حكاية الشاعرة ... اسماء صديق الطيب ... التي ادمت قلبي وادمعت عيني

شرح مفصل و معلومات للتقديم للوتري 2020
فتحي الضو في أستراليا
التحالف الديمقراطي بمنطقة ديلمارفا يدعوكم لحضور احتفاله بالذكري 54 لثورة اكتوبر
Etihad Airways APAC
منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 15-10-2018, 12:47 PM الصفحة الرئيسية

مكتبة جمال عبد الرحمن(HOPEFUL & HOPELESS)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
13-07-2003, 00:03 AM

HOPELESS

تاريخ التسجيل: 22-04-2003
مجموع المشاركات: 2465

للتواصل معنا

FaceBook
تويتر Twitter
YouTube


حكاية الشاعرة ... اسماء صديق الطيب ... التي ادمت قلبي وادمعت عيني



    اولاً وقبل أن ندخل في الحكاية التي ابدعت شاعرتنا في تصويرها لا بد من تعريف سريع بشاعرتنا المرهفه بنت بلدي أسماء صديق الطيب الجنيد (soma)


    بقلم الأستاذ عبدالله عمر الحبيب اذا يقول عنها :
    اسماء صديق الطيب ... شاعرة من بنات بلدى, انسانه مرهفة الحس وجميلة الوجدان .بدات الكتابه وهى يافعه بتشجيع متواصل من والدها المغفور له العم صديق الطيب المربى الذى تعرف فضله الاجيال... معه اتيحت لاسماء ان تعيش فى مناطق عدة بالسودان, احبت قراه وحضره. عشقت النيل وتغنت مع السواقى وحكت عن العتامير ومجتمع القرية بكل ما فيه من جمال وتسامح وتعاون . اكثر ما يميز اسماء عن غيرها هو انتماؤها الصادق والقوى لمجتمعها وقدرتها المبدعه على تصوير مفرداته لدرجة عالية من الشفافية النافذه. حتى تكاد ترى وانت فى ركن قصى بعيد عن السودان ...تكاد ترى شخوص ذاك المجتمع تضج حركةً : ذاهبةً لفرح, او فى لمة قيلوله ,فى معايدة او عزاء فى فقد عزيز ..
    صهرت الغربه اسماء فجاءت اشعارها اكثر نضجاً تفيض احساسا صادقا تنفذ لدواخلك بمجرد سماعها او قراء تها, لهذا تفاعل معها كل من سمعها او قرأ لها على صفحات مواقع شبكة المعلومات العالميه ...
    ( عافى منك وراضى عنك يا اسماء) ,. كانت تلك هى آخر كلمات فاه بها المغفور له العم صديق الطيب قبل ان يودع دنيانا الفانيه وكانت اسماء بعيده عنه فى غربتها, ولكنها كانت حاضرة باحساسها , حيث كانت منقبضة فى ذلك اليوم بلا سبب معلوم .
    وكتبت فيما بعد حكاية من الواقع مست شقاف القلوب وادمعت العيون .فكانى بذاك الرضا الابوى بمثابة نفحات خير وبركة على ينبوع اسماء الابداعى .
    اقدم لكم ايها الاعزاء جميعا الاستاذه اسماء صديق الطيب .
    عبد الله عمر الحبيب كندا فانكوفر


    ثم بعد هذا نعرج لحكاية شاعرتنا التي ابدعت في وصفها ونقل أحداثها بصورة تجعلك كمن سمع وشاهد من شدة ابداعها في نقل صورة وحجم الألم الذي الم بها في تلك اللحظه
    لا افسد عليكم جمال النص فهيا نلج في عالم اسماء الجميل

