azhari ... yur photos are more than beautiful... but you have to refer or mention the source .. those photo was taken by US Embassy staff during mid of 70's ...the person who took the photo was a marines officer in US Embassy -Khartoum .. just refer to his profile in www.flickr.com
05-01-2008, 08:00 AM
ALazhary2 ALazhary2
تاريخ التسجيل: 09-06-2003
مجموع المشاركات: 4966
اولا:- عايزين نثبت معلومة مهمة .. ومبدا.. الخرطوم عاصمة السودان.. الواحد ذلك الزمان. بتاعت الناس كلهم.. حتى الناس العايشةفى العاصمة المثلثة. يعنى العاصمة بحدودها المعروفة.. يعنى ناس الشجرة برة اللعبة دى.. فمابالك بالكلاكلات وهلم جرا. يعنى دة توضيح لابد منو حتى الناس العايشةفى العاصمة المثلثة. برضو كانوا بسالوا بعض.. يا اخوى انت اهلك من ويين..؟ وكان الرد طوالى.. ياخى نحن اولاد برى.. مثلا.. لكن اهلى جوا من الجزيرة. دى تامين ضرورى جدا لمواصلة الحكى ولازم نضرب مثال بسكان الداخليات هؤلاء لهم الحق في المشاركة في هذا الطرح وهذا فهم ايضا لابد منو.. وعلى كدة نفتح الباب على مصراعية لكافة اهل السودان الزمان.. واصر على كلمة الزمان. ليشاركوا فى هذا السفر.
ثانيا:- بعد معاينتى السريعة للصور.. وجدت انها من العاصمة المثلثة وهنالك بعض منها ممكن يكون في امدرمان او بحرى بالرغم من ان الصورة ماخوذة في الخرطوم(معطى). مثال لذلك صورة الثلج والتى سوف ابداء بهاانبراشى وذلك لاسباب كثيرة اذكر منها الاتى:- وليذكرنى الاحباب ان سهيت او نسيت.. فالذكرى في ذلك الزمان كانت ناقوس يدق في عالم النسيان.. ولاانا غلطان ياجماعة الخير. سبق ان اشرت لاننى سابدأ وسيكون مدخلى التلج عشان دخلتى تكون باردة عليك يالازهرى.. فكلنا في الهوى سوا والاسماء شواهد.. ودى كمان اول مرة اتداخل معاك في بوست نسال اللة يجعلها باردة .. كما جاء ذكرة كونى بردا وسلاما على ابن ابراهيم ومدام انت الازهرى فقطع شك انت الذبيح.. وهذا يرجح على انك من مواليد ذالك الزمان.. ونكون بذلك قد فندنا اول البهتان..
Quote: طبعاً في 1976م أخوكم الأزهري كان لسا ما إتعلم المشي
جاييكم للتلج.. وواضح في الصورة ..
انو ده التلج بتاع زمان .. وانو سليم.. وعضمو قوى.. ومامكسر.. يعنى ان اشهد على قولى هذا.. ما فيهو اى تكسير تلج.. لاى حد.. وانو الثلج الواضح فى الصوره دى لوضربوك بية بيوجع. ولربما يفلق.. كما قال الشيال امام القاضي.. يا مولانا مويه كنق ..
والله لو عارف الصور القديمة دي تجيبك لينا كان من زمان فتشت ليها .
أسعدتني زيارتك جداً لأسباب كتيرة
تعرف يا أستاذ فيصل أنا قايل لمن كتبت تاريخ (1976م) إني حا أقشر بي إنو لسا شباب وكدا لكن جا أشرف وخرب علي الحكاية طلعني زول عجوز جداً . هسع من شدة ماجاني شعور إني كبير وعجوز بديت أحس بألام الرطوبة في المفاصل.
الله يملاك عافية بجاه النبي (طه)
ياخي أي حلفاوي بعرفوا إسمه يا طه يا داوود ياخليل
لك الود والتقدير
05-01-2008, 08:08 AM
ALazhary2 ALazhary2
تاريخ التسجيل: 09-06-2003
مجموع المشاركات: 4966
وكانت الخرطوم مليانه اغاريق ويونايين .....كان فى حى اسمه الحى الانجليزى ......وكانت برضو فى اسر من سوريا شوام...وارمن وكانت كتير من الاسر العريقه تسكن مناطق غرب الخرطوم ... وايضا شرقها .....
