كتب الكاتب الفاتح جبرا المتوفرة بمعرض الدوحة
|
|
 كيف تكتشف أقرباءك في المنبر
|
بالأمس تمكنت من اكتشاف قرابتي بتماضر شيخ الدين وشقيقها هشام يازول يازول . وما كنت أتصور مطلقا أنه يمكن أن يكون بيني وبين القيقين أي رابطة دم ، إلا رابطة أننا سودانيين ، يعني نتلاقي في جدنا سودان فقط ، وما كنت أتصور أن حبوبتي المتن بت الشيخ الإمام - بالرغم من كل ما شحننا به أهلنا تجاهها من صفات طيبة - يمكن أن تكون لها حفيدة مثل تماضر شيخ الدين ، علما ( عين ولام مفتوحتان ) يعرفه السودان ويعشقه ،
وبالرغم من أن الاكتشاف كان مفاجأة لي ، إلا أنه لم يحدث بمحض الصدفة وبمقياس وجدتها ... وجدتها ، فأنا أتبع منهجا في التعارف ، ليس على مستوى المنبر ، ولكن في كل حياتي لا أحيد عنه . وهذا المنهج منهج وراثي ، ورثته من أهلي الذين يحرصون على معرفة أنساب الناس وبسألون عنها ويحتفظون بوثائق قديمة جدا تثبت ورثتهم وأنسابهم ، وفي نفس الوقت يهتمون قدر الإمكان بصلة الرحم والتواصل الاجتماعي بينهم وبين من يعرفون ويعايشون ، كما أنهم تجاوزوا منذ سنين عديدة المسألة العنصرية ، وكان للتصوف دور هام في هذا المنهج ،
أجد نفسي دائما تواقا للتعارف ، وعندما أقابل شخصا وأتعرف عليه فإنني عادة أحاصره بالأسئلة حتى أتعرف عليه أو يملني ويتركني ، وكثيرا ما أخرج بنتائج إيجابية ، كأن أعرف بعض معارف من ألتقي ، أو يطلع بيننا قرابة ، أو صداقة قديمة أو صحبة سابقة ، أو تعارف جديد ،
ولا أتردد أن أشبه شخصا ما بشخص آخر أعرفه ، وكثيرا ما أعمد إلى أحد محدثي وأسأله عن انتمائه وأقول له أنك تشبه فلان من المنطقة الفلانية ،
والمسألة اخوتي ليست مضيعة للوقت أو تسلية أو نوعا من التخلف ، لأن الله سبحانه وتعالى يقول ،
وجعلناكم شعوبا وقبائل لتعارفوا
والمعرفة كنز يثمنه غاليا من يعرف قيمته ، وليس المقصود هو القيمة المادية ، إنما هناك مخرجات ونتائج عديدة إيجابية تخرج من عباية معرفة الناس ، وأورد مثالا :
كنت في العام خمس وسبعين طالبا في جامعة الخرطوم ، أعيش في داخليات البركس ، وكان لي قريب يعمل سائقا في بصات القوز والحلة ( بصات حمراء بزيق أخضر في تلك الفترة ) وكان قريبي هذا مزواجا ومتلافا للزواج ، تزوج اثنتين وطلقهما ، وأراد أن يتزوج بثالثة هي بنت صديق له من الدروشاب ، وجاءني وقال لي أنه سيسد ماله يوم الخميس وعليّ أن أرافقه ، فسألته من سيكون معنا ، أجابني أن أحد أصدقائه سيرافقنا ، وقلت أين النساء ، قال : لا نساء ولا يحزنون ، هي أول مرة أنا أتزوج ؟ قلت حسنا ، ستمر عليّ يوم الخميس ، قال : نعم ، قلت : على بركة الله ،
وذهبنا ثلاثتنا يوم الخميس ، فوجدنا أهل العروس قد أعدوا استقبالا يليق بأكثر من خمسين شخصا نساء ورجالا ، فلما دخلنا عليهم سألونا أين أهلنا وباقي الأسرة ، فتصدى لهم قريبي بلسان طويل ، ودخل معهم في جدال ، أما أنا فقد جلست على أحد الكراس ، واشتد الحوار بين مضيفينا وقريبي ، لدرجة أنني تصورت أن العكاز حا يدور ،
وفي تلك اللحظة جاءني رجل كبير في السن يتوكأ على عصا ، وجلس قبالتي ، وسألني : هل أنت من الضيوف ، قلت نعم ، قال : من أين أنتم ، قلت : نحن من معتوق بغرب الجزيرة ، فقال : من معتوق السوق وللا معتوق الحلّال ، قلت يبدو أنك تعرف منطقتنا ، قال انا أسألك وأنت تجيب ، قلت نحن من عجوبة ، قال إنت ود منو في عجوبة ، قلت أنا ولد ناس ودقاسم ن
نادى الرجل أولاده وأهله قائلا ،
هوي آناس ، هوي ، تعالوا ، قولوا خير ، وباركو ، انتوا ما جوكم ناس ساكت ، أنتو جاتكم قبيلة ، فاستغربت المسألة كثيرا ، فجاء الناس واجتمعوا حولنا ، وقال أحد الأبناء وهو عم العروس ، والله الشايب ده خرّف ، فسالني أمامهم ، انت ود منو في ناس ودقاسم ، قلت أبوي عبد الباقي ، فسألني : أبوك نعلو طيب ، قلت الحمدلله بخير ، فقال للواقفين ، الولد ده أنا بعرف أبوه من أيام أنا صبي ، وبنزل في بيتهم وبنوم وآكل وأشرب وحماري يأكل ويشرب ويشدوا لي حماري وأركب أروح وبعد سبوعين تلاتة تاني أجيهم ، اصلي كنت تاجر ببيع الويكة بالحلّال ،
تنفس الناس الصعداء ، وما كان من قريبي الذي يريد الزواج إلا أن سحب عصاة الرجل الشايب وهلل بها ورتب على الأرض حتى أثار الغبار ، وسارت أمورنا بهدوء وطلب مني الرجل الشايب بعد أن سألني عن علاقة العريس بي وأوضحتها له ، طلب مني أن أدخل أنا للنساء وأدفع لهن المهر ، وفعلت ذلك وانطلقت الزغاريد ، وأبناء هذه الزيجة الآن رجال .
