|
|
 سوء تفاهم بين فراش و وردة ......الي عشاق هذا النوع من الشعر
|
سوء تفاهم
بين فراش ووردة
_______________
الورد دايما بيبسم
جوّ قلب الناس بيرسم
صورة لروعة جمالو
لرشاقتو وانفعالو
سر عظمتو واكتمالو
برضو واضع في احتمالو
ايه بنقص من كرامتو
لمّا يكشف عن وسامتو
ويهدي للناس ابتسامتو
---------------------
الورد خات في ضميرو
ايه بضيرو
لو مصيرو يفوح شذاهو
ويهدي للاحباب عبيرو
----------------------
ديمة في اعماقو شايل
لهفة الشوق والرسائل
خاتي دايما في اعتبارو
انو درب الحب مسارو
في شعارو الاعتيادي
الورد لابعرف اكره لا بعادي
----------------------
مرة طلت وردة قالت
من رحيقها الدمع سالت
تشكي من روعة صباها
من جمالها ومن بهاها
تبكي من حرقة حشاها
من فراش مغرور غشاها
جرح خدودها رشف نداها
-----------------------
ديمة شايلة جمالي غنية
قلبي فاتح ابوابو دنيا
ماني فاكره في ناس بتقسي
وللمحبة كمان بتنسي
عارفه انو خدودي واحة
وقلبي دايما ليها مرسي
زي نضاري واخضراري
حبي ظاهرفي احمراري
لا مظنة ولا مدسة
-----------------------
الفراش كايس طريقة
يسكت الوردة الرقيقة
-----------------------
يا وردة يا متمردة
اصلا بداية الحب كدا
لما شفتك انزهلت
وبجمالك انبهرت
قلبي رفّ
وحلقي جفّ
قلت لو المس خدودك
من رحيقك شلت رشفة
لاني خاين مرة خنت
لاني غدار يوم غدرت
الاّ بس اغراني حسنك
قلت اقاوم ما قدرت
-- منو البقاوم لجمالك
كل زول في قلبو شالك
في المناديل والاغاني
مرة في كروت التهاني
مع الاماني
----------------------
ياوردة مالموضوع غرور
لمسة خدود رشفة ندي
يا وردة ما جربت حب
ولا عيونك سهدا
الحب دا نار متوقدا
رويحتي بالشوق مجهدا
من يوم بدا
قلبي لا ارتاح لا هدا
مرات بيسرح في المدي
يرجع يكلم في الصدي
يا وردة يا متمرده
الحب دا حال متفرده
لا عندو ساس لا قاعدة
ناس تقصدو وناس يقصدا
ناس تزهدو وناس يزهدا
ناس تعبدو ويستعبدا
ناس تكتمو ويسهدا
ناس ترفضو ويتوددا
ناس تنكرو ويهددا
ناس تقربو ويستبعدا
ناس تبعدو ويتوعدا
ناس تقبلو ويوحدا
ناس تجبرو ويحايدا
ناس سارحه فيه مشردة
ناس ساكنة بيه مقيدا
ناس في سعاتو ممدا
ناس للجحيم متوسدا
يا وردة يا متمردة
اصلا حكاية الحب كدا
----------------------
الوردة ملّت للجدال
يا فراش ما فيش مجال
للملام والانفعال
ما انت عارف في المثال
زي الغمامة لقاي محال
لو كنت عاشق للجمال
اغزل وانسج في الخيال
-----------------------
الفراش اصبح وجيع
يا وردة خوفي بلاك اضيع
كيف استطيع--------
بعدك احلق في الغمام
وافرح واغني مع الربيع
ما انتي عارفه هواي دفين
وقلبي في حبك سجين
لو رفض قلبك يلين
بقبل هلاكي مع اليقين
يا وردة يا متوردة
معقولة بس للحدّي دا
تصبح حياتي مهددا
-------------------------
مرّ النسيم والدنيا غيم
شاهد الجو متطرب
الدنيا زي ساحة حرب
الوردة تبكي وتنتحب
الفراش واقف حزين
مجروح قلب
يشكي ويسب
في الحبّ يوم
او عايز يحب
------------
------------
النسيم سمع الحكاية من البداية
قال للفراش خليك بعيد
وشوش علي الوردة
ومسح دمع الخديد --
((- معذورة يا ست الجمال
يا الفي الحسن ما ليك مثال
اصل الفراش مغرور بليد
وكمان عنيد
------(( تعال ياغبي..؟
نادي الفراش بانفعال
خلاص شفت ومقدده
وعامل صبي
بئر التفاهة محدده
وفي الحب كمان عامل نبي
الحب دا حالة مجردة
يسري في الروح يسعده
ناس تعرفو ومتاكده
ناس تجهلو زيك كده
الحب دا ما لعبة حشر
ولا كمان حالة سعر
منو العلمك
خلاك عنيف
وملاك شر؟؟))
ردّ الفراش في صوت حزين
--- تعلمت من
فعل البشر
تعلمت من
فعل البشر
تعلمت من
فعل البشر
ليبيا 1992
|
|
 
|
|
|
|
|
| |
awad hassan
هاشم أحمد خلف الله
مجدي عبدالرحيم فضل
Nasruddin Al Basheer
Sahar Yousif
فيس بوك
تويتر
انستقرام
يوتيوب
بنتيريست