رسالة (مناضل جنوبي) لاخوته في( دارفور) وابناء (الهامش) حول العلاقات مع اسرائيل.

Quote: الانحياز للامة العربية والاسلامية استنكاح سياسي سامبلا ....!! مقال (1) ...من( لحدي يوم القيامة) بقلم : محسن طه [email protected] قريت تعليقات ومقالات وحوارات في سودانيل لبعض المعلقين العرب السودانيين – الناس القيافة البحبو اللطافة- وهم ( عبد الوهاب الافندي - مقال اساءة لدارفور واساءات الي السودان ، وكمال عبيد وزير دولة بزوارة الاعلام والاتصالات ، نافع علي نافع مستشار رئيس ، وبعض معلقين عرب من مصر – يا اخت بلادي يا شقيقة – وهم هاني ارسلان رئيس وحدة دراسات النيل وشؤون السودان بالاهرام – هاك الهنا دا- ، و اماني الطويل الخبيرة بالاهرام وشؤون السودان. وهنا في المقال دا ما عايز اكتر مع المصريين ديل والعايز رد عليهم يمشي يقرا رد الاخت تراجي مصطفي في سودانيزاونلاين – لكي بركات الرب نيكانج – في ردها علي مثقفين الطهورة الفرعونية... –شفتو الفرعنة لما وصلتنا وصلتنا في ياتو حتة.؟! (وعلي هامان يا فرعون !!) وما يلفت النظر هنا – وكلكم نظر – هو القاسم المشترك للآرائهم في الرفض المباشر لوجود اي تحالف سياسي بين دولة اسرائيل – اهل سيدنا موسي عليه السلام- واحدة من شروط الايمان ... الايمان بالرسل والكتب السماوية- هو سيدنا موسي دا اتربي في بيت منو....؟- وبين الاخوة الثوار في حركة تحرير عبد الواحد محمد نور – وما عليك يا عبد الواحد زمان برضوا كانو بقولو حركة قرنق بدلا عن الحركة الشعبية لتحرير السودان - واجماعهم الغريزي لو ما قلنا السكوتي ... انو دارفور تاريخيا هي (ارض القران والاسلام) وهم منحازين تاريخيا لقضايا امتهم العربية والاسلامية. والسؤال البسيط هنا للاخوة العرب المصريين والاخوة العرب (القيافة) السودانيين ... هو كلمة تاريخيا دي معناها شنو بالعربي عليكم الله...؟ والمعزرة علي السؤال البسيط ... فانا دي عرب تااي عربي جوبا- بنتكلم بالطريقة دي (ربنا قي دردك براميل تاهو في السما وناس ما قي دورو كوروجو) .... وانا جادي في السؤال دا ومعاي ناس كتيريييييين تنطبق عليهم صفة (واللذين يقراونه وهو شديد عليهم) واحتمال يمشوا النار كان ما خفنا الكضب.... السؤال التاني الأبسط من الأول هو مش في ناس قالوا السبب الأساسي لمشكلة دارفور (جمل) ولا حاجة كدا...؟ وتييب يا جالودونقات العروبة والاسلام الجمل دا سرح وقطع الصحرا العربية كلها لحدي ما وصل تل ابيب كيف...من المسجد الحرام الي المسجد الأقصي وما بالليل با النهار عدييل كدا ... توش جو الجك...؟ والسعالين ديل موجهين لمثقفين الصحراء ، أنينا وحات الله ناس غابة ساكت ونسوانا حمالين حطب ظاتوا لا مثقفين ولا يحزنون ، هي الغابة فضل فيها جنبة ما ولعت فيها النار علشان نلقي لينا وكت نقرا ونتثقف زي الناس القيافة بتاعين اللطافة...؟ توضيح قبل ما اخش في موضوع (دارفور واليهود) انا هنا في المقال دا ما داير اخوض معاكم اي نوع من الحوار الممكن تسموهو انتو (العلمي والموضوعي)بصراحة عشان نكون واضحين من الأول وبطلت احلم اشتغل في الامم المتحدة لكن جاهز للعمل في جامعة الدول العربية وبي عربي جوبا كمان والربنا يقدروا كدا يجي يقول لي انت ما عربي وما بتتكلم عربي ولا لسانك (أغلف) ولا حاجة والسبب بدون لف ودوران مقدرتكم الخطيرة علي عدم الجدية والفلاح في التعليقات علي أدني الامور وفك المسائل الأكثر اهمية عكس الهوا ... وخليكم معنا هنا في الهوا البارد ده بعد دا هاكم أعرفوا كلمة تاريخيا انحنا بنفهما كيف تاريخيا وحاليا... شوفوا يا اخوة مافي اي مشكلة للعلاقة مع اسرائيل ودارفور والسودان كلوا كمان ، ومسألة انو دارفور منحازة تاريخيا للأمة العربية والاسلامية دا كلام شكلوا انو الناس البقولوهو ما دايرين حوار جادي وعملي لحل الدواس الحاصل الان مش تاريخيا العاجباكم دي،واحسن تعامل مع نوع الكلام دا هو المثل القايل (الجمل ماشي والكلب بنبح) وما اصلا سببها جمل علي حسب قولكم، اها انبحوا زي ما دايرين، لكن الدايرين نقولوا انو الفرق بين دارفور وعبيدها و – مواليها- واليهود هو فرق في التعريف القانوني والمجادلات بين (العبودية) و (الهلكوست) شوفتو كيف...؟ ومرة في مسألة العبودية ومحرقة اليهود ... سأل نجم الكوميديا الامريكي الاسود كرس رووك جمهور المستمعين لنكاته اللازعة (يوو نقرو) من هو افضل زعيم في الوقت الحالي – مش تاريخيا- ممكن يمثلنا كسود في امريكا ....؟ العبيد كلمهم قالوا زعيم (امة الاسلام)(اسلامنيشان) لويس فرخان، فقال اوكي كلام صاح ، اوافق علي فرخان، فهو افضل زول عندنا سياسيا واحسن من يقوم بحملات التبرعات والتنظيم صاح، لكن مشكلتو واحدة بس انو بكره اليهود، ففي كل خطبة لازم يتكلم عن اسرائيل ... قال (كموون نقروو) انتو عارفين ما عندنا مشكلة مع اليهود كعبيد ، المشكلة حقتنا في الجانب القانوني للعبودية واليهودية، فالعبودبة كانت عمل تجاري قانوني – وماتزال بمعاني اخري- والهلكوست عمل غير قانوني ومدان، واليهود الان بيدفعوا ليهم قروش بسبب المحرقة واعتذارات كمان ونحنا العبيد الزنوج مافي زول ادانا قروش ولا اعتذر لينا، بالرغم انو العبيد في امريكا اشتغلوا ميتين سنة بلاش – ملح يعني- ) اها بعد النكتة دي يغلبنا نديكم درس – بعد الغدا – باللغة العربية الفيها الحاجات السمحة السموها (المجاز ، والشبه والمشبه به والقياس والطباق والجناس)الخ .... تفتكر يغلبنا....؟ وهو في شنو غير قواعد اللغة العربية الخلت الناس والدكاترة كمان يقولوا ناس دينق واوهاج وابكر – حتي لو كان سيمائهم في وجوههم من اثر الشلوخ- يكونوا عرب وعرب العرب كمان ، وفي كتب كمان مكتوبة بالاتجليزي وكاتبنها دكاترة مشلخين رغم التطور الفني في الغناء من – السمحة أم شلوخ لي يا جميل يا سادة حبك جنيي زيادة – الجن الكلكي انو مافي اي مشكلة بين عبيد وموالي السودان واليهود – اقعدوا العبوا لحدي ما نألف كتب ونقول ليكم أنحنا يهود اليهود عديل ونغالط ليك ناس اسرائيل نفسهم- عبيد دارفور والسودان عموما ما شغالين من مجان من زمان وتاريخيا- ولا كيف..؟