|
|
 أم فتفت بالفـــــــــــــــول
|
استمتع كثيرا بأكل الباذنجان ( الأسود ) وأعرف أن كثيرا منكم يسميه ( البراطيش ) لكن أقول لكم أن من يطلق هذا الاسم على الباذنجان يطلقه عليه لأنه لا يعرف كيف يتعامل معه طبخا وتخليلا وقليا وسلقا وشويا وحشوا ، فالباذنجان حسب معرفتي اللصيقة به لا يؤكل لحلاوة أو طعامة طعمه أو جمال منظره ، إنما يؤكل لما أضيف إليه من تحسينات ، كالحشوة ، أو التتبيلة ، أو خلطة الصينية ، أو لإضافة الشطة الحارقة ، أو الليمون الحامض ، أو المايونيز ، أو الزبادي ، أو الثوم ، أو الفلفل الأخضر ( الرومي ) . ويحشى الباذنجان بالأرز واللحم المفروم مع التتبيلة المناسبة ، كما يحشى بالجزر المهروس والثوم عندما يتم تخليله بالماء والخل ، ويحشى باللوز والفستق حين يتم تخليله بالزيت ويسمى ( مكدوس ) ،، ويطهى الباذنجان بالفرن ليصبح صينية باذنجان ويتم رصه فوق اللحم المفروم أو المكعبات وتضاف إليه دوائر الطماطم والفلفل الأخضر ويمكن أن يضاف إليه الجزر الطولي أو الدائري ،، ويمكن أن يطهى الباذنجان بالحلة مع اللحم العجالي أو الضاني ويتم التعامل معه كأي خضار ، لكنه دائما يكون في حاجة إلى الثوم وإضافة الحامض ،، ويحمر الباذنجان بالزيت ثم يضاف يرص بعناية وتصب من فوقه خلطة معدة مسبقا تتكون من الزبادي والمايونيز والليمون والثوم والفلفل الأخضر المهروس ويضاف إليها الشطة والملح حسب الرغبة .. أما المخلل فيتم سلقه نصف سلقة ، ثم تفتح كل حبة فتحة صغيرة للحشو ويتم حشوه بالحشوة المناسبة لكل حالة تخليل .. وتعرف الكثير من نساء السودان سلطة الباذنجان المهروس ( بابا غنوج ) وهي عادة تعد من الباذنجان المشوي ، ويمكن أن يتم سلقه أيضا ،،
ريقك جمّ مش ؟
ده مش موضوعنا ، فالموضوع أصلا هو أن هناك أشياء كثيرة في هذه الدنيا لا تؤكل لحد ذاتها ، وبعض هذه الأشياء قد لا تتضمن فائدة تذكر للجسم وبعضها قد يحتوي على ضرر كبير تأتي نتائجه عاجلة أو آجلة ،، ونحن نجد أنفسنا نقدم على مثل هذه الأكلات من باب أنّ هذا ما وجدنا عليه آباءنا ،، ومن الأكلات السودانية الضارة أكلة المرارة ، لكن من يأكلونها يعتبرونها أهم شئ في الخروف بأكمله ،، لكن المرارة لا يمكن أكلها إلا إذا تم غسلها عدة مرات وتم تحسينها بكثير من المحسنات ،، والكثير من الناس يرى أن غسل المرارة ( خاصة الكبدة والفشفاش ) يضر بها ، ويقبل أن يتم غسل الكرشة فقط . وكثير من الشعوب تأكل الكبدة نيئة ، لكن الفشفاش ( الرئة ) والكرش فربما نكون نحن الشعب الوحيد الذي يأكلها نيئة .
