|
|
|
 Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
Quote: لو في طريقة أخطبوا لي أول واحدة قاعدة في شمال الصورة .
ولو هي وافقت وأهلها وافقوا وكيل العريس صديق الموج .
شاب هادي جداً وطيب وفي حاله و يقدس الحياة الزوجية وضعه المادي (كعب) لكن الله كريم. |
الازهرى العزيز...تحياتى
ومن يخطب الحسناء يجزلها المهر..
اها شفت دى دايرين فيها 250 بقرة فقط..
ده عشان ظروفك...
ولعلك لا تدرى ان فى الجنوب كلما كانت البنت طويله كلما زاد المهر..
ولا اغالى ان قلت لك ان بعضهم يتزوج باربعمائة بقرة..
بس انت عندك واسطه نقصنا ليك البقر شويه..
بسرعة اخطب قبل مايجى شول اشوانق يقول بقر ده شويه،،،
| |
 
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: صديق الموج)
|
الزميل العزيز أستاذنا صديق الموج (وكيل العريس)
تحياتي وتقديري لشخصك الكريم
تعرف يا أستاذ صديق انا بحب أهلنا الجنوبيين جداً لكن ما أتاحت لي الظروف أتعرف على صديق من الجنوب بشكل قريب .
الوالد كان عنده صديق جنوبي (عم مايكل) كنا بنشوفه لمن نمشي السودان إجازة زول طيب جداً وفي غاية الكرم كان يتحفنا وإخواني ونحنا صغار بي كمية من علب حلاوة اسمها حلاوة (كسلا) وبردم لينا البيت كراتين طحنية أسمها طحنية سعد أو سعيد ما متذكر . ربنا يطراه بالخير .
ربنا يوحد شملنا في دولة مؤسسات ديمقراطية وننعم بالسلام والخير جميعاً .
أها نرجع لي موضوعنا الأساسي : شوف يا أستاذ صديق مادام قبلت منصب الخير دا (وكيل العريس) كمل جميلك وقول لي المهر دا يساوي كم بالدولار .
البنية سمحة وتساهل وزنها دهب (من حسن حظي إني بفضل الجمال الرشيق) ومابحب الجمال حق سيجمان ماركة محل ماتمد إيدك تحمد سيدك .
بس كان المهر طلع مبلغ جامد بالدولار مابقدر عليه في ظل ظروفي الحالية . وربنا يديك العافية إنت بي واسطتك بقى 250 بقرة وجاء كمان جورج بيونغ ماقصر و نقص لينا مية بقرة . بس شوفوا لينا المية وخمسين بقرة ديل بطلعوا بي كم .
شول دا زول طيب مابزيد علينا الخوف يجي دينق ويقول المهر قيمته تكون بي بقر تكساس مابقر الجنوب يكون عوقني تعويقة كعبة جداً .
ربنا يملاك عافية بجاه الرسول الكريم .
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
Quote: أستاذ صديق
هو ماقصر لكن شوف كلمة (كمقدمة)
منها خوف الكلمة دي بالذات لو جات من جوك بيونق |
شوف يا الازهرى..تحياتى
اخوانا فى الجنوب ديل متسامحين جدا..ومافى قولة خير..
يعنى لو انت زول كويس والبقر نقص شويه ما بتوقفوا معاك وبزوجوك.
لكن بشرط تتم البقر ده فى المستقبل..
يعنى فى ناس عرسوا واولادهم عمرهم الان عشرة سنوات ولسه
بكملوا فى البقر..
وبعدين من عادات الجنوبيين الواحد لايمكن قطعا يتزوج
ابنة عمه او خاله او خالته او عمته فهذه محرمة قطعا وبتعتبر
اخت.
وشوف يجى العلم يثبت انه زواج الاقارب سبب رئيسى فى الامراض
الوراثيه..وهم بعملو كده كعادات.
بعدين المراة كان ولدت ما بعرفو اربعين يوم زينا الا تتم سنتين تماما
او ترسل الولد لى جدو لكن معاه البقر بتاعه.
شوف القران بقول وفطامه فى عامين وهى السن التى ينضج فيها الوليد..
اتمنى من الاخوان يحدثونا بالمزيد عن عادات وتقاليد اهل الجنوب..
طبعا انا بجهز فى نفسى وبتعلم عشان ماشى قدامك اتزوج،،،
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: صديق الموج)
|
أستاذنا صديق الموج
الله يطمنك ويريح بالك .
Quote: وبعدين من عادات الجنوبيين الواحد لايمكن قطعا يتزوج
ابنة عمه او خاله او خالته او عمته فهذه محرمة قطعا وبتعتبر
اخت.
وشوف يجى العلم يثبت انه زواج الاقارب سبب رئيسى فى الامراض
الوراثيه..وهم بعملو كده كعادات.
بعدين المراة كان ولدت ما بعرفو اربعين يوم زينا الا تتم سنتين تماما
او ترسل الولد لى جدو لكن معاه البقر بتاعه.
شوف القران بقول وفطامه فى عامين وهى السن التى ينضج فيها الوليد..
اتمنى من الاخوان يحدثونا بالمزيد عن عادات وتقاليد اهل الجنوب..
طبعا انا بجهز فى نفسى وبتعلم عشان ماشى قدامك اتزوج،،، |
دي معلومات جديدة علي ماكنت عارفها .
فعلاً نحنا محتاجين لإعادة إكتشاف بعضنا البعض قبال أي حاجة تانية .
هناك جهل كبير لدى الشماليين بعادات إخوانهم في الجنوب وأعتقد كمان الامر نفسه لدى إخوانا الجنوبيين عن أهلهم في الشمال وإن كان بدرجة أقل في ظني .
شكراً جزيلاً على الإهتمام والتجاوب وفي إنتظار أخوانا الزملاء من جنوب السودان يوضحوا لينا أكتر عن عادات الزواج في الجنوب .
على فكرة قبل أكتر من 15 سنة قابلت في لندن شاب جنوبي إسمة قاصد خير جوزيف لاقو وأخته شابة جنوبية لطيفة جداً وفي غاية التهذيب إسمها غادة ووالدتهم ميمونة . الله يذكرهم بالخير هو في عمرنا او أكبر بقليل . لكن برضوا ماسمحت الظروف أتعرف عليه أكتر .
من هذا البوست أرسل له التحيةولأسرته الكريمة .
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
Quote: على فكرة قبل أكتر من 15 سنة قابلت في لندن شاب جنوبي إسمة قاصد خير جوزيف لاقو وأخته شابة جنوبية لطيفة جداً وفي غاية التهذيب إسمها غادة ووالدتهم ميمونة . الله يذكرهم بالخير هو في عمرنا او أكبر بقليل . لكن برضوا ماسمحت الظروف أتعرف عليه أكتر .
من هذا البوست أرسل له التحيةولأسرته الكريمة . |
ايضا انا اعرف هذه الاسرة ووالدتهم ميمونه او امنه عبد الرحمن كانوا جيراننا واخوانها
محمد والصادق عازف كمنجه مشهور واستاذ، ومنصور عبد الرحمن ده دفعتى ..وشقيقتها عائشه
ابوها دنقلاوى وامها جنوبيه امراة فاضله اسمها زهرة..
لهم التحايا اين ماكانوا..وبالظبط لى اربعين سنه منذ فارقتهم
لكن اسماؤهم واشكالهم لايمكن ان اخطئها ابدا،،،
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
أولاً يا الأزهرى2 بشكرك على الهدية (بتحفظ!)...
تعرف انا نتحفظ ليه؟
لانو مرحلة منافسات ملكة الجمال لسه بعيد خالص ما حصلناه... مش لانو بناتنا ما قدر الحدث ولكن لانو لكل مرحلة متطلبات!!!
عموماً شكراً على الإهداء.
ثانياً مالك جايب العجوز الإسمو صديق الموج ده هنا ياخ!!! ده خليو بعيد من هنا هسع يجيك يقول داير يعرس هو بدال يكون ليك وكيل
ثالثاً الستارة ليك شنو فى الإختيار هسع الزولة الأول الواقفة من الشمال دى مالها... مالها... مالها وللا عندك مشكلة مع المواصفات والمقاييس وللا ادوك الخبر بإنو البنات الطوال مهرهن كتيييييييييير؟ وللا إنت زول مس كول (قصير)
لسه يا عمك ما بدينا!