كيف تجد أقرباءك :
فقط ابحث عنهم بجدية ، وستجدهم في البوستات التي تتحدث عن أمورنا الاجتماعية وما يرتبط بها من عادات وممارسات ، ودقق أكثر في مداخلات الزملاء ، ستجد إشارة هنا أو هناك ربما تقودك إلى خيط يوصلك بعلاقة هجرتها أو هجرتك من سنين ،
لا تفكر أبدا في أن معرفة الناس تجلب لك جوانب سلبية ، أو ستنبني عليها مصروفات مادية ، فقط فكر في الجانب الإيجابي ،
ابحث عن الكنوز تجدها ،
أنا وجدت عدة كنوز في هذا المنبر ،
حيدر بدوي ، مسد msd، اسماعيل وراق ، عباس abas ، تماضر ، يازول يا زول ، قوي ، ، وأخطط في الهجوم على أبوجهينة وشنتير وابا وآخرين
فتعالوا طوعا أو كرها ،
|
|
 
|
|
|
|
|
|
|
|
Re: كيف تكتشف أقرباءك في المنبر (Re: abas)
|
عباس ابن عمي
من ودرعية أعرف أحد زملائي اسمه ابراهيم ماجداب ، وأعتقد أنه شايقي
من ودحسين أعرف زميلتي سامية محمد أحمد وأعتقد أن والدها العمدة
والمنطقة تقريبا للخوالدة والمسلمية
ولا تبعد عنها كثيرا المدينة عرب ، وفيها يكثر العركيين ، وتجاورها ودربيعة ، ومنها جدة أبي ، وفيها ولد ، ثم عدنا إلى أصولنا في معتوق مرة أخرى
| |
|
|
|
|
|
|
|
|
|
Re: كيف تكتشف أقرباءك في المنبر (Re: Hozy)
|
ما براك يا هوزي .. أنا برضو ما في أي طريقة يكون في واحد قريبي في البورد ده. غايتو إلا يقوم ود قاسم أو عباس يجوطوا لينا خريطة النسب ويطلعوني قريب فيلاديمير بوتين .. بعد ما يشترك في البورد
| |
|
|
|
|
|
|
|
|
|
Re: كيف تكتشف أقرباءك في المنبر (Re: Hozy)
|
العزيزة هوزي
لك التحية
فقط نسيتي ، أنا وأنت اتضح أننا أهل من زمان ، فقد أجري معك لقاء في البورد واتضح أنك مشتركة بين العركيين والكنوز ، وبالتالي فأنت منا ، وكلنا من آل البيت ،
وقعت الليلة مع شنتير واسماعيل وراق ، الله يحلنا
| |
|
|
|
|
|
|
|
|
|
Re: كيف تكتشف أقرباءك في المنبر (Re: Tumadir)
|
تماضر
بطلي الشربكة ، الناس ديل ما ببقوا لينا ولا حاجة ، خلي كل واحد يفتش على أهلو
ما في زول مقطوع من شدرة ، وأكان دايرين يبقوا لينا ، كل واحد ينزل فايلو ويجيب لينا سي في مكربة ، وبعدين نراجعها ونشوف مين يقرب لي مين
| |
|
|
|
|
|
|
|
|
|
Re: كيف تكتشف أقرباءك في المنبر (Re: ودقاسم)
|
السلام عليكم جميعا
اختي العزيزة مايا . . هم مش من أندينا نحن حنكون من أندهم
الأعزاء هوزي وشانتير . . أنا رحت فين مافي مشكلة خنخليكم من أندنا وممكن نضيف معانا كمان خالتنا مياده
يا ود قاسم اخوي كيفك ايه الاخبار
انا من ابوخبيرا وبنطون الدويم ايه رايك ممكن اكون قريبك
| |
|
|
|
|
|
|
|
|
|
Re: كيف تكتشف أقرباءك في المنبر (Re: حمزاوي)
|
ااها خلصنا من ود قاسم والعركيين
الدناقله يقيفوا لى بهناك
انا يتخيل لى حا كون سبب لى وحدتك يادى البلد.. عرقيا...
