|
|
 نشيدان للقبة ولأم دبيكرات........رباح الصادق
|
نشيدان للقبة ولأم دبيكرات
رباح الصادق
بسم الله الرحمن الرحيم
النشيد الأول للقبة:
اتكلم يا حبيب
فوق صاحب التأديب
التبعو قط ما بخيب.. سيدي عبد الله
**
يا الضاوية غرب النيل
حداك رابع المساجد الليها شدو رحيل
منو الأظلم من الكسرك
منو الأظلم من الأسرك
منع ذكر الله فيك يقيل
ودنّس أرضك الما عماري والدخان
وعطل ذكرك الفجري
وبدّل راتبك العصري
بقال وقيل..
يضيق بينا الصدر من كونو طال الليل
وكونك في الأسر يا القبة ليك سنين
فيهتف بينا ود تورشين
بنيناك نحن كان من طين
وعدنا بناك..
وعايدنك نشوفو عديل
صباح ما ليل يخاتلو فتيل
صباح فضاح.. نشمّر فيهو نبدا فلاح
ونبني وطنا بي التهليل
نودّر ليلنا نحن نعيد حكاوي دليل
دروس مدفوعة دما يسيل
حساب ما ليه حد في الهمة شد الحيل
وشيك بي بياض مضاه قبيل..
سيدي عبد الله
***
اتكلم يا حبيب
فوق صاحب التأديب
التبعو قط ما بخيب.. سيدي عبد الله
النشيد الثاني: لأم دبيكرات
يا ربي أخمد نار
الظلمة الأشرار
الحبـّـو لي الدينار
أبو شورى وخربوا الدار
**
يا خليفة الصديق حبّكم دفّار
تجد ام دبيكرات طالبة الأشعار
عطشانة لمدحك الحق ما بوبار
يا حبيبنا عفوا لهجنا قصّار
يقصر عن وصفك يا تاج الدار
يا الهان السلطان يا الذل الدينار
جوّد كل آثم وجوّد من جار
صادق وسراطا حاسم بتار
لي كل خيراتٍ كنت الشمّار
جبرت كسورنا ودمرت الكسار
قشقشت الدمع الفي الدين كان مطّار
والدمع الان يا حبيب فيكم مدرار
الجمع أتأكم للعزم الجرار
يتمسح بمسوحكم في دربكم سيّار
قايدنا الصادق اسما وأفعالو
الورث المهدي وورثكم بنزالو
لا كلّت همة لا ضلت افكارو
رافعين الراية خاطين فوق جمار
الضيق ما ودرنا والخوف الودّار
ماسكين في مبدانا أبشر يا بشّار
غربالكم غربلنا
نقانا وجمّلنا
بي هواكم سربلنا
ضرضرنا وخلخلنا
قلبنا وعبّرنا
بي أكبر عبّار
لا رطلا لا كيلو لا طن لا قنطار
كونك صميما عزمك ما خار
من بعد الكسرة
ما طغت الحسرة
ما خبت الفكرة
جمّعت صفوفك.. قاصد للكرة
في أب عنجة راوك..
