|
المؤتمر القاعدي للهيئة العليا للجبايات
|
المؤتمر القاعدي للهيئة العليا للجبايات
في نهاية السنة الالفينية الثالثة اجتمعت اللجنة الشعبية (لقطاع عزة) في منزل الملهم الجديد للجنة الاستاذ عبد الدافع الشاطر والذي وهب للجنة جزءا من بيته المتهالك لخدمة الحي لممارسة نشاط اللحنة واجتماعاتها ,اجتمعت اللجنة وهي في غاية الوهن والتشتت رغبة منها في لملمة الاطراف والاستعداد لترتيبات الحزب الحاكم للانتخابات القادمة المجدد لهم فيها بحكم قانون التمكين. وقد كان دخول عبدالدافع الشاطر دافعا للممسوسين بحب الجزب وللكثير من المنتفعين الذين كان يستهويهم بريق ومأكلة هذه اللجان. وعبدالدافع هذا لمن لا يعرفه عبقري فذ صاحب افكار براقة في ظاهرها وقاتمة فيما تكنه,يعجز الشيطان نفسه عن الخروج بمثلها. ابتدأت اللجنة بحديث رتيب لحاج علي البركة الرئيس السابق للجنة مبديا أسفه الشديد لقلة الجدمات المنفذة وعازياً ذلك لعدم التزام أبناء الحي بالاشتراكات الشهرية. عبدالدافع الشاطر: انتو مدخولاتكم أصلاً كانت كم السنة الفاتت؟ حاج علي : والله اكًان مليون أكان أفل شوية. بس آاي والله عليك أمان الله ما كفتنا يوم احتفلنا بجية المعنمد,الا تماهن لينا حاج الخضر. وانتو اصلاً بنود الجبايات عندكم شنو؟ ما ياهو اشتراكات ودي أصلاً مافي زول بيدفعها, ومرات شهادة سكن ,شهادة وفاة وحاجت زي دي.. لكن معقولة ياها دي بنود الجبايات العندكم؟ أها تعمل شنو؟ طيب طيب يا جماعة أنا مجهز شوية حاجات كدة ح أقراها ليكم عشان نزيد مكتسباتنا بتاعة التمكين. يعني كيف يعني؟؟ نبيع ونكسب وكدة؟؟ أسكت يا حاج علي (حاج الخضر مقاطعاً) أنا بقترح أنه نقفل منافذ الحي كلها إلا مدخلين نخت فيهم بوابات كبار ومسؤلين أمنيين من ناس الهدف,أهو نكون بكدا طورنا نظامنا الأمني وما تخافوا الجهات العليا ما بتبخل الصرف على الأنظمة الأمنية,يعني لا قرش لا تعريفة..
اها وبعدين؟؟ لا بسيطة..بعدين نلزم الناس إنه أي زول تكون عنده بطاقة دخول ممغنطة ودي طبعاً بقروش رمزية.أما للضيوف الدخول بتذاكر وطبعاً أسعار التذاكر بتزيد في الأعراس والبكيات والأعياد. يا زول !! برضو أنا بقترح إنه نسور الميدانين الكبار يا سلام عليك أهو أنا كدة فهمت, نشيل دخل البوابات ونطور بيها ميادين الحلة والمنتزهات والله عبقري يا أستاذ.. لا ياااخي...أنا قلت نسورها ونعملها مواقف سيارات بقروش وطبعاً ما حنظلم ناي الحي حنخليها برضه بطاقات رمزية وبكدا نكوم أمنا العربات من السرقة,لكن بقى عربات الزوار برضو بتذاكر وما حأعيدها تاني التذاكر ليها مواسم أسعارها بتزيد. لا حول ولا قوة إلا بالله.. يا جماعة التمكين داير ضريبة والحكومة تعبت تشيل الحمل براها,احنا لازم يكون عندنا دور ولا كيف؟؟ أها يا أستاذ تاني في حاجة؟ أيوة أنا بقترح إنه يكون في اشتراكات يدفعوها الاباء للجنة الشعبية عشان الأولاد يلعبوا في الشارع,وأولياء الأمور حيكونوا مجبورين يدفعوها. ليه؟؟ لأنه احنا تحت قانون الطوارئ وأي تجمعات وتجمهرات تعتبر تهديد لنظامنا الأمني وحنخطر الأجهزة الأمنية لفضها إذا ما التزموا. طيب احنا أولادنا يلعبوا وين؟؟ لا ياااخي انتو أولادكم ديل أولاد التمكين,ليهم ميادينهم براهم لانو كل المشاريع البتكلم عليها دي حينفذوها هم. وبالمناسبة احنا حنضيف تصديق تاني للحفلات غير حق ناس النظام العام لأنه احنا برضه لينا ضوابط لازم تبقى في قروش تندفع قصادها,زي ناس المرور تقطع وبعدين ما مشكلة سوي الداير تسويه. يا أستاذ ممكن تخلي باقي كلام الجبايات ليوم تانيوطمنا علي الخدمات شوية. حاج علي وقد بدا متضايقاً من ضيق فقه التمكيني. أول حاجة احنا لازم نبني المقر الجديد وأنا خلاص اتكلمت مع شركة صينية تبدأ في الترتيبات دي. وطبعاً حنحدد مخصصات كويسة لأعضاء اللجنة لجهدهم المبذول دا . وبعدين أنا وصيت شركة ماليزية سودانية تظبط لينا المقر بتكييف مركزي وأسانسير ودا طبعاً حيخلينا ننفذ مشاريع التمكين دي بصرامة شديدة.. أها رايكم شنو؟ لا إله إلا الله .. حاج الخضر الحاضرين مرددين لا إله إلا الله. حاج الخضر مردداً (والعصر*إن الإنسان لفي خسر) ... بقلم د.نجم الدين صالح
(عدل بواسطة جدو on 06-21-2008, 02:09 PM)
|
|
|
|
|
|