لسه عندى قبايل كنيره ما جبت ليكم سيرتها
حاوحدنا...ونبقى قبيله كبيره...مشروره فى الحلال والبوادى..والمدن
وبعد خلاص نتقالد ونبكى مع بعض ...ونيل شوق التلاقى
نجيب فنان يغنى
"مشاكلى بسيطه بالريده بتحل...وعندى حبيبه بشقى وبسعده"
ونبدا ننتج...ونربط حمير تعبنا فى طرف مزرعة...الازدهار...ونتدور ساقية الحضاره...والفهم...ونحن ننوم ونقوم على عطر الورد ...و صوت الحب
من هنا...للـــــــ.......مستقبل
| |
|
|
|
|
|
|
|
|
|
Re: كيف تكتشف أقرباءك في المنبر (Re: حمزاوي)
|
حمزاوي
لك التحية
تعرف يا حمزاوي ناس أبوحبيرة كلهم أهلي ، مالك احمد الشيخ وأولاده ، أولاد أحمد سيداحمد ، وهؤلاء لحالهم يمثلون ثلاثة أرباع أبوحبيرة ، وفي الدويم أهل كثيرين جدا ، وإذا انطلقت من أبوحبيرة شرقا فإنك وبعد ربع ساعة تدخل أبوحلاقيم ، وفيها الشيخ عبدالباقي ( الرقيّق ) وخليفته شيخ الجيلي ، وهم أهلي ، ومنها تواصل شرقا لتصل إلى المجيقة ، وهذه أعرفها بيتا بيتا ويعرفونني طفلا وصبيا وكهلا ، وهم عركيين ، ثم تصل بعد سبعة دقائق إلى معتوق وقراها العديدة وهناك نشأنا ولعبنا وما زلنا نجوب القرى يمنة ويسرة نرفع أيدينا بالفاتحة أو نهنئ بعرس أو نبارك مولودا أو نبيع بقرة أو عنزا ، أو نشتري قفة الملاح ، ونزور قبة أبونا الشيخ دفع الله ود الشيخ حمدالنيل وخليفته الشيخ حمدالنيل ( ابنه )
إذا أردت مرافقتنا في هذا المشوار فستجدنا مرحبين بك .
| |
|
|
|
|
|
|
|
|
|
Re: كيف تكتشف أقرباءك في المنبر (Re: ودقاسم)
|
ماعارف اقول ليك مبروك القرابة ولا لتماضر فكل منكما مدعاة لفخر الأخر
أما القرابة في البورد والله ياود قاسم أنا ماأظن القى لي قريب في البورد ده لأني شايف الناس الحمر ماكتار .
| |
|
|
|
|
|
|
|
|
|
Re: كيف تكتشف أقرباءك في المنبر (Re: ali othman)
|
الأخ علي عثمان
لك التحية
تعرف يا علي أنا عندي صاحب اسمه علي عثمان معنا هنا في الرياض ، قابلته من ثلاثة أيام وسألته هل انضم إلى البورد ، فقال لا ، فحلفته ، فأقسم لي ،
الحمرة البتتكلم عنها هي حمرة لون ، وللا حمرة عين ، وللا حمرة سياسية
في كل حالة فإن لك أهل كثيرين .
أدعوك إلى مصاهرة العركيين لتصبح لنا أهلا .
| |
|
|
|
|
|
|
|
|
|
Re: كيف تكتشف أقرباءك في المنبر (Re: salam)
|
ود قاسم
أشاركك في أغلب الأحايين صفة البحث عن Our Roots
و عن الأقارب
و ها أنذا آتيك طوعا و أقول لك :
بأنكم تقولون أن جدتكم التاية ( مسلمية )
لذا أحب أن أقول لك أن قريتي في شمال السودان هي ( قبة سليم ) و يرقد تحت قبتها البيضاء جدنا العالم النحرير الشيخ محمد المسلم سليم ، و الذي تزوج عدة نساء في الجزيرة و شمال السودان و صعيد مصر و ينسب اليه مسلمية مصر و مسلمية بعض قبائل الجعليين.
و الشيخ محمد المسلم سليم ليس من قبيلة المحس ، و انما أتى قريتنا رحمه الله باسطا يديه لنشر تعاليم الأسلام ، و تزوج من هناك و انتشر أحفاده في عدة قرى.
و يقال أن الأباظية في مصر هم من أحفاده.
و آل سليم في مصر في منطقة الديوان و الدر بالصعيد ، و الفشن بالقرب من القاهرة.
و مسلمية الجزيرة.
و السدارنة بالجزيرة.
و جزء من محس العيلفون.
فأين هؤلاء من قرابة أولئك ( يعني يا ود قاسم عاوزين حاصل الضرب و الجمع )
هل المسلمية الذين تقصدون هم مسلمية غير هؤلاء ؟
أم هؤلاء مسلمية و أولئك آل سليم ؟
أفادكم الله
| |
|
|
|
|
|
|
|
|
|
Re: كيف تكتشف أقرباءك في المنبر (Re: salam)
|
SALAM
سلام عليك سلام
لازم يكون لينا حد هناك ، بجيب ليك الخبر الأكيد ، ولكن لو أخدنا فكرة :
من هو ودعيسى
لماذا سميت المسيد عليه
ولماذا سميت البلدة كلها مسيدا والمسيد جزء منها
ما القرى التي تتبعها
هذه نقاط لبوست منفصل
يلا اكتبوا كلكم
| |
|
|
|
|
|
|
|
|
|
Re: كيف تكتشف أقرباءك في المنبر (Re: wd al geran)
|
الشايقي ود الجيران
لك التحية
مسوي حالك ود مدينة وانت عقابك شايقي ، تفتش لي في لنك الحفظ لأغاني الشوايقة
الشوايقة أهلك هم أهل عوض مثلنا تماما ، والسفنجات عندكم ، ونحن عندنا الهوستن
بس يا ود الجيران قول الجداد ...... الجداد
مش الدجاج
الدجاج دي بتاعة الاغتراب
وكمان مغترب في الخليج
قال هدوء قال
| |
|
|
|
|
|
|
|
|
|
Re: كيف تكتشف أقرباءك في المنبر (Re: ودقاسم)
|
والله يا ودقاسم انا في الاول كتبتها جداد لكن لاوزتة ناس الخليج يفهموها جداد (الجمع الدارجي لكلمة جديد) - وانتا عارف ناس الخليج  - فقمتا غيرتها
وتشكر على روحك الحلوة ياراجل يا جميل
وكدي واصل البحيت النشوف اخرتا معاك شنو.
| |
|
|
|
|
|
|
|
|
|
Re: كيف تكتشف أقرباءك في المنبر (Re: ودقاسم)
|
عزيزي ود قاسم
اولا انا في جدة ، واشكرك على هذه الدعوة الكريمة بس أم محمد ماتسمعنا، الحمرة حمرة لون وأنا من قبيلة العبابدة وأهلي في بربر .