ريقك جمّ مش ؟
ده مش موضوعنا ، فالموضوع الأساسي هو أنني ربما أكون قد أكلت طنا من أم فتفت طيلة حياتي ، وصادفني من أكلها ما صادفني من متاعب مؤقتة أو مزمنة ، ، وأم فتفت بالرغم من أنها موجودة في كل الحيوانات المأكولة اللحم إلا أننا اعتدنا في الغالب أن نأكلها من البقر ، ولا تلاقي أم فتفت الضأن أو الماعز إقبالا كبيرا من أكلة أم فتفت ،، وأم فتفت صعبة التنظيف ، حتى لأكاد أجزم أنها لا يمكن تنظيفها بنسبة مائة في المائة لأنها تتكون من طبقات تراكمت بعضها فوق بعض ،، ولا تستطيع تنظيفها إلا يد ماهرة ومدربة ، وهناك كثير من أكلة أم فتفت يرون أن تنظيفها أكثرمما يجب لهو مفسدة لها ، أي أنها بالتنظيف ربما تفقد جزءا من طعمها ونكهتها ،، لكني أرى أن أم فتفت لا طعم لها ، فهي ماسخة كالباذنجان تماما ، لكن الباذنجان لا رائحة له ، بينما أم فتفت لها رائحة قوية ونفاذة ، ولا أتفق مطلقا مع من يقول أن رائحة أم فتفت عفنة ، إنما أرى أنها عفنة جدا ( أسّ مائة ) .. إذن لماذا نأكل أم فتفت ؟
ما أراه أن أم فتفت كالباذنجان تماما لا تؤكل لحد ذاتها ، وإنما تؤكل من أجل حذاقة طعم الخلطة المضافة إليها ، ، ولما كانت أم فتفت اكتشافا سودانيا خالصا ، فإن خلطتها أيضا سودانية أصيلة ،، فالفول السوداني المطحون ( الدكوة ) والشطة الملتهبة والملح والليمون والشطة الخضراء والبهارات الحارقة والبصل المحشوش نااااعم( ويفضا أخضرا ) ، كلها مخلوطة مع الفول هي ما يدفعنا إلى أكل أم فتفت ،، كما أنّ أم فتفت ارتبطت بالبهجة الشعبية ( المريسة والشربوت والدكاي والعسلية ) كما ارتبطت بالبهجة المعبأة في القوارير ( بدون تفصيل ) ، وطبعا لوحوحة الشلة دور كبير في التهام المزيد من أم فتفت ، ويأتي بعدها لحس كل ما يتبقى من الخلطة ، حتى يتصبب العرق ،، ولا يهم مايحدث للمعدة المسكينة بعد ذلك ، والزارعنا غير الله يجي يقلعنا ،،
السؤال :
لماذا لا نأكل الخلطة وحدها ، ونأكل أم فتفت مطبوخة أو نرميها لكلابنا ؟
|
|
 
|
|
|
|
|
|
|
|
Re: أم فتفت بالفـــــــــــــــول (Re: ودقاسم)
|
أخوي ود قاسم
مالك علينا من الصباح ده أم فتفت شنو ومرارة شنو ده اكل بعاعيت ساكت
( تصدق لو كنت عارف إنو أم محمد بتأكل أم فتفت والمرارة قبل ما اعرسها كان حيكون عندي راي تاني بس الله ستر )
أما بالنسبة لماذا لانأكل الخلطة وحدها ؟
فأعتقد أن هنالك من يأكل هذه الخلطة دون أم فتفت ولكن روادها لايستطيعون التنازل عنها فهي قد أصبحت من المسلمات .
| |
|
|
|
|
|
|
|
|
|
Re: أم فتفت بالفـــــــــــــــول (Re: ali othman)
|
ود قاسم
لما وصلت نهاية الموضوع لساني كان مدلدل على الكي بورد.
باذنجان زمان عشان كان حجمه أكبر ، سموه براطيش. رغم أنني أحب ذلك الطبيخ ( هل جربته بالكسرة ؟ ) حاجة ما حصلتش.
