|
|
 نشات الامام نجم البيت السعيد عريسا
|
حبيبناالاستاذ نشات الامام الصحفي المتميز والمذيع التلفزيوني اللامع
فى كل (بيت سعيد)والزول الفنان والصديق الصدوق اخو الاخوان قرر طائعا ايقاد
شمعة (الحب البيوقد للنهاية) واختار دخول العش الذهبي .. نشات يدعوكم جميعا
لتناول طعام الغداء فى منزل الاسرة ببحري حي الفيحاء يوم الجمعة 25 ابريل الجاري
وستنتقل الافراح مساء ذات اليوم الى صالة المعلم بالخرطوم..
مبروك للعريس نشات
وبيت مال وعيال ان شاء الله وربنا يتمم على خير.........
|
|
 
|
|
|
|
|
|
|
|
Re: نشات الامام نجم البيت السعيد عريسا (Re: صديق الموج)
|
Quote: يا اخوى مادام قاعد فى بيت سعيد مالك؟
كان بتسمع النصيحة اخير ليك البيت السعيد..
غايتو مبروك،،، |
صديق ااخوي ما تسمعك المدام
مالك عاوز تزعزع قناعات الراجل
نحنا ما صدقنا ، هو صاح الزاوج بيكمل نصف الدين
لكن بيشيل النص التاني
لكن الموت مع الجماعة(عرس)
ولا شنو
| |
|
|
|
|
|
|
|
|
|
Re: نشات الامام نجم البيت السعيد عريسا (Re: Adil Osman)
|
أيها الفتى الابنوسى دعنى أقول لك والفرحه تعم كل جوانحى الف مبروك
وإنشاء الله بيت مال وعيال كما يقول أهلنا الطيبون .. تمنيت أخى نشأت
أن أكون معك فى هذا اليوم الجميل وتلك اللحظات النادره .. لكن عزاؤنا
الوحيد بأن الاخوة بدءا من ودالشيخ ( عبدالمنعم) وأنتهاءا
بالعزيز محمد عبدالقادر جميعهم معك وهذا يجعلنا فى غاية الاطميئنان
والسعادة .. مرة أخرى الف مبروك أخى نشأت ..
تاج السر
| |
|
|
|
|
|
|
|
|
|
Re: نشات الامام نجم البيت السعيد عريسا (Re: Elmosley)
|
Quote: نشآت
ياسلام ياخي الف الف مليون مبروك
ايها النقي وبيت مال وعيال
ووالله لو كنت موجدا معكم لماتوانيت بالتغني لكم
لا بل ذلك ليشرفني
وشكرا يامحمد علي هذا الخبر الجميل |
الرائع الموصلي
مرحبا بك فى خيمة فرح نشات
تمنيناك بيننا
واول ما تجي السودان
اكيد حتغني لينا
تسلم ياحبيب
| |
|
|
|
|
|
|
|
|
|
Re: نشات الامام نجم البيت السعيد عريسا (Re: عبد اللطيف السيدح)
|
Quote: ويا ودعبد القادر ما بتفوت زي الموالد دي
وحاول فكلينا صحن كوكتيل في الماسنجر
وابقوا عشرة علي عكاشة ما ينشرط
|
السيدح اخوي
اها العرس دة دلوكتو ضحوية
ومازال الليل طفلا يحبو
الكوكتيل جاييك بالاتاش
لكن الباسطة ابت تتحول
ممكن نرسلا ليك بالبريد السريع
تمنيناك بيننا يا اخي
عكاشة دة مدرب ما تشيل همو
تحياتي
| |
|
|
|
|
|
|
|
|
|
Re: نشات الامام نجم البيت السعيد عريسا (Re: Gaafar Ismail)
|
Quote: الأستاذ محمد عبد القادر
شــكرا جزيلا على إيراد هذا النبأ السار.
أنا حاولت الإتصال بنشأت على هاتفه الجوال الذي أعطاني رقمه عام 2006 ولم استطع الوصول إليه.كما حاولت الاتصال عبر المسنجر ولكن تأتيني رسالة error
أرجو أن تنقل له تحياتي وأطيب أمنياتي بدخول القفص الذهبي وإن شاء الله بيت مال وعيال.
للضرورة أرجوك أن تحدثه يترك رقم هاتفه الجوال عاجلا عبر بريدي الإلكتروني:[email protected]
|
الاخ جعفر اسماعيل
نشات غير الموبايل
واكيد ستجد رقمه
على الايميل
شكرا على المشاعر الطيبة
| |
|
|
|
|
|
|
|
|
|
Re: نشات الامام نجم البيت السعيد عريسا (Re: الجندرية)
|
سلامات
وعوافي
صديقي الذي في "بهائه مستكين" ..