وماتسألني عنها لأني شفتها 12 ساعة بس
| |
|
|
|
|
|
|
|
|
|
Re: كيف تكتشف أقرباءك في المنبر (Re: ghariba)
|
هاله قوته...وقفتى فى صف الدناقله؟؟ تمام...دريمز سمعت بالصف دة ولا لسه؟؟؟
دافى...وقفت فى صف...ناس كسلا؟؟؟ تى زول بعرف دافى من كسلا
ولا حاج اغا..ولا اسحق الحلنقى...يقيف فى الصف
اى زول قريبو خضر الحاوى ولا عبد اللطيف خضر...يتنظرنى...
غريبه...لينا الشرف...
كان ما خليت البورد ده كلو يبقى لى ...عينكم تشوف...
ومصطقى آدم انت فعلا نسايبنا...لانو من حسنى بت محمود ورحت " سايبنا" تحياتى لزوجتك المصون...والاسره
| |
|
|
|
|
|
|
|
|
|
Re: كيف تكتشف أقرباءك في المنبر (Re: Tumadir)
|
اخى ود قاسم
و الله عملت لى نفسيات
لما قلت لى ما لقيتى حاجه تربطنى بيك ضخكت بينى و بين نفسى و قلت معقول القى زول هنا قريبى تانى.
بس لما قلت (تعرف يا حمزاوي ناس أبوحبيرة كلهم أهلي ، مالك احمد الشيخ وأولاده ، أولاد أحمد سيداحمد ، وهؤلاء لحالهم يمثلون ثلاثة أرباع أبوحبيرة ، وفي الدويم أهل كثيرين جدا).
حيرتنى
طيب بتعرف بنات حسن سيد احمد من ابو حبيرة (حكمات وحياة و البقية )) لو طلعوا اهلك معناه فعلا من عندينا
اما الدويم اصلا انا من الدويم .بس انت من ناس منو فى الدويم . انا اهلى فى الحى الاول.
| |
|
|
|
|
|
|
|
|
 Re: كيف تكتشف أقرباءك في المنبر (Re: ودقاسم)
|
الحمد لله ياودقاسم ياقريبي
وياتماضر ياقريبي
بركة الجبرتو بخاطري شوية
تسلموا
وانا اقول تماضر دي مالي دمي حاني ليها
اتاريها القرابة
!!!!
سبحان الله !! حكمته عظيمة
والله ياودقاسم كنت ناسية الموضوع ده
شفتكم عاملين بوست كبير للعركيين وفاردين فيه
اشجار العائلة كلها
وفروعها ضربت ناس كتار
انا طبعا مابفهم في الاشجار ولا الفروع
يعني مييييييييييح ابيض
مابفهم ابدا في النسب والقرابة
واللفات الكتيرة
المهم يا قرايبي تسلموا والله يخليكم لي
| |
|
|
|
|
|
|
|
|
|
Re: كيف تكتشف أقرباءك في المنبر (Re: Hozy)
|
Quote: والله يا ودقاسم انا في الاول كتبتها جداد لكن لاوزتة ناس الخليج يفهموها جداد (الجمع الدارجي لكلمة جديد) - وانتا عارف ناس الخليج - فقمتا غيرتها
|
يا ود الجيران دى كتبتها لناس الخليج ....
طيب و حشرو عباس ديك البهناك كتبتها لناس ديم النور ...
ملاسى
| |
|
|
|
|
|
|
|
|
|
Re: كيف تكتشف أقرباءك في المنبر (Re: abas)
|
abas
العركي الأصيل ، يا أخي مالك علي ، بالله في زول في الدنيا دي يقرّب من أبوحراز ، ده شين وعندو جضوم ، ولسانو أعوذ بالله ،
وين هو الزول ده ، يبدو أنه يعاني من أثر الشواكيش ، فهو مدمن
أبوحراز لو أنت من ودربيعة وبتعرف ناس ودربيعة وشفت البوست ده ، فأنا حبوبة أبوي من ودربيعة ، وهي بنت عبد الجليل ، وأخت عبد الرحمن الذي هو والد عبد الفكي الجليل واد الوسيلة ، وأحمد وبابكر ، وعمهم محمد ( حّميد ) وعمهم عطا المنان والد ابراهيم ، وعمهم الحاج والد محمد ود الحاج ، وشقيقتي حرم تقيم من سنين في ودربيعة مع زوجها عبد الرحمن ود حمّيد
وأزور ودربيعة بانتظام
تاني داير شنو ، عامل جضومك ديل ،
| |
|
|
|
|
|
|
|
|
|
Re: كيف تكتشف أقرباءك في المنبر (Re: ودقاسم)
|
يا ود قاسم
باقي لي السودان دة كلو اهل
ولا مصر علي التركيز؟؟
غايتو لناس اللي من اندينا كتاااااار
تصدق يا ود قاسم ..لقيت واحدة هنا مشبهة عليها
استمرت المراسلات شهر
تطلع في الاخر منو؟؟؟
أختي
| |
|
|
|
|
|
|
|
|
|
Re: كيف تكتشف أقرباءك في المنبر (Re: ودقاسم)
|
يا ود قاسم اخوي
سلام وتحية
تعرف انا لي في المجيقة غزالة
أركب الاوستن ابيض ضميرك من ابوحبيره الي المجيقه الي معتوق الي
24 القرشي إلى المناقل الي مكتب 64 العزازة الشكينبا المدينة عرب
طابت وطابت لكم طابت وودالقرشي ودالشافي وقوز كبرو
والكع ساي
| |
|
|
|
|
|
|
|
|
|
Re: كيف تكتشف أقرباءك في المنبر (Re: حمزاوي)
|
| Quote: المشتهي الحنطير يطير |
خالتنا الكبيرة مقاما و احتراما دومة
تضرب الامثلة لتقريب المعني ... بس المثل دا لخبط فهمي شوية..