- يا ناس هوي العربي دا والله ما اتعلمناه بالساهل ولا بأخوي وأخوك ، جلد بي سوط العنج الممسح بالزيت لحدي ما زيتنا طلع. شغالين مجانا في مشاريع الجنقو في (القضارف والرنك والجزيرة) الا بس حبة فكة نشتري بيها الكجيك والشرموط وشاي – عشان الاوفرتايم بالليل لقراية القران- اوفرتايم شنو قولوا فولتايم عديل كدا ...- السكر السكر يا ابو عشة بدرجة لواء – ويجيك واحد قاعد في المانيا ويقول ليك (خليها مستورة)، وكانوا بعد الشغل الملح دا يمشوا ويقولوا الحمد لله – المال تلتو ولك تلتو كما ورد في سفر التكوين، والله اعلم- حتي وصلنا لمرحلة كتلتو بس ، والمحرقة ما مدورة في دارفور وقبالها الجنوب ونفض جبونات عديل كدا تاريخيا وحاليا، ياربي يكون قاعدين يعملوا فيهو اليهود ولا حاجة...؟! وبعدين تعالوا هنا يا ناس دارفور انتو قايلين هسي ناس الوسط ديل زعلانين الزعل دا كلوا عشان عبد الواحد عمل علاقة مع اسرائيل ...؟ لا بالعكس هم زعلانين مفرفرين من نفسهم عشان قمتوا سبقتوهم في فكرة التطبيع مع اسرائيل، والفكرة اصلا عندهم من بدري وعجينا خمر لامن دفق، لكن بسبب الغلطات حقتهم في منو البعوس ومنو البمسك القرقريبة ومنو البخت الطايوق في التملة، راحت في زحمة المواصلات بين القصرين – وهم عندهم جماعة تخصص في طرشيق الجلسات بين القصرين، ماهماهم عدادم رامي تش(حلاوة لبن)- ... هو اصلا كلمة تاريخيا دي قايلين قاصدين بيها شنو...؟ هم واجعهم وممغصهم مغص الدوسنتاريا انو الناس بقت تفاتيح وناقشة البيحصل شنو تاريخيا وفي مرادهم تستمر الحالة زي زمان ، لما يجي واحد (ود بلد) ويسوق ليهو كم واحد من (دارفور، جبال النوبة، الجنوب والشرق) ويقول بيهم ارحكم يا جماعة السعودية نشوف لينا دعم لخلاوي دارفور (نار التقابة تاريخيا) وهمشكوريب والرنك – ولا شنو يا شيخ منقو اوعي تكون لسه معلق بين القصرين...؟ يا زول امش المانيا المعارضة الخارجية احسن من الداخلية- وهناك في السعودية ناس خادم المقولتين العربية والاسلامية ما بقصروا – يقصر الملح ولاكيف...؟- هناك ود البلد صاحب التفاكير يختو ليك في فندق انتركونتنينتال الدولي، اما الموالي بتاعين الرنك ودارفور وهمشكوريب يشوفوا ليهم لكوندات – لكن احسن من حيث النظافة والتبريد مازي بتاعة السوق العربي ابات عناقريب كلها قمل ومرقوت، ياخي ماهي قاعدة في السوق العربي حيكون فيها مخدات ريش نعام يعني وتنجيد وفرش جديد ...؟- المهم بعد المؤتمرات الاسلامية – عفوا اقصد المؤمرات – لقد تم بحمد الله منح الوفد الاسلامي (السوداني) مبلغ من المال – وبي الجورج- وخمستاشر كونتينر من المصاحف الشريفة تعفي من الجمارك في ميناء بورتسودان . وفي الخرطوم – محل الريس شبعان نوم – يقوم ود البلد بعقد اجتماع سريع جدا جدا- السبب وصول وفد ايراني وماليزي بالمريديان- اجتماع مع كل من الموالي أدروب ومنقو وابكراية – المهم يا جماعة حمد الله علي السلامة وبعد دا كل واحد يشيل ليهو ليهو خمسة كونتينر مصاحف ووزعوها في همشكوريب والرنك وخلاوي نار التقابة كويس...؟ لحدي ما نلقاكم في المؤتمرات الولائية انشاء الله، وبعدين يا شيخ منقو جيب اضانك جاي ، ياخ ما تركز شديد في الرنك حاول خش جوه شوية في فشودة علشان المرة الجاية لما تسافر يكون عندنا كم شارلي نطلع ليهم جوازات - ودبلوماسية كان ما عاجبكم – ومن شارلي يكون شازلي – ولاشنو يا منقة- ما تخاف حا اذكيك تذكيه شحمانة عشان تكون محافظ فشودة . كلام خارج الموضوع لي شيخ منقو:- هو زول قرية ، بلغة الشلك (كدي جالدونق كي نوو جاأل، بن قن كنج ماراج، كوب ني ضابوونج يي لينغ لانق، كوب وجال بيت ساكيت ) أشرح الكلام دا بالعربي ولا فاهمين ...؟ عشان انا ما داير واحد يجي ناطي لي ويديني نوط العنقريب وكلامي يروح في شوربة شرح العنقريب – انا عنقريبي دا حق عزابة طق طق وكاع كاع، وما مشكلة انا الكوكاب حقي جاهز وممسح بسمن الشلك وحاجات تانية اصلوا- ما حامياني- لو جيتو تتظارفوا في الموضوع دا. طيب عرفنا القروش الجات من السعودية قعدت في الخرتوم والمصاحف مشت همشكوريب والرنك ودارفور طيب السؤال القروش المجننة قرقوش قاعدين يصرفوها وين قايلين ....؟ بتتصرف لو ما بتفهموا يا موالي لي اولادهم في اوربا وامريكا وفرنسا البدرسوا بالانجليزي والفرنسي – ولا عندهم حصة عربي زاتو- شوفتو كيف يا ناس نار التقابة المنحازين تاريخيا لامتكم الجاهلية العربية الاسلامية...، وديل البرة السودان، اما الجوه السودان لي اولادهم البقروا في المدارس المسيحية حقت الكنايس الكاثوليكية ، امال المدرسة البيريطانية حقت (الدب محمد) بتصرف بالاسترليني من وين ومن جيب ابو منو من دارفور، ولا كانت بتدرس في دارفور ولا في واحد من اولاد دارفور في المدارس الكاثوليكية بالخرطوم وفي المدن الاسمنتية في الخرطوم وممكن يكتبوا قدام باب العمارة يافطة (هذا من فضل ربي) تاني في زول يقدر يقول حاجة بعد ما يقرا اللافتة دي ....؟ اي زول بجر واطي ولو كان شيوعي –مضيع زمنوا في وهمة العدالة الاجتماعية- اوكي نخلي شوية اولاد البلد الناس القيافة وعرب العرب ونرجع ليهم قدام ونشوف واحد شحمان زو وزن ثقيل تاريخيا – ياربي يكون منو ....؟ ايوا تليك لقيتو ليكم – يوسف القرضاوي الموظف الاسلامي بقناة الجزيرة وصاحب البرنامج العجيب الاسمو (الدين والحياة) وطبعا الجالدونق القرضاوي اتشمشر – وهو اصلا بتشمشر في اي حاجة حتي في الفجل في الجنة – وقال مع القائلين في مسألة دارفور كـ (مؤامرة صهيونية وغربية) ونوع الكلام الايزي داك – الممكن يقولوا اي نقلتي علمي وفكري في سوق العرب الموضوعي والعقلاني تاريخيا- لكن الجالدونق القرضاوي دا اصلا ما ممكن يدقس ويخلي واحد من اولاده يدرس في جامعة الازهر (الشريف) ولا جامعة القران الكريم وافريقيا العالمية في