|
|
 ماهو مصير أملاكنا فى ( جزيرة سواكن ) الأثرية......؟؟؟
|
طلب منى والدى العزيز ربنا يديه الصحة والعافية أن أكتب عن هذا الموضوع ،
فوالدى وعمى وكثير من افراد اسرة والدى يؤرقهم هذا الموضوع من زمان..
وجدتى الحبيبة فاطمة أحمد باشريك لاحقت هذا الموضوع فى حياتها مع السلطات وفى المحاكم
حتى رحلت عن دنيانا ولحقت بأجدادها..
ولم توفق فى تحقيق اى تقدم حول مصير املاكنا فى جزيرة سواكن التى وضعت الدول عليها يدها
منذ القرن الماضى بحجة انها منطقة اثرية..
الدولة وضعت يدها على هذه الأملاك الأثرية ثم اهملتها وتركتها لعوامل التعرية
حتى تهدمت بيوتنا الجميلة ذات المعمار الرائع والفريد وصارت ركام من الحجارة والخشب !
أمر مؤسف ومؤلم..ولطالما آلم جدتى رحمها الله ، وكل ما كانت تذهب الى سواكن
أو ترى صور سواكن القديمة تذرف الدمع الغزير..ولسان حالها
كما غنى الفنان السواكنى الراحل ادريس الأمير:
صب دمعى
وانا قلبى ساكن
حار فراقك
نار يا سواكن
جدتى وعمى عندما كانوا يتابعون هذا الموضوع فى المحاكم فوجئوا بمن يدعى ملكية احد منازلهم
فى الجزيرة ، فأسرة الفنان السواكنى المعروف عبد الكريم الكابلى تسلبط بعضهم فى أحد منازل
أجدادنا العريقة..
والمحكمة طالبت بالشهود ...وطبعا الشهود ماتوا وشبعوا موت...رحمهم الله..
فأسرة جدتى اضطرت للنزوح عن الجزيرة والرحيل الى مدينة بورتسودان الفتية آنذاك فى العشرينات
من القرن الماضى ، بعد أن دمر الانجليز اقتصاد ميناء سواكن القديم وضربوه بانشاء ميناء بورتسودان
فى العام 1910..
وبالرغم من مقاومة السواكنية الرحيل عن مدينتهم التاريخية العريقة الا انهم اضطروا اضطرارا الى هجرها
كما هو معلوم..
وتركوا منازلهم الرائعة المعمار للقطط والكلاب تسكنها وعرائس الجن وحوريات البحر..
للتاريخ والتوثيق ..هذه هى أملاكنا فى سواكن..والوثائق موجودة..أى نعم هى دابت وتهتكت لكن لسه موجودة والحمد لله:
* بيتين باسم الخليفة باشريك أحمد فى حارة أوكوم ، قطعة خلف الشيخ فرج الله ، وقطعة ثانية شرقها
ادريس تقع شمال القطعة الأولى ، والقطعتين بقرب الساحل .
وفى قطعة ثالثة باسم فاطمة شريفة زوجة جدنا الخليفة باشريك احمد ( جد جدتى )
ولا يوجد وريث لهذه الأملاك غير عمى الخليفة محمد مختار محمد أحمد ايرا
ووالدى أحمد مختار محمد احمد ايرا..
والشهود كلهم رحلوا عن دنيانا ..للأسف..وهذه مشكلة واجهتنا وآخرين.
هذا للتوثيق..
_____
|
|
 
|
|
|
|
|
|
|
 Re: ماهو مصير أملاكنا فى ( جزيرة سواكن ) الأثرية......؟؟؟ (Re: AMNA MUKHTAR)
|
شذرات من تاريخ سواكن
من موقع : (مسكينة سواكن)
swakin.netfirms.com
تقع سواكن على الساحل الغربي للبحر الأحمر على خط عرض 19.5 درجة شمال خط الاستواء وخط طول 37.5 درجة شرق , وهي كانت في الأصل جزيرة سواكن ثم توسعت إلى " القيف" وما جاوره فغدت مدينة سواكن التي تضم الجزيرة و"القيف" و "كاس الدور" و"الملكية" و"المشيل" و"اندارا "و"الليلي" وغيرها...
لا يعرف تاريخ محدد تأسست فيه سواكن , ولكن الكثير من الشواهد تدل على أن الجزيرة كانت مأهولة منذ تاريخ موغل في القدم , ولكن سواكن اشتهرت بعد ظهور الإسلام وازدادت شهرة بعد أن استطاعت أن تحل محل " عيذاب " كميناء أفريقيا الأول للحج , وكانت مستقلة عن السودان ولها نظامها الإداري الخاص وعلى رأسه أمير من "البلو" , ثم من " الأرتيقة" الذين لا يزالون يتوارثون عموديتها . وفي عصر السلطنة الزرقاء زارها الشيخ عجيب المانجلك وهو في طريقه إلى الحج وصاهر زعمائها كما بنى فيها حفيرا يسمى "الفولة" لا يزال قائما.