وبجيك راجعه......بس اسال امى (يطول الله فى عمرها)
اخونا عمار
دى حالتو كده من زماااان .....بس يغتس كم يوم ويمرقلوا بى صور ...........
الصورة الاولي بنسبة 90/ في منطقة الحلة الجديده .. وتحديدا الناحية الغربية المحاذية لسكه العمله ...
الصور الثانية : المركز الثقافي الامريكي سابقا .. في شارع القصر قبل مدخل حافلات الصحافة (السكرية) تم تحويل الي بنك الغرب الاسلامي ..
اجزخانة ناشيونال في شارع الجمورية او الجامعه غير متاكد ولكن العماره فيها الان مكاتب الضرائب في السوق الافرنجي,,,
الصورة الثالثة والرابعة ما عرفتهم وين ,, لكن مصنع الثلج في المنطقة الصناعية , وفي السكه حديد داخل مبنى مصلحة المرطبات شرق كبرى الحرية.
صورة البار ,, صور لبار في فندق من فنادق الخرطوم ,, وغالبا ما يكون بار فندق الشرق , او اكربول ,, لان الفنادق الخمسة نجوم العاملين كان ليهم ذي رسمي (يونفورم) اما انها في فندق ليه لان قزازات الويسكي ناقصة يعنى ببيع بالكاس ,, المحلات الكان بتيبع بالكاس غير الفنادق مطعم الاستقلال , شرق مستشفى الخرطوم ,, وبار الرويال ايضا جواره.. اما البارات فكانت مركزها , السوق العربي جوار صينية القندول , بار الخرطوم الجديده , وباسولا بار وسوق الخرطوم 2 الاماكن الاخرى التى تقدم مشروبات روحية غير البارات مطعم البساتان في الخرطوم وصالة غردون في المقرن جورا جامعة القاهرة الفرع واتني في السوق الافرنجي ,, وشيش كباب (كايرو جلابية) ,,
الصورة الاخيرة ,, الرافع يد باين صناح ده واحد كان زبون دائم في البارات دي وما بعد ما امتلئت بطنه قال الحمد لله ماملئت البطن اللعينة , وقام فرتق الخرطوم بالبارات 1983م
ــــــــــــ
05-02-2008, 00:50 AM
Abureesh Abureesh
تاريخ التسجيل: 09-22-2003
مجموع المشاركات: 30182
I think US Embassy - Aljmhouria Street Near Exclsior Hotel and Al Qasr Street This is where I get my first Visa to US Note: there was no security in the Embassy no blocks.. only one policeman (unarmed)!1
Quote: الصورة الاخيرة ,, الرافع يد باين صناح ده واحد كان زبون دائم في البارات دي وما بعد ما امتلئت بطنه قال الحمد لله ماملئت البطن اللعينة , وقام فرتق الخرطوم بالبارات 1983م
والله الاجمل من البوست دا هو مرورك وكلماتك وشعورك الاخوي الطاغي ومداخلاتك خفيفة الدم والمبهجة .
أنا بسمع ياناهد إنو الخرطوم فعلاً كانت جميلة وبسيطة ونظيفة وفيها جاليات كتيرة لكن جار عليها الزمان .
تعرفي أنا حكيت ليك نكتة أستاذنا المصري حق العربي كان بدرسنا في دولة خليجية وكمان درس في فترة من الفترات في الخرطوم : المهم كان مرة بتكلم عن العواصم العربية وإنو كل عاصمةعربية عندها لقب مثلاً تونس الخضراء , دمشق الفيحاء , ألخ . فقمت أنا بي شلاقتي سألتو قلت ليه طيب الخرطوم لقبها شنو ؟
فكان قاعد وقام وقف وقال لي لااااااااا بأاااه الخرطوم دي حاجة تانية دي إسمها الخرطوم الغبراء
طبعا أنا المغصة كتلتني خاصة لمن الزملاء في الفصل ضحكوا علي .
لكن في إجازة كدا مشينا السودان وتاني يوم جات كتاحة من النوع الماخمج كتاحة كتاحة أريتها كتاحة السرور ياناهد الواطة ضلمت في نص النهار.
وإتذكرت أستاذنا المصري والتمست ليه العذر قلت يكون قابلته كتاحات زي دي
الله يخلي ليك الوالدة ياناهد ويملاها عافية بجاه من بيته في طيبة حرم صلى الله عليه وآله وسلم.