    حكاية من الواقع

    الزمان في شهر مايو2001. ألا جازه السنوية المكان قريتي الصغيرة الكائنة في قلب الجزيرة وسط الجروف والبحر والحواشات الكتيره . كنت زي كل مره وزي كل الناس بفرح بالا جازه . امشي السوق واتبضع والملم في الهدايا لي الأهل العزار, والجيران, والأصحاب , وباقي الأحباب . استف شنطي قبال شهرين وامكن تلاته, و اقعد احسب في الأيام تمشي تمر زي سلحفاة يمر يوم ويرجع ورا أسبوع , النوم يطير من الفرحة , بعد الناس تنوم اقعد احسب في باقي الأيام الجايه, أتخيل في يوم الوداع من ما يجوني صاحباتي واشيل ليهم الحاجات, والجوابات , و لازم اتذ كر الصاحبات عشان اخلي ليهم مساحة في الشنيطات ..واسرح بعيييييد أتخيل يوم السفر من الصباح حتى الغيار البلبسو يوم السفر بتخيلو . ما دا بكون اشتريتو قبال ما أفكر في السفر .
    لانو بذ كرني بي السفر و يوم السفر , ويوم اللقاء المنتظر, اصحا بدار لا باكل ولا بشرب شاي الصباح. ولا رأسي اليوم داك بحس بالصداع , ما الفرحة اكبر من كل الظروف , حتى التعب من السهر براه بروح , امشي المطار زي الصغار, اضحك أتبسم وعلى البشوفو كلو اسلم . استنا في صف العفش والناس دافسه دفس . كل الشنط مردومة ردم , وناس كتيره اكتر من الشنط الفي المطار, تخاف تقول ديل كيف شايلم المطار. ولا الكلام الطيارة يا جماعه ديل كلهم ماشين معانا ؟ لكن ولللاسف ما كلهم حا يضو قو السفر . فيهم الليهو سنين ما قادر يسافر , ولا حتى بقدر على حق التذاكر, الله كريم عليهم. ما في زول ما بدور السفر وشوفة الأهل , لكن الظروف القاهرة نعالجا كيف ؟ المهم أصحابنا ديل عندهم الجوابات , دايرين يرسلوها ومعاها حبة قروش وشوية حاجات , يجوك يستأذنوك, لو ممكن تشيل يا زول ؟ . فيهم البتضارا من الناس ويتصرصر , الله لا وراكم لا بساعد ولا وجها صبوح منويعتزر . أهلنا مجبورين يمشو لي أتنين تلاته , وفي النهايه يشوف ليه حاجه جايه , يقول دي احسن . وكلامو صاح تلاقيه الحاجة تتبسم وتتلعثم في الكلام , وبالأحضان بتسلم , اهلا يا عشاي أنا ماشه راجعه لي وليداتي , جيت لي ولدي دا , وهسه ماشه. اها يا حاجه بس اديك الجوابات ديل لي أهلي, بتصلو بيك وبجوك في بيتك , من مكانك ما تتحركي. سمح يا ولدي بس اكتب العلوان. وصاحبنا يتنفس نفس طويل ويساعد أخوه ود الحاجة في العفش , لما ينتهوا من الوزن يقيف مع المسافرين , لما يدخلوا والحاجه تمشي يجيها بي الأحضان يودعا كأنه بعرفا من سنين , ونمشي الصالة , وهاك يا لخمه وإزعاج , كل واحد يصلح في الأكياس ا لشايلا , كل واحد فرحان زي يوم العيد, وتجي الطيارة , والجميع يتشابا يشوف الطيارة , زي أول يوم يشوفا. بعد التعب وزحمة الناس , وركوب الطيارة..

    يبدا المشوار. العالم جايطه والأطفال تجارا, كأنهم في حارة ما في طياره. والباين عليه التعب, شويه يتقلب, ويتقلب, وهاك يانومه. والبقرا في جريده, والبشوف في مجلة لا فيها قصه ولا قصيده,تكسير زمن وبس.

    رحله طويييييييييييله , ومن فوق يلوح لينا غبار بلدنا, والطوب الأحمر المجدع في الشوارع , والشجيرات , والعربات السمحة والمكسرات , وكيمان كيمان العمارات , قلبى يقول تح... تح.... اها وصلنا يا ناس . ديك الخرطوم , وامدرمان, وشمبات، أدور أطير من الكرسي واجرى أخلى القاعدين. اقعد اضحك براى من الفرحة, واتمتم بى كلمات بس ما فاهمه شئ . ولا المعاى سامعنى كل زول في حالو. ولما تقيف الطيارة , نتزاحم اكتر من أول زي الماشين بيت واحد, بنتسابق على الطريق نشيل ونخمخم في الشنط والا كياس الشايلنها في أيدينا. التوب يتكرفس, والوليدات يتصايحو من الفرحة .الكل فرحان , كبير, صغير, مافى فرق في اللحظة ديك من كبير ولا صغير. وجوه المطار هاك يا انتظار . اصعب انتظار, طياره طيارتين قدامك ,ما دا زمن

    ألا جازه. بس اقعد بعيد واتفرج شديد. لما العفش يجيك ، وأعمامنا الكبار الشغالين في المطار، متلهفين زينا لي رزقم من بخشيش , أكان دولار, أكان ريال، ما هم برضو بحسبو لي ألا جازه وجية المغتربين لي اهلم .. ولما نكون خلصنا من التفتيش ولم العفش، والشنط زاتا ما بتشيل كل العفش ,التقول ما كان فيها ده كلو . نحن ما كنا دافسنها دفس... ومتين نخلص من العفش, نمشى لي الناس الحنان المستنينا من زمان , في الحر والغبار. ليهم ساعات طوال ...

    بعد السلام والمطايبه, نفكر نجرى لي الناس الكبار , المابقدرو لي جية المطار , والزينا شوقو بيطول .. ما نحن ما من امبده , ولا السجانة, ولا المحلات القريبة.. نحن من الجزيرة , ساعة ولا أتنين بالكتير ونصل الحلة . بعد ما نمر بي حلال أهلنا من سوبا , والمسعود يه , الأجمل من السعودية ،والتي وأبو عشر, لمن نصل البحر . وهناك يجينا نسيم أهلنا والطين , والجبنه , واللمه ,ولمن نصل تكتمل اللوحة بالسلام , والدموع , والابتسامات , وصياح الأطفال والجيران.

    اها الجماعة وصلو ؟ آي وصلو , ألف حمد الله على السلامة ، الله يسلمكم يا أخوانا ،العمات , الخالات , الجارات , الصاحبات ,كلهن يجن جاريات , بعد السلام واللمه الكبيرة ,نشوف المهم من أحوال الديره , نمشى نعزى في هوايد الليل قبل الصباح , ما ناس عشه بكاهم حار وما بتخلى لي الصباح ,

    والباقي من أخبار الحلة لي الصباح , قبال شراب الشاي.