في عهد السلطان سليم العثماني ضمت سواكن لولاية الحجاز العثمانية , وكان حاكمها وقضاتها يعيون من قبل والي الحجاز , وعند استيلاء محمد علي باشا على السودان لم تعترف تركيا بسيادته على سواكن , وقد قامت بتأجيرها له مقابل مبلغ يدفعه سنويا لولاية الحجاز وبشرط أن تعود سواكن بعد وفاته لولاية الحجاز, وهكذا كان , فبعد وفاة محمد علي باشا سنة1849 عادت سواكن للدولة العثمانية وكان مواطن سواكن يعتبر " سواكني عثماني " , إلا أن باديتها كانت تابعة للسودان . في عهد الخديوي إسماعيل ضمت سواكن للسودان الإنجليزي المصري بعد أن تعهد الخديوي إسماعيل بدفع مبلغ 7500 جنيه مصري لوالي جدة مقابل تنازل السلطان العثماني عن سواكن ! وقد صدر فرمان عثماني بذلك وتم الأمر سنة1869 م .
بعد احتلال الإنجليز لمصر استولوا عليها كغيرها من الممتلكات المصرية , ولكن العلم الانجليزي لم يكن يرفع فيها بل يرفع العلم المصري فقط . و عند اندلاع الثورة المهدية أقام الإنجليز سورا حول" القيف " لسد هجمات عثمان دقنة , وكانت للسور خمسة بوابات اشتهرت منها بوابة كتشنر ( باب شرق السودان ) , التي حاولوا حديثا ترميمها فنتج عن ذلك بوابة مختلفة اللون أسمنتية الملامح واختفى اللون الحليبي الناصع الذي تميزت به البوابة القديمة. وبعد القضاء على المهدية أحكم الإنجليز قبضتهم على كل السودان بما فيه سواكن, وبدءوا مخططهم الذي احتلوا من أجله كل الأقطار الأفريقية , وهو طمس الهوية العربية والإسلامية حيثما وجدت , وقد نجحوا في طمس هوية سواكن نجاحا لا يفوقه سوى نجاحهم في تنزانيا , بدأ المخطط بإنشاء ميناء بورتسودان ( أليس اسم مرسى الشيخ برغوث أكثر أصالة؟) , ولم ينشئوا في سواكن حتى رصيفا للحجاج كما هو الحال الآن , وشجعوا سكانها على هجرها بمنحهم الامتيازات في بورتسودان , وحادوا بالسكة حديد الذي أنشئوه عنها حتى يزيدوا من عزلتها , وغضوا الطرف عن سرقة حجارة مبانيها المهجورة وآثارها , وتجاهلوا حاجات مواطنيها حتى غدت – وبسرعة قياسية- مدينة أشباح .
وعندما خلت الدور عاث فيها اللصوص فسادا, فسرقوا ونهبوا, وكانت الطامة عندما اقتلعوا حجارة البيوت المتهاوية اقتلاعا لاستخدامها في قمائن الجير بعد أن عز الحجر الجيري الذي بنيت به البيوت , وهكذا ساهم ابناؤها في سلخ جلدها ودق عظامها حتى اختفى الهيكل نفسه.
والآن...يبدو أن الروح بدأت تعود إليها, ولكن هيهات أن تعود كما كانت , وكل أملنا أن لا يعيدوها جنينا مشوها ليس له من الأم إلا الاسم!.
.........
أول ذكر لسواكن يعود إلى فشالا الحبشية Fashala d' Abyssinie" التي تذكر أنّ الرحلة البحرية لملكة سبأ إلى الملك سليمان , سنة 950 قبل ميلاد المسيح , تمت برا حتى مصوع , مرورا بسواكن.
ثم جاء نص من العالم اليوناني بطليم (100-170م) والذي عمدها باسم
Evangelon portus.
في سنة883 استقرت في الجزيرة عائلة من الأرتيقة قادمة من الجزيرة العربية. و يبدو أن سواكن تلقت في ذات الوقت هجرة ضخمة قادمة من اليمن, خاصة من منطقة حضرموت على خليج عدن.
في سنة 956 وصف سكان الجزيرة بأنهم مسلمون ينتمون إلى البجا تحت حكم الملك "مقريزي". وهذه القبيلة تعيش دائما في كل شرق السودان حتى كسلا.
حوالي سنة 1200 ذكر مصدر أن سكان الجزيرة من مسيحيو البجا!.
في سنة1264 أفادت الأخبار الواردة إلى القاهرة بأن تجارا قد نهبوا في سواكن. الحكومة المحلية استولت على بضائع من مات أو قتل منهم, حارمة أطفالهم من الميراث. وبعد أن قامت محكمة السلطان بإعلام القائد في سواكن بأن لا يسلب التجار,قام حاكم "قوص" بالمسير إلى سواكن ففر قائدها إلى الحبشة ,
وتركت حماية صغيرة لتمنع رجوعه إلى سواكن , وهكذا سقطت المدينة وللمرة الأولى , تحت العصا المصرية.