وبمناسبة صوري البمرق بيها كل يوم : والله ياناهد أخير لي بوستات الصور من مواضيع السياسة البايخة وكلها شكل .
تحياتي وتقديري
05-02-2008, 02:19 PM
ناهد بشير الطيب ناهد بشير الطيب
تاريخ التسجيل: 02-08-2008
مجموع المشاركات: 4180
نواصل سيرة التلج قبل ذلك لابد ان نشير الى ان الشكر لك ايها الازهرى.. على حضى على مواصلة مابدا..
Quote: أستاذنا الكريم sumah
ياخي والله مداخلتك دي أسمح من الصور زاتها
عليك الله أسعدنا بذكريات الزمن الجميل .
منتظرنك ماتطول الغياب
** لابد ان اذكر ان اجمل ما قرأت من تعليق على صور للاخ عمار عبدالله عبدالرحمن
Quote: الصورة الاخيرة ,, الرافع يد باين صناح ده واحد كان زبون دائم في البارات دي وما بعد ماامتلئت بطنه قال الحمد لله ماملئت البطن اللعينة, وقام فرتق الخرطوم بالبارات 1983م ..
** وايضا اقول للاخ Walid Safwat
Quote: العمارات شارع النص الصورة باتجاه الجنوب عند تقاطع شارع 35 وتظهر اسوار مدرسة العمارات الابتدائية النموذجية
بس ختفتها من خشمى.. كنت احكى عن تلك الصورة والتى كنت اعيشها يوميا.. ونحن نمتطى البص الخاص بمعهد الموسيقى.. والذى كان ذلك خط سيره فى اتجاة شارع 75 ** وايضا ان اقف عند سؤال الاخ نصر
Quote: يا سمعة في السبعينات إنت جيت من نيالا ولا لسه؟ مجرد سؤال وما تفهمني غلط
اخى نصر اظنك لماح فاننى قد ذكرت ..
Quote: اولا:- عايزين نثبت معلومة مهمة .. ومبدا.. الخرطوم عاصمة السودان.. الواحد ذلك الزمان. بتاعت الناس كلهم..
وكذلك تعرضت ..
Quote: حتى الناس العايشةفى العاصمة المثلثة. برضو كانوا بسالوا بعض.. يا اخوى انت اهلك من ويين..؟ وكان الرد طوالى.. ياخى نحن اولاد برى.. مثلا.. لكن اهلى جوا من الجزيرة. دى تامين ضرورى جدا لمواصلة الحكى ولازم نضرب مثال بسكان الداخليات هؤلاء لهم الحق في المشاركة في هذا الطرح وهذا فهم ايضا لابد منو..
وايضا لايفوتنى ان اقول ونحن نمتطى قطار نيالا تكون اول اشارة للرقى والحضارة ان تظهر لنا بادرة للثلج عند التقاطع سنار.. والمغنى قال عند التقاطع اسمو مسرح الارام ملائكة سافرة ظباى نافرة غنينا ياكروان غنينا يا فنان .. ويصر ذلك الفنان القادم من مايرنو في مدينتى.. نيالا البحير.. ان المقصود موطن محبوبتة (سنار ) وان ذكرى التقاطع.. ما جا في هذة الاغنية الا لان حفصة كانت كل يوم تبيع التسالى والمناديل والطعمية بمحطة القطار .. لنا نحن.. ركاب ذلك القطار.. قطار الغرب الذى مجدة صوت الشعب الشاعر الاستاذ الدبلوماسى محمد المكى ابراهيم .. فى رائعتة الشهيرة بها الاسم قطار الغرب.. ويمكن الرجوع للحكى عن قطار الغرب هنا بهذا المنبر فى سفرنا عن مدينتى نيالا البحير.. عروس المدائن.. كما يحلو لى ان اناديها.. وبعشق كل زول يرتاح على رمشة عيون فيها.. بناديها.. .. هذا القطار.. ايضا ارتبط عند اهل نيالا بالتلج والذى لاتعرفه المدينة الا ثلاث ايام في الاسبوع مع السمك.. تلك ايام وصول القطار الى نيالا وقد كان القطار السفرى ثلاث مرات في الاسبوع اما البضاعة فذلك لايحصى ولايعد.. ( كيف لا وهى ميناء البلاد الغربى) فقط انة يخلو من السنطور مش قلنا ثلج ذلك الزمان من النوع الجيد يتحمل وعثاء السفر لثلاث ليال .. لايكل ولايمل.. ويساعده في ذلك دقة مواعيد قطر نيالا والذى يحمل عندة