|
تهويمات وخربشات على جدران الثورة والوحدة والوطن ... توصل (الربع الثاني2008)
|
كل ربع وإنتوا طيبين (7) حيرة
إني أتساءل عن شئ تتمزق خلفه أشلائي فالحيرة قد حارت ما بين الحاضر والماضي والليل صراخ يتردد من داخل حلبة أفكاري هنالك لوح يتكسر داخل لوح من جملة أسفاري والسيف اللامع في عمري يأبى أن ترقد أجفاني فالماضي يؤرقني واليوم القادم من مستقبل أيامي
(8) شكوى
زماناً عشتو بين الناس ووسط الناس أنا السارح بعيد وبعيد وليلاً نمتو بين حيطان توسوسلي وتقولي النوم كفاك نهيد وعيداً فرحبوا الجيل وغنالو وانا السارح يقولوليَّ داك يوم عيد دة عيدأ كنت برجاه الفرح دورين بغنيلو واذكر الوقفة والتوحيد حليل زمناً قضيتو اصبح سراباً ضيع آمالاً بسرحن في رمال الريد سهرت .. سهرت كانت نومة تطرد نومة من فوق الجفون وتعيد نجوم صيفاً دى عديتها وصدق والله بالتحديد وجريد برداً تحت سقفاً ظلال دومةً قريت بيناتن التجريد
مع تحياتي العطرة أبوفواز
|
|
|
|
|
|
|
|
Re: تهويمات وخربشات على جدران الثورة والوحدة والوطن ... توصل (الربع الثاني2008) (Re: صديق عبد الجبار)
|
إهداء : إلى الأخ العزيز في الطرف الآخر محمد عبد القادر سبيل (8) غضب الناس (الخرطوم بحري - أغسطس - 1984م) هوي يا ناس إيش الحاصل ...! وقفت هناك وسط الشارع وغضب الناس والعرق النازل سألت الحلة .. سألت القوم .. وكل يازول .. إيش الحاصل .. !! كاني غشيم ونسيت السكة ... وماني وليد البلد العاقل دي البلد السترت أمي وابويا وحتى أنحنا الكنا درفن ودرنا نواصل سألت الكون وكل من حولي ليش بنعاني ؟ .. أنحنا الكنا لكل مكابر نحن العازل ***** الجاري مسابق السكة علي الكتاب والماشي المكتب ورامي خضاره وقافل الباب وديك الماشة قديلة ورامية مسيرة ولاحقة الجامعة هديك يا داب يشحدوا تكسي .. يقول نشفان يوقفوا بص.. يلقوه ملان يسكوا الحافلة الفيها بننت وكم صبيان يمرقلك صك تصريح في ورقة وماضي عليها فلان ***** ركبت إصيفر معايا أفندي وسيم متدين دقينتو جديدة .. وريحتو أرامس .. قال حأبين قال يا ناس استغفروا الله ! قلنا استغفرناه .. قال المشكلة مش هي الدولة ! الدولة رشيدة واقفة شديدة وكاسبة الجولة المشكلة فيكم إنتوا إنتوا نسيتوا الرب وسفهتوا عبادة المولى والحاصل غضب العادل جاب البلوة ! ***** قتللو ... آآ زول كفاك آاحشاه !! الدنيا مزلة ؟ أنحنا عطشنا .. أنحنا اترقنا .. أنحنا عمينا وفي داب الدولة يا ما ضقنا مذلة تقولي الرب .. ! أنحنا عبيده وداك العاصي .. عصاكم إنتوا ما مولاه وأما السارق مد إيديته فشان ياكل ***** أبهلوا العيش والقرص الحار أسندوا الماشي اقروب ... واكسوا حفاه الزي النار سهلوا تمن القفة الفيها خضار روقوا حلم الديمة يهلوس بالاإيجار وقفوا طمع الصفوة والتجار وقبل ما ددخلوا علي الحرمات .. أنقروا باب الدار وخلوا العسكر يرجع تاني على ثكناته يكون نفسه ... ينظف سيفه ... يذيل العار ______ البيتين الأخيرين مهديات لحكومة الانقاذ والسيد نافع بن علي بن نافع مع تحياتي أبوفواز
| |
|
|
|
|
|
|
