كلما سمعت أحدهم يتحدّث .. إقتنعت اكثر بأن بعض فنانينا مفروض يغنّوا .. وبس.
كمال ترباس .. يحاوره مذيع شاب بهارموني هذا المساء.. حضرت قليلا من الحوار.. أو الخوار.. إن صّح التعبير .. (معليش )..
المذيع (للأسف لم ألتقط إسمه) إجتهد في أن يأتي بأسئلة جريئة ويتجنّب المكرّر ومألوف من ناس موقف طريف مرّ بيك.. وما إلى ذلك..
وجدته أقرب لـ أسلوب لاري كينج (على علاته).. بعيد عن مدرسة عمر الجزلي.. وأبعد عن دفعته من مذيعي ومذيعات النيل الأزرق والذين أداؤهم يبعث على الغيظ.. الإحباط.. الشفقة.. واللامبالاة (بنفس الترتيب)..
المهم ماذا يفعل ترباس خلال الدقائق التي حضرتها من البرنامج.. يرغي .. ويزبد.. يحتد بصوت عالي .. وزهجة.. تصيب المشاهد المسكين بالتوتر.. لم أكمل البرنامج ولكن ما شاهدته كان -لا ريبة- مشروع شكلة..
_____ بعد تلك الدقائق الغريبة.. طلعت للسوبرماركت.. وبين ممراته.. وجدت نفسي أفكّر.. (ما عندي شغلة مش؟) لماذا لا يستثمر ترباس (وآخرون) بعض الجهد والمال في التعاقد مع خبير إعلام وإتصالات مثلا.. يوجّه مثل هذه اللقاءات فيحوّلها لحوار هادف وممتع.. بدلا عن كارثة..؟؟
الكلام عندنا ليس من فضّة وانما صفيح.. ألمونيا.. ومجاني..
إتقان الحرفة.. الغنا مثلا لا يصحبه طموح مماثل لصقل المهارات الأخرى خصوصا مهارات التواصل وضبط النفس..
_____
وانتهز الفرصة لترشيح الفنان كمال ترباس لجائزة أقصر نفس في اللقاءات الفنيّة..
توقّعت في أي لحظة.. على قول عمر الفاروق.. أن يقطع ترباس في المذيع كف.. يقبقبه من قميصه.. أو يخنقه ويكفنّه بالعمة الستة أمتار ديك.. هوغان ولا فينتورا كانوا ح يبدو اكتر دبلوماسية من الشفته ده..
ليهو حق الفنان الشاب فلان الفلاني أن يضرب أحدهم في حفلة.. وليها حق الفنانة علانة.. ان تزعمط إحداهن في مناسبة إجتماعية.. إن كان هذا أسلوب المخضرمين..
Quote: لم أكمل البرنامج ولكن ما شاهدته كان -لا ريبة- مشروع شكلة..
هلا يا نجوان وبالله ده وقت تمشي فيهو السيوبر ماركت دي شكلة او مشروع شكلة يتفوت (وش زعلان) كنتي ياخي تتمتي الفيلم الي اخر عكاز وبعدين نجي نسمع منك .... تربسة الكلام ضرورية علا قاسسسسية يا نجوان ولكن الفنانين والناس البظهروا في شاشات العامة يحتاجون لدورس وورش في فنون بلع الكلام ومباصرته
Quote: كلما سمعت أحدهم يتحدّث .. إقتنعت اكثر بأن بعض فنانينا مفروض يغنّوا .. وبس.
اولا نجوان وكيكي في بداية بوست .. دة مهم !!
الزول دة الكان بيسال مرة لقيتو ناطي تلفزيونيا في رقبة الجيعيلي زااااتو وخفت الشاشة تطرشق قمت سويتشد اووف خالص خالص ... امس برضو صدفة لقيتو في نفس الكورنر نفس الطربيزة وقميصو نفس القميص بس كمال ترباس بالجهة التانية ...ترباس جاي زعلان وانا كنت اصلا تعبان وجاي من الشغل يادوبك وتوقعت حاجة تبرد جوفي فلقيتم بس كل واحد بينطق في خلق التاني .... باين تاني كلو واحد فينا يغني براهو .... يلللا ياكيكوفيتش نعمل فرقة ونجوان حتلم البيزات
متربسة صباحكـ ليه يا نجوان ياخ !! أبحث عن كتابتكـ لاستمتع بطعمها و انسحب في صمت .. المرة دي قررت اكتب .. و ما ح اكتب كمين والله ولا فخ
الزول ده (ترباس) ..