شول اشوانق
________________________________________________
حاسى بى ريحة دردقة فى البوست ده ما عارف ليه!!!!!
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: شول اشوانق دينق)
|
العزيز شول
أولاً بالتبادي شكراً على قبول الهدية .
تاني شئ عمنا صديق الموج دا واسطة كبيرة عند أهلنا الجنوبيين وبحبهم وبحبوه . أنا زاتي بحب أهلنا الجنوبيين جداً ومن زمان كنت بتمنى أتعرف على أخ وصديق من الجنوب . وإن شاء الله حوش ريسنا بكري يحقق هذه الأمنية .
صديق الموج قبل يكون وكيل العريس لكن في نفس البوست رمى كلام كدا إنو هو نفسه بجهز للعرس ويامان السمحات في الصورة كتار يعني ماحايشكل لينا منافسة أو يعمل لينا ضيق 
بعدين أصلاً هو ماعندو أي مجال للمنافسة(العجوز لايستطيع الصمود في منافسة أمام الشباب ) خصة في مسألة العرس دي  .
أها نرجع لي بنوتنا السمحات الفي صورة إنتا قلتا أول واحدة واقفة في شمال الصورة صاح ؟
يامان انا بحب الحاجات الصغيرة صغيرة مابحب الطوال والسمان وأهلنا قالوا الدهب بقطعوه صغار
نرجع لي موضوع الدردقة
علي الطلاق مافي أي دردقة (أنا زول متفائل إني حااعرس قريب عشان كدا بحلف بالطلاق)
كدي بس إنتا همتك معانا وورينا المية وخمسين بقرة بي كم دولار وفي إمكانية لتنقيص العدد؟ ياخي عندنا حديث بقول (أقلهن مهراً أكثرهن بركة) .
تحياتي وتقديري لشخصك الكريم .
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: مثيانق شريلو)
|
العزيز مثيانق ود السلاطين
شكراً ليك على قبول الهدية والمرور الكريم .
ياحبيب دايرين واسطتكم في تخفيض المية وخمسين بقرة دي .
أخوك الأزهري عزابي مغترب قروشه كلها شايلنها ناس الحكومة أقساط جامعات .
إنتا زول ود شيوخ في الجنوب وأي وساطة منك مقبولة وأكيد أهل البنية لو هي وافقت مابردوا ليك كلمة.
بعدين البوست دا هدية ليكم كلكم يعني إنتا زاتك وشول لو ماعندكم خطيبة أو قيرل فريند ممكن الصورة دي تخدمك في إختيار عروس .
تحياتي وتقديري لشخصك الكريم .
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: amir jabir)
|
العزيز أمير جابر
مادام إخترتا الفي نص ماعندك أي مشكلة معاي
المشكلة كان بتحصل والعكاكيز بتتضارب لو عينك زاغت ومشيت على الإتكلم فيها اخوك الأزهري .
بعدين زي ماقلتا الحكاية مامحتاجة بوليس ولا مدافرة الحكاية فيها مهر وبقر بالمئات يامان يعني مابقرب الا الجيبه مليان والفلس طاقي الناس عشان كدا بعاينو من بعيد ويتحسروا بس .
بعدين تعال وينك في بوست المطعم ؟ من ديك وعيك ماشفناك تاني ؟ يعني بس تجي يوم الإفتتاح عشان الاكل مجان على سبيل الدعاية وبعدها تزوغ وما تجي ؟
خلينا كدا يا امير نشحتف روحكم بالجمال السوداني والأكل السوداني .
هسع بعد دا يا أمير خوفي البنية السمحة دي تطلع مخطوبة 
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
Quote: أها نرجع لي موضوعنا الأساسي : شوف يا أستاذ صديق مادام قبلت منصب الخير دا (وكيل العريس) كمل جميلك وقول لي المهر دا يساوي كم بالدولار .
البنية سمحة وتساهل وزنها دهب (من حسن حظي إني بفضل الجمال الرشيق) ومابحب الجمال حق سيجمان ماركة محل ماتمد إيدك تحمد سيدك .
بس كان المهر طلع مبلغ جامد بالدولار مابقدر عليه في ظل ظروفي الحالية . وربنا يديك العافية إنت بي واسطتك بقى 250 بقرة وجاء كمان جورج بيونغ ماقصر و نقص لينا مية بقرة . بس شوفوا لينا المية وخمسين بقرة ديل بطلعوا بي كم .
شول دا زول طيب مابزيد علينا الخوف يجي دينق ويقول المهر قيمته تكون بي بقر تكساس مابقر الجنوب يكون عوقني تعويقة كعبة جداً . |
ما تقول لى من قبيل!!! إنت قفلت على واحدة جنوبية وعايز تعرف الإجراءات وكده!
قبضتك وللا لا؟
شول اشوانق
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: شول اشوانق دينق)
|
سلام جاك يامونج الازهرى نمره اتنين
كروروك كروروك وبعرسو بالعروك
حسى حسى ياامه العريس ووزعى الببسى-الببسى المحلى-بس قريش ماتجينه وتعمل لينا حركات وانحنا فى يوم البركات
سيرو سيرو ازهرى العريس الليله سيرو
بيت ضره بيت ضره انشا الله رجال مره-الفنانه الاصيله فاطمه الجعلى- فى ناس قالوا نبره ونستبره وغبلنا وبعد الشر علينا؟
طقطق طقطق ايوو يوو ياعديله يابيضا ياملايكه سيرى معه ازهرى العريس يالله يتم ليه،شب ترب سحبو منى والله كب كرب طيرو منى.
مبروك ياجااال-يازول- وبيت مال وعيال ويسمعا بنات نيكانق حرم وعلى بطلاق-ابغض الحلويات- خروف السمايه على وعاد طهور ماعندنا.
ولى معلوميتك فى بعض القبائل عندنا العرس عندهم مابهين واللين واول حاجه بدقوك وماعشان حاجه عبيطه لكن،عشان تكون عبره ودرس تكون متزكرو كويس لو يوم درته تقل ادبك على بتهم.
مره فى الجريف شرق شفنا ليك يوكس مليان ملكيه و عساكر سجون وجيش وبوليس وتوش دخلو واحد من البيوت ووقعوا ليك كسر من طرف فى ناس البيت وقاموا الجيران ضربوا لناس البوليس على اساسه انوا فى كاسورى وجات اتنين عربه بوليس كندوره وخشوا جوه البيت الفيو الشكله وهناك كانت الصدمه لمالقوا انوا معظمهم عساكر ولابسين كاكى ومشه الشاويش وقال ليهم انتباه ياعساكر وكيف انتو تعملوا شكله وانتو لابيسين كاكى؟فقالوا ليهو يازول هووى مافى اى شكله ولا اى حاجه بس الناس الفى البيت ديل عندهم ولد عازو يعرس مننا وانحننا جينه عشان نوريهم انو بتنا عندها اخوان رجال مستعدين ياكلوا النار لو يوم ولدهم عمل حقارات على بتننا وهسه انتو كلكم اعملوا انصراف من هنا وشغلنا دا جزء من العادات والتقاليد ما شغب والخلف دور .
وفى قبيله تانيه برضبو بخلوك تجى تتقدم لبتهم وبعدين اولادهم بيمشوا ليبدوا ليك بره لمن تمرق من بيت ناس العروس وهناك بكسروك لمن تان وتشوف النجوم بالنهار وبرضوا عشان تعامل بتهم باحترام وتقدير.
