|
|
 حلمنتيش ..... مونولوج
|
مساحة أفردها هنا للشعر الفكاهي
المشهور بالحلمنتيش
وقد سبقني الكثيرين
بهذه المساحة
ولكن شهر الحلمنتيش
لا يمل
وسوف نحاول
ان نسرد بعض الحقائق
عن هذا النوع من الشعر
بدون ترتيب
يعني
حاجة كدة بالبلدي
او زي ما بقولوا
بلدي بالرشوشة
(واحد يشرحا للحناكيش)
وإلى اول القصائد:
عايز اكون
هذه القصيده للمتجكم العلفي
قالو زهجانه واظنك
ما عرفتي سؤالي عنك
يا اللذيذة الكلكي جنك
عايز اكون انا ابقي منك
اي حاجه قريبه منك
تبقي طربيزه ابقي كرسي
تبقي راكب ابقي تكسي
بيكي اسافر لام دقرسي
وتبقي حافله ابقي بوكسي
وياسلام لو ابقي ببسي
تشربيني
تقرطعيني
تدفقيني
وما مهم
هي قرطعيني
بس مهم شوفت عيونك ابقي اي حاجة قريبه منك
تبقي وردي ابقي ترباس
تبقي سانتو ابقي كدباس
تبقي بنكي ابقي حراس
تبقي برعي ابقي عباس
تبقي اوبرا ابقي ترباس
ابقي غرقان تبقي رفاس
رفسيني
وفتشيني
وغرقيني
وفنجطيني
وماهم
هي رفسيني
بس مهم شوفت عيونك وابقي اي حاجه قريبه منك
تبقي فالق ابقي مفلوق
تبقي كسره ابقي طايوق
تبقي منفوخ ابقي مطفوق
تبقي ويكه ابقي لايوق
تبقي شناق ابقي مشنوق
تبقي حراق ابقي محروق
وياسلام لو تبقي خازوق
مقلبيني
وزهجيني
وعكريني
ومامهم
هي مقلبيني
بس مهم شوفت عيونك وابقي اي حاجه قريبه منك
تبقي حيطه ابقي طوبه
تبقي روسيا ابقي كوبا
تبقي جمباظ ابقي هوبا
تبقي غنمايه ابقي لوبه
تبقي فاطمه ابقي زوبه
ابقي راس هي تبقي قوبه
الميني
وعوريني
وبشتنيني
وزهجيني
ومامهم
هي عوريني
بس مهم شوفت عيونك وابقي اي حاجه قريبه منك
تبقي سكر ابقي ضبان
تبقي بوليس ابقي بمبان
تبقي كبده ابقي مصران
تبقي شيته ابقي طرزان
ابقي حفله وتبقي سكران
فرتقيني
وجهجهيني
وبهدليني
ومامهم
هي فرتقيني
بس مهم شوفت عيونك وابقي اي حاجه قريبه منك
قالو زعلانه واظنك
قالو قرفانه واظنك
ماكي عارفه سؤالي عنك
يااااااااااااا اللزيزه الكلكي جنك
عايز اكون انا ابقي منك اي حاجه قريبه منك
أبقى أختك أبقى أمك
أبقى ليك فستان يضمك
أببقى مقعد فيه تقعدى
ةقلبى مسند ليك جنبك
واحدة من أنغام جميلة تدندنيها
أو مجلة بتقرآ فيها
أو حفيرة صغيرة
لما تكنسى تدفينها
أدفنينى
ما مامهم لو تدفنينى
بس مهم شوفة عيونك وابقى حاجة قريبة منك
أبقى مصحف وتبقى تالى
تبقى لوءلو وأبقى غواصة
تفتش فى اللاالى
وابقى حب اللب تسالى وتكسرينى
مامهم لو تكسرينى بس
مهم المس سنونك وابقى حاجة قريبة منك
تبقى كعبة وابقى طايف ولجمالك ابقى شاف
تبقى مقلة وابقى سيلاً دمعو جارف
وتمسحينى ما مهم لو تمسحينى
