دعواتكم لزميلنا المفكر د.الباقر العفيف بالشفاء العاجل
|
|
 بيرقر .. بيرقر ماكنتوش .. ليه عايزننا ناكل بــــوش ..!!
|
بكتب ليكم وانا في قلب ( السودان الجديد ) ..
سودان ( المطاعم ) والعربات ( الكورية ) ..
سودان الناس البتقوم والدنيا ( ضلام ) وبترجع برضو والدنيا ( ضلام ) ..
سودان ( ما حدش فاهم اي حاجة ) ..
سودان ( اجيك بالدرب ولا تجي انتي ) ..
سودان ( الكارو والركشة والـBM دبلويهات ) ..
سودان ( قندهار ) وبتيخة ( ناصر البطل ) ..
سودان زلط ( تحت شعار شارع زلط في كل زقاق ) ..
سودان ( قاعة افراح في كل شارع والناس ما لاقية تعرس ) ..
سودان ( العمالة الاجنبية واولاد حلتنا لسع قاعدين تحت الشجرة ) ..!!
سودان ( صراف آلي لكل مواطن والناس ما عندها قروش ) ..
سودان طرمبة ( 6 مليون شركة بترول بتصرف للموظفين بالدولار ) ..
سودان ( الشقة ايجار بمليون جنيه .. والشقة ملك بمليون دولار ) ..
سودان ( الدينار والجنيه الجديد .. والناس بتحسب بالجنيه القديم )
|
|
 
|
|
|
|
|
|
|
|
Re: بيرقر .. بيرقر ماكنتوش .. ليه عايزننا ناكل بــــوش ..!! (Re: Sobajo)
|
Quote: شوفي اي زول ( كادح ) وشكله كدا لا يملك من ( حطام ) الدنيا شئ ..
قولي ليهو أرح نتغدا ..
طوالي يقول ليك .. ارح ناكل ( بيــتزا ) ..!! |
الغالي حميده
التناقض ليس في السودان بل التناقض في السودانيين أنفسهم وحقيقه الناس تحيرك زاتو يعني تلقى الواحد يلعن في الوضع والحال وفي نفس اللحظه تلقاهو شايل لي موبايل بي مليون جنيه يعني بدل مايقول الحمد لله تلقاهو ماراضي بأي حاجه .....
ماينقصنا فقط هو الشكر على النعمه وعدم النظر لمايمتلكه الاخرون والقناعه
| |
|
|
|
|
|
|
|
|
|
Re: بيرقر .. بيرقر ماكنتوش .. ليه عايزننا ناكل بــــوش ..!! (Re: humida)
|
حميدا كيف حالك؟
حمدلله على السلامة
متابعة اندهاشك من الخرطوم
انا ذاتي السنة الفاتت والقبلها بديت اسجل اندهاشي قدام التغيير الضخم الحاصل في الخرطوم..
وبالتالي السودان ككل..
خليني انصرف بيك شوية عن موضوع الكافتريات واعرج بيك على احدث انواع النقابات..
الخرطوم مدينة العجائب..
"هاهي الارض تغطت بالتعب"
عندي كم مداخلة عايزة ادخلها عندك كان سمحت..
دي الاولي قسمتها اتنين عشان طويلة..
_____________________________________________________
مشاهد يومية في خرطومنا العتية ..! (1)
النقابات الرجالية :
نقابة حلاقي الحمير ( وشعارها ما تدخلونا في أنواع الحلاقة والسياسة والمشاكل حقنا بناخدو غصب ما بالساهل .. لدينا أحدث أنواع الحلاقة ، المستمدة من الحروب الإقليمية ، والدولية والحساد عينهم بالعمي ، شَكِّل راس حمارك كما تريد )..!!
نقابة حلاقي البعير
نقابة التفجير ( تفجير المعايير الاجتماعية )
نقابة الغني والفقير
نقابة الخبرة في التمطير ( نقابة ود عماري دائم الصلاحية ، وشعارنا نبيعك بالتعريفة لعند المية )
نقابة البال الطويل
نقابة التأصيل
نقابة العنصرية.. وتدويل القضية ..