الخرتوم، بابناء الواعظ حسب راي فؤاد عجمي في مجلة (فورين بولسي – عدد مميز- اكتوبر 2003) واحدة من بناتو درست بجامعة تكساس – جورج بوش منها- وحصلت علي الماجستير في (علم الاحياء) لاحظوا كويس علم الاحياء (البايولوجي) وليس علم (احياء الدين)، وابنه حصل علي الدكتوراه من جامعة سنترال فلوريدا في مدينة اورلاند، وابنه الاخر انتسب الي برنامج دراسي امريكي بامتياز الا وهو برنامج الماجستير في ادارة الاعمال بالجامعة الامريكية في القاهرة ) واحتمال ولا واحد من اولاده الامريكان ديل ما حافظ سورة الكهف – وبالله يا ناس دارفور لو تاني جاكم أي واحد ولو القرضاوي نفسه فتح دينوا في موضوع دارفور دا ختوها معاهو قرض قولوا ليه اسمع يا معلم يا قرضاوي امشي افتح الاية (27) من سورة الكهف وقرضوا علي كدا، اصلا ما تكتروا معاهو ولا حاجة ولا اي زول مستنكح بتاع الامة العربية والاسلامية ، انتو خايفين من شنو ولا فضل ليكم شنو في الدنيا...؟! ولا خايفين تمشوا النار يوم القيامة...؟!! انا مستعد اوريكم خمسة ايات بس في المصحف تخليكم تخشوا الجنة وسمان كمان زي ناس (المنشية والمعمورة) وتوفروا باقي وكتكم عشان اولادكم يدرسوا الدراسات حقت اولاد القرضاوي في امريكا، واحتمال تخشوا الجنة قبل بن لادن والقرضاوي والترابي زاتو ، ولا انتوا لسه شايلة فيكم المكنة حقت الامة العربية والاسلامية ....؟!! غايتو لو لسه شايلة – اقول اللهم قد بلغت اللهم فاشهد- وبراكم شايفين الموظفين بتاعين العربية والاسلامية شغالين كيف ، لكن كدا واحد من اولاد دارفور ولا دينكا ولا شلك ونوبة ولا ناس ادروب يقول داير يدرس ولدوا علم ادارة الاعمال (بزنس) زي اولادهم ، حا يجيكم القرضاوي نفسه وبدون خجل منكم ولا من الله ويقول ليكم انتو ما عارفين امريكا دي عدو العرب والاسلام وفلسطين تاريخيا ، ايوه فلسطين الاولادها بدرسوا منح في جامعة الخرطوم واحيانا بشاركوا في ضرب الطلاب السودانيين في المظاهرات مع اولاد صلاح قوش- ياخ بلا فلسطين معاكم هو المخلينا (فلس طين) غير القضايا الهايفة شنو...؟!!. نواصل ، القرضاوي ممكن يجي يقول ما تدرسوا في المدارس القومية في السودان- والان المدارس دا زاتها انتهو ليك منها لما عرفوا بقت تجيب ليهم الفصل العلمي رياضيات لكلية الهندسة جامعة الخرطوم (في الفترة السموها امتداد مدرسة الفاشر الثانوية ، وعارفين الجلاكين الشلك والدينكا والفور والهدندوة الشغالين عتالين في بورتسودان وجنقو سامبلا ساكت بقولوا – خلاص يا اولاد مافي قروش للقراية بره السودان امشوا اقروا في المدارس بتاعت الجماعة القوميين - ،ويمشوا الطلبة المدارس (ردا دمورية مقدود من ورا والكرعين مغبشين والراس كلوا قمل و قوب (زي الريال ابو جمل) وهناك في الدارس يلقوا العجب والصيام في رجب – كرن كرن جرس الطابور، اول حاجة يمرقوا ليك الطلبة (الوسخانين والمعفنين و المقملين ) ديل والمعلمين ليهم تلاتة شهور ما صرفوا الماهية ويقعوا ليك