|
|
 ساخر سبيل : دقسة حسنين !
|
www.alfatihgabra.com
حمل (مواطن) أوراقه وخطا إلى داخل (المصلحة الحكومية) لإتمام بعض المعاملات الخاصة ، شرح لموظف الإستقبال فأشار عليه بمقابلة الأستاذ (حسنين) مشيرا له نحو مكتبه
- الأستاذ حسنين مش كده
- أيوه أنا الأستاذ حسنين .. فى حاجه ؟
- لا بس أصلو فى الحقيقة يعنى عندى الإجراء ده وعاوز أخلصو (يمد له الملف)
- (يقلب فى اوراق الملف) : ومستعجل كده ليه إنت مش عارف انو العجلة من الشيطان وإن الله مع الصابرين؟
- أصبر كيف يا أستاذ أنا ليا شهر (بزازى) بى ورقى ده !!
- (ينظر له من تحت النضارة الطبيه) : طيب وأنت دفعت كل الرسوم والدمغات واللازم منو ؟
- أيوه يا أستاذ دفعتهم في وعندك أهو كل الإيصالات مدبسه
- (يضع الملف وينظر له ) : بس انت لسه ما دفعت لى (عبدالسلام) !
- (فى إندهاش) : (عبدالسلام) ده كمان منو البدفعو ليهو؟
- الله يطولك يا روووح .. أنت أول مرة تيجي هنا وإلا شنو؟ فى زول ما بيعرف (عبدالسلام)
- معليش ، أصلو أنا أول مرة أجى وما عارف الإجراءات .. ممكن يا أستاذ تورينى مكتب (عبدالسلام) ده وأنا أمشى أدفع ليهو
- (يمد له يده ) : يا عزيزى (عبدالسلام) ده ما بشيل (القروش) بى نفسو جيبا هنا أنا بوديها ليهو
- طيب والقروش دى يعنى رسوم وكده ؟اصلو أنا سألت زول قال ليا ياها القروش الدفعتها دى ياها المطلوبه
- (فى ضيق) : مافى مشكلة خلاص خليك من (عبدالسلام) عاوزين نشرب الشاى
- المشكله وين نادى المراسله خليهو يجيبو ليكا ؟
- عامل ما (ناقش) إنت ؟ عاوز تعمل لي فيها مجنون وإلا شنو؟
- مجنون كيف يا استاذ شايفنى (بطقع) ؟ يعني علشان الزول أول مرة يجى المصلحه بتاعتكم دى لازم يتهزأ يعنى؟
- معليش إنت لا (بطقع) ولا حاجه .. شوف يا سيدى ورقك ده شكلو كده ناقص ، شيلو راجعو تانى وتعال ليا بكره ولو ما جيت ذاتو يكون أحسن !
- كيف الكلام ده الموظف الهناك ده راجعو كلو وقال ليا ورقك ده كامل وما ناقصو إلا الختم العند الأستاذ (حسنين) اللهو إنت يا أستاذ
- خلاص خلى الموظف القال ليك كده ده يختمو ليك
- أيواا يعنى إنت عاوز رشوة
- ما رشوة بالضبط كده ممكن تقول تسهيلات عشان الواحد نفسو تتفتح للشغل
- طيب ما تقول من زمااان يا أخي وشابكنى الأستاذ (عبدالسلام) وعاوز أشرب (شاي) وشنو ما بعرفو دااك
- يلا حصل خير دخل كده إيدك فى جيبك وناولنا .
- معليش يا أستاذ (حسنين) لكن بس أناولك كده زى كم ؟
- يعنى عشان إنت راجل صباح خير قول كده (خمسمية) .
- معقوله هسه النضمى ده كلو فى خمسمية يعنى حق كبايت شاى
- شاى ايه يا مواطن (خمسميت ألف) !
- لكن ده مش كتير شويه ؟
- صدقني يا أستاذ أنا ما عندى فيهم أى حاجه ديل كلهم ماشين للأستاذ (عبدالسلام) نحنا لينا أجر المناولة بس وعموما لو ما معاك هسه (يرمي الملف على الأرض) ممكن تجيبهم فى أى يوم تانى.
- (يخرج رزمة نقود من جيبه) : لا لا خلاص أهم ديل
- (يضع النقود في الدرج ويلتقط الظرف من الأرض ) : أيوه كده ، ياخى إنت زول متعب بالحيل ضيعت علينا زمننا ساااكت
- يا استاذ حسنين بس لو ممكن خدمة
- حااضر جدن
- (يخرج من جيبه بطاقه) : بس عاوزك تصور ليا البطاقه دى
- (يمسكها ثم يطالع فيها ثم يرتجف) : معقول عميد فى المباحث !!! – مواصلا- والله يا سعادتك الما عارفك يجهلك
- الما عارفك يجهلك يا موظف يا مرتشى بوظتو لينا (الخدمة المدنيه) وريحتكم بقت فايحة .. – ثم ينده-
يا عسكرى يا عسكرى (يدخل شخصان يرتديان زياً مدنيا ويلقيان التحيه) : أمسكو الموظف المرتشى ده وأحفظو (الفلم الصورتوهو ده) وشيلو القروش الفى الخزنة دى كلها معروضات ومعاها الخمسمية المرقمة الأنا أديتا ليهو دى
- حاضر سعادتك !!
بينما (حسنين) يقف مندهشا من عنصر المفاجأة يقوم الشخصان بتفريغ الدرج والخزنة من القروش ويخرجان يتبعهم (العميد المزيف) والذين ما أن خرجو من باب المصلحه حتى كانو (فص ملح وذاب) !!
تنبيه :
أيها الموظف المرتشى أكل (تحت تحت) ما تخلى ريحتك (تفوح) فتكون عرضه لمثل هذا النوع من العصابات !!
|
|
 
|
|
|
|
الفاتح يوسف جبرا
فيس بوك
تويتر
انستقرام
يوتيوب
بنتيريست