|
|
 نور ومهند..وفرصة مواعدة الجكسوية وقت المسلسل
|
المسلسل التركي المدبلج نور يبدو إنو أعاد إمكانية التجكيس وقت المسلسل بعد أن إنقرضت هذه العادة الحميدة ردحاً من الزمن في ظل المسلسلات السودانية والمصرية الصعيدية وما ادراك ما يسرا و نور الشريف والوجوه المتكررة ..
اتوقع إنو اخر مرة ولد واعد ليهو في وقت المسلسل ايام رأفت الهجان وليالي الحلمية لحدي الجزء الثالث والمال والبنون ومن بعدها لم يواعد ولد بت إلا في رمضان خلال صلاة التراويح ..
اتوقع إنو الموضة رجعت الأيام دي مع المسلسل العجيب وغريب ورهيب مسلسل نور التركي المدبلج ..
الروعة جاية من غنج اللبنانيين في طريقة الترجمة مع البساطة والأناقة والأريحية في الأتراك ..
إتصلت على ناس البيت أسلم عليهم قبل فترة واخترت التوقيت الساعة 10 مسا نظام الكل بيكون قاعد ..اول حاجة ردوا لي بعد تعب والمشكلة أي زول بيقول لي هاك كلم ده وبعدين ارجع لي لحدي ما لقيت روحي كلمتهم كلهم في 30 ثانية فقط !!!
أمي الله يديها العافية ختتا لي بب كده وقالت لي يا عمر اضرب لينا بعد مسلسل نور !!!
نوووووووووووووووووووور؟؟؟ نور دي منو ؟؟
مسلسل تركي !!!
قلت أمي دي من زمان شابكاني ليك حركات احمد شوقي ديك وإنو جدك صديق العجب من أصول تركية يكون عاودا الحنين وبقت تفهم تركي ..
كدي يا امي اديني صلاح النفهم الحاصل :
والله يا عمر مسلسل مدبلج موبااااااااااااااااالغة إسمو نور ..كدي اقفل اسة واضرب بعد حداشر ..
تووت ..توووت ..تووت..
قلت ما مشلكة أستفيد من باقي الرصيد واضرب لي النسابة كمان اسلم عليهم :
ادوني الخالة أسلم عليها واكفر ليها عملية العيون ..
والله يا عمر بتحضر في المسلسل بتاع نور !!!!!!!!!!!
أممممممممممممممممممممممممممك نسيبتي عديييل كده !!!!!
لالالا خلاص خلوها بضرب ليكم وقت تاني..
في البيت وانتو الصادقين المدام ما بتتفاهم معاي بخصوص العشاء إلا بعد الساعة حداشر مسا ..
اخر كورة انا حضرتها في الدوري الأسباني أظنها كانت مباراة ريال مدريد وفالنسيا في الدور الأول بعد ما اكتشفت المدام درب المسلسل ده ..
غايتو الله يخلي لي معتصم وتمبس ما جايبين خبرا فبقول ليهم جاي احضر معاكم الكورة ..
خشيت النت لقيت ليك بلاوي منتديات ومعجبين واصدقاء نور وما ادراك ما جمعية المعجبين ..
النصييييحة ليك يا الله قمت يوم جريت ليك الكرسي وقلت النحضر فيها شوية نظام مجاملة للمدام عشان بقت تجاملني في متابعة الهلال ومانشستر ..
نور الما بتغباني كنت شايفا ليك شييييينة وعولااااااق ..
مهند لولا خوفي من امنة مختار لقلت لكم إنو الحلاة كلللللللللللللللللها وجاهة الف ووسامة طن ..
البيت عامل كيف اللبس كيف وترجمة اللبنانيين زااااااااااتا كيف..
أبشركم يا بورداب أخوكم أسة من 9 ونص بيكون ماسك الريموت وتاااكل في إنتظار نور !!!
في حياتي ما تابعت لي مسلسل مدبلج لأنو بتذكر في مسلسل كده إسمو كساندرا مكسيكي بدا لمن انا دخلت اولى جامعة لحدي ما إتخرجت من الجامعة المسلسل ما خلص !!!
اها فيكم زول متابعوا معاي ولا اكون برااااااي!!!؟
|
|
 
|
|
|
|
عمر الفاروق
فيس بوك
تويتر
انستقرام
يوتيوب
بنتيريست