كل جميل.. حتى الثلج.. والذى يتلقفة الخاصة من الموظفين.. والاعيان من تجار المدينة وسادتها.. فليالى المدينة غالبا مايظهر فيها التلج فى تلك الايام.. فتعمر بة الموائد.. يبرد بة مشروب الشعير والذى كان البعير هو رمز الصناعة وجودة ذلك الزمان ولربما من الافضل ان ناتى على ذكر ذلك مرتبطا بالصورة الاخرى .. التى يتوسطها ذلك الشاب الصبوح. وايضا كانت تحظى ببعضة موائد الرحمن في رمضان.. فاعل الخير هو:- هو القطار.. الذى قال فية الغناى .. القطر الشالك انت.. يتكسر حتة حتة .. دة كلام دة باللة.. فالسكة حديد قربت المسافات كثيرا.. ويكفيننى فخرا.. اننى في امدرمان التى كان جنوبيا هواها يطلق عليا اسم ود نيالا.. وفي نيالا عروس المدائن والتى اقضى بها كل الاجازات. ينادونى ياود امدرمان .. فى نيالا علم .. وفى امدرمان علم على راسه نار يطلق عليا سيد الحيشان الثلاثة فهلا تدلنى على الحيشان التلاتة.. يا هذا؟؟ ويكفينى اننى اتحذلق لكل من يسالنى.. الخو من وين في الاهل..؟؟ ارد علية مل شدقيا.. من عموم اهل السودان.. لا لجهوية انادى.. ولا لعنصرية بغيضة ادين.. بالرغم اننى اعرف ان تلك المغنية التى ياتى صوتها مع الريح عند انصاص الليالى وصوت دلوكتها المشروخ نائحا كل منك ياود الغرب.. اللة منك يا ود الغرب .. اعرف انها تقصدنى .. انا ذلك الفتى .. و لم اهب واقفا في ذلك الليل المضلهم لااقول ها انا ذا.. انما انوم نومى هذا .. واستغفر اللة لى ولها.. لاجعلهم يموتوا بغيظهم .. وعندما سكنت خارج العاصمة ساقنى صدر المحافل الذى يحمل اهله الحقيبة حقيبة الفن.. ان في الضواحى وطرف المدائن يلا ننظر شفق الصباح ملاذى من غلوا المدن بعد ان ازدحمت.. وتعالى كظيظها.. تلك الاغنية التى ارتبطت بالثلج. ما كانت تلك الاغنية فى السودان الزمان الا وكان الثلج ثالثهم. والصباح لاح بهل الوشاح ذلك الوشاح.. كان قبل المشروع الحضارى بسنين عددا.. و ذلكم هو الصباح .. الذى لم يطل حتى الان.. وسكنت الجرافة.. شمال امدرمان.. صدحت مغنية من الحداثيين كما جاء فى اللغة عند اهل الثقافة شجر الجوافة.. ياشجرالجوافة.. الزول قيافة .. حبيبى سمعة .. سكن الجرافة.. سمعنا بة.. كل ذلك نعرفة واكثر.. لكننا لانذكره خوفا من العين .. فالعين بيه حسين . كما تقول حبوبتى.. فاطمة بت محمد صالح اتدارو من العين.. فالعين حارة.. ونحن نحكى عن التلج البارد برودة ليل مدينتى.. شاطى النهر .. التى اعيش بين ظهرانيها الان عمدة ... ... كل الكلام دة جابتو الجملة دى (ما تفهمني غلط ) .... وما تفهمني غلط كله دة من سيرة التلج وعلشان المرة الجاية تعرف كيف تكسير التلج بيكون .. ... ولكننى لازلت اكرر .. العاصمة المثلثة بحدودها التى نعرف .. وان الشجرة سفر.. ومحطة قطر .. اللهم هل بالغت.. وان عدتم عدنا.. ** وايضا للاخت هدى عبد المنعم.. نقول شكرا للمعلومه.. واؤاكد ان في سيرة التلج لابد ان ياتى ذكر ال عبدالمنعم.. وهم اصحاب مصانع الثلج.. والكوكا كولا.. الدبل كولا.. والكيتى كولا .. كما ورد ذكرها فى كتاب الاغانى السودانية ومؤلفه هندى عبد الكريم .. الذى يعرفة شباب ذلك الزمان ويحفظونه عن ظهر قلب.. وشن نقول ليا ناس سنار اه لو كانوا يعلمون .. لكن لا بد من القول ان اهلها. اى سنار (مايرنوا).. انهم كانوا اهل طرفة.. وملح..