بس مهم شوفت عيونك وابقى حاجة قريبة منك
ابقى شكلة وتبقى حجاز
ابقى لمبة وتبقى لى جاز
تبقى فينى وتحرقينى
اي حاجه قريبه منك
اي حاجه قريبه منك
اي حاجه قريبه منك
عايز اكون منك قريب أى
حاجة قريبة منك
عايز اكون انا ابقي منك اي حاجه قريبه منك
|
|
 
|
|
|
|
|
|
|
|
حلمنتيش مهني (Re: ابراهيم قناوي)
|
وهذه مقاطع
ساخرة
أرجو أن تجد لها مكانا في
هذا الزخم
الإسفيري
مدرس الرياضيات
إني أحبك حب السـين للصاد * * * فأنت للعمر تبسـيط لأعداد
جمع الأحبة عندي خير مسألة * * * فكيف أجبر عندي كسـرك العاد
في قسمة اللــه أرزاق لنا طرحت * * * ويضرب الله أمثالا لمزداد
جذر المحبة تربيع لعشرتنا * * * وجدول الهم عندي رائح غاد
الفوال
حبيبتي بعينها قلابة * * * تجر قلبي جرة الربابـة
تميس رقـة بكل صحـــف * * * قمراء تملي رغبة الغلابة
راعي غنم
أهش الذئب عن عينيك بالعصا * * * ياخيرمن يمشي على الحشيش والحصى
صاحب بنشر
لقد ملأ الهوى قلبي هواء * * * ونسم خاطري مسمار طرفك
تدوربي الهواجس دون جنط * * * على عجل أفتش حول حزمـك
تحيرني عفاريت الليالي * * * وألقى الحل في تبديل بلفك
مدرس العربي
ولكم رفعت لأجلك المكسـورا * * * وجزمت قولا في هواك جسـورا
كيف التصرف من فعال جمعها * * * يثني صحيحا أو يعل صبورا
حتى المنادى لست أفهم وصفه * * * مادمت أنصب من مناي قصورا
ساعاتي
فراشة أنت يا حلم السويعات* * * دقيقة اللفظ تشفين الجراحات
إن كنت في السيريا عمري وصنقله* * * فلتضبطي الوقت كم يغدو وكم يــات
تأملي الدرب إما عدت ثانية * * *فللعقارب صولات وجولات
مصور
حمضت صورتك التي أحببتها * * * ورأيت وجهك مشرقا بفلاش
لما رأيت رؤوسها محروقة * * * فورا نقلت لغرفة الإنعاش
| |
|
|
|
|
|
|
|
|
|
Re: حلمنتيش ..... مونولوج (Re: ابراهيم قناوي)
|
في ليلة صيفيةمن ليالي
جامعة الخرطوم
جلس مجموعة من شعراء الحلمنتيش
يتحاورون حول كيفية
تطوير هيئة حلمنتيش
برئاسة شيخ السجادة الحلمنتيشية
الدكتور
الحساس محمد حساس
الشهير بمحمد عبد الله الريح
وفجأة وبدون مقدمات
إقتحم مجلسهم
شاب ريفي
نحيف يحمل شنطة حديد
وقال لهم: أنا سمعت عنكم وبدور أنضم ليكم
ولما كانت الظواهر دائما خداعة
قال له الرئيس الدكتور الحساس:
إنت يا أخوي قايل الحكاية ساهلة كدة؟
أولاً لازم يكون عندك إسم حركي
يعني أنا الحساس محمد حساس
ودة المتجهجه الأممي وووو
وقبل أن يرد الشاب
بادره الرئيس قائلا:
ولازم اللقب يجي في قصيدة كمان
وهنا
إنبرى الشاب قائلا:
أنا المتجكم العلفي
أنا المتنجغم القرفي
أنا العفنان أنا الوسخان
أنا ....