نشات الحلبي ..
ترقص يا صديقي الذكريات والايام الجميلة فرحا بهذا الخبر ..
وتدور في اروقة الذاكرة صورتك البهية وانت "تحيك المؤامرات اللذيذة" للاصدقاء الميامين في معسكرات الامتحانات ..
كل عام قصة جديدة تطبخ سيناريوهاتها وتنتجها وتخرجها لوحدك ثم توقع في حلقتها الاخيرة "ضحكتك الجميلة" ..
وكانك كنت تعلم باننا سنكون معا الي الابد ..
وكانك كنت تعلم بان هذه المؤامرات ستكوت بهار تواريخنا القديمة تضيف لطعم حاضرنا مذاقا شفافا وانيقا ..
وكاني كنت اعلم انني ساتذكر كل ذلك يوم ان "يتنزل" علينا يوم "عرسك" ..
ياهذا الولد الحلبي الجميل ..
ملايين التبريكات لك ..
للاسرة الكريمة..
والزغاريد تشق صمت الليالي بعذوبتها معلنة بداية المراسم
والبخور يمارس هوايته في ابهار حواس المساء بالصندل والتيمان ..
وانت .. وفي الصباح ترقص في وسط "الدارة" ملفح بثوب "السرتي"..
ويديك مفتوحتان علي شكل "شنكل" "تحاوي" العروسة ذات اليمين وذات الشمال ..ان لن تحرزي هدفا..
والزغاريد والصيحات تتعالي "الغلبوا منو يا ناس ..الغلبوا منو .."..
ثم تنهتي المراسم ..
يمضي كل لحال سبيله ..
وتمضي انت لتمهر الارض برائحة حياتك الجديدة ..
حياتك الجميلة ..
اسال الله ان يجعله زواجا مباركا وان يجعل دارك مقاما طاهرا شريفا وان يبلغك الله وزوجك درجات الايمان الكامل واليقين الصادق ...
ثم تقبل محبتي ..
"وددت كثيرا لو كنت موجودا الي جانبك يا نشات .. وددت ذلك كثيرا.."
| |
|
|
|
|
|
|
|
|
|
Re: نشات الامام نجم البيت السعيد عريسا (Re: تاج السر محمد حامد)
|
Quote: الاخ محمد عبدالقادر .. فقط أرجو أن لاتنسونا من الصور الجميلة
واللقطات العجيبة ليتم بثها أو نشرها عبر هذا المنبر حتى نقاسمكم
الفرحة وملعون أبوها غربة .. ودمتم ..
|
حاااااااااااااااااضر تامر ياتاج السر
اكيد ما بنقصر
وملعون ابو الغربة ام بنايا قش
| |
|
|
|
|
|
|
|
|
|
Re: نشات الامام نجم البيت السعيد عريسا (Re: ودرملية)
|
Quote: والزغاريد تشق صمت الليالي بعذوبتها معلنة بداية المراسم
والبخور يمارس هوايته في ابهار حواس المساء بالصندل والتيمان ..
وانت .. وفي الصباح ترقص في وسط "الدارة" ملفح بثوب "السرتي"..
ويديك مفتوحتان علي شكل "شنكل" "تحاوي" العروسة ذات اليمين وذات الشمال ..ان لن تحرزي هدفا..
والزغاريد والصيحات تتعالي "الغلبوا منو يا ناس ..الغلبوا منو .."..
|
ودرملية الشفيف
لك التحية
اطربتني بعذوبة المفردة
واسكرتني بهذه المداخلة المجرتقة
التى جعلت رائحة الصندل تفوح من بين ثنايا هذا البوست
التقاطاتك رائعة كالعادة
ذاكرتك الفوتغرافية لا تتوفر الا لرجل شفاف مفرط الاحساس يالحياة والناس
بعدين واضح انو العروس دي عملتك عبقري
فى مسائل العرس وكدة
هذا الحلبي الجميل تمنيناك ان تكون بجانبه
حريرة فى اليد او سعفة من نخيل
ولكن ثق انك ستظل عافية فى جسد الفرح
وغنية سيرة وضريرة فى راس هذا الجميل نشات
تتخيل اول ما حدد العرس اتذكرناك
مقطوع ابو الغربة
فراقة الحبايب
ولكن اكيد الارواح ستتواصل كعادتها
تحياتي يا جميل
| |
|
|
|
|
|
|
|
|
|
Re: نشات الامام نجم البيت السعيد عريسا (Re: عصام الدين حسين حسن)
|
خبر جيد يا محمد عبد القادر
ويمكن نقول انكسر المرق واتششت رصاص العزوبية وسط الاعلاميين والصحفيين
(ياناس ماقدر كدا)
ويا حبيبنا نشأت ألف ألف مبروك وان شاء الله (البيت السعيد) الذي كنت تسوّق له من خلال البرنامج يكون نصيبك..