في مطلع القرن الرابع عشر كانت المدينة المسلمة تصدر أغناما أعدت للأضاحي. في سنة1328 كان حاكم سواكن " العمري" ,احد أقرباء أمير سابق لمكة ويحتفظ بعلاقات جيدة مع قبيلة البجا التي تنتمي أمه إليها .وكانت سواكن حينها في تنافس مع عيذاب – التي تقع إلى الشمال وأقرب إلى جدة- ولكن تدمير عيذاب سنة 1426 بواسطة الأشرف بارس باي ,ترك لسواكن الفرصة السانحة لتصبح ميناءا تجاريا هاما.
في سنة 1425 قامت جماعة من الأشراف ، سلالة النبي محمد ، قامت بالهجرة من مكة إلى السودان,واستقرت بالقرب من كسلا. وكانوا يقضون وقتا من العام في سنكات وسواكن , وترجع بيوت معينة في الجزيرة إلى تلك الحقبة.
بعد سقوط القسطنطينية ،سنة1453، نهوض الإمبراطورية العثمانية رافقه اضمحلال للقوة المصرية فاستفادت سواكن وجدة من فترة من الاستقلال والإزهار.
قبيل نهاية القرن كانت المدينة تدار من قبل سلطان مسلم من قبل ملك "هماسين" , مدينة قريبة من اسمرا الحالية في اريتريا .
في بداية القرن السادس عشر ، أتراك السلطان سليم الأول،هزموا مصر، وفي سنة1517 سيطروا على موانئ البحر الأحمر.وهكذا صارت سواكن تحت السلطة التركية.
في حوالي 1517 أتت قافلة مكونة من 336 قسيس ورجل دين قادمين من الحبشة في طريقهم للحج إلى القدس وبعد قليل من مغادرتها سواكن في طريقها إلى النيل تم ذبحهم من قبل البجا ونجا من بينهم 15.
في سنة 1451 ، السفن البرتغالية ل" ستيفانو دي غاما" غادرت مصوع نحو السويس لتدمر الأسطول العثماني الذي كان حينئذ يحتكر تجارة البهار. وكان بطل الانيز البرتغالية –جون أوف كاسترو- على متنها . وصلوا سواكن في الاول من مارس ووجدوا المدينة تحت الحكم التركي ولكن بدون حماية. واعتمادا على "كاسترو" كان مينائها آنذاك يستقبل 200 مركب, مما يجعلها في المرتبة التالية بعد لشبونة.وكانت تجارتها تصل الهند وملقة. في الثامن من مارس أحرقن المدينة ونهبت بعد فرار السكان الذين رفضوا دفع فدية الضخمة للبرتغاليين. ولكن الاسطول البرتغالي خسر 8 أيام استثمرها الأتراك وفشل هجوم "غاما".
في سنة1580 عجيب عبدالله المانجلك , من العبدلاب هزم الفونج وضم سواكن مع ساحل البحر الأحمر وقاسم الأتراك في مدخلات الميناء.
و مقتطفات من موقع انجليزي آخر ولكن هذه المرة من غير ترجمة! :
The History of Suakin
Suakin is an old port, on the Red Sea, similar to Venice in that it is located on a lagoon. Its golden age was in the 15th and 16th centuries. At that time it was the most important African port on the Red Sea, on a par with Lisbon. In the 17th century the development of a sea route around Africa brought with it a first decline in the importance of the town. It enjoyed a revival in the 19th century, due to the growing influence of Egypt on the Upper Nile, especially through the opening of the Suez Canal in 1869. In 1885 Suakin got its first railway connection.
The importance of tourism grew with increasing numbers of pilgrims crossing over to Jedda and then further on to Mecca. The coral reef made extension of the harbour impossible and for this reason it remained unsuitable for the large steam ships which were being built at the beginning of the last century. This is why the new port of Portsudan, which lies 40 km to the north, was extended between 1905 and 1909. After the first world war Suakin rapidly lost its importance and the island had already been deserted by 1930.
Today only a few families live in the old town and on the mainland, The Geyf about 20.000 inhabitants. Suakin lies in the tropical savannah belt.A few Nomads who raise cattle, live on the outskirts of it. The plain rises 20 km further inland.
to form a mountain range with heights up to 1000 metres which borders on the Nubian Desert
In 1973 and 1993 UNESCO did a survey with the aim of preserving Suakin.