Re: تهويمات وخربشات على جدران الثورة والوحدة والوطن ... توصل (الربع الثاني2008) (Re: محمد عبدالقادر سبيل)
|
بقول مرحب واحييكي واخت الفرحة في عيني واناديكي
بمسك القبلة في إيدي واناجيكي وبادعو السيد المختار ينجيكي
باقولها كتيرة يا الحلوة وباغنيها بريدك يا نجم ليلتي وحلف بي روحي بفديكي
بخت صورتك واعاينليك اشوف البهجة في عينيك
أقبل غادي تاني أجيك ألاقي مرارة الغربة وشقاوة الريدة ليها طعم بدورها واشيلها من شفتيك
متين يا السمحة نتلاقى وتطلعي لي نغم .. تخلي إطارك المرسوم
تختي اسم الله في قلبي وتغني الفاتحة واليامين
واشيل واسمع ... واخت واركع ... دعاي تكبيرة لي خديك _____ أبوفواز - المملكة المتحدة - أكسفورد - أبريل 1980
| |
|
|
|
|
|
|
Re: تهويمات وخربشات على جدران الثورة والوحدة والوطن ... توصل (الربع الثاني2008) (Re: صديق عبد الجبار)
|
بمناسبة التعداد السكاني، وواجب كل من يستطيع من أبناء الشمالية المبيت غداً ليلة الثلاثاء 22/أبريل ، في منطقته من أجل الثروة والسلطة لمهدنا الحبيب !! أهدي هذه القصيدة ، إلى مروي حبيبتي
Quote:
|
" حضان بيوت بي فوق " الخرطوم بحري - فجر السبت الموافق 3-2-1979 مروي الجمال حزنانة تتزكر متوسدة الرصيف وبالجميز بتدثر سمعت حديث بيجيبوا الناس بيسرح في قليبي كدر خوير ابدوم صبح اكبر وشم ترابه واتشمر
لا عرف صراية لا كمتر ولا حتى الرصيف من تحته ما عمر
وانا البلحيل بعيد منفي بتحسر علي بلداً يمين بطراها كل ما اكبر
بقولوا خلاص ملصت تويبها الي تحت خدر وطمست لي حديد القون وفضل الصدير حضان بيوت بي فوق ينوم في مهالع الليل ويتحسر
وعلي بي الله دا الفضل .. كت شهاي بيوتاً بي طويب اخدر صبح منفي .. وكمان بكاي طلال بلحيل بتتكسر
حليل زمن السعيد بحماره يتبختر يقول بي شديد معاي السعدي والحرجل
وداك بي هناك يجلب القش يصابق في المغيرب ابدر مغيرباً ... باللبن قنانه ما بيودر
يجينا الليل .. وإن قماري نتسامر وإن الهلال بي تالى الطريف شمر بنضحك في ظلام الليل ..نقول ياريت هي تتنور
وهسع لا ظلام نور !! وحتى العمار يبس عول !
وبرضك لسه بطراكي .. وبرضي انتي الكبير منديل دموع العين .. وبتزكر
بتزكر قعادنا هناك تحت النيمة نتفكر بنبني بيوت .. ونمشي دروب .. ونتفرق نجر واطة .. ونعلي بكان .. ونتفرق ننادي النور .. يجينا ظلامنا .. نتفرق
وفي الآخر .. نجر الآهة والآهات .. وكل ما مرة .. نتفرق !!
كل دا بطراه .. وبطرا كتير !! يجي الملعون سويل ابدوم .. يكب واقوده في الحنضل ؟
لكن خلاص بي الله ما بنفتر .. ويمين جاييك يا مروي .. وحلف بي الله ما بنجفل !
دي انتي اليمة واليابة .. وانتي شيالة دريب الريدة بالأول
وانا الببكيك ما برثيك .. زي الشاعر القول !!
بخلي الذكرى أوابة ... وتبقى الحروف للطوبة جيابة ! ولي كل الأماني .. القافية سبابة ..
أما الكلمة .. للجامع وحتى النادي بوابة !! وتبقى الريدة .. والطورية .. والصبحية .... والضواية ...
هديتن مني ليك يا مروي نماية ... في قصيدتاً ... ديمة سواية
******************** تحياتي وحبي ومعزتي أبوفواز
| |
|
|
|
|
|
|
|