    وناس البيت في عقاب الليل يتقسموا في الحاجات , دى حقتى ، ودى حقتك ,

    والبيت كلو يقيس ويعبر في الحاجات , وتجيك ريحة الهبهان , والصابون, والمعجون , وتمشى تنووووووووم . بعد سهره طويلة , لا فيها تعب , ولا مرض . وكمان من الصباح اول زول تلقاك صاحى وفرحان , مشتاق لي شاي اللبن , وموية الزير .

    وتبدأ أحلي أجازه مع الأهل .سلام بالأحضان من أول الحلة لي آخر الحلة

    الصغار , الكبار , أسبوع سلام الناس داخله ومارقه أفواج, أفواج , منهم من شايل عامود أكل , ومنهم قهوة ضهر ,والعروس بالليل تجيك تكوس .
    ولما ألا جازه تنقضي يجوك مودعين تانى بالعشيات , والونسات , والضحكات ,وأنت سارح هناك تتذكر نهاية اجمل اللحظات . وتودعم على أمل اللقاء بهم في ألا جازه الجايه بأذن الله .تفارقم وقلبك معصور ألم , مع نغمات الوداع الحنينه , الحزينة , ترن في مسامعك . ودعتك لي الله والرسول , وداعتاً تغطيك وتحفظك وترجعك بالسلامة , ودعناكم الله والرسول , ودعناكم لى أمين الوداعة البختا البلا والساعة.. . وداع وأمنيات جميلة تصبر وتجرس في آن واحد ...

    ..المرة دي وقبل ألا جازه بي أسبوع بس, يا خوانا بعد ما اشتريت كل الحاجات وعملت كل التجهيزات الحكيتا ليكم.. من الصباح التلفون صاح.. اللهم اجعلوا خير في شنو؟ جاني الخبر. خبر السواد... خبر الرماد... أبوك مات... آه أنا .

    أنا الولهانة لي شوفتك ,أنا المشتاقة لي ضمك...آه أنا... بعد غياب سنه ونص آه أنا.. الكنت بتكلم معاك قبال يوم بس ... آه أنا... الماشة ألا جازه أعيد احلي سيناريو بتكرر علي كل مره . لما نصل بتجي جاري قبال ما تقيف العربية , آه أنا ... لمن تسلم بتلمنا, وبتخمنا كلنا, آه أنا... وو ووب أنا... اتجر ست, واتبهدلت, والخبر يا أخواني في الغربة حار..

    و موت الابو يا خواني نار.. صعب الفراق , صعب البصدق الخبر . والأصحاب ما بقصرو بس الصعب انو الخبر كيف تتقبلو.. خليت, الشنط ,خليت العفش, وشالوني شيل لي المطار, الكنت بمشيه براي بي شوق وفرحه. كرهت المطار, وكرهت السفر في اليوم داك, ولمن وصلت لا شفت بلدي, ولا غبار بلدي , ولا العمارات, ولا الشجيرات , ما العيون بالدموع مليانات , آه أنا.. من اللقاء جوه المطار, من الأهل الواقفين بره المطار , الكل جاي يعزيني , يواسيني , الموظفين, الموظفات , الطلبة , الطالبات, أولاد أهلي الفي البندر, والبنات الفى الجامعات, واه أنا من شوفة الأهل, كمان معاهم محمد اخوي الصغير البعد موت ابوي بقي كبير وجاي يصبرني ومستقبلني في المطار. أنا اها أنا... يا أخوانا السلام كان بالفاتحة, والقبلات كانت بالدموع , والجاني كلو شايل السلام بعد الفاتحة.. أتغير ا لكلام, العبارات اتبدلت من المصيبة الهلت علينا, الله يصبرك, والله يصبرك, واه أنا من المشوار لي الحلة. وشالوني شيل وختوني في البوكسي , وماسكني من الحالة العلي أهلي الكبار,

    واه أنا من الوصول , قبال اصل شلت الهم كيف اصل, وين أبوي الكان بجينا قدام الباب؟ وين أبوي الكان بسلم بي ترحاب؟ وين أبوي ؟ وين أبوي؟ نزلت زي مجنونة ما شايفه الناس, ولا شايفه اللمه, حتي الملامح اتغيرت, من ناس بيتنا لي الجيران, والأهل كلهم, لانهم بكوه شديد, واتبهدلو, وجيت أنا بصوت مبحوح, ما بطلع حتى لو طلعت الروح.. دايره اكورك, دايره ابكي, ما قادرة أنا. اها أنا... أخواتي الصغار ,أخواني الصغار, أهلي الكتار, ابكي مع منو؟ اعزي منو؟ أمي الحنينه المتوجعة, ومتصبرة, وبي التوب الأبيض متلفلفة؟ آه أنا... ووووب أنا... يمه صحي أبوي مات ؟ قولي الحمد لله يا بتي استغفري الله... احي أنا ..وو ووب أنا.. ما شفتو.. أسبوع واحد بس. واجيكم. يمه هييييي يا يمه صحي أبوي مات؟؟ يا أخواني هيييي. صحي أبوي مات ؟ حتى أخواني الأولاد الكانو بالعين عبرتم ومتصبرين شافوني زي المجنونة ما مصدقة قالوا ووووووب. ونسوا الصبر. ونسو الناس المعانا , قالو ووووووب, أي أبوك مات, أبونا ما ت....