مش الشيخ كشكـ رحمه الله قال فيه مع الست أم كلثوم : "إمرأة في الخمسين من عمرها تقول خذني في حنانكـ خذني ( يختي خدكـ ربنا) و ذلكـ الترباس يقول : (البعبدها) الا تربس الله رأسه " شكلها دعوة الشيخ أُستجيبت و ترّبس الله رأسه
مرة قابلته مع شاب صديقي في واحد من مراكز التسوق .. و كان وقتها قد انجز أسطوانة يغني فيها مع فتاة أثيوبية تدعي (هيمنوت) سالته : يا استاذ انت ليه قبلت انكـ تغني مع الحبشية دي !! مش انت زول فنان كبير و كده !! رد علي بصوت عالي جدا و زهج شديد: ياخ الرسول قال للصحابة امشو الحبشة .. مشو مية رجعو اتنين !! انا ترباس ده أحسن من الصحابة في شنو !!
و دي صورة لـ هيمنوت قيرما
_ عندي تسجيل ليو مع النجاشية هيمنوت بحاول ابحث عنه و اجيبه ليكـ هنا .
04-17-2008, 08:42 AM
Baha Elhadi Baha Elhadi
تاريخ التسجيل: 03-29-2008
مجموع المشاركات: 879
Quote: ولا سفر ولا إختلاط بالثقافات الأخرى بيعلمنا أدب الحوار والإختلاف..
يانجوان غالبية اهل بلادنا متخندقةentrenched في مجموعات صغيرة تبدء بالاسرة الصغيرة ثم الممتدة ثم القبيلة او اولاد الحي او المدينة .. حدود دولة الاسرة هي جدران بيتها وما خارجه غريب( في مكان اخر قي هذاالمنبر اشارت واحدة الي امر الغريب وكيف كانت امها تحذرهم من الغريب) وعلي هذا المنوال تبقي المقارنة النسبية ... بقي امر التمازج مع الغريب خارج حدود البيت ربما في راكوبة في وسط القرية او في المسجد.. الخ ...الاطراف برغم ما اصابها من انعدام للخدمات او الرعاية الحكومية تمتعت بالخروج من مثل تلك الخنادق بحكم ترحال بيني وتمازج وصل درجة التزاوج وتجارة بينية فلذا تجد اهلنا في اقصي الشمال رغم حاجز اللغة قد تمازجت مع اجناس كثيرة اتت الي هنالك ( تجار وفاتحيين ورحالة ووووو) وهنا اذكر ما قراءت مرة في كتاب كتبه احد عشرات المؤرخيين والاجتماعيين الذين كانو يتدفقون علي وادي حلفا قبل الهجرة " رايت في فصل دراسي واحد سحنات فيها جينات من اجناس كثيرة "...هذا الانفتاح كان ينعكس في ان مدينة وادي حلفا مثلا لم يكن فيهات الا شرطي واحد وانا اصحاب المتاجر والمطاعم كانو يتركو ابوابها مواربة او فاتحة في غيابهم وان البضائع كانت تبقي في الشوارع ...التمازج يخلق احيانا كثيرا من الشعور بالامن والاستقرار فلا يبدو الانسان في صورة المدافع دائماdefensive والذي ينعكس علي التصرف مع الاخر وانعدام لخطاب هادئ يطغي علي الحوار.....
