|
|
 تعبيرات دارجة - بليغة
|
درسنا في مادة البلاغة أشياء كان العرب يقولونها ويقصدون غيرها، فمثلاً يقول العرب في مدح المرأة (بعيدة مهوى القِرط)، ومهوى القِرط هي المسافة بين حلمة الأذن والكتف، فإذا كانت المرأة "بعيدة مهوى القرط"، فهي طويلة الجيد، وهي علامة جمال. كما يقولون أن فلان (جبان الكلب)، ويريد القائل هنا أن الكلب لا ينبح في الأغراب، وذلك لأنه متعوِّد على رؤية الأغراب، فهم غالباً ما يدخلون البيت جماعات، وذلك بسبب أن صاحب البيت مِضياف، والكرم إحدى صفاته، وهذا ما يريد القائل الوصول إليه، أن (فلان كريم).
طيب، كان حيحصل شنو لو قال إنو فلان كريم، وفلانة رقبتها طويلة؟ عالم تحب تعقّد الإشياء بس.
عندنا في السودان تعبيرات مشابهة في دارجيتنا الجميلة. تعالوا نحاول نجمّع ما نذكر من تلك التعبيرات.
|
|
 
|
|
|
|
|
|
|
|
Re: تعبيرات دارجة - بليغة (Re: محمد أبوالعزائم أبوالريش)
|
محمد
تحياتي
شكرا على هذا البوست في خضم المعارك الدائرة
نجي للتعبيرات
أباطو و النجم : كناية عن الفلس الشديد
نفسو حار : كناية عن سريع الغضب
إيدو مقدودة : كناية عن الإسراف و الصرف البذخي
صبراً يبل الآبري : و يبدو أن الأبري كان أكثر شيء يتطلب أن يصبروا عليه : كناية عن طلب الصبر
و واصل
دمتم
| |
|
|
|
|
|
|
|
|
|
Re: تعبيرات دارجة - بليغة (Re: محمد أبوالعزائم أبوالريش)
|
محمد ابو العزائم
تحياتي وشكري علي الموضوع اللطيف جداً
دي فرصة اقول ليكم واحد من ابلغ الجمل التي سمعتها.. ولكن يلزم ان اذكر السياق كامل ليتضح المعني.
طالبة الشهادة السوادنية يسألها عمها الكبير في السن عن أي كلية ترغب في الدراسة بها بالجامعة.
قالت: كلية الطب.. عشان ابقي دكتورة واعالجك كان مرضت.
قال: والدراسة كم سنة.
قالت: ستة سنوات
قال: ستة؟؟؟
اكون بقيت للتراب بقاقة
لم اسمع في حياتي من يذكر الموت ويصف القبر ابلغ منه
شكري لك مرة اخري
| |
|
|
|
|
|
|
|
|
|
Re: تعبيرات دارجة - بليغة (Re: محمد أبوالعزائم أبوالريش)
|
أبا جُهينة
أكيد عندك الخبر اليقين
| Quote: نفسو حار : كناية عن سريع الغضب |
وعكسها أيضاً صحيح (نفسو بارد)
وعلى ذكر الأنفاس:
هناك من (نفسو طويل)، وهو الذي يصبر على الأشياء حتى ينال مراده.
والعكس (نفسو قصير)
أشكرك على المشاركة والإضافة
و ... واصل معانا[GREEN/]
| |
|
|
|
|
|
|
|
|
|
Re: تعبيرات دارجة - بليغة (Re: محمد أبوالعزائم أبوالريش)
|
الأُستاذُ / محمَّد أبو العزائم ..
لكَ التَّحايا ممهورَةً
بالودادِ وبالرُّقِيّ ..
وسأَعُودُ إليْكَ هُنا
ثانيةً بإذنِ واحِدٍ
أحَدْ ...
فزَمَنِيَ الآنَ أبيضُ مِنْ سِرْبَالِ
الطَّبَّاخْ ..
..
قَمَرٌ لأجلِكَ وحَرْفِكْ ..
احترامي ...
أخوك / محمَّد زين ...
| |
|
|
|
|
|
|
|
|
|
تعبيرات دارجة ..بليغة (Re: محمد أبوالعزائم أبوالريش)
|
أبو العزائم و ضيوفو الكرام ...
هاكم دى حاجة بسيطة و جاييكم راجع..