** نعود لسرد سيرة التلج من الاشياء الغريبه في ذلك الزمان انو التلج كان بى يبيت.. يعنى ممكن تمشى كشك التلج وتلقى واحد عامل شمطه مع بتاع الكشك لانو اداه تلج بايت و انو هو داير تلج فرش يعنى جديد بتاع اليوم الفرق برضو ما كبير بين البايت والتلج الجاى من المصتع يادوب.. بس البايت بيكون مليان نشاره وغسيلها قد يفقدك جزء من اللوح.. كلمة يالوح.. في الغالب كان يطلقها الاساتذة المعلمين على التلاميذ قليلى التحصيل .. وفي نفس الوقت يمتازوا بالبرود.. وتقل الدم .. بعنى الواحد وبصوت اجش يسالوه.. ويرد من غير تردد .. ماحافظ .. ويتجلد كانوا ما حصلت حاجة صم بكم لايدمعون .. مما يرفع درجة حرارة الاستا ذ قصاد لوح التلج الواقف قدامو ده.. نسال اللة ان لاتكونوا من الالواح فى كل زمان ومكان..
مصانع التلج فى السودان كانت ترتبط ارتباطا وثيقا بمصانع المياة الغازية .. والبيرة على قلتها.. (الغريبة حتى اولاد المدارس التى كانت زيارتهم لمصنع البيرة بيقولوا انو البيرة من التانك قبل ماتتعبى فى الزجاج فى السير بتكون باردة تلج علما بان اهل السودان فى عرفهم لايخلطون البيرة مع الثلج) الا انها كانت تجود بنوعية عالية الجودة.. يعنى تلج بلورى سميك تقل فيه نسبة النشادر . ويصنع من مياة نقية مفلتره . ومفلتره دى يعنى موية صحة وهى ماتجود بة حنفيات شركة الموية وتاتى من النيل العذب مباشرة.. لايرقى اليها اى شك في انها موية عالية النقاوة والجودة .. وبعيدة عن التلوث.. كمان اصحاب المصانع ذلك الزمان كان عندهم زمه مش ذى ديل حدث ولا حرج .. واذكر من اشهر مصانع التلج في العاصمة المثلثة مصانع ابورجيلة وكانت عربات التلج تحمل اسمهم تجوب الاسواق.. المناسبات.. والحدائق.. وكانت فى جدائق داخل الاسواق ومواقف المواصلات. لكن كانت غالبية الحدائق ترقد على ضفاف الانهار.. التى تكون لنا نهر النيل العظيم.. سليل الفراديس.. نهر النيل ذلك الزمان كان جميلا.. وعلى ضفتيه تكون الحياة بابدع صورها .. وهو ملهم الشعراء والفنانين وملتقى المحبين والعشاق.. كم من الواح ثلج ذابت على شاطئية بفعل حرارة الشوق والهيام.. ولهيب نار الغرام.. لربما ننظر الى عمق صورة اخرى.. وفي خلفيتها تتجسد لنا علاقة الثلج الازلية والنهر.. يحكى ان حكماء الشعب المغلوب على امره ذلك الزمان.. من الشعوب الجيران اراد ان يجرى نهرا في صحرائه البلغ البور فاستقدم لها جبل من الثلج.. فاجرا بها نهرا اجاج.. ولربما جاءت سيرة النهر هذا مع صورة اخرى.. لذا نطلب منك ايها الازهرى ان لاتطلق الصور هكذا على عواهينها فتششتت بنات افكارنا.. بين تلك الشواطى.. وفنانا قال في الشاطى.. يا الحبان ساهرتوا بينا.. ... ... وسلام هى حتى مطلع الفجر وحتى طلوع شمس اخرى.. وفجر اخر.. وقبل طاوع الروح .. فقد وصلت الروح الحلقوم نواصل سيرة اللوح.. لوح التلج.. .. ... .. هنا يباع الثلج البارد..
والله مداخلتك أطربتني وأحسبها كذلك اطربت كل من يدخل إلى هذا البوست .