    قالوووو وووووب, زي النسوان الواقفات , قالوا وووووب , و جاني عمي, وجاني خالي, والناس الكبار , ما فيهم من قال اتصبري, اتصايحو معاي وردحوا ردح وصرخوا زي شفع صغار , والدموع ماشا جاريه زي بحر حزين, وأنا أقلد في الكبير والصغير, أمي, أخواني, أهلي وحباني, جاتني الخالة, جاتني العمة, يا عمتي هووووي صحي أخوك مات؟؟ احي أنا يا بت أمي أبوك مات.. . مات الاخو, مات الابو, مات الخال مستور الحال , طويل البال. خال الوليدات. مات الحنين, مات الخزين, أحي أنا... مات الوسادة, مات الركازه, مات المهل عشا الأهل, مات المربى , مات المدرس, مات الكلس, مات ألما بعرف لم القرش , احي أنا وو ووب أنا... يايمه كيف السلام؟؟ كيف الحضن والضمه؟؟ كيف مع الأهل اتلمه؟؟.يا يمه يا حبيبة الضلمه... يوم طويل يوم ما بتمناه لي عدو, ولا حبيب , وكل ما أقول أتصبر, أشوف أمي متلفلفة بالتوب الأبيض واتذكر, والعيون ترقرق, والدموع تنهمر, وحا تظل تنهمر, وتنهمر,

    لمن أموت واحصلك, يا يابا .ما بقدر اعمل شي دا القدر, وكل البقدر عليه ا رفع الأيدي أتتضرع, لي ربي الكريم يرحمك, وفي جنان الخلد يكون مسكنك, ويا الله الكريم تصبرني, و يا أخواني الكرام أتدعو لي , الله الكريم يرحم أبوي, ويصبرني .............

    أسماء صديق الطيب

    28/10/2001
    www.al-nafitha.com
                   |Articles |News |مقالات |بيانات

13-07-2003, 01:44 PM

ابو جهينة
<aابو جهينة
تاريخ التسجيل: 20-05-2003
مجموع المشاركات: 20242

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: HOPELESS)

    أخي العزيز جمال : تحياتي.
    لا يقرأ لسوما و يتأثر إلا من كان له قلبا رهيف و إحساس مرهف و مشاعر صادقة.
    و لقد كتبت في سوما الكثير معلقا على شعرها و نثرها ، و إليك ما كتبته عن موت أبيها يرحمه الله :

    أما قصيدتها ( مرت سنة ) و التي تؤبن فيها والدها ( رحمه الله رحمة واسعة ) ، فهي قصيدة ، و الله على ما أقول شهيد ، فقد أبكتني طويلا ، فقد كان كل بيت في القصيدة ، كأنه يعنيني أنا عندما فارقني والدي بعد أن أجريتْ له عملية بالخرطوم ، و تماثل للشفاء ، و عملنا له ( الكرامة ) و صدح فيها المادحين طوال الليل ، و عدت للرياض لأفاجأ اليوم التالي بخبر وفاته ، و أعود للخرطوم و أصوات المادحين تضج في أذني طوال الرحلة ، و عندما وصلت ، كانت الصورة تماما كما قالت سوما ( النيل بكاك مايل دنا ).
    رحماك يا ربي، و لا يبقى إلا وجهك ذو الجلال و الإكرام. ( و لينا الصبر من ربنا ).
    إنها قصيدة بكائية ، و مرثية جديرة بالقراءة و التمعن ، فكلمات سوما في قلب كل مفجوع كتم البكاء و حبس الدمعات و إكتفى بالإستماع لعزاء المعزين ، و عندما ذهبوا ، إنحشرت الكلملت و لم تستطع الخروج ، و ها هي سوما تخرجها من قاع الحزن الدفين ، و من قلب صابر مؤمن بقضاء الله و قدره المحتوم.

    سوما ، إحترمت أنا أحزانك ، و لكنها نبشتْ أحزانا كنت قد دفنتها و دموعا قد حبستها ، فأنا و لسبب أجهله لا أبكي وقت الفاجعة ، و لكني أقف مذهولا أنظر لمن حولي و كأنني في حلم ، ثم إذا بقيت وحدي ، إنفجرت في بكاء مكتوم سرعان ما يتحول إلى بكاء يجتاح صدري و يجرح حنجرتي حتى تجف المآقي.
    و لكن الحزن هو كالنار تحت الرماد ، يخبو و يلوذ بالهدوء ، و ما أن تسمع كلماتا مثل مرثية سوما لأبيها حتى يتوهج الجمر فيتطاير الرماد و تعلو ألسنه اللهب فتحرق جوفك.
    لله درك سوما. سلمت أختا ، و شاعرة ، و قاصة ، و دعواتنا الصادقة أن يرد الله غربتك ، و أن يجعل أحزانك القديمة ، غمامات إبداع ترش و تنثر حبات روائعها أمطار خير و بركة على أسماعنا و قلوبنا.
    ---------------------
    و تسلم يا جمال
                   |Articles |News |مقالات |بيانات

13-07-2003, 10:33 PM

HOPELESS

تاريخ التسجيل: 22-04-2003
مجموع المشاركات: 2465

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: ابو جهينة)