بطنو غريقة: دة البيحفظ او يكتم السر، أو ما بيطلع أمورو الخاصة حتى على أصحابة
لسنه فلقة ..لسنو فاكى .. لسانه متبرى منو: ده لما الواحد بيقول الكلام البيجى فى راسو من غير ما يراعى للناس الحواليه
| |
|
|
|
|
|
|
|
|
|
Re: تعبيرات دارجة - بليغة (Re: محمد أبوالعزائم أبوالريش)
|
الجبيب ود ابو العزئم
بوستيك ظريف وما بنفات
زمان فى السبعينات كنا ساكنين فى ود مدنى
بحكم عمل الوالد (رحمه الله) فى ادارة التوجيه التربوى
مره جاتنا خالتى (الله يرحمها) فى زيارة من البلد ،
والوقت داك لسه الكهرباء والمويه ما دخلت قريتنا
الخاله لما جات احتفينا بيها طبعا، وأكرمناها ، اكل إيه
وتحليه كاستر ، وفواكه ، وبيبسى
بعد ما الخاله اتظبطت كويس بالحاجات دى قامت قالت :
اتاريكم قاعدين هنا تاكلوا فى الحنتويل وتشربوا فى المويه الباردة ،،،
لى هسى ما عرفنا الحنتويل ده شنو ....
اها اديك كمان ع السريع كده :
عينوا طايره : الزول البعاين للنسوان
اضانو خفيفة :الزول الشمشار ، البنقل الاخبار
ايد ورا وايد قدام : دليل على العودة خالى الوفاض
حانف وشيشو تقول بدور يقع منو : للزول البكون زعلان لمن عاوز يطق
الرماد كال حماد : دليل حدوث كارثة او مصيبة
التُرابه فى خشمك ، خُم وصُر : تقال عندما يفشل الشخص فى تحقيق نتيجة ايجابية فى شى ما
| |
|
|
|
|
|
|
|
|
|
Re: تعبيرات دارجة - بليغة (Re: الفاتح الجنيد)
|
الحبيب ود الجنيد ..
طبعاً جنس الكلام ده بعجب ناس البادية بالحيل.
غايتو الحنتويل ده يطرشني .. لكن دي فرصة تفتش وافتش معاك .. يمكن نلقاهو.
(عينو طايرة .. وأضانو خفيفة) دي فعلاً من الأمثلة القاصدها في البوست، وشايف بالتحديد العين والأضان ليهم تعبيرات كتيرة. وأضانو خفيفة ممكن برضو تعني (حاد السمع) وعكسها (أضانو تقيلة).
خليك قريب ..
مودتي
| |
|
|
|
|
|
|
|
|
|
Re: تعبيرات دارجة - بليغة (Re: محجوب البيلي)
|
الأخ محجوب البيلي ..
الراسو خفيف ده طبعاً البيسكر من كاس واحد والاّ إتنين.*
لكن الغريبة تعبير (راسو تقيل) ما عندها صلة براسو خفيف، وهي تعني (النوم كابس عليهو) .... مش؟
شكراً للمشاركة.
___________________________
* أنا كمان هم اللي قالولي
| |
|
|
|
|
|
|
|
|
|
Re: تعبيرات دارجة - بليغة (Re: محمد عبدالرحمن)
|
ارجوا ان تكون مداخلتي خفيفة الظل لانها من الدارجي جدا من ديار المسيرية
يقولون ان فلان عنكريب سجالة ( السجالة تعني الاصحاب او الاصدقاء )
و نكريب السجالة كناية عن قوة التحمل حيث ان الاصدقاء يجلسون باعداد كبيرة في عنكريب واحد فهو دئما يحمل اثقالا لبيرة دون كلل او ملل
| |
|
|
|
|
|
|
|
|
|
Re: تعبيرات دارجة - بليغة (Re: محمد أبوالعزائم أبوالريش)
|
الأخ adam alamar
Quote: ارجوا ان تكون مداخلتي خفيفة الظل لانها من الدارجي جدا من ديار المسيرية
يقولون ان فلان عنكريب سجالة ( السجالة تعني الاصحاب او الاصدقاء )
و نكريب السجالة كناية عن قوة التحمل حيث ان الاصدقاء يجلسون باعداد كبيرة في عنكريب واحد فهو دئما يحمل اثقالا لبيرة دون كلل او ملل |
ياخي زولك ده ما ياهو زاتو البنقول عليهو نحن (جمل الشيل).