The old arabian towns constitute an outstanding cultural heritage. However they are threatened by numerous influences, amongst them the change in values and the infitration of modern ways of life connected with this.
| |
|
|
|
|
|
|
|
|
|
Re: ماهو مصير أملاكنا فى ( جزيرة سواكن ) الأثرية......؟؟؟ (Re: شهاب الفاتح عثمان)
|
الحبيبة أمونة
سلامات
أولا بالتأكيد لن يضيع حق وراءه مطالب ..وبفتحك لهذا البوست أري انك قد خطوتي الخطوة الأولي في الاتجاه الصحيح ..وسوف تعود أملاككم باذن الله ..فقط ليتك تبحثين عن أخرين لديهم نفس المشكلة من اهلنا في الشرق في ذات المنطقة حتي يتم تصعيد القضية علي أعلي مستوي وتصبح قضية رأى عام فاما ان يتم تعويضكم كغيركم في حالات مشابهة تم تهجيرهم أو ان تستردوا أملاككم وأملاك أجدادكم واهليكم ..
كوني هنا وسنكون متابعين الي ان يأخذ كل ذي حق حقه..وكوني بالف خير آمنة بت مختار
أختك نادية مختار
| |
|
|
|
|
|
|
|
|
|
Re: ماهو مصير أملاكنا فى ( جزيرة سواكن ) الأثرية......؟؟؟ (Re: نادية عثمان)
|
الاخ امنة
دبايتو
فى الحقيقة امر مساكن سواكن القديمة امر يؤرقنى لان الكثير من الذى الورثة الان يعانون مما تعانينه انت واسرتك والمؤسف حقا ان الدولة حرمت الورثة ولم تحافظ على المساكن الاثرية حتى سويت بالارض بسبب الزمن وهنالك الكثير من من ماتوا ورحلوا عن الدنيا و فى قلوبهم حسرة مما لحق بهم...
وكلما تقدم الزمن يكثر الورثة ويزيد عددهم مما يصعب حتى الت اليهم هذه القطة او تلك التقسيم بينهم اذكر فى بداية التسعينات تمكننا من استخراج كل الاوراقة التى تؤكد صحة امتلاك جد جدتنا لقطعة ارضة اكثر من اربعمائة متر وشخصيا لم اعر الامر اهتمام كبير لان عدد الورثة كبير جدا المهم عندى خالى كان مهموم بالامر وكانت تسكن واحدة من جداتنا فى جزء من قطعة الارض فى كوخ سواكنى قديم وعندما توفت رحمها الله تسارعت الخطى اولا لحصر الورثة ربما بلغ العدد اكثر من عشرين شخصا وبعدها الاحياء من ابناء وبنات الورثة عدد اكبر المهم القصة انتهت ببيع القطعة واقل واحد حصل على مبلغ محترم وقتها وكلهم ترحموا على جد جد جدتنا ........
ولكن اهلنا الارتيقة طبعا البلد بلدكم والامر يحتاج الى صبر طويل فى المحاكم واستيلاء الدولة لهذه الممتلكات التى لا تقدر بثمن اليوم تحتاج بان تواجهوا السلطات فى سبيلها وهنا لا بد من ذكر السيد محمد نور هداب هذا الانسان السواكنى الاصلى الذى يعمل جاهدا للحفاظ على تراث سواكن وتاريخها ليتك يا امنة تفردين بوست لهذا الانسان ولمن لا يعرف محمد نور صاحب قرية سواكن النموذجية فهو يستحق ان يشكر على ما يقوم به من اعمال رائعه...
ربنا يريد ليكم كل املاكم ولكل السواكنية ...
اوعكم تبيعوا وتسكنوا عشوائى
| |
|
|
|
|
|
|
|
|
|
Re: ماهو مصير أملاكنا فى ( جزيرة سواكن ) الأثرية......؟؟؟ (Re: AMNA MUKHTAR)
|
الأخ سيف جبريل لم يهمه فى البوست كله
سوى اسم جد جدتى ( باشريك) ..وجه جارى كانه أكتشف الذرة وقال:
| Quote: امنة اتاري اصلك حضرمية ونحن ما عارفين... |
وطبعا هذه كانت فرصة ذهبية للاخ ود محجوب..
جه ناطى ومنتهزها ..قائلا بثقة عجيبة :
| Quote: لماذا تطالبين باملاككم فى سواكن . وتتجاهلين املاككم فى اليمن الجنوبى. |
!!!!!!!
تعالوا يا ناس..
يا العاملين فيها ما عارفين معنى مصطلح ( جلابة)..
تعالوا شوفوا الأخوين سيف جبريل وود محجوب..تبرعوا بأن يعطوكم
مثالا نموذجيا ل( الجلبنة) كيف تكون..
احتكار الحقائق ومغالطة الناس حتى فى أصولها وأعراقها..
احتكار الوطنية والنضال والفهم والتاريخ واى حاجة سمحة فى البلد..
الادعاء بانهم هم فقط السودانيين وانهم أسياد بلد يقعدوا يقوموا على كيفهم
..واهل السودان الباقين كلهم أجانب وافدين..
انت ما شمالى ..طوالى انت يا تشادى يا أريترى يا حلبى يا عبد يا يمنى يا كنغولى..
هسه خلاص من هذا البوست حا تطلع ( اشاعة) على ان آمنة مختار ما سودانية..
ولو بكره فتحت خشمى اتكلمت فى أى موضوع يخص وطنى الهو السودان وما عندى غيرو وطن..
