تلاقي ليك زول وتسألو وتقول ليهو : ويييييييييين يا فلان أول امبارح تشرّني كده وما تجي ؟؟
يردّ ليك فلان حيل مييت ووش تكسوه المسكنة : والله إنت ما عارف حاجة ساي
وبس يخلّي ليك الموضوع عايم كده والله انا متأكد مليون في المية معظمنا بيرد بي الإجابة دي ولو زنقتو الحاصل شنو تلقاهو ما عندو أيييييييي شي ولا في حاجة أصلاً
ما تتخيلوا الإجابة دي بتكييفني قدر شنو خصوصاً لمن الزول البيقولا ليك يكون ممثل بارع ويقرب يخليك تتحسس من إنك سألتو أصلاً ويديك إحساس إنو شايل كل هموم الدنيا في راسو وإنو مصائب الدهر معشعشة في نافوخو ..
إنها إجابات عائمة لأسئلة واضحة .. نعم في كتير من الأحيان تسأل الواحد سؤال واضح وتتوقع إجابة واضحة وما اتقوع إنو الإجابة بتكلف الزول حاجة .. يا محمد مالك الليلة ما جيت مناسبة ناس خالد ؟ يا زول بس خليها على الله ..
يا التيجاني وينك أمبارح ما شايفك في اجتماع لجنة تطوير الحي؟ يا زول كدي خليني انا أسة أها امبارح سويتو شنو ..
03-25-2007, 10:09 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
أروع الأعذار البتكييفني في حنان حناني لمن واحد يكون مطوول منك وقاطع خبر وهو المتلوّم فيك وما جايب ليك خبر أها مثلاً الزول ده يكون ليهو خمسة شهور ما شافك وما بيسأل عليك وإنت تكون حصلت ليك حاجات كتييرة وهو ما جايب ليك خبر أها الزول ده يكون طيلة الخمسة شهو الفاتت دي نصيييح وما عندو عوجة وسااامع بي حاجاتك دي كلها لكن ما وصلك يقوم الزول مثلاً قبل تلاتة يوم كده تجيهو ملاريا ويرقد عيان وتشاء الظروف بعد التلاتة يوم دي تقوموا تتلاقوا في مكان عام وأول ما تسألوا وتقول ليهو : وييييييين يا فلان ياخ خمسة شهور غاطس ولا بتسأل ولا بتبارك لي ولا جيتني في يوم سافرت ووو يقو بي كل بساطة يقلب الطاولة عليك بي ويرد ليك: ياخ أسكت ساي عشان ما بتسأل ؟؟؟ ياخ انا مشيت للموت وجيت وراقد عيان بي ملاريا بس أسكت خليها ساي لكن أهو الحمد لله اسة بقيت كويس ويا زول عازرك مع الجري ده أكيد بتكون ما فاضي تجيني
03-25-2007, 10:16 AM
tmbis tmbis
تاريخ التسجيل: 10-19-2002
مجموع المشاركات: 24862
والله يا عمــر .. الحركة دي امس متعت ليك بيهــا واحد بالليل..
يا تمبس ياخ إنت الحركة دي ممتّعني بيها ليك سنتين قدر أقول ليك كا جيتني مالك تشبكني والله انت ما عارف حاجة ساي .. الغريبة معتصم القاعد معاك طول اليوم سألناهو تمبس مالو قال لينا والله الزول ده تمااااام بس دي كعوبية منو !! يا ربي يكون معتصم برضو ما عارف حاجة ساي ؟!!
03-26-2007, 07:46 AM
هاشم أحمد خلف الله هاشم أحمد خلف الله
تاريخ التسجيل: 01-16-2007
مجموع المشاركات: 6449
والغريبة يا ابقوتة لمن تقول ليهم الكلام ده يقولوا ليك : اي والله عازرنك ياخ ..
تخريمة : واحد شاف صاحبو في الاشارة قام ضرب ليهو وقال ليهو : يا زول انت وين ؟ داك قالل يهو انا في البيت راقد والله تعبان شوية قال ليهو يا زول انت متأكد إنك في البيت ؟؟ داك قال ليهو ايوة ..ليي في شنو ..؟ قال ليهو يا زول كان كده انت وعربيتك سرقوكم
03-26-2007, 08:51 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
شخصي : والله افتقدتك قلت اشوف الكبتن دا الحاصل ليهو شنو
شخصو : والله بس زحمة شغل كده .. ونقلنا مكتبنا
شخصي : مشى خيالي لبعيد جدا واتخيلت ان المكتب نقلوه لي جده ولا تبوك
شخصو : لا والله نقلنا للملز
شخصي :الملز !!!!!!!!؟؟؟؟؟ الملز حقتنا دي ؟الهنا في وسط الرياض ؟
شخصو : ايوه الملز دي
شخصي : ياحراااااااااام ..طفشوكم اخر الدنيا الله يكون في عونكم
شخصو : المهم خلينا نشوفك ياحبيب
شخصي : ماحتشوفني . لاني مسافر وبجهز للسفر , بس خليها على الله جري شديييد اصلك انت ماعارف حاجة ساي
هههههههههههههههههههههه
يا خضر يا طيب: والله لكن ضحكتني ياخ قلت لي زولك قال ليك رحلنا الملز ؟؟؟؟ الغريبة هم كانوا في الملز في الأول لكن تعرف الملز دي بعييييييييييييييدة ياخ خصوصاً مع البنزين البقا الغااااااااااالي ده ..
