إلى أصدقائي في سودانيزأولاين (Re: HAIDER ALZAIN)
|
Quote: أكثر ما يُعجبني في أصدقائي إنهم لا يُجاملونني، وإن جاملوا فإنهم لا يُبالغون في المُجاملة، وإنهم يقفون في وجهي دائماً مدفوعين بدافع الصداقة المحبّة، فيُقيمونني إذا اعوججت، ويُصححونني إذا أخطأت، وينتقدونني إذا أخفقت. يرغبون في رؤيتي دائماً كما يُحبون. هم مرآتي
|
هشام آدم
يا سلااااااااااااااام
ديل نعم الاصدقاء ...ابقى 1000 عليهم
لانهم انقرضوا الزمن ده... وبقى فى تملق اجتماعي
و ربنا يخليكم لبعض
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: فادية اليمني)
|
| Quote: لانهم انقرضوا الزمن ده... وبقى فى تملق اجتماعي |
الأخت: فادية اليمني
تصدّقي إنو التملّق الاجتماعي ضروري جداً، ورغم ضرورتو دي إلا إن بيكون مسيخ بين (الأصدقاء). جميل جداً إنو نجامل بعض، والبعض دي أكيد ما داخل فيها الأصدقاء لأنهم أبداً ما بعض، فالأصدقاء ذوات موازية لذواتنا الخاصة، فهم ليسوا بعضاً بكل كُلاً، وهم شواذ القواعد الاجتماعي بكل خصوصيتهم وخصوصية علاقتنا معهم. وعشان كدا يمكن ما أزعل لو زول غلط في حقي، لكن أكيد وقطع شك إني ح أزعل لو غلط صديقي في حقي، الغلطة بتكون أكبر بكتير، وعلى قدر الزعل ده على قدر ما تكون الصداقة؛ ما المسألة في النهاية عاملة زي قانون الإزاحة بتاع أرخميدس (قياس كتلة المادة من خلال غمرها بالسائل، وبقدر كميّة الماء المُزاح تكون كتلة المادة)، لكن لو كان شخص (عادي) بالنسبة لي، فأكيد تصرفاتو ما حتهمني لأنه هو زاتو في عظمو ما مهم بالنسبة لي، وبالتالي فمكانتي عندو ما مهمة، ولا تقييمو لي برضو ما مهم
حسي عليكي الله ما لي أفتخر بأصحابي ديل؟
غايتو الله يديم المعروف
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: HAIDER ALZAIN)
|
| Quote: بس بفهم حاجة يا هشام الحب والاحترام والمحافظة على المبدأ اصعب ما يبحث عنها الانسان |
حيدر الزين يا صديقي ...
جكّة أمبارح دي خلتني ليك أصحى الصباح رايق جنس روقة كده، زي لمّن الواحد حبيبتو تصحّيهو ببوسة. مزاجي رايق، ومنداح كده، وما عندي مزاج في الشكل خالص. فلو عندك أيّ شَكَل عليك الله وفّرو لي وكت تاني، وإنتا ما بتعدم طبعاً. أما الوغد معتز تروتسكي، فلو جا بنتّف ليك ريشو قبّال ما يتفاصح بي كلامك الكتير داك، لأنو المقام ما مقال (حِيط) خالص!
كلامك الفوق ده جميل بالجد، ووقع لي تماماً.
تعرف يا حيدر ...
مرّات بيكون رأيك في فلان إنو زول جميل ورائع ومؤدب وراقي، وفي نفس الوكت، يكون في زول تاني شايف عكس كده تماماً. الحقيقة إنو إنتا صاح في رأيك عنو، والزول التاني برضو رأيو صاح في رأيو عنو. تبقى المُشكلة وين؟ هل هذا الشخص عندو انفصام في الشخصية بحيث يكون مع ناس مؤدب ومحترم وراقي، ومع ناس تانيين يكون العكس؟
تعرف المُشكلة وين؟
في الحلقة القادمة بحكي ليك :)
| Quote: اوعك تاني تعمل كدة |
تأكّد إنو الحكاية دي ما حتتكرر تاني :)
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: haroon diyab)
|
Quote: وفي مكان غير هذا
كتبت ( انا احبك لله في لله)
ماعارف ليه |
يمكن بذكّرك بشبابك؟ :)
غايتو لو قلتَ ليك:"أحبك الله الذي أحببتني فيه"
بيجيني الرفاعي عبد العاطي ناطي ويقيف لي في
حلقي .. فخلينا في سرّك يا حنين
تسلم وليك مني ألف تحية
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: بهاء بكري)
|
الأخ هشام..