ضرب ضرب ضرب ضرب بسوط القرنتي وخرطوش الموية الاسود لمن يآمنوا , وبعد داك يسمعوا وبصوت عالي نشيد العلم نحن جند الله جند الوطن ، ويخوشوا الفصل يقعدوا ارضي يا عبد ، والفصل فاتح من الجهات الاربعة والكتاحة ماشة وجاية وجايبة معاها اكياس الصعود الفاضية الفي الكوشة الجمب الفصل ودا غير ريحة البول بتاع السكورجية المارقين من الانداية بالليل بعد ما ضربوا (العرقي والعسلية والكجيمورو والقام زوت) وبعد داك الحصة عربي املاء منظورة – هسي منقوشة نقش- الاستاد خلوا بالكم كويس وقروا وراي (انا طفل عربي من العراق والشام والسودان) والاستاد ذاتو ممكن يكون دنقلاوي ولا فلاتي ما عارف ، والحصة التانية تكون دين – يا ديني العربي- وهاك الماحافظ يطلع برة والضرب مستمر وتعال شوف الطلبة ساعة الفطور – دا لو في فطور ولا الحنفية شغالة – جاك يا عربي (انتي دي تفل من عربي وانا داك تفل عربي من الجام والسودان ) واستاذهم (واللاهي ناس الوزارة الزفت ديل تلعوا دينا وميتينا ظاتو يا شيه) وبعدين ببساطة يقولوا ليك في اذاعة امدرمان مدارس ( زقلونا وطردونا وكرتون كسلا وديوم بحري ) لم ينجح احد، ولو في واحدين في مدارس تانية نجحوا يكون راجيهم الكبري الكبير (الشهادة السودانية) لو كنت جايب 90% في الرياضيات والكيمياء والفيزياء – حقت ناس القرضاوي- وكان نجحت يودوك جامعة (القران الكريم، امدرمان الاسلامية، وافريقيا العالمية) وغبر بوابة التمييز الايجابي – بفهمهم- قانون قبول الطلاب من الاماكن الاقل نموا او مناطق التداخل اللغوي، وهناك في الجامعات الاسلامية دي يدرسوهم لغة عربية تاني وعلوم الفقه والبيان والشريعة واصول الدين والدعوة) وهم طلاب - كما قالوا- جايين من مناطق اقل نموا – يعني بمفهوم السياسة البسيط عند الكفار هنا في الغرب محتاجين (طرق وكباري ومستشفيات واجزخانات ومعامل طبية وبيطرة وزراعة – شفتوا المهن دي كيف...؟!! واخيرا عرفنا انو العلوم حقت المناطق الاقل نموا ما فيها زول من ناس الانقسنا ولا جبال النوبة ولا مناطق ناس ادروب – قولوا ليهم تيب- وجنوب السودان ودارفور، اها البدرسوها ناس منو...؟!! الاجابة واضحة ما دايرة تفكير، لكن بعد ما الجماعة الموالي ديل بتلتلوهم ليك بالدراسات العربية والاسلامية بمشوا يشتغلوا وين وفي ياتو مجالات...؟!! غايتوا اجابتي انو ناس مشوهين التشويه دا كلوا ماعندهم مكان للشغل غير مناطق الجهاد( البوسنة والهرسك وافغانستان وباكستان وجنوب السودان) والفضلوا في الخرطوم يمشوا النظام العام وامن المجتمع وترزية في بوابة جامعة الخرطوم –وهاك يا معاينة في اسكيرتات البنات واي فتحة بالجمبة ولا حاجة يخيطوها بالمسلة والدبارة ، اوكمان ممكن يمشوا يشتغلوا في جهاز الامن بمسمياتوا المختلفةوارح قبض الشيوعيين والمستقلين والديمقراطيين الخ ...