واصلي وما تغيبي
04-17-2008, 09:16 PM
نجوان نجوان
تاريخ التسجيل: 04-01-2006
مجموع المشاركات: 2641
نجــوان سلام .... ترباس وقع في (قلمك) بالصدفة الموضوع ده بالذات (بكهربني) حد الموت ... لأنو دي ما مشكلة ترباس بس .. مشكلة ناس كٌتار عندنـا ..!!(حتى من يدعون العلم والثقافة " ودشليون شهادة" ) ........... هل سمعت الفنان المرحوم (إبراهيم عوض ) ...صاحب المصير وهو يتحدث ؟؟؟؟؟
04-17-2008, 09:27 PM
نجوان نجوان
تاريخ التسجيل: 04-01-2006
مجموع المشاركات: 2641
Quote: وجدت نفسي أفكّر.. (ما عندي شغلة مش؟) لماذا لا يستثمر ترباس (وآخرون) بعض الجهد والمال في التعاقد مع خبير إعلام وإتصالات مثلا.. يوجّه مثل هذه اللقاءات فيحوّلها لحوار هادف وممتع.. بدلا عن كارثة..؟؟
تفتكرى خبير الاعلام (او العلاقات العامه) دى ح ياخد كم??? و ح يضيف شنو لترباس ترباس ما مهم عنده الناس رايها شنو فى كلامو....لان نفس الناس دى على استعداد ان تدفع ملايين عشان يجيبوا ترباس يغنى فى عرس. عزيزتى نجوان احنا السودانيين دكاترتنا ما بيتعاملوا مع الناس كويس ....خلى فنانيننا....انا ما بقول كدى لانى شايفه ان الدكاتره اهم...بس هم اللى بيتعاملوا من الناس بصوره مباشره.. انا بصراحه ما بيهمنى لو كانت ترباس اصلا ما بيعرف يتكلم او لو كان منقوع فى مويه ترمس.. غناه حلو ...بس كلامو"....." who cares
04-17-2008, 11:33 PM
اساسي اساسي
تاريخ التسجيل: 07-20-2002
مجموع المشاركات: 16468
ياخي لو قصدك الحلقة بتاعة محاكمة مع الصحفي كابو . الحلقة دي حضرتها قبل فترة ياخي اليوم الحضرتها فيهو جاتني كاروشة من ترباس اجتهد اجتهاد غير مسبوق في انه يشبه نفسه بي عمك وردي وبي اسلوب وردي في اطلاق التصاريح النارية وفي النهاية قالها عديل للمذيع انه مافي زول بيقدر علي برنامجك دا من الفنانين الا انا ووردي بصراحة اليوم داك حنني ترباس لمن عيوني رقرقت ليهو مع وجود الكاروشة وردي منو يا ترباس البتتشعلق في ديلو يا ترباس ياخي وردي دا لو قعد يقح ساكت ممكن ينزلوها ليهو نغمات في الجوالات خليك في اللبن ابو لي بي
04-17-2008, 11:51 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
Quote: يا ترباس ياخي وردي دا لو قعد يقح ساكت ممكن ينزلوها ليهو نغمات في الجوالات
"جالك كلامى"??على قول المصريين.. اهو كلام صاحبنا اساسي اكبر دليل على ان الناس ما بتهتم كتير باخلاق الفنانين ..بالكتير كده الواحد تجيه كاروشة "ذى اساسي كده"... وردى رغم سمعته الماكويسه خالص فى موضوع التعامل من الناس ...فى ناس بتحبه جدا.. و ترباس رغم ان سكوته افضل من كلامه...لكن لسه بيتكلم و الناس لسه بتحبه.
04-19-2008, 10:14 PM
نجوان نجوان
تاريخ التسجيل: 04-01-2006
مجموع المشاركات: 2641
Quote: عزيزتى نجوان احنا السودانيين دكاترتنا ما بيتعاملوا مع الناس كويس ....خلى فنانيننا....انا ما بقول كدى لانى شايفه ان الدكاتره اهم... بس هم اللى بيتعاملوا من الناس بصوره مباشره..
في أشياء ترجع لعوامل ذات علاقة بالشخصية ومدى شمولية طموحها.. وأشياء ترجع لقصور في الإعداد المهني والتدريب.. ترباس مثالا للأولى .. بينما بعض دكاترتنا يعاني من الثانية..