ود قاسم : الحاجات دي لو قدامك قول لي عشان أهجم على مطبخ فوزية.
| |
|
|
|
|
|
|
|
|
|
Re: أم فتفت بالفـــــــــــــــول (Re: ali othman)
|
العزيز علي عثمان
لك التحية
أوعى تقول لي ما أكلت الحاجات دي ، يكون ده مقلب دولي ، كان لازم تاكل وبعدين تعلن عن توبة نصوح ،،
تعرف أنا لما المدام جات هنا قالت ما بتاكل الحاجات دي ، لكن أخوك كان مدمن على هذه الأكلات ، وكنت أتوحوح من الشطة في وهي جالسة إلى جانبي ، وشوية يا زول النفيسة دخلت ، ولحست من الخلطة ، ثم تقدمت نحو الكبدة والأن هي تضرب المرارة وا/ فتفت زي السلام عليكم ، لكن أخوك القولون عوقوا فتاب لوجه الله تعالى ، لكن العيد هيج أشجاني وبقيت أتمطق بس أصريت على موقفي .
| |
|
|
|
|
|
|
|
|
 Re: أم فتفت بالفـــــــــــــــول (Re: Raja)
|
تعرف يا ود قاسم انا السنة دى زى الما عيدت لانى
كنت شغال فترة العيد كلها ، وما ضقت الكبدة النية
وكمان حبيبتى ام فتفت ،
حأحكى ليك مرة فى لوس انجلوس عندنا صاحبنا بيتو كبير
قمنا جبنا لينا خروف وضبحناه جوه البيت ، وكان فى زميل تانى
جاى ومعاهو زوجته الامريكية وقفت تتفرج ونحن بنقّطع اللحمة
اخونا الضّباح بعد ما طّلع الكبدة قام قطع منها حتة وأكلها
تعال شوف صحبتنا الامريكية سوت شنو ، اخدت ليها شهقة كدة
ويا الطراش جاك يوم وبهدلة ودوخة مره نجيب كلونيا
وناس يقولوا ليك ليمون ، المهم فى النهاية لمن فاقت
قالت اول مرة أصدق المعلومة اللى بتقول إنو الافارقة
بياكلوا لحم البشر.قلنا ليها الحمدلله ما حضرتى ساعة الضبح .
دى كانت بّلغت فينا البوليس.
| |
|
|
|
|
|
|
|
|
|
Re: أم فتفت بالفـــــــــــــــول (Re: mohamed elshiekh)
|
ود الشيخ
حاج بيت مكة
كيفك
أمبارح بعد ما خلصنا من مشاوير الضيف ، رجعنا البيت متأخرين ، وكنا مكسلين من العشاء ، وكانت الخيارات محدودة ، فسالتهم عن باقي الغداء ، فإذا بالطبق الأساسي باذنجان باللحمة المفرومة ، والساعة كانت تقترب من الثانية عشر منتصف الليل وخالك يداعب الباذنجان ويعبئ قطع الخبز باللحم المفروم حتى يتدفق من الجانبين ، ويسيل الزيت بين الأصابع ،، وفوزية تنظر إلي وكأنها تفكر بعملة الأمريكية التي أوردها ترهاقا العظيم ،، لكن خالك ما سائل في حد ..
| |
|
|
|
|
|
|
|
|
|
Re: أم فتفت بالفـــــــــــــــول (Re: ترهاقا)
|
ترهاقا العظيم
لك التحية
هي الأمريكية دي ما لقت محل تقعد فيهو مع الحريم ، الجابها شنو عشان تقيف مع الضباحين ،،
بس صدقني يا ترهاقا لو سألت عنها الآن ستجدها مدمنة أم فتفت .