يطير عرفناها...
الحنيطير يطلع منو ؟؟
ملاسى
| |
|
|
|
|
|
|
|
|
|
Re: كيف تكتشف أقرباءك في المنبر (Re: ودقاسم)
|
| Quote: يا غريبة مالك نسيت اسعد ابراهيم و بدرالدين شنا ؟ |
أنا بتكون طفشتو مني الشنا المبارياني دي يا ملاسي
يا خوانا الداير يقبى ليكم يسوي شنو؟؟؟
غايتو أنا حلاوي من الحلاوين
لو لقيتو ليكم حاجة بتناسبني أدوني خبر
| |
|
|
|
|
|
|
|
|
|
Re: كيف تكتشف أقرباءك في المنبر (Re: ودقاسم)
|
حنينة
أنا مرة رديت على التلفون ولقيت بت بدت تغازلني ، وفي نهاية المكالمة قالت لي يا وسخ يعني بتستجيب لمشاغلات البنات ، أنا فاطنة ( أختي )
حمزاوي
غزال المجيقة دي بت عمي ، وأنا كاشفك وعارف قصتك ، والشاكوش اللي انت أخدتو منها كنت أنا وراهو
دوما
أي خلطة ممكن تكون عصير ، بس طبعا في عصير طاعم وعصير مسيخ ، وانت وشنتير وجماعتك عاملين معانا ( النفيسة فيها والقليب مابيها ) تعالوا اتلموا معانا عشان نبقى أهل
ملاسي
الحنيطير نبتة غير حقيقية يتخيلها الناس رديئة الطعم خشنة الملمس نتنة الرائحة ، وعندما يشبه بها الانسان ( كتشبيه دوما السابق ) فإن التشبيه يعتبر تشنيعا وهو في النهاية ممارسة عنصرية ، شايل شيلتي مع دوما ، وجااااهز ، ولو ما شافت الرد ده بيكون أحسن
ملكة سبأ
كلنا أهلك وكلك أهلنا
أسعد ابراهيم
يا اخي معناها أهلك كتار جدا
بتعرف في الابيض ناس أبوحراز ، وناس فضل وميرغني عمر ، ومكي الخليفة ، إذن نحن أهل
بدر الدين شنا
ود حبوبة يجمعنا ، وناس المحيريبا وما جاورها دفع الله الزين الحبيب ، مالك أبوسن ، محمد إمام ، الشيخ علي العبيد ، بادي محمد الطيب ، عبد الله محمد ، عايز زيادة ؟
سلام
تعالي صادة وأنا راجيك قريب من المسيد ، في اللعوتة
| |
|
|
|
|
|
|
|
|
|
Re: كيف تكتشف أقرباءك في المنبر (Re: ودقاسم)
|
ود قاسم تحياتي
تتصور يا اخي انا كنت فاهم المثل بطريقة تانية خالص كنت قايلو
المشتهى حن الطير يطير, يعنى الزول الكايس المحنة من الطير يتعلم الطيران
غايتو انا لو مالقيت غير قرايبي ديل, لقيت لي امثلة و اخوان و حاجات كويسة خلاص ...