ممكن اى واحد يجى ناطى لى فى حلقى ويسكتنى ..
وما بعيد يفتح لى بوست يطردنى فيهومن المنبر ..
ومن البلد زى بوست أنور كنح الطرد فيهو الزغاوة وناس تراجى ..
هسه كده خلاص ..أنا( بجرة قلم) طلعت ما سودانية..!!!
لذلك لا يحق لى المطالبة بأى أملاك فى السودان ..
فكأن الأخوين سيف جبريل وود محجوب يعرفون اصولى وجذورى حتى يغالطونى فيها..
وينكرون على سودانيتى ؟!!!!!!!
حاجة عجيبة تحير الما بتحير..!!
وطبعا الأخ هشام نوريت انتبه لتلميحهم الخبيث ..
ولأنه ابن منطقتى ويعرف عما اتحدث فى هذا البوست..
تداخل منبها لهم ( عسى ولعل) ..مشيرا الى ان ( قبيلة الأرتيقة) قبيلتى
هم أصحاب سواكن وأهل الجلد والراس..
وهم أكثر من يحق لهم المطالبة بحقوقهم فيها ( مع عدم غبط حقوق الآخرين بالطبع):
| Quote: ولكن اهلنا الارتيقة طبعا البلد بلدكم |
..
شكرا هاشم نوريت..
أما انتم يا جلابة..فنحن لا نمتلك ارضا لا فى جنوب اليمن...ولا شمال الشام..
ببساطة لاننا لسنا يمنيين ..وانما سودانيين زينا زيكم..
ولنا حقوق وأملاك مش فى سواكن بس بل فى بروسودان وطوكر وكسلا والخرطوم
وفى مناطق أخرى متفرقة من السودان..
أها كمان اوعو تكونوا ناوين تقلعوها مننا؟!!
والله يا هو ده الفضل..
يمنية حضرمية قال...
عشان كده مليون مرة قلنا الما بعرف تاريخ الناس وأصولها واعراقها ما يتحشر ساى..
وينظر فى البعرفو..والما بعرفو..
الما بتعرفو يا جلابيب..ان الأسماء الحضرمية والحجازية شائعة جدا فى شرق السودان..
وحتى اولئك الذين لديهم اصول يمنية او حجازية او تركية أو حتى بيزنطية هم سودانيون
مثلهم مثلكم..,لا تنقص سودانيتهم عنكم فى شئ..
فهمتو...ولا نعيدو..؟
يا أسياد البلد..يا لذاذ انتو ..
| |
|
|
|
|
|
|
|
|
|
Re: ماهو مصير أملاكنا فى ( جزيرة سواكن ) الأثرية......؟؟؟ (Re: AMNA MUKHTAR)
|
آمنه
سلامات
استغربت لهذا التساؤل من ود محجوب.
Quote:
لماذا تطالبين باملاككم فى سواكن . وتتجاهلين املاككم فى اليمن الجنوبى.
|
يا ود محجوب
اولا لعلمك لا توجد امكان كثيرة في العالم حدث لها ما حدث لسواكن
وتأكد الحضارمة و اليمانيه الذين لهم ميراث باليمن وحضرموت اخذوهوا او لازال بخير.
لكن سواكن مدينة هجرت ووضعت الدولة اياديها على املاك الناس المسجلة باسمائهم.
يعني تخيل مروي بتاعتك دي او القرير مثلا وكيف انتم تعرفون بعضكم وحوش ناس جدك وحوش ناس عمك
وحوش العمدة...وفجأة سافرتوا كلكم من اجل مصالحكم بورتسودان وعند عودتكم لتطلوا املاككم اخبروكم
انكم لا ستطيعون دخولها لانها صارت آثار وصارت ملك الدولة. وقدام عينك تتهده البيوت وتذوب طوبة وراء طوبة وتتساوى بالارض وانت محروم حتى من دخولها ناهيك عن صيانتها. ولا الدولة بتصون ولا خلت خلق الله يصونوا الا ان انتهت فعلا كل مدينة سواكن القديمة.
آمنه مختار ليست يمينة ولا حضرمية لعلمك
وانا شخصيا اجريت دراسة عن الحضارمة تنفيذ للدكتور النرويجي لايف منقر واعرف كل الاسر اليمينة والحضرمية ببورتسودان وما حاولها...واعم ان آمنه ليس منهم. فارجو ان تتآنوا في
اللفحي.
| |
|
|
|
|
|
|
|
|
 Re: ماهو مصير أملاكنا فى ( جزيرة سواكن ) الأثرية......؟؟؟ (Re: AMNA MUKHTAR)
|
وكمان عشان ما واحد يمشى يلقط لينا من قوقل كلام للمؤرخ الفلانى ولا الفرتكانى..
ويقوقلنا ويقوقل قبيلتنا واصولنا وجذورنا...ويطلع زيتنا ذاتو
هاكم دى معلومة مجانية:
زمااااااااان واحد من جدودنا جه من حضرموت اسمه ( باصفار)..