خلينا نشوفك يا خدرة
03-26-2007, 10:59 AM
نهال الطيب نهال الطيب
تاريخ التسجيل: 03-14-2007
مجموع المشاركات: 1606
والله أنا زمان كنت بزعل وأشيل والوم في الناس لكن اكتشفت ليك احسن طريقة تجلي الزول علي قول المثل لو داير تهريه أسكت خليه يقوم لمن يتحرق يقول ليك وين مختفية بس بشغل الاسطوانة طوالي ههههيييي والله جنس جري والله الشغل ما مديني فرقة نهائي والله بقيت طوالي رافعة القزاز ومشغلة التكيف وفاتحة للشعب العربي كوبري الا من رحم ربك وهسه دي عذبت لي زول بالحركة دي
ود الفاروق صديق ابن عمي والله دايرة أجيك من بدري لكن مشغوليات وش غامز مش في زولة كده كانت بتقول ليك العرس في اليمن رخيص بس ياني ذاتها نهال الطيب عبدالهادي بت عم ميرغني عبدالله
03-26-2007, 04:28 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: يقوليك اسكت ساي الموبايل بتاعي مااااااااااضرب والارقام كلها اتمسحت
ياخي انا كايسك من زمان مالاقي ليك سكة
نوع دا يخليك تشك في نفسك وتلومها لوم شديد
والعجب لمن يقول ليك جاتني نزلة فجأة كده !!! ويقوم عشان يأكد ليك يديك كحة كحتين كده في السماعة وهو بيتكلم نظام كلامو صاح .. والله يا عمر كح كح موجوديين كح كح بس تقول شنو نزلة وكده كححححححححححححح كححححححححححح كححححححححححح ياخ خليك زي عبد الكريك الكابلي وقول لي: معليش يا ابو عمير انا مصاب بالرشح
وطااااااااال إنتظاااااااري ليلة السبببببببببببببت
03-26-2007, 05:00 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
من أشهر أنواع المخارجات "أها ما أعطلك" بتنفع في حالة التلاقي وجها لوجه و أيضا في التلفون بس تعمل حسابك إنو في ناس معلمين ما بتمشي فيهم النوع المابيفك يدك بعد السلام ولما تقوليه ما أعطلك بسرعة يرد ليك "أبدا ما عندي حاجة" و يواصل دا أحسن حاجة تختها ليه واضحة و تقوليه "طيب أنا مستعجل " و تتخارج و بعد مسافة مأمونة تتلفت عليه و تجامله بي "بينا تلفون" ---------------------- أها يا عمك ما أعطلك
والله إنت يا عمر زول لذيذ خالس ..وما طالبني حليفة .. الواحد يخش بوستاتك والبسمة تسابقو .. تهبّّّش الناس في أوتار حساسة .. طبعاً الزول بعد ما يقول ليك عذرو المهبهب ويخليك يقول لي نفسو " والله ركبتو ليهو جنس مكنة " ..
ويعطيك العافية .. (بلبناني وكدة )
03-26-2007, 05:33 PM
Khalid Saeed Khalid Saeed
تاريخ التسجيل: 12-12-2005
مجموع المشاركات: 2605
وينك ياود الفاروق .. تعرف مرة أنا كنت زايغ لي من زول .. لأني معزوم في لمة لزيزة وزولك ده مابينفع معاي في اليوم ده بالذات .. المهم سألني بكره البرنامج شنو .. قلته ليهوا ماشئ بايت في الخرج .. المهم تاني يوم مشيت لي جماعتي من بدري بدري .. ولكين ذي ماعارف السودانيين .. إتأخرنا في تجهيز الحاجات لقايت ما صلاة الجمعة جات فإقترح الشباب نصلى الجمعة في منفوحة بعدين نتخارج .. المهم صليت الجمعة .. داير أطلع من الجامع .. ألقى ليك زولي زاتوا .. مسكني من يدي وقال لي ماقلته لي بايت في الخرج من إمبارح .. قلته ليه أسمع أطلعاكه بره الجامع وبكلمك بالحاصل .. قال ليه كلمني في الجامع هنا ... قلته ليه داير أكضب عليك .. وفي الجامع مابقدر أكضب . زولك كعد يضحك وقال ليه عفيتك .. إتخارج .