وزى ماقال ليك صديق الموج احيانا بدفعوك بقر جامد-كتير- وممكن يقبلوا بالمعقول- يعنى عندهم مقدر زروفك- وكدا،ومساله انو تدفع بقر كتير واحيانا يصل الميه وخسين دى لانو انحنا ناس بقولوا علينا فقهاء القانون السودانى المخضرمين جزامه الله الف خير ناس كريم المعتقدات-صحى يا الازهرى نمره اتنين بتعرف معنى مفرده كريم المعتقدات؟؟المهم مره جاوبته على السؤال دا لطلاب جامعه الاسلاميه امدرمان ماوكتوهسه.طبعا انت عارف فى بعض المناطق فى السودان مافى قانون مكتوب ومعظمه قانون طبيعى-وخليك طبيعى ياحبه- فبتجى قدام جراكين القبيله وتقسم امامهم انك حدتفع المهر المطلوب من الابقار وكان قالوا عايزين ميه وخمسين ممكن تقول عندك عشره وعبد الباقى-الباقى ميه واربعين-بتكون معلقه فى رقبتك ليوم الدين ودا كلوا بس عشان يمنعوا حالات الطلاق من غير مبرر فى اغلب الاحيان.اها لو قلت ليها على بالطلاق طلقانه طلاق تلاته-حتى ولو بطريقه ناس سوق سعد قشره والعربى- والجماعه بجوك بقولوا ليك الحساب ولد.
وفى قبيله برضو لمن تجى تعرس بيتهم بعزمك يوم عندهم وبتكون فى قطيه خاصه ليك ويجيبو البت تقعد معاك يومين تلاته للتعارف والبت بتكون ممسحه بنوع معين من الزيت ومامسموح ليك تلمس البت طيلت المده القاعد فيها واياك واياك ان تلمس البت وكان لمسته البت حق راه طوالى بيتم نفيك من البلد واحسن محله تقضى فيهو فترتك الانتقاليه-الدنيا- الخرتوم لانك رجل من غير اخلاق والمقصود من الفكره القدره على التحمل والصبر وانو انك زول صبور والبت ممكن تعيش معاك كزوجه وهى بالها رايق ومرتاح-وشول ممكن يوريكم اكتر فى الحته دى وعن بعض التقاليد.
وبعدين شايفك قلته انحنا مابنعرف حاجه عن الجنوب والجنوبين ماعرفين حاجه عن الشمال ؟واقوليك كلام لو فى ناس عارفين السودان دا حته حته وزقاق زقاق ديل بيكونوا الجنوبين ويوم تانى نتكلم فى الموضوع دا واتحدى اول ناس الكانوا صحبانى وقعدين معى فى حته واحده وبالسنين انوا بعرفوا حاجه عن الجنوبين ومره فى واحد دكتور كان بكتب معانه فى جريده الصحافى الدولى الزول دا يوما مقالاتو عن الجنوب والجنوبين فيوم جى قعد جمبى وقنب ينضم عن الجنوب وقلت ليهو يادكتور انت شفت الجنوب قال ابدا والله وطيب يوم صاحبته ليك جنوبى فى حياتك قال لا ابدا والله،اها يابو الزهور-وسط الزهور متصور- جنس الناس الزى الدكتور دا كتار والله الواحد ماعارف الناس بقوا دكاتره كيف؟
وابشر ياعريس لانو بوستيك دا بوست بتاع زول يوميا بروح سوق الدخوليه-دا اكبر سوق فى ملكال- عشان حصيره النوم وسعد قشره للشيله وعمارتو ناصيه.
وعندى ليك حبه كلام فى الخستكات فى اليومين الجايت ماتقول ناسيك لانو كلامك هناك فى الخستكات جميل وداير ليهو كنش تمام للفرك واللبيك فرك دقاق من غير عطرون وباكنبودر,
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: محسن طه)
|
Quote: ولى معلوميتك فى بعض القبائل عندنا العرس عندهم مابهين واللين واول حاجه بدقوك وماعشان حاجه عبيطه لكن،عشان تكون عبره ودرس تكون متزكرو كويس لو يوم درته تقل ادبك على بتهم.
....
......
وفى قبيله تانيه برضبو بخلوك تجى تتقدم لبتهم وبعدين اولادهم بيمشوا ليبدوا ليك بره لمن تمرق من بيت ناس العروس وهناك بكسروك لمن تان وتشوف النجوم بالنهار وبرضوا عشان تعامل بتهم باحترام وتقدير. |
دا الشغل..
اهو ديل الاهل ولا بلاش ...
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
| Quote: وشول ممكن يوريكم اكتر فى الحته دى وعن بعض التقاليد. |
الأزهرى2 حقو تشكر محسن ده لانو مرقك... تعرف ليه؟ لانو مرقك من زنقة كلب فى طاحونة
هسع لو ما هو اصلو ما كنت هاشرح ليك الزواج فى الدينكا... لكن لازمك ترفع البوست ده وتصب عشان أجيك... كويس؟
محسن!!! أحيييييييى انا منك! مالك يا الاخو كان تخليو شوية... إلأ مافى مشكلة.
بس أجيك!
شول اشوانق
________________________
الأزهرى2 بس محسن معانا فى البورد ده
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
Quote: ولى معلوميتك فى بعض القبائل عندنا العرس عندهم مابهين واللين واول حاجه بدقوك وماعشان حاجه عبيطه لكن،عشان تكون عبره ودرس تكون متزكرو كويس لو يوم درته تقل ادبك على بتهم.
مره فى الجريف شرق شفنا ليك يوكس مليان ملكيه و عساكر سجون وجيش وبوليس وتوش دخلو واحد من البيوت ووقعوا ليك كسر من طرف فى ناس البيت وقاموا الجيران ضربوا لناس البوليس على اساسه انوا فى كاسورى وجات اتنين عربه بوليس كندوره وخشوا جوه البيت الفيو الشكله وهناك كانت الصدمه لمالقوا انوا معظمهم عساكر ولابسين كاكى ومشه الشاويش وقال ليهم انتباه ياعساكر وكيف انتو تعملوا شكله وانتو لابيسين كاكى؟فقالوا ليهو يازول هووى مافى اى شكله ولا اى حاجه بس الناس الفى البيت ديل عندهم ولد عازو يعرس مننا وانحننا جينه عشان نوريهم انو بتنا عندها اخوان رجال مستعدين ياكلوا النار لو يوم ولدهم عمل حقارات على بتننا وهسه انتو كلكم اعملوا انصراف من هنا وشغلنا دا جزء من العادات والتقاليد ما شغب والخلف دور .
وفى قبيله تانيه برضبو بخلوك تجى تتقدم لبتهم وبعدين اولادهم بيمشوا ليبدوا ليك بره لمن تمرق من بيت ناس العروس وهناك بكسروك لمن تان وتشوف النجوم بالنهار وبرضوا عشان تعامل بتهم باحترام وتقدير.
|
اه يا شباب بتقدروا على كدا ولا بكا ساى فى هذا الجمال الابنوسى البقر هين الله يمرقكم من الكسر دا
يا محسن يا اخوى مالك مطفش الوليدات ؟
انتصار
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: انتصار محمد صالخ بشير)
|
ازيك يانتصار
سلام بتاعك يا يابنيه بتاع مامه تاى-ازيك يابت امى-على قول حبوبه ست النفر
قلت لى مالك مطفش الشباب؟ مافى اى طفيش بس فى طقيش
وبنات الابنوس ديل لازم نحميهم من بكاسى السيره الاتجاه واحد
ولو كان بص السيره مكتوب فيه جبل ام على وقوقريال وبالعكس كان ممكن نقول عادى زى الزبادى
ود قرف صحبى قال لوارى العديله وزين والحنه والضريره البتمشى غابات الابنوس بتمشى تقطع شجر الابنوس
وشبها بعمليه (النفى البيولوجى)ودا كلام بجيب الكلام
فكيف بيكون الكلام لمن فرقه المشاه الابونسيه تجى جبل ام على وتقول دايره تقطع شجره التمر هندى؟
واخير الابنوسيات عندهم ناس بدقو وبكسرو بس عشان الابنوسيات يكنن محترمات فى بيتهم وبعداك بفكوهم وغابات الابنوس-غابه الابنوس عيونك يابنيه من خبز الفنادق غابه الابنوس عيونك-ماعندها شروط تلاته(مالها،جمالها،نسبها) وان لم تجد فاظفر بزات الدين تربه يداك والشرط الاخير دا غرضى عليهو شديد بنجيهو مره تانيه لانو فيهو ورطه تاريخيه من ناس معزتنا المبنريد غيرهم ورحلوا خلونا ياحليلهم-عرفتيهم ديل ناس منو؟-وهسه عندنا الخريف اللوارى لازم تقيف.