    استاذنا الوقور
    جلال داوود ابوجهينه
    كل الود والأحترام
    اشكرك علي صدق مشاعرك .. وشاعرتنا المرهفة ليس لنا الا الوقف لها احتراماً وتقديراً
    فقد استطاعت بحق أن تصف لنا مشهد من مشاهد الحزن ببراعه وصدق جعلنا نري ونحس ونلمس ما قد عانت .. فالمشهد قد يمر علي كل واحد منا .. ولكن في تعبيرها ابعاد اخرى تجعلك حاضراً بذهنك ومشاعرك معها تتألم مثل ما تتألم وتبكي بحرقه لشدة الألم .. ولكن عزائنا في هذا الأبداع الأرث الخالد... رحم الله العم صديق وأسكنه فسيح جناته
    واليك القصديه التي تعتبر بحق من الروائع الأدبيه

    بعد مرور عام على رحيلك يا غالى
    فى جنات الخلد باذن الله يا ابى العزيز

    مرت سنه ...
    مرت سنه كانت الم.. كانت ضنى ...

    دمعات تقطع فى الحشا...

    زى ام حنون فقدت جنى ...

    انات وجع تحكى الفراق..

    تحكى اليتم مر العنا ...

    آهات بتعصر فى القليب هنا وهنا ...

    تفتح جرح ما بند مل...

    مليون سنه .. ومليون سنه ....

    كيف اندمل .. كيف احتمل ...

    صورتك معاى.. جواى هنا...

    انت الابو انت الاخو...

    انت الصديق كنت المنى...

    كنت الرفيق طول الدرب ....

    كنت الاهل كنت السنا....

    مشيت بعيـــــد يتمتنا ..

    حسيت براى انا ما انا ...

    كيفن اكون كيفن انا ...

    بعد الفقد .. بعد الفنا ...

    كنت الفرح ..كنت المرح ..

    بعدك خلاص البسمه…

    راحت مننا ….

    حتى الطيور فوق السماء ...

    رحلت بعيد من حينا ...

    والفراش خلى الزهر ..

    سافر رحل من زهرنا ..

    كل الحروف رثتك شعر ...

    والنيل بكاك .. مايل دنا ...

    دمعو سال.. زى الجمر...

    يبس خدارو.. و انحنى ...

    حتى الجروف ..لبست سواد...

    عم الحداد فى شرقنا..

    وكل غربنا ...

    وبيتنا داك ما بتوصف...

    لا ضاق فرح .. لا حس يوم بالهنا....

    عم الحزن كل الارض...

    حتىالشدر .. عرف الحزن مال و انتنى ..

    صغار الفريق ...عرفو الدموع..

    لا يوم نسوك .. لا صدقوا يوم فتنا ...

    سؤالم عليك فى كل صباح ..

    الهب شجونا ولوعنا ...

    ابكوه يا اهل العلم ...رحل القلم ..

    جف الحبر.. ما عاد يسطروجعنا ...

    ابكنو ياخالات .. ويا عمات ..

    و بنوت عمنا ...

    ابكن معاى عز القبيله وعزنا ...

    ابكوه يا دخرى الجدود ....

    غابت شمسنا.. وضلم بدرنا

    فقداً عظيم .. مو لى براى ..

    فقد الاهل كل الاهل ..كلنا..

    مهما كتبت وقلت فيك...

    كل الكلام ماظن يضمد جرحنا ...

    سفرك بعيد من غير رجوع ...

    دعواتنا ليك من قلبنا ..

    الرحمه ليك يا فقدنا ..

    ولينا الصبر من ربنا ..

    ولينا الصبر من ربنا ..



    ابنتك المكلومه

    اسماء صديق الطيب الجنيد

    مسقط سلطنة عمان

    14/5/2002
                   |Articles |News |مقالات |بيانات

13-07-2003, 02:49 PM

Elmosley
<aElmosley
تاريخ التسجيل: 14-03-2002
مجموع المشاركات: 34389

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: HOPELESS)

    سوما انسانه رائعه ربنا يحفظها
                   |Articles |News |مقالات |بيانات

13-07-2003, 04:37 PM

Tumadir
<aTumadir
تاريخ التسجيل: 23-05-2002
مجموع المشاركات: 14699

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: Elmosley)

    منسوجة انت يا سومة من خلايا الحب

    لذا اتى حزنك نبيلا وساميا

    لقد شبهتينى بك من قبل

    ولكنى هنا ارى نبوغك بائنا ومفضوحا

    واراك تنتمين بتشبث واضح للحنين والرهافة والشفافية

    سدد المولى خطاك

    ورحم والدك

    وعمر قلبك بالجمال والسمو والحب والنبل

    لك منى الف تحية وقبلة
                   |Articles |News |مقالات |بيانات

13-07-2003, 10:39 PM

HOPELESS

تاريخ التسجيل: 22-04-2003
مجموع المشاركات: 2465

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: Tumadir)


    الانسان الفنان
    موصلي

    نعم يا صديقي... اوجزت وصدقت .. مع تمنياتنا لها بالتوفيق





    الفنانه وأديبه
    تماضر

    Quote: منسوجة انت يا سومة من خلايا الحب

    لذا اتى حزنك نبيلا وساميا


    ما اجملها من حروف .. وما اسماها من معاني .. تحمل بين طياتها روح الانسانيه التي تطلي دواخلك الجميلك
                   |Articles |News |مقالات |بيانات

13-07-2003, 09:55 PM

soma

تاريخ التسجيل: 14-09-2002
مجموع المشاركات: 4120

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: HOPELESS)