أتحفنا بالمزيد من ديار المسيرية .. شكراً ليك .. أديت البوست بُعد جديد
تحياتي
| |
|
|
|
|
|
|
|
|
|
Re: تعبيرات دارجة - بليغة (Re: محمد البشرى الخضر)
|
سلام أبو الريش ، هاك ديل :
شنقلي طوباي تلقي دهباي
دفن الليل أب كراعاً برة
الـ في سروالو قداي ...ولا بفنقل ( أو يشنقل ) --- ده عايز ترجمة
دنيا دبنقة ..دردقي بشيش ..
الحسنة في المنعول ...زي الشرى في القندول
والنواية بتسند الزير..
بعدين ، الفولة في خشمو ما بتنبلا
والسايقة ..واصلة
والعريجا ...لي مراحا
وكلام القصير ..بتلقي ورا ...( يعني ضحى الغد )
لو اتذكرت حاجة تانية ...بجيك راجع ...شكراً على البوست المفيد الخفيف ...
ودي وتقديري ..لك ولزوارك الكرام ...
| |
|
|
|
|
|
|
|
|
|
Re: تعبيرات دارجة - بليغة (Re: ibrahim fadlalla)
|
الأخ إبراهيم فضل الله ..
يا زول زيدنا من كلام كردفان الحللللو وطاعم ده.
| Quote: الـ في سروالو قداي ...ولا بفنقل ( أو يشنقل ) --- ده عايز ترجمة |
ده كان ترجمتو ما بجيب الفضايح ..... هو سروالو فيهو قدَّاي .... البخلي يفنقل شنو؟ 
شكراً على الأمثلة المعبّرة
تحياتي
| |
|
|
|
|
|
|
|
|
|
Re: تعبيرات دارجة - بليغة (Re: محمد البشرى الخضر)
|
أبو حتوت ياعمّك
| Quote: عينو/ها بيضا - كناية عن الجرأة الغريبة و التناحة وعدم الحياء و حاجات تانية |
السؤال هنا ياتو عين بتعلو على التانية (العين البيضاء) والاّ (العين القوية) .....
بعدين عرفنا (الجرأة) و(التناحة) و(عدم الحياء) لكن ما عرفنا (الحاجات التانية) دي .... تكون (حاجات تانية حامياني) على قول ترباس؟
شكراً على المرور و ... خليك معانا
| |
|
|
|
|
|
|
|
|
|
Re: تعبيرات دارجة - بليغة (Re: صلاح الأحمر)
|
وكتين :
( عالم تحب تعقد الأشياء )
إتو شن بوديكم للكلب يعضيكم!؟
| Quote: الراسو خفيف ده طبعاً البيسكر من كاس واحد والاّ إتنين.* |
القال ليك منو ؟
بجيك بس هسع:
ماني لاقية إيدي
غير :
ماني لاقية خاتري
سلام كتير بابوالعزائم
| |
|
|
|
|
|
|
|
|
|
Re: تعبيرات دارجة - بليغة (Re: صلاح الأحمر)
|
الأخ صلاح الأحمر ....
يا زول إسمك ده أنا شامّي فيهو ريحة كردفان ..
كان ظني صحيح .. تعال ورينا جرابك الكردفاني فيهو شنو.
وكان ما صحيح .. ورينا العندك محل ما تبقى.
عاطر التحية
| |
|
|
|
|
|
|
|
|
|
Re: تعبيرات دارجة - بليغة (Re: ماضي ابو العزائم)
|
ماضي ..
الغريبة إنو في كل الأمثلة الأوردناها هنا، مافي علاقة بين الوصف والموصوف، بمعنى إنو التعبير غريب (بطنو غريقة) ... الغريق ده طوالي بنفكِّر في بير والاّ بحر. وقلبو كبير .. أظن أهل الطب بيقولوا كبر عضلة القلب يعني اعتلالها عافاكم الله. رغم كدة ... ورغم غرابة جمع الوصف والموصوف بهذه الطريقة، إلاّ أنهامعبّرة جدّاً.
| |
|
|
|
|
|
|
|
|
|
Re: تعبيرات دارجة - بليغة (Re: طارق جبريل)
|
يا زول والله إحلوّت حلا!