فى سؤال غابات الابنوس عيونك دى تجى لشجر التمرهندى من غير الشروط التلاته الفوق والرابع القون الزهبى الاخير؟وهل القون الازهبى يكفى وحده؟هووى انتى تار يا انتصار انحنا كنا بنسك الاكياس-الكيس-فى الخرتوم بالليل اقعدى زقردى لشبان كويس.
صعب صعب ياعلى والابنوس صعب ياعلى
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: محسن طه)
|
عوووووك
يا جنا ها ...
العريس دا وينو ..؟
بتين نفضت الحنة يا ازهري نمرة اتنين وقمت للجري...؟
العرس دا ما يادوبك بدا، انا قلت لك متبرع بي خروف السماية، اهاهسي متبرع ليك بالفنان كمان ، وحانمشي للمك يتبرع ليك بي كم بقرات كدا والحفلة حتكون بي كاظم الساهر ويقام الحفل بي نادي ناصر الثقافي العربي بالخرطوم، ولا توجد مواصلات بعد العرض لانو مفروض كل واحد عندو عربية في البلد الخلت الالمان زاتهم البعملوا العربات يستغربوا في كمية العربات الفي البلد.
ولانو طبعا العريس زول مثقف ،نوجه دعوة خاصة للشاعر محمود درويش في ليلة شعرية خاصة قصيدتهو اللذيذة - الأرض تُورث كاللغة - وتقام الليلة بالمركز العربي الثقافي الليبي بي الخرطوم اتنين حي الزهور ولا كيف ...اها قصرنا معاك يا ابو الزهور، ودا كلوا علي حسابنا، والبث حيكون مباشر بكل القنوات من تلفزيون وراديو امدرمان العربي القومي ، ويشرف الحفل قيادات ورجالات المجتمع المدني زي ناس علي محمود حسنين ورباح الصادق المهدي، والمحامي عازي سليمان (من ابناء جبل ام علي) وحسن الترابي، وشيخ الهدية،وتاني منو ...؟ايوووه وكنبة احتياطي للمحامي ابيل الير، د.توبي مادوت، ود.لام أكول.
ويقدم الحفل الاستاذ المخضرم محسن طه مدير ومؤسس مركز الخستكة ودراسات حقوق ناس الواطة والعبيد، وسيكون المشرف العام علي الحفل الأستاذ كبر مدير فرع مركز الخستكة ودراسات حقوق ناس الواطة والعبيد بغرب كندا...
المهم ندعو الجميع لهذا الحفل الحيكون تاريخي والحيكون بمثابة الاستقلال التاريخي لجمهورية السودان وسيقوم برفع العلم بعد نهاية الحفل العريس الازهري نمرة اتنين ..
خليكم جاهزين ياجماعة...
وانت يا ازهري اجمع هنا... وبطل الزوغان بي هنا وبهناك، الموضوع دا (من الأهمية بمكان) حسب تعبير اصحابي المثقفين جدا،
------------------------------------------------
بالمناسبة البوست دا انا حا اجي ارفعوا ليك كل يوم، لانو دا اللواك- الزريبة- الحا نحسم فيهو كل القضايا في السودان المسالة ما مسالة المرغني يكون الرئيس والصادق رئيس الوزراء ونقد زعيم المعارضة...
عشان كدا خليك مصحصح يا ابو الزهور ... عشان نديك صورة وسط الزهور ، والزهور دي هي البوست دا، والصورة حتكون هنا
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: محسن طه)
|
العزيز محسن طه
أولاً أسف على التأخير كنت مشغول باجراءات سفر
تانياً الشكر الجزيل لل الأحبة الذين شرفونا في هذا البوست الجميل.
محسن ياخي عندي إحساس إنو قصتك عن عادات الدق والكسر النضيف دا كلو حركات منك ساي عشان تخوفنا وتخلينا نصرف نظر عن الغتجاه جنوباً نحو الجمال الجنوبي .
ياخي معقول يامحسن الزول يجي عند الناس عشان يعرس منهم يدقوه؟
يازول كسر ودق ما معانا كلو كلو .
بعدين ياخي نحنا ناس بنؤمن غنو النساء ما اكرمهن إلا كريم ولا أهانهن إلا لئيم واخوك الأزهري دا ود عمد وشيوخ زيك كدا تمام يعني بنكرم بت الناس ونشيلها فوق راسنا .
يامحسن ياخي في زول بدق ليه مرة وكمان زوجته؟
زي ماقلتا ليك دي حركات منك ساكت عشان جنى مندكورو مايجي يضايقكم في جكس الجنوب
كدي بس قولو لينا المهر كم بعد الواسطة حقتك وحقت صديق الموج وحقت جوك بيونق . شول الغتيت دا ماداير واسطته .
ياخي شوف كل قبائل الجنوب أكرم وأنعم بها لكن إن شاء الله بس العروس العيني وقعت عليها دي تكون من الدينكا . أنا معجب جداً بالدينكا ديل ناس نسب وحسب وقبيلة عظيمة .
كمان قالوا الزاندي سمحين شديد لكن ماحصل شفت لي زاندية .
بعدين يامحسن طه القال ليك منو أنا بحب ناس كاظم الساهر ؟
يازول أنا زهجت من الإتجاه شمالاً وداير أتجه جنوباً (بقت علي حالة القذافي) نفض يده وتوبه من العرب وجامعتهم وعمرو موسى و(إتجه للولايات المتحدة الأفريقية) .
لو حصل العرس دايرنو يكون افريقي خالص يعني ممكن يكون في النادي النوبي والفنان من الجنوب ولا من الحلفاويين النوبة .
Quote: وبعدين شايفك قلته انحنا مابنعرف حاجه عن الجنوب والجنوبين ماعرفين حاجه عن الشمال ؟واقوليك كلام لو فى ناس عارفين السودان دا حته حته وزقاق زقاق ديل بيكونوا الجنوبين ويوم تانى نتكلم فى الموضوع دا واتحدى اول ناس الكانوا صحبانى وقعدين معى فى حته واحده وبالسنين انوا بعرفوا حاجه عن الجنوبين ومره فى واحد دكتور كان بكتب معانه فى جريده الصحافى الدولى الزول دا يوما مقالاتو عن الجنوب والجنوبين فيوم جى قعد جمبى وقنب ينضم عن الجنوب وقلت ليهو يادكتور انت شفت الجنوب قال ابدا والله وطيب يوم صاحبته ليك جنوبى فى حياتك قال لا ابدا والله،اها يابو الزهور-وسط الزهور متصور- جنس الناس الزى الدكتور دا كتار والله الواحد ماعارف الناس بقوا دكاتره كيف؟
|
أكيد أهلنا الجنوبيين بيكونوا بعرفوا الشمال وعادات الشمال أكتر من معرفة الشماليين بالجنوب وعادات الجنوبيين واعتقد السبب هو الهجرة الكثيفة نحو الشمال بسبب الحرب وكمان بسبب إنوا العاصمة والمركز في الشمال .
إن شاء الله يامحسن المشاكل دي كلها تنتهي بالإستقرار والتنمية والسلام لكن الحاجات دي محتاجة لجهود كبيرة جداً من الطرفين.
تخريمة يامحسن طه : شيخ الهدية مات الله يرحمه داير تجيبه لينا كيف دا ؟ إلا كان يبقى شيخ الهدية (زومبي) أو دفنوه في (ترب البنية) أتحدى شول الغتيت يعرف ترب (البنية ) دي شنو
Quote: المهم ندعو الجميع لهذا الحفل الحيكون تاريخي والحيكون بمثابة الاستقلال التاريخي لجمهورية السودان وسيقوم برفع العلم بعد نهاية الحفل العريس الازهري نمرة اتنين ..
|
محسن طه الكلام الفي الإقتباس الفوق دا كلام مهم جداً وواعي جداً (نتكلم شوية زي الزملاء والزميلات المثقفين) .
الكلام دا يامحسن فعلاً ممكن يكون من أهم أسباب الوحدة والترابط الإجتماعي الدافع نحو الوحدة والسلام والتنمية .
تحياتي وتقديري
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: صديق الموج)
|
أستاذنا صديق الموج
Quote: د.توبى ده صديق للعائله تصدق يا الازهرى د.توبى ده اتزوج ب 350 بقرة.