    الاخ الشفيف جمال ابن بلدى .. سلام بعد غيبه طويله .. تدهشنى كتاباتك يوم بعد يوم .ويدهشنى تنوعك وانت الانسان البسيط ..وانت ذاك الشاب المرهف .وانت صاحب الظل الخفيف والدعابه والنكتة ..وانت ذلك الشاب الحنين ابن البلد الرصين .. قلبك عامر بالحنيه .. حقيقة اسعدتنى الظروف ان التقى بك وبمن امثالك .لك كل الود والتحايا العطره .. وشكرا على البوست رغم ما يحمل فى طياته من ذكريات نحرت فى عظامى وادمت قلبى الضعيف وسالت دموعى بحار نخرت وجهى النحيل .. لكن .........هذه مشيئة المولى الكريم .. دعواتى للوالد الصديق بالرحمه الواسعه والصبرلى و لاسرتى المكلومه ..
    يديك الف عافية يا جمال

    العزيز ابو جهينه ..هذة هى الحياة وهذا هو حزننا .. اننى احس بكل كلماتك وباحساسك الذى نشترك فيه سويا .. كنت اسمع كلمة يتم ويقشعر بدنى لها .. وارأف على كل من ذاق هذا اليتم المرير واراه يرى الزمن امامه ضرير .. ولكنى استغفر الله العزيز الغفور ..واستعين به دوما .. الرحمه الواسعه لوالدينا ولنا جميعا الصبر الجميل ..

    الاخ العزيز الموصلى ..لك التحايا العطره وانت دوما تسعدنى بكلماتك الجميله فى كل الاوقات .. ويسعدنى وجودك دوما فى مثل هذة اللحظات المريره وليلها الحالك .. التحيه لك والله لا اراك مكروها فى عزيز لديك ..وتسلم

    الاخت الحبيبه تماضر لكى وحشه وانت دوما متالقه فى صفحات البوردوفى كل مكان .. غيبه طويله
    حقيقة اسعدتنى طلتك اليوم .. ورغم الاحزان دعينى ارحب بك فى دارنا المتواضعه .. الف مرحب حبابك
    تسلمى على رقة كلماتك ويديك الف عافيه ..
    تسلموا جميعا ولكم كل الود
                   |Articles |News |مقالات |بيانات

13-07-2003, 10:58 PM

HOPELESS

تاريخ التسجيل: 22-04-2003
مجموع المشاركات: 2465

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: soma)


    الأخت الأنسانه .. بت بلدي .. وفخر أهلي
    سلام واحترام
    كم أنا فخور بك كم أنا مسرور بأن في فتياتنا من هم من امثالك .. وأي عز هذا واي مكرمة من ربي بأن جعلك مننا وجعلنا منك .. لله الحمد والمنه
    ومابوفيك حقك غير أهديك قصيدتك الرائعه
    [
    بت بلدى

    يا نوارة الشدرة الطارحه البكره

    يا مرسومه بقندول عيش

    ورزازة مطره

    يا شموخ النخله وطعم الثمره

    يا بت بلدى

    *****

    روعة بسمة ولون السمره

    جمال تاجوج يا اصل الفكره

    لوزة قطنة وريحة زهرة

    نيلك طرحه وضلك سدره

    قوامك بانا وشك قمره

    عيونك ضفه .. سر النظره

    قليب اطفال بساطه وفطرة

    شايله دلالك من الخضره

    يقالد ديسك نخيل التمره

    يا بت بلدى

    *******

    رنة صوتك سحر النبره

    خصالك سمحه

    وسيرتك عطره

    كريمه فى دارك

    بشوشه وديعه

    وخاتيه البطره

    سبحان الخالق رب القدره

    ودعتك الله وابقى عشره
                   |Articles |News |مقالات |بيانات

13-07-2003, 11:04 PM

abuguta
<aabuguta
تاريخ التسجيل: 20-04-2003
مجموع المشاركات: 8275

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: soma)

    الاخ جمال
    اسماء دى بجد مبدعة
    وخلتنى فى كل كلمة اتبعه
    مرة امشى على اثنين
    ومرة كمان على اربعة
    بس هى بجد مسرعة
    زى النيل وقت الخريف
    يسوق المراكب بودن اشرعة
    حتى الجروف بتكون مليانة
    ومترعة
    شعرها فيه الحنين
    وكلمات رصينة مرصعة
    بس هى بجد مبدعة

    اخوك
    م.احمد صديق
    ابوقوتة
                   |Articles |News |مقالات |بيانات

14-07-2003, 02:03 AM

haneena
<ahaneena
تاريخ التسجيل: 27-05-2003
مجموع المشاركات: 2002

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: abuguta)

    الأخ هوبليس
    شكرآ لتعريفي بسوما
    شاعرة مرهفة وكلمات حنينة

    المبدعة سوما
    لقد جري دمعي مدرارا وأحسست بقلبي ينزف دمآ من كلماتك في فقد والدك
    يا للصدق ويا للفقد-كأنه فقدي

    لا أراكم الله في فقد عزيز لديكم

    دمت للإبداع وربنا يبدل أحزانك فرحآ

    وواصلي إبداعك

    حنينة
                   |Articles |News |مقالات |بيانات

14-07-2003, 07:46 AM

soma

تاريخ التسجيل: 14-09-2002
مجموع المشاركات: 4120

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: HOPELESS)