وبالبارجات صبوك
غرّبت وما قدرو.. بالبك لحقوك
في أب ركبة نزلت.. وللسيد زرت
وفي شركيلا أقمت.. شهرين ثم خترت
الجردة الجاتك بي كتشنر ارتدت
خافت من شوفة أعلامك صدّت
كت زايد عزمك بتاً ما لنـــت
وصعيدا سرت.. لي قدير اتدرجت
قاصد تعيد الكر وتنّي الأخبـــار
ترجع من تاني للدين تبني حدار
حولا مكثت.. ومن تاني كــررت
لي الظلمة قصدت
يا الراية رفعت.. يا دمّك هدّار
لاقوك للبقعة قاصد سيار
ناس ونجت وجيشو الخاتين الأشرار
خطيت التاريخ بي حروف من نار
من نور ونهار
يا سيد أمباية ونحاسك نقار
حللت البيعة للداير يختار
وصمدت ومن حولك كل الأخيار
في الفروة انتظارك لي موت بي ثمار
للقبلة موجه.. للجنة اختيار
ود حلو عن يمينك..وفضيل عن يسار
واب جكة أمامك من الرصاص ستار
شايلك بالسنين أربعتاشر ليل نهار
كيف ما تشيلو في ساعة احتضار
حجرك كان قرارو ما أروع قرار
علي الفاروق سل سيفو في الكفرة انشهارو
قت ليه انتظر وما طال انتظارو
جن هن الثلاثة في صدرك.. وتوارو
غيبن القبيل ركن الدين عمـــارو
خليفة المهدي ود تورشين.. خبارو
روى البلد الحنين.. ترك سيرة فخارو
والصديق اتجرتق بي الدم ضرّار
ما ضرهم الموت حيين عند الجبّار
***
يا خليفة الصديق حبّكم دفار
كب فينا كبّك أملانا ثمار
بذرة ونّوار
صب فينا صبّك.. للدين نبقى جدار
نغسلو نجلوه من طين ثم غبار
من كل من باعو ودنّسلو شعار
والوطن الباكي مجروح حسار
ضاق من قصقاصو همالو وقصّار
أب دقنا مفتولة بي الغش والأقذار
الغسل الجلباب ما غسل الأوزار
الضل طريقو وكذبت ليه أحبار
ضيّق لي شعبا قاصدلو صغار
شعبا ما بركع غير للقهّار
دارس في فصلك في هدي الدار
درستو درسك ما خابلو الكرار
ما خاب من تبعك.. يا التابع سيد الغار
أقبل كلامي لا معرب ولا مسدار
مولاي بي جاهكم يسترنا من الخرخار
والظالم والنهّار
يسدل علينا ستار
ننصر على من جار
**
يا ربي أخمد نار
الظلمة الأشرار
الحبو لي الدينار
أبو شورى وخربوا الدار
|
|
 
|
|
|
|
|
|
|
|
Re: نشيدان للقبة ولأم دبيكرات........رباح الصادق (Re: munswor almophtah)
|
الظرف الذى جاء باالخليفه الى سدة الحكم كان ظرفا استثنائيا... وفى الثلاثة عشر عاما الذى قضاها حاكمااستطاع أن يؤسس لقيام دوله ولم يكتمل الحلم لان الخليفه كان سببا رئيسافى ذلك ... سأتناول ذلك بالتفصيل فى الصحافه السودانيه والصحف العربيهالتى اكتب لها.... وليت (الخليفه) قضى فى ذلك اليوم بين جبل كررى والنهر الدامى ومنح نفسه لقب سيد الشهداء......... وشتان بين الموت فى شان الله والخروج من ارض المعركه( معردا ) على ظهر حمار ظالع وكان يحول ان يطمئن المجموعه الفاره معه بقوله ( ماتخافوا نحنا معانا نبى الله الخضر) ...... ولما نفذ الصبر قال واحد من المجموعه.. ( سيدى خليفة المهدى ..نحنا معردين من الترك والنصارى ... انت ونبى الله الخضر معردين من منو؟؟؟ )
| |
|
|
|
|
|
|
|
|
 Re: نشيدان للقبة ولأم دبيكرات........رباح الصادق (Re: أحمد طه)
|
الأخ أحمد طه السلام والرحمه.... ولعل الأستاذه لنا أجدر بتوضيح الجوانب التاريخيه وإن كنت أميل إلى فلسفة التاريخ لا التاريخ فقد جذبنى معيارى تقديرى أقرب إلى التصوف من تقريرية التاريخ التى ربما تكون غير جافه لغيرى ولك من الود والسلام الوفير الكثير...............
منصور
| |
|
|
|
|
|
|
|
|
|
فرية تاريخية (Re: munswor almophtah)
|
الأستاذ أحمد طه
تحية طيبة
لا بد من التفريق بين المؤرخين كسلاطين باشا و الذين كتبوا عنه
وبين مؤرخين شرفاء غايتهم الوصول للحقيقة التاريخية
الخليفة عبدالله عندما أحس بدنو الهزيمة في أم دبيكرات فرش فروته و مات عليها متوجهاً نحو القبلة بعد ان استشهد أب جكة و أجلسه الخليفة على فخذه ، أب جكة طوال المعركة زاد عن الخليفة زود الأبطال.