طارق جبريل بي جلالة قدرو معانا هنا؟
Quote: ابو الريش كيفنك
جينا بس نخت بنبرنا لامن نفضى
وكان عايز تشبيهات انا جاهز |
يا زول وهِّط بنبرك وادينا من تشبيهاتك ووصفك البعرفو داك.
وهات من حق أهلك الشايقية.
حبابك ألِف
| |
|
|
|
|
|
|
|
|
|
Re: تعبيرات دارجة - بليغة (Re: Kostawi)
|
Quote: بطنو غريقة
عينو قوية
جكس شرط
كراعو حارة
أب سكاكات
لسانك حصانك
تضوقي يا بنية
تضوقي كان حية
أمشي عامل راسك زي اللديتر
الولف كتال
كرمبا |
كرمبا دي واحدة من التعبيرات والاّشنو؟
ليك التحية
| |
|
|
|
|
|
|
|
|
|
Re: تعبيرات دارجة - بليغة (Re: عادل التجانى)
|
كيفك يا أبو الريش
تشبيهات المدح بما يشبه الزم
قال الشاعر: أنا العفنه المقابلة الريح .. وأنا الشافوا كلو أبو
الزم بأسماء الحيوانات
جن وسعر
بخ سمو
لسعتو والقبر
والنشال الحريف بسرق الكحلة من العين
تحياتى
| |
|
|
|
|
|
|
|
|
|
Re: تعبيرات دارجة - بليغة (Re: رأفت ميلاد)
|
رأفت ....
Quote: أنا العفنه[/B] المقابلة الريح .. وأنا الشافوا كلو أبو
الزم بأسماء الحيوانات
جن وسعر
بخ سمو
لسعتو والقبر |
ياخ نحن مالو كلامنا كلو شين كدة؟
__________
خارج النص:
خلي سلوى صيام تواصل معانا ... وبطِّل أمور التحريش دي
| |
|
|
|
|
|
|
|
|
|
Re: تعبيرات دارجة - بليغة (Re: Sosan Abdullah)
|
صاحب المداخلة .. سوسن عبدالله والاّ سليمان ...
أيّاً كان ... حبابو عشرة
التعبير ده محيّرني ... لأنو المعروف إنو الكديسة هي الروحها طويلة .. وكمان بيقولوا عندها تسعة أرواح .. ما عارف الكلب جابها من وين؟
الفقرة الفوق دي جابت لينا تعبير تاني من التعبيرات المقصودة، وهو (روحو طويلة).
تحياتي
| |
|
|
|
|
|
|
|
|
|
Re: تعبيرات دارجة - بليغة (Re: Salwa Seyam)
|
حباب سلوى صيام ....
| Quote: يا اخوانا وين سيد البوست .. نحن غايتو استلمنا المحل وقعدنا .. |
يا زولة ما عندك أي مشكلة ....
إستلميهو .. وضيِّفينا فيهو
_______
كلام في أضانك:
أوعي من رأفت ده بتاع شبك .. شايفاهو طلّعني مجنون وسعران
| |
|
|
|
|
|
|
|
|
|
Re: تعبيرات دارجة - بليغة (Re: ناجية مصطفى)
|
الأستاذة ناجية مصطفى
شوفي لينا من جرابك كلام نسوان مدبرسات ..... مفلهمات .... مسطَّحات .....
أقبض .... (مسطِّح) دي من التعبيرات البنفتش عليها ....
نوّرتي البوست
| |
|
|
|
|
|
|
|
|
|
Re: تعبيرات دارجة - بليغة (Re: محمد أبوالعزائم أبوالريش)
|
ابو العزائم مالك
تريان ومندي كاسي الكتان والهندي
وشِنْ القَعدة
يا أبو السُّرة
في ضُل العمارات أم كمرةً برّة
ضُقْنا الحَنْضَل اليانكي
وبَلَعْنا المُرّة
كِمْلَتْ كوتة التُّمبَاك
صَقَعْنا الجِّـرّة
ووكت إتقفّلَتْ شِقّيشْ
قَبَلْ بي المرّة
نَرْمي أمُرنا في بلد المعاني الحُـرّة
الشّمْ خَوّخَتْ
بَرَدَنْ ليالي الحّـرّة
والبرّاق بَرَقْ ..