تساهل والله يا ابو نشوى
آه لو خليتو الغداء في (مدني) كان صاحبك مازن بري وقعت ليهو في تنك!!
...
يا محمد عبد القادر
عرس ودرملية مرقتنا منو كيت..!
ياخ مافيهو اعادة..؟
| |
|
|
|
|
|
|
|
|
|
Re: نشات الامام نجم البيت السعيد عريسا (Re: عادل فضل المولى)
|
Quote: يا محمد عبد القادر
عرس ودرملية مرقتنا منو كيت..!
ياخ مافيهو اعادة..؟ |
عادل فضل المولى
عرس ودرملية دة نسخة واحدة
ما بيتكرر
ياخ اقول ليك قالو التصوير
ما قدر ينسخو بي نفس الطعم
عاااااااااااااادي تلقى العريس فى الواطة
هجيج شديد
الحق نشات شايفو حافظ وصايا ودرملية
تعال بدري
| |
|
|
|
|
|
|
|
|
|
Re: نشات الامام نجم البيت السعيد عريسا (Re: بله محمد الفاضل)
|
يا أبو حباب,,,,,,,
حبابك الف
يشهد الله أن هذا البوست
الجميل كجمال كاتبه, والشفيف
كما المتداخلين فيه,, حدثتني
نفسي بالدخول والمشاركة فيه,,
لأن الولد الهمام والأصيل وود البلد
الديمة رافع راسنا نشأت الامام
دايما جمايلو فوق رأسنا من فوق ,,
وله علينا أيادي بيضاء وزاهية...
حدثت نفسي بالدخول في البوست
منذ أن حدد نشأتنا وبهجتنا يوم
زفافه المشهود,, لكن يعلم الله
يا أبوحباب مالاقين فرقة,,, الى
أن جاءت مشاركتنا له يوم الحنة
,, في تلك الأمسية الرائعة التي شدت
فيها ايمان لندن,,,, وتبشيراتكم
أنتم يا أبو حميد زملاء المهنة
والدرب تشق السما وتملأ الآفاق
,,,,,,,,,,,,,,,,,,,,
ثم كانت مشاركتنا الكبيرة للحبيب
أبو النيش في ليلة حلمه بصالة
المعلمين أمس الجمعة 25 /4
,,,,,,,وكل القماري كانت تقوقي
في هذا الفرح الكبير,,,
,,,,,,,,,,,,,,,,,,,,,,,,,,
لذلك ترى يا أبو حباب أن
مشاركتي في البوست جاءت متأخرة
وما أبو النيش ممن يأتوهم متأخرين
إنه بهجة الرأي العام وريحانتها
وأريجها الفواح,,,,
يا ود عبد القادر والله البوست لقيتو
جاب جنس حبايب,, كل الغالييين
بدون ذكر أسماء,,,,,,,
أما العزيز ود رملية فقد أبكاني
بمفرداته العذاب, من أين جاء هذا
الشفيف.. تحياتي ودرملية فقد أعادتنا
كلماتك الرائعة, الى زمان ظننا أنه
ولى دون رجعة,,,
وتحياتي للأسرة الكريمة ويااااااااااأخي
والله واحشنا
,,,,,,,,,,,,,,,,,,,
ابو النيش مليون مبروك,,,, قلناها ليك
أمس وأول أمس والاسبوع الفاااااااااات
ونقولها لك الآن في حوش بكري الواسع
وان شاء الله نقولها لك في مقبل الأيام
مع الباكورة في الانتاج الذي سيأتي كما
عرقه الباهي ,,, فإن العرق دساس يا
صديقي
,,,,,,,,,,
للجميع محبتي
| |
|
|
|
|
|
|
|
|
|
Re: نشات الامام نجم البيت السعيد عريسا (Re: بخاري بشير)
|
سلامات
وعوافي
"وسيم الروح" بخاري بشير ..
وصاحبنا الباهر "ابوحباب" ..
ونشأت .."دمي" الذي زفته الحسان الي مضاجع الجمال ..