ومع ذلك..هذا لا يتفى سودانيتنا او بجاويتنا..
ويطلعنا حضارمة ويمنيين ..مع احترامى الشديد للحضارمة واليمنيين..
فكثير من السودانيين الشماليين يفخرون بان لهم جذور فى الجزيرة العربية
ولا يجدون فى ذلك غضاضة ..ولا ينفى هذا عنهم سودانيتهم!!
ولكن لما غيرهم يكون عندو جد من زمان من أصول غير سودانية..
طواااالى بجرة قلم يطلع ماسودانى..
ومفروض ما يطالب باى حقوق من حقوقو فى السودان..!!
شئ عجيب فعلا..!
تلك قسمة ضيزى..
| |
|
|
|
|
|
|
|
|
|
Re: ماهو مصير أملاكنا فى ( جزيرة سواكن ) الأثرية......؟؟؟ (Re: AMNA MUKHTAR)
|
يا آمنة
الما عادي شنو إنك تكوني حضرمية ?
أو العيب شنو?
يا ستي الحضارمة في بورتسودان لعبوا
دور مقدر و مشهود ليهو في إزدهار
و إنعاش اقتصاد البلد بناشطهم التجاري
الذكي في مجال الاستيراد و التصدير و حركة
الملاحة بين بورتسودان و كثير من مواني
البحر الاحمر بل و العالم.
و حافظوا علي أموالهم و إستثمروها في داخل
السودان , لم يهربوها أو ينقلوها لأي بلد
آخر , فالسودان بالنسبالهم كان و مازال وطن
بنوا فيه المدارس و المستشفيات و ساعدوا كثير
من الاسر.
| |
|
|
|
|
|
|
|
|
|
Re: ماهو مصير أملاكنا فى ( جزيرة سواكن ) الأثرية......؟؟؟ (Re: AMNA MUKHTAR)
|
الاخت امنة مختار... لم اقصد كما فهمتى فأنا اكن الاحترام لكل السودانيين من دون تمييز وهذا هو طريقنا لانشاء سودان جديد وليس السودان يبنى بالنويح والهرجلة والنعيق.. بل ولي كثير من الاصدقاء اصولهم حضرمية بل وسعودية ايضآ.. ولا اجد قضاضة فى ذلك... اما على المستوى الشخصى والاسرى ان اهلى اكثر المتضررين من الفساد الذى طال السودان منذ عهد السفاح جعفر نميرى... فصودرت الكثير من اراضى اهلى فى الجريف غرب وهى ملك حر ولم افتح بوسط هنا للردحى والعويل... فالثوريين احلامهم اكبر من الاشياء الشخصية.. نحن نحمل فى جوانبنا قضايا وهموم وطن اكبر من ميراث اسري او جهوى...بل وظللنا نناكف من اجل قضايا الحرية والديمقراطية.. وهى عندنااكبر من ميراث.. لقد وهبنا ارواحنا فداءآ لذلك ... لم نهادن ولم نساوم فى قضايا الوطن قيد انملة.. اتمنى ان لا تنجرى لاشياء.. خارج نطاق هذا البوست.... وان لا تحاولى الاصطياد فى الماء العكر لتصفية حسابات شخصية....Be carful
سيف
| |
|
|
|
|
|
|
|
|
|
Re: ماهو مصير أملاكنا فى ( جزيرة سواكن ) الأثرية......؟؟؟ (Re: AMNA MUKHTAR)
|
Quote: أولا بالتأكيد لن يضيع حق وراءه مطالب ..وبفتحك لهذا البوست أري انك قد خطوتي الخطوة الأولي في الاتجاه الصحيح ..وسوف تعود أملاككم باذن الله ..فقط ليتك تبحثين عن أخرين لديهم نفس المشكلة من اهلنا في الشرق في ذات المنطقة حتي يتم تصعيد القضية علي أعلي مستوي وتصبح قضية رأى عام فاما ان يتم تعويضكم كغيركم في حالات مشابهة تم تهجيرهم أو ان تستردوا أملاككم وأملاك أجدادكم واهليكم ..
كوني هنا وسنكون متابعين الي ان يأخذ كل ذي حق حقه..وكوني بالف خير آمنة بت مختار
أختك نادية مختار |
الشقيقة ندوية..
يا زهرة الفل الندية
يا وردة كسبت قضية
يا الرايقة أم شعورا حية
شكرا على مرورك البهى..
فأريجك عطر الأجواء.. وطلتك البهية
بس أنا خايفة بكرة يطلعوكى ما سودانية
أرترية ولا حضرمية..
ولا يمكن من لبسة الفوطة الصفرا الحلوة دى
يطلعوكى هدندوية..