وعندما إنتهى من قصيدته
قام الرئيس مصافحاً للشاب
وقال له أنت من اليوم
الرئيس بلا منازع
وقد كان
هذا اليوم مولد الشاعر
الدكتور محمد بادي العكودابي
الذي بز الأوائل والأواخر
وكان حقا شاعر الحلمنتيش الأول
بلا منازع
بل فارس العامية
الذي تفوق حتى على شيخه
وأستاذه المرحوم
إسماعيل حسن
بغزارة الإنتاج وتنوع أبواب الشعر
وهذا رائي الشخصي
وسوف أورد بعض روائعه
إن شاء الله
ودمتم سالمين
| |
|
|
|
|
|
|
|
|
|
Re: حلمنتيش ..... مونولوج (Re: ابراهيم قناوي)
|
تحفة فنية للشاعر الرائع ( د. محمد بادي )
وهي قصيدة يخاطب فيها
أحد الحناكيش
ويورد فيها
طرفا من روائع
التراث السوداني الأصيل
حيث يقول:
هوى يا وليد يا دلوعة يا مرنوعة
أعدل إيدك المفدوعةواتلحلح
واقيف دغرى وواس صدرك
مع صدرى واتشدّع
ليك الحق ..........!!!!
شان ولدوك فوق اسفنج
وحتى أول جديد سوهو ليك بالبنج
وهسع هوايتك إنك تلعب البنق بونق
وليك الحق عشان فطموك
بعد مازدتا فوق سنتين
وفى سن عشرة نومك كان على الليدين
غطاك بالشاش وفرشك بيحرير الصين
والبتدورو كلو بتلقى غاب قوسين
ابوك مليان وجيبو سمين وقلبو سمين
وفاتحلك حساب فى البنك والتأمين
وليك الحق...........!!!!!!!!!!
عشان ما خضتا فى وحل المطر والطين
ومن الترعة ما سويت شراب الهين
وما قيلتا فى ضل دومة بى فرعين
وما شاققتا عرق النيل مع الوزين
وليك الحق........!!!!!
عشان ادمنتا عيشة اللين
مشي الاسفلت ما جربتو بالكرعين
ركوب اللورى فى شمساً تصر العين
وما عانيت وقوف الصف وراء التموين
عشان يا انتى ما بتدرى سجل ابواتك البدرى
دحين اسمع .. أقيف واسمع
سماك الباكى مجدو الزال
يا ما كانوا تحتوا رجال
ابوخنجر وابوشوتال
والصقر البجيك خوجال
صوتن كان يمين جلجال
ومكسيين كمال وجلال
لكن الزمن اسرع
سيفن بلحس الفقره
وما كان برضو بالحقرة
وكانوا بضبحوا الشقره
وكانوا بضوقو العادوه نوم الكوع
وكانوا بموتوا فى شان حرمة المفزوع
الجعلى اب شرابا حار وقالوا بعدى يومو خنق
والشايقى البياكل النار وفوقو نحاسو متخنق
ودرفون البجا الصقار وحاقب سيفوا ياكل الشق
والغرباوى عينو شرار وكضب القالوا عندو عرق
والنيلى البعرفوا كتار على كتل الأسود جرّق
والبطحانى والشكرى وغيرهم من أهل فخرى
ومنهم أصلى لا بشبع ولا بقنع
هوى يا وليد
حصل جربتا كب السارية
فى القلعة وخلا العتمور
وشفتا بروقه تترقص وتتحرقص
تقول مطويه فى قرقور
وعاوى الزيفة ينفخ
فى جبال النقعة زى الصور
والحصحاص يجرفوا السيل
يكنسوا على مهاوى الخور
وقلب الصاقعة يتطرقش
يكب النار دمار وشرور
وشفتا الحال عرق مقلوع
جبل متروم فرع مكسور
جمال غرقانة بى حالا
وحد المويه فى الغرغور
ود ابن ادم المسكين
نجاتو تحت قرون التور
والعوتيب يجيك يجرى
يشيلك وانتى ما بتدرى
وما بيرفع
هوى يا وليد ...
