ما كنت قايل إني بابعد كل دا ولا كنت فاكر إنو البرجعني بس فقد الحبايب والعزا بتحسر والوم نفسي الحبيسة علي زمن الجفا واقول ياريت مصايرنا وقداح عيشنا ... تودينا وتجيبنا علي مراحنا قفا ***** جيت عشان أترحم علي الميتين لقيت يا زولي مذهول وبتعجب علي الحيين القابضين علي جمر المحنة الزين الماسكين الوضوح بالكلمة حمرة عين برغم ناس الطبلة والتمكين لقيتك يا والدة يا مروي لكل أصالة إنتي عرين ما زلت ياكي صنب العزيزة وحضنك أب رياحين تودري كل من يرفع إنيفو عليك واللا ليكِ يشين ***** وقفت بعد حججاً كتيرة علي تراب أطلالك الشامخة مااحتجت لي لأياً ولا اتوهمت فشان اعرف الدار وريحتها الصارخة وافرق بين الراسخة والماسخة برغم حياً اسمه التعمير .. مسا مع الناس بترفض كل من نغمة مشروخة سلامة الباشا تتلقاك ... وحي الثورة يمشي معاك ... وحي الدومة يفرشلك أحلي الورود بي بسمة مطبوخة ***** وكتين سمع نغمة نساوين الحزن والخوف وييويبوي .. وييويبوي .. وييويبوي ... واسترجعت تاريخها تأكد لي تمام لومي الكتير .... وغيابنا المغلف دايماً باعزاراً مبيخة ومميسيخة !! ***** وبرغم السد وكبري النيل الشفتو فيك يا مهدي الجميل بيقلب كل نهاراً في جوايا ليل إنسان مروي بي أم برد والسهراجة ديمة عليل وأحياناً حزام ناراً وتايفويد مسوي الويل لا بيئة نضيفة ولاتثقيفاً يسبق التهليل وكلو صورنا مقلوبة ومحتاجة للتعديل ***** تعمير الشوارع والحجار.. يا مرحبابو ألف والخزان وكبريه .. نقيفلو ألف وتسوير أتر نبتة .. ندورو ألف لكن فشان يتعمر الإنسان ويبقي ألف عشان تتطور البيئة وتبقالا النضافة ولف وضد كُل ضببينة وبويعيضة نسوي حلف لا زمانة تشميرة وهتافاية ... تقول للدولة وينك يا أم شعارها وقف ؟؟
***** الإسبتالية البدخلها سليم يمرض ويلقطلو علاية الممرضة توبها جاري وجناها فوق الصفحة وشايلالها إبراية ومحضر العملية بالعراقي والسروال وكمان عامل حكاية والدواء الملعون يا إما مافي .. يا إما القريشات ما كفاية أما الدكاترة البطينين يا تلقي واحد والا إثنين .. والمسيكنين حايرابهم الصرفة والغاية ***** ليش يا أبين كلاماً ديمة حلواً مر سويعة الحق ليش ما بتهاتفونا وتقولوا الحق ليش تداروا علينا وماتورونا الشق وصوت الطق ليش تخبوا علينا كل ما تجونا ... وما تدقوا جرس النجدة دقاً دق ***** النفس العزيزة خلتكم كما المضبوح وبيغني والكدسة السمان غشوكم وغشونا ونحن هناك بنغني جالسين كما الهمبول وقايلين الأهل في ديارنا متهني العذر مفقود ... والأسف آلاف ... وياريت سوات الصاح لي هسي مستني وداعاً ... وداع مشتاق وديمة مدلي شان نرجع سوا وتاني نقفز الجنًيِ
Quote: وبرغم السد وكبري النيل الشفتو فيك يا مهدي الجميل بيقلب كل نهاراً في جوايا ليل إنسان مروي بي أم برد والسهراجة ديمة عليل وأحياناً حزام ناراً وتايفويد مسوي الويل لا بيئة نضيفة ولاتثقيفاً يسبق التهليل وكلو صورنا مقلوبة ومحتاجة للتعديل
كلام جميل ياصديق الأمس الجميل صديق عبدالجبار اتمنى ان تكون قد تذكرت اسمي وصورتي على البروفايل مضى زمن طويل عندما كنا سويا زملاء في مدرسة مروي الإبتدائية والثانوية العامة كنت حينها اسكن في حي الموظفين حين عمل والدي عبدالسلام محمد المهدي مراقبا لمباني مجلس ريفي مروي وعشنا سنوات مابعد حرب 67 والى غاية1969 في تلك المدينة الجميلة { مرو ي} أذكرك جيدا صديقنا صديق وأذكر اخوتك الأعزاء وداركم بالقرب من النادي الأهلي حين كنتم تعطرون ليالي وسهرات النادي بإيقاعاتكم ونشاطكم الفني الرائع التحية لك صديقنا صديق ولكافة ابناء اسرتكم وابناء مروي الذين عشنا معهم في تلك الفترة الجميلة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
صديق عبد الجبار
omer abdelsalam
فيس بوك
تويتر
انستقرام
يوتيوب
بنتيريست