04-18-2008, 11:17 PM
انعام عبد الحفيظ انعام عبد الحفيظ
تاريخ التسجيل: 12-07-2005
مجموع المشاركات: 8738
Quote: ليهو حق الفنان الشاب فلان الفلاني أن يضرب أحدهم في حفلة.. وليها حق الفنانة علانة.. ان تزعمط إحداهن في مناسبة إجتماعية.. إن كان هذا أسلوب المخضرمين..
نجوان إزّيّك لا ، دا حوار لازم يتشاف
وُدّي
ـــــ أنا في البعيد مشتاق لهمسة من الوطن يا نسمة
04-19-2008, 09:40 PM
نجوان نجوان
تاريخ التسجيل: 04-01-2006
مجموع المشاركات: 2641
نجوان وانا مفقوع بالطوة !,, يعني فهمتيني وده موضوع حانرجع ليهو تاني, لأنو كوم براهو,, كدي نرجع لموضوع {التربسة}:-
واحد من المعتقلين السياسيين زمن إعتقالات مايو والنميري أصبح زبون دايم لجهاز الأمن, ما أن يطلق سراحه حتى يعاد إعتقاله مرة أخرى قبال ماياخد نفسو,,لدرجة إنو أصبح يتضايق من أي حاجة ليها علاقة بالإعتقال والحجز,حتى إنو في مرة إعترض بشدة أن يقيم مطرب كبير حفل زواج شقيقته, ولم يكن ذلك المطرب سوى,,كمال {ترباس}!.
04-21-2008, 08:42 AM
نجوان نجوان
تاريخ التسجيل: 04-01-2006
مجموع المشاركات: 2641
نجوان المقصود يانجوان القلي والنجاض بالزيت الحار في طوة نارا ملهلبة!!,, والله والله ده أنا مع زولنا المعني! ,,شفتي كيف?!,, إنت مالك خليتي ونسة الدرر والدراب?.. إنتظري أنزل أجيبا ليك وارجع!.
04-22-2008, 12:42 PM
نجوان نجوان
تاريخ التسجيل: 04-01-2006
مجموع المشاركات: 2641
يا جماعة إنتو نسيتو أنو الفنان كمال ترباس فنان رقم، ونمبر ون كمان. نعم فنان "رقم" قالها بعضمة لسانه، وكررها أكتر من مرة !! يعني أنت لو عاوز تعمل ليك حفلة بمناسبة زواجك، هل يعقل أن يكون الفنان كمال ترباس ليس من ضمن المرشحين لإقامة هذه الحفلة؟ أبدا وطبعاً لا، وأكيد عرسك ما حيكون عرس، كان ماغنى فيهو الفنان كمال ترباس. وما دام الفنان ترباس "رقم" ورقم ما ساهل، وبدفع أكتر من غيره(وبرضو أرقام كبيرة) في المناسبات الإجتماعية، فمن حقه يا جماعة يتكلم قدر قروشه ، ولا شنو ياجماعة؟!
04-22-2008, 05:35 PM
نجوان نجوان
تاريخ التسجيل: 04-01-2006
مجموع المشاركات: 2641
كيفن ما بتفرق؟: (الأولي) بنقطتين، (والثانية) بنقطة واحدة!!.
(رغم): رغماً عنا ، فلا خيار لنا ولا يؤخذ برأينا فيما يقدم لنا كمشاهدين ،فقنواتاتنا الفضائية تستضيف نجوماً بمزاجها هي وليس بمزاج المشاهدين الذين صنعوا هؤلاء النجوم، ،وبدونهم لا نجومية ولا يحزنون(هذا هو واقع الحال في قنواتنا الفضائية ولسان الحال بيقول:" العجبو عجبو، والما عجبو،الريموت في ايدو والقنوات ما في أكتر منها !).
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
نجوان
)..
عبدالكريم الامين احمد
abubakr
فيصل نوبي
Baha Elhadi
Adil Osman
عمران حسن صالح
smart_ana2001
اساسي
انعام عبد الحفيظ
عاطف عبدون
لؤى
mamkouna
حسن الجزولي
Abdel Aati
إسحاق بله الأمين
فيس بوك
تويتر
انستقرام
يوتيوب
بنتيريست