تجى تقول 150 بقرة كتير.. |
ياخي دكتور توبي دا بكون مقرش ومابتفرق معاه ال350 بقرة . وانا عزابي مشرد مفلس (الحمد لله على كل حال) .
ياخي البت الكلمتك عليها دي سمحة جداً وكيوت زي مابقولوا ولو الجيب ملان والله تساهل بقر اوله في كريمة ومروي وآخره في جوبا وملكال لكن العين بصيرة واليد قصيرة .
إنتا بس أعمل فينا خير وقول لينا 150 بقرة بي كم دولار عشان نشوف وضعنا وكدا . وكمان كان قدرت مع محسن طه وباقي الحبايب تنقصوا شوية يكون شغلكم نضيف أهم شي شول الغتيت دا ماتدخلوا واسطة
ودينق ماتكلموا كلو كلو لأنو الأيامات دي سمه فاير مع ناس حزب الامة وبجي شايت ضفاري وهسع بدخل لينا بي نظرية تبوظ الشغلة كلها .
نرجع لي موضوع محسن طه
Quote: بعدين محسن طه ده ما تسمع كلامه بضيعك...
وبخوف فيك لانو عايز نفس البنت الانت كلمتنى بيه |
أنا برضو حسيت بي كدا وشميت ريحة نظرية مؤامرة (شفت وصف الدق والكسر كيف) ؟ والله لمن إتخيلت نفسي مربط بي شاش ومجبص ومافيني ضلعة سليمة .
الزول دا ود شيوخ وعمد وشكلوا داير الجكس الفي الصورة كلهن الواقفات والقاعدات مثنى وثلاث ورباع وخماس وسداس (زواج دائم وزواج عرفي وزواج منقطع)
بعدين بيني وبينك محسن طه دا شكلوا عاوز يطفشنا و ماداير مندكورو يقبل جنوب لأنو عارف كان قبلنا على الجمال الجنوبي بنعمل ليه ضيق مع الجكس وكدا .
ياصديق الموج ياخي أنا بس داير تشوفوا لي موضوع البنية الفي شمال الصورة أول واحدة قاعدة وإن شاء الله تطلع من الدينكا .
طبعاً أكرم وأنعم بقبايل جنوبنا كلهم بس انا داير أناسب الدينكا الناس ديل حسب ونسب وعز وسلطة وكمان واسطة عند النائب الاول يبقى نسيبنا ويدينا قطعة أرض درجة اولى في نيوسايت ولا جوبا .
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
اسمع يا جالدونق
صديق الموج...
تعال هنا شنو الموج اصلو ماجابك لينا، رغم انو الموج الطرورة بجيبها، ولا دي موج بتاع شواطئ (البحر الابيض المتوسط محل البنات والصيف)و (الراقصة والسياسي).
والله قربت اجيك في خستكة مصطفي سري، حقت صديق الموج ما برحب الا بالحاجات اللطيفة وقول يا لطيف اربعة رغيف...
بعدين قلت لي شنو ، عايز اضيع العريس الازهري ياخ دا ما زهرة الروض الظليل، لكن الصحراويين ديل ما لازم نوضح ليهم الصورة، لانو هم بحبوا العربدة في غابات الابنوس، لكن الجيل البان جديد دا ، قرر انو نعمل ليهم السيرة بي المكسر والدخان، ومتبرعين ليهم بي كاظم الساهر ودرويش والحفلات في المركز الليبي ونادي ناصر وكمان زيد نسيتها دا قبيل المركز الفلسطيني بالطائف ، قصرنامعاهم اها دا كلوا عشان نحفظ لقريش حقوقها الثقافية...
بعدين يكون في علمك يا اخوي انا من العايلة المالكة يعني من بيت المك زاتو ما من البلاليين - بلال الحبشي - بتاعين الشلك ، تكون انت في الثانوي تلاقي المدام رسلوها ليك ودفعوا اي حاجة
يلا يا جماعة النقدة النقدة صفقوا،
ايه رايك يا صديق في المشهد دا بالله
( دخان حايم والوان زي بتاعت الديسكو، وشباين بشتتوا الورد وماشين قدام العروس، ناس رابطيم نصهم برباط كبير احمر - ما عارف ليه دايما احمر- وبدقوا علي الدفوف وينططوا حول العروسة والعريس - الازهري طبعا-، ويغنوا اتمخطري يا حلوة يازينةالخ الاغنية، العروسة والعريس يخشوا نص الخيمة وبعدين يدور الاسلو - ماريا كيري - بعدين بتاع التصوير يجيب ليك الناس القاعدين ناس حبوبة كتوشة، ست النفر متمحنين علي الحداثة الجات دي، بعد ماكانو بغنوا ليهم السمحة ام شلوخ بقوا يقولوا ليهم ياجميل ياسادة اها لمن وصلوا مرحلة الزفة، ومنعت ست النفر وحاجة كتوشة منعا باتا انهم يعملوا جوطة ويدقوا دلوكة في اثناء الزفة عشان ما يبوظ الدخان العاملنوا والديكور بتاع الزفة ، ) اها شفت كيف قصرنا مع اي زول هنا ...
ملحوظة :
في مشاهد تاني للناس القيافة الحبوا الزفات اللبنانية والسورية...
اها بعد دا نجاشول ممكن نعمل ليها حداثة نسميها نجاكوستي ولا نجاجبل ام علي ...
ابشرا
تقوم بينا العربية
تودينا للسادة
العربية القيافة ...
والناس اللطافة ...
تقوم بينا كب تقع بينا رب
تودينا للسادة...
والنبق والنحل
-------- وفي برضوا غنيتنا الدكاكينية تحت تحت بعد التحريف للعريس واصحابهم القريبييييييين خالص ، وخالص دي مهمة خالص في الحتة دا
ويا نجاكوستي - سلوي للبحبوا اسم سلوي-
انا قلبي شن سوا
وقالوا الريد بالقوة
وترررررا ورا
ياصديق الموج ...
اها انت راكب في ياتو بس سيرة فيهم ، الجاية ولا الماشة...
مع العريس ولا مع الخيانة المشوكشين ....؟
والسؤال دا مهم ياجالدونق ...عشان توبي مادوت صاحبك ودا
ودا نظام شيباك جيناسن...
واناجااااااهز من الصباح بالدرقة والكوكاب ولابس اللاوووالعسلية والقامزوت والمورو والابيض واي حاجة تانية ما حامياني اصلوا والمستورد في التصبينة ودا للضيوف الاعزاء.
اها يا جالدونق نازل معاي النقارة ولا قاعد فوق...؟؟!!
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: JOK BIONG)
|
Quote: 150بقرة موش من لون واحد ..نحن دايرين كل الوان
مجوك ومكير الخ.وما دايرين بقرة بوونج دا جور.. |
شفتا كيف ياصديق الموج !!
أنا ماقلنا ليك من قبيل أنا خايف من كلمة (كمقدمة) الكتبها جوك في أول مشاركة ليه .
ياجوك بس إنتو نقصوا عدد البقر وأنا أجيبو ليك كوكتيل كا داير بقرة لون زينب زاتو ندبرها ليك .
ياخي جوك دا ذكرني قصة بقرة بني إسرائيل .
هسع يجي بعد شرط الألوان دا يقول داير البقر كل واحدة بتتكلم لغة وكمان يكون جدهن الأول هولندي وحبوبتن الخامسة نيوزلندية لغاية مايطفشنا .
الزول دا قاعد يتلكك لينا ياصديق .
المهم إنتو نقصوا البقر وإحنا بنتصرف في قصة الألوان دي .
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: محسن طه)
|
محسن طه
| Quote: ويغنوا اتمخطري يا حلوة يازينةالخ الاغنية، |
الأغنية دي لي أنا ولا للعروس؟
ياخي الإسم دا ما حلو حسسني بي جفاف كدا وعطش وكمية من الكتاحة أخير منو مندكورو .
أنا من مدرسة الغابة والصحراء جناح الغابة
بعدين يا محسن أنا ما من أنصار الحداثة (مع إستثناء مهر البقر دا أنامامعاهو ومع الحداثة)
أنا داير عرس يكون مشرفين عليه إشراف تام الحبوبات والسوبر فايزر حقتهم حبوبة كتوشة.