فرية تاريخية أن الخليفة عبدالله فر من المعركة
رجل قوي الشكيمة واضح العزيمة لا يفر و لا يهاب الموت
محبتي
لنا
| |
|
|
|
|
|
|
|
|
|
Re: نشيدان للقبة ولأم دبيكرات........رباح الصادق (Re: munswor almophtah)
|
الاستاذه لنا مهدى
تحياتى
أرجو أن تطمئنى بأن الدراسة التى أعدها لاتشمل رؤية واحده مما ذكره (شواطين باشا)
ولكنها تكمله لدراسه قادنى اليها ماذكرته فى وقت سابق فى محاضره بدار اتحاد طلاب جامعة الخرطوم حول مرجعية الغناء فى السودان شارك فيها الاساتذه كامل عبد الماجد وعوض بابكر تحدثت فيها عن بعض المسكوت عنه فى تاريخنا وانصب حديثى حول الانحطاط الثقافى فى عهد المهديه..... فقد آن الاوان ان نعيد ونجيد قراءة التاريخ لنعيد صياغته ...من الذى ينكر دور المهديه فى تشكيل وجداننا القومى وما منحتنا من شموخ .... ولكن ذلك لن يقف بيننا وبين الحقيقه .
الفكر المهدوى صار قدرالآل بيت المهدى والقانعين به .. الدفاع عنه فى زمن يعج بالمتغيرات واهتزاز الثوابت فوقائع الايام التى سبقت معركة كررى حملت الكثير من الدروس خاصة فى الساعات التى سبقت المعركه والتى شهدت اجتماع الخليفه بأركان حربه فى مجلس الحرب الذى غادره واحد من اشجع قادة المهديه وهو يتمتم( المهديه مهديتك لكن نصره مافى )وبالرغم من ذلك ابلى هذا الحانق بلاءا حسنا فى ميدان المعركه ...كم هو رائع هذا الانسان السودانى العظيم فقد خرج الخليفه شريف من محبسه فى سجن الساير دون ان يستعيد ذكرى ايام السجن المهينه ..وذل الحبس .. ومهانة عربى ود دفع الله ليشارك فى المعركه المجزره حسب تعبير تشرشل بالرغم من تخاذل البعض مما اورده الشيخ بابكر بدرى فى الجزء الاول من مذكراته والشيخ الجليل واحد من رواد المهديه الذين شهدوا معاركها آخرها توشكى الكارثه وكررى المجزره .
| |
|
|
|
|
|
|
|
|
|
Re: نشيدان للقبة ولأم دبيكرات........رباح الصادق (Re: munswor almophtah)
|
سلامات يا منصور
كيف يا زول انشاء الله كلو تمام - النصيحة دفاعك عن القبة دة
ما عجبنى و شنو كمان جامع الخليفة و لا ميدان شنو ما عارف
هييى يا زول خليك حريف - العمايل العملا الوهم دة فى أمدرمان
بس تخلينا نمسح ليهو أى أثر بلا لمة زى ما بقولو الخواجات
الأراضى دى Prime Realestate for Investment
و الناس زمان قالو شن طعم القبة ......... و تم الباقى براك
بالمناسبة صحبك خالد كان متعشى معانا فى العيد و كنا فى سيرتك
و ان شاء الله نتقابل قريب لو جابك الطريق بى عندنا
و سلام
| |
|
|
|
|
|
|
|
|
|
Re: نشيدان للقبة ولأم دبيكرات........رباح الصادق (Re: zoul"ibn"zoul)
|
يا دكتور إبن قاضى إبن قاضى إبن قاضى القضاة...السلام والرحمه طبعا بيت الخليفه الحيته بالحيته مع الهشماب ولو بقى مول البازار حايكون فى القلب والهاشماب حاتكون أخطر من المنشيه وطبعا الدفاع عن بيت الخليفه خوفا على السروراب لأن بها قصور الونى والدواليب والعنجوخايفين إعملوها حراج..........
أين ذلك الخالد وإن شاء الله تكونوا زكرتمونى بالخير لك الشوق والتحايا وانا لازم أعزليك حلفك بنتلاقا نتلاقا نتلاقا,,,,,,,,,,,,,,,,,,
ولك السلام يازول إبن زول
منصور
| |
|
|
|
|
|
|
| |
munswor almophtah
nashaat elemam
lana mahdi
أحمد طه
ayman haroun
فيس بوك
تويتر
انستقرام
يوتيوب
بنتيريست