|
|
 الصبوح والليل..............إبراهيم عبد العزيز عثمان-جامعة قطر-الدوحة
|
الصبوح والليل
إنت لو تنسي
أنا ما أنسي
الوجه الصبوح وجميل
روعة مرافي النيل
وبهجة المرسي
****
إنت لو تنسي
أنا ليلي لو أمسي
يهيّج الذكري
والذكري لو تقسي
أمضي ليلي عليل
وتعربد الفكرة
بين المصير والراح
مع إنسياب النيل
لوعاتي والأفراح
تبحث عن المرسي
بين الصبوح والليل
****
إنت لو تنسي
حلاوة الأيام
محياك صبوح وجميل،
زي غادة الأحلام
وصبية الفردوس
في ضفاف النيل
شايلة المحنة كئوس
تسقي المودّة دوام،
*****
إنت يا قاسي
ظالم عنيد وبخيل
تنسي أيامنا
في ضفاف النيل
وأنا ما ناسي
الجميل يا جميل
تشهد نجوم الليل
وزفرة أنفاسي
أنا في هواك عليل
مخلص شعوري نبيل
بطيبة إحساسي
*****
يا الظالم المظلوم
أرحمني بعطفك
أنا لي زمن محروم
من حنان ودك
لا عتاب أو لوم
في سنين بعدك
والقلب إختار
بعد ما إحتار
من صدود ردك
الحياة قربك
سعادة وإستقرار
*****
مرة أقول قدري
قادني لحبك
ومرة أقول ده مصير
وزلّة التفكير
خلتني راضي أسير
في خطي دربك
لو خانني التعبير
أوضاعت الكلمات
من كياني بحبك
أو تاهت الأفكار
في مفاتن جسمك
ولحظك البتّار
طرفه حاني كحيل
يخجل ظلام الليل
يلهمني بالأشعار
*****
إنت لو ناسي
سارح مع التيار
تدرى وما تدرى
أنا بالعلي راضي
راضي بالمشوار
ومشيئة الأقدار
ما يهمني الماضي
وكل ما يجري
سارح مع التيار
دي الحياة أقدار
وأنا راضي بقدري
******
خلّي المحنّة تدوم
من جناين خدّك
نقطف الأزهار
والرحيق مختوم
بمودة قلبك
يا الظالم المظلوم
أطفي جمر النار
في الحشا المكتوم
دي الحياة أسرار
زي سكون الليل
بيها المحنة تدوم
وتغرد ضفاف النيل
إبراهيم عبد العزيز عثمان-جامعة قطر-الدوحة
[email protected]
|
|
 
|
|
|
|
munswor almophtah
abubakr
فيس بوك
تويتر
انستقرام
يوتيوب
بنتيريست