نقابة التصريحات العنترية ..!
نقابة الشر بلية ...
نقابة الليلة المنسية ...!
نقابة الصدق : يا أخوانا ما تغشونا ..
ونقابة النقابات وحدات زمنهن جايي - منهن ديل - وواحدات زمنهن فات ..
أرجوزة : أنا المسطحة من غير قطر أنا التي تجاوزتها التكنولوجيا والعمر قد مر
ضحكت من أعماقي وأنا اقرأ كلام احد الإخوة من الذين أطلقوا علي أنفسهم جمعية أو نقابة ماسحي الأحذية وغسالي العربات . وعذر ت الصحفي الكبير عثمان ميرغني - الذي يتهمه صاحب نقابة غسالي العربات ، بالتعالي والعنصرية لأنه ضحك حينما اخبره غسال عربته بان جواله سرق منه . مبعث ضحكتي أننا في سودان العجائب كل شئ ماشي بالمقلوب . علي مستوي الدخول الشهرية أو السنوية - ما بتفرق كثير - الجامعيون هم أكثر الفئات المظلومة . أما الفئات التي لا يتعدى تعليمها الثانوي ، فهي تتفاوت قد تكون أحسنها حالاً أو أرداها . وذلك حسب طبيعة المهنة التي تمتهنها . أما من وطن نفسه علي أن يكون أفنديا جامعياً يكوس الرزق عند أبواب لجنة الاختيار التي أصبحت هي الاخري ، تغير أماكن تواجدها حسب مقتضي الحال ، فذلك هو المشرور عند أبواب سلاطين لا يعرفون سوي الرحمة الموجهة . وكلما انخفض مستوي التعليم ، كلما زاد مستوي الدخل ، وما غضبة صاحب الغضبة المضرية لنقابة غسالي العربات وماسحي الأحذية ، إلا دليلاً علي ذلك .
نواصل..
حليمة
| |
|
|
|
|
|
|
|
|
|
Re: بيرقر .. بيرقر ماكنتوش .. ليه عايزننا ناكل بــــوش ..!! (Re: حليمة محمد عبد الرحمن)
|
مشاهد يومية في خرطومنا العتية ..! (2)
تحكي احد الطرف التي يبدو أن احد الظرفاء الموجوعين من هذا الزمن المقلوب مصدرها ، أن احد الأطباء العموميين اعتاد غسيل عربته أسبوعيا عند احد الإخوة أعضاء النقابة المذكورة أعلاه، فما كان من الطبيب الذي استكثر المبلغ الذي طلبه الغسال ، إلا الاحتجاج الكثير ... ولم يستجيب لاحتجاجه الصارخ الأخ المذكور أعلاه، فاغتاظ الطبيب وسأله : اسمع ياخينا آنت بتكسب كم في اليوم من مهنتك دي؟
الغسال : والله مستورة والحمد لله ..
الطبيب (بإلحاح شديد ): كم يعني ؟ بتطلع صحن فولك منها؟
الغسال (مقهقهاً ): صحن فول ؟!! أنا اشتغل بصحن الفول ؟.. انت ما نصيح ياخي ولا شنو؟ اسمع أنا ذاتي والله ما قاعد آكل فول ..
الطبيب: ما بتاكل فول ؟ أمال بتاكل شنو؟ كبدة يعني ؟
الغسال(وقد استفزته العبارة الأخيرة) أيوة مالي ما باكل كبدة .. ما عندي خشم بشبه خشم البياكلوا الكبدة ولاشنو؟ عايز أقول ليك حاجة والله الكبدة دي ذاتها بنقزقز بيها قبل الأكل الجد.. داك خلي ساكت. والله تاكل معانا وجبة واحدة ملاريا شهر ما تجيك..قال فول قال ..!!
الطبيب ( وقد استفزه عدم أكل الفول خاصة وانه ظل يقنع نفسه فترة طويلة بأنه بروتين البروتينات ): اسمع ياخي قلت لي ما بتاكل فول..والله أنت بتنجر نجر تمام(أي تكذب ).. يعني بتاكل حاجات تانية.. وبتتكلم كأنه عندك حساب في البنك. وبعد شوية ح تقول نسيت كرتك الالكتروني...الخ..