حصل سادرتا بالديداب
وقدامك مراحك وراكب الخباب
ودربك طولوا يملا العين
سحاب وغبار ومويتو سراب
وهوى كرباجك البكاى
يبكى على ضهور الضمر الانجاب
وتسرى الليل وما تضوق هجدة
لو كان النجم ما غاب
وبعد أيام تجيك لفته
ويلوحلك فى البوادى سحاب
وتكرف من دعاش العينة تملا رئاك
عطر وأطياب
تلقى الوادى خضر زى تقول
ماكان خراب ويباب
وبت ام ساق تقييل من ضحاها
على المعالى ونسمة الهباب
وتفرش ليك حزمة نال تحت
سيالة تريانة فروعها قراب
وتنفخ كل آهاتك مع المزمار
تصوغ الحان ملانة شباب
وتنسي الدنيا كل الدنيا
ماعندك معاها حساب
خلاف برقا يشيل حرقاص
أو رعدا تقول رصاص وكت فركع
هوى يا وليد ...
حصل صحاك عز الهجعة
صوت شتماً بعيد مخنوق
وجاتك شخرة الطنبارى
مشتاقاً يسوى القوق
ونومك طار واتقسم
والرشرش صبح مفروق
واتلفحت نص من توبك الجرجار
على الدلوكة سايق سوق
وتلقى هناك بنات بلدك ولاد بلدك
يعلو الصفقة تقدح فى القلوب الشوق
ونغم الفال ابشرن يا بنات بالخير
والجنيات تطير لا فوق
وكم زغرودة تتفجر
تفور بالناس بعد ما تروق
يعوم الوز صدورو تشابى
للمجهول وما بتضوق
تميل زينوبة زى البان
يمين وشمال تودى الطوق
واخوان ام شلخ ينكبو جوه الداره
زى صقرا نزل من فوق
ضرب الصوت والركزة بيفرق الناس
عشان زينوبة ما بتحوق
وعاد تتحزم الجنيات
وتتنظم تقيف في روق
وكل واحد يهز ضرعاتو
والحجبات تزح لافوق
جفير الخوسة فايت الكوع
وسيرو مع العضل مطبوق
والطاقية تحت الحاجب المعقود
هدية أم زين وما مشرية من السوق
ويتقدم عريس السمحة رافع صوتو
كان بسوقوا بيهو النوق
والعنجاوى ينزل فوق ضهورن
بس تقول منشحطة فيهو بروق
يبدا مجرو بالترقوة ويتحدر
مع الضلع القصار ملصوق
واحمر عين يشم الدم بعد ما يرش بنات
عمو ويزيدن شوق
وثابت حيطة لا بتهز ولا بتلز
وصارى جبينو كلو عروق
وقال بعد العقد طلقانة ما يحجزوهو
إلا يخلو ضهروا شقوق
هناك الحال مغير جد
وهيجة الناس تفوت الحد
وكان حجازو مد الليد بتسمع كع
هوى يا وليد ...