قلت لي الجماعة شغلوك أيام العيد ولم تستمتع بالمرارة ، والله مشكلة ،، خلي تمبس يطلع ليك صورة صحن مرارة من مرارة العيد ، وللا أقول لك ، خلينا يوم نضبح لينا خروف في مزرعة حسن الملك ..
| |
|
|
|
|
|
|
|
|
|
Re: أم فتفت بالفـــــــــــــــول (Re: Raja)
|
العزيزة رجاء
لك التحية
إذن نحن شركاء في حب الباذنجان ، وكمان الدمعة ، بس تعرفي يارجاء أنا لا يعجبني أداء السودانيين تجاه الباذنجان فأميل إلى المصريين والشوام وأقلدهم في تعاملي مع الباذنجان ، ، وبالرياض مطعم مصري اسمه (الدمياطي ) تدخله فتجد فيه أربعة أو خمسة أصناف من الباذنجان فيسيل لعابك لشطتها الحارقة فيضطر ودقاسم ومحبي الباذنجان لزيارة هذا المطعم مرة أو مرتين في الاسبوع ، وكلما مررت ناحيته استوقفني أولادي يطالبونني بشراء الباذنجان الجاهز ،
وكمان يا رجاء زي ما شهيتينا شربوت الحاجة ، الآن أيضا شهيتينا طبخاتها ، بس خلي الأمور تستعدل والناس تنجمع ، ونتذوق زاد بعضنا بعضا ..
شكرا لك .
| |
|
|
|
|
|
|
|
|
|
Re: أم فتفت بالفـــــــــــــــول (Re: ودقاسم)
|
الزميل ود قاسم ... أسعد الله أوقاتك بكل فتافت (أم فتفت يعني) وبراطيش.
الباذنجان ده (وللا دي؟) ما حبيته إلا بعد ما اكتشفت الطريقة اللبنانية في طبخه او قليه. أما أم فتفت فلم أتناولها إلا مرة واحدة وجغمة واحدة فقط وكانت تلك الجغمة استجابة لواحد حلف علي بالطلاق إلا أجربها. ديك كانت أول وآخر مرة مع أم فتفت. الشيء التاني الذي لم أتعاطاه، واستغرب لمتعاطيه هو الكوارع!!! أي والنبي الكوارع. قاتل الله الكوارع وخلقتها. هذه المخلوقة المسماة بالكوارع لم تشرّف معدتي حتى الآن .. وسوف لن أسمح لها بذلك.
يبقى سجلّي في أم فتفت والكوارع فااااااضي، وأصحابي مقتنعين بان نص عمري ضاع عشان ما أكلت الهلاتيت دي!!. هل فعلاً نص عمري ضايع يا زميل؟
| |
|
|
|
|
|
|
|
|
|
Re: أم فتفت بالفـــــــــــــــول (Re: Shinteer)
|
الزميل العزيز شنتير
يا أخي وينك مختفي ؟ ليك وحشة ،،
كل سنة وانت طيب ، والسنة الجاية تكون مدمن كوارع ،، وكويس إنك أخيرا اتفقت معنا على الباذنجان ،، ويبدو أن هناك تحولا عاما تجاه الباذنجان في السودان ، وقد لاحظت ذلك في آخر إجازة لي قضيتها هناك ، حيث يزرع الآن بكثرة ويستهلك بكثرة ،،
أما أم فتفت فهي مرحلة هامة من حياة الفرد السوداني ، وإن لم تمر بهذه المرحلة فمعنى ذلك أن نصف عمرك قد ضاع ،، أما الكوارع فهي قمة المزاج ، وقد أكلت كوارع حيوانات عديدة منها الإبل والبقر والماعز والضأن ، وما زلت أسعى إلى الكوارع بكل قوتي ، وأستمتع بشوربتها وأغسل يدي بمزاج من الجيلاتين الذي يحدث تماسكا بين أصابع يدي ،، ولي مع الكوارع أيضا ذكريات لا تمحى ..