الغسال ( وقد بدا حسه الفكاهي يتحول إلي غضب ) اسمع ياخي .. ما يغرك عربيتك المكعكعة دي ولا بنطلونك النضيف وجيبك الانضف منو.. والله أنا لو عايز اشتري ليلي علوي من بكرة تلقاني وراء الدركسون قاعد فيها من ضرب ضراعي دا، وهز ضراعه القوي. اسمع خليني أنا أنت بتكسب كم في الشهر؟
الطبيب ( بعد أن طرح بدل العدوى الذي خصم منه ثم البدلات الاخري ): حوالي أربعمائة..
الغسال: بس ..؟؟
الطبيب : شنو عايز تقول لي أنت بتكسب اكتر من المبلغ دا في الشهر ..
الغسال : يا بوي شهر شنو؟ أنا مبلغك دا بالميت بطلعو في اربعة يوم ...
الطبيب : شنو شنو؟؟ أنا القريب تمنتاشر سنة واشتغلت امتياز سنتين يعني عشرين سنة تجي تقول انت انك بتقدر تحصل مبلغي دا في خلال أربعة أيام؟
الغسال : ايوة شفت أنا القدامك دا المؤهلاتي كلها ما تزيد علي جردل موية وصابونة ودلقان وعضلات لزوم الشغل، ما برضي بعيشتك دي كان شغلوني أخصائي، خلي طبيب عمومي.. بعدين تعال أنت زعلان ليه؟ القال ليك اقرأ واشتغل طبيب وضيع مستقبلك منو ؟
لماذا يزعل الاخ صاحب جمعية ماسحي الأحذية وغسالي العربات ؟
وفكرة تجمع اصحاب هذه المهن في جمعية، هي فكرة جديدة وفريدة في حد ذاتها. وبكل أمانة أنا لا امنع نفسي عن الضحك للحس الفكاهي الذي كتب به الاحتجاج علي سلوك عثمان ميرغني الذي صب تماماً في التعالي والانتقاص من أقدار الناس كما يدعي صاحب البيان.واليكم مقتطفات منه، نعود بعدها للتعليق عن المتناقضات في هذا الزمن ..
"شاهدنا في جمعية محترفي غسيل العربات وماسحي الأحذية السودانية كغيرنا من أبناء الوطن الشرفاء الحلقة المعادة اليوم(الأحد الماضي) والتي قدمها الإعلامي الكبير محمد جمال وكان موضوعها حول استخدامات التقانة في السودان مستضيفا بها طلبة كلية علوم التقانة ومهندسين وشخصيات كان من بينهم الصحفي عثمان ميرغني.
رغم ايجابية الحلقة في موضوعها المطروح والهام للوطن والمواطن، إلا إن تلك الايجابية انتقصتها قيمة إنسانية أساسية وهي ما تسبب فيه الصحفي عثمان ميرغني الذي نال من حرفة غسيل العربات حين شهر بغاسل عربته في معرض حديثه عندما قال (مرة الغسال بتاع عربيتي قال لي جوالي ضاع مني) وهو يضحك بكل سخرية واستغراب ينم عن تعالي وانتقاص لحق غاسلي العربات في أن يحصلوا على وسيلة تقنية يتواصلون بها مع الغير ويسهلون عبرها مهام أعمالهم والاتصال بزبائنهم." وختم الأخ حديثه بترك بريده الالكتروني المنشور أدناه دليلاً علي انه من مرتادي تكنولوجيا
الانترنيت ..
[email protected]
أما تلفونه فهو موجود بطرفنا لمن يريد التواصل المستقبلي والتخطيط لغسيل عربته عبر هذه الجمعية الرائدة، بدلاً عن الغسيل المَكَرًّت ( نسبة للكرتة وهي معروفة لدي السودانيين )، محافظة علي البرستيج الاجتماعي.