دائماً الصور تستنطق الإنسان خاصة إذا كانت قديمة وأرتبطت بالذكريات .
Quote: هنا يباع الثلج البارد..
اضحكتني هذه العبارة وأتذكر مرة كنت في مشوار مع الوالد(ربنا يحفظه ويطول لينا عمره) وشفنا مطعم أسماك مكتوب فيه (سمك بحري) قمت أنا ضحكت وقلت للوالد بالله شوف الزول دا هو في سمك مابحري؟ قام الوالد قال لي آآي في سمك نهري طبعاً طوالي الضحكة راحت وقام الوالد حكى لي قصة يوجد ثلج بارد دي .
Quote: والكوكا كولا.. الدبل كولا.. والكيتى كولا
الأولى عرفناها لكن التانية والتالتة اول مرة أسمع بيها.
تعرف يا أستاذنا العزيز مرة نزلنا السودان إجازة كدا ايام المرحلة المتوسطة وقام واحد ود خالتنا قال لي بتعرف البزيانوس قلت ليه لا قال لي دا عصير سمح جدا وقام ساقني الدكان وقال لي يلا اشتري لينا اتنين بزيانوس (عزومة غريبة هو عازمني وانا ادفع) المهم عجبني جداً طعم البزيانوس لكن وانا بشرب لقيت حاجة كبيرة كدا في خشمي واستغربت وطلعتها لقيتها حشرة كبيرة نحلة ولا ابو دنان ماعارف والله لايوريك الحصل شنو . الظاهر المصنع حقها بدائي جدا رغم حلاوة طعمه .
عليك الله واصل هذا الجمال .
05-02-2008, 05:45 AM
Nasr Nasr
تاريخ التسجيل: 08-18-2003
مجموع المشاركات: 10818
ويقال يا سمعة أن قرويا من ضهاري السودان كان يسمع بالكهرباء وقدروا ما وصفوها ليهو ما عرفها المهم خاتيها في بالو ولا هي براها قعدت في بالو الله أعلم. زولك قام كدا دخل المدينة ذات صيف غائظ وطلب للمرة الأولي في حياته بيبسي من حق ناس أهل هدي. والبيبس كان (متلج) طالع من الديب فريزر، وزولك أخد الجغمة الأولي وقام ناطي صايحا "الكهرباء"
والمهم يازول كويس إنك فهمتني غلط عشان تطلع الكلام المغتت لكن لا فاضي ولا خمج
سلامات الأزهري؛ وتشكر كتير على الصور الجميلة؛ وياريت لو في المزيد. طبعاً ما عكرتها إلا صور اللوح أب عاج والأحمق التاني بتاع ليبيا؛ لكن دا طبعاً تاريخ؛ ب حلّوه... و مرّه.
كان لي بوست بهذا العنوان السبعينات مره تاني شكراً؛ ولك الود.
05-02-2008, 07:09 PM
ALazhary2 ALazhary2
تاريخ التسجيل: 09-06-2003
مجموع المشاركات: 4966
** * الازهرى نمره2 اقصد الازهرى بالرقم2 بعد مداخلتك الاخيرة بتاعت البزيانوس تبقى من العرب العاربة.. يعنى مش من عرب جهينة. والذين يعرفون هذة الايام بالبدون يعنى حنجر فرملة اليد فى الانبراشة دى .. ونكتر من الشرح.. بس انت ما تكتر من المزه دى..
قالوا يا أستاذ سمعة في واحد عازم ناس أصحابو على قعدة ومجهز المزاج من (عرقي العيش سواها فينا سكرانين والسكرة طينة) وكمان بنقو وارد أفغانستان يعني حاجة مية مية . المهم جهز كل حاجة بس قروشو نقصت ماقدر يشتري ليهم لحمة للشية . قام سرق ((قرد)) الجيران وضبحوا وشواه ليهم. لمن جو أصحابه بالليل وسكروا كلهم وإنسطلوا (ماعارف السطلة بتجي مع السكر ولا لا) المهم واحد منهم قال لي سيد البيت صاحب العزومة : ياخي والله لحم الشية دي سمح سماحة لمن يطلع في الراس زاتو . فقام صاحبنا قال ليه : راس يااب راس دا بطلع في الشجر خلي راسك الكبير دا
تحياتي وتقديري لشخصك الكريم .
