مطلوب نص قصيدة الحاردلو الكبير (سنتين والعيش بالقبضه قلبك ساساق للنبضه)

Quote: ماضهبت اقول لقيتك وانتى فى كل الخواتم والمياتم والنجيمات والعواتم ما حزنت اقول بكيتك ونحن فى حزن المخاليق والمغنين المطاليق الفرح جاييك وعد غنوة اولاد التحاريك السعد ولا البعد البعد ولا السعد وكنتى فى ليل الخوابى تهاتى بينات الطوابى تحاكى جقليب السعى الجناييت خلو حجرك ريح يفوفى وعين مزرزرة من شقى الفرح المرابى ومنية الوعد الدعى يا ديارى الوين ....أنى تور عفين الشين .....أنى ما اضينة وزين انى تور عفين الشين انى وانت فى شوفك تخاتل رفة الطير والحفيف وانت فى خوفك تكاتل عينة الجلبت خريف وانت فى اللالوبة مصلبة البنيات النسيمات الهفيف وانت فى اللالوبة مشنقة الوليدات ناس نجومى ومحبس النفس الرهيف بطنك كرشت غى البنات نافى دقنك حمست جلدك خرش مافى وكت الوهم نافيت .. صدق الوعد جافى وكت العلم جافيت .. مر الصدق وافى وكنا بنشيل الغباين والاناشيد جهدية الاورطية جهدية الحلبونا شدو جمالم جونا حلبنا ليهم سمسم والسمسم ما كفاهم جلبنالهم سعية وجينا للبقعة ام قبايل سيل من الوادى الكبير الكفيف شايل الكسيح يا عيون ود الضكير واحدة من توشكى تقلع تانى تقلع فى المطامير يا جبة الدرويش البابا بسل العيش الله بسلا والبابا خدمة الديش الله بسلا البابا القول بى شويش يا عيون ود الضكير عماك فى حقك ديه لى زمنا مو جهدية جهدية الاورطية جهدية الحلبونا شدو جمالم جونا وحلبنا ليهم سمسم والسمسم ما كفاهم جلبنالهم سعية يا عيونى شن بتشوفى ويا امونة شن بتشوقى شدرا تال اليمامة ولا الصقر الحمامة ولا البطن التفوفى يا امونة شن بتشوفى ويا عيونى شن بتشوفى جهدية وسيف وراية تبروقة وخيل وشاية اذان بالجوع اذن لى ام خوفك فايت خوفى يا امونة شن بتشوفى ويا عيونى شن بتشوفى تلت التلاتة شلق تانى التلات محلق والتالت جا يبشرنى سرقوهو الدايرين حتوفى يا امونة شن بتشوفى ويا عيونى شن بتشوفى شايفة الدموم واللمة بين الدقون والعمة ولانى فوق معلق صقر الحدى مندوفى يا عيونى شن بتشوفى ويا امونة شن بتشوفى

Quote: الاخ ملامح ,,سلامات النص الذي اوردته لشاعر محمد طه القدال , وليست الحردلو كما طلب الاخ اسماعيل وراق

Quote: أرجو من الأخ إسماعيل وراق إذا تكرم نشر النص الذي أرسلته الأخت لنا مهدي لإزلة الإلتباس و لسحب التصحيح الذي أوردته في هذا البوست للأخ إسماعيل.

Quote: سنتين والعيش بالقبضه قلبك شاباى للنبضه.. مهديه الحاربونا.. مهديه القاربونا.. مهديه سيف ورايه)

Quote: شكر الاخ ملامح القصيدة فعلا للشاعر محمد طه القدال والحاردلو هو القائل بعد ان اذاقه الخليفة التعايشى الهوان زكونا وفطرونا وقلنا عقب ما بجونا*** وجات التصفية من البيوت مرقونا يا يابا النقس ويا الانجليز ألفونا *** نحن أولاد فراش مثل الحريم خلونا وهى قصيدة ما كان يجب ان يقولها الحردلو ففيها انكسار ومذلة وواستغاثة بالاجنبى (الانجليزى والنجاشى) ولم يبقى له الا التمنى والشماتة حيث يقول البقت على تبقى على الأنصار *** بارود انجليز ومكنة وبشاتن حال فى حوش الخليفة ينزل السردار*** وشيخ الدين قبيض ومحمود يجيب النار وهى امنية اشبه بحلم تحقق!!!! جنى

Quote: يا أسماعيل أهو النص نزلته ليك في البوست.. قالوا الخيل تجقلب و الشكر لي لنا مهدي .. مع تحياتي للعزيزة لنا..

Quote: كلمات القصيدة كاملة يا عماد بما فيها سنة والعيش بالقبضة قلبك شاباى للنبضة! جنى

Quote: وياريت لو في واحد عارف النص (سنتين والعيش بالقبضه قلبك ساساق للنبضه)

Quote: (سنتين والعيش بالقبضه قلبك ساساق للنبضه.. أظن القدال كان يستدعي القصيدة حول النعيم ودحمد التي غناها خلف الله حمد وكت العيش بقى بالقبض ديوان النعيم ولا بنسد أما مهديه الحاربونا.. وصحتها جهدية فهي أقرب لأهزوجة لعب أطفال جهينة حاربونا شدوا جمالم جونا ضبحنا ليهم زرزر الزرزر ما كفاهم كفاهم جودة الله ... والقدال أعلم الباقر موسى

Quote: يقول العارفون بملاحم شعر القدال: ان شابا في غرب السودان في فترة المهدية حين ارهقت خلق الله بنهب العيش وباطلاق يد الجهادية عليهميقال ان الشاب كان رعديدا وجبن عن المقاومة مع من قاومو عسف الجهادية.. وظل في مراتع الصبا وخوفه ينخلع ويكاتل الظلال كما دون كيشوت.. اها امو يوم قالو جات زعلانة من فشلو في مشرووع الرجالة هزقتو قائلة: (انت فى شوفك تخاتل عينة الجلب الخريف انت فى اللالوبة مصلبة البنيات النسيمات الهفيف انت فى اللالوبة مشنقة الوليدات ناس نجومى محبس النفس الرهيف بطنك كرشت غى البنات نافى...........................يعني جابت ليها كرش وانتا ماشغال بي غى البنيات.. دقنك حمست جلدك خرش مافى....................... ودقنك وصلت الواضة وانتا جلدك ماعندو اي علاقة بي موضع الشبر بتاع خالد بن الوليد.. وكت الوهم وافيت ..وكت العلم جافي .........يعني وكت الهزل حاضر ووكت الجد زايغ .... يعني زول فارغة ساي صدق الوعد نافيت .. مر الصدق وافى.....ما بتوفي بي وعود رجالتك ..مرة ارنض احرجتني الله لاعادك.. اها وقيل ان الابن حين سمع تقريع والدته له بهذه البلاغة: قام من توه وامتشق حسامه وصاح في المرابيع قائلا: يا ديارى الوين اني...........................يعني انه الصعب الختر..و(اني) تعني انا عند اهل الغرب. تور عفينة الشينة أني.................... قصدو انو التور العفين ما اضينة وزينة اني....................... انا مازول اضينة وزول مزيون.. تور عفينة الشينة اني..... مكررا فخره بنفسة وقيل انه ركض بعدها نحو الدواس حتى مات وحسن موتة..

Quote: وراق ياخي معقولة ؟؟ دي قصيدة مايعرفها الانصار والله دي مفروض تحفظوها زي راتب الامام..

(عدل بواسطة وليد محمد المبارك on 12-06-2008, 04:15 PM)