شكرا علي البوست والذي هو وان كان معنون لأصدقائك الا انه يصلح رسالة طيبة للجميع..
جميل أن نبحث عن الكيف قبل الكم..
لكن مالذي يمنع من نوسع دائرة الكيف "حيث يوجد استحقاق" حتي يزيد الكم؟؟
الكلمه الطيبه بجانب أنها صدقه..هي اذن تلقائي للمرور للقلوب..
الكلمه الطيبه وليست المجامله الخاوية اوالمجامله في غير مكانها..
الكلمة الطيبه هي التي يجب ان تكون اساس المخاطب’ بين الجميع وهي قطعا لا تمنع توصيل الآراء
بصدق ووضوح..
تحياتي لك وللجميع..
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: Muna Khugali)
|
ود آدم
الدهب زي كلامك دا في الأصـــحاب !
أها وكيف نصاحبك نحنا ؟
عطائي لأصدقائي عــــطاء لا حدود له
عطاء آخره الماده واوله وجودي بينهم ووجودهم فيني !
الله يخلي ليك أصحابك ويخليكم لبعض
غايتو أنا قطعته الكلام الزي الدهب دا ورسلتو في رساله خاصه لأصحابي !
سميك
هشام
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: Hisham Ibrahim)
|
أخوي هشام إبراهيم
ما عارف إذا كنتَ أنا براي كدا، ولا في ناس زيي في المسألة دي، لكن بحس بانجذاب غريب لكل شخص اسمه (هشام)، ونادراً ما أجد أن هذا السمي مختلف عني كثيراً. ولكن خليني أحكي ليك حاجة خطرت على بالي حسي، وما عارف المناسبة شنو:
زمان أيام الجامعة، كنّا ملمومين حوالين البورد عشان نشوف نتيجة أول سمستر في سنة أولى، وفجأة ألقى ليك اسم واحدة (حنان آدم محمد آدم)، وأنا اسمي (هشام آدم محمد آدم)، وبيني وبينك طوّالي شكّيت في أبوي، إنو يكون معرّس ليهو مرة تانية وجايب منها أولاد وداسي الموضوع ده علينا، والغريب إنو لغاية ما جيت اتخرّجت من الجامعة ما لمّيت في حنان دي، وبالتأكيد ما قدرت أصارح أبوي بشكوكي دي
إنتا لو في مكاني تعمل شنو؟
ياخ تسلم على الكلام الجميل القلتو ده ... وربنا يديم المعروف
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: Muna Khugali)
|
الأستاذة: منى خوجلي Quote: جميل أن نبحث عن الكيف قبل الكم..