يامحسن أهم من دا كله : باقي ليك البنية السمحة دي بتكون لحدي هسع ما مرتبطة؟
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
Quote: ولو كان بص السيره مكتوب فيه جبل ام على وقوقريال وبالعكس كان ممكن نقول عادى زى الزبادى
|
دبايوا محسن سلام بتاع شرق
شنو البمنع يا محسن يا اخوى يكون البصات السيرة من وبالعكس الابنوسات الجميلات ديل اكيد من ذاك الجمال
الموجود فيكم انتم رجال الجنوب نحن الخرب بينا شنو غير اشياء لا وجود لها كان الغرض منها ان تكون انت فى جنوبك ونحن فى شمالنا
اعقد النية وفى النهاية الجنوب يكسب وانا متاكدة وواثقة.
انتصار
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: انتصار محمد صالخ بشير)
|
| Quote: إهداء لشول أشوانق دينق ومثيانق شريلو وصديق الموج ومحسن طه ودوت مجاك ولكل عشاق الجمال في شمال السودان وجنوبه. |
| Quote: ربنا يوحد شملنا في دولة مؤسسات ديمقراطية وننعم بالسلام والخير جميعاً |
Quote: سؤال تاني للإخوة الزملاء من جنوب السودان والمهتمين بشأن الجنوب والثقافة الجنوبية :
هل هناك تزواج بين القبائل في الجنوب ؟
يعني الدينكا بيزوجوا الشلك أو العكس مثلاً أو فيما بينهم والنوير والزنادي وغيرها من القبائل ؟ |
Quote: اخوانا فى الجنوب ديل متسامحين جدا..ومافى قولة خير..
يعنى لو انت زول كويس والبقر نقص شويه ما بتوقفوا معاك وبزوجوك.
لكن بشرط تتم البقر ده فى المستقبل.. |
Quote: على فكرة قبل أكتر من 15 سنة قابلت في لندن شاب جنوبي إسمة قاصد خير جوزيف لاقو وأخته شابة جنوبية لطيفة جداً وفي غاية التهذيب إسمها غادة ووالدتهم ميمونة . الله يذكرهم بالخير هو في عمرنا او أكبر بقليل . لكن برضوا ماسمحت الظروف أتعرف عليه أكتر .
من هذا البوست أرسل له التحيةولأسرته الكريمة . |
Quote: عموماً شكراً على الإهداء.
ثانياً مالك جايب العجوز الإسمو صديق الموج ده هنا ياخ!!! ده خليو بعيد من هنا هسع يجيك يقول داير يعرس هو بدال يكون ليك وكيل
ثالثاً الستارة ليك شنو فى الإختيار هسع الزولة الأول الواقفة من الشمال دى مالها... مالها... مالها وللا عندك مشكلة مع المواصفات والمقاييس وللا ادوك الخبر بإنو البنات الطوال مهرهن كتيييييييييير؟ وللا إنت زول مس كول (قصير)
لسه يا عمك ما بدينا!
شول اشوانق |
Quote: ولو مشيت جوه الجنوب هاتفرح كتير بأهل ماقابلتهم في مكانهم..
ناس كريمه بشكل عجيب..وطيبه جدا..
عارف أنا قابلوني في مطار اجيب برقصة الدينكا..ده غير الحتفالات التانيه..
يوم بجيب ليك الصور باذن الله..
سلام للوطن العزيز..وليك.. |
يالجمال النفس البشرية
حينما تتحلي بالعفوية
وتنبذ التعالي والعنصرية
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
Quote: لسه يا عمك ما بدينا!
شول اشوانق
________________________________________________
حاسى بى ريحة دردقة فى البوست ده ما عارف ليه!!!!! |
شول.. جيباك يامان..
دردقة ساكت؟..
غايتو نرجو الجميع القزقزة بالرابط التالي..
http://www.misssouthsudan.com/video.htm
فيهو معلومات مهمة عن المنظمة المسئولة من تنظيم المسابقة ..و شروطها..
بعد داك نجي نشوف عرس اخونا الأزهر تو..
لغاية الحين داك.. عندي سؤالين:
1. ليه "اخوانا الجنوبين".. الإنفصال حصل ولا شنو؟
2.ممكن واحد/ة يوريني منو الدينكاوية.. النويراوية.. الشلكاوية.. الأنواك.. الباريا.. الزاندي.. الجور ..البلندا.. في الصورة الفوق دي؟..و هل لو كانت الصورة لمكلة جمال السودان.. ممكن الناس تعرف الناس من ملامحها ولا؟
بالنسبة للأزهري.. حقو تسأل منو البيشيل بقر المهر؟.. لأنو صديق الموج عارف اللعبة.. رفع السعر..و جوك بيونق كشف نومة الموج.. قام خت سعر من عندو؟..
محسن طه.. النفي البيلوجي شغال قرف يا حبيب..و لمن نجي تاني بنشوف الحاصل شنو..و الموضوع عرس ساكت يا اخوي..
كبر
(مسئول مكتب دراسات الخستكة الإستراتيجي في غرب كندا)
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: Kabar)
|
ألزميل العزيز كبر
شرفتنا ياحبيب .
مشكور على الموقع حفظته مفضلة وماشي عليه .
| Quote: بالنسبة للأزهري.. حقو تسأل منو البيشيل بقر المهر؟.. لأنو صديق الموج عارف اللعبة.. رفع السعر..و جوك بيونق كشف نومة الموج.. قام خت سعر من عندو؟.. |
أشرحو لي دي ياكبر ؟ أخوك الأزهري ماناقش أبو النوم .
| Quote: . ليه "اخوانا الجنوبين".. الإنفصال حصل ولا شنو؟ |
لا عاش من يفصلنا
لكن دي كلمة دارجة بنقولها دائماً أخوانا المحس أخوانا الدناقلة أخوانا الرباطاب وهلم جرا...
| Quote: ممكن واحد/ة يوريني منو الدينكاوية.. النويراوية.. الشلكاوية.. الأنواك.. الباريا.. الزاندي.. الجور ..البلندا.. في الصورة الفوق دي؟..و هل لو كانت الصورة لمكلة جمال السودان.. ممكن الناس تعرف الناس من ملامحها ولا؟ |
السؤال دا نحوله لي محسن طه ؟
تحياتي وتقديري لمرورك الجميل .
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
شوف يا الأزهرى2 يا أخوى
اول حاجة فى العرس عندنا:
- ممكن تعرس من أى قبيلة فى الجنوب (الجنوبيين بيتزاوجوا مع بعضهم).
- ما ممكن تعرس قريبتك من الدرجة التاسعة (جدكم التاسع مشترك)... ده على الأقل عند الدينكا أهلى ... هسع ممكن أهون شوية نقصوهو ممكن الدرجة السابع وممكن السادس كمان (الجماعة ما مبارينكم عاد ).
- زمان ما ممكن تعرس أخت صاحبك الإنت طالع ونازل معاهو وبتاكلو سوا ... هسع برضو الموضوع ده خقت شوية وبرضو الناس مبارينكم شفته كيف
- الدينكاوى لو ختى عينو على واحدة داير يعرسها ومشى ليهم البيت ما بيشرب وللا بياكل فى بيتهم كلو كلو لانو زمان لو اكلت وشربت فى بيت الجماعة بعدين وكت العرس بيكونوليك بمبى (بدفعوك عرامة).
- بدرى الدينكا بيعرسوا بالبقر وهسع الكلام ده قل شوية (ما البقر معظمه إتنهب )... بس الناس الجوا هناك زى ولابة البحيرات لسه شوية متمسكين شديد بالكلام ده بس مع الأيام الكلام ممكن حبه حبه بيختفى.
- زمان الدينكاوى ما بيدهق المهر (عدد الأبقار) براهو كان بيشاركوه اولاد اعمامه وخاله بس هسع مع الظروف الخلى خشم الناس مل ملح ده صعب شديد إنو يشاركوك فى المهر.
- كلام عدم عرس القريبات ده برضو خاشى فيهو بنات عماتك وبنات خالاتك طبعاً.