الآن لا أنصحك بأكل أم فتفت ، لكني أشد على يدك وأنت تتعاطى الباذنجان ، وأحضك بشدة على تناول الكوارع فهي سهلة على المعدة ومغذية وطاعمة ولحمها غزير ..
| |
|
|
|
|
|
|
|
|
|
Re: أم فتفت بالفـــــــــــــــول (Re: Raja)
|
العزيزة رجاء
لك التحية
إني أشتم رائحة التحرش ،،ومحاولات الانتصار للنوع ،
تعرفي يا رجاء فوزية دائما تقول لي :
إنت لو ما اتحشرت ما بترتاح ؟ وهذا لأني لا يمكن أن أترك حلة مقفولة دون ان أعرف ما فيها ، ولازم أجيب الكمشة وأصوت ، وهناك كثير من الطبخات الخاصة بنا كانت من اكتشافي ثم تسعى فوزية لتطويرها ،، وتجديني آكل الكثير من الأشياء التي يرفضها السودانيون ، فمثلا غالبية السودانين لا يعرفون طعم الجمبري أو الاستاكوزا ، ولا يأكلون الفطر ، ولا يحبون البقدونس ، ولا يفضلون محشي ورق العنب ، وتعرفين طريقتهم في أكل المحشي بالخبز ، أي لا يأكلون المحشي مباشرة ،، ولا يعجبهم الحمص الشامي ، وأصناف عديدة يرفضونها ،، لكن ودقاسم ما شاء الله عليه لا يفرط في شئ من ذلك ،،
أما شراء الخضار واللحوم فأنا أستمتع بذلك ، وأوزع الخضار وأشارك في تنظيفه وحفظ ما يمكن تجميده منه ، وتقطيع الجزر والخيار للمخلل ، وأجيد تقطيع البامية بنوعيها المفروك والمقمع ، وأورق الخدرة ، والسبانخ والسلج ، وأبحث عن البامبي ، وأحب القرع وخاصة ما يسمى بالأمريكي ( قرع ضغير الحجم ، وأحب الكوسا شديدة الخضرة ، وأفضلها محشية ، وحاجات يا رجاء ..
لكن فوزية دائما تتذمر من تدخلي في المطبخ ، وتقول أنها متفرغة لبيتها ولا تحتاج لمساعدين ،، وهذا كله خوف من المساعدين الخارجيين مش الداخليين ، وهو خوف تمارس فيه المثل :
الباب البيجيب الريح سدو واستريح ..
| |
|
|
|
|
|
|
|
|
|
Re: أم فتفت بالفـــــــــــــــول (Re: معتصم دفع الله)
|
العزيز معتصم
لك التحية
أنت من جيل أعقب البهجة ، لكنكم ورثتم بعض حلاوتها ، فعضوا على ما ورثموه بالنواجذ ، ولا تترك أكل أم فتفت إلا بعد أن تبلغ عمر خالك ، وغذا نجوت من أمراض المعدة والأمعاء وأسأل الله لك ذلك أن تستمر في أكلها ما شئت ،
تحياتك لفوزية وأولادها وصلت ، وسلم لي على صلاح .
| |
|
|
|
|
|
|
|
|
|
Re: أم فتفت بالفـــــــــــــــول (Re: ودقاسم)
|
الاستاذ ود قاسم
عيد سعيد عليكم والاسرة
قالوا نميري كان ( او الى وقت قريب ) بياكل يوميا الصباح صحن معتبر من الام فتفت ، يكون ياربي ده القعده في الحكم 16 سنة؟؟
اما الباذنجان ، فلو بقى طاجن كمان يكون ابداع حقيقي خالي من اي منغصات جانبية لكن ما بضمن ليكم حموضة المعدة
ولكم التحية
| |
|
|
|
|
|
|
|
|
|
Re: أم فتفت بالفـــــــــــــــول (Re: maia)
|
العزيزة مايا
لك التحية
والله لو مشيتي شوية في موضوع الارتباط بين أكل أم فتفت وإطالة أمد الحكم تكوني عملتي لينا بحث شيق جدا ،، خاصة وأنه يقال أن نميري مريض جدا ، فألحقي قبل ما يفرتق ..