مِنْ مِنّا جاب القِرّة
شوف عيني الصِّقير بجناحو كَفَتْ الفِرّة
تلقاها ام خدود الليلة مَرَقَتْ بَرّة
| |
|
|
|
|
|
|
|
|
|
Re: تعبيرات دارجة - بليغة (Re: Emad Abdulla)
|
ابو الريش ..
سلام ..
هاك ديل إن شاء الله ما يكونوا مكررات :
العين ما بتعلى علي الحاجب
السواي مو حداث
سهر الجداد ولا نومو
تاكل بضرسك تنفع نفسك
الماتلحقو جدعو
باب النجار مخلع
اتعلم الزيانه في قفا اليتامى
الماعنده ضهر ينضرب علي بطنه
| |
|
|
|
|
|
|
|
|
|
Re: تعبيرات دارجة - بليغة (Re: محمد أبوالعزائم أبوالريش)
|
الأخ محمد علي طه الملك
Quote: العين ما بتعلى علي الحاجب
السواي مو حداث
سهر الجداد ولا نومو
تاكل بضرسك تنفع نفسك
الماتلحقو جدعو
باب النجار مخلع
اتعلم الزيانه في قفا اليتامى
الماعنده ضهر ينضرب علي بطنه |
أشكرك على الأمثلة المعبّرة.
حبّذا لو تدينا من نوع الجُمَل التي يكون فيها جمع الوصف والموصوف غريباً على شاكلة (كراعو حارَّة) و(بطنو غريقة) و(عينو طايرة) إلخ
تحياتي
| |
|
|
|
|
|
|
|
|
|
Re: تعبيرات دارجة - بليغة (Re: محمد أبوالعزائم أبوالريش)
|
الأخوة والأخوات ....
التعبيرات التي قصدتها في هذا البوست هي التي تتكون فيها الجملة من مبتدأ وخبر، أو صفة وموصوف (أرجو تكون معلوماتي اللغوية صحيحة). وسأحاول هنا تبويب هذه التعبيرات كالتالي:-
وصف العين:
1) عينو طايرة.
2) عينو قوية
3) عينو بيضاء
وصف الإيد:
1) إيدو لاحقة.
2) أيدو مقدودة.
3) إيدو طويلة.
4) إيدو خفيفة.
5) إيدو تقيلة.
6) ضراعو أخدر.
وصف الكُراع
1) كراعو طويلة.
2) كراعو حارَّة.
وصف الراس:
1) راسو خفيف.
2) راسو تقيل.
3) راسو ناشف.
وصف القلب:
1) قلبو كبير.
2) قلبو رهيف.
3) قلبو قوي.
4) قلبو خفيف.
أوصاف النَفَس
1) نَفَسو حار.
2) نَفَسو بارد.
3) نَفَسو طويل.
4) نَفَسو قصير.
أوصاف اللسان:
1) لسانو طويل.
2) لسانو فاكّي.
3) لسانو حلو.
4) لسانو زِفِر.
أوصاف الأضان:
1) أضانو خفيفة.
2) أضانو تقيلة.
أوصاف متنوّعة
1) بطنو غريقة.
2) ذمّتو واسعة.
3) بالو طويل.
4) بالو واسع.
5) جلدو خشن.
6) مخّو تخين.
7) فهمو تقيل.
8) روحو طويلة.
9) ضهرو قوي.
10) دمو خفيف.
11) دمو تقيل.
12) نفسو صغيرة.
13) أخلاقو ضيّقة.
14) أخلاقو واسعة.
15) ضلّو ميِّت.
والباب مفتوح للإضافات
| |
|
|
|
|
|
|
| |
محمد أبوالعزائم أبوالريش
ابو جهينة
كمال علي الزين
انعام عبد الحفيظ
محمَّد زين الشفيع أحمد
الفاتح الجنيد
محجوب البيلي
Mohammed Kaddam
محمد أبوعاقلة الطريفي
محمد عبدالرحمن
محمد البشرى الخضر
ibrahim fadlalla
صلاح الأحمر
طارق جبريل
ماضي ابو العزائم
Kostawi
محمد المرتضى حامد
عادل التجانى
رأفت ميلاد
Gaafar Ismail
haroon diyab
Abd-Elrhman sorkati
محمد الطيب حسن
Emad Abdulla
محمد على طه الملك
فيس بوك
تويتر
انستقرام
يوتيوب
بنتيريست