ده جولة أولى يا عريس وبعد داك نجيك بالكلام الدراب دراب لامن نخلى خشمك ملح ملح ... إنت بس لوك الصبر وما عايزين بعدين زول يغنى لينا الحزن النبيل فى حالة إنو عجز يستوفى الشروط اللازمة للزواج... سمح الكلام يا جماعة.
شول اشوانق
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: شول اشوانق دينق)
|
Quote: - ممكن تعرس من أى قبيلة فى الجنوب (الجنوبيين بيتزاوجوا مع بعضهم).
|
دا كلام جميل جداً ياشول
Quote: ما ممكن تعرس قريبتك من الدرجة التاسعة (جدكم التاسع مشترك)... ده على الأقل عند الدينكا أهلى ... هسع ممكن أهون شوية نقصوهو ممكن الدرجة السابع وممكن السادس كمان (الجماعة ما مبارينكم عاد ).
|
ليه كدا بس َ بالغتو والله ياخي البت لي ود عمها هسع كان البنية السمحة الإخترتها دي كانت بت عمي مابقدر اعرسها؟ دي عوجة كبيرة ياشول ؟
طيب السبب شنو ؟
تعرف في الإسلام في توصية بتجنب زواج الاقارب .
كدي ياشول أشرح لينا سبب التشريع دا ومقصده .
| Quote: زمان ما ممكن تعرس أخت صاحبك الإنت طالع ونازل معاهو وبتاكلو سوا ... هسع برضو الموضوع ده خقت شوية وبرضو الناس مبارينكم شفته كيف |
دي برضو صعبة !!
Quote: الدينكاوى لو ختى عينو على واحدة داير يعرسها ومشى ليهم البيت ما بيشرب وللا بياكل فى بيتهم كلو كلو لانو زمان لو اكلت وشربت فى بيت الجماعة بعدين وكت العرس بيكونوليك بمبى (بدفعوك عرامة).
|
يا شول ياخي أسمح حاجة حماتك تعزمك كوارع ولا حمام محمر ولا شية جمر .
ياخي الحماة بتدلع نسيبها لحدي ما يقع في الشرك بعد داك بتوريه المكشن بلا بصل .
لكن ياخي على الأقل أيام الخطوبة خليه يتفسح ويتدلع في اهل العروس .
بعدين ياخي شكلكم كدا إنتو الإخترعتو بوليس المرور (كمية كدا من الغرامات) حاجة عجيبة.
Quote: زمان الدينكاوى ما بيدهق المهر (عدد الأبقار) براهو كان بيشاركوه اولاد اعمامه وخاله بس هسع مع الظروف الخلى خشم الناس مل ملح ده صعب شديد إنو يشاركوك فى المهر.
|
أهم شي كشف العرس ياشول يعني في النهاية العريس يكون بس دفع حق بقرة واحدة والباقي كله تموهو الأهل والحبان .
مافي عرس بدون كشف وإلا في الحالة دي ناس كتار حالهم بتكشف .
دراب شنو تاني هو فضل فيها دراب بعد (الكسر والكفيت القال عليهم محسن) ولا في ملح أكتر من الكتبو جوك بيونغ القال داير كل بقرة لونها براه ؟
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
Quote: ابو الزهور
سلامات
شوفو لينا المعلقه قلب في اضانه.
بس اجيب ليها بقر من وين |
فيصل يا حبيب وحاتك كده شجعتنى شوف شول اشوانق ده
بتاع مشاكل يعنى انا وانت الى الان مجتمعين عمرنا ما تم مية
سنه يجى يقول للبنات ديل كبار..
بعدين كبار اصلو خرفنا؟؟
اى زول مصيرو يكبر..
شوف محسن طه عب كبير ما تشوف كلامو ده لو مشى معاك هناك
والله الواسطه عندو...
شول اشوانق بكون داير خمسة من البنات ديل عشان كده
بحاول يجهجه الموضوع..
بعدين انت زاتك ما عزلت الا الدايره انا؟
شفت الخاته الحلق القلب فى اضانها دى
من بنات باريا..وانا احب دين باريا زاتو....
انت عارف كل البنات ديل بنات دينكا وشويه باريا وشلك
يعنى مافيهم نوير ولا زاندى ولا فرتيت..
لكن وحاتك البايظ بتاعهم يفتح احى انا..
انا غايتو ما عندى مانع لو الفى اقصى شمال الصورة
اللابسة رداء يكون بخت امى...
بس شوف يطلع منها شول اشوانق وحاتك نعرس عرس
عشان ما يخرب علينا..
محسن العزيز..انت مدعو ما تجيب معاك شول لو سمحت
او قول ليه العرس فى ام طرقا عراض ..
يعنى لما يعرف يصل ام طرقا عراض دى تكون المرة حملت،،،
ودعتكم الله نتلاقى فى الحنه يا شباب،،،
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
Quote: انت عارف كل البنات ديل بنات دينكا وشويه باريا وشلك
يعنى مافيهم نوير ولا زاندى ولا فرتيت.. |
القاليك منو يا عجوز
| Quote: لكن وحاتك البايظ بتاعهم يفتح احى انا.. |
قبضتك يا بتاع الهارت والوست واربعطاشر تانى تنكر؟؟؟
Quote: انا غايتو ما عندى مانع لو الفى اقصى شمال الصورة
اللابسة رداء يكون بخت امى...
بس شوف يطلع منها شول اشوانق وحاتك نعرس عرس
عشان ما يخرب علينا.. |
ده إسمو قفلة يا عجوز ... داير تقفلنى يا عجوز إنت ... بعدك
وانا احب دين باريا زاتو....
جبتا آخرك يا ود الموج... بس خليهو لغاية اضرب ليك ....
______________________
فيصل يا عجوز راجيك امفكو
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: amir jabir)
|
أمير جابر
كنت لابد لي من يوم بوست الغداء والرجلة صاح؟
أها يامان إتسديت حقك وبزيادة كمان .
حرام عليك ياخي هو نحنا ناقصين 
كدا أنا لحدي هسع خطبت تلاتة ومن صورك ديل اخطبوا لي الصورة نمرة تلاتة القبل الأخيرة .
ياخي أنا مغرم بي الناس القيافة الكلهم لطافة وزن الريشة وكالبانة مايلة .
ناس وزن ماكمة يضيق الباب عنها وملء الدرع بهكنة ماركة محل ماتمد إيدك تحمد سيدك ديل ماعندي فيهم كبير غرض . وفي النهاية الكلام الاخلاق
تسلم لمرورك الغياظ
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: almogira alemam)
|
حاجة غريبة جدا ,,,,,,,,,,,,
ليه دائما الناس تربط جمال المرأه بالقدر الذي تبدية من جسدهاو كشف ما امرت ان تستره
و لماذا التعري و السفور هو مقياس الجمال عند البعض
و الله احينا مهما كانت المراه حلوة و جميلة تعافها النفس ان هي سفرت و انعدم عندها الحياء و الخجلة
فجمال المراه في الادب و الحياء
فقد اسعدتني الظروف ان زرت الجنوب و بالتحديد الاستوائية , فرأيت كثير من اخواتنا الجنوبيات قمة في الجمال و الانوثة ، دون اللجوء الي السفور و الابتذال الرخيص الذي لا معني له غير ................
لذا فبنات الجنوب سمحات .. لكن دون هذا التعري المشين و المخجل .... فابالله عليكم هل بعد هذا ترون ان من بين من في الصورة جميلة ,,,,وو و هل فعل من تقدم للزواج سيقبل بواحدة من اي واحدة طلعت في هذه الصور
خليكم صادقين مع انفسكم قبل الغير
ادم العمار
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
Quote: ليه كدا بس َ بالغتو والله ياخي البت لي ود عمها هسع كان البنية السمحة الإخترتها دي كانت بت عمي مابقدر اعرسها؟ دي عوجة كبيرة ياشول ؟
طيب السبب شنو ؟
تعرف في الإسلام في توصية بتجنب زواج الاقارب .
كدي ياشول أشرح لينا سبب التشريع دا ومقصده . |
تعرف يا الأزهرى2 كلام عدم عرس القرايب ده عندنا تقليد قديم جداً وبعدين حقيقة زواج الأقارب مشاكلو كتيرة من محاسنوا على سبيل المثال لا الحصر:
- زواج الأقارب بيقفل الزول مع معرفة أسر تانية ممكن فى معرفتو ليهم ومصاهرتو ليهم يكون فيهو الأفضل.