السؤال الذي يطرح نفسه ماهي الاطروحات التي تتبناها هذه الجمعية للحفاظ علي موروثها الثقافي والاجتماعي ، خاصة إذا قرر المجتمع إسقاط الشق الأول من جمعيتهم بحيث ينتعل أفراد المجتمع أحذية لا تحتاج إلي ورنيش ومسح ، وقررت أمريكا وألمانيا واليابان وغيرها من البلدان إنتاج عربات ذاتية النظافة ؟؟، اعتقد انك حينها ستحتاج إلي أمثال عثمان ميرغني بشدة للدفاع عن قضيتك.. لازم يا أخ ودي نصيحة خالصة تعمل ليك تيم إعلامي وآخر قانوني لرعاية مصالحك ..
شكراً لسوداتيل التي جعلت السودان القاصي يتواصل مع الداني، والتي جعلت بائعات الشاي أو ستات الشاي في برندات الأسواق يعرفن أهمية الموبايل أو الجوال ويحملنه أينما حللن.. الباقي علي وزارة التربية تحل مشكلة الأمية عشان النسوان ديل يقدرن يخزنن الأسماء والأرقام ويعرفن شخص المتصل حتى يكون لديهن حق الرد أو رفض استقبال المكالمة أو تعليق المتصل حتى تنسل روحه ، وبرضو لزوم البرستيج الاجتماعي.
قبل عامين نزلت إلي السودان واتصلت بمنزل احدي زميلاتي الصحافيات من اللائي يعملن مترجمات في التلفزيون ، ونادت والدتها احدي أخواتها فقامت-لدهشتي الشديدة آنذاك- بإعطائي رقم موبايل زميلتي.. في الواقع أنا دقة قديمة، قاعدة في البيت ومقطوعة عن عالم الصحافة والمواكبة، كنت فاكرة انو الموبايل عامل زي مفتاح العربية ، الذي صارت علاقته تتدلي طويلة من يدي الحسناوات بينما تكنكش الأصابع في المفتاح بقوة خوف السحب. والحال كذلك لم أكن ادرِ أن مصطلحات المغتربين تجاوزت الفومولات الثلاثة التي أطلقتها أمامي جارتي الأمية ثم انسلت: من علامات الاغتراب والعودة للوطن بعد طول غياب، العربية التمام وحلة البريستو مرفوعة الصمام والجوال الباندا تمام ( وهذه الأخيرة من عندي لزوم التحديث والمواكبة ). وكالأطرش في الزفة مسكت في هذه الثلاثية المبعدة عن القضية .. والقضية أي قضية .. دي حكاية تانية .
داعبت زميلتي الصحافية قائلاً: شنو ياختي بقيتي بت عز موبايل عديل ؟ ما عملت العربية ولا أحسن نبدأ بحلة البريستو؟ فصبت علي راسي دشاً بارداً .. شنو يا حليمة انتي لسع مسطحة .. ما جنبك جارات يورنك الحاصل، في مجتمع المغتربات والمصطلحات . وانو ستات الشاي بقن عندهن موبايلات ..
في الواقع هالني الأمر وقررت في العام القادم اللحاق بركب ستات الشاي، خاصة وأنني في اجتماعات العمل التمهيدية الأولي كنت الوحيدة التي لا تمتلك وسيلة تقنية حديثة للاتصال .. وهذا ما دفعني بقوة إلي اللحاق بركب التقانة وشراء الجوال بعد مرور عامين علي مطلع الألفية الثالثة.
المضحك المبكي في سودان اليوم هو أن الصحفي مع مرتبه الحالي ، ليس لديه إمكانية الولوج إلي عالم الجوال، إلا أن يشتري بالتقسيط الأبدي المريح أو أن تكون نفحة من نفحات الأقارب، يكون جديداً " أهل العوض " أو احد ضربات الحظ في حراج أبي القاسم . إما أنواع التكنولوجيات الاخري كاللاب توب أو الكومبيوتر المحمول الذي تحول اسمه أخيرا إلي النوتبوك .. فذلك شان آخر قد يكون لنا وقفة مع زبانية المعرفة عند كل صحيفة ..