( وجه غامز وساخر)
| |
|
|
|
|
|
|
|
|
|
Re: ماهو مصير أملاكنا فى ( جزيرة سواكن ) الأثرية......؟؟؟ (Re: AMNA MUKHTAR)
|
الاخت آمنة
درسنا في التاريخ السوداني بأن الانجليز هجروا سواكن كميناء للميناء جديدة اسموها بورت سودان لو جود الشعب المرجانية و لضحالة المرفأ في المدينة القديم مما يعوق حركة السفن الضخمة من و إلى المرفأ.
هل هذا صحيح؟ ام كما اوردت في القطعة التعريفية لمدينة سواكن و تاريخها يرجع السبب بشكل رئيسي لطمس المعالم العربية الاسلامية بهجرها و تركها نهب و مدينة اشباح.
و ما هو وضع المدينة الان؟
اتمنى ان ترد حقوقكم لكم و يعود العمار و الحيوية لسواكن من جديد مع الحفاظ على الآثار و صونها.
تحاياي
| |
|
|
|
|
|
|
|
|
|
Re: ماهو مصير أملاكنا فى ( جزيرة سواكن ) الأثرية......؟؟؟ (Re: ثروت سوار الدهب)
|
العزيز ثروت
لحين حوضر آمنه
ارد عليك:
Quote: الاخت آمنة
درسنا في التاريخ السوداني بأن الانجليز هجروا سواكن كميناء للميناء جديدة
اسموها بورت سودان لو جود الشعب المرجانية و لضحالة المرفأ في المدينة
القديم مما يعوق حركة السفن الضخمة من و إلى المرفأ.
|
هذا تاريخنا المكتوب بايدي الغرباء كما قيل .
الحقيقة ان الانجليز ارادوا ضرب الاحتكار لان سواكن كانت مقمسة كميناء لمرافيء
وكل مرفأ يمتلكه تاجر محدد من حقه هو فقط قبض الرسوم,يعني عمك الشناوي باشا
كان له مرفأ وهو يعتبر (شيخ بندر التجار) اي رئيسهم وهو صاحب القصر ذو ال366 غرفة
قيل ينوم في كل غرفة ليلة واحد في السنة ويحب التغيير!!
تخيل ان احفاده ورثة هذا القصر اين هم من كل هذه الثروات؟؟!!
هم اناس عاديين بل واقل في بورتسودان.
| |
|
|
|
|
|
|
|
|
 Re: ماهو مصير أملاكنا فى ( جزيرة سواكن ) الأثرية......؟؟؟ (Re: Tragie Mustafa)
|
| Quote: نخشى ان يأتى يوم وينكروا علينا هذه الحقوق. |
طيب ما ياكي .. وارثــة وعندكم بهايم في ضهـر بيتكم... وبتضربي في جبنة التلاتة بقرات الدنماركية دي وبتفكي بيها الريق..
طيــب...
التهميش دا من شنــو..؟
تـرف يعني ..؟
واللا عايزه تعيشي عيشة البساطة زينا نحن المقطعين ديل ..؟
بلاي الواحد ما لاقي ليهو تصريح بتاع اسمنت وسيخ يتم بيهو عمارتو التلاتة طوابق الفي المنشية. والسيدة تراجي تجي تقول ليك والله ضحكتني يا عابدين شـرف..
والله انا مني ومن بكري ابوبكــر دا بعد كدا أعمل لي ايقونة بتاعت مكتب عقارات وامسكه لي صبري الشريف ومرتضى جعفـر والعايز يبني ليهو قطعة ارض في البورد دا .. يبني لينا بي طريقة ما تكون متوافقه على طريقة الاسلام السياسي ..
يعني بي صراحة يا مهمشين:
العندو بيت رايح ليهو يشوف ليهو اقرب بقـرة يفتح خشمه في الحتة القاعد فيها .. حسب النطاق الجغرافي وخطوط التماس والتعداد السكاني في نسختو الأخيرة .. وكان وقفتي ليك كدا قدام قصر يا كونتيسة امنة مختار وقلتي افتح يا سمسم ولقيتي اللؤلو والمرجان بتاعك دا .. ما تنسي ترقعي بكري ابوبكر دا بي ( جـره) .. يا كردان بتاع كرسي جـابر من الصدف والمحـار.. وأنا ذاتي عايز حقي ..
هووووي يا مهمشين..:
بلاي العندو تصريح بتاع اسمنت ورمله زايد يرقعنا بيهو .. مسالة السيخ ح يحلها لينا صلاح غريبة وود البـاوقة.. وفــرح
| |
|
|
|
|
|
|
|
|
 Re: ماهو مصير أملاكنا فى ( جزيرة سواكن ) الأثرية......؟؟؟ (Re: Tragie Mustafa)
|
Quote: آمنه
سلامات
استغربت لهذا التساؤل من ود محجوب.
Quote:
لماذا تطالبين باملاككم فى سواكن . وتتجاهلين املاككم فى اليمن الجنوبى.
يا ود محجوب
اولا لعلمك لا توجد امكان كثيرة في العالم حدث لها ما حدث لسواكن
وتأكد الحضارمة و اليمانيه الذين لهم ميراث باليمن وحضرموت اخذوهوا او لازال بخير.
