|
|
|
 Re: الدكتور محمد بادى ... نقوش على جدار الزمن الجميل ... ( توجد أشعار ، وكلام غبش ) .... (Re: محي الدين جبريل)
|
عربون
أبيات من قصيدة الدكتور محمد بادى جزيرة عبدالله ( بكسر العين )
أنا أخو البت اللكعت قرن الخمرة النازة
على وردان الصبوة الراكزة
الجنيات الهازة ..
صدورن لازة
ورقّ النص زي خيت الشلة
بالحيل آ جني إيه والله
الجنيات الحزمو الجبة
وعرق الشتوي عليهم نايا و صب
قول ما دلّه .. رجالا حصدوا الحبة
عيشهن هادو انكال واتعبّ
ومنو كتير في الواطا انكبّ
وباقيه مصوبر واقف قبة
الحمد آلاف .. الشكر آلاف
الحمد آلاف الشكر آلاف
العيش الرقد أصناف أصناف
الولد الكال.. عزام .. حلاف...ضياف
الرزق الجانا مدلة..
الحلق الجاف اتبلة
بالحيل آ جني إيه والله
| |
 
|
|
|
|
|
|
|
|
Re: الدكتور محمد بادى ... نقوش على جدار الزمن الجميل ... ( توجد أشعار ، وكلام غبش ) .... (Re: كمال علي الزين)
|
شكرا كمال على الزين على مرورك
وابقى داخل حبابك الف ....
ودى التكملة
جزيرة عِـبد إلًه
أنا أخو البت اللكعت قرن الخمرة النازة
على وردان الصبوة الراكزة
الجنيات الهازة ..
صدورن لازة
ورقّ النص زي خيت الشلة
بالحيل آ جني إيه والله
الجنيات الحزمو الجبة
وعرق الشتوي عليهم نايا و صب
قول ما دلّه .. رجالا حصدوا الحبة
عيشهن هادو انكال واتعبّ
ومنو كتير في الواطا انكبّ
وباقيه مصوبر واقف قبة
الحمد آلاف .. الشكر آلاف
الحمد آلاف الشكر آلاف
العيش الرقد أصناف أصناف
الولد الكال.. عزام .. حلاف...ضياف
الرزق الجانا مدلة..
الحلق الجاف اتبلة
بالحيل آ جني إيه والله
الوادي الجانا مترقن
مدّ جنحاتو الطايل شرقا وغرباً
القبلي بروقو على القلعات يضّربن
الدُّكَن البعدن قربن
فوق صنقور المحلة الطالت كبن
قول للمحلة بيوتك خربن
قول ما دله.. الحلق الجاف اتبلّ
بالحيل آ جني إيه والله
مرحاتنا شرابهن يوت ماغبن
شبعانات .. في الشقل أب شوك ما شبن
الحُمّل ولدن وربّن
حلماتن تقلن.. جرّن.. فوق سيقانن كبّن
اللبن العايم في ضرعاتن جبّن
المغصة إن كان ضرعاتن خربن
القرعة آ وليد .. السعن آ بنية
القربة كمان... كبوها المية
المغصة إن كان ضرعاتن خربن
شوفو النعمة السالت فوق قيزان الرملة
ناس البندر لبن الشاي بالعملة
سمح الخمج الفوق أسيادو
سمح العز المن أجدادو
الجنيات المشو ما عادو
كان بالردة أكان اتنادو
سمح الخمج الفوق أسيادو
سمح العز المن أجدادو
الجنيات المشو ما عادو
كان بالردة أكان اتنادو
غرّب حامد وشرّق بلة
كانوا بحلبو الضرع الدلة
كانوا بحضرو الخير القدحو معلا
الجنيات ما كفرت بنعمة الله
بالحيل آ جني إيه والله
ذات في يوم والغيمة تهتّف مطرا نقّع
فوق نوار الطلح الفقع
ريحة البرد إن جاتك عطرا فايت خمر الفوق أردافا مجضع
شفنا الوادي يقشقش في دمعات الليل
والتعل الشايل بدا يتفقع
تلب حامد فوق مخلوفة أب زور واتربع
طلق الرسن أب زمة وسوّا خبيبا بدّع
هوّد في رقّاب الصي
لا قوه ثلاثة زبيدية
خالفين سيقانن فوق السنكيت ورقاب ألبل بيناتن مرخية
محجوبات بالخرز الفصلو السوميت
كل واحد درقة وسيف وطبنجية
وباقي جرابن مليان دلميت
الجنيات اتقبلو وضاقو الحارة وضاقو المرة
وكان حجازن صقر الجو
حامد كان عارفين .. ضاقوه رجال قبالكن
شوفو أرزاقكم أخير من ضو
حامد عوج الطندب آ وليدات
عوج الطندب نار القصب الهبلت ما بتعدلو
شوفو شلوخو تلاتة مطارق رقدن
وكل تلاتة يمين سياف اتقبلو
حبوب القارح ... ما دلة
ولدا ما ختالن زلة
شن قولك فيهو عليك الله
بالحيل آ جني إيه والله
وينا مراتع الدرت الباسط دايما ببكي عليهن
وين بنوت الحلة البكّر عصرا بدري يسون في شاهيهن
بعد الليل ما يهّود ونحن نهّود..