تحياتي و تقديري
ملاسى
| |
|
|
|
|
|
|
|
|
|
Re: كيف تكتشف أقرباءك في المنبر (Re: Hussein Mallasi)
|
| Quote: الحنيطير نبتة غير حقيقية يتخيلها الناس رديئة الطعم خشنة الملمس نتنة الرائحة ، وعندما يشبه بها الانسان ( كتشبيه دوما السابق ) فإن التشبيه يعتبر تشنيعا وهو في النهاية ممارسة عنصرية ، شايل شيلتي مع دوما ، وجااااهز |
لوووووول اخونا ود قاسم ابدا الحنطير البعرفوا انانبات من فصيله البقوليات والحبوب بتاعته صغيره الحجم دقيقه جدا بيقوم براه كنالما نمشي التحتانيه نحش القش مرات بجي معاه ولا رائحته نتنه ولا شي وحاشاكم من الريحه النتنه بس حبوبه صغيره وما في زول بزرعه ولا يحصده يعني ممكن تقول ما عتده استعمال اهاونحن عاده نطلقه لو اغتظنامن زول يعني قريب من حكايه الكديسه المالحقت اللبن اها قالت اللبن عفن او الما بتلحقه جدعه اهاالمثل داك جاكم جدعه واناوكت مالقيت طريقه فيكم وانت قلت خلو الدايره مقفوله قلت ليكم المشتهي الحنطير يطير تعبيرا عن غيظي من قفل الدايره وكمان تشفيا فيكم شبهت عصيركم بالعكاره وطبعاالعكاره يعرفهاالبطاحين وكل مرتادي الخلاوي وناس ام ضوا بان واظنك بتعرفها اوسمعت بيها والبطاحين لو المراه بقت مبطله بقولوا ليها عكري لووووووووووول ولو دايرين شرح مبطله دي قولوا عووووك . ود قاسم ما تزعل مني لساني سليط
والله امازحكم دي شفيتها من البت قريبتي شيري
| |
|
|
|
|
|
|
|
|
|
Re: كيف تكتشف أقرباءك في المنبر (Re: ودقاسم)
|
ود قاسم
ماتخاف ماطلعنا قرايب لكنك ذكرت بادي محمد الطيب اها الجماعة ديل معارفي ، أولاد عمه عباس الزين الطيب وأخوهو عمر الزين وانا مشيت منطقتهم ( حلة عباس ) وعباس الزين ده كان ليهو الأثر الكبير في إنو بادي يهتم بأغاني الحقيبة ويجي الخرطوم
| |
|
|
|
|
|
|
|
|
|
Re: كيف تكتشف أقرباءك في المنبر (Re: ودقاسم)
|
حسين ملاسي
تعرف يا حسين ناس الغرب يقولوا الحنيطير ده قش بقوم عند ناس البحر ، وناس البحر يقولوا الحنيطير ده قش بيقوم عند ناس الغرب ، وناس الشرق يقولوا الحنيطير ده قش بيقوم في الجنوب ، وناس الجنوب يقولوا الحنيطير ده قش بتاع مندكورو ، وهكذا ، كل أهل منطقة يمرونه على المنطقة الأخرى ،
دوما
الوحيدين الذين اعترفوا بنتماء الحنيطير لهم هم أهل البطانة على لسانك ، ونحن ننكر وجوده عندنا ، ولذا أقنعنا أهلنا أنه كالغول ، غير موجود ،
على كل حال أنا أزوركم لما نرجع السودان وأشيل لي تيراب حنيطير منكم لأني مشنهيهو
وإذا كنت شاطرة ورينا الولد لما يكون جيعان ويزهج أهلو من كثرة طلبه للأكل لماذا عندما يقدمون له الأكل بيقول ليهو هاك اتحنطر ، أو واحد تاني يجيك يقوليك والله اتحنطرنا بكسرة بملاح كذا
المبطلة أظنها التعبانة ، وإلا يكونوا ناس البطانة بيرطنوا ،
لا تخشي عليّ أعرفك وأفهمك ، وأعرف أنك تبغضين العنصرية ، لكني مارست معك نوعا من الاستفزاز لأدفعك للكتابة ، شفتيني غياظ كيف ، مش أنا ودقاسم قريب ناس المنبر كلهم
علي عثمان
يعني نقدر نقول عليك حلاوي من حلة عباس وود حبوبة جدك ،
يا مقنع ولياتو
من أمس الضحى
توري أب زنود ساقوه
| |
|
|
|
|
|
|
|
|
|
Re: كيف تكتشف أقرباءك في المنبر (Re: Ahlalawad)
|
ود عمي أهل العوض
أنا وأنت ودوما وشنتير ، وأخيرا انضمت إلينا تماضر وشقيقها يازول يازول ، اتضح أننا كما أسلفت ننتمي لأهل العوض ، لكن منا من هو موغل في أهل عوضيته ، وأنا من هذا الصنف ، والفرق بيني وبينك ودوما وشنتير أنني متأثر بثقافة النيل الأبيض ، وهي كما يسميها أهلنا ثقافة ( حاتي تشمها ) أشرح لك ذلك :
يقال أن الحساني ( وهم من القبائل المؤثرة في منطقة النيل الأبيض ) اقتتل مع رجل آخر من قبيلة أخرى ، فقطع الرجل أنف الحساني ، فأصر شقيق الحساني أن يثأر لأخوه ، لكن دخلت الأجاويد والطلاقات والحرامات ، فوعد الحساني بالعفو ، واجتمع هو وغريم أخيه في الإنداية ليحتفلا بالعفو ، وكانا قد أحضرا لحما سمينا ليتم شويه للحاضرين ، فأخرج الحساني سكينه من ذراعه ليقطع بها اللحم ، فلما رآها الغريم أبدى إعجابه بها ، وبلمعانها ، فدار حوار بينه وبين الحساني حول السكين ، وقال الحساني لغريمه أن سكينه أصلية وأن رائحة الحداد الذي صنعها ما زالت موجودة فيها ، وطلب من غريمه أن يشم السكين ، وقد استحلفه هكذا ( حاتي تشمها ) أي وحياتي وهو أكل لبعض الأحرف تماما ك ( الشم خوخت ) . ووضعها تحت أنف غريمه ليقوم الغريم بعملية الشم ، فما كان من الحساني إلا أن قطع أنف غريمه وثأر لأخيه .
هذا ما نسميه الغتاتة ، وأحاول ممارستها مع الحبيبة دوما لأستنطقها بمزيد من الحكي ، وأثأر من بغرها لقرابتي من تماضر وشقيقها يا زول يا زول .
والله أهل عوض وصحّوا .
دي فهمتيها يا دوما ؟
| |
|
|
|
|
|
|
|
|
|
Re: كيف تكتشف أقرباءك في المنبر (Re: ودقاسم)
|
راحة الروح وسعادتها . . إنما هي في صفائها بالإخلاص لله ، وإشراقها بنوره ، ومجاهدتها في سبيل الاتصال به والقرب منه ، ولن يتحقق لها ذلك إلاَّ بالرضــا بكل ما يفعله المحبوب الأعظم ، والثقة في عدله والاطمئنان إلي حسن جزائه ومتى صفت الروح من علائق المادة وشوائب الدنيا انعكست عليها الأنوار الإلهية فانتشت بروح المحبة القدسية وسكرت بشراب المشاهد الربانية وتحققت لها السعادة الأزلية والراحة الأبدية .