لكن سواكن مدينة هجرت ووضعت الدولة اياديها على املاك الناس المسجلة باسمائهم.
يعني تخيل مروي بتاعتك دي او القرير مثلا وكيف انتم تعرفون بعضكم وحوش ناس جدك وحوش ناس عمك
وحوش العمدة...وفجأة سافرتوا كلكم من اجل مصالحكم بورتسودان وعند عودتكم لتطلوا املاككم اخبروكم
انكم لا ستطيعون دخولها لانها صارت آثار وصارت ملك الدولة. وقدام عينك تتهده البيوت وتذوب طوبة وراء طوبة وتتساوى بالارض وانت محروم حتى من دخولها ناهيك عن صيانتها. ولا الدولة بتصون ولا خلت خلق الله يصونوا الا ان انتهت فعلا كل مدينة سواكن القديمة.
آمنه مختار ليست يمينة ولا حضرمية لعلمك
وانا شخصيا اجريت دراسة عن الحضارمة تنفيذ للدكتور النرويجي لايف منقر واعرف كل الاسر اليمينة والحضرمية ببورتسودان وما حاولها...واعم ان آمنه ليس منهم. فارجو ان تتآنوا في
اللفحي.
|
ايه الغريب فيما كتبت بس عشان كتبو ود محجوب
وايه المحاضرة الطويلة دى الما عندها علاقة بما كتبت..
وهل لو كان عندها اصول حضرمية وللا تركية بينفى سودانيتها.
عالم عجييييييييييييييييييب.
Quote:
هاكم دى معلومة مجانية:
زمااااااااان واحد من جدودنا جه من حضرموت اسمه ( باصفار)..
|
اها خمى وصرى...........................
شوفى البيلفح منو...؟
| |
|
|
|
|
|
|
|
|
|
Re: ماهو مصير أملاكنا فى ( جزيرة سواكن ) الأثرية......؟؟؟ (Re: AMNA MUKHTAR)
|
!!!!!!!!!!!!!!!!!!!
كدى دقيقة يا ناس معليش ..أسمحوا لى افطكم كلكم..
وأشوف مستر اى ( الشايقى الكونامى ) ده طلع قريبنا من وين؟؟؟
مستر اى ..نحنا عندنا اهل حبوبة أبوى ( آمنة الحلنقية)الأنا مسمينى على اسمها
فى كسلا..
ناس التركى وناس لباب ..انت تبع ياتو فيهم ؟
معقولة مستر اى..يطلع قريبى من دون ناس البورد..!!
أمانة السودان ده طلع ضيق ضيق
| |
|
|
|
|
|
|
|
|
|
Re: ماهو مصير أملاكنا فى ( جزيرة سواكن ) الأثرية......؟؟؟ (Re: AMNA MUKHTAR)
|
الاخت العزيزة امنة
السلام عليكم
املاك جدودنا فى سواكن تحتاج لوقفة جماعية حتى يتم استردادها
بعدين شنو يا امنة طلعوك يمنية ؟؟ شئ جميل والله الظاهر الناس دى ما بتعرف اللغة البجاوية
حرف الباء سادتى الكرام يستخدم للنفى وكلمة باشريك هى نفى لصفة غير حميدة كالطمع او ما شابه ذلك
ايضا كلمة باسوقميت تعنى الذى لا يحقر وكثير من الكلمات التى تبدأ بالباء
عذرا امنة احيانا لا استطيع ان اعبر بشكل صحيح لضعفى فى اللغة العربية
انتصار
| |
|
|
|
|
|
|
|
|
|
Re: ماهو مصير أملاكنا فى ( جزيرة سواكن ) الأثرية......؟؟؟ (Re: Adil Osman)
|
---------------------
بختك يا امنة الانترنت جاب خيرو وطلعت قريبة قريبنا الحبشى وطبعا خاصة ناس الشرق كلما رجعت فى انسابهم الى الوراء اى اثنين جد تجدهم يتلاقو مع اطراف اخرى فى قبائل اخرى طبعا دا كلوا عشان شبكة جدتك مع الحبشى
........................
نكتة قديمة قالوا فى واحد بلدينا راكب حافلة مع جماعة فسالوه انت اسمك مين قال ليهم باشريك الجماعة عاينو لى بعض وفكوها ضحك وبلدينا عرف هم قاصدين شنو فقال ليهم ليه تضحكوا ايوه اسمى باشريك وكمان عبد يمانية .
.....................
| |
|
|
|
|
|
|
| |
AMNA MUKHTAR
Saifeldin Gibreel
ود محجوب
شهاب الفاتح عثمان
هاشم نوريت
Adil Osman
Tragie Mustafa
Mohamed E. Seliaman
tmbis
مجاهد عبد الرحمن
Hussein Mallasi
abubakr
انتصار محمد صالخ بشير
فيس بوك
تويتر
انستقرام
يوتيوب
بنتيريست