|
|
 حميد (فضى نارك يا محارب ولا هات البندقيه) لروح القائد (جون قرنق دمبيور)
|
خوفى من تلحق رفيقك
يابريق نجم الحيارى
وانت لا نور فريقك
لا شرق فجرك سهارى
فى زمن ياصحوة طلعك
غص فى حلق الصحارى
حتى شال الغمة فرق
دودى زى وهج البشارة
قلنا ياسعد المواسم
عودك المليان جسارة
عودك الفجر المصادم
بالبصيرات والبصارة
يستحيل يرضخ يساوم
مهما كان الريح حصاره
يفضل النخل البقاوم
فى الصدود نخل الفقارة
يا اندلاع صوت الغفارى
فى حلق دغش الغلابة
لو خريفك تانى يطرح
اه .. يا اخر سحابة
لما يا شرف المواكب
يبقى هم الناس امارة
تندحر كل المناصب
ينكسر كرسى الوزارة
كتى وين .. وين انتو كنتو
كتى وين لما الشوارع
ما ثبت قداما مرتق
نفض الصمت المسافة
مدت الشوق المبارى
للصباحات التجرتق
كم شهيداً بق مارق
من فرقة الظلمة فجراً
تم بى دمو الشرافة
وضم حضن الارض عاشق
كتى وين .. وين انتو كنتو
لما كان فى سجنو ثاير
بى جلابة السونكى نومتو
ويصحى بى امر العساكر
قومتو فى الزنزانة يمحى
ويفتح الاف الحناجر
تجدب الاطفال ويكتب
انبل الاشعار لى باكر
تشطب السجان وصوتو
ويبقى فنان البساسق
كتى وين .. وين انتو كنتو
لما فضل الدين عباية
تدى فوق كتف الغنايا
تنتصب فى الجو طوابق
تنقلب فى التو بنوكة
للبداهن .. والبنافق .. والبوافق
لما كان نفس العباية
تتمسخ بى قدرة حبلاً
لى قصار عمر الكحايا
من جلب تنسل سيفاً
عبر السواهو مارق
شدة الفقر الخرافى
حدة الشغل اللمافى
رغم الاف الحناجر
والخوازيق والمرافق
كتى وين .. وين انتو كنتو
كتى وين ..
لما البيوت فى الشمال قامت خنادق
للكتابات البتنزل
فوق ضهاريهم مطارق
لما طلاب الحقيقة
كانو بختارو المشانق
اه .. يا وطنى المستف
فى المطارات القصية
اه .. يا كفنى المنتف
فى مدارات القضية
اه .. يا صمتى المكتف
بالعبارات الندية
اه .. يا نبتى الملطف
بالنهارات الندية
اه .. من رفع المصاحف
بالرماح الاجنبية
المعاطف اجنبية
العواطف اجنبية
الجلاليب اجنبية
الدواليب اجنبية
الدهاليز اجنبية
السراير اجنبية
المساير اجنبية
صبة الكاس اجنبية
ختت الراس اجنبية
رشة الدلكة اجنبية
رعشة الفركة اجنبية
طفية النور اجنبية
والخوازيق .. عربية
عربية .. عربية
فضى نارك يا محارب
ولا هات البندقية
غنى عشقك يا صبية
نحن قدامك مدارق
غنى للوطن المفارق
عشت يا وطنى المبرق
بالندى ولون المشارق
يا محرق .. يا مجرب
عشت بى شرف البنادق
ويسقط العفن البتلب
فوقنا من شرف الفنادق
|
|
 
|
|
|
|
ناظم ابراهيم
فيس بوك
تويتر
انستقرام
يوتيوب
بنتيريست