    اخى العزيز جمال .. لك التحايا والاحترام بلا حدود .. حقيقة لقد اخجلتنى بعباراتك الصادقة ..وشكرى لك بلا حدود ..فلولا وجودكم بجانبى ووقفتكم هذه ما كان لقلمى المتواضع شق طريقه وسط هذا الكم الهائل من الابداع فى كل مكان .. ان الكتابة عبء لا تتخيله وطريق وعر ولكن شمعاتكم المضيئه دوما ودعواتكم الصادقة من قلوبكم العامره بالحب والوفاء يا ابناء وبنات بلدى ..هى زادى فى هذا الدرب الطويل
    لكم منى كل الحب واتمنى ان اكون دوما عند حسن ظنكم بى واتمنى التوفيق من عند الله العلى القدير ..
    جمال لك منى اسمى آيات الوفاء والتقدير .. وو احيانا تضيق العباره
    لك ودى واحترامى ..


    الاخ العزيز جدا توأمى فى الافكار الاصيل ابن بلدى ابو قوته ..
    التحايا والتقدير ..والشكر بحار ومحيطات على كلماتك التى اسعدتنى كثيرا .. وقفت عاجزه امامك وامام تعبيرك حقيقة .. لا يسعنى الا ان اهديك الاحترام والتقدير يا كثيف
    ابو قوته شكرا ..يا مطر الشرق ..


    الحنينه جدا حنينه .. حبابك وحباب طلتك .. تسلمى يا حبيبه على كلماتك الصادقة وحنينة زيك .. سعيده بوجودك معنا ..وتألمت لألمك
    الله لا وراك الم .. وسلامة قلبك ..
    تسلمى كتير حنينه يا ريحة الدعاش .. يا بسمة يا لون الفراش
    احبتى جميعا لكم كل الود وتسلموااااااااااااا
                   |Articles |News |مقالات |بيانات

14-07-2003, 08:29 AM

Ridhaa
<aRidhaa
تاريخ التسجيل: 05-02-2002
مجموع المشاركات: 10057

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: HOPELESS)
                   |Articles |News |مقالات |بيانات

14-07-2003, 09:05 AM

HOPELESS

تاريخ التسجيل: 22-04-2003
مجموع المشاركات: 2465

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: Ridhaa)

    صديقي الحبيب
    باشمهندس احمد ابوقوته
    سلام واحترام
    وتسلم يا ملك علي كلماتك الجميله




    الاخت حنينه
    تسلمي .. ومعرفه خير


    العزيزه سوما
    لم نوفيك ما تستحقين .. ولكن تقبلي منا القليل




    الحبيب رضا
    تسلم علي التسجيل
    وياريت لو قدرته تنزل الصوت في البوست واكون ممتن
                   |Articles |News |مقالات |بيانات

14-07-2003, 04:47 PM

abuguta
<aabuguta
تاريخ التسجيل: 20-04-2003
مجموع المشاركات: 8275

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: HOPELESS)

    كمان تانى فوق
                   |Articles |News |مقالات |بيانات

14-07-2003, 05:35 PM

ابو فاطمه

تاريخ التسجيل: 05-04-2003
مجموع المشاركات: 499

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: HOPELESS)

    المبدع جمال
    لك الشكر على هذا التعريف بالاخت سوما
    وده المرجو من الاخوان في المنبر الجميل ده
    كل يوم يعرفونا بواحد مبدع جديد
    مما يثري من معلوماتنا
    شكرا ليك يا ملك




    الاخت الشاعره سوما
    لا اراكم الله مكروه في عزيز انشاء الله
    والكلام المكتوب عنك والشعر القريتو عنك ده
    يخلي الواحد فعلا يكتب عنك ويفتش كتاباتك
    لكي الود



    اخوكم ابوفاطمه
                   |Articles |News |مقالات |بيانات

14-07-2003, 11:18 PM

omergoda
<aomergoda
تاريخ التسجيل: 19-10-2002
مجموع المشاركات: 263

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: HOPELESS)

    الاخ الجنتل جدا جدا جمال
    لك كل الاحترام والتقدير لهذا البوست الرائع منك
    اضافة مختصره لحكاية الشاعرة ام رامى ... ام وسيدة بيت وسيدة مطبخ من الطراز الراقى بيت اسلامى بحت الصلوات الخمس فى مواعيدها تماما
    من أوكد الأمور التي ينبغي أن توليها الأسرة المسلمة اهتمامها وتركيزها "تسيير الأبناء على منهج إسلامي تربوي" ، يمارسونه كل يوم وليلة حتى يتعودوه، ويصير جزءاً في حياتهم العملية، فتألفه طباعهم ويتأصل في كيانهم النفسي، ويرسخ في وجدانهم ومشاعرهم. وبدعواتى وابتهالاتى راجيا لهم القبل الحسن وان يجعل فى حياتهم المزيد من السعادة ويجعل دارهم عامر وكبيره بنفس زوجها العزيز الصديق الاخ ودالجنيد

    والتحيه العطره للاديبه والشاعرة الاخت / اسماء ولاسرتها الكريمه

    عمر جودة
                   |Articles |News |مقالات |بيانات

15-07-2003, 05:51 AM

HOPELESS

تاريخ التسجيل: 22-04-2003
مجموع المشاركات: 2465

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: omergoda)