بسيطة جدا مسألة حموضة المعدة ، أعملي الطاجن ونحن نتحمل الحموضة .
لك الشكر
| |
|
|
|
|
|
|
|
|
|
Re: أم فتفت بالفـــــــــــــــول (Re: ودقاسم)
|
العزيز ود قاسم
تحياتي
ياخي مالك داير تفرقنا من بعض انا وانت ؟ ما كنا اصحاب
انا مش ما بحب ام فتفت والمرارة وبس ! لو ختوهم في الصينية بخلي الاكل
وكويس انو ابو سهى (حلبي) ما بياكل الحاجات دي
لكن انا قلبي كلو على اختي المسكينة فوزية بتكون هاريها بالمطبخ وخصوصا العشاء ولا كيف؟؟
قول فسيخ معليش بس ما تركين .. قول كمونية يعععععععني بس بتعتمد على الزول البعملها
اتمنى لك وجبة دسمة بس ما تكتر من الشطة
| |
|
|
|
|
|
|
|
|
|
Re: أم فتفت بالفـــــــــــــــول (Re: أم سهى)
|
أختي أم سهى
لك التحية
بالنسبة للمرارة وأم فتفت أنا أكلت كميات ، لكني حاليا لا آكلها رغما عن أن الرغبة تملؤني ، إلا أن القولون لم يعد يتحمل ذلك ، وعليه أوقفنا تناول مثل هذه الأطعمة اللذيييييييذة ، وكلي شوق إليها ،،
فوزية بالرغم من أنها تعلمت متأخرا تناول هذه الأطعمة ، إلا أنها وكما يقولون من يضحك أخيرا يضحك كثيرا ، وقد جهزت خلطة شطة خضراء يوم الوقفة وأضافت إليها الأتّي يوم الضحية ، ويمكن إذا أن يحدثك تمبس عن هذه الخلطة ، وأنا فقط كنت أتفرج على حلبة المصارعة ،
وبالمناسبة الحلبة من أكثر الناس عشقا للحم ، وقد يكون أبوسهى من حلب المدن ، أما حلب الأرياف فياما أكلنا معهم اللحم وأم فتفت والمرارة والربيت ،، ويقال عندنا إذا سبقك الحلبي للجزار فتأكد أنك لن تجد كبدة ولا أم فتفت ..
ربنا يحفظ لك سهى وأبوها وبلغيهما تحياتي ،،
| |
|
|
|
|
|
|
|
|
|
Re: أم فتفت بالفـــــــــــــــول (Re: ودقاسم)
|
ازيك يا ود قاسم
انا دخلت بالصدفة
وبعدين داير اقول ليك حاجة
ام سهى دي اسالني منها انا يوم من الايام كنا شماسة سوا
يعني بطنا مدبوغة وبتهضم اي شئ
وكانت بتطبخ لينا الشطة
والله يا ودقاسم وحاة سيدي الحسن
ام سهى كانت بتطبخ لينا الشطة الخضرا عديييل
وتعال يا وحوحة
لا قادرين ناكل لا قادرين نهرب
وكانت ايام جميلة
خالد
| |
|
|
|
|
|
|
|
|
|
Re: أم فتفت بالفـــــــــــــــول (Re: خالد العبيد)
|
خالد ود العبيد
كيف حالك والأسرة
يا أخي إنت بس اللي كنت شماسي ، أم سهى ما كانت معاك ولا بتعرفك ، وانت مادام بتتذكر بيت العزابة بتاع امتداد ناصر ( أبونصير وفوكس وودعباس ) معناها فعلا كنت شماسي ،
وغداك وفطورك شطة ،،،
طيب في العيد ضربت مرارة وللا عملت زي جماعتك القاعد معاهم ديل لا ضحية لا سماية ؟
| |
|
|
|
|
|
|
|
|
|
Re: أم فتفت بالفـــــــــــــــول (Re: ودقاسم)
|
الأخ ودقاسم
| Quote: لكن أخوك القولون عوقوا فتاب لوجه الله تعالى |
وبعد ده كله تقول لي جرب ، ديل إنتو ناس العصيدة واللبن والسمن البلدي حصل ليكم كده أمال إحنا ناس اللبن المخلوط بي موية نسوي شنو ؟
متع الله الجميع بالصحة والعافية
| |
|
|
|
|
|
|
|
|
|
Re: أم فتفت بالفـــــــــــــــول (Re: ali othman)
|
العزيز علي عثمان
لك التحية
كنا صغارا ، ثم صبية ، وأهلنا يذبحون الدجاجة المصابة بانفلونزا الطيور ( سمير ) هكذا كنا نسميها ، ويذبحون العنز المصابة ب ( أبنيني ) ولا أعرف له اسما حديثا ، لكنه نوع من الالتهاب الحد ،، ونأكل كل هذا ونظل أصحاء ،، ولا أعلم كيف تحولت مصاريننا إلى حالة الدلع الحالية وأصبحت تشكو حتى من شرب كباية بيبسي كولا ، وزمان كانت البيبسي كولا علاج للمغص.