لكن مالذي يمنع من نوسع دائرة الكيف "حيث يوجد استحقاق" حتي يزيد الكم؟؟ |
أولاً وقبل أيّ شيء، أشكرك على مداخلتك الجميلة، وهي –بالمناسبة- فتحت أفاق جيّدة في هذا الموضوع المتعلّق بالصداقة والعلاقات الإنسانية. يقول أحد الروائيين العالميين (لا أتذكر منه هو): "أن أكتب رواية واحدة جيّدة في عشر سنوات، خير من أن أكتب عشر روايات سيئة في سنة واحدة" هذا الكلام يتناول الحديث عن "التجويد" والمبالغة فيه، وكأنّ الكم والكيف متعارضات بطريقة ما، وكثيراً ما ارتبطت مسألة غزارة الإنتاج بقلّة الإخلاص للعمل المُنتج، ولكن الحقيقة أنّ هنالك روائيون مثل نجيب محفوظ، عُرف عنهم غزارة الإنتاج وجودة العمل. هذا الكلام يجعلني أتفق معك حول إمكانية أن يتوافق الكمّي والكيفي في العلاقات الإنسانية، ومن الذكاء أنّك استخدمتِ جُملة اعتراضية أساسية (حيث يوجد استحقاق)، ولقد توقفتُ كثيراً عند هذه الجُملة، في محاولة مني لرصد هذه الاستحقاقات وعلاقتها بالكم والكيف، فوجدت أنه لا يوجد تعارض منطقي بينهما في الحقيقة، ولكن أُس المشكلة هي أنّه كلّما ازداد الكمّ قلّ تقييمنا للكيف. ولكي أوضح هذه النقطة فإننا وإن كثر أصدقاؤنا؛ فإننا نلجأ إلى الاستئثار بعدد قليل جداً من الأصدقاء لنطلعهم على أسرارنا ونأتمنهم عليها، ويظل لنا مساحة هامشية ضيّقة جداً من الصراحة والاستئناس ضمن إطار العلاقات الإنسانية الكبير والممتد. فنحن انتقائيون حتى مع أصدقائنا؛ أليس كذلك؟
تحياتي وأجدد شكري لك على المداخلة الجميلة
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: هشام آدم)
|
كدى نرجع من الاول وبشكل عام
ماهى الصداقة
ماهو المقياس اوالمقايس لتسمى هذا الشخص صديقا؟؟؟
لدى زميل عمل اردنى قال لى من اكبر عيوبكم يا السودانيين تخلطون بين الصداقة والزمالة والمعرفة او اى علاقة اخرى
هل نحن نخلط الكيمان؟؟؟؟
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: ismeil abbas)
|
أخى هشام
أشكرك على سعة وحسن ظنك
وأتمنى أن يسود الخير دائما بين الناس
أخى حيدر الزين
احترامك لك مثله أو ما يفوقه منى
وأتمنى بجد أن أجتمع بك قريبا جدا
وثق أنها ستكون أكثر من ساعات خير
بل ستكون الخير كله
لا تهتم لكلام بهاء لأنه مغرض وبغير منى
راجع الماسنجر بس أوعى تجى تقول اتحرشت بيك
سلامى ومحبتى الخالصة لك
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: سيف النصر محي الدين محمد أحمد)
|
الأخ: سيف النصر محي الدين محمد أحمد
| Quote: غايتو انا رأيي تخت ياسر طيفور نمرة واحد..على الأقل اليومين ديل |
كويس إنّك جبت الكلام د هبي جاي، لأن الكلام الداير أقولو عن ياسر طيفور، ممكن يتفهم غلط في أيّ بوست تاني. ياسر طيفور من القلائل الذين يملكون القدرة على صياغة مداخلات ذكية. لم أتقاطع معه شخصياً في بوستات كثيرة، ولكن أتقاطع معه وأنا أقرأ بعض البوستات، وتُعجبني فيه قدرته على تلخيص وجهة نظره في جُمل قصيرة وعميقة جداً. للأسف لا أعرفه بشكل شخصي، وأتمنى ذلك بالتأكيد، ولكن من متابعتي "الضعيفة" للمنبر وللعديد مما يُكتب فيها، فإنني أعتقد أنه إنسان "نظيف" ...
لا أتوقع أن يدخل هذا المنبر ملائكة يكتبون بأجنحتهم، ولكنني أبني قناعاتي تجاه الآخرين فيما يغلب على كتاباتهم. لستُ منحازاً إلى أحد بقدر ما أنحاز إلى الحقيقة وأعتقد أنه يفعل الشيء ذاته، ولكن ولأن الحقيقة المجرّدة مُحرجة ومؤلمة فإن العديد منا لا يتقبّلها بشكل المباشر والصريح. ولذا فإنني أقول بأنه شخص شُجاع، وأنا أعتز بصداقة أمثاله بكل تأكيد.