إن أهل المعرفة بالله السادة الصوفية يمثلون قلب الإسلام فهم الذين حملوا العلم حقاً في باطنهم وظاهرهم ، وهم الصورة الكاملة للمسلم الكامل المؤمن الطاهر في ظاهره وباطنه ، في سره وعلانيته ، ويمكن أن تكون فقيهاً وان لم تعمل بما تعلم ولكنك لن تكون زاهداً ولا عارفاً إلاَّ إذا زهدت بالفعل وشهدت فعرفت ، فعلمهم عمل وعملهم حال وحالهم خطوة إلى الطمأنينة في مقام القرب الأدنى ( ألا بذكر الله تطمئن القلوب ) .
الطريقة القادرية ودخولها السودان :
انتقلت الطريقة القادرية طريقة السادة العركيين عن طريق الشيخ عبد الله العركي من الشيخ حبيب الله العجمي خليفة السيد تاج الدين البهاري القطب خليفة القطب الأوحد عبد القادر الجيلاني وقد أخذها عن شيخه بأورادها وأذكارها .
خلافة الطريقة القادرية وسلسلتها :
كانت خلافة السادة العركيين بعد وفاة الشيخ عبد الله العركي قد آلت إلي إبن أخيه الشيخ دفع الله المصوبن ود أبو إدريس ومن بعده إلي الشيخ محمد القنديل بن الشيخ عبد الله الطريفي بن الشيخ أبو عاقلة المسمي " بالكشيف " ومن بعده آلت إلي ابنه الشيخ الغوث المشهور الشيخ يوسف أبو شراء ثم إلي ابنه الشيخ محمد الزاهد " طويل اليد " ثم إلي ابنه الشيخ أحمد الريح ثم إلي ابنه الشيخ حمد النيل ثم إلي ابنه الشيخ عبد الله " عاشميق " ثم إلي أخيه الشيخ عبد الباقي " أزرق طيبة " ثم إلي ابنه الشيخ حمد النيل ثم خلفه أخيه الشيخ أحمد الريح ثم ابنه سيدي الشيخ أبو عاقلة المتوفى عام 1990م ثم إلي أخيه سيدي الشيخ عبد الله أمد الله في عمره .
تقوم خلافة السادة العركيين علي الطريقة القادرية طريقة القوم وذلك بحفظ القرآن الكريم وفهم علومه ودراسة المختصرات في السنه والفقه و اللغة و الشريعة ، وقد كان سادتنا جميعاً حفظة للقرآن الكريم ومعلمين له نفعنا الله بهم في الدارين .. اللهم آمين .
خلفاء العركيين بطيبة :
الشيخ يوسف أبو شراء خليفته الشيخ محمد ، خليفته الشيخ أحمد الريح ، وكلهم قبروا بأبي حراز خليفته الشيخ حمد النيل وقبره بأم درمان خليفته الشيخ عبد الله وقبره مع جده الشيخ الريح خليفته الشيخ عبد الباقي أزرق طيبة ، خليفته الشيخ حمد النيل خليفته أخيه الشيخ أحمد الريح ، خليفته الشيخ أبو عاقلة . ودفنوا بضريح واحد في طيبة ، خليفته " أخيه " الشيخ عبد الله أطال الله عمره ، وأمد في أيامه ونفعنا بدعواته الصالحات آمين .
الشيخ يوسف أبو شراء
هو الشيخ الغوث المشهور بالشيخ يوسف أبو شراء رضي الله عنه بن الشيخ محمد القنديل بن الشيخ عبد الله الطريفي بن الشيخ أبو عاقلة الكشيف بن الشيخ حمد النيل وهو أحد العدول الخمسة أبناء الشيخ دفع الله ود مقبل.
ولد الشيخ يوسف في أبي حراز 1133 هـ نشأ في بيت السيادة والمجد نشأة كريمة وحفظ القرآن وهو بن التاسعة وأخذ علي يد أبيه الرسالة والجزء الأول من الخليل والعقائد وقد أعده والده للخلافة إعداداً تاماً وعمره آنذاك أربعة عشر عاماً وتولي الخلافة وعمره عشرون سنة ومكث فيها أربعة وستين عاماً ويعود له الفضل في تأسيس بقعة ( طيبة ) وعمره 21 عاماً فأسس مسجده عام 1154 هـ وقد بلغ عدد الطلاب في زمانه سبعة آلاف طالب . لـقب بأكرم أهل زمانه لبذل ماله في إكرام الضيوف وإعاشة طلاب العلم ، كان حليماً لين الجانب ، لكنه لا يخشى في الحق لومه لائم .