ربنا يدينا الصحة والعافية جميعا .
| |
|
|
|
|
|
|
|
|
|
Re: أم فتفت بالفـــــــــــــــول (Re: ودقاسم)
|
العزيز ودقاسم
وحاة شيخي حمد اب عصاة سيف ام سهى دي كانت (الجوكي) بتاعنا في دنيا الشماسة
والجوكي دي اسال منها ام سهى يمكن توريك ويمكن لا
لانو الشماسة على فكرة عندهم شرف وقسم غليظ عشان مايبقوا (تلفون دلاقين) ودي برضو اسال منها ام سهى
على اي حال ايها الشفيف ذكرتني بس ناس فوكس ابو التومات سلمى وثرى
وشلة العذابة الجميلة
اما عن الضحية نحن طول عمرنا (بنضحي) بقت على الخروف المسيكين ده
ولك مني اعذب الود
خالد
| |
|
|
|
|
|
|
|
|
|
Re: أم فتفت بالفـــــــــــــــول (Re: ودقاسم)
|
صديقي ود قاسم
انت عارف انا ما باكل ام فتفت دي..
لكن بستمتع جدا بمشاهدة آكليها وعندي جاري الله يديه العافيه مضيع عمرو كلو في العرقي وام فتفت
يوميا وبظبط المسايل دي براهو..وذولك وناس جدا ومتفتح وبليغ لمن يكون ضارب الحاجات دي، تعال نفتح باب دراسه تانيه بين ام فتفت وظرفاء وسكيري القوم في السودان ،، رأيك شنو.
اغرب حاجه انو في ناس بياكلوا الشحمه التحت رقبة الخروف وبين ضلوع القفص الصدري قبل ما الخروف ينزل لحمه وعضام ديل بيكونو مالم؟
لك كل التحايا لك كل الود...
ابونور وعبده
| |
|
|
|
|
|
|
|
|
|
Re: أم فتفت بالفـــــــــــــــول (Re: ابو نور)
|
العزيز أبو نور وعبده
لك التحية
يلا افتح لينا الموضوع لدراسة العلاقة بين أم فتفت والسكارى والظرف ، وأبدأ بصاحبك هذا الذي ذكرت ،
أما ما أسميته أنت الشحمة التي تحت الرقبة وفوق الضلوع فهي ( سن البرك ) وأنا جربتها نيئة لكني لم أستسيغها ، لكني أحبها وسط اللحم المحمر وهي ساخنة ، ولا تقع عيني عليها إلا وأخطفها ،
لك تحياتي وكثيف الود
| |
|
|
|
|
|
|
|
|
 Re: أم فتفت بالفـــــــــــــــول (Re: ودقاسم)
|
الاستاذ ود قاسم
كل التحايا العطرة مني و عائلتي لكم
الكلام عن الاسود و ام فتفت شهئ و يفتح النفس ..