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: كمال علي الزين)
|
العزيز: كمال علي الزين
أشكرك يا عزيزي على مرورك بهذا البوست .. بالأمس القريب كنتُ أتكلّم مع الأخ والأستاذ محمد الزين الشفيع، وجاء ذكرك في سياق الكلام، فسألني عمّا جرى بشأن روايتك الأخيرة، والحقيقة أنني أشكره على تذكيري بهذا الأمر، وأتمنى أن أعرف منك ما حدث لك مع الرواية: هل وُفقتَ في اختيار ناشر مناسب؟ أم أجّلتَ الموضوع إلى وقتٍ آخر؟
شكري لك مجدداً على إطلالتك
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: Ridhaa)
|
الأخ: رضا
الله يكرم أصلك يا حبيب .. وده من ذوقك، وفي النهاية تظل بشريتنا متحكمة فينا عشان كده ما بتلقى زول جميل في كل حاجاتو زمن الأنبياء انتهى يا صديقي، ونحن الآن نجدّع بأصابع هشة في بحر لُجّي ولا يدعك الكثيرون أن تكون كما تريد. وآخرون ... لو عملت لهم البحر طحيناً فلن يقتنعوا بك لأنهم لا يريدون وليس لأنك أخفقت.
هذا المكان علّمني كثيراً، ولكنه –للأسف- علّمني أشياء لم أكن أُفكّر في تعلّمها، ولكنني –بلا شك- استفدتُ منها. والناس والأشياء ليسوا كما نراها يا عزيزي، والحكمة السائدة هنا يا عزيزي هي حكمة الغلبة: أن تغلب ببذاءتك، فإن لم تستطع فبشلّتك، فإن لم تستطع فبمهاترات ، وذلك أضعف الإيمان
تحياتي لك
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: سمير شيخ ادريس)
|
Quote: لا تهتم لكلام بهاء لأنه مغرض وبغير منى
راجع الماسنجر بس أوعى تجى تقول اتحرشت بيك
سلامى ومحبتى الخالصة لك |
سمير شيخ ادريس .. في تحرش اكتر من مدّ اليد :)
بعدين المفروض يغير منو التاني منو انت والا بهاء بكري ؟
اظن انت اقرب .. !!
لكم التقدير والاحترام
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: ismeil abbas)
|
الأخ العزيز: إسماعيل عباس
تحية مجدداً
تتطرّق إلى موضوعات جميلة، وأتمنى أن نُوسِعها نقاشاً بالشكل الذي يليق بها
سأبدأ بسؤالك عن: "هل القلب الذي يُحب بصدق لا يكره أبداً"
أقول في البداية أنّ مشاعرنا دائماً صادقة، ولكنها غير ثابتة. بمعنى أنني قد أحب فلان ثم أبغضه، وأنا صادق في الحالتين. ومن الطبيعي أن يتصّعد شخص في مكانته لديك، أو ينخفض بناءً على عوامل كثيرة جداً، متعلّقة بك وأخرى متعلقة به. وهذه الأخرى المتعلقة به هي نفسها متعلقة بك كذلك ومتعلقة بمعاييرك الخاصة وتقييمك للأشياء والمواقف. ولذا فإننا نجد من الصعوبة أن تعود أيّ علاقة منتهية إلى سابق عهدها كما كانت قبل انتهائها لأسباب كثيرة جداً، أهمها أن عنصر الثقة والأمان لما يعودا متوفرين.
وهنالك نقطة أخرى، فنحن نستخدم "القلب" للتعبير عن عواطفنا ومشاعرنا وهذا شيء خاطئ، فالقلب مثله مثل المعدة أو البنكرياس، عضو في جسم الإنسان يؤدي وظيفته فقط ولكن منبع العواطف والمشاعر تجاه الأشخاص والأماكن والمواقف هو الدماغ. ويرتبط الدماغ بالقلب وببقية أعضاء الجسم عبر وحدات الخلايا العصبية والتي تتصرّف بموجبها (أيّ بموجب هذه الموجات الكهروعصبية) للتناسب والموقف، مستنداً في كل ذلك على ما يتوافر لديها من معلومات ضخمة جداً في أرشيفها. ولذا فإننا كثيراً ما نشعر بالجوع في حالات الخوف الشديد، كذلك قد نشعر برغبة في التبوّل، وإزدياد خفقان القلب هي واحدة من هذه التصرفات اللاإرادية التي تُشارك الدماغ تفاعله مع المواقف والعواطف التي يبثها.