عاد أماتن ينادن ليهن
نمشي على القيزان نتقادم
أقيس الخطوة مع التاتاي ومشيهن
والله البعد الحاصل ما نساني
وحاتكن في قمراتنا بشوفو وشيهن
الا النضم أب غنة اللهج السكر وين بلقاهو
بنات الريل الدوب ليهن
الخوف يا ناس كان يبقى الشوق الحاصل بينا معشعش فيهن
مقنع سابل وين بلقاهو
طرفا ذابل وين بلقاهو
وعين بتدنقر من واليهن
الوجنات الشعّن بقّن
ود العين النايم زرقن
مو زايغ رسيان وميقّن
زولن كان خدران ومحقّن
من الشوفة عروقو يطقّن
كان الدنيا بصح تتخلا
كنا بركنا معاهن فوق رملاة الحلة
الا كمان بنشوفا مذلة
الجنيات الغابت جابت
إنت الجيب بس قايلو قميص افرنجي وكرتونات كرملّة
لا لا وحاتك حاشا وكلا
ديل يوم عادوا اتلافو الجاهل بحقوق الله
ديل كم لحقو البشهق ضايق وداووا العلة
الولد الجايب حقايب سفرو تقال..
تقال من جنس كتاب ومجلة
الحكمة النضم إياهو الكان..
الحكمة الولد اتوضى وصلّى
عادة البلد الدخلت فيهم سكنت ..
سكنت ماب تتخلا
نحن كما طارين الحلة ودرنا الطلة
نشيلا معاهم فرح وميتة
حلاة الموت كان في عِبدلّه
حلاة الموت كان في عِبدلّه
| |
|
|
|
|
|
|
|
|
|
Re: الدكتور محمد بادى ... نقوش على جدار الزمن الجميل ... ( توجد أشعار ، وكلام غبش ) .... (Re: معاذ حسن)
|
الاخ محى الدين
شكرا على هذه الاريحية
ود بادى شايقى القبيلة ,,جعلى المنشاء كل الكلمات والاسلوب الموجود فى شعر ود بادى من ديار الجعلية
او ثقافة الوسط يقال انه عشا فى ديار الجعلين 25 سنة,,,,ولم ينزل القرير
وتلمحه فى قصيدته
بعد عشرين عام نزلت قرير اهالى الشام
يعشو الضيف بخيلهم فنجرىوعزام,,
وحتى شرق حامد وغرب بله والجمل والمخلوفة والضرع,,,
كل الاسماء جعلية والاسلوب جعلى,,,
لذا لا تجد شعره يغنى عند فنلانى الشايقية لانه لا يعكس بيتهم
وانا اصنف ود بادى من شعراء الوسط..مثله مثل محمد طه القدال,,
ولو لقينة طرفة بنجدع معاك
| |
|
|
|
|
|
|
|
|
|
Re: الدكتور محمد بادى ... نقوش على جدار الزمن الجميل ... ( توجد أشعار ، وكلام غبش ) .... (Re: محي الدين جبريل)
|
الأخ محي الدين
تحية طيبة
لكم الشكر علي هذا البوست الرائع الذي نتمني أن يكون محركًا لعودة الشاعر د. محمد بادي لمحبي شعره
Quote:
كل الكلمات والاسلوب الموجود فى شعر ود بادى من ديار الجعلية |
ياريت أخي عبدالحليم تأتينا هنا بقصيدة "جواب بت الخير"، وحبذا إن كان لديكم تسجيل صوتي لها حتي يستمع إليه الأخ أبوقوتة ليقف علي اللهجة والأسلوب الذي إستخدمه الشاعر في إلقاء تلك القصيدة وإيرادها فيها للكثير من الكلمات التي تكشف خطأ تعميم الأخ أبوقوتة لكلمات وأسلوب الشاعر وجعلها حصراً علي ديار الجعلية! بصورة أشبه بتناوله للشأن الهلالي في كتاباته وردوده علي الأخوة المريخاب!! علماً بأنني أري ديار الشكرية وبيئتها في الكثير من أشعار ود بادي وأتفق مع الأخ أبوقوتة في رأيه حول وجود شبه بين أشعاره وأشعار القدال..
ولكم وللأخ أبوقوته وبقية المتداخلون كل الود والإحترام..
| |
|
|
|
|
|
|
|
|
|
Re: الدكتور محمد بادى ... نقوش على جدار الزمن الجميل ... ( توجد أشعار ، وكلام غبش ) .... (Re: الصافي بشير الصافي)
|
الصافى اخوى
حبابك الف ، آآآخوى ، جعلية وشايقية أشعار ودبادى ، أعتقد إنها ما مهمة الآن المهم إنو هو عبارة عن مدرسة قائمة بذاتها ، وما دون ذلك يمثل النصف الفارغ من الكوب ، ولا شنو .... متفقين طبعا أنا وأنت وأبوقوتة فى الحتةة دى ...