لن اندهش إذا قرأت عن الجمعيات او النقابات النسوية الآتية :
نقابة الكوافيرات البلديات الإفرنجيات
نقابة الزغرادات عند الأفراح وفي الملمات
نقابة الثكالات والنائحات والرادحات والباقيات الجايات ..
نقابة الموظفات للحاق بركب الفَرَّاشات ..!!
نقابة البنية العرجونة ..
نقابة الشراية والنقدة والليمونة ..
وأخيرا نقابة فرز الدقيق في الطاحونة ..
ونقابة نقاء العَجْنة المضمونة من البرمجانات المجنونة ..!
ونقابة الشر قدل يا أخوانا ألحقونا ..!!
والبقية تأتي ...
ودمتم
حليمة
| |
|
|
|
|
|
|
|
|
|
Re: بيرقر .. بيرقر ماكنتوش .. ليه عايزننا ناكل بــــوش ..!! (Re: حليمة محمد عبد الرحمن)
|
والله يا مأمون ..
مجهجه وعندو ملاريا وشلل اطفال ..
وجاته ذي كحة كدا لكن بقى كويس بعد ما مسكو السل الرئوي ..
واحتمال كبير يموت ..
مفارقة ..
مشيت أسأل عن سعر البيوت في الرياض والعمارات ..
عشان الواحد لمن يسكن في ( فرملة الشمس ) يكون مقتنع ..
شبكوني ليك ( ما بين ستمية لمليون وتلاتمية ) ..
تصدق انا فهمتهم غلط .. كنت قايلهم بتكلموا بالجنيه القديم ..
طلع بتكلموا ( بالدولار ) ..
تخريمة ..
جات مارة ( ركشة ) قبل شوية مكتوب فيها ( UN ) ..
حتي يا مأمون ناس ( UN ) فلسوا وبقوا يركبوا ركشات ..!!
| |
|
|
|
|
|
|
|
|
|
Re: بيرقر .. بيرقر ماكنتوش .. ليه عايزننا ناكل بــــوش ..!! (Re: humida)
|
تتهاااااااااااااااااااااااااي هاااااااااااااااااااااااااااي هااااااااااااااااااااااااااااي..
شبكتني انا اجازتي عشرين يوم حا اقعد منها 15 يوم في القاهرة وخمسة في الخرطوم ..
يا زول انت أسة مرقتها في شهرين عدييييييييل كده والغريب انو القاهرة ما قعدت فيها اسبوع ..
والله يا مان انا خايفك تجينا اسمك (ابو وحيد) ..
عليك الله يا مان امشي الحتة القالوا دينق قعد فيها كتير ديك واخد ليك كم صورة كده وتعال وريني ليهم من اوزون وبلوتو واورانوس والذي منو ..
تخاريم :
التخريمة الأولى مصعب شال البلاي استيشن معاهو لي ناس النعمنو والعوض والنديانة ..اها ان شاء الله شغلوهوا بي الشمع..
التخريمة التانية : جاي بتين عشان نجيك المطار وبالله تعال لينا في وقت ما يكون دوام عشان ننستر معاك ..
التخريمة التالتة : تلفونك الشبكتني شغال طلع طواااااالي في حالة مقفول ..
| |
|
|
|
|
|
|
|
|
|
Re: بيرقر .. بيرقر ماكنتوش .. ليه عايزننا ناكل بــــوش ..!! (Re: ناذر محمد الخليفة)
|
مبالغة يا حميدة
بي التبادي
جيداً جيت
لي سودان ست الشاي البتسدد في أقساط الماتيز
ودي عربية زائعة الصيت في البلد الغفيرا نايم دي
جيت لي سودان المليون عمة وجلابية
والدقن حدها حسن
والصلاة وجاهات
وبي الليل أسكت محلك سر
أنا قلت بي الليل يضبحوا وبي النهار يسبحوا؟؟
أوعي تقولني كلام ما قلتوا!!