Quote: بالمناسبة مالك اليوم داك ما جيت مناسبة ناس خالد ؟
تحياتي ليك وللباقين ( الباقين ديل ماعارفهم منوا ) لكين مرات برضوا بتخارج .. تقول للزول تحياتي ليك وللباقين .. يفرح فرح شديد .. ويشمي يخسر ليهوا بطاقة بي 100 ريال عشان يوصل تحياتك للباقين ... الأرباب والله خليها ساكت ..
03-26-2007, 05:37 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
ياخ لكن بالجد دي حاجة جميلة خالص وأول مرة أحس إنو منبر بكري ده منو فايدة وممكن يعمل حاجة كويسة نستفيد منها
Quote: مش في زولة كده كانت بتقول ليك العرس في اليمن رخيص
ااااي لكن كمان لمن زريناك وقلنا ليك خلاص وصفي لينا بيتكم عشان نجيكم قلتي لينا انا سودانية وعليه الشيلة 12 12 والمهر استرليني ما سائل في دولار ويمة انا زولي ما جا يا يمة انا زولي راجية ..
ويا لها من أسرة أسرة ال عبد الهادي.. أسرة لا يوفيها هذا المكان حقها .. ما ان قرأت اخر أسطر ووجدت أسمك مقرون بهذا الإسم إلا وعاد بي شريط الذكريات لزمن أحسبه من الزمن الجميل.. الفتيحاب وما ادراك ال ميرغني والخالة الحنون عواطف ... ياااااااااااااااااه يا نهال على ذاك الزمان وليته يعود .. كم أتذكر ذلك المسكين الذي دخل دون أن يطرق الباب ودخل ووضع " مخلايته وعكازه" ثم كبّر تكبيرة الإحرام ليصلي .. وما ان سألناه " يا زول انت بتخش سااااااااااااااااااي انت قايلا زريبة ؟؟؟" فما كان منه إلا أن قال " هو ده ما جامع يعني ؟؟؟؟"
وذلك الحرامي الذي دخل الغرف ولكنه لم يستطع الخروج لتعقيد خريطة المنزل فما كان من صدّيق إلا وردد: " في باب بي يمينك بيطلعك " بالأمس كنت اتحدث إلى ميرغني تلفونياً وكعادتنا نجتر شريط الزكريات وكان قبل فترة قد أخبرني بأن عمار خطب !!! والإندهاشة كانت في العروس !!!!! الظاهر نحن كبرنا يا نهال مبروك لي عمار ووصلي ليهو المباركات دي بالله ..
تخريمة : يا زولة كدي بجيك بي رواقة بالرغم من انك قفلتيني بي حكاية صديق ابن عمي دي والواحد تاني ما حا يقدر يشاكلك أو يشاغلك يا زولة انا حا أنكر ليك مرغني ده حطب ولاااااااااا بعرفو ولا شتين
03-26-2007, 06:03 PM
نهال الطيب نهال الطيب
تاريخ التسجيل: 03-14-2007
مجموع المشاركات: 1606
عمر تصدق من كلماتك ونكش الذكريات العبرة خنقتني ياااااااالللللللههه كم اوحشوني وكم اشتقت للعقدة في الحوش وخالتو عواطف بتصلي وعمو عبدالله وونسته الفاهمة وميرغني يشيل ويخستك بينا ووسارة وعفويتها وعازة ياااللله لي منها زمن كتلاني بالشوق وحمودي والمذاكرة بالليل وكان لي صديق الفردة خليه ساي ده ما موضوع براه ياحليلهم جد جد
والله ما قادرة اكتب
عمار خطب فتونة العسل
ويازول انا زاتي ميرغني ما بعرفه وخش شمال طوالي
03-27-2007, 00:32 AM
خضر الطيب خضر الطيب
تاريخ التسجيل: 06-24-2004
مجموع المشاركات: 10116
ااااي لكن كمان لمن زريناك وقلنا ليك خلاص وصفي لينا بيتكم عشان نجيكم قلتي لينا انا سودانية وعليه الشيلة 12 12 والمهر استرليني ما سائل في دولار ويمة انا زولي ما جا يا يمة انا زولي راجية ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
tmbis
abuguta
خضر الطيب
Rihab Khalifa
هاشم أحمد خلف الله
زول ساكت
نهال الطيب
محمد البشرى الخضر
Khalid Saeed
فيس بوك
تويتر
انستقرام
يوتيوب
بنتيريست