05-03-2008, 11:28 PM
صلاح شكوكو صلاح شكوكو
تاريخ التسجيل: 11-19-2005
مجموع المشاركات: 4484
شكرا أخي ALazhary2 على هذه الصور الرائعة لكن عندي ملاحظة غريبة شوية اللافتة المكتوب فيها ممنوع الوقوف دي إتكتب مقلوبة كبف ؟؟ الإحتمال الوحيد إنو العفريتة إتحمضت مقلوبة ودا معناه نعاين للساعات في أيادي الناس هل هي في الغالب في اليد اليمين واللا في الأيادي الشمال .. لكن يبدو أن الصورة بها ظل لا يسمح بهذا القدر من الملاحظة..
شكرا ليك
..
05-04-2008, 08:09 AM
ALazhary2 ALazhary2
تاريخ التسجيل: 09-06-2003
مجموع المشاركات: 4966
انا غاطس في البطاطس انتو ناسين الويك اند بتاعنا لسة ما خلص نظام اجازة وكدة.. بس حبينا نوريكم انو كل حاجة تمام و الايدو في الموية مش ذى الايدو فى التلج..
* **
05-05-2008, 05:28 AM
ALazhary2 ALazhary2
تاريخ التسجيل: 09-06-2003
مجموع المشاركات: 4966
يا ابو الزهور .. الخرق الدستور.. انتو صبرا يبل الابرى ماعندكم.. علشان يتبل الابرى.. ويختوا فيهو التلج .. عن حبيبتى انا حاقول لكم.. حبيبتى كانت.. كانت ثلاجة 13 قدم .. وتعمل بالجاز .. انا ندمان اشد الندم .. انو ما صورناها.. لا انا ولا ابوى بالرغم:- من انو ابوى بهوى التصوير.. وانا متخصص فيهو.. لكن لم نفكر ابدا فى اننا سوف نبعد عن تلك الثلاجة.. والتى تحولت بعد ان غشت الكهرباء المدينة فى السبعينات .. الى حافظة رغيف وخضار.. ورجعت للعمل ثانيا فى التسعينات.. وكان والدى تغشاه الرحمة.. دائما مايردد.. شايف ياابوع السباع.. صناعت الانجليز هازا راسة ان سبحان من يحي العظام وهى رميم .. وان كولدير كلام فارغ.. ربنا يبارك لينا فى.. فى عم غوغول.. سرعان ما لبى طلبى.. وشوف الصورة اسفل.. المقال لدواعى امنية.. وانا امامها تلاجتنا ديك .. الدخلت نيالا فى بداية الستينات.. وعلمتنا الفلهمة.. والقردمة.. وخلتنا نحكى عن حلاوه تلج.. واكل الايس كريم .. والدندورما .. هاى امامكم الخالق الناظر .. ياربى بجيك وتسالنى.. فهذة الثلاجة قد رجعت الى العمل بعد ان احيلت للمعاش الاختيارى .. عندما عمت كهرباء المدن.. مدينة نيالا في عام 1973 ومع بداية الانهيار العام فى السودان.. وعندما اتى البشكير.. ونشف كل حاجة.. بما فيها كهربا نيالا.. رجعت ثلاجتنا للعمل مرة اخرى .. بالرغم من شح الوقود.. فقد كانت تعمل بالجاز.. والجاز احبتى يختلف عن الغاز .. والغاز خشم بيوت.. كما الجاز خشم بيوت .. حتى بيت ناس .. (ناس الجاز) السرية خادم جدى محمد سيداحمد.. ام ناس ود الجاز.. الذين ورد ذكرهم بعد ثورة الانباذ.. الصباح.. سنواصل سيرة الثلج .. وسيرة الجاز.. الجاز ابو غزالة.. وفرق الجاز في السبعينات .. وتجويز اغانى الحقيبة .. وحقبنة اغانى الجاز.. والرتينة .. والشول .. والجاز.. تعالوا علينا بية جاى.. علشان نواصل .. وعن حيبيبتى انا حاحكى ليكم.. وبقول ليكم .. هنا يباع التلج البارد..
الخو نصر ياحليلك انت لمن كنت تقدل فى مؤسسة البترول انا عارفك.. كنت بتاع انابيب وكدة والانابيب كتيرة وصلت حتى صناعة الاطفال اطفال الانابيب.. والبالونات عرفتها.. بس انتو في سنار بتقول ليها.. هنبوكة.. يعنى هى بالونات فارغة.. وقابلة للانفجار في اى لحظة.. بس مش غريبة .. الفنان صاحبك.. وبعد مرور عشرات السنيين وحتى الان مصر عندما تسخن الحفلة الا ان يسخن بيك.. ويغنى ليك..