وسوف أعود لبقية النقاط التي تعرّضت لها في مداخلتك الجميلة
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: سناء عبد السيد)
|
| Quote: الصداقة من انبل العلاقات الانسانية بين البشر, اذا كانت مبنية على الصدق و الوفاء |
الأخت: سناء السيّد
أعجبني الاستشهاد الموفق بأبيات الإمام علي بن أبي طالب
كرّم الله وجهه، وبالفعل فالصدق هو أهم عنصر في العلاقات
الإنسانية، فإذا توفر هذا العنصر فسوف تتوفر بقية العناصر
بشكل تلقائي: التضحية، الثقة، الصراحة ... إلخ
أشكرك على المشاركة
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: صلاح الدين عبدالله محمد)
|
الأخ: صلاح الدين عبد الله
| Quote: كدى نرجع من الاول وبشكل عام: ماهى الصداقة |
سؤالك مهم جداً، ويمكن يكون لكل شخص تعريفه الخاص بالصداقة، وربما إذا قرأت بوست (THE FRIENDS) تجد إجابات شافية بالنسبة إليك. بالتأكيد هنالك فروقات "نسبية" في علاقاتنا بالآخرين، ولذا من الصعب جداً أن نُحدد درجات العلاقة أو أنّ نُحدد مقياساً للعواطف والمشاعر. فنحن نعلم بالفطرة أننا نحب والدينا (مثلاً) ولكن بكل تأكيد فإن ميلنا إلى أحدهما قد يكون أكبر من الآخر، وكذلك بالنسبة للعواطف الآباء تجاه الأبناء، ففي كل أسرة هنالك شخص محبوب بشكل خاص وربما دون أسباب واضحة، ولكن هذا لا ينفي وجود ذات العواطف (ولكن بنسب أقل) تجاه بقية الأفراد.
الصداقة –في اعتقادي- هي عاطفة ذاتية، وعندما أقول ذاتية فهذا يعني أنها لا تخضع لمعيار عام. نحن فقط من يُحدد هذا المعيار، وبالتالي فإن كلاً منا له معاييره الخاصة للصداقة والعلاقات الإنسانية بشكل عام. أرجو أن تقرأ بوست (THE FRIENDS) فهو بوست جيّد وبه العديد من المشاركات الجيّدة والجاد كذلك فيما يتعلق بموضوع الصداقة.
أشكرك يا عزيزي على هذه التساؤلات المُضيئة
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: هشام آدم)
|
ياهشام
نحن قبول تاني
ولا طلعت مننا العربي والدين والشهادة بتاعتنا نفسّّّت
غايتو لو في القبول التاني مااتوفقنا ح اخش الكلية الحربية تووووووووش وفي الحالة دي النيران بتكون غير صديقة وتقول زاتوو من العوض وعليه العوض
انا شخصيا ياهشام طمعان في صداقة منى خوجلي وبعلنها على الملأ
زاتوووو
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: ALZOLZATOO)
|
ALZOLZATOO
إنتا مش قبول تاني، إنتا ياخوي قبول خاااااااص
فاهمني طبعاً (والمعنى في بطن الفيل) لوووول يكه
يا عزيزي الأمور كلها تمشي على غير هدى وما نحن إلا
قِطع على رقعة شطرنج كبيرة تُسمى الحياة أو قل (الآخرين)
أتحرك فتتحرك، ويتحرّك الآخرون وفي كل حركة هنالك معنى
حتى وإن لم نفهم أو ننتبه أو نُدرك هذا المعنى ولكن ثق
أنّ هنالك معنى لكل ما يحدث. حتى عندما نفقد صديقاً أو
نخسره إلى الأبد فإن في ذلك حكمة ومعنى ... ولكن
إياك أن تحاول البحث عن الحكمة، فهذه الحِكم يا عزيزي
ليس للكشف أو الاكتشاف، ولكنها فقط للإدراك
تحياتي، وصدقني إنتا ألذ زول
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: هشام آدم)
|
العزيز
هشام
