|
تلفزيونا ((القومى)) وغاغة ابيي
|
تلفزيونا القومى بتاع غاغات يشبك ليك فى موضوع لامن يجيب الزيت الاسبوع الاول كان غاغة خليل خليل وينو ختفو الدود خليل فى برنامج الاطفال هجاء خليل فى برنامج شوارد الردحى فى البرامج السياسية خليل المتمرد خليل المرتزقة اها الاسبوع التانى غاغة النفرة البقت نهضة الخط الساخن والبروف الزبير بشير والنهضة الزراعية عوض واغنيات الحقيبة الخضراء بمناسبة النهضة اها الاسبوع التالت غاغة الطيارة وقعت والطيارة اتحرقت والطيران المدنى ولا الشريك الكويتى اها الاسبوع دا غاغة ابيي لقاء يتحدث فيه فاروق جاتكوث وزول كدا صلوحة برنامج لقاء ابوالقاسم قور ود كارلو منو كدا وقور يصرح انا هسا تقول على مسيرى ولا دينكاوى برنامج لقاء مع مجموعة من ابناء ابيي وتسمع انا القدامك دا حبوبتى دينكاوية اها وبعدين الغريبة كلهم بيقولو حبوبتى دينكاوية ما فى زول بيقول جدى دينكاوى
اعلام المناسبات الموجه دا اسخف انواع الاعلام الهوجة والعجلة والكلفتة سمة الاعداد كلام فى الهواء عن الوطن الواحد وكان هذا اكتشاف جديد حوارات سطحية وفى النص تمرير رسائل تنحاز للقول بان ابيي تتبع الشمال ولاضفاء موضوعية مفقودة يتم استضافة بعض من ابناء الجنوب
من المتابعة عندى احساس انو الغاغات دى اسبوعية كل اسبوع بعنوان جديد
ومساهمة فى الغاغا اقترح برنامج الرياضة يشوف ليهو كم لاعب حريف كدا ويظهر على القومى ويقول العبارة المنافقة انا القدامك دا حبوبتى دينكاوية
اقتراح تانى مسلسل او سباعية فى حلقات تبدا بقصة حب على الطريقة الهندية البطل الهادى الصديق عشان زول متكلف فى الاداء والبطلة هند راشد وهاك يا قصة حب وكلام بعربى جوبا وبعدين تصادف مشكلات وفى الختام الهادى يقول انا حبوبتى دينكاوية ابوى لمن كان بيشتغل فى الجنوب تزوج وهى مع وقع المفاجاءة تقول انا كمان حبوبتى دينكاوية وموسيقى تصويرية حزينةبالناى تصدق نحنا اخوان ودموع وعاشت ابيي تابعة للشمال
|
|
|
|
|
|
|
|
Re: تلفزيونا ((القومى)) وغاغة ابيي (Re: mohmmed said ahmed)
|
التعايش بين المسيرية والدينكا تفرضه المصالح المشتركة والواقع الجغرافى وبالرغم من الازمات التى تحدث حول المراعى ابتكرت عبقرية الشعب طرق للتفاهم والتصالح
العامل السلبى فى العلاقة بينهما هو التدخل الحكومى بازكاء نار الخلافات
حكومتنا البهية وخلفها القومى التعيس
لو خلو الناس ديل يكون احسن
| |
|
|
|
|
|
|
|