البابور جاز خلو اليشتغل الشغل بالجاز خلو اليشتغل الى ان يصل مرحلة الاندراشة الجد وتسخن رقصة الكاروشة
وفى سنار خلو الايشتغل انكسر مسمار صلحو العمال..
ومنذ ذلك التاريخ وانتم نجضانين بكفاح الطبقة العاملة.. وفارقتو الانابيب البتحرق حشاها..
يا حليل الكشف .. كشف الحال عند ناس الانباذ.. ورقيص العروس.. فقد عملوها مثنا وثلاث ورباع..
وشل شل شل كب لى جالون.. وشل شل شل حسب القانون .. وشل شل شل لالا ما بديك وشل شل شل الطرمبة هديك..
وكان الجالون.. وكنا نحن .. وكان الجاز والرقص حتى مطلع الفجر اه الجالون.. لابد ان نذكر انة في السبعينات من القرن الماضى.. جالون حديد .. اصفر فاقع لونة يسر الناظرين.. وكان للمرتاحين يدفن في التلج.. وللغلابة المفتحين.. يلف بورق الجرايد ويرش بالماء ليرطب.. ويبقى بارد تلج.. بس انت جيت هنا ورتبطت .. ... ... نواصل سيرة التلج .. وهنايباع الثلج البارد
سمعة وشحنة من الحنين للسبعينات طالت حتي جالون شل الأكثر شهرة من كل جوالين البترول. بالمناسبة دي، إنت رجعوك مع الجماعة الرفدوهم في قرن ورجعوه في القرن البعده؟؟؟ كدا شوف لينا القصة شنو، يمكن نرجع تاني زي ما بقول إبراهيم عوض ولا أقول ليك زي ما غنت نانسي عجاج "ياخي سيبك"
التاريخ (زي ما قالو المثقفين) يعيد نفسه، لكنها الملهاة في المرة الثانية. ونحن فينا عمر لملهاة بعد دا!!!!!
وبدون مناسبة أتذكرت مسرحيات تخرجكم في السبعينات ومسرحية كدا إسمها حفلة علي الخازوق. (إنت يا المسرحيين ما بتاعين نبوءات وكدا. شفت الخوازيق كترت كيف؟؟؟)
05-07-2008, 05:11 AM
حسن طه محمد حسن طه محمد
تاريخ التسجيل: 03-01-2007
مجموع المشاركات: 3653
تحت هذه الشجرة امام المركز الثقافي الامريكي بشارع القصر تركت عجلتي الرالي ودخلت المركز الذي كنت مشتركا فيه لاستبدل الكتب .
لم يأخذ ذلك من الوقت الا دقائق معدودات وخرجت لاجد ان العجلة قد سرقت -وما لميت فيها حتي هذه اللحظة - وكانت العجلة الرالي آنذاك بمثابة بي ام دبليو حاليا.
شكرا لك واعدت لنا الذكريات الجميلة بما فيها سرقة العجلة.
05-09-2008, 08:38 AM
ALazhary2 ALazhary2
تاريخ التسجيل: 09-06-2003
مجموع المشاركات: 4966
الغزوات.. والإنتصارات.. فى السبعينيات.. ده كلام كبير خلاص لابد ان نفرش لة الدار.. ونجهز الاحبار.. وبعد ان استمعتم لما وراء الاخبار.. نترككم مع فاصل غنائي
* **
05-30-2008, 04:48 PM
ALazhary2 ALazhary2
تاريخ التسجيل: 09-06-2003
مجموع المشاركات: 4966
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ALazhary2
james
يوسف محمد يوسف
Adil Osman
sari_alail
أشرف البنا
sumah
Walid Safwat
فيصل محمد خليل
Nasr
عمار محمد حامد
ناهد بشير الطيب
عمار عبدالله عبدالرحمن
Abureesh
elsawi
اكرم عثمان عبده
صلاح شكوكو
abcde
حسن طه محمد
كمال عكود
Hussein Mallasi
Biraima M Adam
khaleel
فيس بوك
تويتر
انستقرام
يوتيوب
بنتيريست