| Quote: أكثر ما يُعجبني في أصدقائي إنهم لا يُجاملونني، وإن جاملوا فإنهم لا يُبالغون في المُجاملة، وإنهم يقفون في وجهي دائماً مدفوعين بدافع الصداقة المحبّة، فيُقيمونني إذا اعوججت، ويُصححونني إذا أخطأت، وينتقدونني إذا أخفقت. يرغبون في رؤيتي دائماً كما يُحبون. هم مرآتي التي أرى بها أخطائي وعثراتي، وأقيس بهم مدى إخفاقاتي وأعرف مواطنها. نختلف دائماً، ولا يكون اختلافنا سبباً لبغضاء بيننا. يفصلون بين ما هو خاص وما هو عام، بين ما هو فكري وما هو إنساني. |
دامت المحبة بينكم ونطمع ان نكون منهم
خالص الود
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: هشام آدم)
|
الجميل هشام
سلام
| Quote: لا أنكر أنني لا أوفّر مساحات هامشية كبيرة في أُطري الخاصة التي أُصنّف داخلها الآخرين، وأنّ عمليات الارتقاء والهبوط المستدامة هذه، لا تتم بسهولة وسلاسة، لأنني منذ البداية لا أُدخل الآخرين داخل إطار التصنيف إلا بعد مشقة، ولهذا فإنّ كمّ الأصدقاء لم يكن هاجسي على الإطلاق، وربما يُعدّون على أصابع الكفّين مجتمعتين. ولكنني فخور بأصدقائي إلى الدرجة التي أشعر فيها بأنني محظوظ بهم. |
في معظم الأحيان تنداح مشاعرنا من منابع اللاوعي منسابة نحو سهول الإحساس المترع بالصدق تجاه آخر التقيتة عرفته جيدا أم لم تعرفهم تظل تلك المشاعر تعبر عن مكنونات النفس الإنسانية التواقة للصداقه .
لك الود
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: يوسف السماني يوسف)
|
| Quote: في معظم الأحيان تنداح مشاعرنا من منابع اللاوعي منسابة نحو سهول الإحساس المترع بالصدق تجاه آخر التقيتة عرفته جيدا أم لم تعرفهم تظل تلك المشاعر تعبر عن مكنونات النفس الإنسانية التواقة للصداقه |
الجميل المبتسم : جوزيف السمّاني
تحياتي لك وللأسرة الكريمة
ليست هنالك –يا عزيزي- أيّ علاقة إنسانية خاضعة لمنطق عقلاني غير علاقات الزواج، والتي تكون لها حسابات عقلانية جداً سواء من قِبل الرجل أو من قِبل المرأة، وما عدا ذلك، فهي (أي العلاقات) تجري لمستقرٍ لها، دون أن نحشر فيها أنوفنا على الإطلاق. والإندياح عملية لاحقة على هذه العشوائية، لأننا بالتأكيد نريد أن نقتنع بأننا نحن من نرسم حياتنا بإرادتنا الحرة، وهذا محض خداع لا أكثر، خداع له هدف واحد فقط أن نشعر بالرضا عن ذواتنا المقهورة، وأن نشعر بأننا نحن من نمتلك حياتنا بكل ما فيها ومن فيها من أصدقاء وأحبة وأعداء.
لك مني كل التحية والتقدير أيها العزيز
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: هشام آدم)
|
حبيبنا / هشام ..
يعني ما ذكرتني في البداية وأنا كُتَّ فاكر نفسي أوَّل واحد ، ولَّا عشان نحنا الواحد بغيب من البورد دا شهرين ، وبجي يقعُد فيهو يومين ؟. طَيِّب يا هشام إمَّهِلْ بنَجِّمَكْ *
( انظُرْ شرحَ المفردةِ أسفلا ) .
* فقد كانتْ تقولُها لنا جَدَّتي حينما نرفضُ الاِنصياعَ لتنفيذِ مشوارٍ من مشاويرها التي لا تنتهي ، فتجدها فاردةً يدها اليمنى ، وضَامَّةً إلى راحتها السّبَّابةَ والإبهام ، وتسمعُكَ مـــــن الغضبِ ( اصطكاكَ ) أسنانِها .
عمومًا ياخي عشان ما تزعِّلني ، أكتبني إنْ شاء الله الطِّيش زاتو ما مشكلة .
ولك التَّحيَّات ، قبلها التَّقدير .
______________________
دا الإيميل حقِّي القلتَ ليك ح.أرسِّلوا ليك .