    الأحباء
    دكتور ابوفاطمه
    استاذ عمر جوده

    كل الحب واتم التقدير علي رقيق كلماتكم الصادقه
    دمتم
                   |Articles |News |مقالات |بيانات

15-07-2003, 07:52 PM

omergoda
<aomergoda
تاريخ التسجيل: 19-10-2002
مجموع المشاركات: 263

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: HOPELESS)

    فوق
                   |Articles |News |مقالات |بيانات

18-07-2003, 01:27 AM

HOPELESS

تاريخ التسجيل: 22-04-2003
مجموع المشاركات: 2465

للتواصل معنا

FaceBook
تويتر Twitter
YouTube


Re: حكاية الشاعرة ... اسماء صديق الطيب ... التي ادمت قلبي وادمعت عيني (Re: omergoda)


    طعم الغربة
    أسماء صديق الطيب(الجنيد)- مسقط عمان


    هديك الليلة شوفو الغربه ماشه شوى...
    وأنا البتضارامن عينيها ما تشوفني وتنادى على..
    وأنا البتشابا فوق للغيمه كان الغيمه تشفع لي ..
    كان الغيمه تختفنى وتحلق فوق ديارنا العامرة تسرح بي ..
    ولما الغربة تمشى تفوت أجيكم تانى بين ايديكم اللولتنى لما كنت دابى جنى ...


    .....................
    ولكن انتو ما عارفين ..وقسم الغربة كيف ببين ....
    ولماالحاره تصبح جد وما هو كلاما شيتاً ني...
    وكت اللحظة تبقى حقيقة وين بنفوت ..
    لا بابا بمسك الريح ولا قدرا بعرف الشبٌ دابو ندى...

    .................
    فراقكم انتو يا أهلي دريباً قاسى كله شوك بطعن في القليب الحي.....
    وبتذكر وداعكم لي ....
    وكت عتبت باب بيتنا ودموعكم تجرى تصرخ وى.....
    بحس بجريها في ضلوعىوبتعصر في كبيدتى شديد وما هو شوى....
    بحس بالخطوة تبقى تقيله أريت التانيه ترجع بي....
    واقول لرويحتى وين ماشه وتسيبي الديره بالفيها .
    من الجد العجوز واقف و لي عند البيحبى حبي....
    تقولي خلاص ده ياهو قدر ومين بقدر بحبس السيل
    وكت يهدر يدوس الشتلة ويسرح تى .....
    وسقت خطاي.. وشلت حنانكم الغالي وحفظتو معاى بين ايدى..
    وكت اشتاق ..افرً ايدى .....
    ألاقيك يمه... ألاقى الخالة.... ألاقى العمة بتقول لي ..
    ودعتك الله ود بطني..قريب ترجع تانى تضوي متل الضى...
    دياركم انتو يا أهلي دياراً زين وبلد الطيبة...
    كست دروبا حاره.. وحاره.. سكه.. وسكه.. بي رجلي....
    بيعرفنى الكبير عايش..وبعرفني الصغير الشلتو فوق كرعى ....
    بتعرفنى الرمال الشاربة من موية بحرنا..
    ألبيها اتعطرت لما كنت دابى صبى.....
    وحتى قصبنا بشهد بى بى روائع نيلنا ساقبه الحنان راويه عزً الري....
    دى ما بلدي ...وكيف انتو ..إياكم انتو ما بلدي..وإياكم انتو ما أهلي....
    وإياكم انتو غنوه قديمه في شفتي...
    بشيلكم آهه في الغربة..وبشيلكم نغمه في الفرحة..وحنانكم يا هو نور عيني....

    ..............
    ورضيت بالغربة يا أهلي .......
    رضيت بالغربة شان عزة حروفاَ غالية
    فوق أحلامي تتواري وتقول لي ....
    ياني راجياك تانى ترجع لي.
    .ولو عارف السنين بتهون كفاى الفات ...
    وكان اديتك الباقي وبراك عارف الحنان العندى متل اللبنة صافى نقى....
    صفا السمحين.. دعاء الطيبين.. مشاتل عامره
    بى فرح الصغيرالعبً من رمل الجروف الجاريه شاقه ودى.


    .....................
    هناك في الغربة يا أهلي ...بشوف الناس غريبة وتايهه
    في أحزانا طاويه ألحي ....

    بشوف في عيونا نظرات الودار ..مليون سؤال.
    .في جوفي تكويني وتخلف الكى....
    وحتى القمرا ..ما بتشبه قمربلدى البضوى الساحة صافى لبى....
    ووين الخضرة ..وين الخضرة وين راحت ...
    ودييك المويه فوق للصخره تصرخ تبكى وووووب وأحي....

    .............
    وحاتكم انتو يا أهلي ...
    ما فىاحنً من أهلي ..منو الغيركم بعرف البى.....
    ويقاسمني الزمن لو جاني تارى على......
    لكنى خلاص اتيمنت ... واتيقنت ....
    ما دام الغربة صبحت نغمه بسمع صوتا فوق أضنى...........
    وطعم الغربة في لساني واصابعو تدور تأشر لي....
    بسلم أمري للأيام...واجيكم تانى .شان بى شوفتكم أتعطر .واكحل بيه ضى عيني
                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de