حصل شارفت دغشا بدرى
فوق حجرة مخانق النيل
فى سنة تساب والشرقي
حزم القيف وطفح الكيل
وشوفتا الهيبة فوق اسيادا
والشخرى البكتل الحيل
وشفتا الجارى يحفر
فى جروف كوكبنا
بس داير يشقو عديل
يجيك بي صدرو متحزم
ومتلقف صفوف فى صفوف
يحاكى الخيل
ومويتو الهايجة تبلع جب
وتجقم فى مدالق السيل
وفوق الرملة مشرور
العشارى طويل
معشعش بين نوايبو الطير
حليلو جزايرو جاها النيل
وحالف ما يخلى شبير
حزم اطرافا يكسر فيها
بالهدام وينحر فيها بالقرقير
وبكرة يموصها يشرب طينها
يزرع فيها شلالات هدير وهدير
وتكسح مركب النواتة عايمى
على قرون الموج جناحها كسير
رواسيها مالى اصابعوا فى المجداف
يقوم لافوق ويجى من تانى فوق الدفة
رافع ايدو ينده فى جملة الصلاح واهل الخير
هناك الموت يمين شافوهو شوف العين
ومافى شفيع ومافى مجير
تقول الزول يعرف اجلو
ومكان موتو لولا إنو
ما كشفو الإله لى غير
شن فضل بلا الغرق البدور ناعى
وفعلا كانوا يا هو مصير
ومشيت المركب الغرقاني بين موجتين
طفروا منها النواتا بطن اللجّة قالوا اخير
تماسيحاً يقالدوا الموج يصارعوا
عتاوة العرق الكتالو مرير
ساعة يعومو بالضرعات وساعة فج
صدورن ضمة مااتبلت ولو قطير
ديل يا وليد ولاد النيل
رضو الهيجة من صدروا
ومن الطيبة رضعوا كتير
الواحد فعايلو كتر ونضمو دقاق
نهرتوا يمين تسوى الفاق
ومراً أصلاً لا ضاقوه لا بنضاق
كفاك يا وليد بلاش فاقة
خلاص أنا تهتا فى الاشواق وما برجع
وهسع ضمة لا شايفك ولا بسمع .
مع تحياتنا للشاعر المبدع محمد بادي
| |
|
|
|
|
|
|
|
|
|
Re: حلمنتيش ..... مونولوج (Re: ابراهيم قناوي)
|
يقال أن هيئة حلمنتيش
طلبت من الدكتور الحساس محمد حساس
أن يكتب قصيدة
فهو كاتب نثري
ليس له أي كتابات شعرية
فكان أن كتب هذه القصيدة
الأولى والأخيرة
((بيضة الديك))
وهي تحفة حقيقية
وتعتبر يتيمة
الشعر الحلمنتيشي
ووحيدة الحساس محمد حساس
فإلى القصيدة:
خليناك وما خليتنا
--------
خليناك وما خليتنا
ه يا القصيت دربنا وجيتنا
من بين الشباب ناديتنا
قلت كتير خلاص حبيتنا
لما شبكنا فيك ابيتنا
يظهر ناوي تخرب بيتنا
قول باالله كيف باريتنا
بي مات العيون جريتنا
في حبل الغرام شريتنا
مااا تنزلنا ياااا الماطريتنا
ورانا كتير جريت سكيتنا
لي قاضي المحنه شكيتنا
لما شبكنا فيك فكيتنا
بدمع العيون بكيتنا
جيتنا وبالعيون باكيتنا
لمّن غلبك سكيتنا
زي لعب الورق شكيتنا
جيت حمبكته ليه دكيتنا
تاني بريس بريس لاقيتنا
لما رضينا بيك صافيتنا
وتاني بدون سبب جافيتنا
ليه يا جكسه يعني طفيتنا
وقمت وبالحنان وصيتنا
لمن للاهل عصيتنا
ولمن في الدرج رصيتنا
في الاوت بعيد باصيتنا
زي لعب العيال سويتنا
واتفششته زيييييين كاويتنا
ه ياالغسلتنا ولاويتنا
ما اتكرمشنه ليه ما كويتنا
اتشتت ما لميتنا
في قفه هواك خميتنا
في كانون هواك حميتنا
لمن زيتنا فاح شميتنا
لمن زيتنا فاح شميتنا
| |
|
|
|
|
|
|
| |
ابراهيم قناوي
heba Elmahi
فيس بوك
تويتر
انستقرام
يوتيوب
بنتيريست