عشان انا لسة في الغيبوبة دي
لمن أطلع من غرفة العناية المركزة
أبقي تعال آبلني....!
| |
|
|
|
|
|
|
|
|
|
Re: بيرقر .. بيرقر ماكنتوش .. ليه عايزننا ناكل بــــوش ..!! (Re: عثمان سيد أحمد)
|
الليلة أجازة .. المدرسة قفلت
موية المطرة هدت سورا
الزنكى مخرم
وا أتغطت مويةعفونة
حاج محجوب مهموم بالكوم
كيفن يدفع حق الكهربة الأصلا قاطعة
ناس الموية .. فاتورة بتصدم
ولا عشوشة الدايرة فطورا
ومحمد حالف
أكان ما أدوه
أستاذو يدقو .. يحرمو الحصة
أصلو مصاريف المدرسة
طارت فوق
وهمو أنزاد
تبرع سنوى
ومجلس أبوى .. بدفع مجبر
حق الكرسى والتكالة
مروحة .. مافى
دفتر.. مافى
حتى كتابم البدرسو فوقو
صارفينو مقطع .. ورقو ملزق
صفحاتو أنهردت
وغلافو أتشرط
وبرضو يقولو وطن التومة
نبراس وهاج .. ومدارس تسطع
مليون ميل وبالتربيع
حق الأوضة .. شيتا يهبل
وا .. بتقول خلقوها
ومن أرحامن .. جد ولدوها
سعرها يخلع
وبناها يرمل
أمبارح أحمد ود السرة
جابوه جنازة
وفراشو أندق
حاجة السرة .. جد .. مصدومة
أمبارح دى .. يسرح ويمرح
وفى الحواشة .. يوما أغبر
المنجل جرحو .. قطعلو صباعو
ودّوا المستشفى .. ودمو يكب
الكهربة قاطعة .. والبنج خلصان
علا وليدها دكر بالحيل
لا فلتت منو آه وبكية
لا نزلت منو دمعة وحيدة
بس دمو أتسمم
المشرط صدّا وتعقيمو أتوقف
ما بقدروا يدفعوا .. حق المكنة .. البتعقم مشرط
ولا يجيبوا .. مشارط جملة
الزين ملهوف .. وفؤادو معذب
الليلة نفيسة بتلدو حسين
علا ولادة .. وبالعملية
500000
كتيرة عليو
وهو موظف
ماهيتو تكفى ولا تغطى
حق الحلة وتمن الكسوة
الحالة عصيبة
خرتومنا الغالى .. سوهو شوارع
عربات كورية
الحتة أندفست .. دفسيبة شديدة
السافر بره .. رسل بكرة
داير قطعة .. وفى .. الخرتوم
يبنيها بعرق الغربة الطاهر ولاذع
الكل .. مطلع
بعد ما ضاق نسيم الغربة
كيفن يرجع يسكن فجة
مافيها غير شفخانة
نورا بيطفىء .. و.. عدمانة مكيف؟
لا فيها مدرسة .. سمحة وزينة
مع أنو المدرسة الفى الخرطوم
أصلا خاصة
وحقها .. مرتب حول ..
الحالة عصيبة
نافوخنا .. أطرشق
الشارع .. واسوه .. وصبولو زفت
حفرولو .. مجارى كبيرة .. غريقة
علا .. جوانبو مليانة .. تراب
والمطرة الصبت ماها كتيرة
بس الموية طحالب ساى
والباعوض شبعان ومتهنى
دم الشعب اللاهث كادح
الله يساعدو ويجبر خاطرو
كل حكومة بتوعد فوقو
باكر أجمل
باكر أنضف
باكر تغنى .. ونحن نغنى
وعود .. بالكوم
والحالة الحالة
أكان ما أرتدت
وغطست تانى
لزمن العصر .. الماهو .. الحجرى
بس دنياصورو .. بيقدل شامخ
-------------------------------------------------
* DAWN
| |
|
|
|
|
|
|
| |
humida
mamkouna
انعام عبد الحفيظ
Sobajo
محمد فرح
Mamoun Ahmed
A.Razek Althalib
طارق عبد اللطيف نقد
حليمة محمد عبد الرحمن
Mohamed E. Seliaman
عمر الفاروق
ناذر محمد الخليفة
حبيب نورة
عثمان سيد أحمد
فيس بوك
تويتر
انستقرام
يوتيوب
بنتيريست