ذكرتوني اكل الكسرة و ام فتفت و ملاح التقلية والشربوت والحلو مر..
الاكل في السودان ليه طعم .لكن في الغربة طعمه مسيخ ..عليكم اللة شنو الفي الغربة ليه طعم؟؟؟؟
غايتو اللة يكون في العون...
ولكم مني كل الحب ومعاهم سلطة اسود بالشطة الخضراء كمان....
| |
|
|
|
|
|
|
|
|
|
Re: أم فتفت بالفـــــــــــــــول (Re: ودقاسم)
|
الاستاذ ود قاسم
كل التحايا العطرة مني و عائلتي لكم
الكلام عن الاسود و ام فتفت شهئ و يفتح النفس ..
ذكرتوني اكل الكسرة و ام فتفت و ملاح التقلية والشربوت والحلو مر..
الاكل في السودان ليه طعم .لكن في الغربة طعمه مسيخ ..عليكم اللة شنو الفي الغربة ليه طعم؟؟؟؟
غايتو اللة يكون في العون...
ولكم مني كل الحب ومعاهم سلطة اسود بالشطة الخضراء كمان....
| |
|
|
|
|
|
|
|
|
|
Re: أم فتفت بالفـــــــــــــــول (Re: سارة منصور)
|
الظاهر انو الموضوع دا مقصود بيهو خروف العيد عشان كدا الناس البحبو امفتفت يكونوا حبوك حب على عين العيد ، المهم ان دخلت اقول ليك كل عام وانت الف خير العيد العقب ام فتفت
وانا قاصدة البوست بتاعك بتاع العلاقات بين الجنسين ما لاقياه كمبيوتر ي كان لام فيهو فايروس مزكوم وحال و بالبلي والظاهر فاتنيايوة انا عرفتك عايز تربي بهايم ليه عشان ام فتفت !!!
| |
|
|
|
|
|
|
|
|
|
Re: أم فتفت بالفـــــــــــــــول (Re: سارة منصور)
|
الأستاذة سارة
تحيات طيبات لك وللعائلة الكريمة
تعرفي أحلى ما في الغربة هو الحنين المتدفق للوطن ، لو اتذكرنا الأكل والونسة دميعاتنا تجري ، ولو سمعنا الغنا دميعاتنا تجري ، ولو سمعنا أناشيد اكتوبر نجعّر عديل كده ..
أم فتفت في الغربة رخيصة جدا ومتوفرة ، لكني لا أجبها هنا ، وعندما أراها أشعر وكأنها مبردة من سنين أو مصنوعة ،، ولكن عندما أعود في إجازتي أبكّر إلى الجزارة وهاك يا شراء ..
تعرفي الموضوع مش موضوع أكل ،، هو موضوع لمة أهل وصحاب وجيران ،،
نار البعد والغربة
شوق لأهلي والصحبة
شوق لكل جميل في الحي
| |
|
|
|
|
|
|
|
|
|
Re: أم فتفت بالفـــــــــــــــول (Re: ودقاسم)
|
سلام ياودقاسم
| Quote: وهناك كثير من أكلة أم فتفت يرون أن تنظيفها أكثرمما يجب لهو مفسدة لها |
رواية أهل الليل (على وزن أهل الخطوة)وهذه رواية مجروحة
مع تحيات ستات الكوارع
ويبدو لي انت وام العيال قاعدين تعملو من الجلد حاجة تاني غير (السعن )مكسرين قوانين المادة بفنائها
لكما الود وان شاء تنفعكم
| |
|
|
|
|
|
|
| |
ودقاسم
ابو جهينة
Raja
ترهاقا
mohamed elshiekh
Shinteer
معتصم دفع الله
أم سهى
خالد العبيد
عشة بت فاطنة
yasiko
فيس بوك
تويتر
انستقرام
يوتيوب
بنتيريست