ويوروهم ليك القبلة بي وين ويصلوا مش خمسة مرات في اليوم وبس بل صلاة شكر وتطوع وهلمجرا... ويخلوهم ليك يعرفوا صحي (البونية الفوقية بتحدد التحتية ) يرجعوا الجامعات وما عندهم شك انو علي الحاج هو اول من أذن في جامعة الخرطوم - عليكم النبي هي دي بلد دايرة ليها قراية (القراية ام قر)... غايتوا نقعد احسن نتفرج في الديمقراطية حقت الامريكان ....! وختاما - لانو الساعة هنا بالدولار- اقول لي ناس دارفور وكل الموالي والعبيد الجدد واولاد العرب العبيد صحباني في الخرطوم ، مافي زول شغال بقضية دارفور وناس الهامش من ناس الوسط (الظريفين ديل) وياهو شفتوا الجالدونق الكبير بتاع الديمقراطية في السودان لمن الله قدروا يعمل ليهو مسيرة جماهيرية- عبر بوابة هامش الحريات الجابتها الحركة الشعبية بالدق والجر بالواطة ما بالجهاد المدني – وعليك الله هو جهاد ويكون مدني كيفن دي ...؟!!- عملها باسم التدخل الاسرائيلي الجاير والسافر والغاشم في بيروت، وفي نفس الوكت الفيهو دارفور مولعة نار ونفض جبون تحت وفوق، وطفل دارفور ما زي طفل حسن نصر الله – ويفرق كتير طعم الحلو بو يبقي مر- عشان كدا يا ناس العدالة وسوا سوا اشتغلوا كويس المنشية دي ملحوقة ما تستعجلوا- ولا كيف يا ما عندكم علاقة مع اسرائيل ...؟!! عشان لما يكون في مشية للسعودية تاني شيلوا انتو القروش والكونتينرات حقت المصاحف ادوها ليهم وكمان وصلوها ليهم لحدي حوش ود بانقا- آل قريش وجزاكم الله الف خير ، وهوسسسسسس اطلبوا المصلحة حتي ولو في التوراة، ولاشنو يامؤمنين....؟!! نواصل ولا ما نواصل ماعارف...!!

(عدل بواسطة Tragie Mustafa on 03-16-2008, 07:41 PM)
(عدل بواسطة Tragie Mustafa on 03-16-2008, 07:41 PM)

Quote: طيب عرفنا القروش الجات من السعودية قعدت في الخرتوم والمصاحف مشت همشكوريب والرنك ودارفور طيب السؤال القروش المجننة قرقوش قاعدين يصرفوها وين قايلين ....؟ بتتصرف لو ما بتفهموا يا موالي لي اولادهم في اوربا وامريكا وفرنسا البدرسوا بالانجليزي والفرنسي – ولا عندهم حصة عربي زاتو- شوفتو كيف يا ناس نار التقابة المنحازين تاريخيا لامتكم الجاهلية العربية الاسلامية...، وديل البرة السودان، اما الجوه السودان لي اولادهم البقروا في المدارس المسيحية حقت الكنايس الكاثوليكية ، امال المدرسة البيريطانية حقت (الدب محمد) بتصرف بالاسترليني من وين ومن جيب ابو منو من دارفور، ولا كانت بتدرس في دارفور ولا في واحد من اولاد دارفور في المدارس الكاثوليكية بالخرطوم وفي المدن الاسمنتية في الخرطوم وممكن يكتبوا قدام باب العمارة يافطة (هذا من فضل ربي) تاني في زول يقدر يقول حاجة بعد ما يقرا اللافتة دي ....؟ اي زول بجر واطي ولو كان شيوعي –مضيع زمنوا في وهمة العدالة الاجتماعية-

Quote: تراجي تحية لك خليه يواصل في الكلام ...

Quote: الجسورة تراجى لك التحية والتحية عبرك لكاتب المقال حقيقة الرجل رسم صورة حقيقية لما يجرى فى السودان .... ولكن الواقع يذكرنى بقول رجل كبير فى السن عندما سئل لماذا حمل ابنائه السلاح ضد الحكومة فرد " الوليدات وعو"