- المشاكل البتحصل بين اولاد الاعمام فى حالة المنافسة على الفوز بواحد من بنات الأسرة الجمالها قاطع وهناك بيحصل داحس والغبراء
- نظام المبادلة ... ود عمك يعرس أختك وإنت تعرس أختو فيها مساكل إجتماعية وعدم إستقرار أسرى.
- هسع يا الأزهرى ما ممكن تمشى بيت عمك متاخر مثلاً بعد عشرة إلا للشديد القوى وبعدين فى حالة مافى راجل فى البيت ممكن ما تخش بيت عمك زاتو ... شفته مشاكل زواج الأقارب كيف.
طيب يا الأزهرى2 طالما الإسلام وصى بتجنب زواج الأقارب مصرين عليو ليه (عليك الله اهلنا ديل هسع ما علماء بالفطرة كده )
لسه الكلام ما خلص
ش4
_______________________________
المغيرة شيل شيلتك معاى
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: طارق جبريل)
|
الحبيب طارق جبريل
إنتا خاتنك لي وظيفة تانية ومهمة جداً وهي :
تمسك الكشف حق العرس .
طبعاً الكشف حق العرس زي المهر برضو بالبقر يعني برضو طلعت راعي للبقر
الله اداك على قدر نيتك ياحبيب . يعني الوظيفة الكنا خاتنها ليك طلعت ياها زاتها الوظيفة الإنتا دايره
أريتو حظ السرور يا طارق .
بعدين إنتا مامحتاج واسطة من صديق الموج (البكاااااي في بنات الباريا)
عليك الله ياطارق جبريل اطلع فوق شوية بوستات كدا وشوف صديق الموج بكى قدر شنو وكسر تلج لمن عدمنا إسم اللوح .
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: ALazhary2)
|
Quote: حاجة غريبة جدا ,,,,,,,,,,,,
ليه دائما الناس تربط جمال المرأه بالقدر الذي تبدية من جسدهاو كشف ما امرت ان تستره
و لماذا التعري و السفور هو مقياس الجمال عند البعض
و الله احينا مهما كانت المراه حلوة و جميلة تعافها النفس ان هي سفرت و انعدم عندها الحياء و الخجلة
فجمال المراه في الادب و الحياء
فقد اسعدتني الظروف ان زرت الجنوب و بالتحديد الاستوائية , فرأيت كثير من اخواتنا الجنوبيات قمة في الجمال و الانوثة ، دون اللجوء الي السفور و الابتذال الرخيص الذي لا معني له غير ................
لذا فبنات الجنوب سمحات .. لكن دون هذا التعري المشين و المخجل .... فابالله عليكم هل بعد هذا ترون ان من بين من في الصورة جميلة ,,,,وو و هل فعل من تقدم للزواج سيقبل بواحدة من اي واحدة طلعت في هذه الصور
خليكم صادقين مع انفسكم قبل الغير
ادم العمار |
فضيلة الشيخ ادم العمار ..تحياتى
اول شىء انت تاريخ تسجيلك قبل عشرة يوم فقط...واسال احمد العمار لما فتح بوست
الترحيب بيك انا قلت ليه شنو؟؟ضرورى جدا جدا جدا جدا جدا جدا.تسال اخوك.
فما تفتكر يا اخوى نحن اسلمنا فى البورد ده . والله نعرف قدر معرفتك فى الدين دى
خمسمائة مرة،وبعدين ما كل زول يكون مبلغ علمه فى الدين دلائل الخيرات ينصب
نفسه شيخ ومفتى،نحن ملمومين فى البوست ده كما ترى مسلمين ومسيحيين ويمكن معانا
لا دينيين وبنتونس فدحين شيل فتوتك دى افتح بيها بوست بى هناك وبرضو بنجيك وبنوريك العارفنو
شنو والبتذكرنا بيه شنو والكنا جاهلنه شنو،ونقوم نشكرك بتبصيرنا يا الحبيب.
فيا شيخ ادم ما تكون جيت من هناك وتبحت بى درب الباسورد ده عشان تبقى مفتى
بورد والا عايز تكسب حسنات ملح.
كلما تلقى ليك زول تقول ليه ده حرام وده حلال..وبعدين تاخد درجات اضعف الايمان.
تصدق ما حا تقدر تغير اى شى هنا بهذه الطريقه، لان البورد ده سوق كل زول يعرض بضاعته
من الدهب حتى الجردقه ومن عطور باريس حتى الكول والتركين..
ولكل زبائن وكل كاسده لها سوق يوما.
بعدين نصيحة اخيرة قلت ليك لو عاوز تبشر هنا فغير الاليه ارجوك.
جزاك الله خير ..بس ماتنسى حديث الرسول(ص) روحو عن القلوب ساعة بعد ساعة
ان القلوب اذا كلت عميت،،،
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: amir jabir)
|
الاخ صديق الموج السلام عليكم و رحمة الله
اولا اشكرك علي النصائح ,,,,
انا فعلا جديد لنج في هذا البورد .... و كوني جديد ما اظن يمنعني من ابدا اي رأي
طبعا انا اعلم جيدا مدي الحرية المتاحة في هذا البورد ... و ده شي ايجابي و مفيد
و اعلم جيدا ان هناك مسيحيين و لا دينيين و كل ما ذهبت اليه ... و اعلم جيدا ان هناك
من هم مناط بهم القيام بامر الفتاوي و الدعوة الي الله .... هل ما قمت بكتابته يعتبر فتوي ؟
هل انا اسأت لاصحاب الديانات الاخري و الماعندهم ديانة و العلمانيين ؟
انا جيت البورد ده عشان الحرية الفيهو و كنت بعتبرها متاحة للجميع يعني حتي الصور الجابوها
للبنات الكاسيات العاريات و المكشفات ديل ما احتجيتوا عليهم و قلتوا هم احرار نعم هم احرار
طيب اسمحوا لنا بشوية حرية عشان نقول ما في انفسنا دون الاساءة للاخرين و هذا ما وددنا ان نقوله
اما الداير يتزوج ملكة جمال او غيرها فله مطلق الحرية في المفاهيم و المعايير الخاتيها في نفسه
لزوجته المرتقبه ... يعني انت يا اخوي صديق الموج لو جابوا ليك ملكة جمال الكون و انت عارف كيف
هي وصلت لهذه المرتبه و صورها مالية الجرايد الطريقة اياها و الشخت ظاهر للقاصي و الداني
سؤال بريء بالله عليك الله بتتزوجها ؟
| |
|
|
|
|
|
|
|
|
|
Re: مسابقة إختيار ملكة جمال جنوب السودان((توجد صورة)) هدية لشول ومثيانق ولعشاق الجمال (Re: سيف النصر محي الدين محمد أحمد)
|
العزيز سيف النصر
الشخت = الشحم
(حسب علمي)
الأغنية التي أتذكرها هي أغنية :
الشحم دا (والناس يقولو أأأأيا)
واللحم دا (والناس يقولو آآآآآآآآآيا)
ويابهية ( .. آآآآيا)
..الخ .
أنا قصدت أقول لآدم إنو كلمة (شخت) وقعها على السمع شين(تعطيك إحساس بالقرف) سماعياً ماحلوة أخير منها كلمة الشحم وكلاهما يسبب الكلسترول .
في إحتمال كلامي الفوق دا يكون صاح وفي إحتمال مايكون صاح
وفي إحتمال جزء منه يكون صاح وكمان في إحتمال جزء منه يكون غلط
وفي إحتمال الأسد يشوفك وفي إحتمال مايشوفك
لو شافك وأكلك إإإإإإإن شاءءءء الله ماتنفعوا
| |
|
|
|
|
|
|
| |
ALazhary2
انتصار محمد صالخ بشير
صديق الموج
JOK BIONG
BAKTASH
Abdel Aati
Muna Khugali
شول اشوانق دينق
amir jabir
Abd Alla Elhabib
Kabar
فيصل محمد خليل
almogira alemam
خدر
طارق جبريل
Sayed Bekab
ميسرة غاندي
فيس بوك
تويتر
انستقرام
يوتيوب
بنتيريست