كنت يا بخاري اذا ما احتارت الروح وافتقدت ارابيب بسمتها وافراحهاعندما تضج الاشواق الي "روح والديً" وهم يمارسون غيابهم "في كمال حضورهم" ..كنت الجأ الي "مهابط" الاصدقاء.. واحتي الظليلة التي اتفيأ ظلالها الوريفة .. حديقتي الغناء التي تطربني ازهارها ويسكرني عبيرها ..
اتلمسهم في دمي "كالحمى" ..اشعر بهم .. اتحسسهم يمدون حناجرهم في "صوتي" ..اضحك بهم .. وابكي لهم .. وامتهن الفرح الصارخ لضحكة صغيرة ترتسم علي وجوههم ..
نشأت "تربى في روحي" منذ نعومة "سنه" .. بهرني هذا الولدالسمح بشهامته ومقدرته علي الحياة بصورة بسيطة ولطيفة ..
اعجبت به وحمدت الله كثيرا عليه .. كونه ما شق عليه درب الا واستعان عليه بالصبر والمثابرة ..هذا الذي مزق قاهر الظروف وهزمها في "عقر دارها" اذ ما تدلى لسقفه غصن شوك الا وهزاه بالثمار ..انظر الي دربه يا بخاري .. مذ ايامه الاولى في الراي العام .. مكافحا بطلا رجلا ثمينا ..لم يستكين للصعوبات ومافتأ يلقمها كل يوم "الف حجر خيبة" ..
كان ياتي الينا في الجامعة وفي عينيه بواقي نعاس .. كنت احسبه "نؤوم الضحى" فانتحيت به جانبا ان ياصديقي ماذا ألم بك "تنهد ثم قال لي : والله لي يومين ما مشيت البيت كنت بايت في الجريدة الشغل كتير" ..غصة قوية "سدت" حلقي ..ايا هذا الولد الصغير !! ..يومها ايقنت انني قد صادقت رجلا بقامة الجبال ..او اعلى شأنا وهيبة ..
مازلت اتذكر نظرات امه له .. وكانها تنظر "الي نهر عريض" ماءه عذبة وشواطئه حنينة مليء بالغنائم والكنوز..
كانها عندما نظرت اليه رسمت تاريخ حياة كاملة لونته ببرائة الامهات وطرزته بحنانها النبوي اللطيف.. فكان نشات جدير بهذا الحنو واللطف الالهي الجميل .. اذ كسر عود الخيبة والخضوع للظروف ..وكذا ابوه اذ يمم وجهه شطر خليفته الحبيب واتكأ عليه سندا صنديدا وجدارا لا ترهقه الرياح العاتيات ولا الظروف القاسيات ..
ثم انظر الي كل اهل داره "وكانهم قوم اتوا من الجنة في مسراهم فعرجوا علي الارض رأفة بساكنيها ليسقطوا عليها بركاتهم وكذا كراماتهم" ..
هذا الولد كان يمشي علي الارض "بقدميه الفلات" وكانه يمشي كالظل ..خفيف عليها رؤوف بها ..
وكان اذا ما اجتمع الصحاب الميامين .. كان كالغرة في جبين طفلٍ وليد..سيدنا في الضحك رغم الشقاء الذي يعانيه في العمل ..سيدنا في النكات رغم العناء الذي يلاقيه في الحياة .. سيدنا في الواجب برغم ضيق ذات اليد والمسئولية ..
كان كل شيء فينا ..
واجمل شيء في حياتنا ..
حتى "خبثه" ..كان خبثا مباح حلال .. لايمكن ان نلتقي جميعنا الا وكانت له حكاية .. تفاصيلها شيقة وتحمل في ثناياها اجمل تعابير المحبة .."يدفرها" هكذا علي مهل في "نص اللمة" ..فنضحك .. واضحك انا مرتين "مرة لجمال خبثه واخرى لحظي الجميل ان جمعني بمثل نشات وبقية الرفاق الطيبين" ..
هذا الولد السمح شق طريقه "في وعثاء الدروب وسوء انقلاباته" بشكيمة وقوة لا تخرج الا من "قلب اسد" ..
احببته كثيرا .. لصدقه ..لطيبته .. لجمال روحه .. لضحكته الملائكية الظريفة ..
وفوق كل ذلك "لبره بوالديه" ثم لوقوفه بجانب اخوانه الي ان اشتد منهم العود واستقام عندهم الفكر والعقل ..
نشات ياصديقي بخاري "عصير طاعم ولذيذ من تجارب قاسية وشاقة"..
هذه قطرة من وشل نشات الذي عرفته .. قطرة ضئيلة من طرف موج هادر وكبير ..
افلا ياتيه الفرح راجلا ومحمول ؟
افلا تُهب السعادة نحوه طائعة مختارة ؟
انه نشات الامام "دمي" الذي زفته الحسان الي مضاجع الجمال ..