[email protected]
رسِّل ليْ عناوين دور النّشر الإتكلَّمنَّا عنها
أول أمس فيهو ( ماني عارف لكين جاني إحساس إنُّو
لهجتي هنا راندوك راندوك ، أسمح لي غايتو خطِّي هنا مكعوج
، دا كلُّو في شان ما ذكرتني مع الجماعة فوق ديل ، وأنا حالتي فاكر روحي
صاحبك ، خلاس يعني خُوَّة فرتِقْ ولَّا شنو ؟ ) .
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: محمَّد زين الشفيع أحمد)
|
العزيز الأستاذ: محمد زين الشفيع
والله يا حبيبنا .. البوست ده جاب لي مشاكل ما تتخيّلا، لكن الريدة والمحبة يا صديقي سلوك، وليس مجرّد بوست، وأنت تعلم يا عزيزي أنني أحترمك جداً ولا أكن لك إلا كل محبة وتقدير. رسّلتَ ليك أسماء دور النشر التي أرسلتها من قبل للعزيز كمال علي الزين، وأرجو أن تنتفع بها
مع خالص أمنياتك لك بالتوفيق
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: هشام آدم)
|
هشام آدم
يخسي عليك عايز تبدلني ، بعد استبشرت خيراً ، بانو نكون اصدقاء..
عموما مافي مشكلة وشكلو الايام الفاتت في مياه كثيرة مرت من تحت الجسر..
كما وصلني من مكتبنا في (الكي جي بي )انو كثير الامور شى فهمتو وشى لا..
الايام دي مافاضي ليهو عشان اتابعو ن رغم اني عايز اكتب ليك كثير من المشاعر المتبادلة في هذه البوست ؛ودلوقت نوعا ما ليست لدي رغبة الكتابة حاسي روحي بعيد منها ده غير الجري ، فمرات الواحد بتاوق يطرق اصابعينو ، يعنى البوست ده حيكون نصب العيون لو اتفكت العقدة..
يعني لو اتفكت العقدة الا تقوم جاري ...
الايام دي انا مشغول بانتظار مسلسل (Adams family)..
وكلمتك من اسي اماكن عامة فقط برافيد ما معانا. .
بعيد وقريب حديثي موجه للعزيز (حامد محمد حامد) المرة الفاتت عمل فيها نايم وجلاني ما رد علي..
يافرة ماتجي تمشى معانا لابو سامي. ..
التحايا النواضر لكل من هنا...
| |
|
|
|
|
|
|
|
|
|
Re: رسالة إلى أصدقائي في سودانيزأولاين (Re: معتز تروتسكى)
|
معتز تروتسكى
بعيد وقريب حضور وغياب دة يوم اللى اصله ما بينفات
وعلى قول اخر دة ما قدر الله عديل .
ياخى انت يا ريت لو بتتجلى وبما ان ذاكرتى خربة (AGE FACTOR) بس مش كبير اوى ولكنى تاثرت بقصة البيعة اللى فوق , ويوم ما نزلوك المزاد العلنى وبما ان قدرك عالى لم يستطع احد من المزايدة.
وبما ان الشغلة جابت ليها الزايدة الدودية ومصران اعور ندعوا الله العلى القدير سلامة الفشفاش والمرارة لهشامنا ولتلك المياه ان تجرى هادئة رقراقة.
كن بخير ولك مثل ما تقول دائما التحايا النواضر او النوادر كما يحلوا لى
| |
|
|
|
|
|
|
| |
هشام آدم
ismeil abbas
أميرة فاروق عبد العال
doma
عمر الفاروق
الرفاعي عبدالعاطي حجر
انعام عبد الحفيظ
محمد مكى محمد
HAIDER ALZAIN
فادية اليمني
حامد محمد حامد
haroon diyab
زهير عثمان حمد
بهاء بكري
Muna Khugali
ASHRAF MUSTAFA
Hisham Ibrahim
صلاح الدين عبدالله محمد
سناء عبد السيد
احمد التجانى احمد
rosemen osman
سارة علي
ALZOLZATOO
ناهد بشير الطيب
على محمد على بشير
ياسر بيناوي
Amin Mohamed Suliman
يوسف السماني يوسف
محمَّد زين الشفيع أحمد
معتز تروتسكى
فيس بوك
تويتر
انستقرام
يوتيوب
بنتيريست