لكن ده طلبك
الرســـــالة
بت الخير يجيك الخير
وصل جوايك الكاتباهو للولد الحتالي
وكان الظن ترسلي ليه هين هينين من البركاوي
داك الطعمو حالي
ولو بالقل شخاليب دوم
وهنا والله ني ومسيخ وغالي
سؤالك يمة عن احوالي
كان شفتيها تغنيك عن سؤالي
انا اتوكرت في قلب البنادر
زي غريب شرقان مدلدل في الدوالي
جات شايلاني حرّة جوف
انا اتحديت مجالا مومجالي
مصايب الجامعة اكبر من جميع الشفتو
ولا سمعتو في ايام الخوالي
قعاد الكرسي كان شفتيهو
ورم ساقي زي سيد الزلالي
اقلب في الدفاتر من صباحا بدري
لامن تمسي ما بنسي انشغالي
اسوق الليل تحت ضوء الكهارب
وديمة هارب من فراشي
وهادو حالي
ده كلو عشان اجيب نمرا
انافس بيها واستر بيها حالي
والله عاد حالة ما بتسر البال
ومن يوم ما هديت ما انسر بالي
سلاطين العلم يايمة
ينسوا العشرة في فد يوم
يدفروك بره زي دفر الطبالي
وخايف من اجيك مرفود
وهادي الفكرة من ما جيت
معشعشه في خيالي
واخير افتح اضانك
قبل ما تلقي فوق اضني
ملويات حبالي
وكان حصل القدر يايمة لا تلوموني
لومي علي البنادر نورا اقوي من احتمالي
بناتا فيها رويانات جسومن بالدهون
تلصف بلا جلود السحالي
سبيبن ديمة بالحزم الكبار مبهول مردم
فوق قفاهن..وا حلالي
صدورن طامحة زي موية الدميري
الهايجي تكشح في العوالي
عيونن واسعة تبلع مية
زي ولدك تشرك للموحد والضلالي
وحاتك ضُمّه ما بقدر عليهن
ساعة اقيف قدامن
انكس راسي بي قدري وجلالي
مشيهن سوا زي سرب الغزال
لكن نفورن مو غزالي
عدادن مابخبرو
الا وين ما امشي الاقاهن قبالي
وقصاصن ينقّر بي عصاتو
ومايفرّق دربهن
من بين دريبات القماري
بخورن في سماء البندر
يدوخ متل مسك العشاري
رقيصن ينهزنو بلا الفلو
الّلماتو غابن منو في ضل الضهاري
يجمّع في قفاهو وينطرح
يتمطّى تتحتحت مفاصلو
وده ياهو الفاك جباري
دلالكين تجيب الضلّ
علي متاهات الضهاري
غناين اصلو ما سمعنابو
كنت بقول ليكي الا هسع ما ني طاري
وطنبورن مبرقع وحسو فاقع
لا في كنتر لا ودع فوقو بيراري
عشوقن في الرقيص
يتلوي متل سيد المغص
يوم يبقي في حالة طوارئ
والمداين ديمة فايري
زي وحوشا في البراري
والمـآسي كتيرة حاصلة
والمكضب يلاقي بوليس السواري
عاد دي حالتا بقدر اتستر معاها
خلاف احاكي الناس واجاري؟
وانتو راجيني يوم اجيكم بشهادتي
وينبسط ضهري وكباري
وبرضو خايفين من اجيكم بي غربية
وفي خجل قايد صغاري
والقدر بي غادي كاتب ليه شيتا
لاني حاري ولا ني طاري
حاجة واحدة تكون في علمك
اني جايي وتاني راجع لي دياري
وياني حمّيد القديم
الا بس فاقد حجابي وراح سواري
يمة كتري من رضاكي
وسلميلي علي المعاكي
وقولي لي حبوبة زيك
نحن شبنا وماك براكي
سلميلي علي جروفنا وحتى وزينا البكاكي
سلميلي علي بناتنا
وقولي ليهن ماني ناسي
طاري شلاخا مواسي
زي شقوق بيتاً سداسي
طاري نقشا فوق خدودن
بين ضفايرو وشوفو قاسي
جسمي في البندر ممدد الا بينكم بي حواسي
سلميلي علي البكادن والبشتت في التقاوي
في الكرد محراتو قالع
وصوتو فوق تيرانو عاوي
ماحزم بقجة ثيابو وقام فجر لاحق اللواري
اخيرو يحفر في جروفو
مالو مال حفر المجاري
سلميلي علي الضرايح
والفضل من الخلاوي
والفقير الفوق حصبرو
يكتب البخرة ويداوي
مع السلامة ودعتك الله
ولي وصيتك ماني ناسي
لي شفقتك مافي داعي
وابقي عشرة الراعي واعي
في بحور اهل البنادر من زمن طالق شراعي
كان نحجت بجيك غانم
وكان فشلت بجيك ضراعي
| |
|
|
|
|
|
|
| |
محي الدين جبريل
كمال علي الزين
فرحات عباس
معاذ حسن
abuguta
ود محجوب
فيس بوك
تويتر
انستقرام
يوتيوب
بنتيريست