وهنيئا لك ياعروسة .. برجل كالجبال هامة وكالعصافير روحا .. وكضحكة الاطفال قلبا .. ينضح شهامة وكرامة وطيبة واخلاقا وعفة وجمالا واناقة ومواقف كالانجم اذا ما الديجور عسعس ونسيما طيبا اذا ما لفح النهار ثوب الهجير..
يا صديقي الحبيب بخاري مشتاقين ياحبيب ..
وتجد الحزن "قد تملكني" لكون ظروفي لم تسمح لي بحضور هذه الاحتفالات بعرس الميمون "نشات" ..
محبتي لكم جميعا..
ثم كونوا كالبيارق ..
وبلغوا عني هذا الابنوسي الطف الاماني واعذبها ..وبلغوهوا عني اني احبه لله في الله بالله ..
| |
|
|
|
|
|
|
|
|
|
Re: نشات الامام نجم البيت السعيد عريسا (Re: بخاري بشير)
|
الحبيب بخاري
وهذا هو حال ودرملية
يكتب نفسه بمداد الصدق دوما
شفيف ومكتنز بحب الناس
صادق واخو اخوان وحبوب
لم ار فى حياتي شخص يبكي حينما يغادره الاخرون
الى العمل ولساعات
انه الحبيب ودرملية رافقته فى سكن جريدة الشرق بالدوحة
وعرفته عن قرب هين تستخفه بسمة الطفل
قوى يصارع الاجيالا
حاسر الراس عند كل جمال مستشف من كل شئ جمالا
رجل تستحي من ادبه المفردة وتتقاصر الكلمات عن ادراك جوهره
زول دهب عميق وحساس وهميم
لا يتذكر نفسه الا احيانا
يعيش للاخرين يهبهم بتواضع ايام عمره وضوء عينيه ان ارادوا
الفى يدو ما حقتو والدنيا عندو ضل زائل
زاهد وتقى ونقي
كان يحفزني على المساجد
كنا نتسامر بالشعر والغناء والنكتة اللطيفة حتى يشقشق الفجر
تبددت فى غرفته المشحونة بالشجن والذكريات ايام الغربة
حتى صارت وطنا ناوي اليه...
اله يديك اعافية ياود رملية
ويلهم والديك الجنة فقد خلفاك فى هذه الفانية
دليل طهر وسيرة نقاء وعزة وايمان
اللهم اغفر لهما وارحمهما.............
| |
|
|
|
|
|
|
|
|
|
Re: نشات الامام نجم البيت السعيد عريسا (Re: محمد عبد القادر)
|
سلامات
وعوافي
الحبيب "ابو حباب"..
يا صديق "البستني ثوبا ماهلا واخوك ضعيفوني"..
سلمت يا صديقي ..
غير ان "الذكريات اعظم بكثير من ان تنسى فهي تنمو وتكبر معنا فكلما انصرم عام اتقدت الذاكرة بالاشواق" ..
وربنا يديم بينا المعزة والمودة الاصيلة ..
بعدين "عمو بخاري" دا مالوا بيغيب شهر ويجي يوم ..
ومالك طه "قول ليهو ودرملية قال ليك انت باركتا لي عرسي والا لسة" ..
ايوا عشان انا عاوز ازعل من اي زول ما بارك لي ..سمح يا ابو حازم ..
ثم الحلبي "عسًل" وين يامحمد ..عشان ترسل لينا تلفونو نعمل ليهو ازعاج
| |
|
|
|
|
|
|
| |
محمد عبد القادر
Hussein Mallasi
طلحة عبدالله
AnwarKing
معاذ حسن
محمد سنى دفع الله
Yasir Elsharif
صديق الموج
طارق جبريل
أحمد طه
ebrahim_ali
Adil Osman
تاج السر محمد حامد
Elmosley
Gaafar Ismail
عبد اللطيف السيدح
kamalabas
munswor almophtah
ناذر محمد الخليفة
ترهاقا
محمدين محمد اسحق
الجندرية
ودرملية
Saifeldin Gibreel
مهيرة
Abu Mariam
نهلة محكر
Mohammed Ibrahim Othman
الفاضل يسن عثمان
عادل فضل المولى
Elawad Eltayeb
هاشم أحمد خلف الله
salma subhi
معتصم عيدروس
بله محمد الفاضل
بخاري بشير
ناهد بشير الطيب
انعام عبد الحفيظ
عامر تيتاوى
فيس بوك
تويتر
انستقرام
يوتيوب
بنتيريست