من أشهر تلاميذه :
الشيخ أحمد ودكنان الذي أخذ عليه الطريق والشيخ محمد نور ود نصار
توفي الشيخ يوسف أبو شراء رحمه الله عليه عام 1217 هـ وتولي الخلافة من بعده ابنه الشيخ محمد الزاهد الذي ولد عام 1158هـ والمعروف بصاحب اليد الطويلة و الكرامات وفعل الصالحات وقد سار علي نهج آبائه في الإصلاح والإرشاد وتدريس العلوم الشرعية وإكرام الوافدين كما عرف بالزهد والورع توفي عام 1242هـ ودفن بجانب أبيه عليه رحمه الله ورضي عنه وخلفه ابنه الشيخ أحمد الريح والمعروف بالسجاد أي صاحب السجدة الطويلة وكان يقضي جل وقته في تدريس العلوم الشرعية وإرشاد المريدين ويقضي الليل قائماً متهجداً ساجداً لله سبحانه وتعالي وقد عرف بالشجاعة والوقوف مع الحق وقد زاره كبار الأولياء أمثال الشيخ عوض الجيد والسيد حسن الميرغني والشيخ التوم ود بانقا وقد عرف بالكرم كجده الشيخ أبو شراء . وكلهم قبروا بأبي حراز وتولي الخلافة إبنه الشيخ حمد النيل وقبره بأم درمان . (مقابر حمد النيل الشهيرة بأم درمان ) .
حسن محمد أبوبكر
مدني – حي المدنيين
لك مع خالص تقديري اخي ودقاسم
| |
|
|
|
|
|
|
|
|
|
Re: كيف تكتشف أقرباءك في المنبر (Re: مهاجر)
|
أخي مهاجر
لك التحية والود والشوق
هذا عمل جليل نحتاجه لمعرفة هؤلاء الرجال الصالحين ، الذين درسوا القرآن وعلموه للآلاف من أبناء السودان وما زال أبناءهم يواصلون المسيرة ،
تحياتي لأهلنا في أبوحراز وطيبة وأمدرمان وكركوج وسنار ومعتوق والطلحة وأين ما حلوا .
عليهم رضوان الله جميعا ، ولهم منا طيب الدعاء ، سائلين الله أن يجمعنا بهم في جناته فما أحسن رفقتهم
لو زرت طيبة وقابلت أبوي شيخ عبدالله بلغه تحياتي وأسأله أن يدعو لي بالتوفيق والسداد وبالصحة والعافية .
| |
|
|
|
|
|
|
|
|
 Re: كيف تكتشف أقرباءك في المنبر (Re: ودقاسم)
|
اخي العزيز ود قاسم
انا قريب من طيبة وكركوج اسكن فداسي الحليماب لكن الان في جدة طبعا لكن في العيد اتصلت علي اخي الاكبر وكان في طيبة لانوا ماخد الطريق من زمان وكل عيد بيمشي طيبة وابن اخي ايضا ماخد من شيخ عبدالله لكن نحنا طبعا من ناحية الوالدة للشريف يوسف الهندي ومن ناحية الوالد الي جدنا الشيخ سكوتي في الشمالية ابوحمد.وايضا الي الشيخ احمد عبدالعزيز الشيخ طه وشيخ السماني الفكي تربطنا بهم قرابة ونسب. وانا طلعت لدعوات خالي الي طريق اخر.وعندنا عركيين كمية في فداسي من اهلكم جيرانا ناس محمد جبريل وابنه يوسف ابشرا والان هو قاضي في مدني.
| |
|
|
|
|
|
|
|
|
|
Re: كيف تكتشف أقرباءك في المنبر (Re: ودقاسم)
|
العزيز مهاجر
جزاك الله خير الجزاء علي الشرح الوافي والكافي عن العركيين وكمان زت عليهم من الاولياء الصالحين تور عفينا ابونا الشيخ عوض الجيد الذي لازالت كراماته واضحه للعيان
تحياتي ليك تاني ولي مدني الجميله ولي حي المدنيين وللمدرسة الاميرية ولمدرسة النهر وزكري ايام الطفولة وبداية الشباب .
| |
|
|
|
|
|
|
|
|
|
Re: كيف تكتشف أقرباءك في المنبر (Re: tasneem)
|
تسنيم العزيزة
لي صلة مصاهرة بكل من الركابية والكنوز ، وقد ذكرت الأستاذ مأمون أبوعلوان مثالا للكنوز ، وأمه بنت السلطان علي دينار ، وهو خال لزوجتي .
البورد كله أهل
والسودان كله أهل
| |
|
|
|
|
|
|
|
|
|
Re: كيف تكتشف أقرباءك في المنبر (Re: ترهاقا)
|
تعرف يا ترهاقا ، بعد فترة كم شهر كده حاولت يوم جمعة أزور العريس في بيت نسايبو ، ولم أفلح في معرفة البيت إلا بعد جهد جهيد ، وعندما دخلت استقبلنب والد العروس ، وجاءتني العروس وأختها وجلسوا معي جميعا ، وسألتهم عن العريس ، فسكتوا ، وانسحبت العروس وأختها ، وقال لي أبوهم :
قريبك طلع مقلب ،
فسألته : كيف
قال :
تصور طلق مرتو في خلاف بسيط جدا
واستمر بعد ذلك الكلام متقطعا ، وحاولت الزوغان ، وأصر الرجل على أن أتغدى معهم ، فاعتذرت واكتفيت بكباية العصير واتخارجت ،
لكن قريبي عاد ورد زوجته إليه ، وأنجب منها عددا من البنين والبنات ، وأحد أولاده يعمل في قطر حاليا ، ومازالت هي أهم زوجاته ، حيث تزوج بعدها ثلاثة .
دي حكاية بحفلة ، إيه رأيك ؟
| |
|
|
|
|
|
|
| |
ودقاسم
abas
Shinteer
smart_ana2001
Tumadir
Mayada
ابو جهينة
wd al geran
إسماعيل وراق
Hussein Mallasi
ghariba
haneena
doma
ملكة سبأ
ASAAD IBRAHIM
بدرالدين شنا
Ahlalawad
مهاجر
ترهاقا
Alrayah Senhuri
فيس بوك
تويتر
انستقرام
يوتيوب
بنتيريست